1. 2023-ҹү илин иллик ҝөрүшүндә һансы фикирләри ешитдик?

 2023-ҹү илин иллик ҝөрүшү a чох әламәтдар олду. Биз нәфәс дәрмәдән тәлимләримизә ҝәтирилән јени изаһатлара гулаг асдыг, һәмчинин хидмәтимизлә бағлы мөһтәшәм еланлар ешитдик. Мәсәлән, өјрәндик ки, һәтта Бөјүк Бабил мәһв оландан сонра да, ола билсин, бәзи инсанларын Јеһованын тәрәфини тутмаг имканы олсун. Диҝәр хәбәр исә о иди ки, артыг 2023-ҹү илин нојабр ајындан етибарән тәблиғчиләрин тәблиғ хидмәтләри илә бағлы һесабат вермәләринә еһтијаҹ јохдур. Бу дәјишикликләр тәблиғ ишимизин әввәлки гәдәр әһәмијјәтли, тәҹили олмадығыны ҝөстәрир? Гәтијјән јох!

2. Нәјә ҝөрә һәр өтән ҝүн тәблиғ етмәјин зәрурәти даһа да артыр? (Марк 13:10).

² Һәр өтән ҝүн тәблиғ ишимиз даһа да ваҹиб һал алыр. Нәјә ҝөрә? Чүнки вахт битмәк үзрәдир. Исанын ахырзаманда олаҹаг тәблиғ иши илә бағлы һансы пејғәмбәрлији сөјләдији һагда дүшүнәк. (Марк 13:10 ајәсини охујун.) Чарпаз ајәдә — Мәтта 24:14 ајәсиндә Иса демишди ки, хош хәбәр бүтүн јер үзүндә «сон» ҝәлмәздән әввәл тәблиғ олунаҹаг. «Сон» дејиләндә Шејтанын шәр дүнјасынын бирдәфәлик мәһви нәзәрдә тутулур. Јеһова јахын заманда баш верәҹәк һадисәләрин ҝүнүнү вә саатыны тәјин едиб (Мәт. 24:36; 25:13; Һәв. 1:7). Һәр өтән ҝүн бизи һәмин ҝүнә даһа да јахынлашдырыр (Ром. 13:11). Сонун ҝәләҹәји ҝүнә гәдәр исә биз тәблиғ ишини давам етдирмәлијик.

3. Биз нәјә ҝөрә тәблиғ едирик?

 ³ Һәр биримиз бөјүк мәна дашыјан бу суал үзәриндә дүшүнмәлијик: «Хош хәбәри нәјә ҝөрә тәблиғ едирик?» Гысаҹа десәк, севҝидән ирәли ҝәләрәк. Тәблиғ етмәклә биз хош хәбәри, инсанлары, ән әсасы, Јеһованы вә Онун адыны севдијимизи ҝөстәририк. Ҝәлин бунлары нөвбә илә арашдыраг.

ХОШ ХӘБӘРИ СЕВДИЈИМИЗ ҮЧҮН ТӘБЛИҒ ЕДИРИК

4. Јахшы хәбәр ешидәндә адәтән нә едирик?

⁴ Јахшы хәбәр ешидәндә кечирдијиниз һиссләр јадыныздадыр? Бәлкә дә аиләниздә көрпә доғулаҹағыны өјрәнмишдиниз, ја да еһтијаҹ дујдуғунуз анда иш тәклифи алмышдыныз. Сөзсүз, бу хәбәри аиләнизлә, достларынызла бөлүшмәјә сәбирсизләнирдиниз. Бәс бүтүн хәбәрләрин ичиндә ән јахшы хәбәри — Аллаһын Падшаһлығы һаггында хош хәбәри ешидәндә дә ејни шеј баш вермишди?

5. Аллаһын Кәламындакы һәгигәтләри илк дәфә өјрәнәндә һансы һиссләри кечирмишдиниз? (Һәмчинин шәкилләрә бахын.)

⁵ Аллаһын Кәламындакы һәгигәти илк дәфә өјрәнәндә кечирдијиниз һиссләри јадыныза салын. Өјрәнмишдиниз ки, Аллаһ сизи севир, Она ибадәт едән инсанларын арасында олмағынызы истәјир. О, әзаб-әзијјәтләринизә сон гојаҹаг, јени дүнјада өлән әзизләринизи һәјата гајтараҹаг вә саирә (Марк 10:29, 30; Јәһ. 5:28, 29; Ром. 8:38, 39; Вәһј 21:3, 4). Бу һәгигәтләр гәлбинизи охшады (Лука 24:32). Беләҹә, сиз өјрәндикләринизи севдиниз вә буну һамыја данышмаг истәдиниз. (Әрәмја 20:9 ајәси илә әлагәләндирин.)

