1. Јеһова хидмәтчиләрини нә етмәјә тәшвиг едир? (Һәмчинин шәклә бахын.)

 ТӘСӘЛЛИЈӘ еһтијаҹ дујанда, нә едәҹәјимизи билмәјәндә кимә үз тута биләрик? Ҹаваб мәлумдур. Биз Јеһова Аллаһа дуа едә биләрик. О Өзү бизи буна тәшвиг едир. Истәјир ки, Она тез-тез, һәмишә дуа едәк (1 Салон. 5:17). Билирик ки, чәкинмәдән Јеһоваја үз тутмаг вә һәр мәсәлә илә бағлы Ондан мәсләһәт истәмәк олар (Мәс. 3:5, 6). Јеһова сәхавәтли Аллаһ олдуғу үчүн ҝүн әрзиндә нә гәдәр дуа едәҹәјимизә мәһдудијјәт гојмур.

2. Бу мәгаләдә нәји арашдыраҹағыг?

² Дуа бизим үчүн чох гијмәтли һәдијјәдир. Амма ишимиз башымыздан ашдығы үчүн бәзән дуа етмәјә вахт тапа билмирик вә ја ҝөрүрүк ки, дуаларымызы јахшылашдырмаг лазымдыр. Хошбәхтликдән Мүгәддәс Китабда бизи тәшвиг едән, бизә өјүд верән чохлу мәсләһәтләр вар. Мәгаләдә Исанын нүмунәсиндән дуаја неҹә вахт ајыра биләҹәјимизи өјрәнәҹәјик. Һәмчинин арашдыраҹағыг ки, дуаларымызы јахшылашдырмаг үчүн һансы беш мөвзуну дуамыза дахил едә биләрик.

3. Иса дуа илә бағлы нәји билирди?

³ Иса билирди ки, дуаларымыз Јеһова үчүн чох гијмәтлидир. О, јер үзүнә ҝәлмәздән узун илләр өнҹә Јеһованын мөмин киши вә гадынларын дуаларына ҹаваб вердијини ҝөрүрдү. Мәсәлән, Атасы Һәннәнин, Давудун, Илјасын вә диҝәр  инсанларын сәмими дуаларына ҹаваб верәндә Иса Онун јанында иди (1 Ишм. 1:10, 11, 20; 1 Пад. 19:4—6; Зәб. 32:5). Елә буна ҝөрә дә шаҝирдләрини тәшвиг едирди ки, тез-тез вә чәкинмәдән дуа етсинләр (Мәт. 7:7—11).

4. Исанын дуаларындан нә өјрәнирик?

⁴ Јеһоваја етдији дуаларла Иса давамчыларына нүмунә гојмушду. О, хидмәти бојунҹа Јеһоваја дәфәләрлә дуа етмишди. Онун иши чох иди, әтрафында да һәмишә адамлар олурду. Она ҝөрә дә дуа етмәк үчүн конкрет вахт ајырырды (Марк 6:31, 45, 46). Тәк галыб Јеһоваја дуа едә билсин дејә о, сәһәр ертәдән ојанырды (Марк 1:35). Ән азы бир дәфә Иса ваҹиб гәрар вермәздән өнҹә бүтүн ҝеҹәни дуа етмишди (Лука 6:12, 13). Өлүмүндән өнҹәки ҝеҹә исә о, дәфәләрлә дуа етмишди. Чүнки јер үзүндәки тәјинатынын ән чәтин һиссәсини тамамламаг үзрә иди (Мәт. 26:39, 42, 44).

5. Дуа едәркән Исадан неҹә нүмунә ҝөтүрә биләрик?

