1, 2. Јеһованын Шаһидләри һансы чәтинликләрлә үзләшир?

ҺӘВАРИ БУЛУС Тимутини вә онун симасында бүтүн мәсиһиләри хидмәтләрини там шәкилдә јеринә јетирмәјә тәшвиг етмишди (2 Тим. 4:5). Һәр биримиз Булусун бу мәсләһәтинә әмәл етмәјә чалышырыг. Амма тәбии ки, бу, елә дә асан дејил. Бир чох баҹы-гардашымыза тәблиғ ишиндә иштирак етмәк үчүн бөјүк ҹәсарәт лазымдыр (2 Тим. 4:2). Мәсәлән, бәзиләри фәалијјәтимизә мәһдудијјәт гојулдуғу вә ја гадаған олундуғу әразиләрдә јашајыр. Онлар азадлыгдан мәһрум олмағы ҝөзә алыб тәблиғ ишиндә иштирак едирләр!

² Јеһованын халгы мүхтәлиф проблемләрлә үзләшир вә бу онлары руһдан сала биләр. Мәсәлән, чохлары аиләләринин ән зәрури тәләбатларыны өдәмәк үчүн ҝеҹә-ҝүндүз ишләмәли олур. Әлбәттә ки, онлар чох хидмәт етмәк истәјәрдиләр, амма һәфтәнин сонунда артыг ҝүҹләри түкәнмиш олур. Бир башгаларынын хроники хәстәлик вә ја јашлылыг әл-голуну бағлајыб. Онларын арасында һәтта еләләри вар ки, һеч евдән чөлә чыха билмир. Бу баҹы-гардашлар хидмәтдә чох аз иштирак едә билир. Диҝәрләри исә даима дәјәрсизлик һиссиндән әзијјәт чәкир. Јахын Шәргдә јашајан Мери * адлы баҹы дејир: «Бәдбин фикирләри дәф етмәк үчүн о гәдәр әлләшиб-вурушурам ки, мәнәви ҹәһәтдән ҝүҹүм галмыр. Сонра да өзүмү гынајырам ки, нијә вахтымы вә ҝүҹүмү хидмәтә сәрф етмәдим, һәдәр етдим».

3. Бу мәгаләдә нә һагда данышаҹағыг?

³ Һансы чәтинлијимиз олурса олсун, Јеһова бизә ҝүҹ верә биләр ки, шәраитимиз чәрчивәсиндә хидмәтимизи давам етдирәк. Јеһованын буну һансы үсулларла етдијини арашдырмаздан өнҹә, ҝәлин ҝөрәк О, һәвари Булуса вә Тимутијә неҹә көмәк етмишди. Ҝөрәҹәјик ки, Јеһованын вердији ҝүҹ сајәсиндә онлар чәтинликләринә рәғмән, хидмәтләрини там јеринә јетирдиләр.

4. Һәвари Булусун һансы чәтинликләри вар иди?

⁴ Һәвари Булусун үзләшдији чәтинликләрин сајы-һесабы јох иди. Бунлара синә ҝәрмәк үчүн онун Јеһованын көмәјинә еһтијаҹы вар иди. Мәсәлән, о, дүшмәнләри тәрәфиндән дөјүлмүш, даша басылмыш вә һәбс олунмушду (2 Кор. 11:23—25). Булус вахташыры бәдбин фикирләрлә мүбаризә апардығыны өз дили илә демишди (Ром. 7:18, 19, 24). Һәмчинин о, ҹисминә бир тикан кими батырылан һансыса хәстәликлә мүбаризә апарырды. Бу бәладан гуртулмаг үчүн о, дөнә-дөнә Аллаһа јалвармышды (2 Кор. 12:7, 8).

5. Булус үзләшдији чәтинликләрә бахмајараг, һансы ишләри ҝөрмүшдү?