6. Ернест вә Роузун һадисәсиндән нә өјрәнирсиниз?

⁶ Ҝәлин бир һадисәјә бахаг. Ернест b адлы бир гардашын тәхминән 10 јашы оланда атасы вәфат етмишди. Ернест дејир: «Дүшүнүрдүм, ҝөрәсән, о, ҝөјә ҝедиб, јохса садәҹә өлүб вә даһа һеч вахт јашамајаҹаг? Аталары олан ушаглара пахыллығым тутурду». Ернест тез-тез гәбиристанлыға ҝедирди. Атасынын гәбринин јанында диз  чөкүб дуа едирди: «Ај Аллаһ, нә олар, де атам һарададыр». Атасынын өлүмүндән тәхминән 17 ил сонра она Мүгәддәс Китабы өјрәнмәк тәклиф олунду, о да разылашды. Ернест өјрәнди ки, өлүләр санки дәрин јухудадыр, һеч нә билмирләр вә Аллаһ онлары ҝәләҹәкдә дирилдәҹәјинә сөз верир (Ваиз 9:5, 10; Һәв. 24:15). Нәһајәт, Ернест узун илләрдир ону нараһат едән суаллара ҹаваб тапды. Мүгәддәс Китабдан өјрәндији һәгигәтләр Ернести валеһ едирди. Онун јолдашы Роуз да Мүгәддәс Китабы өјрәнмәјә башлады вә о да өјрәндији һәгигәтләри севди. 1978-ҹи илдә онлар вәфтиз олундулар вә бөјүк шөвглә өјрәндикләри дәјәрли һәгигәтләри аиләләринә, достларына вә диҝәр инсанлара данышдылар. Бунун сајәсиндә Ернестлә Роузун 70-дән чох инсанын Јеһованы таныјыб вәфтиз олунмасында пајы олду.

7. Мүгәддәс Китаб һәгигәтләринә олан севҝимиз дәринләшәндә нә баш верир? (Лука 6:45).

⁷ Мүгәддәс Китаб һәгигәтләринә олан севҝимиз дәринләшдикҹә онлары һамыја данышмаг истәјирик. (Лука 6:45 ајәсини охујун.) Биз дә Исанын биринҹи әсрдәки шаҝирдләринин кечирдији һиссләри кечиририк. Онлар демишди: «Биз ҝөрдүјүмүз вә ешитдијимиз шејләр барәсиндә данышмаја билмәрик» (Һәв. 4:20). Бизим өјрәндијимиз һәгигәтләрә севҝимиз о гәдәр бөјүкдүр ки, бу һәгигәтләри мүмкүн гәдәр чох инсанын ешитмәсини истәјирик.

ИНСАНЛАРЫ СЕВДИЈИМИЗ ҮЧҮН ТӘБЛИҒ ЕДИРИК

8. Биз нәјә ҝөрә инсанларын хош хәбәри ешитмәсини истәјирик? (« “Инсанлары сев. Шаҝирд һазырла”» адлы чәрчивәјә бахын.) (Һәмчинин шәклә бахын.)

⁸ Јеһова вә Иса инсанлары севир, биз дә инсанлары севирик (Мәс. 8:31; Јәһ. 3:16). «Үмидсиз вә Аллаһсыз» јашајан инсанлара јазығымыз ҝәлир (Ефес. 2:12). Онлар бу һәјатын проблемләр дәнизиндә боғулурлар. Биздә исә онлара лазым олан хиласедиҹи жилет вар. Бу, Аллаһын Падшаһлығы һагда хош хәбәрдир. Бу ҹүр инсанлара бәсләдијимиз севҝи вә шәфгәт бизи әлимиздән ҝәләни едиб онлара хош мүждәни чатдырмаға сөвг едир. Бу ҝөзәл хәбәри ешидәндә онларын үрәји үмидлә долур, һәмчинин хош хәбәр онлара бу ҝүнүн өзүндә дә хошбәхт олмаға көмәк едир вә «әсл һәјат»а — јени дүнјада әбәди һәјата говушмаг имканы јарадыр (1 Тим. 6:19).

9. Инсанлары ҝәләҹәклә бағлы нәдән хәбәрдар едирик вә нәјә ҝөрә? (Һизгијал 33:7, 8).