⁵ Исанын нүмунәсиндән өјрәнирик ки, нә гәдәр мәшғул олсаг да, дуаја вахт ајырмалыјыг. Ола билсин, Иса кими бизә дә бунун үчүн конкрет вахт тәјин етмәк лазымдыр. Ја сәһәр бир аз тез ојана биләрик, ја да ахшам бир аз ҝеҹ јата биләрик. Бунунла Јеһоваја ҝөстәририк ки, Онун вердији әнам бизим үчүн дәјәрлидир. Ҝөрүн Лин адлы бир баҹы илк дәфә дуа әнамы һаггында ешидәндә һансы һиссләри кечирмишди. О дејир: «Биләндә ки, Јеһова илә истәдијим вахт даныша биләрәм Она јахын достум кими јанашмаға башладым. Истәјирдим ки, дуаларымы даһа да јахшылашдырым». Сөзсүз ки, бу һиссләр бизә дә танышдыр. Бәс нә барәдә дуа едә биләрик? Ҝәлин беш әсас мөвзуја нәзәр салаг.

6. Вәһј 4:10, 11 ајәләринә әсасән Јеһова нәјә лајигдир?

⁶ Јеһованы мәдһ един. Һәвари Јәһја она назил олан бир мөһтәшәм вәһјдә ҝөрүр ки, ијирми дөрд ағсаггал Јеһоваја сәҹдә гылыр. Онлар Јеһованы мәдһ едиб дејирдиләр ки, О, «шана, шәрәфә, гүдрәтә» лајигдир. (Вәһј 4:10, 11 ајәләрини охујун.) Ејнилә садиг мәләкләрин дә Јеһованы вәсф етмәк үчүн  сәбәбләри чохдур. Онлар ҝөјдә Јеһованын јанындадырлар, Ону јахшы таныјырлар, Јеһованын һәр ишиндә Онун хүсусијјәтләрини ајдын ҝөрүрләр. Јеһованы мүшаһидә етдикҹә Ону даһа чох уҹалтмаг истәјирләр (Әјј. 38:4—7).

7. Јеһованы нәјә ҝөрә мәдһ едә биләрик?

⁷ Биз дә дуаларымызда Јеһованы мәдһ етмәлијик. Дуада Ону нә үчүн севдијимизи, нәјә ҝөрә Она валеһ олдуғумузу дејә биләрик. Мүгәддәс Китабы мүталиә едән заман Јеһовада ән чох бәјәндијиниз хүсусијјәтләри тапмаға чалышын (Әјј. 37:23; Ром. 11:33). Сонра исә Она бу хүсусијјәтләринә ҝөрә үрәјиниздән кечәнләри дејин. Јеһованы һәм бизим, һәм дә халгы уғрунда етдикләринә ҝөрә дә вәсф едә биләрик. О, һәмишә бизим гејдимизә галыр, бизи горујур (1 Ишм. 1:27; 2:1, 2).

8. Јеһоваја нәләрә ҝөрә миннәтдар ола биләрик? (1 Салоникилиләрә 5:18).

⁸ Јеһоваја шүкүр един. Дуада Јеһоваја миннәтдарлығымызы билдирмәк үчүн о гәдәр сәбәбимиз вар ки! (1 Салоникилиләрә 5:18 ајәсини охујун.) Саһиб олдуғумуз һәр бир јахшы шејә ҝөрә Јеһоваја шүкүр едә биләрик. Ахы һәр бир ҝөзәл пајын мәнбәји Одур (Јаг. 1:17). Јеһоваја бу мөһтәшәм Јер күрәсинә ҝөрә вә диҝәр јарадылыш мөҹүзәләринә ҝөрә миннәтдарлығымызы билдирә биләрик. Һәмчинин алдығымыз нәфәсә, аиләмизә, достларымыза вә үмидимизә ҝөрә Она шүкүр етмәји унутмамалыјыг. Ән әсасы да Јеһоваја шүкүр етмәлијик ки, Онунла дост олмағымыза имкан јарадыб.

9. Нәјә ҝөрә Јеһоваја миннәтдарлығымызы артырмалыјыг?

