1. Мүгәддәс Китабы өјрәнмәздән өнҹә һәјатыныз неҹә иди?

 ЈЕҺОВАНЫН ШАҺИДЛӘРИ илә Мүгәддәс Китабы өјрәнмәздән өнҹә һәјатыныз неҹә иди? Чохларымыз һәмин вахтлары һеч јадына да салмаг истәмир. Чүнки, хасијјәтимизи вә дүшүнҹәмизи бу дүнјанын дәјәрләри, писә вә јахшыја даир бахышлары формалашдырырды. Нәтиҹәдә, «бу дүнјада үмидсиз вә Аллаһсыз» јашајырдыг (Ефес. 2:12). Амма Мүгәддәс Китабы өјрәнмәјә башлајандан сонра һәјатымыз бүсбүтүн дәјишди.

2. Мүгәддәс Китабдан билик алмағын сајәсиндә нәји анладыныз?

² Мүгәддәс Китабдан билик алмағын сајәсиндә анладыныз ки, ҝөјдә сизи чох севән Атаныз вар. Өјрәндиниз ки, Ону разы салмаг вә хидмәтчиләриндән ибарәт аиләсинә дахил олмаг үчүн һәјат тәрзиндә, дүшүнҹәниздә көклү дәјишикликләр етмәлисиниз. Јеһованын бәјәндији ишләри ҝөрмәји, бәјәнмәдији әмәлләрдән узаг дурмағы өјрәнмәлисиниз (Ефес. 5:3—5).

3. Колослулара 3:9, 10 ајәләриндә Јеһова бизә нә бујурур вә бу мәгаләдә нә һагда данышаҹағыг?

³ Јеһова Јараданымыз вә сәмави Атамыздыр. Онун аиләсинин давранышы илә бағлы гајдалар гојмаға һаггы чатыр. О бујурур ки, вәфтиз олунмаздан өнҹә биз «көһнә шәхсијјәти әмәлләри илә бирҝә» әјнимиздән чыхарыб атаг *. (Колослулара 3:9, 10 ајәләрини охујун.) Бу мәгалә вәфтиз олунмаг истәјәнләрә нөвбәти үч суала ҹаваб тапмаға көмәк едәҹәк: 1) Көһнә шәхсијјәт нәдир? 2) Нәјә ҝөрә Јеһова ону әјнимиздән чыхармағы бујурур? 3) Буну неҹә едә  биләрик? Артыг вәфтиз олунмуш шәхсләрә исә бу мәгаләни арашдырмаг көһнә шәхсијјәтә гајытмамаға көмәк едәҹәк.

4. Көһнә шәхсијјәтин гулу олан инсана нәләр хасдыр?

⁴ Көһнә шәхсијјәтин гулу олан инсанын дүшүнҹәси вә давранышы ҹисманидир. Адәтән белә инсан худбин, гәзәбли, нашүкүр вә гүрурлу олур. О, порнографик материаллара, зоракы вә әхлагсыз филмләрә бахыр. Сөзсүз ки, онун јахшы хүсусијјәтләри дә вар, бәлкә дә, әмәлләринә вә ја сөзләринә ҝөрә пешманчылыг чәкир, амма өзүндә нәләрисә дәјишмәк үчүн ҝүҹлү истәји јохдур (Гал. 5:19—21; 2 Тим. 3:2—5).

5. Көһнә шәхсијјәти әјнимиздән тамамилә чыхара биләрик? Изаһ един (Һәвариләрин ишләри 3:19).

⁵ Гејри-камил олдуғумуз үчүн һеч биримиз бүтүн пис фикирләри вә арзулары үрәјимиздән вә ағлымыздан тамамилә чыхара билмәрик. Бәзән данышығымызда вә давранышымызда сонрадан пешманчылығыны чәкәҹәјимиз сәһвләрә јол верәҹәјик (Әрм. 17:9; Јаг. 3:2). Амма биз көһнә шәхсијјәти әјнимиздән чыхаранда артыг ҝүнаһлы дүшүнҹәләрин вә әмәлләрин гулу олмуруг. Тамамилә башга бир инсан олуруг (Әшј. 55:7; Һәвариләрин ишләри 3:19 ајәсини охујун).