⁵ Бүтүн бу чәтинликләрә бахмајараг, Булус Јеһованын вердији ҝүҹ сајәсиндә хидмәтини давам етдирә билмишди. Ҝөрүн о, һансы ишләри ҝөрүб. Мәсәлән, Булус Ромада ев дустағы оларкән јәһуди рәһбәрләринин вә ола билсин, дөвләт мәмурларынын гаршысында мүждәни ҹәсарәтлә мүдафиә етмишди (Һәв. 28:17; Филип. 4:21, 22). О һәмчинин Император гвардијасында чохларына тәблиғ етмишди. Еләҹә дә јанына ҝәлән һәр кәсә шаһидлик верирди (Һәв. 28:30, 31; Филип. 1:13). Бу вахт әрзиндә Јеһова мүгәддәс руһу илә Булуса мәктублар јаздырмышды. Бу мәктубларын та о вахтдан бу ҝүнә гәдәр мәсиһиләрә бөјүк фајдасы олуб. Үстәлик, Булусун нүмунәси Ромадакы баҹы-гардашлары мөһкәмләндирмишди, бунун сајәсиндә онлар «Аллаһын сөзүнү ҹәсарәтлә, горхмадан» тәблиғ етмишдиләр (Филип. 1:14). Бахмајараг ки, Булус бәзән истәдији гәдәр хидмәт едә билмирди, амма олдуғу шәраитдә баҹардығыны едирди. Онун башына ҝәләнләр «мүждәнин јајылмасына хидмәт етмишдир» (Филип. 1:12).

6. 2 Коринфлиләрә 12:9, 10 ајәләринә әсасән, Булус нәјин сајәсиндә хидмәтини јеринә јетирә билмишди?

⁶ Булус бүтүн бу ишләри өз ҝүҹүнә јох, Јеһованын ҝүҹү сајәсиндә етдијини баша дүшүрдү. О демишди ки, о, зәиф оланда Аллаһын ҝүҹү «өзүнү бүтүнлүклә ҝөстәрир». (2 Коринфлиләрә 12:9, 10 ајәләрини охујун.) Она ҝөрә дә Булус һәбс олунмасына, тәгиб вә диҝәр чәтинликләрлә үзләшмәсинә бахмајараг, Јеһованын мүгәддәс руһу илә вердији ҝүҹ сајәсиндә хидмәтини там јеринә јетирә билмишди.

7. Хидмәтини јеринә јетирмәјә Тимутијә нәләр мане ола биләрди?

 ⁷ Булусун ҝәнҹ әмәкдашы Тимутинин дә хидмәтини јеринә јетирмәк үчүн Јеһованын ҝүҹүнә еһтијаҹы вар иди. Тимути Булуса узун тәблиғ сәфәрләриндә јол јолдашы олмушду. Һәмчинин Булус ону башга јығынҹаглары да зијарәт едиб руһландырмаға ҝөндәрмишди (1 Кор. 4:17). Бәлкә дә, Тимути өзүнү бу ишә јарарлы санмырды. Јәгин, елә буна ҝөрә Булус она демишди ки, «гој ҝәнҹ олдуғуна ҝөрә һеч кәс сәнә сајмазјана јанашмасын» (1 Тим. 4:12). Үстәлик, һәмин вахтларда Тимутинин дә ҹисминә батырылан тикан вар иди — о, тез-тез нахошлајырды (1 Тим. 5:23). Амма Тимути билирди ки, Јеһова гүдрәтли мүгәддәс руһу илә она көмәк олаҹаг, мүждәни тәблиғ етмәк вә баҹы-гардашлара хидмәт етмәк үчүн она ҝүҹ верәҹәк (2 Тим. 1:7).

8. Јеһова бу ҝүн халгыны неҹә ҝүҹләндирир?

⁸ Бу ҝүн Јеһова халгына «инсан ҝүҹүндән үстүн олан ҝүҹ» верир ки, Она сәдагәтлә хидмәт едә билсинләр (2 Кор. 4:7). Ҝәлин Јеһованын бизә көмәк етмәк үчүн тәгдим етдији дөрд васитәјә нәзәр салаг: дуа, Мүгәддәс Китаб, диндашларымыз вә хидмәтимиз.

