1. Һансы руһани мәгсәдләри гоја биләрик?

 БИР мәсиһи кими биз Јеһованы чох севирик. Истәјирик ки, Она хидмәтдә әлимиздән ҝәләни едәк. Бунун үчүн гаршымыза руһани мәгсәдләр гојмалыјыг. Мәсәлән, һансыса мәсиһи хүсусијјәтини јетишдирмәк, мүәјјән баҹарыға јијәләнмәк вә ја диндашларымыза көмәк етмәк үчүн јоллар ахтармаг олар b.

2. Нәјә ҝөрә руһани мәгсәдләр гојмалы вә онлара чатмаға ҹан атмалыјыг?

² Нәјә ҝөрә биз руһани ҹәһәтдән инкишаф етмәјә ҹан атмалыјыг? Биринҹиси, истәјирик ки, мәһәббәтли Аллаһымызын рәғбәтини газанаг. Өз баҹарығымызы, истедадымызы Јеһоваја хидмәтдә там истифадә едәндә О, чох севинир. Икинҹиси исә баҹы-гардашларымыза даһа чох көмәк етмәк истәјирик (1 Салон. 4:9, 10). Нә гәдәр мүддәтдир һәгигәтдә олмағымыздан асылы олмајараг, һәр биримиз руһани ҹәһәтдән инкишаф етмәји гаршымыза мәгсәд гоја биләрик. Ҝәлин ҝөрәк бунун үчүн һансы аддымлары атмаг олар.

3. 1 Тимутијә 4:12—16 ајәләриндә һәвари Булус Тимутини нәјә тәшвиг етмишди?

³ Һәвари Булус Тимутијә биринҹи мәктубуну јазанда бу ҹаван оғлан артыг тәҹрүбәли ағсаггал иди. Бунунла белә, Булус Тимутини тәшвиг етмишди ки, руһән инкишаф етмәјә давам етсин. (1 Тимутијә 4:12—16 ајәләрини охујун.) Булусун сөзләриндән ҝөрмәк олар ки, о,  Тимутинин ики саһәдә инкишаф етмәсини истәјирди. Биринҹиси, мәһәббәт, иман, паклыг кими мәсиһи хүсусијјәтләрини инкишаф етдирмәсини, икинҹиси, охумаг, өјүд-нәсиһәт вә тәлим вермәк баҹарығыны јахшылашдырмасыны. Тимутинин нүмунәси әсасында ҝәлин ҝөрәк әлчатан мәгсәдләр гојмаг руһани ҹәһәтдән инкишаф етмәјимизә неҹә көмәк едә биләр. Һәмчинин хидмәтимизи ҝенишләндирмәјин бәзи јолларыны арашдыраг.

4. Филиппилиләрә 2:19—22 ајәләринә әсасән, Тимутини Јеһоваја хидмәтдә јарарлы едән нә иди?

⁴ Тимутини Јеһоваја хидмәтдә јарарлы едән нә иди? Саһиб олдуғу ҝөзәл мәсиһи хүсусијјәтләри. (Филиппилиләрә 2:19—22 ајәләрини охујун.) Булусун сөзләриндән ҝөрмәк олар ки, Тимути тәвазөкар, чалышган, садиг, етибарлы инсан иди. О, чох меһрибан иди, баҹы-гардашларла марагланырды. Буна ҝөрә дә Булус ону чох истәјирди вә она бөјүк мәсулијјәтләр һәвалә едирди (1 Кор. 4:17). Ејнилә, биз дә Јеһоваја мәгбул хүсусијјәтләр јетишдирәндә Она даһа әзиз олуруг вә јығынҹаға даһа чох хејримиз дәјир (Зәб. 25:9; 138:6).

5. а) Һансы хүсусијјәти јетишдирмәли олдуғунузу неҹә мүәјјән едә биләрсиниз? б) Шәкилдә тәсвир олунан ҹаван баҹы диндашларына даһа чох шәфгәт ҝөстәрмәк мәгсәдинә чатмаг үчүн нә едир?