6. Нәјә ҝөрә Јеһова јанлыш фикирләрдән вә пис вәрдишләрдән јаха гуртармағымызы истәјир?

⁶ Јеһова бизи јанлыш дүшүнҹәдән вә пис вәрдишләрдән јаха гуртармаға тәшвиг едир. Чүнки О бизи чох истәјир вә бизим хошбәхт олмағымызы арзулајыр (Әшј. 48:17, 18). О билир ки, биз ҝүнаһлы арзулара тәслим оланда һәм өзүмүзә, һәм дә әтрафымыздакы инсанлара зәрәр јетиририк. Буну ҝөрмәк исә Јеһоваја гәлб ағрысы верир.

7. Ромалылара 12:1, 2 ајәләринә әсасән, гаршымызда һансы сечим вар?

⁷ Хүсусијјәтләримиздә дәјишиклик етмәк истәдијимиз үчүн, ола билсин, достларымыздан вә аилә үзвләримиздән кимсә бизи әлә салсын (1 Бут. 4:3, 4). Онлар дејә биләр ки, истәдијимиз кими јашамаға ихтијарымыз вар, һеч ким бизә јол ҝөстәрмәмәлидир. Амма әслиндә, онлар азад дејилләр, Шејтанын идарә етдији дүнјанын тәсири алтындадырлар. (Ромалылара 12:1, 2 ајәләрини охујун.) Һәр биримизин гаршысында  сечим вар: ја биз ҝүнаһын вә Шејтанын дүнјасынын формалашдырдығы көһнә шәхсијјәти әјнимиздә сахлајаҹағыг, ја да изин верәҹәјик ки, Јеһова бизи дәјишиб мүмкүн олан гәдәр јахшы инсана чевирсин (Әшј. 64:8).

8. Көһнә шәхсијјәтдән јаха гуртармағымыз үчүн һансы көмәјимиз вар?

⁸ Јеһова билир ки, јанлыш дүшүнҹәни дәјишмәк вә пис вәрдишләрдән јаха гуртармаг үчүн мүәјјән вахт вә ҝүҹ сәрф етмәк лазымдыр (Зәб. 103:13, 14). Амма Јеһова Кәламы, мүгәддәс руһу вә тәшкилаты васитәсилә бизә һикмәт вә ҝүҹ верир, һәмчинин лазыми дәјишикликләр етмәјимизә көмәк едир. Шүбһәсиз, сиз Јеһованын көмәјини артыг ҝөрмүсүнүз. Бәс көһнә шәхсијјәти әјниниздән чыхармаг вә вәфтизә јарарлы олмаг үчүн даһа нәләр едә биләрсиниз?

9. Аллаһын Кәламы сизә неҹә көмәк едә биләр?

⁹ Мүгәддәс Китабын көмәји илә өзүнүзү јахшыҹа тәһлил един. Аллаһын Кәламы ҝүзҝүјә бәнзәјир. Бизә дүшүнҹәмизи, данышығымызы, давранышымызы јохламаға көмәк едир (Јаг. 1:22—25). Мүгәддәс Китаб дәрси кечән мүәллиминиз вә ја башга јеткин мәсиһи сизә өзүнүзү тәһлил етмәјин јолуну ҝөстәрә биләр. Мәсәлән, онлар Кәлам васитәсилә һәм зәиф, һәм дә ҝүҹлү ҹәһәтләринизи ҝөрмәјә көмәк едә биләрләр. Нәшрләримиздән пис вәрдишләринизи тәрҝитмәјә көмәк едәҹәк мәсләһәтләр тапмағын үсулуну өјрәдә биләрләр. Јеһова да сизин көмәјинизә чатмаға һәмишә һазырдыр. О сизи һамыдан јахшы таныдығы үчүн сизә көмәк етмәјин ән јахшы јолуну билир (Мәс. 14:10; 15:11). Одур ки, Она дуа етмәји вә Кәламыны һәр ҝүн мүталиә етмәји вәрдишә чевирин.