⁹ Јеһоваја миннәтдар олмағымызын сәбәбләрини дүшүнмәк үчүн хүсусилә сәј ҝөстәрмәлијик. Әтрафымыз нашүкүр инсанларла долудур. Инсанлар елә һеј нәјисә әлдә етмәк истәјирләр. Онлар саһиб олдуглары шејләрә ҝөрә миннәтдар олмағы унудурлар. Әҝәр бу дүшүнҹә бизим дә зеһнимизә һопса, дуаларымыз хаһишләр сијаһысына чевриләҹәк. Бунун баш вермәмәси үчүн Јеһованын биздән өтрү етдикләринә ҝөрә миннәтдарлығымызы артырмалыјыг вә буну Она билдирмәлијик (Лука 6:45).

10. Миннәтдар олмаг бир баҹыја сынаглара дөзмәјә неҹә көмәк едиб? (Һәмчинин шәклә бахын.)

¹⁰ Миннәтдар олмаг бизә чәтинликләрә дөзмәјә көмәк едир. Ҝәлин Күнг-Сүк b адлы бир баҹынын нүмунәсинә бахаг. Она бәдхассәли ҹијәр хәстәлији диагнозу гојулмушду. О дејир: «Бу хәстәлик мәнә ҝүҹлү зәрбә иди, мәнә елә ҝәлирди ки, һәр шеји итирмишәм, чох горхурдум». Бәс баҹы бүтүн бунлара неҹә таб ҝәтирди? О дејир: «Һәр ҝеҹә јатмаздан габаг евин дамына чыхыб һәмин ҝүн алдығым беш  хејир-дуаја ҝөрә уҹадан дуа едирәм. Бундан сонра ҹаныма раһатлыг чөкүр вә мәндә Јеһоваја мәһәббәтими изһар етмәк истәји јараныр». Баҹы баша дүшдү ки, Јеһова ән ағыр вәзијјәтләрдә белә бизә дајаг олур вә вердији немәтләр үзләшдијимиз чәтинликләрдән гат-гат чохдур. Күнг-Сүк баҹы кими биз дә һәтта чәтинликләримиз заманы Јеһоваја чох шејә ҝөрә миннәтдар ола биләрик. Дуада Она миннәтдарлығымызы билдирмәк бизә дөзмәјә вә гәлб раһатлығымызы горумаға көмәк едәҹәк.

11. Нәјә ҝөрә Иса ҝөјә гајыдандан сонра шаҝирдләринә ҹәсарәт лазым иди?

¹¹ Дуа един ки, тәблиғдә ҹәсарәтли оласыныз. Иса Мәсиһ ҝөјә галхмаздан әввәл шаҝирдләринә хатырлатды ки, онлар «Јерусәлимдә, бүтүн Јәһудијјәдә вә Сәмәријјәдә, һәтта јерин уҹгарларынадәк» онун һаггында шаһидлик вермәлидирләр (Һәв. 1:8; Лука 24:46—48). Бунун үстүндән чох кечмәмиш јәһуди дин рәһбәрләри һәвари Бутрусу вә Јәһјаны тутуб Синедрионун өнүнә ҝәтирдиләр вә онлардан тәләб етдиләр ки, даһа тәблиғ етмәсинләр, һәтта онлары һәдәләдиләр (Һәв. 4:18, 21). Бәс Бутрусла Јәһја нә етди?

12. Һәвариләрин ишләри 4:29—31 ајәләринә әсасән шаҝирдләр нә етдиләр?

¹² Јәһуди дин рәһбәрләринин тәһдидләринә ҹаваб олараг Бутрусла Јәһја белә деди: «Өзүнүз фикирләшин: Аллаһын гаршысында Аллаһы гојуб сизә гулаг асмаг нә дәрәҹәдә дүзҝүндүр? Биз ҝөрдүјүмүз вә ешитдијимиз шејләр барәсиндә данышмаја билмәрик» (Һәв. 4:19, 20). Бутрусла Јәһја азадлыға бурахыланда шаҝирдләр Јеһоваја дуа едиб Онун ирадәсини јеринә јетирмәк үчүн көмәк истәдиләр. Онлар белә дуа етдиләр: «Өз гулларына гүввәт вер ки,.. Сәнин сөзүнү бундан сонра да ҹәсарәтлә данышаг». Јеһова онларын бу сәмими дуасына ҹаваб верди. (Һәвариләрин ишләри 4:29—31 ајәләрини охујун.)