⁵ Гаршыныза конкрет мәгсәд гојун. Дуа едәрәк дүшүнүн ҝөрүн өзүнүздә нәләри јахшылашдырмалысыныз. Бир хүсусијјәти сечин вә диггәтинизи она ҹәмләјин. Мәсәлән, бәлкә, даһа шәфгәтли олмалысыныз вә ја баҹы-гардашлара көмәк етмәк истәјинизи артырмалысыныз? Јахуд даһа сүлһпәрвәр олмалысыныз вә бағышламағы өјрәнмәлисиниз? Јахын достунуздан һансы саһәдә инкишаф етмәли олдуғунузу соруша биләрсиниз (Мәс. 27:6).

6. Һансыса хүсусијјәти јетишдирмәк истәјирсинизсә, мәгсәдинизә неҹә чата биләрсиниз?

⁶ Мәгсәдинизә чатмаға чалышын. Буну неҹә едә биләрсиниз? Мәсәлән, јахшылашдырмаг истәдијиниз хүсусијјәт һагда дәрин мүталиә едә биләрсиниз. Тутаг ки, сизә башгаларыны бағышламаг чәтиндир вә бунун үзәриндә ишләмәк истәјирсиниз. Мүгәддәс Китабдан башгаларыны һәм бағышлајанлар, һәм дә бағышламајанлар һагда охујуб, нәтиҹә чыхара биләрсиниз. Мәсәлән, Исанын неҹә даврандығы һагда дүшүнүн. О, инсанлары тәрәддүд етмәдән бағышлајырды  (Лука 7:47, 48). Һәмчинин фикрини инсанын кечмишдәки сәһвләринә јох, ҝәләҹәкдә јахшы ишләр ҝөрә биләҹәјинә ҹәмләјирди. Фәрисиләр исә башгаларыны һеч сајырдылар (Лука 18:9). Бу нүмунәләр үзәриндә дүшүнәндән сонра нөвбәти суаллары өзүнүзә верин: «Мән башгаларына баханда нә ҝөрүрәм? Онларын һансы хүсусијјәтләринә фикрими ҹәмләјирәм?» Кимисә бағышламаг чәтиндирсә, һәмин инсанын јахшы хүсусијјәтләрини бир вәрәгә јазын, баҹардығыныз гәдәр чох хүсусијјәт јазмаға чалышын. Сонра дүшүнүн: «Исанын ҝөзүндә о, неҹә бир инсандыр? Иса ону бағышлајарды?» Бу ҹүр мүталиә дүшүнҹәмизи дәјишмәјә көмәк едә биләр. Ола билсин, хәтринизә дәјән инсаны бағышламаг үчүн әввәл-әввәл чох чалышмалы олаҹагсыныз. Амма бунун үзәриндә ишләсәниз, вахт кечдикҹә башгаларыны бағышламаг сизә даһа асан олаҹаг.

7. Мәсәлләр 22:29 ајәси ишиндә уста олан адамларын әмәјиндән Јеһованын јарарландығыны неҹә ҝөстәрир?

⁷ Һәмчинин сиз һансыса баҹарыға јијәләнмәји гаршыныза мәгсәд гоја биләрсиниз. Бир дүшүнүн, Бејтел биналарынын, Топланты залларынын, ибадәт евләринин тикинтисиндә нә гәдәр инсанын әмәји кечиб. Онларын әксәријјәти пешәкар баҹы-гардашларын јанында ишләјә-ишләјә һансыса баҹарыглара јијәләнибләр. Шәкилдән ҝөрдүјүмүз кими, һәм гардашлар, һәм дә баҹылар Топланты залларынын вә ибадәт евләринин јахшы вәзијјәтдә сахланылмасына көмәк етмәк үчүн мүәјјән ишләр өјрәнирләр. Беләҹә, «әбәдијјәт Һөкмдары» Јеһова Аллаһ вә «падшаһлар Падшаһы» Иса Мәсиһ ишиндә уста олан адамлар васитәсилә мөһтәшәм ишләр һәјата кечирир (1 Тим. 1:17; 6:15; Мәсәлләр 22:29 ајәсини охујун). Биз зәһмәткеш олмаг вә баҹарыгларымызла өзүмүзү јох, Јеһованы шәрәфләндирмәк истәјирик (Јәһ. 8:54).

