1. Бүтүн инсанлар һансы мүһүм гәрары вермәлидир?

 БУ ҜҮН инсанлар мүһүм гәрар вермәлидирләр. Онлар ја Каинатын һөкмдары олан Јеһова Аллаһын тәрәфини тутмалыдырлар, ја да Онун гәддар дүшмәни олан Шејтан Иблисин. Үчүнҹү јол јохдур. Верәҹәкләри гәрардан онларын әбәди јашајыб-јашамајаҹаглары асылыдыр (Мәт. 25:31—33, 46). «Бөјүк мүсибәт» дөврүндә онлар ја хилас олмаг үчүн, ја да мәһв олмаг үчүн ишарәләнәҹәкләр (Вәһј 7:14; 14:9—11; Һизг. 9:4, 6).

2. а) Ибраниләрә 10:35—39 ајәләри бизи нәјә тәшвиг едир? б) «Вәһј» китабы бизә һансы саһәдә көмәк едә биләр?

² Ибраниләрә 10:35—39 ајәләрини охујун. Әҝәр сиз Јеһованын һакимијјәтинин тәрәфини тутмаға гәрар вермисинизсә, һикмәтли аддым атмысыныз. Сөзсүз ки, сиз башгаларына да дүзҝүн гәрар вермәјә көмәк етмәк истәјирсиниз. Бунун үчүн онларла «Вәһј» китабында јазыланлар һагда даныша биләрсиниз. Бу мөһтәшәм китабда Јеһоваја гаршы чыханларын агибәтиндән, еләҹә дә Онун һакимијјәтини сәдагәтлә дәстәкләјәнләрин алаҹағы немәтләрдән бәһс олунур. Биз бу ваҹиб һәгигәтләри дәриндән арашдырмалыјыг. Бунун сајәсиндә Јеһоваја хидмәт етмәк гәтијјәтимиз мөһкәмләнәҹәк. Бундан әлавә, орадан өјрәндикләримизлә башгаларына да дүзҝүн гәрар вермәјә вә бу гәрара бағлы галмаларына көмәк едә биләрик.

3. Бу мәгаләдә нә өјрәнәҹәјик?

³ Бу мәгаләдә нөвбәти суалларын ҹавабыны тапаҹағыг: Аллаһын һакимијјәтинин тәрәфиндә оланлары ҝәләҹәкдә нәләр ҝөзләјир? Бәс «Вәһј» китабында тәсвир олунан ал-гырмызы рәнҝли вәһши һејваны дәстәкләјәнләрлә нә баш верәҹәк?

4. Һәвари Јәһја Иса илә бирликдә ҝөјдә кимләрин олдуғуну ҝөрүр?

⁴ Һәвари Јәһја вәһјдә Јеһованын һакимијјәтини дәстәкләјән вә әбәди немәтләр алан ики груп ҝөрүр. Биринҹи групда оланларын сајы 144 000 нәфәрдир (Вәһј 7:4). Јәһја онларын ҝөјдә Сион дағында Исанын јанында дурдуғуну ҝөрүр (Вәһј 14:1). Онлар јер үзүндән сечилибләр вә Иса илә бирликдә ҝөјдә гурулан Падшаһлыгда јер үзүнү идарә едәҹәкләр (Вәһј 5:9, 10; 14:3, 4).

5. 144 000 нәфәрин јер үзүндә галан һиссәсини тезликлә нә ҝөзләјир?

⁵ 144 000 нәфәри тәшкил едәҹәк минләрлә мәсһ олунмуш мәсиһиләр әсрләр әрзиндә сечилиб (Лука 12:32; Ром. 8:17). Јәһјаја ҝөрүнтүдә дејилир ки, ахырзаманда онларын јалныз аз гисми јер үзүндә олаҹаг. Бөјүк мүсибәт башламаздан өнҹә јер үзүндән олан мәсһ олунмушлар Јеһованын разылығынын әламәти олараг сонунҹу дәфә мөһүрләнәҹәк (Вәһј 7:2, 3; 12:17). Бөјүк мүсибәтин мүәјјән бир мәгамында исә онлар ҝөјә галдырылаҹаглар вә 144 000 нәфәрин артыг ҝөјләр һәјатына дирилмиш һиссәсинә говушаҹаглар. Онлар Аллаһын Падшаһлығында Иса илә бирликдә һакимијјәт сүрәҹәкләр (Мәт. 24:31; Вәһј 5:9, 10).

6, 7. а) Һәвари Јәһја даһа сонра кимләри ҝөрүр вә онлар һагда нә мәлумдур? б) Нәјә ҝөрә Вәһј 7-ҹи фәсил һәм јер үзүндәки мәсһ олунмушлар үчүн, һәм дә бөјүк издиһам үчүн әһәмијјәт кәсб етмәлидир?