13. Жин-һјук гардашдан нә өјрәнирик?

¹³ Һөкумәт гадаған етсә дә, тәблиғ етмәјә давам етмәклә шаҝирдләрин нүмунәсини изләјә биләрик. Жин-һјук адлы бир гардаш һәрби хидмәтдән имтина етдијинә ҝөрә һәбс олунмушду. Һәбсханада она бирнәфәрлик камерада олан мәһбуслара гуллуг етмәк тапшырылмышды. Гардаш садәҹә марагланмалы иди ки, онлара нә лазымдыр. Бундан артыг сөһбәтләрә, о ҹүмләдән Мүгәддәс Китаб һаггында данышмаға иҹазә јох иди. О дуа етди ки, һәр фүрсәт јарананда ҹәсарәтлә, ејни заманда еһтијатла һәгигәти данышсын (Һәв. 5:29). Гардаш дејир: «Јеһова дуамы ешидиб мәнә ҹәсарәт вә һикмәт верди. Мән камераларын гапысы ағзында беш дәгигәлик Мүгәддәс Китаб дәрсләринә башладым. Ҝеҹә исә мәктублар јазырдым вә сәһәриси ҝүн мәһбуслара верирдим». Јеһова бизә дә хидмәтимизи иҹра етмәјә көмәк едәҹәк. Бунун үчүн Жин-һјук гардаш кими Ондан ҹәсарәт вә һикмәт истәмәлијик.

14. Проблемләрә дөзмәјә бизә нә көмәк едә биләр? (Зәбур 37:3, 5).

¹⁴ Проблемләринизә дөзмәк үчүн Јеһовадан көмәк истәјин. Чохларымыз хәстәликләр, емосионал проблемләр, әзизләримизин иткиси, аилә дахили чәтинликләр, тәгибләр вә диҝәр проблемләрлә үзләширик. Һәлә бир пандемијалар вә мүһарибәләр оланда бу шејләрә дөзмәк даһа да чәтин олур. Бу заман үрәјинизи Јеһоваја бошалдын. Јахын достунуза өзүнүзлә бағлы нә дејәрдинизсә, ејни шејләри Јеһоваја  да дејин. Әмин олун ки, Јеһова сизин ишинизи јолуна гојаҹаг. (Зәбур 37:3, 5 ајәләрини охујун.)

15. Дуа чәтинликләрә синә ҝәрмәјә неҹә көмәк едир? Нүмунә чәкин.

¹⁵ Даима дуа етмәк бизә чәтинликләрә синә ҝәрмәјә көмәк едәҹәк (Ром. 12:12). Јеһова хидмәтчиләринин нәләр јашадығыны јахшы билир, онларын фәрјадларыны ешидир (Зәб. 145:18, 19). Ијирми доггуз јашы олан Кристи адлы бир өнҹүл баҹы өз һәјатында бунун шаһиди олуб. Онун сәһһәтиндә гәфилдән ҹидди проблем јаранмышды. Нәтиҹәдә, о, дәрин депресијаја дүшмүшдү. Бундан бир мүддәт сонра исә онун анасында өлүмҹүл хәстәлик ашкарланды. Кристи дејир: «Јеһоваја бүтүн үрәјимлә дуа едирдим ки, һәр ҝүнүмү баша вурмаға мәнә көмәк етсин. Чалышырдым, руһани ишләрлә мүнтәзәм мәшғул олум, мәсәлән, јығынҹаглардан галмајым, фәрди мүталиә едим. Дуа мәнә һәјатымын гаранлыг анларындан кечмәјә көмәк етди. Билирдим ки, Јеһова һәмишә јанымдадыр. Мәһз бу фикир мәнә тәсәлли верирди. Сәһһәтимдәки проблемләр дәрһал һәлл олунмады. Амма Јеһова дуаларыма ҹаваб олараг мәнә сакитлик вә гәлб раһатлығы верди». Ҝәлин һеч вахт унутмајаг ки, Јеһова «мөмин бәндәләри сынаглардан неҹә гуртармағы» јахшы билир (2 Бут. 2:9, 10).