8. Һансы баҹарыға јијәләнмәли олдуғунузу неҹә мүәјјән едә биләрсиниз?

⁸ Гаршыныза конкрет мәгсәд гојун. Һансы баҹарыға јијәләнә биләрсиниз? Бунунла бағлы јығынҹағыныздакы ағсаггалларла, бәлкә дә, рајон нәзарәтчиси илә мәсләһәтләшә биләрсиниз. Әҝәр онлар сизә мәсләһәт ҝөрсә ки, натиглик вә тәлим вермәк баҹарығынызы јахшылашдырасыныз, онда конкрет нәјин үзәриндә ишләмәли олдуғунузу сорушун. Сонра исә бу баҹарығынызы јахшылашдырмаг үчүн әлиниздән ҝәләни един. Ҝәлин ҝөрәк нәләр едә биләрсиниз.

9. Һансыса баҹарыға јијәләнмәк истәјирсинизсә, мәгсәдинизә неҹә чата биләрсиниз?

⁹ Мәгсәдинизә чатмаға чалышын. Тутаг ки, сиз тәлим вермәк баҹарығынызы јахшылашдырмаг истәјирсиниз. «Өзүнү охумаға вә тәлим вермәјә һәср ет» брошүрүнү дәриндән мүталиә едә биләрсиниз. Һәфтәичи ҝөрүшдә һансыса бәндиниз оланда сәриштәли гардашдан хаһиш едә биләрсиниз ки, тапшырығыныза габагҹадан гулаг ассын вә сизә лазыми мәсләһәт версин. Тапшырығыныза әввәлҹәдән һазырлашын ки, чалышган вә мәсулијјәтли бир инсан кими танынасыныз (Мәс. 21:5; 2 Кор. 8:22).

10. Һансыса саһәдә пүхтәләшмәк истәјириксә, мәгсәдимизә неҹә чата биләрик? Нүмунә чәкин.

¹⁰ Бәс әҝәр сизә хүсусилә чәтин олан бир саһәдә пүхтәләшмәк истәјирсинизсә, онда неҹә? Тез тәслим олмајын. Гари адлы бир гардаш үзүндән сәлис охуја билмирди. О дејир ки, әввәлләр јығынҹагда нәјисә уҹадан охумаға чалышанда чох утанырды. Амма о, үзәриндә ишләмәјә давам етди. Инди о дејир ки, тәҹрүбәли гардашлардан  алдығы тәлим сајәсиндә јығынҹагларда вә бөјүк топлантыларда нитгләр сөјләјир!

11. Әлавә мәсулијјәтләр иҹра етмәјә јарарлы олмаг үчүн биз дә Тимути кими нә етмәлијик?

¹¹ Ҝөрәсән, Тимути сајылыб-сечилән натиг вә мәһарәтли бир мүәллим олду? Мүгәддәс Китабда бунунла бағлы һеч нә дејилмир. Амма Булусун мәсләһәтинә әмәл етдикҹә, шүбһә јохдур ки, о, тәдриҹән мәсулијјәтләрини даһа јахшы иҹра едирди (2 Тим. 3:10). Ејнилә, биз дә баҹарыгларымызы пүхтәләшдирсәк, әлавә мәсулијјәтләр иҹра етмәк үчүн даһа јарарлы олаҹағыг.

12. Баҹы-гардашлар сизә һансы көмәји ҝөстәриб?

¹² Һәр биримиз диндашларымызын көмәјини ҝөрмүшүк. Хәстәханада оланда Хәстәханаларла әлагә комитәсиндә вә Хәстәләрә зијарәт групунда олан ағсаггаллар бизә баш чәкәндә чох миннәтдар олуруг. Һәјатымызда һансыса чәтинликлә үзләшәндә ағсаггалларын вахт ајырыб бизи динләмәсини, бизә тәсәлли вермәсини чох гијмәтләндиририк. Јахуд тәҹрүбәли өнҹүлүн бизә көмәк етмәк үчүн шаҝирдимизин дәрсиндә иштирак етмәси, бизә лазыми мәсләһәтләр вермәси бизә чох хош олур. Баҹы-гардашларын һәр бири бизә севә-севә көмәк едирләр. Әҝәр диндашларымыза көмәк етмәјә ҹан атсаг, биз дә бу севинҹи дадаҹағыг. Иса Мәсиһ дә демишди ки, «вермәк алмагдан даһа чох хошбәхтлик ҝәтирир» (Һәв. 20:35). Әҝәр сиз дә бу вә ја диҝәр саһәләрдә хидмәтинизи ҝенишләндирмәк истәјирсинизсә, мәгсәдинизә чатмаг үчүн нә едә биләрсиниз?

