Жак вә Марилин 1988-ҹи илдән бәри тамвахтлы хидмәтдәдирләр. Мүхтәлиф вәзијјәтләрә ујғунлашмағы баҹаран бу әр-арвад Гваделупа вә Франса Гвианасында бир чох тәјинатларда хидмәт едибләр. Бу ики әрази һал-һазырда Франса филиалынын нәздиндәдир. Ҝәлин онлардан мүсаһибә ҝөтүрәк.

Тамвахтлы хидмәтә башламаға сизи нә тәшвиг едиб?

Марилин: Ушаглығым Гваделупада кечиб. Тез-тез анамла сәһәрдән ахшама кими тәблиғ едирдик. Анам хидмәтдә чох фәал иди. Инсанлары севирәм, буна ҝөрә дә 1985-ҹи илдә мәктәби битирәр-битирмәз өнҹүл хидмәтинә башладым.

Жак: Ҝәнҹлик илләрим тәблиғ етмәји севән тамвахтлы хидмәтчиләрин арасында кечиб. Мәктәб тәтилләриндә көмәкчи өнҹүл кими хидмәт едирдим. Бәзән һәфтәсонлары автобусла өнҹүл баҹы-гардашларын хидмәт етдији әразијә јолланырдыг. Бүтүн ҝүнү тәблиғ едиб, сонра да чимәрлијә үз тутурдуг. Чох ҝөзәл ҝүнләр иди!

Марилинлә аилә гурандан гыса мүддәт сонра, 1988-ҹи илдә өз-өзүмә дедим: «Үзәримиздә һеч бир өһдәчилик јохдур, нијә дә даһа чох хидмәт етмәјәк?» Мән дә Марилинә гошулуб өнҹүллүјә башладым. Бир ил сонра өнҹүл мәктәбини кечдик вә хүсуси өнҹүл тәјин олундуг. Гваделупада бир нечә тәјинатда хидмәт етдикдән сонра бизә Франса Гвианасына көчмәји тәклиф етдиләр.

Илләр әрзиндә тәјинатларыныз тез-тез дәјишиб. Мүхтәлиф вәзијјәтләрә ујғунлашмаға сизә нә көмәк едиб? 

Марилин: Франса Гвианасындакы Бејтелдә хидмәт едән гардашлар билирдиләр ки, Әшија 6:8 ајәси севимли ајәмиздир. Она ҝөрә дә чох вахт бизә зәнҝ едәндә зарафатјана сорушурдулар: «Севимли ајәниз јадыныздадыр?» О саат баша дүшүрдүк ки, тәјинатымыз дәјишиләҹәк. Биз дә дејирдик: «Биз ҝәдәрик! Бизи ҝөндәр!»

 Чалышырыг јени тәјинатымызы кечмиш тәјинатларымызла мүгајисә етмәјәк, јохса хидмәтдән севинҹ дуја билмәрик. Һәмчинин баҹы-гардашлары јахындан танымаға, онларла дост олмаға чалышырыг.

Жак: Бәзән достларымыз бизи дилә тутурдулар ки, башга әразијә көчмәјәк, онларын јанында галаг. Лакин Гваделупадан көчәндә бир гардаш Иса Мәсиһин Мәтта 13:38 ајәсиндәки сөзләрини јадымыза салды: «Тарла дүнјадыр». Одур ки, тәјинатымыз дәјишәндә өзүмүзә хатырладырыг ки, һара көчмәјимиздән асылы олмајараг, ејни «тарлада» хидмәт едирик. Әсас әрази вә инсанлар олсун!

Һәр дәфә јени әразијә көчәндә ҝөрүрүк ки, јерли әһали өзүнә ҝөрә хошбәхт јашајыр. Одур ки, биз дә онлар кими јашамаға чалышырыг. Һәрдән јемәкләри бизимкиндән фәргләнир, амма биз дә онларын једијини јејир, ичдијини ичирик, тәбии ки, бәзи ҝиҝијена гајдаларыны нәзәрә алараг. Һәмишә чалышырыг ки, бүтүн тәјинатларымыз барәдә мүсбәт данышаг.

Марилин: Јерли баҹы-гардашлардан да чох шеј өјрәнирик. Франса Гвианасына илк ҝәлишимиз јадымдадыр. Ҝүҹлү јағыш јағырды. Дүшүнүрдүм ки, јағыш кәсәндән сонра хидмәтә чыхарыг. Амма баҹы мәнә деди: «Ҝетдик?» Тәәҹҹүблә сорушдум: «Неҹә?» О деди: «Чәтирини ҝөтүр, велосипедлә ҝедирик». Беләҹә, бир әлимдә чәтирлә велосипед сүрмәји өјрәндим. Буну өјрәнмәсәјдим, јағыш мөвсүмүндә һеч вахт тәблиғ едә билмәздим!

Тәхминән 15 дәфә көчмүсүнүз. Көчмәклә бағлы башгаларына һансы мәсләһәти верәрдиниз?

Марилин: Көчмәк асан дејил. Галмаға елә јер тапмалысан ки, хидмәтдән гајыданда өзүнү евиндәки кими һисс едә биләсән.

