1. Иса Мәсиһ шаҝирдләринә һансы әмри вермишди? (Үз габығындакы шәклә бахын.)

ИСА МӘСИҺ едамындан өнҹә шаҝирдләринә ајдын бир әмр вермишди: «Бир-биринизи мән сизи севдијим кими севин». Сонра сөзүнә әлавә едиб демишди: «Аранызда мәһәббәт олса, һамы биләҹәк ки, сиз мәним шаҝирдимсиниз» (Јәһ. 13:34, 35).

2. Бир-биримизә мәһәббәт ҝөстәрмәк нәјә ҝөрә ваҹибдир?

² Иса демишди ки, бир-биримизи онун бизи севдији кими севсәк, һамы ајдын ҝөрәҹәк ки, онун давамчыларыјыг. Бу, биринҹи әсрдә дә белә олуб, бу ҝүн дә беләдир. Она ҝөрә дә чох ваҹибдир ки, истәнилән чәтинликләри ашыб бир-биримизә мәһәббәт ҝөстәрәк!

3. Бу мәгаләдән нә өјрәнәҹәјик?

³ Гејри-камил олмағымыз бир-биримизи һәрарәтлә севмәјимизә мане олур. Буна бахмајараг, Мәсиһдән нүмунә ҝөтүрмәјә чалышмалыјыг. Бу мәгаләдән мәһәббәтин сүлһә ҹан атмағымыза, ајры-сечкилик етмәмәјимизә вә гонагпәрвәр олмағымыза неҹә көмәк етдијини өјрәнәҹәјик. Мәгаләни арашдырдыгҹа өзүнүзә нөвбәти суалы верин: «Чәтинликләрә рәғмән, бир-биринә мәһәббәт ҝөстәрмәјә давам едән баҹы-гардашлардан нә өјрәнә биләрәм?»

4. Мәтта 5:23, 24 ајәләринә әсасән, нәјә ҝөрә биздән инҹијән диндашымызла сүлһ јаратмаға чалышмалыјыг?

⁴ Иса Мәсиһ биздән инҹијән диндашымызла сүлһ јаратмағын ваҹиблијини вурғуламышды. (Мәтта 5:23, 24 ајәләрини охујун.) Билдирмишди ки, Јеһованы разы салмаг истәјириксә, башгалары илә јахшы мүнасибәтдә олмалыјыг. Әлимиздән ҝәлән гәдәр башгалары илә сүлһ јаратмаға чалышанда Јеһованын  гәлбини шад едирик. Јох әҝәр кин сахлајыб, мүнасибәтләри дүзәлтмәјә чалышмасаг, Јеһова ибадәтимизи гәбул етмәјәҹәк (1 Јәһ. 4:20).

5. Нәјә ҝөрә Марк гардаша сүлһ јаратмаг чәтин иди?

⁵ Бәзән сүлһ јаратмаг чәтин ола биләр. Нәјә ҝөрә? Марк * адлы бир гардашын башына ҝәләнләрә нәзәр салаг. Бир гардаш ону тәнгид етмиш вә јығынҹагдакыларын јанында писләмишди. Бәс Марк нә етди? О хатырлајыр: «Һирсими боға билмәјиб өзүмдән чыхдым». Амма сонра Марк бу һәрәкәтинә ҝөрә пешман олду вә гардашдан үзр истәјиб мүнасибәтләри бәрпа етмәјә чалышды. Лакин һәмин гардаш Маркла барышмаг истәмәди. Әввәл-әввәл Марк дүшүнүрдү: «О, барышмаг истәмирсә, мән нијә барышмаға ҹан атмалыјам?» Лакин рајон нәзарәтчиси она тәслим олмамағы мәсләһәт ҝөрдү. Марк нә етди?

6. а) Марк сүлһ јаратмаг үчүн нә етмишди? б) Марк Колослулара 3:13, 14 ајәләрини неҹә тәтбиг едир?

⁶ Марк мәсәләјә мүнасибәтини ҝөтүр-гој едәндә баша дүшдү ки, онда тәвазөкарлыг чатышмыр, өзүнү башгаларындан үстүн сајыр. Ҝөрдү ки, дүшүнҹә тәрзини дәјишмәлидир (Кол. 3:8, 9, 12). О, тәвазөкарлыг ҝөстәриб јенидән һәмин гардаша јахынлашды вә һәрәкәтинә ҝөрә бир даһа үзр истәди. Һәмчинин гардаша мәктуб јазыб нә гәдәр пешман олдуғуну вә һәр шеји јенидән башламаг истәдијини гејд етди. Һәтта гардаша онун хошуна ҝәләҹәк кичик бир һәдијјә дә бағышлады. Амма әфсуслар олсун ки, гардаш һәлә дә аҹыглы иди вә Маркы бағышламаг истәмирди. Буна рәғмән, Марк Исанын әмринә итаәт етмәјә давам едәрәк гардашына севҝи ҝөстәрир вә ону бағышлајырды. (Колослулара 3:13, 14 ајәләрини охујун.) Гаршы тәрәф сүлһ јаратмаг ҹәһдләримизә һај вермәсә дә, әсл мәсиһи мәһәббәти сајәсиндә ону бағышлаја вә  мүнасибәтләрин дүзәлмәси үчүн дуа едә биләрик (Мәт. 18:21, 22; Гал. 6:9).

