1, 2. Бир-биримизә хүсуси мәһәббәт ҝөстәрмәк үчүн һансы сәбәбләримиз вар?

БИР-БИРИМИЗӘ хүсуси мәһәббәт ҝөстәрмәк үчүн әсаслы сәбәбләримиз вар. Бунлардан бәзиләри һансылардыр? «Мәсәлләр» китабындакы нөвбәти ајәләр бу суала ҹаваб верир: «Хејирхаһлығы, сәдагәти әлдән бурахма... Онда Аллаһ да, бәндә дә үзүнә хош бахар». «Хејирхаһ адам өзүнә хејир едир». «Салеһлијә, лүтфкарлыға ҹан атан һәјата... јетишәр» (Мәс. 3:3, 4; 11:17; 21:21) *.

² Бу ајәләрдән ајдын ҝөрмәк олар ки, диндашларымыза әмәлдә мәһәббәт ҝөстәрмәк үчүн әсаслы сәбәбләримиз вар. Биринҹиси, мәһәббәт ҝөстәрмәјимиз бизи Јеһованын ҝөзүндә дәјәрли едир. Икинҹиси, бу бизим өзүмүзүн хејринәдир. Мәсәлән, диндашларымызла арамызда мөһкәм достлуг мүнасибәти јараныр. Үчүнҹүсү, бунун сајәсиндә ҝәләҹәкдә бол немәтләр, о ҹүмләдән әбәди һәјат мүкафатыны алаҹағыг. Бир дәфә Јонатан Давуддан хаһиш етмишди: «Һәм сағлығымда, һәм дә өләндән сонра мәнә Јеһованын мәһәббәтини ҝөстәр» (1 Ишм. 20:14). Биз дә бир-биримизә мәһәббәт ҝөстәрмәлијик вә ҝөрдүјүмүз кими, бунун үчүн әсаслы сәбәбләримиз вар.

3. Бу мәгаләдә һансы суаллара ҹаваб тапаҹағыг?

³ Бу мәгаләдә дөрд суала ҹаваб тапаҹағыг. Кимләрә хүсуси мәһәббәт ҝөстәрмәлијик? «Рут» китабындан мәһәббәт һагда нә өјрәнирик? Мәһәббәтимизи неҹә ҝөстәрә  биләрик? Мәһәббәт ҝөстәрмәк һансы бәһрәни ҝәтирир?

4. Мәһәббәт ҝөстәрмәкдә Јеһоваја неҹә бәнзәјә биләрик? (Марк 10:29, 30).

⁴ Өтән мәгаләдән өјрәндијимиз кими, Јеһова јалныз Ону севәнләрә вә Она гуллуг едәнләрә хүсуси, түкәнмәз мәһәббәт ҝөстәрир (Дән. 9:4). Биз «Аллаһын севимли өвладлары кими Она бәнзәмәјә» чалышырыг (Ефес. 5:1). Иман баҹы-гардашларымыза гаршы дәрин вә түкәнмәз мәһәббәт јетишдирмәк истәјирик. (Марк 10:29, 30 ајәләрини охујун.)

5, 6. Бүтүн инсанлара ҝөстәрилән мәһәббәти нүмунә әсасында изаһ един.

⁵ Јәгин разылашарсыныз ки, бу ҹүр мәһәббәти даһа дәриндән баша дүшсәк, диндашларымызла мүнасибәтдә ону даһа јахшы тәзаһүр етдирәҹәјик. Бунун үчүн ҝәлин ҝөрәк диндашларымыза ҝөстәрдијимиз мәһәббәт бүтүн инсанлара ҝөстәрдијимиз мәһәббәтдән нә илә фәргләнир. Бир нүмунәјә бахаг.

⁶ Һәвари Булусун ҝәми гәзасына дүшдүјү вахты хатырлајын. Онлар ҝәми гәзасындан хилас олуб Малта адасынын саһилинә ҝәлиб чыхмышдылар. Малта ҹамаатынын Булусҝиллә һеч бир танышлығы јох иди. Амма онлара мисилсиз инсанпәрвәрлик ҝөстәрдиләр (Һәв. 28:2, 7). Малта ҹамааты дара дүшмүш истәнилән адамла белә давранарды. Буна ҝөрә дә дејә биләрик ки, онларын ҝөстәрдији мәһәббәт бүтүн инсанлара гаршы ҝөстәрилән мәһәббәтдир.

7, 8. а) Мәһәббәт ҝөстәрмәјә инсаны нә тәшвиг едир? б) Нәјә ҝөрә «Рут» китабына нәзәр салаҹағыг?

⁷ Инди исә ҝәлин Давудла Јонатанын нүмунәси әсасында ҝөрәк диндашларымыза гаршы неҹә мәһәббәт ҝөстәрмәлијик. Јонатанын атасы Давуду өлдүрмәк истәсә дә, Давуд Јонатана мәһәббәт ҝөстәрмишди. Јонатанын өлүмүндән илләр сонра да Давуд Јонатанын оғлу Мефибошетә мәһәббәт ҝөстәрмишди. Сөзсүз ки, Давуд һәр адамла белә давранмазды. Онун Јонатанла мөһкәм достлуг мүнасибәти вар иди, буна ҝөрә она хүсуси мәһәббәт ҝөстәрмишди (1 Ишм. 20:9, 14, 15; 2 Ишм. 4:4; 8:15; 9:1, 6, 7).