9. Дуа бизи неҹә ҝүҹләндирә биләр?

⁹ Дуа васитәсилә. Ефеслиләрә 6:18 ајәсиндә Булус бизи Аллаһа «һәр ан» дуа етмәјә тәшвиг едир. Дуамыза ҹаваб олараг Јеһова бизи ҝүҹләндирәҹәк. Мәсәлән, Боливијада јашајан Ҹани гардаш Јеһованын көмәјини һисс етмишди. Проблемләр бир анда ону ағушуна алмышды: һәјат јолдашы, атасы вә анасы ејни вахтда ҹидди хәстәлијә тутулмушду. Ҹани үчүн үч хәстәјә бахмаг чох ағыр иди. Анасы вәфат етди. Јолдашынын вә атасынын сағалмасы исә хејли вахт чәкди. Ҹани о ҝүнләри хатырлајараг дејир: «Ән дөзүлмәз вахтларда мәнә һәмишә дуада үрәјими ачыб бошалтмаг көмәк едиб». Јеһова Ҹанијә таб ҝәтирә билсин дејә ҝүҹ вермишди. Боливијада ағсаггал кими хидмәт едән Роналдын анасында хәрчәнҝ ашкар олунмушду. Бир ајдан сона анасы вәфа етди. Бу иткијә дөзмәјә она нә көмәк етди? Роналд дејир: «Јеһоваја дуа едәндә үрәјими Она бошалдырам, кечирдијим бүтүн һиссләри данышырам. Билирәм ки, О мәни һамыдан јахшы баша дүшүр, һәтта мәним өзүмдән дә јахшы». Бәзән бизә елә ҝәлир ки, проблемләрин ичиндә боғулуруг, билмирик нә һагда дуа едәк. Һәтта елә олур ки, һиссләримизи, фикирләримизи ифадә етмәјә сөз тапмырыг. Бу һалда белә, Јеһова бизи дуа етмәјә чағырыр (Ром. 8:26, 27).

10. Ибраниләрә 4:12 ајәсинә әсасән, Мүгәддәс Китабы дәриндән мүталиә етмәк нәјә ҝөрә ваҹибдир?

¹⁰ Мүгәддәс Китаб васитәсилә. Булус ҝүҹ вә тәсәлли үчүн Аллаһын Кәламына үз тутурду. Биз дә ҝәрәк белә едәк (Ром. 15:4). Аллаһын Кәламыны дәриндән мүталиә едәндә Јеһова мүгәддәс руһу илә көмәк едә биләр ки, охудугларымызы вәзијјәтимизә тәтбиг едәк. (Ибраниләрә 4:12 ајәсини охујун.) Јухарыда ады чәкилән Роналд дејир: «Јахшы ки, һәр ахшам Мүгәддәс Китабы охумаг вәрдишинә јијәләнмишәм. Јеһованын хүсусијјәтләри, бәндәләрини нә гәдәр севдији һагда чох дүшүнүрәм. Беләҹә, һәр дәфә јенидән ҝүҹ алырам».

11. Мүгәддәс Китабы охумаг јаслы баҹымыза неҹә ҝүҹ вермишди?

¹¹ Аллаһын Кәламыны мүталиә едәндә биз проблемләримизә дүзҝүн јанашмағы өјрәнирик. Ҝөрүн Мүгәддәс Китабы охумаг јолдашыны итирән јаслы баҹымыза неҹә  көмәк едиб. Бир ағсаггал она «Әјјуб» китабыны охумағы мәсләһәт ҝөрдү. О, китабы охујанда әввәлҹә Әјјубу јанлыш дүшүнҹәләринә ҝөрә гынамаға башлады. Үрәјиндә она белә дејирди: «Ај Әјјуб, наһаг белә дүшүнүрсән!» Амма бирдән анлады ки, әслиндә, өзү дә Әјјуб кими дүшүнүр. Охудуглары баҹыја дүшүнҹәләрини дәјишмәјә көмәк етди вә әринин иткисинә дөзмәк үчүн ҝүҹ верди.