7. а) Иса Мәсиһ бизә нә етмәји бујуруб? б) Бир баҹы һансы вәзијјәтлә үзләшмишди?

⁷ Иса Мәсиһ бујурмушду ки, инсанларын бизимлә неҹә рәфтар етмәсини истәјириксә, онларла о ҹүр рәфтар едәк. Һәмчинин демишди ки, тәкҹә бизи севәнләри севмәјәк (Лука 6:31—33). Бәс әҝәр јығынҹагдан кимсә биздән ҝен ҝәзир вә бизимлә саламлашмаг истәмирсә, онда неҹә? Надир һалларда олса да, бу кими шејләр баш верә биләр. Лара адлы баҹы мәһз белә бир вәзијјәтлә үзләшмишди. О дејир: «Бир баҹы мәнимлә сојуг давранырды, һеч билмирдим нәјә ҝөрә. Ҝәрҝинлик кечирирдим, јығынҹаға һәвәссиз ҝедирдим». Лара әввәл-әввәл белә дүшүнүрдү: «Мәним һеч бир ҝүнаһым јохдур. Онсуз да, бу баҹынын гәрибә олдуғуну јығынҹагдакылар да билир».

8. Лара сүлһ јаратмаг үчүн нә етди вә ондан нә өјрәнә биләрик?

⁸ Лара сүлһ јаратмаг үчүн тәдбир ҝөрдү. О, Јеһоваја дуа етди вә баҹы илә данышмаг гәрарына ҝәлди. Онлар мәсәләни ајдынлашдырдылар вә гуҹаглашыб барышдылар. Елә бил һәр шеј дүзәлмишди. Лара дејир: «Бир мүддәт сонра баҹы јенә әввәлки кими давранмаға башлады. Әлим-голум јаныма дүшдү». Лара дүшүнүрдү ки, баҹынын она мүнасибәти дәјишмәсә, о, севинҹ дуја билмәјәҹәк. Амма сонра баша дүшдү ки, ән јахшысы баҹы илә бундан сонра да мәһәббәтлә давранмаг вә ону «үрәкдән бағышла»магдыр (Ефес. 4:32—5:2). О хатырлады ки, әсл мәсиһи мәһәббәти «она едилән пислијин һесабыны тутмур. Һәр шејә гатлашыр, һәр шејә инаныр, һәр шејә үмид едир, һәр шејә дөзүр» (1 Кор. 13:5, 7). Бундан сонра Лара бу мәсәләјә ҝөрә нараһат олмады. Заманла баҹынын она мүнасибәти јахшылашды. Баҹы-гардашларла сүлһдә олмаға ҹан атырсынызса вә онлары севмәјә давам едирсинизсә, әмин ола биләрсиниз ки, «мәһәббәт вә сүлһ Аллаһы сизинлә олаҹаг» (2 Кор. 13:11).

9. Һәвариләрин ишләри 10:34, 35 ајәләринә әсасән, нәјә ҝөрә ајры-сечкилик етмәмәлијик?

⁹ Јеһова ајры-сечкилик етмәјән Аллаһдыр. (Һәвариләрин ишләри 10:34, 35 ајәләрини охујун.) Биз дә ајры-сечкилик етмәмәклә Онун өвладлары олдуғумузу ҝөстәририк. Биз «башгасыны өзүнү севдијин кими сев» әмринә итаәт едирик вә руһани аиләмиздәки сүлһү горујуруг (Ром. 12:9, 10; Јаг. 2:8, 9).

10, 11. Бир баҹы мәнфи фикирләрини неҹә дәф етди?

¹⁰ Бәзиләринә ајры-сечкилик етмәмәк о гәдәр дә асан дејил. Мәсәлән, Рут адлы бир баҹынын белә бир проблеми вар иди. Јенијетмә јашларында оланда башга өлкәдән олан бир нәфәр Рутун аиләсинә бөјүк пислик етмишди. Рут бу һадисәнин она неҹә пис тәсир етмәси һагда дејир: «Һәмин өлкә илә бағлы һәр шејә нифрәт едирдим. Фикирләширдим ки, орадан олан һамы ејнидир, һәтта баҹы-гардашлар да». Бәс Рут бу мәнфи фикирләрини неҹә дәф етди?

