1. Мүгәддәс Китаб әсл мәһәббәти неҹә тәсвир едир?

 МӘҺӘББӘТИН «алову алышыб-јаныр; Јаһын аловудур. Ҝур сулар мәһәббәти сөндүрә билмәз, чајлар јујуб апара билмәз» b (Нәғ. 8:6, 7). Бу ајәләрдә мәһәббәт неҹә дә ҝөзәл тәсвир олунуб! Бу сөзләр әр-арвадлары әмин едир ки, мәһәббәтләри түкәнмәз ола биләр.

2. Әр-арвадлар араларындакы мәһәббәтин сојумамасы үчүн нә етмәлидир?

² Араларындакы мәһәббәтин өмүр боју давам етмәси үчүн әр дә, арвад да өз тәрәфиндән нәсә етмәлидир. Мәсәлән, ҝөтүрәк тонгалы. О, сонсуза гәдәр јана биләр, амма она даима одун атмаг лазымдыр. Әҝәр нәзарәтсиз галса, алов тәдриҹән сөнәҹәк. Әр-арвадларын да бир-бириләринә олан севҝи тонгалы сонсузадәк јана биләр. Амма бунун үчүн онлар мүнасибәтләрини даима мөһкәмләндирмәлидирләр. Бәзән мадди чәтинликләр, сәһһәтләриндәки проблемләр, ушагларын тәрбијәси илә бағлы нараһатлыглар әр-арвадлары о гәдәр сыхыр ки, араларындакы севҝинин сојудуғуну һисс едирләр. Әҝәр евлисинизсә, никаһынызда «Јаһын алову»нун даима јанмасы үчүн нә едә биләрсиниз? Бу мәгаләдә мүнасибәтләринизи мөһкәмләндирмәјин вә хошбәхт аиләјә саһиб олмағын үч јолуну арашдыраҹағыг c.

3. Јеһова илә мөһкәм мүнасибәт әр-арвада араларындакы мәһәббәти ҹанлы сахламаға неҹә көмәк едир? (Ваиз 4:12). (Һәмчинин шәклә бахын.)

³ «Јаһын алову»нун даим јанмасы үчүн әр дә, арвад да Јеһова илә мүнасибәтини мөһкәм сахламалыдыр. Бу онларын  никаһына неҹә көмәк едир? Сәмави Аталары илә мүнасибәтләринә дәјәр верән әр-арвадлар ҹанла-башла Онун мәсләһәтләринә әмәл едир. Бунун сајәсиндә онлар мәһәббәтләрини сојудаҹаг проблемләрдән узаг олур вә ја онларын өһдәсиндән ҝәлирләр. (Ваиз 4:12 ајәсини охујун.) Һәмчинин руһани дүшүнҹәли инсан Јеһоваја бәнзәмәјә вә Онун кими хејирхаһ, сәбирли, бағышлајан олмаға чалышыр (Ефес. 4:32—5:1). Әрлә арвадда бу хүсусијјәтләр оланда мәһәббәтләринин ҝетдикҹә артмасы даһа асан олур. 25 илдән чохдур ки евли олан Лена баҹы дејир: «Руһән јеткин инсаны севмәк, она һөрмәт ҝөстәрмәк асандыр».

4. Нәјә ҝөрә Јеһова ҝәләҹәк Мәсиһин валидејнләри кими Јусифлә Мәрјәми сечмишди?

⁴ Мүгәддәс Китабдан бир һадисәјә бахаг. Јеһова Давудун нәслиндән о гәдәр адамын ичиндән ҝәләҹәк Мәсиһин валидејнләри кими Јусифлә Мәрјәми сечди. Чүнки онларын һәр икисинин Јеһова илә мөһкәм мүнасибәти вар иди. Јеһова билирди ки, Она мәһәббәт һәмишә никаһларынын мәркәзиндә олаҹаг. Әр-арвадлар Јусифлә Мәрјәмин нүмунәсиндән нә өјрәнә биләр?

5. Әрләр Јусифдән нә өјрәнә биләр?