⁶ Јәһја 144 000 нәфәри ҝөрәндән сонра «бөјүк бир издиһам» ҝөрүр, амма онларын сајы мәлум дејил (Вәһј 7:9, 10). Бәс онлар һагда нә мәлумдур? Јәһјаја ҝөрүнтүдә нөвбәти сөзләр дејилир: «Бунлар бөјүк мүсибәтдән чыханлардыр. Онлар либасларыны Гузунун ганында јујуб ағардыблар» (Вәһј 7:14). Бөјүк мүсибәтдән сағ чыхандан сонра бөјүк издиһам јер үзүндә јашајаҹаг вә мөһтәшәм немәтләр алаҹаг (Зәб. 37:9—11, 27—29; Мәс. 2:21, 22; Вәһј 7:16, 17).

⁷ Бәс шәхсән биз өзүмүзү Вәһј 7-ҹи фәсилдә тәсвир олунан сәһнәдә ҝөрүрүк? Фәрги јохдур, ҝөјдә, јахуд јер үзүндә јашамаг үчүн сечилмишик, һәр биримиз өзүмүзү орада ҝөрмәлијик. Һәгигәтән дә, Аллаһын һәр ики групдан олан хидмәтчиләрини чох ҝөзәл дөвран ҝөзләјир! Онда Јеһованын һакимијјәтинин тәрәфини тутдуғумуз үчүн севинҹимизин һәдд-һүдуду олмајаҹаг. «Вәһј» китабындан бөјүк мүсибәтлә бағлы даһа нәләр өјрәнирик? (Мәт. 24:21).

8. Бөјүк мүсибәт неҹә башлајаҹаг вә әксәр инсанлар неҹә давранаҹаг?

⁸ Өтән мәгаләдә гејд олундуғу кими, бу дүнјанын сијаси гүввәләри јалан динин дүнја империјасы олан Бөјүк Бабилә һүҹум едәҹәк (Вәһј 17:16, 17). Бунунла да бөјүк мүсибәт башлајаҹаг. Бәс һәмин вахт Јеһоваја чох сајда инсанын ибадәт етмәјә башлајаҹағыны ҝөзләмәлијик? Хејр. Әксинә, Вәһј 6-ҹы фәсилдән өјрәнирик ки, һәмин дөврдә Јеһоваја хидмәт етмәјәнләр даға бәнзәдилән сијаси вә коммерсија тәшкилатларына сығынаҹаглар. Онлар сәмави Падшаһлығын тәрәфиндә олмадыгларына ҝөрә Јеһова онлара әлејһдарлары кими бахаҹаг (Лука 11:23; Вәһј 6:15—17).

9. Бөјүк мүсибәт заманы Јеһованын халгы башгаларындан нә илә фәргләнәҹәк вә бу нәјә ҝәтириб чыхараҹаг?

 ⁹ Јеһованын садиг хидмәтчиләри бу чәтин дөврдә башгаларындан фәргләнәҹәкләр. Онлар һәмин вахт да јер үзүндә Јеһова Аллаһа хидмәт едән вә «вәһши һејваны» дәстәкләмәјән јеҝанә халг олаҹаглар (Вәһј 13:14—17). Онларын гәти мөвгеји Јеһованын әлејһдарларыны гәзәбләндирәҹәк. Беләҹә, халглар бирлији бүтүн дүнјада олан Јеһованын халгына һүҹум едәҹәк. Онларын бу азғын давранышы Мүгәддәс Китабда Мәҹуҹ өлкәсиндән олан Јәҹуҹун һүҹуму адланыр (Һизг. 38:14—16).

10. Вәһј 19:19—21 ајәләриндә тәсвир олундуғу кими, Јеһова халгына гаршы һүҹума ҹаваб олараг нә едәҹәк?

¹⁰ Онларын бу амансыз һүҹумуна ҹаваб олараг Јеһова нә едәҹәк? О дејир: «Мән гәзәбдән алышыб-јанаҹағам» (Һизг. 38:18, 21—23). Вәһј 19-ҹу фәсилдә сонра нәләрин баш верәҹәји јазылыб. Јеһова Оғлуну ҝөндәрәҹәк ки, халгыны горусун вә дүшмәнләрини мәғлуб етсин. Иса Мәсиһ «сәмави гошунла», јәни садиг мәләкләрлә вә 144 000-лә бирликдә әкс һүҹума кечәҹәк (Вәһј 17:14; 19:11—15). Бу мүһарибә нә илә битәҹәк? Јеһоваја гаршы чыхан бүтүн инсанлар вә тәшкилатлар тамамилә мәһв олаҹаг! (Вәһј 19:19—21 ајәләрини охујун.)

11. Һансы хүсуси мәрасим «Вәһј» китабынын зирвә нөгтәсидир?