¹¹ О баша дүшүрдү ки, бу фикирләрлә мүбаризә апармалыдыр. Рут «Иллик фәалијјәт» китабындан һәмин өлкәдә јашајан баҹы-гардашларын хидмәти, әлдә етдикләри наилијјәтләр һагда охуду. О дејир: «Һәмин өлкәдән олан инсанлар һагда мүсбәт дүшүнмәјә чалышырдым. Фикир вердим ки, орадакы баҹы-гардашлар Јеһованын јолунда ҹан гојур. Беләҹә, онларын да үмумдүнја гардашлығын бир парчасы олдуғуну дәрк етдим». Тәдриҹән Рут онлара мәһәббәт ҝөстәрмәли олдуғуну анлады. О дејир: «Һәмин өлкәдән олан баҹы-гардашлара нә вахт раст ҝәлирдимсә, онлара гаршы меһрибан олмаг үчүн әлимдән ҝәләни едирдим. Сөһбәт етдикҹә онлары даһа јахшы таныдым». Бу, һансы нәтиҹәни верди? Рут дејир: «Вахт кечдикҹә онларла бағлы мәнфи дүшүнҹәләрим јоха чыхды».

12. Сара адлы бир баҹынын һансы саһәдә проблеми вар иди?

¹² Бәзиләри өзләри дә фәргинә вармадан ајры-сечкилик едә биләр. Мәсәлән, Сара инсана мадди дуруму, миллијјәти, јахуд тәшкилатдакы мәсулијјәти әсасында гијмәт вермәдијинә ҝөрә дүшүнүрдү ки, ајры-сечкилик етмәјән биридир. О дејир: «Амма ҝөрдүм ки, әслиндә, ајры-сечкилик едирәммиш». Неҹә? Зијалы аиләдә бөјүдүјү үчүн Сара бу ҹүр инсанларла отуруб-дурмаға үстүнлүк верирди. Һәтта бир дәфә достуна демишди: «Тәһсилли баҹы-гардашларла отуруб-дурурам, о бириләриндән ҝен ҝәзирәм». Ајдындыр ки, Сара дүшүнҹәсини дәјишмәли иди. Неҹә?

13. Сара дүшүнҹә тәрзини неҹә дәјишди вә биз бундан нә өјрәнирик?

¹³ Бир рајон нәзарәтчиси Сара баҹыја дүшүнҹә тәрзини јохламаға көмәк етди. Баҹы дејир: «О мәни сәдагәтлә хидмәт етдијимә, јахшы шәрһләр вердијимә вә Мүгәддәс Китабы јахшы билдијимә ҝөрә тәрифләди. Сонра изаһ етди ки, билијимиз артдыгҹа тәвазөкарлыг, һәлимлик вә мәрһәмәт кими хүсусијјәтләримиз дә инкишаф етмәлидир». Сара рајон нәзарәтчисинин мәсләһәтинә гула асды. О дејир: «Анладым ки, өнәмли олан хејирхаһ вә мәһәббәтли олмагдыр». Беләҹә, Сара диндашларына бахышыны дәјишмәјә башлады. Буну неҹә етдији барәдә дејир: «Јеһованын онларда бәјәндији хүсусијјәтләри ҝөрмәјә чалышырдым». Бәс бизим барәдә нә демәк олар? Һеч вахт истәмәздик ки, тәһсилли олдуғумуза ҝөрә башгаларына јухарыдан ашағы бахаг! Бүтүн гардашлығы һәрарәтлә севсәк, ајры-сечкилик етмәјәҹәјик (1 Бут. 2:17).

14. Ибраниләрә 13:16 ајәсинә әсасән, Јеһова башгаларына гонагпәрвәрлик ҝөстәрмәјимизә неҹә јанашыр?

¹⁴ Гонагпәрвәрлик Јеһова үчүн чох  өнәмлидир. (Ибраниләрә 13:16 ајәсини охујун.) Онун үчүн бу, ибадәтимизин бир һиссәсидир, хүсусилә дә еһтијаҹы оланлара гонагпәрвәрлик ҝөстәрмәјимиз (Јаг. 1:27; 2:14—17). Одур ки, Мүгәддәс Китаб бизи «гонагпәрвәр олун» дејә сәсләјир (Ром. 12:13). Гонагпәрвәрлијимиз баҹы-гардашларымызын бизим үчүн дәјәрли олдуғуну, онлары севдијимизи вә онларла јахын олмаг истәдијимизи ҝөстәрир. Кичик бир сүфрә ачмағымыз, кимисә чаја дәвәт етмәјимиз, кимисә јемәјә гонаг чағырмағымыз, үмумијјәтлә вахт ајырыб диггәт ҝөстәрмәјимиз Јеһованын көнлүнү хош едир (1 Бут. 4:8—10). Амма гонагпәрвәрлик ҝөстәрмәјимизә мане олан амилләр ола биләр.