10. Елинин һадисәсиндән нә өјрәндиниз?

¹⁰ Јеһованын ән јахшы гајда-ганунлар вердијинә бүтүн гәлбинизлә инанын. Онун бујурдуғу һәр бир шеј бизим хејримизәдир. Јеһованын гајда-ганунларына ујғун јашајанларда өзүнә һөрмәт һисси јараныр, онлар һәјатда мәна тапырлар вә әсл хошбәхтлији дујурлар (Зәб. 19:7—11). Јеһованын бујругларына әмәл етмәјәнләр исә ҝүнаһлы бәдәнин әмәлләринин гулу олурлар вә бунун аҹы нәтиҹәләрини бичирләр. Ели адлы бир нәфәрин башына ҝәләнләр буна әјани сүбутдур. О, Јеһованы севән бир аиләдә бөјүјүб. Амма Ели јенијетмә јашларында өзүнә јахшы достлар сечмәди. О, наркотик гәбул етмәјә, әхлагсыз һәјат јашамаға вә оғурлуг етмәјә башлады. Ели фикир верди ки, һәдсиз гәзәбли, зоракы инсана чеврилиб. О дејир: «Бир мәсиһи кими етмәмәли олдуғум һәр әмәли төрәдирдим». Амма Ели ушаглыгдан өјрәндикләрини унутмамышды вә сонрадан Мүгәддәс Китабы јенидән өјрәнмәјә башлады. О, вар ҝүҹү илә чалышды ки, пис вәрдишләриндән гуртулсун вә 2000-ҹи илдә вәфтиз олунду. Јеһованын ганунларына ујғун јашамағын она һансы хејри олду? О дејир: «Инди үрәјим раһатдыр вә виҹданым тәмиздир» *. Бу нүмунә ҝөстәрир ки, Јеһованын бујругларына әмәл етмәјәнләр өзләринә зијан вурурлар. Һәтта бу һалда белә Јеһова онлара дәјишмәјә көмәк етмәјә һазырдыр.

11. Јеһова нәләрә нифрәт едир?

¹¹ Јеһованын нифрәт етдији шејләрә нифрәт един (Зәб. 97:10). Мүгәддәс Китабда јазылыб ки, «тәкәббүрлә бахан ҝөзләр, јалан данышан дил, ҝүнаһсыз ган төкән әлләр»  Јеһова үчүн ијрәнҹдир (Мәс. 6:16, 17). О һәмчинин «зоракы, һијләҝәр адамдан» икраһ едир (Зәб. 5:6). Јеһова бу ҹүр әмәлләрә о гәдәр нифрәт едир ки, Нуһ пејғәмбәрин дөврүндә дүнја зоракылыгла долдуғу үчүн бүтүн пислији јер үзүндән силмишди (Јар. 6:13). Башга бир саһәјә бахаг. Мәлаки пејғәмбәр васитәсилә Јеһова демишди ки, ҝүнаһсыз һәјат јолдашындан бошанмаг үчүн фәнд гуранлара нифрәт едир. Јеһова онларын ибадәтини гәбул етмир вә давранышларына ҝөрә Она һесабат верәҹәкләр (Мәл. 2:13—16; Ибр. 13:4).

12. «Писликдән икраһ етмәк» нә демәкдир?

¹² Јеһова Аллаһ бујурур ки, «писликдән икраһ» едәк (Ром. 12:9). «Икраһ» сөзү чох ҝүҹлү бир һисси билдирир. Бу, нәјәсә һәдсиз дәрәҹәдә нифрәт етмәк, ондан ијрәнмәк демәкдир. Мәсәлән, әҝәр сизә бир габ ијләнмиш јемәји јемәк тәклиф олунсајды, нә едәрдиниз? Адам һәтта буну фикирләшәндә белә үрәји ағзына ҝәлир. Ејнилә Јеһованын бәјәнмәдији иши ҝөрмәк фикринин өзү биздә икраһ ојатмалыдыр.