⁵ Јусиф Јеһованын бујругларына ҹанла-башла әмәл едирди. Онун јахшы әр олмасынын сирри дә мәһз бунда иди. Ән азы үч дәфә о, Јеһовадан аиләси илә бағлы ҝөстәриш алмышды. Һәр дәфә дә о бу ҝөстәришләрә дәрһал әмәл едирди. Һалбуки бунлар асан тапшырыглар дејилди (Мәт. 1:20, 24; 2:13—15, 19—21). Аллаһын вердији бујруглара әмәл етмәклә Јусиф Мәрјәми горуду, она дәстәк олду вә онун гајғысына галды. Бир дүшүнүн, Јусифин бу ҹүр давранышыны ҝөрәндә Мәрјәмин она севҝиси вә һөрмәти неҹә артырды! Әзиз әрләр, сиз дә Јусифдән өрнәк ҝөтүрәрәк чалышын аиләнизин гејдинә галмаг үчүн Мүгәддәс Китабдан мәсләһәтләр ахтарасыныз d. Сонра исә чәтин олса да, бу мәсләһәтләрә әмәл един. Бунунла арвадынызы севдијинизи ҝөстәрәҹәксиниз вә никаһынызы мөһкәмләндирәҹәксиниз. Вануатуда јашајан вә 20 илдән чохдур евли олан бир баҹы дејир: «Әрим Јеһованын мәсләһәтинә үз тутанда вә Онун ҝөстәришләринә әмәл едәндә она һөрмәтим бирә-беш артыр. Өзүмү архајын һисс едирәм вә онун вердији гәрарлара етибар едирәм».

6. Арвадлар Мәрјәмдән нә өјрәнә биләр?

⁶ Мәрјәмин Јеһова илә өз мүнасибәти вар иди. Онун иманы Јусифин етдикләриндән асылы дејилди. О, Мүгәддәс Јазылары јахшы билирди e. Һәмчинин вахт ајырыб  өјрәндикләри барәдә дүшүнүрдү (Лука 2:19, 51). Јеһова илә бу ҹүр сых мүнасибәти олмасы ону мүкәммәл һәјат јолдашы етмишди. Бу ҝүн чох арвадлар Мәрјәм кими давраныр. Мәсәлән, Емико адлы бир баҹы дејир: «Субај оланда мәним өзүмүн руһани ҹәдвәлим вар иди. Амма евләнәндән сонра артыг әрим икимиз үчүн дуа едирди, аиләви ибадәти о апарырды. Фикир вермишдим ки, артыг мәним иманым онун етдикләриндән асылыдыр. Баша дүшдүм ки, Јеһова илә мүнасибәтләрими мөһкәмләндирмәк үчүн өзүм дә нәсә етмәлијәм. Буна ҝөрә дә инди мән Аллаһымла баш-баша галмаг үчүн вахт ајырырам: дуа едирәм, Мүгәддәс Китабы охујурам, орадакы фикирләрин дәринлијинә варырам» (Гал. 6:5). Әзиз арвадлар, Јеһова илә достлуғунузу мөһкәмләндирдикҹә әринизин сизи тәрифләмәк, севмәк үчүн даһа чох сәбәби олаҹаг (Мәс. 31:30).

7. Әр-арвадлар Јусифлә Мәрјәмдән Јеһоваја бирҝә ибадәт етмәклә бағлы нә өјрәнә биләр?

⁷ Бундан әлавә, Јусифлә Мәрјәм бир әр-арвад кими әл-әлә вериб Јеһова илә мүнасибәтләрини мөһкәм сахламаға чалышырдылар. Онлар баша дүшүрдүләр ки, бир аилә кими Јеһоваја ибадәт етмәк чох ваҹибдир (Лука 2:22—24, 41; 4:16). Ола билсин, буну етмәк елә дә асан дејилди, аиләләри бөјүдүкҹә бу даһа да чәтинләширди. Амма Јусиф вә Мәрјәм чыхыш јолу тапырдылар. Онлар әр-арвадлар үчүн чох ҝөзәл нүмунәдирләр. Әҝәр Јусиф вә Мәрјәм кими сизин дә ушагларыныз варса, јәгин, јығынҹагларда иштирак етмәк, аиләви ибадәтә вахт ајырмаг асан олмур. Бәлкә дә, икиниз бир јердә мүталиә етмәјә вә ја дуа етмәјә вахт тапа билмирсиниз. Амма унутмајын ки, бирҝә Јеһоваја ибадәт етсәниз, һәм Она јахынлашаҹагсыныз, һәм дә бир-биринизә. Буна ҝөрә дә Јеһоваја ибадәти һәр шејдән үстүн тутун.

