Инсан јенидән аилә гурдуғу андан етибарән әввәлки никаһ јығынҹағын нәзәриндә позулмуш сајылыр, јени никаһ исә гүввәјә минир. Нәјә ҝөрә белә нәтиҹәјә ҝәлмишик? Буну баша дүшмәк үчүн ҝәлин ҝөрәк Иса Мәсиһ бошанмаг вә јенидән аилә гурмаг барәдә нә демишди.

Мәтта 19:9 ајәсиндә Иса Мәсиһ гејд едир ки, бошанмаг үчүн јалныз бир Мүгәддәс Китаб әсасы вар. О дејир: «Ким арвадыны әхлагсызлыг етдијинә ҝөрә дејил, башга сәбәбә ҝөрә бошајыб өзҝәси илә евләнирсә, зина едир». Иса Мәсиһин сөзләриндән өјрәнирик ки, 1) бошанма јолу илә никаһын позулмасы үчүн јалныз бир Мүгәддәс Китаб әсасы вар, о да әхлагсызлыгдыр вә 2) киши арвадыны Мүгәддәс Китаб әсасы олмадан бошајыб башгасы илә евләнәрсә, зина едир a.

Иса нә демәк истәјирди? Демәк истәјирди ки, әхлагсызлыг едиб, арвадыны бошајан кишијә Мүгәддәс Китаб јенидән евләнмәк үчүн әсас верир? Сөзсүз ки, јох. Әҝәр киши зина едәрсә, гадын, јәни ҝүнаһсыз тәрәф әрини бағышлајыб-бағышламамаға гәрар верир. Әҝәр гадын ону бағышламаса вә рәсми бошанма оларса, бошанма просеси баша чатдыгдан сонра һәр икиси јенидән аилә гура биләр.

Јахуд да, ола билсин, ҝүнаһсыз һәјат јолдашы никаһыны горумаг истәјир вә әринә ону бағышладығыны дејир. Бәс әҝәр зина етмиш әр арвадынын ону бағышламасыны гәбул етмәјиб, биртәрәфли гајдада бошанарса, онда неҹә? Арвады ону бағышламаг вә никаһыны горумаг истәдији үчүн Мүгәддәс Китаб кишијә јенидән аилә гурмаға әсас вермир. Амма киши Мүгәддәс Китаб әсасы олмадан башгасы илә аилә гурмаг гәрарына ҝәләрсә, тәкрарән зина етмиш олур вә беләҹә, она гаршы јенидән интизам тәдбири ҝөрмәк лазым ҝәләҹәк (1 Кор. 5:1, 2; 6:9, 10).

Киши Мүгәддәс Китаб әсасы олмадан јенидән аилә гурурса, јығынҹаг онун әввәлки никаһына вә јени никаһына неҹә бахыр? Мүгәддәс Китаба әсасән, онун әввәлки никаһы һәлә дә гүввәдә галыр? Ҝүнаһсыз һәјат јолдашы һәлә дә кечмиш әрини бағышлајыб-бағышламамаға гәрар верә биләр? Јығынҹаг онун јени никаһына зина һесаб олунан никаһ кими бахыр?

Әввәлләр белә изаһ олунурду ки, ҝүнаһсыз тәрәф нә гәдәр ки сағдыр, јенидән никаһа дахил олмајыб вә ја әхлагсызлыг етмәкдә тәгсирли билинмир, јығынҹаг кишинин јени никаһына зина һесаб олунан никаһ кими бахыр. Лакин Иса бошанмаг вә јенидән аилә гурмагла бағлы данышаркән ҝүнаһсыз тәрәф барәдә һеч нә демәмишди. Әксинә, о демишди ки, Мүгәддәс Китаб әсасы олмадан арвадыны бошајан вә башгасы илә аилә гуран киши зина едир. Белә вәзијјәтдә бошаныб јенидән аилә гурмаг, јәни Исанын зинаја бәрабәр тутдуғу әмәл әввәлки никаһы позур.

 Әҝәр киши арвадыны бошајыб, башгасы илә евләнәрсә, ҝүнаһсыз һәјат јолдашынын ону бағышлајыб-бағышламамаг мәсәләси артыг өз гүввәсини итирир. Беләҹә, гадын әввәлки һәјат јолдашыны бағышлајыб-бағышламамаг кими ҹидди гәрар вермәк мәсулијјәтиндән азад олур. Бундан әлавә, јығынҹағын јени гурулан никаһа бахышы ҝүнаһсыз һәјат јолдашынын өлүмү, јенидән аилә гурмасы, јахуд әхлагсызлыг етмәси кими амилләрдән асылы дејил b.

Јухарыда ҝәтирдијимиз вәзијјәтдә әр зина едир вә арвадындан бошаныр. Бәс әҝәр әр зина етмир, анҹаг бошаныб башгасы илә евләнирсә, онда неҹә? Јахуд әр бошанмамышдан әввәл јох, бошанандан сонра әхлагсызлыг едиб вә арвадынын ону бағышламасына рәғмән, јенидән евләнибсә, онда неҹә? Бүтүн бу нүмунәләрдә бошаныб, јенидән евләнмәк зина сајылыр вә әввәлки никаһы позур. Гурулан јени никаһ һүгуги гүввәјә малик олур. «Ҝөзәтчи гүлләси» журналынын 1979-ҹу ил 15 нојабр сајынын 32-ҹи сәһифәсиндә дејилир: «Инди о, јени никаһа дахил олуб вә бу никаһы позуб кечмиш арвадынын јанына гајыда билмәз; әввәлки никаһа бошанма илә, зина илә вә јенидән евләнмә илә сон гојулуб».

Изаһата едилән бу дәјишиклик о демәк дејил ки, мәсиһиләр артыг никаһа мүгәддәс бир шеј кими јанашмырлар вә зинаны ҹидди ҝүнаһ сајмырлар. Мүгәддәс Китаб әсасы олмадан арвадыны бошајан киши сонрадан Мүгәддәс Китаб әсасы олмадан јенидән аилә гурарса, зина етдијинә ҝөрә она гаршы интизам тәдбири ҝөрүләҹәк. (Әҝәр кишинин јени аилә гурдуғу кәс мәсиһидирсә, зина әмәли әсасында она гаршы да интизам тәдбири ҝөрүләҹәк.) Јени гурулан никаһ зина һесаб олунан никаһ сајылмаса да, кишијә јығынҹагда хүсуси мәсулијјәтләр верилмәси үчүн узун илләр кечмәлидир вә әҝәр төрәтдији әмәл артыг һеч кими нараһат етмирсә, башгаларынын һөрмәтини газаныбса, о, бу мәсулијјәтләрә јарарлы һесаб едилә биләр. Ағсаггаллар кишијә мәсулијјәт вермәздән габаг һәмчинин дүшүнмәлидирләр ки, онун план гурараг хәјанәт етдији кечмиш һәјат јолдашынын вә атыб ҝетдији азјашлы ушагларынын вәзијјәти вә шәраити һал-һазырда неҹәдир (Мәл. 2:14—16).

Мәсиһиләр Мүгәддәс Китаб әсасы олмадан бошаныб јенидән евләнмәјин ҹидди нәтиҹәләрини нәзәрә алыр вә һикмәтли давранараг Јеһова кими, никаһы мүгәддәс гурулуш һесаб едирләр (Ваиз 5:4, 5; Ибр. 13:4).