16. Нәјә ҝөрә нәфсимизә үстүн ҝәлмәк үчүн Јеһованын көмәјинә еһтијаҹымыз вар?

¹⁶ Јеһовадан хаһиш един ки, нәфсә үстүн ҝәләсиниз. Ҝүнаһлы олдуғумуз үчүн һәмишә нәфсимизлә мүбаризә апарырыг. Шејтан исә бу мүбаризәмизи даһа да чәтинләшдирир. Мәсәлән, о, әхлагсыз әјләнҹәләрлә зеһнимизи корламаға чалышыр. Бу ҹүр әјләнҹәләр ағлымызда чиркин фикирләр јарадыр. Бу фикирләр бизи Јеһованын ҝөзүндә напак едир вә ҹидди ҝүнаһа сүрүкләјир (Марк 7:21—23; Јаг. 1:14, 15).

17. Дуа етдикдән сонра нәфсимизә үстүн ҝәлмәк үчүн нә етмәлијик? (Һәмчинин шәклә бахын.)

 ¹⁷ Јеһованын көмәји илә нәфсимизә үстүн ҝәлә биләрик. Иса давамчыларына өјрәтдији дуаја белә бир хаһиш дахил етмишди: «Гојма јолумузу азаг, бизи Шәрирдән хилас ет» (Мәт. 6:13). Јеһова дадымыза чатмаға һазырдыр, јетәр ки, буну Ондан истәјәк. Бундан әлавә, дуамыза ујғун давранмалыјыг. Буну неҹә едә биләрик? Әлиниздән ҝәләни един ки, Шејтан дүнјасында ҝениш јајылмыш фикирләрә даһа аз мәруз галасыныз (Зәб. 97:10). Һәмчинин Мүгәддәс Китабы мүталиә едәрәк ағлынызы сағлам фикирләрлә долдурун. Бунунла јанашы, јығынҹаг ҝөрүшләриндә вә тәблиғдә иштирак етмәк дә дүшүнҹәнизи горумаға көмәк едәҹәк. Јеһова исә гојмајаҹаг ки, сиз «ҝүҹүнүз чатмајан сынаглара мәруз галасыныз» (1 Кор. 10:12, 13).

18. Дуа илә бағлы һәр биримиз нә етмәлијик?

¹⁸ Биз сон дәрәҹә чәтин бир вахтда јашајырыг. Буна ҝөрә дә садиг галмаг үчүн һәр биримизин дуа етмәјә инди даһа чох еһтијаҹы вар. Одур ки, һәр ҝүн Јеһоваја үрәкдән дуа етмәк үчүн вахт ајырын. Јеһова истәјир ки, дуа едиб үрәјимизи Она ачаг (Зәб. 62:8). Дуада Јеһованы мәдһ един, ҝөрдүјү ишләрә ҝөрә миннәтдарлығынызы билдирин. Хидмәтдә ҹәсарәтли олмаг үчүн көмәк диләјин. Јеһоваја јалварын ки, истәнилән проблемә таб ҝәтирмәк вә нәфслә мүбаризә апармаг үчүн сизә ҝүҹ версин. Гојмајын ки, нәсә вә ја кимсә сизин Јеһоваја мүнтәзәм дуа етмәјинизә мане олсун. Бәс Јеһова дуаларымыза неҹә ҹаваб верир? Нөвбәти мәгаләдә бу ваҹиб суалын ҹавабыны арашдыраҹағыг.