8. Никаһларында ҝәрҝинлик олан әр-арвадлар аиләви ибадәтләриндән там фајда әлдә етмәк үчүн нә едә биләрләр?

⁸ Ола билсин, мүнасибәтләриниздә ҝәрҝинлик вар, бирликдә аиләви ибадәт кечирмәк истәјиниз јохдур. Онда гысаҹа олараг икинизин дә мараг даирәсинә ујғун олан мөвзулар арашдырын. Бу сизин мүнасибәтләринизи мөһкәмләндирәҹәк вә Јеһоваја бирҝә ибадәт етмәк истәјәҹәксиниз.

9. Нәјә ҝөрә әрлә арвад бирликдә вахт кечирмәлидир?

⁹ Әзиз әр-арвадлар, бир-биринизлә вахт кечирмәклә мәһәббәтинизи аловландыра биләрсиниз. Онда јолдашынызын нә дүшүндүјүндән, һансы һиссләри кечирдијиндән бихәбәр олмајаҹагсыныз (Јар. 2:24). 15 илдән чохдур ки евли олан Лилија вә Руслан евләнәндән гыса мүддәт сонра бир шеји мүшаһидә етдиләр. Лилија дејир: «Ҝөрдүк ки, дүшүндүјүмүз кими бирликдә чох вахт кечирмәк алынмајаҹаг. Ҝүнүмүз ишә, ев ишләринә ҝедирди, ушагларымыз оланда исә онлара вахт ајырмалы олурдуг. Баша дүшдүк ки, бир әр-арвад кими бирҝә вахт кечирмәсәк, ҝетдикҹә бир-биримиздән узаглашаҹағыг».

10. Әр-арвадлар Ефеслиләрә 5:15, 16 ајәләриндәки принсипә неҹә әмәл едә биләрләр?

¹⁰ Әр-арвадлар бирликдә вахт кечирмәк үчүн нә едә биләр? Бунун үчүн габагҹадан вахт тәјин етмәк олар. (Ефеслиләрә 5:15, 16 ајәләрини охујун.) Ниҝеријада јашајан Узонду адлы гардаш дејир: «Мән ишләрими планлашдыранда графикимә арвадымла бирҝә кечирәҹәјим вахты да дахил  едирәм вә бу ән ваҹиб ишләримин сырасында олур» (Филип. 1:10). Молдовада бир рајон нәзарәтчисинин һәјат јолдашы олан Анастасија вахтындан сәмәрәли истифадә едир. О дејир: «Чалышырам, шәхси ишләрими јолдашым өз мәсулијјәтләри илә мәшғул олан вахт ҝөрүм. Бунун сајәсиндә галан вахтымызы бир јердә кечирә билирик». Бәс әҝәр ҹәдвәлиниз уҹбатындан баш-баша галмаг үчүн вахт тапмаг чәтиндирсә, нә едә биләрсиниз?

11. Аквилас вә Прискилла бирликдә һансы ишләри ҝөрүрдү?

¹¹ Әр-арвадлар Аквилас вә Прискилладан чох шеј өјрәнә биләр. Биринҹи әсрдәки мәсиһиләрин онлара бөјүк һөрмәти вар иди (Ром. 16:3, 4). Мүгәддәс Китабда онларын никаһлары илә бағлы чох мәлумат олмаса да, орадан өјрәнирик ки, онлар бирликдә ишләјирди, тәблиғ едирди вә башгаларына көмәк едирди (Һәв. 18:2, 3, 24—26). Үмумијјәтлә, Мүгәддәс Китабда Аквилас вә Прискилланын ады һәмишә бирликдә чәкилир.

12. Әр-арвадлар бирликдә вахт кечирмәк үчүн нә едә биләр? (Һәмчинин шәклә бахын.)

¹² Әр-арвадлар Аквилас вә Прискилланын нүмунәсини неҹә изләјә биләр? Ҝүндәлик һәјатда һәр икинизин ҝөрәҹәји чох иш олур. Бәлкә, бәзи ишләри ајрылыгда ҝөрмәк әвәзинә, бир јердә едәсиниз? Мәсәлән, Аквилас вә Прискилла бир јердә тәблиғ едирди. Сиз дә мүнтәзәм белә едирсиниз? Һәмчинин Аквилас вә Прискилла бир јердә ишләјирди. Ола билсин, ејни јердә ишләмирсиниз. Бәс ев ишләрини бир јердә ҝөрә биләрсиниз? (Ваиз 4:9). Һансыса иши бир јердә ҝөрәндә бир команда кими олурсунуз вә сөһбәт етмәк имканыныз олур. Роберт вә Линда 50 илдән чохдур ки евлидир. Роберт дејир: «Дүзүнү десәм, бирликдә истираһәт етмәк үчүн вахтымыз чох олмур. Амма мән габлары јујанда јолдашым онлары гурулајыр, ја да бағда ишләјәндә о да јаныма ҝәлир. Бу мәни чох севиндирир. Бирликдә чалышмаг мүнасибәтләримизи мөһкәмләндирир. Бир-биримизә мәһәббәтимиз ҝет-ҝедә артыр».