13. Гаршыныза мәгсәд гојанда һансы мәгамы унутмамалысыныз?

¹³ Үмуми мәгсәдләр гојмајын. Мәсәлән, ола билсин, белә дејирсиниз: «Истәјирәм, јығынҹагда даһа чох иш ҝөрүм». Белә мәгсәдләр гојсаныз, онда билмәјәҹәксиниз она неҹә наил ола биләрсиниз вә ја нә вахт наил олдунуз. Одур ки, гаршыныза ајдын, конкрет мәгсәд гојун. Һәтта бу мәгсәдинизи вә она наил олмағын јолуну бир вәрәгә јаза биләрсиниз.

14. Нәјә ҝөрә мәгсәд гојаркән вәзијјәтә ујғунлашмағы баҹармаг лазымдыр?

¹⁴ Гаршымыза мәгсәд гојаркән вәзијјәтә ујғунлашмағы баҹармалыјыг. Чүнки биздән асылы олмајан вәзијјәтләр  јарана биләр. Мәсәлән, һәвари Булусун башына ҝәләнләри јадымыза салаг. О, Салоники шәһәриндә јени јығынҹағын јаранмасына көмәк етмишди. Тәбии ки, онун мәгсәди орада галыб, јени мәсиһиләрә дәстәк олмаг иди. Амма о, тәгиблә үзләшди вә шәһәри тәрк етмәли олду (Һәв. 17:1—5, 10). Әҝәр Булус орада галса иди, баҹы-гардашлары тәһлүкә алтына атарды. Бунунла белә, Булус онлара көмәк етмәк ҹәһдләринә сон гојмады. О, јаранан вәзијјәтә ујғунлашды. Салоникидә јени имана ҝәләнләри мөһкәмләндирмәк үчүн ора Тимутини ҝөндәрди (1 Салон. 3:1—3). Јәгин, Салоникидәки мәсиһиләр чох севинирдиләр ки, көмәјә еһтијаҹ олан әразијә ҝетмәјә һазыр олан Тимути кими гардашлар вар!

15. Биздән асылы олмајан вәзијјәтләр мәгсәдләримизә неҹә тәсир едә биләр? Нүмунә чәкин.

¹⁵ Булусун Салоникидәки һадисәсиндән өзүмүз үчүн чох шеј өјрәнә биләрик. Ола билсин, һансыса хидмәт нөвүнә ҹан атырыг, амма биздән асылы олмајан сәбәбләрә ҝөрә бу мәгсәдимизә чата билмирик (Ваиз 9:11). Сизинлә дә белә бир шеј баш верибсә, вәзијјәтинизә ујғун башга бир мәгсәд гојун. Тед вә Һајди адлы бир әр-арвад мәһз белә етмишди. Сағламлыгла бағлы јаранан проблемә ҝөрә онлар Бејтел хидмәтләрини дајандырмалы олдулар. Амма Јеһоваја севҝидән ирәли ҝәләрәк онлар хидмәтләрини башга саһәләрдә ҝенишләндирмәјә ҹан атдылар. Әввәлҹә, онлар өнҹүл хидмәтинә башладылар. Бир мүддәт сонра хүсуси өнҹүл тәјин олундулар вә Тед гардаш рајон нәзарәтчисинин көмәкчиси олмаг үчүн тәлим алды. Сонра рајон нәзарәтчиләри үчүн јаш һәдди дәјишдирилди. Тедлә Һајди баша дүшдү ки, артыг бу хидмәт нөвүндә иштирак едә билмәјәҹәкләр. Буна ҝөрә мәјус олсалар да, баша дүшүрдүләр ки, Јеһоваја башга саһәләрдә хидмәт едә биләрләр. Тед дејир: «Биз өјрәндик ки, бир хидмәт нөвүндән тутуб-дурмаг олмаз».