12. Јеһова диндашларымыз васитәсилә бизи неҹә ҝүҹләндирир?

¹² Диндашларымыз васитәсилә. Јеһованын бизә дајаг олмаг үчүн истифадә етдији диҝәр бир васитә иман баҹы-гардашларымыздыр. Булус диндашларына белә јазмышды: «Истәјирәм ки, һамымыз... бир-биримизи руһландыраг» (Ром. 1:11, 12). Јухарыда ады чәкилән Мери дә диндашларынын арасында олмағы чох гијмәтләндирир. О дејир: «Јеһова һәтта һеч мәним проблемләримдән хәбәри олмајан баҹы-гардашлар васитәсилә мәнә көмәк едиб. Онлар мәни руһландыран сөзләр дејирдиләр, ачыгҹа јазыб ҝөндәрирдиләр. Һәмишә дә бу лап јеринә дүшүрдү. Мәнә һәмчинин мәнимлә ејни проблемләри олан баҹыларла дәрдләшмәк көмәк едир. Онлардан чох шеј ҝөрүб ҝөтүрүрәм. Ағсаггаллар да һәмишә чалышыр ки, јығынҹаг үчүн дәјәрли олдуғуму һисс едим».

13. Јығынҹагда бир-биримизи неҹә ҝүҹләндирә биләрик?

¹³ Ибадәт ҝөрүшләри бир-биримизи руһландырмаг үчүн ән ҝөзәл јерләрдән биридир. Јығынҹаға ҝәләндә јахшы олар ки, баҹы-гардашлары севдијинизи, онлара миннәтдарлығынызы ифадә едәсиниз. Беләҹә, бу үсулла онлары мөһкәмләндирә биләрсиниз. Мәсәлән, бир дәфә јығынҹагдан әввәл Питер адлы ағсаггал һәјат јолдашы иманда олмајан бир баҹыја демишди: «Сәни бурада ҝөрмәк адамы чох руһландырыр. Һәмишә ушагларынын алтысыны да сәлигәли ҝејиндириб јығынҹаға ҝәтирирсән. Габагҹадан шәрһләр һазырлајырлар». Баҹынын ҝөзләри долду. Гардаша миннәтдарлығыны билдирәрәк деди: «Бир билсән, бу сөзләрә бу ҝүн нә гәдәр еһтијаҹым вар иди».

14. Хидмәт бизә неҹә көмәк едир?

¹⁴ Хидмәт васитәсилә. Биз Мүгәддәс Китаб һәгигәтләри һагда инсанлара данышанда ҝүҹүмүз тәзәләнир вә бу, инсанларын бизә гулаг асыб-асмамасындан асылы дејил (Мәс. 11:25). Стејси баҹы хидмәтин ҝүҹүнә өзү шаһид олуб. Аилә үзвләриндән бири јығынҹагдан кәнар олундуғу үчүн о, чох пәришан һалда иди. Елә һеј дүшүнүрдү: «Бәлкә дә, она башга неҹәсә көмәк едә биләрдим». Бу фикирләр она аман вермирди. Бәс она өзүнү тохдамаға нә көмәк етди? Хидмәт! Хидмәт едәндә инсанларын көмәјә мөһтаҹ олдуғу һагда дүшүнмәјә башлады. О дејир: «Һәмин вахт Јеһова мәнә бир һәдијјә етди. Мән бир нәфәрлә Мүгәддәс Китаб дәрсинә башладым. О, чох сүрәтлә инкишаф едирди. Бу мәни әмәлли-башлы дирчәлтди. Мәни ајагда сахлајан ән әсас шеј хидмәт олуб».

15. Меринин сөзләриндән нә өјрәнирик?