¹¹ Тәсәввүр едирсиниз, Аллаһын дүшмәнләринин көкү кәсиләндә јер үзүндә сағ галан садиг инсанлар һансы һиссләри кечирәҹәк? Һәмин вахт севинҹимизин һәдд-һүдуду олмајаҹаг! Бөјүк Бабилин мәһвинә ҝөрә ҝөјдә бөјүк севинҹ јашанаҹаг. Амма баш тутаҹаг бир мәрасим даһа бөјүк севинҹә сәбәб олаҹаг (Вәһј 19:1—3). Сөһбәт Гузунун тојундан ҝедир, бу, «Вәһј» китабынын зирвә нөгтәсидир (Вәһј 19:6—9).

12. Вәһј 21:1, 2 ајәләринә әсасән, Гузунун тоју нә вахт баш тутаҹаг?

¹² Тој нә вахт баш тутаҹаг? Армаҝеддон мүһарибәсиндән бир гәдәр әввәл 144 000 нәфәрин һамысы ҝөјдә олаҹаг. Амма Гузунун тоју һәмин вахт олмајаҹаг. (Вәһј 21:1, 2 ајәләрини охујун.) Гузунун тоју Армаҝеддон мүһарибәсиндән вә Аллаһын бүтүн дүшмәнләринин мәһвиндән сонра баш тутаҹаг (Зәб. 45:3, 4, 13—17).

13. Гузунун тоју бу иттифага дахил оланлар үчүн нә мәна кәсб едир?

¹³ Гузунун тоју бу иттифага дахил оланлар үчүн нә мәна кәсб едир? Никаһ оғланла гызы бирләшдирдији кими, Падшаһымыз Иса илә «ҝәлини» олан 144 000 нәфәрин мәҹази никаһы да онлары бирләшдирәҹәк. Бу мүһүм мәрасимлә мин ил әрзиндә јер үзүнү идарә едәҹәк јени һөкумәт өз фәалијјәтинә башлајаҹаг (Вәһј 20:6).

14, 15. Вәһј 21-ҹи фәсилдә 144 000 нәфәр нәјә бәнзәдилир? (Үз габығындакы шәклә бахын.)

¹⁴ Сонра Вәһј 21-ҹи фәсилдә 144 000 нәфәр «Јени Јерусәлим» адлы һәдсиз дәрәҹәдә ҝөзәл бир шәһәрә бәнзәдилир (Вәһј 21:2, 9). Бу шәһәрин бүнөврәсиндә 12 даш вар вә «дашларын үстүндә Гузунун 12 һәварисинин ады» јазылыб. Нәјә ҝөрә бу мәгам Јәһјанын диггәтини ҹәлб едир? О, бу дашлардан биринин үстүндә өз адыны ҝөрүр.  Бу, чох бөјүк шәрәфдир! (Вәһј 21:10—14; Ефес. 2:20).

¹⁵ Бу мәҹази шәһәрин бәнзәри јохдур. Онун баш күчәси халис гызылдыр. Һәр бири мирвари олан 12 дарвазасы вар. Диварлары, бүнөврәси гијмәтли даш-гашларла бәзәдилиб. Шәһәрин өлчүләри һәр тәрәфдән мүкәммәл бәрабәрликдәдир (Вәһј 21:15—21). Амма шәһәрдә бир шеј чатышмыр. Ҝөрүн Јәһја даһа сонра нә дејир: «Мән орада мәбәд ҝөрмәдим, чүнки бу шәһәрин мәбәди Гадир Аллаһ Јеһова вә Гузудур. Шәһәрин ҝүнәш вә ај ишығына еһтијаҹы јохдур, чүнки ону Аллаһын ҹалалы ишыгландырыр вә Гузу шәһәрин чырағыдыр» (Вәһј 21:22, 23). Јени Јерусәлими тәшкил едән һәр бир кәс бирбаша Јеһованын һүзурунда олаҹаг. Буна ҝөрә дә артыг онларын мәбәдә еһтијаҹы олмајаҹаг (Вәһј 22:3, 4). Һәмчинин онлар Аллаһа мүгәддәс хидмәти ҝөјдә баш каһин олан Иса Мәсиһин рәһбәрлији алтында иҹра едәҹәкләр (Ибр. 7:27). Бу сәбәбләрә ҝөрә Јеһова вә Иса бу шәһәрин мәбәди адланыр.

16. Аллаһын Падшаһлығынын миниллик һакимијјәти дөврүндә нәләр олаҹаг?