⁹ Бундан әлавә, инсанлара севҝимиз бизи онлара бу шәр дүнјанын јахынлашдығыны хәбәр вермәјә тәшвиг едир. (Һизгијал 33:7, 8 ајәләрини охујун.) Бизим, аилә үзвләримиз дә дахил олмагла, Јеһоваја  хидмәт етмәјән бүтүн инсанлара үрәјимиз јаныр. Чохлары ҝәләҹәкләриндән хәбәрсиз һәјатларыны јашајырлар. Билмирләр ки, гаршыда онлары «бөјүк мүсибәт» ҝөзләјир. Елә бир мүсибәт ки, «беләси дүнја јаранандан бәри олмамышдыр вә бир даһа олмајаҹаг» (Мәт. 24:21). Биз онларын һәмин һөкм ҝүнүндә нәләрин баш верәҹәјини билмәсини истәјирик. Әввәлҹә јалан дин мәһв олаҹаг, сонра исә Армаҝеддонда Шејтан дүнјасына тамамилә сон гојулаҹаг (Вәһј 16:14, 16; 17:16, 17; 19:11, 19, 20). Биз дуа едирик ки, бу ҝүн мүмкүн гәдәр чох инсан бу хәбәрдарлыға һај версин вә бизимлә бирликдә Јеһоваја ибадәт етсин. Бәс аилә үзвләримиз дә дахил олмагла, бизә гулаг асмајан инсанларын агибәти неҹә олаҹаг?

10. Нәјә ҝөрә инсанлары ҝәләҹәк һадисәләрдән хәбәрдар етмәк олдугҹа ваҹибдир?

¹⁰ Әввәлки мәгаләдә дә изаһ олундуғу кими, ола билсин, бәзи инсанлар Бөјүк Бабилин мәһв олдуғуну ҝөрүб Јеһоваја иман ҝәтирсин вә хилас олсун. Демәли, инди инсанлары ҝәләҹәк һадисәләрдән хәбәрдар етмәк һәмишәкиндән даһа ваҹибдир. Нәјә ҝөрә? Чүнки бу ҝүн онлара нәсә демәлијик ки, сабаһ да јадларына нәсә дүшсүн. (Һизгијал 33:33 ајәси илә әлагәләндирин.) Ола билсин, онлар бизим етдијимиз хәбәрдарлығы хатырлајаҹаглар вә нә гәдәр ки ҝеҹ дејил, бизимлә бирликдә Јеһоваја ибадәт едәҹәкләр. Гәдимдә Филиппидәки ҝөзәтчи мәһз «ҝүҹлү зәлзәлә»дән сонра Аллаһа иман ҝәтирмишди (Һәв. 16:25—34). Ејнилә, бу ҝүн хош хәбәрә һај вермәјән инсанлар, бәлкә дә елә Бөјүк Бабилин ҝөзләнилмәз мәһвиндән сонра фикирләрини дәјишәҹәкләр.

ЈЕҺОВАНЫ ВӘ ОНУН АДЫНЫ СЕВДИЈИМИЗ ҮЧҮН ТӘБЛИҒ ЕДИРИК

11. Јеһованын шана, шәрәфә вә гүдрәтә лајиг олдуғуну неҹә ҝөстәририк? (Вәһј 4:11). (Һәмчинин шәкилләрә бахын.)

¹¹ Инсанлара хош мүждәни тәблиғ етмәјимизин башлыҹа сәбәби Јеһованы вә Онун мүгәддәс адыны севмәјимиздир. Биз хидмәтимизә севдијимиз Аллаһы мәдһ етмәјин бир јолу кими бахырыг. (Вәһј 4:11 ајәсини охујун.) Биз дә бүтүн гәлбимизлә дејирик: «Аллаһымыз Јеһова, Сән шана, шәрәфә, гүдрәтә лајигсән!» Аллаһымызын шана вә шәрәфә лајиг олдуғуну неҹә ҝөстәририк? Јеһованын «һәр шејин јараданы» олдуғуну, Онун сајәсиндә мөвҹуд олдуғумузу инсанлара данышмагла вә буна даир сүбутлар ҝәтирмәклә. Бәс Онун гүдрәтә лајиг олдуғуну неҹә ҝөстәририк? Имканымызын јол вердији гәдәр вахтымызы,  ҝүҹүмүзү вә вәсаитләримизи тәблиғ ишинә сәрф етмәклә (Мәт. 6:33; Лука 13:24; Кол. 3:23). Садә сөзлә десәк, биз Аллаһымыз барәдә данышмағы севирик, һәмчинин инсанлара Онун адыны вә хүсусијјәтләрини ачыгламағы өзүмүзә борҹ билирик. Нәјә ҝөрә?

12. Тәблиғдә Јеһованын адыны неҹә мүгәддәс тутуруг?