Жак: Һансы евә көчүрүксә диварлары бојајырам. Бәзән филиалдакы гардашлар јени әразидә чох галмајаҹағымызы биләндә зарафатјана дејирләр: «Жак, бу дәфә өзүнү әзијјәтә салыб диварлары бојама!»

Марилин габлашдырма ишиндә пешәкардыр! О, һәр шеји гутулара гојуб үстүндә «ванна отағы», «јатаг отағы», «мәтбәх» вә бу кими јазылар јапышдырыр. Беләҹә, јени евә чатанда асанлыгла гутулары лазыми отаглара јерләшдиририк. О, һәр гутунун ичинә нә гојдуғуну  сијаһыја алыр вә нә исә лазым оланда тез тапырыг.

Марилин: Низамлы олмағы өјрәнмишик, буна ҝөрә дә дәрһал хидмәтә башлаја билирик.

Хидмәтинизи там јеринә јетирә билмәк үчүн вахтынызы неҹә бөлүшдүрүрсүнүз? (2 Тим. 4:5).

Марилин: Базар ертәси динҹәлирик вә јығынҹаглара һазырлашырыг. Чәршәнбә ахшамындан етибарән исә хидмәтдә олуруг.

Жак: Дүздүр, һәр ај мүәјјән саат нормасы вермәлијик, амма диггәтимизи буна ҹәмләмирик. Тәблиғ бизим үчүн һәр шејдән ваҹибдир. Евдән чыхандан гајыдана гәдәр растлашдығымыз һамыја тәблиғ етмәјә чалышырыг.

Марилин: Мисал үчүн, пикникә ҝедәндә һәмишә өзүмлә буклет ҝөтүрүрәм. Бәзиләри јахынлашыб нәшр истәјир, һалбуки онлара Јеһованын Шаһиди олдуғумузу демәмишик. Буна ҝөрә дә ҝејимимизә вә давранышымыза һәмишә фикир веририк. Бу шејләр инсанларын диггәтиндән јајынмыр.

Жак: Һәмчинин јахшы гоншу олмагла да шаһидлик веририк. Јерә дүшән кағызлары јығыб зибилә атырам, бағчадакы јарпаглары тәмизләјирәм. Гоншуларымыз бунлара фикир верир вә бәзән ҝәлиб дејирләр: «Мәнә Мүгәддәс Китаб верә биләрсән?»

Уҹгар әразиләрдә чох хидмәт етмисиниз. Бу сәфәрләрдән хүсусилә јадынызда нә галыб?

Жак: Гвиананын бәзи әразиләринә ҝедиб чыхмаг чәтиндир. Чох вахт бир һәфтә боју чәтин јоллардан кечиб 600 километр јол гәт етмәли олурдуг. Амазон мешәсиндә Сент-Ели кәндинә сәфәримиз хүсусилә јадда галан олуб. Јолсузлуг автомобилләри вә сүрәт гајығы илә бир нечә саат јол ҝетмишдик. Бурада јашајанларын чоху гызылахтаранлар иди. Вердијимиз нәшрләрә ҝөрә бизә кичик гызыл парчалары ианә етмишдиләр. Ахшам тәшкилатымызын видеоларындан бирини ҝөстәрмишдик. Чох адам ҝәлмишди.

Марилин: Жакдан бу јахынларда Камопи кәндиндә анма мәрасими мәрузәси сөјләмәји хаһиш етдиләр. Камопијә ҝетмәк үчүн Ојапоки чајында моторлу гајыгла дөрд саат јол ҝетдик. Бу, мөһтәшәм сәфәр иди.

Жак: Чајын дајаз олдуғу јерләрдә ахын тәһлүкәли ола биләр. Инандырым сизи ки, гајығын һәмин јерләрә јахынлашдығыны ҝөрмәк бир башга һиссдир. Гајыгчы белә вәзијјәтләрдән чыхмағы јахшы баҹармалыдыр. Бу, чох ҝөзәл сәфәр иди. Орада ҹәми 6 Јеһованын Шаһиди олса да, анма мәрасиминдә иштирак едәнләрин сајы тәхминән 50 нәфәрә чатырды. Араларында Америка һиндиләри дә вар иди!

Марилин: Јеһоваја даһа чох хидмәт етмәк истәјән ҝәнҹләри бах белә мараглы һәјат ҝөзләјир. Белә вәзијјәтләрдә Јеһоваја етибар етмәлисиниз, онда иманыныз мөһкәмләнәҹәк. Биз һәмишә Јеһованын дәстәјини ҝөрүрүк.

Бир нечә дил өјрәнмисиниз. Дил өјрәнмәк сизин үчүн асандыр?

Жак: Демәздим. Бу дилләри лазым олдуғу үчүн өјрәнмишәм. Сранан-тонго * дилиндә бир дәфә дә олсун Мүгәддәс Китаб гираәтини етмәдијим һалда, «Ҝөзәтчи гүлләси»нин мүзакирәсини апармалы идим! Ҝөрүшүн ахырында бир гардашдан мәни баша дүшүб-дүшмәдијини сорушдум. О деди: «Бәзи сөзләри баша дүшмүрдүк, амма үмумиликдә јахшы иди». Ушагларын бөјүк көмәји дәјди. Нәјисә сәһв дејәндә бөјүкләр һеч нә демәсә дә, ушаглар дејирди. Онлардан чох шеј өјрәндим.