13. Мүнасибәтләринин, доғрудан да, мөһкәм олмасы үчүн әрлә арвад нә етмәлидир?

¹³ Амма бир шеји јадда сахлајын: бир јердә олмаг һәлә о демәк дејил ки, мүнасибәтләриниз мөһкәмләнәҹәк. Бразилијада јашајан бир баҹы дејир: «Индики дөврдә инсанын фикрини јајындыран чох шеј вар. Она ҝөрә дә бизә елә ҝәлә биләр ки, бир дамын алтындајыгса, демәли, бирҝә вахт кечиририк. Амма баша дүшдүм ки, бир јердә олмаг һәлә ишин јарысыдыр. Ишин диҝәр јарысы исә һәјат јолдашына диггәт ҝөстәрмәкдир». Бруно вә арвады Тајз һәмишә чалышырлар ки, бир-бириләринә диггәт ҝөстәрсинләр. Бруно дејир: «Бош вахтымызда телефонларымызы гыраға гојуруг вә бир-биримизлә хош сөһбәт едирик».

14. Әҝәр әр-арвад бирҝә вахт кечирмәји хошламырса, нә едә биләрләр?

 ¹⁴ Бәзи әр-арвадлар бир-бириләри илә вахт кечирмәји хошламыр. Ола билсин, онларын мараглары үст-үстә дүшмүр вә ја бәзи һәрәкәтләри бир-бириләрини гыҹыгландырыр. Бу заман нә етмәк олар? Јухарыда данышдығымыз тонгал нүмунәсинә гајыдаг. Тонгал јанмаға башлајанда әввәл-әввәл ҝур јанмыр. Бунун үчүн ора әввәлҹә хырда одун парчалары, сонра исә бөјүк одун парчалары атмаг лазымдыр. Ејнилә сиз дә чалышын һәр ҝүн һәјат јолдашынызла аз да олса, вахт кечирәсиниз. Аранызда мүнагишә јарадаҹаг шејләрлә јох, икинизин дә хошуна ҝәлән шејләрлә мәшғул олун (Јаг. 3:18). Бу ҹүр кичик аддымлардан башлајыб, нәтиҹәдә, севҝинизи аловландыра биләрсиниз.

15. Никаһда севҝини горумаг үчүн нәјә ҝөрә һөрмәт ваҹибдир?

¹⁵ Никаһда һөрмәтин ваҹиб ролу вар. Бу санки тонгалын јанмасына көмәк едән оксиҝен кимидир. Оксиҝен олмајанда алов чох кечмәмиш сөнүр. Ејнилә һөрмәт олмајанда әр-арвад арасындакы севҝи тез бир заманда сојујур. Амма бир-бириләринә һөрмәт ҝөстәрән әр-арвадлар араларындакы севҝини горујурлар. Бир шеји унутмајын: ола билсин, сиз дүшүнүрсүнүз ки, һәјат јолдашыныза һөрмәт едирсиниз. Бәс һәјат јолдашыныз һансы фикирдәдир? О өзүнә гаршы һөрмәт һисс едир? Пени вә Арет 25 илдән чохдур ки евлидир. Пени баҹы дејир: «Бир-биримизә һөрмәт етдијимиз үчүн евимиздә хош аб-һава вар. Икимиз үчүн дә бир-биримизин фикри дәјәрлидир, буна ҝөрә дә нә дүшүндүјүмүзү раһат дејә билирик». Демәли, нә едә биләрсиниз ки, һәјат јолдашыныз она һөрмәт етдијинизи һисс етсин? Ҝәлин Ибраһим пејғәмбәрлә Саранын нүмунәсинә бахаг.