¹² Јеһоваја олан севҝимиз бизи Онун адыны мүгәддәс тутмаға тәшвиг едир (Мәт. 6:9). Биз Онун адыны Шејтанын мәнфур јаланларындан тәмизләмәк истәјирик (Јар. 3:1—5; Әјј. 2:4; Јәһ. 8:44). Тәблиғдә инсанлара Аллаһымыз һагда вә Онун ҝөзәл хүсусијјәтләри барәдә данышмагдан өтрү үрәјимиз алышыб-јаныр. Истәјирик ки, һәр бир инсан бу һәгигәтләри билсин: Јеһованын ән али хүсусијјәти мәһәббәтдир, О ән јахшы, ән әдаләтли һакимдир, Онун Падшаһлығы тезликлә бүтүн әзаб-әзијјәтә сон гојаҹаг, бәшәријјәтә әмин-аманлыг вә хошбәхтлик ҝәтирәҹәк (Зәб. 37:10, 11, 29; 1 Јәһ. 4:8). Инсанлара бу һәгигәтләри ачыглајанда Јеһованын адыны мүгәддәс тутмуш олуруг. Һәмчинин севинирик ки, биз бунунла дашыдығымыз ада ујғун давранмыш олуруг. Нәјә әсасән белә демәк олар?

13. Нәјә ҝөрә Јеһованын Шаһиди адланмаг бизим үчүн фәхрдир? (Әшија 43:10—12).

¹³ Јеһова бизи Өз «шаһидләри» адландырыр. (Әшија 43:10—12 ајәләрини охујун.) Илләр әввәл Рәһбәрлик Шурасынын бир мәктубунда белә сөзләр јазылмышды: «Јеһованын Шаһидләри адыны дашымаг һәр биримиз үчүн бөјүк шәрәфдир» c. Нәјә ҝөрә? Белә бир нүмунәјә бахаг. Тутаг ки, мәһкәмәдә  кимсә сизин леһинизә шаһидлик вермәлидир. Шаһид гисминдә кими сечәрдиниз? Тәбии ки, таныдығыныз, етибар етдијиниз вә сөзүнүн кәсәринин олмасы үчүн јахшы ад газанмыш бирини. Јеһова бизи Өз шаһиди сечмәклә ҝөстәрир ки, бизи чох јахшы таныјыр вә башгаларына Онун вар олан тәк Аллаһ олдуғуну данышаҹағымыза етибар едир. Јеһованын Шаһиди олмаг бизим үчүн елә бөјүк шәрәфдир ки, биз һәр фүрсәтдән истифадә едиб инсанлара Онун адыны таныдырыг вә Онун һаггында јајылан јаланлары тәкзиб едирик. Бунунла да фәхрлә дашыдығымыз адын — Јеһованын Шаһидләри адынын һаггыны веририк (Зәб. 83:18; Ром. 10:13—15).

СОН ҜӘЛӘНӘ ГӘДӘР ТӘБЛИҒӘ ДАВАМ

14. Бизи јахын ҝәләҹәкдә һансы мараглы һадисәләр ҝөзләјир?

¹⁴ Бизи јахын ҝәләҹәкдә неҹә дә мараглы һадисәләр ҝөзләјир! Үмид едирик ки, Јеһованын көмәји илә бөјүк мүсибәтдән әввәл һәлә чох инсан һәгигәти гәбул едәҹәк. Һәмчинин севинирик ки, бәшәр тарихинин ән гаранлыг дөврүндә — бөјүк мүсибәтдә дә, ола билсин, бәзиләри Шејтанын дағылмаг үзрә олан дүнјасындан үз дөндәриб бизимлә бирликдә Јеһованы мәдһ етсин (Һәв. 13:48).

15, 16. Биз бундан сонра да нә едәҹәјик вә нә вахта гәдәр?

¹⁵ О вахта гәдәр исә ҝөрәси ваҹиб ишимиз вар. Бу иш бир даһа тәкрарланмајаҹаг. Бизә Аллаһын Падшаһлығы һагда хош мүждәни бүтүн дүнјада тәблиғ етмәк нәсиб олуб. Ејни заманда инсанлара хәбәрдарлыг да вермәлијик. Онлар билмәлидир ки, бу шәр дүнја сүрәтлә сонуна јахынлашыр. Сонра һөкм вахты чатанда онлар тәблиғ етдијимиз хәбәрин Јеһова Аллаһдан олдуғуну анлајаҹаглар (Һизг. 38:23).

¹⁶ Демәли, биз нә етмәк нијјәтиндәјик? Хош хәбәри, инсанлары, ән әсасы исә Јеһованы вә Онун адыны севдијимиз үчүн тәблиғ едәҹәјик. Буну ҹанла-башла, шөвглә вә тәхирә салмадан едәҹәјик. Та Јеһова «дајан» дејәнә гәдәр!