Марилин: Бир әразидә франсыз, португал вә сранан-тонго дилиндә Мүгәддәс Китаб дәрсләри кечирдим. Бир баҹы мәсләһәт ҝөрдү ки, мәнә чәтин ҝәлән дилдән — португал дилиндән башлајым, јахшы билдијим дили исә ахыра сахлајым. Бир мүддәт сонра бунун нә гәдәр ағыллы мәсләһәт олдуғуну ҝөрдүм.

Бир ҝүн сранан-тонго дилиндә, сонра исә португал дилиндә Мүгәддәс Китаб дәрси кечәҹәкдим.  Икинҹи дәрси кечмәјә башлајанда баҹы мәнә деди: «Марилин, дејәсән, нәсә дүз ҝетмир!» Бир дә ајылдым ки, бразилијалы гадына португал дилинин јеринә сранан-тонго дилиндә дәрс кечирәм!

Ҝетдијиниз һәр јердә чох севилирсиниз. Билмәк олар баҹы-гардашларын мәһәббәтини неҹә газана билмисиниз?

Жак: Мәсәлләр 11:25 ајәсиндә дејилир: «Сәхавәтли боллуға јетишәр». Вахтымызы башгаларына сәрф етмәјә тәрәддүд етмирик. Ибадәт евинин тәмири илә бағлы бәзиләри мәнә демишди: «Гој бу иши тәблиғчиләр ҝөрсүн». Амма мән демишдим: «Мән дә бир тәблиғчи. Әҝәр ҝөрүләси иш варса, мән дә орада олмаг истәјирәм». Дүздүр, һәр биримиз бәзән өзүмүзә вахт ајырмалыјыг, амма истәмәздик ки, бу, башгаларына јахшылыг етмәјимизә мане олсун.

Марилин: Баҹы-гардашларла јахындан марагланмаға чалышырыг. Беләҹә, киминсә ушағына бахмаг, јахуд мәктәбдән ҝөтүрмәк лазым ҝәләндә хәбәримиз олур. Ишимизи елә гуруруг ки, көмәк әли узада биләк. Еһтијаҹ олан заман әлчатан олмағымыз арамыздакы мүнасибәтләри мөһкәмләндирир.

Тәблиғчиләрә тәләбат олан әразидә хидмәт етмәк сизә һансы немәтләри бәхш едиб?

Жак: Тамвахтлы хидмәт һәјатымызы зәнҝинләшдириб. Чох вахт тәбиәт гојнунда олур, Јеһованын јаратдыгларындан һәзз алырыг. Чәтинликләримиз олса да, үрәјимиз архајындыр. Чүнки һарада олмағымыздан асылы олмајараг Јеһованын халгынын бизә дајаг олаҹағыны билирик.

Ҝәнҹ вахты Франса Гвианасында мәсиһи битәрәфлијимә ҝөрә һәбс олунмушдум. Һеч ағлыма да ҝәлмәзди ки, бир ҝүн бура хүсуси тәјинатлы мүждәчи кими гајыдарам, үстәлик, мәнә дини хидмәтчи кими мәһбусларла сөһбәт етмәјә иҹазә вериләр. Доғрудан да, Јеһова бол-бол немәтләр верир!

Марилин: Мәнә ән чох севинҹ бәхш едән башгаларына хидмәт етмәкдир. Јеһоваја хидмәт етдијимизә ҝөрә чох хошбәхтик. Бунун сајәсиндә бир-биримизә даһа да јахын олмушуг. Бәзән Жак мәнә руһланмаға еһтијаҹы олан бир аиләни јемәјә дәвәт етмәји тәклиф едир. Чох вахт дејирәм: «Елә мән дә бу һагда дүшүнүрдүм!» Тез-тез олур ки, икимиз дә ејни шеји фикирләширик.

Жак: Бу јахынларда мәнә простат вәзи хәрчәнҝи диагнозу гојулуб. Марилинин хошуна ҝәлмәсә дә, һәрдән она дејирәм: «Әзизим, дүздүр, һәлә гоҹалмамышам, амма һәтта сабаһ өлсәм белә, һәјатдан дојмуш һалда өләҹәјәм. Чүнки һәјатымы руһани ишләрә, дәјәрли шејләрә һәср едәрәк јашамышам» (Јар. 25:8).

Марилин: Јеһова гаршымызда ағлымыза белә ҝәлмәјән гапылар ачды, тәсәввүр белә етмәдијимиз ишләр һәвалә етди. Һәгигәтән дә, һәјатымыз јахшы шејләрлә зәнҝиндир. Аллаһа там бел бағлајырыг, буна ҝөрә дә Онун тәшкилаты бизи һара ҝөндәрсә, ора да ҝедәҹәјик!