16. Әрләр Ибраһим пејғәмбәрдән нә өјрәнә биләр? (1 Бутрус 3:7). (Һәмчинин шәклә бахын.)

¹⁶ Ибраһим пејғәмбәр Сара илә һөрмәтҹил давранырды. О, Саранын фикирләрини, һиссләрини нәзәрә алырды. Бир дәфә Сара чох дилхор иди, бүтүн гәзәбини Ибраһимин үстүнә төкмүшдү. Һәтта бүтүн ҝүнаһы онда ҝөрмүшдү. Бәс Ибраһим нә етди? Әсәбиләшиб онунла кобуд данышды? Хејр. О билирди ки, Сара итаәткар гадындыр, һәмишә она дәстәк олур. Она гулаг асды, мәсәләни һәлл етмәјә чалышды (Јар. 16:5, 6). Бу һадисәдән һансы нәтиҹәни чыхарырыг? Әзиз әрләр, сизин аиләдә гәрар вермәк ихтијарыныз вар (1 Кор. 11:3). Амма арвадынызын фикрини нәзәрә алмагла ону севдијинизи ҝөстәрәҹәксиниз, хүсусилә дә верәҹәјиниз гәрарын она да тәсири олаҹагса (1 Кор. 13:4, 5). Јахуд ола биләр ки, јолдашыныз нараһатлыг кечирсин, данышмаға еһтијаҹы олсун. Бу заман онун һиссләринә  һөрмәт едиб диггәтлә гулаг асаҹагсыныз? (1 Бутрус 3:7 ајәсини охујун.) Анжела вә Дмитри тәхминән 30 илдир ки евлидир. Анжела әринин она һөрмәт етдијини ајдын ҝөрүр. О дејир: «Дмитри һәмишә мәнә гулаг асмаға һазырдыр. Өзүмү пис һисс едәндә, ја да садәҹә данышмаг истәјәндә Дмитри мәнә һәвәслә гулаг асыр. Һәтта емосионал данышсам да, о мәнимлә сәбирлә давраныр».

17. Арвадлар Сарадан нә өјрәнә биләр? (1 Бутрус 3:5, 6).

¹⁷ Сара әринин гәрарларыны дәстәкләмәклә она һөрмәт етдијини ҝөстәрирди (Јар. 12:5). Бир дәфә Ибраһим пејғәмбәр ҝөзләнилмәдән ҝәлән гонаглары евинә дәвәт етмәк гәрарына ҝәлир. О, Сараја дејир ки, әлиндәки иши гыраға гојуб чохлу чөрәк биширсин (Јар. 18:6). Сара да ҹәлд тәрпәниб онун дедијини едир. Әзиз арвадлар, сиз дә әринизин гәрарларыны дәстәкләмәклә Сараја бәнзәјә биләрсиниз. Бу, никаһынызы мөһкәмләндирәҹәк. (1 Бутрус 3:5, 6 ајәләрини охујун.) Әввәлки абзасда ады чәкилән Дмитри арвадынын она һөрмәт етдијини һисс едир. О дејир: «Бәзән фикирләримиз үст-үстә дүшмәсә дә, Анжела мәним гәрарларымы үрәкдән дәстәкләјир. Буну ҝөрмәк мәнә чох хошдур. Һәрдән вердијим гәрарын нәтиҹәси јахшы олмур. Амма о мәни һеч вахт тәнгид етмир». Сәнә һөрмәт едән бирини севмәк чох асандыр!

18. Әрлә арвадын мәһәббәтләрини горумасынын һансы фајдасы олур?

¹⁸ Бу ҝүн Шејтан истәјир ки, әр-арвадлар арасындакы севҝи аловуну сөндүрсүн. О билир ки, онларын араларындакы севҝи итсә, Јеһовадан да узаглаша биләрләр. Амма әсл севҝини һеч нә сөндүрә билмәз! Одур ки, чалышын никаһыныздакы мәһәббәт «Нәғмәләр нәғмәси»ндә тәсвир олунан мәһәббәт кими олсун. Гој Јеһова аилә һәјатынызын мәркәзиндә олсун. Бир-биринизә вахт ајырын, бир-биринизин һиссләринә вә тәләбатларына һөрмәт един. Белә етсәниз, никаһыныз әсл мәһәббәтин мәнбәји олан Јеһоваја шәрәф ҝәтирәҹәк вә нә гәдәр ки сағсыныз, мәһәббәтиниз аловланмаға давам едәҹәк.