13. Нәјә ҝөрә ағлымызы горумалыјыг?

¹³ Ағлынызы горујун. Бизим фикирләримиз әмәлләримизә тәсир едир. Елә буна ҝөрә дә Иса Мәсиһ демишди ки, ҹидди ҝүнаһ етмәјимизә ҝәтириб чыхаран фикирләри өзүмүздән узаглашдыраг (Мәт. 5:21, 22, 28, 29). Ахы биз сәмави Атамызын гәлбини севиндирмәк истәјирик, елә дејилми? Буна ҝөрә дә чох ваҹибдир ки, ағлымыза ҝәлән истәнилән пис фикри дәрһал говаг!

14. Данышығымыз нәдән хәбәр верир вә өзүмүзә һансы суаллары вермәлијик?

¹⁴ Данышығыныза нәзарәт един. Иса демишди: «Ағыздан чыхан шејләр... үрәкдән ҝәлир» (Мәт. 15:18). Доғрудан да, бизим данышығымыз дахилән неҹә инсан олдуғумуздан хәбәр верир. Өзүнүзә нөвбәти суаллары верин: «Һәгигәти демәјим мәни пис вәзијјәтә салса да, јалан данышмамаға чалышырам? Бир евли инсан кими, диггәтли олураммы ки, әкс ҹинсдән олан инсанла флирт етмәјим? Позғун данышыгдан вәбадан гачырмыш кими гачырам? Кимсә әһвалымы корлајанда сакит шәкилдә ҹаваб верирәм?» Бу суаллар үзәриндә дүшүнмәјин сизә бөјүк көмәји дәјә биләр. Данышығы палтарын дүјмәләринә бәнзәтмәк олар. Дүјмәләри ачанда палтары әјнимиздән раһат чыхара билирик. Еләҹә дә данышығынызда јалан, тәһгирамиз вә  әдәбсиз сөзләр ишләтмәсәниз, көһнә шәхсијјәти әјниниздән чыхармаг даһа асан олаҹаг.

15. Көһнә шәхсијјәтимизи «дирәјә мыхламаг» нә демәкдир?

¹⁵ Гәти тәдбир ҝөрүн. Һәвари Булус һәјат тәрзимиздә дәјишиклик етмәјин ваҹиблијини вурғуламаг үчүн тәсирли нүмунә чәкмишди. Јазмышды ки, биз көһнә шәхсијјәти дирәјә мыхламалыјыг (Ром. 6:6). Иса Мәсиһ Јеһованы разы салмагдан өтрү дирәкдә мыхланмаға һазыр олдуғу кими, биз дә Јеһованы разы салмагдан өтрү Онун нифрәт етдији әмәлләри өлдүрмәјә һазыр олмалыјыг. Јалныз бу аддымлары атдығымыз тәгдирдә тәмиз виҹдана саһиб олаҹағыг вә әбәди јашамаг үмидимиз олаҹаг (Јәһ. 17:3; 1 Бут. 3:21). Унутмајын ки, Јеһова бизә ҝөрә Өз гајда-ганунларыны дәјишмәјәҹәк, Онун гајда-ганунларына ујғун ҝәлмәк үчүн биз дәјишмәлијик (Әшј. 1:16—18; 55:9).

16. Нәјә ҝөрә ҝүнаһлы арзуларла мүбаризә апармаға давам етмәлисиниз?

¹⁶ Ҝүнаһлы арзуларынызла мүбаризә апармаға давам един. Һәтта вәфтиз олунандан сонра да сиз ҝүнаһлы арзуларынызла мүбаризә апараҹагсыныз. Ҝәлин Маурисју адлы бир нәфәрин һәјатына нәзәр салаг. О, ҝәнҹ јашларындан һомосексуал һәјат тәрзи сүрүрдү. Сонралар Маурисју, Јеһованын хидмәтчиләри илә растлашды вә Мүгәддәс Китабы өјрәнмәјә башлады. О, һәјатында дәјишикликләр етди вә 2002-ҹи илдә вәфтиз олунду. Маурисју артыг узун илләрдир ки, Јеһоваја сәдагәтлә хидмәт едир. Буна бахмајараг, о дејир: «Етираф етмәлијәм ки, бәзән јанлыш арзуларла мүбаризә апарырам». Маурисју гојмур ки, бу шејләр ону руһдан салсын. О дејир: «Бу арзуларыма јенилмәмәклә Јеһованын гәлбини севиндирмәјим мәни үрәкләндирир» *.