16. Галатијалылара 6:4 ајәсиндән нә өјрәнирик?

¹⁶ Биз һәјатымызда баш верән һәр шеји нәзарәт алтында сахлаја билмәрик. Буна ҝөрә дә ваҹибдир ки, Јеһованын бизә тәјинатымыза ҝөрә дәјәр вердијини дүшүнмәјәк, јахуд өз тәјинатларымызы башгаларынкы илә мүгајисә етмәјәк. Һајди баҹы бунунла бағлы белә дејир: «Инсан өз һәјатыны башгаларынын һәјаты илә мүгајисә едәндә севинҹи јоха чыхыр». (Галатијалылара 6:4 ајәсини охујун.) Јахшы олар ки, Јеһоваја хидмәт етмәк вә диндашларымыза көмәк етмәк үчүн јоллар ахтараг c.

17. Һансыса тәјината јарарлы олмаг үчүн нә едә биләрсиниз?

 ¹⁷ Садә һәјат сүрсәниз вә лазымсыз борҹлара ҝирмәсәниз, Јеһоваја даһа чох хидмәт етмәк имканыныз олаҹаг. Һәмчинин бөјүк мәгсәдләрә чатмаг үчүн кичик мәгсәдләр гојун. Мәсәлән, әҝәр сизин мәгсәдиниз өнҹүл олмагдырса, бу мәгсәдә чатмаг үчүн һәр ај көмәкчи өнҹүл кими хидмәт едә биләрсиниз? Јахуд әҝәр мәгсәдиниз јығынҹаг хидмәтчиси олмагдырса, саһә хидмәтиндә иштирак етмәк, јығынҹагдакы јашлы вә хәстә баҹы-гардашлары зијарәт етмәк үчүн даһа чох вахт ајыра биләрсиниз? Һазырда газандығымыз тәҹрүбә ҝәләҹәкдә һансыса хидмәт нөвләринә гапы ача биләр. Сизә верилән истәнилән тәјинаты ҹанла-башла јеринә јетирин (Ром. 12:11).

18. Шәкилдән ҝөрүндүјү кими, Беверли баҹы һансы саһәдә ҝөзәл өрнәкдир?

¹⁸ Һеч вахт дүшүнмәмәлијик ки, јашымыз артыг о јаш дејил, даһа гаршымыза руһани мәгсәдләр гоја билмәрик. 75 јашлы Беверли баҹы бу саһәдә бизә ҝөзәл өрнәкдир. Ҹидди хәстәлији уҹбатындан она јеримәк чох чәтин иди. Лакин о, чох истәјирди ки, Мәсиһин анма мәрасими илә бағлы кампанијада там иштирак етсин. Буна ҝөрә дә о, гаршысына конкрет мәгсәдләр гојду. Баҹы кампанија илә бағлы гојдуғу мәгсәдләринә чатанда севинҹинин һәдди-һүдуду јох иди. Онун белә әзмли олмасы башгаларыны да хидмәтдә әлләриндән ҝәләни етмәјә тәшвиг етди. Јеһова јашлы диндашларымызын зәһмәтини чох гијмәтләндирир. Һәтта шәраитләри уҹбатындан чох шеј едә билмәсәләр дә (Зәб. 71:17, 18).

19. Гаршымыза һансы руһани мәгсәдләр гоја биләрик?

¹⁹ Гаршыныза наил ола биләҹәјиниз мәгсәдләр гојун. Јеһованын рәғбәтини газандыран хүсусијјәтләр инкишаф етдирин. Јеһованын јолунда вә тәшкилатынын ишләриндә даһа чох фајда ҝәтирәҹәјиниз баҹарыглара јијәләнин. Баҹы-гардашлара даһа чох көмәк етмәк үчүн јоллар ахтарын d. Тимутинин инкишафыны һамы ајдын ҝөрдүјү кими, Јеһованын көмәји илә сизин дә инкишафынызы һамы ајдын ҝөрәҹәк (1 Тим. 4:15).