¹⁵ Бәзиләринин вәзијјәти тәблиғ ишиндә чох шеј етмәјә јол вермир. Әҝәр сизинлә дә вәзијјәт беләдирсә, унутмајын ки, Јеһова әлиниздән ҝәләни етмәјинизи чох гијмәтләндирир. Јухарыда ады чәкилән Мери әҹнәбидилли әразијә көчмүшдү. Дили јахшы билмәдијиндән өзүнү јарарсыз һисс едирди. Мери дејир: «Бир мүддәт мән јалныз садә шәрһ вермәји, ајә охумағы вә хидмәтдә буклет тәгдим етмәји баҹарырдым». Буна ҝөрә дә о, сәлис данышанларла мүгајисәдә, тәблиғдә һеч бир хејринин дәјмәдијини дүшүнүрдү. Амма сонра вәзијјәтә башга ҹүр бахмағы  өјрәнди. О баша дүшдү ки, дили јахшы билмәсә дә, Јеһова үчүн јарарлы ола биләр. Мери дејир: «Һәјатлары хилас едән һәгигәт олдугҹа садәдир вә бу һәгигәт инсанларын һәјатыны дәјишир».

16. Евдән чыха билмәјәнләрә руһдан дүшмәмәјә нә көмәк едә биләр?

¹⁶ Јеһова билир ки, бәзиләримиз сәһһәтимизә ҝөрә евдән чөлә чыха билмирик, амма үрәјимиз тәблиғ етмәк истәјилә дөјүнүр. Јеһова шәраит јарада биләр ки, биз тибб ишчиләринә, јахуд гуллуғумузда дуран инсанлара тәблиғ едәк. Әҝәр биз инди етдијимиз хидмәтлә әввәлләр етдијимиз хидмәти мүгајисә етсәк, руһдан дүшә биләрик. Амма Јеһованын инди бизә неҹә көмәк етдији һагда дүшүнсәк, бу бизи ҝүҹләндирәҹәк вә истәнилән сынаға севинҹлә синә ҝәрә биләҹәјик.

17. Ваиз 11:6 ајәсинә әсасән, нәјә ҝөрә тәблиғ ишимизи давам етдирмәлијик?

¹⁷ Биз билмирик әкдијимиз һәгигәт тохумларындан һансы көк атыб ҹүҹәрәҹәк. (Ваиз 11:6 ајәсини охујун.) Мәсәлән, 80 јашларында олан Барбара адлы баҹы мүнтәзәм олараг телефон вә мәктуб васитәсилә тәблиғ едир. Бир дәфә о, мәктублардан биринин ичинә «Ҝөзәтчи гүлләси»нин 2014-ҹү ил 1 март сајыны * гојмушду. Орада «Аллаһын сизин уғрунузда вердији гурбан» адлы мәгалә вар иди. Баҹы мәктубу өзү дә билмәдән јығынҹагдан кәнар едилмиш бир әр-арвада ҝөндәрди. Онлар журналы дөнә-дөнә охудулар. Киши санки Јеһованын онунла бирбаша данышдығыны һисс етди. Бу әр-арвад јығынҹаглара ҝәлмәјә башлады. Јығынҹагдан кәнар едилмәләриндән тәхминән 27 ил сонра онлар јенидән Јеһованын Шаһиди олдулар. Тәсәввүр едирсиниз, Барбара баҹы јаздығы бир мәктубун белә ҝөзәл бәһрә ҝәтирдијини ҝөрәндә неҹә руһланмыш вә мөһкәмләнмишди!

18. Јеһовадан ҝүҹ алмаг үчүн нә едә биләрик?

¹⁸ Јеһова түкәнмәз ҝүҹүндән бәһрәләнмәјимиз үчүн дуа, Мүгәддәс Китаб, диндашларымыз вә хидмәтимиз кими чохлу васитәләр тәгдим едиб. Бунлардан јарарлананда ҝөстәририк ки, Јеһованын бизә көмәк етмәјә гадир олдуғуна вә буну истәдијинә архајыныг. Одур ки, ҝәлин һәмишә Јараданымыза пәнаһ апараг. Чүнки О, «сидги-үрәкдән Она бағлы оланларын рифаһы үчүн ҝүҹүнү» ҝөстәрир (2 Салн. 16:9).