17. Набиһанын һадисәсиндә сизи нә руһландырды?

¹⁷ Дуада Јеһовадан көмәк истәјин; өз ҝүҹүнүзә јох, Јеһованын мүгәддәс руһуна архаланын (Гал. 5:22; Филип. 4:6). Көһнә шәхсијјәти әјнимиздән чыхармаг вә бир даһа ҝејинмәмәк үчүн чох гәтијјәтли олмалыјыг. Набиһа адлы бир гадынын һадисәсинә нәзәр салаг. Алтыҹа јашы оланда атасы ону атыб ҝетмишди. Бу, Набиһанын  гәлбинә дәрин јара вурмушду. Бөјүдүкҹә Набиһа чох гәзәбли, агрессив бир инсан олду. О, наркотик сатышы илә мәшғул олмаға башлады. Буна ҝөрә һәбс олунду вә бир нечә илини һәбсханада кечиртди. Һәбсханаја ҝәлән Јеһованын Шаһидләри онунла Мүгәддәс Китабы өјрәнмәјә башладылар. Набиһа һәјатында көклү дәјишикликләр етди. О дејир: «Пис вәрдишләримин бәзиләриндән әл чәкмәк мәнә о гәдәр дә чәтин олмады. Лакин сигарети атанаҹан чох әзаб чәкдим». Набиһа сигарети тәрҝитмәк үчүн бир илдән чох мүбаризә апарды вә нәһајәтдә, бу асылылыгдан јаха гуртара билди. О, буну неҹә баҹардығыны бөлүшүр: «Ән бөјүк көмәк Јеһоваја усанмадан дуа етмәјим олду». Инди о һамыја дејир: «Әминәм ки, әҝәр мәним кими инсан Јеһованы разы салмаг үчүн һәјатында белә дәјишикликләр едә билдисә, демәли, буну һәр кәс баҹарар!» *

18. 1 Коринфлиләрә 6:9—11 ајәләринә әсасән, Јеһованын бир чох хидмәтчиси нәјә наил олуб?

¹⁸ Биринҹи әсрдә Јеһованын Мәсиһлә бирҝә падшаһлыг етмәк үчүн сечдији бәзи инсанлар әввәлләр пис әмәлләрлә мәшғул олмушдулар. Онларын арасында әхлагсызлар, һомосексуаллар вә оғрулар вар иди. Амма Јеһованын мүгәддәс руһунун көмәји илә онлар өзләриндә дәјишикликләр едә билмишдиләр. (1 Коринфлиләрә 6:9—11 ајәләрини охујун.) Ејнилә бу ҝүн дә милјонларла инсан Мүгәддәс Китабын көмәји илә һәјатларында дәјишикликләр едиб *. Бу инсанлар дәринә көк салмыш вәрдишләриндән јаха гуртара билибләр. Онларын нүмунәси сүбут едир ки, сиз дә пис вәрдишләринизи тәрҝидиб, вәфтиз олунмаг үчүн јарарлы ола биләрсиниз.

19. Нөвбәти мәгаләдә нә һагда данышаҹағыг?

¹⁹ Вәфтиз олунмаг истәјәнләр көһнә шәхсијјәти әјинләриндән чыхармагла јанашы, јени шәхсијјәти дә әјинләринә ҝејинмәлидирләр. Нөвбәти мәгаләдән өјрәнәҹәјик ки, онлар буну неҹә едә биләрләр вә башгалары онлара бу саһәдә неҹә көмәк едә биләр.