¹⁶ Мәсһ олунмушлар бу шәһәр һагда дүшүнәндә үрәкләри севинҹ һисси илә долур. Амма јер үзүндә јашамаг үмиди оланлар үчүн дә бу шәһәр мараг кәсб етмәлидир. Чүнки Аллаһын Падшаһлығынын миниллик һакимијјәти дөврүндә Јени Јерусәлим јер үзүнә сајсыз-һесабсыз немәтләр бәхш едәҹәк. Јәһја бу немәтләрин һәјат сујунун ахдығы чај кими ахдығыны ҝөрүр. Һәмчинин «чајын һәр ики саһилиндә һәјат ағаҹлары» битир. «Онларын јарпаглары халгларын шәфа тапмасы үчүндүр» (Вәһј 22:1, 2). Јер үзүндә јашајан бүтүн инсанлара бу немәтләрдән бәһрәләнмәк нәсиб олаҹаг. Тәдриҹән Јеһоваја итаәт едән һәр бир кәс камиллијә јетишәҹәк. Артыг нә хәстәлик, нә ағры, нә дә кәдәр ҝөз јашлары олмајаҹаг (Вәһј 21:3—5).

17. Вәһј 20:11—13 ајәләринә әсасән, Мәсиһин миниллик һакимијјәтинин ҝәтирдији немәтләр кимләрә нәсиб олаҹаг?

¹⁷ Бу мөһтәшәм немәтләрдән кимләр јарарланаҹаг? Илк нөвбәдә, Армаҝеддондан сағ чыхан бөјүк издиһам, о ҹүмләдән јени дүнјада доғулаҹаг ушаглар. Һәмчинин Вәһј 20-ҹи фәсилдә вәд олунур ки, өлүләрин дирилмәси олаҹаг. (Вәһј 20:11—13 ајәләрини охујун.) Јеһоваја  садиг олмуш «салеһләр»лә јанашы, Онун һагда өјрәнмәк имканы олмајан «гејри-салеһләр» јер үзүндә јашамаг үчүн һәјата гајтарылаҹаг (Һәв. 24:15; Јәһ. 5:28, 29). Бәс бу, о демәкдир ки, һамы дириләҹәк? Хејр! Сағ икән Јеһоваја хидмәт етмәк имканыны гәти шәкилдә, билә-билә рәдд едәнләр дирилмәјәҹәкләр. Онларын фүрсәти вар иди, амма онлар ҝөстәрдиләр ки, јерүзү Ҹәннәтдә јашамаға лајиг дејилләр (Мәт. 25:46; 2 Салон. 1:9; Вәһј 17:8; 20:15).

18. Миниллијин сонунда бәшәријјәт һансы вәзијјәтдә олаҹаг?

¹⁸ Артыг мин илин сонунда јер үзүндә јашајан һәр бир кәс камиллијә јетишәҹәк. Һеч ким Адәмдән мирас алдығымыз ҝүнаһын әсарәти алтында олмајаҹаг (Ром. 5:12). Онун ҝүнаһынын ләнәти тамамилә арадан галдырылаҹаг. Бәли, миниллијин сонунда инсанлар камиллијә јетишәҹәк вә бу мәнада онлар «дириләҹәкләр» (Вәһј 20:5).

19. Нәјә ҝөрә инсанлар сонунҹу дәфә сынанмалыдыр?

¹⁹ Мин ил битәндән сонра Шејтан дибсиз гујудан азадлыға бурахылаҹаг вә она инсанлары сынамаға изин вериләҹәк. Билдијимиз кими, камил олан Иса Мәсиһ Шејтанын бүтүн ҹәһдләринә бахмајараг, Јеһоваја сәдагәтини горумушду. Ҝөрәсән, артыг камил олан инсанлар Иса Мәсиһ кими сәдагәтләрини горујаҹаглар? Һәмин вахт һәр кәсин бу суала ҹаваб вермәк имканы олаҹаг (Вәһј 20:7). Сонунҹу сынаг заманы садиг галанлар әбәди һәјат алаҹаглар вә нәһајәт, әсл азадлыға говушаҹаглар (Ром. 8:21). Јеһоваја аси чыхан кәсләр исә Шејтан вә онун ҹинләри илә бирҝә әбәдилик мәһв едиләҹәкләр (Вәһј 20:8—10).

20. «Вәһј» китабындакы һејрәтамиз пејғәмбәрликләр сиздә һансы һиссләри доғурур?

²⁰ «Вәһј» китабына етдијимиз бу гыса сәјаһәт заманы һансы һиссләри кечирдиниз? Јәгин, орадакы мөһтәшәм пејғәмбәрликләрин ичиндә өзүнүзү ҝөрәндә чох севиндиниз. Бәс бу сизи башгаларыны да пак ибадәтә дәвәт етмәјә тәшвиг етди? (Вәһј 22:17). Гаршыда бизи ҝөзләјән мараглы, һәјәҹан долу һадисәләри мүзакирә етдик. Һәвари Јәһја кими, бизим дә үрәјимиздән бу сөзләри демәк кечир: «Амин! Ҝәл, Ағамыз Иса» (Вәһј 22:20).