15, 16. а) Бәзиләринә гонагпәрвәрлик ҝөстәрмәјә нә мане ола биләр? б) Едит баҹыја гонагпәрвәр олмаға нә көмәк етди?

¹⁵ Мүәјјән сәбәбләр гонагпәрвәрлик ҝөстәрмәјимизә мане ола биләр. Едит адлы дул баҹынын һадисәсинә нәзәр салаг. Јеһованын Шаһиди олмаздан өнҹә о, инсанларла мәсафә сахламаға чалышырды. Дүшүнүрдү ки, гонагпәрвәрлик ҝөстәрмәк башгаларында даһа јахшы алынар.

¹⁶ Јеһованын Шаһиди олдугдан сонра Едит дүшүнҹә тәрзини дәјишди. О, гонагпәрвәрлик ҝөстәрмәк үчүн мүәјјән аддымлар атды. Едит дејир: «Ибадәт евимиз тикиләндә ағсаггал мәндән тикинтијә көмәк етмәјә ҝәлән бир ҹүтлүјү ики һәфтәлик евимдә гонаг етмәји хаһиш етди. Мән Јеһованын сарфатлы дул гадына неҹә бәрәкәт вердијини хатырладым» (1 Пад. 17:12—16). Едит евинин гапысыны бу әр-арвада ачды. Бәс о, һансы немәтләр алды? Баҹы дејир: «Чох шадам ки, онлар ики һәфтә јох, ики ај галдылар. Бу вахт әрзиндә јахын достлуг мүнасибәтләримиз јаранды». Едит һәмчинин јығынҹагдан да өзүнә јахын достлар газанды. Һал-һазырда о, өнҹүлдүр вә хидмәтдә әмәкдашлыг етдији баҹы-гардашлары гонаг чағырмағы чох севир. Баҹы дејир: «Башгалары үчүн нәсә етмәк мәнә севинҹ бәхш едир.  Үстәлик, бунун гаршылығында чохлу немәтләр алырам!» (Ибр. 13:1, 2).

17. Лука илә һәјат јолдашы нәји анлады?

¹⁷ Ола билсин, гонагпәрвәрсиниз. Амма неҹә дүшүнүрсүнүз, бу саһәдә даһа да инкишаф едә биләрсиниз? Мисал үчүн, Лука вә һәјат јолдашы гонагпәрвәр ҹүтлүкдүр. Онлар һәмишә өз валидејнләрини, гоһумларыны, јахын достларыны вә рајон нәзарәтчиси илә јолдашыны евләринә гонаг чағырырдылар. Бунунла белә, Лука дејир: «Фикир вердик ки, анҹаг бизә јахын олан кәсләри гонаг чағырырыг». Лука илә һәјат јолдашы гонагпәрвәрлик ҝөстәрмәк саһәсиндә неҹә инкишаф етди?

18. Лука илә һәјат јолдашы гонагпәрвәрлик ҝөстәрмәк саһәсиндә неҹә инкишаф етди?

¹⁸ Лука вә һәјат јолдашы Мәсиһин нөвбәти сөзләри үзәриндә дүшүндүкдән сонра гонагпәрвәрлијин әслиндә нә олдуғуну анладылар. Иса Мәсиһ демишди: «Әҝәр тәкҹә сизи севәнләри севирсинизсә, бундан нә фајда?» (Мәт. 5:45—47). Онлар һәр кәсә гаршы сәхавәтли олан Јеһованын нүмунәсини изләмәли олдугларыны анладылар. Одур ки, әввәлләр гонаг чағырмадыглары баҹы-гардашлары евләринә дәвәт етмәк гәрарына ҝәлдиләр. Лука дејир: «Бирҝә кечирдијимиз вахтлардан һамымыз зөвг алырыг. Һәр кәс руһланыр, Јеһова илә вә бир-биримизлә мүнасибәтләримиз мөһкәмләнир».

19. Исанын шаҝирди олдуғумузу неҹә ҝөстәририк вә сиз нәјә гәтијјәтлисиниз?

¹⁹ Мәгалә боју арашдырдыг ки, бир-биримизи һәрарәтлә севмәк сүлһә ҹан атмагда, ајры-сечкилик етмәмәкдә вә гонагпәрвәр олмагда бизә көмәк едә биләр. Истәнилән мәнфи фикирләрин өһдәсиндән ҝәлмәли вә диндашларымызы сәмими-гәлбдән, һәрарәтлә севмәлијик. Онда севинҹ дујаҹаг вә Исанын шаҝирди олдуғумузу сүбут едәҹәјик (Јәһ. 13:17, 35).