⁸ Һәмчинин «Рут» китабындан да мәһәббәт һаггында чох шеј өјрәнә биләрик. Бу китабда ады чәкилән бәзи инсанлар мәһәббәт хүсусијјәтини неҹә ҝөстәрмишдиләр? Онлардан өјрәндијимизи өз јығынҹағымызда неҹә тәтбиг едә биләрик? *

9. Нәјә ҝөрә Наимә дүшүнүрдү ки, Јеһова ондан үз дөндәриб?

⁹ «Рут» китабында Наимә һаггында, онун ҝәлини Рут вә әринин гоһуму олан Буәз һаггында данышылыр. Буәз мөмин бир инсан иди. Исраилдә гытлыг оланда Наимә, һәјат јолдашы вә ики оғуллары Муаба көчмүшдүләр. Орада оларкән Наимәнин әри вәфат етди. Даһа сонра оғуллары евләнди, амма әфсус ки, онлар да өлдү (Рут 1:3—5; 2:1). Бу бәлалар Наимәни ҝетдикҹә даһа дәрин кәдәрә гәрг етмишди. Јашадығы фаҹиәләрә ҝөрә онун гәлби губар бағламышды. Һәтта елә дүшүнүрдү ки, Јеһова она дүшмән кәсилиб. О, белә сөзләр демишди: «Јеһованын мәнә гәзәби тутуб». «Гүдрәт Саһиби һәјатымы аҹы етди».  «Јеһова мәнә дүшмән кәсилди, Гүдрәт Саһиби башыма бәдбәхтлик ҝәтирди» (Рут 1:13, 20, 21).

10. Јеһова Наимәнин кәскин сөзләринә неҹә јанашды?

¹⁰ Јеһова Наимәнин бу ҹүр кәскин сөзләринә неҹә јанашды? О, Наимәдән үз дөндәрмәди, әксинә, она шәфгәт ҝөстәрди. Јеһова баша дүшүр ки, «зүлм һикмәтлини дәли едәр» (Ваиз 7:7). Амма Наимәјә Јеһованын онунла олдуғуну ҝөрмәјә көмәк етмәк лазым иди. Јеһова она неҹә көмәк етди? (1 Ишм. 2:8). О, Руту јөнләндирди ки, Наимәјә мәһәббәт ҝөстәрсин. Рут сәмими гәлбдән гајынанасына көмәк етди ки, о, мәнәви ҹәһәтдән дирчәлсин вә Јеһованын севҝисинә әмин олсун. Рутдан нә өјрәнирик?

11. Иман баҹы-гардашларымызы дәрдли оланлара дајаг олмаға нә тәшвиг едир?

¹¹Мәһәббәт дәрдли оланлара көмәк етмәјә тәшвиг едир. Рут Наимәјә бағлы галдығы кими, бу ҝүн дә иман баҹы-гардашларымыз депрессијада вә кәдәр ичиндә олан диндашларынын јанында олурлар. Онлар баҹы-гардашларыны севир вә әлләриндән ҝәлән көмәји ҝөстәрмәјә һазырдырлар (Мәс. 12:25; 24:10). Һәвари Булус да бизә буну нәсиһәт етмишди: «Гәмҝинләрә тәскинлик верин, зәифләрә дајаг олун вә һамыја гаршы сәбир ҝөстәрин» (1 Салон. 5:14).

12. Руһдан дүшмүш баҹы-гардашымыза дајаг олмағын ән ҝөзәл јолу һансыдыр?

¹² Руһдан дүшмүш диндашыныза дајаг олмағын ән ҝөзәл јолу ону динләмәкдир, мәһәббәтимизә әмин етмәкдир. Јеһованын гузусуна ҝөстәрдијиниз диггәт Онун нәзәриндән јајынмыр (Зәб. 41:1). Мәсәлләр 19:17 ајәсиндә дејилир: «Фағыра лүтф еләјән Јеһоваја борҹ верир, Аллаһ да она әвәзини верәр».

13. Рут Орпадан нә илә фәргләнирди вә нәјә ҝөрә Рутун һәрәкәти мәһәббәтдән гајнагланырды? (Үз габығындакы шәклә бахын.)

¹³ Мәһәббәтин нә олдуғуну даһа јахшы баша дүшмәк үчүн ҝәлин Наимәнин әринин вә ики оғлунун өлүмүндән сонра баш верәнләрә нәзәр салаг. Наимә хәбәр тутур ки, Јеһова Өз халгына рәһм едиб вә онлара чөрәк вериб. Буна ҝөрә дә доғма јурдуна гајытмаг гәрарына ҝәлир (Рут 1:6). Ики ҝәлини дә онунла бирликдә јола дүшүр. Јолда Наимә онлары үч дәфә дилә тутур ки, евләринә, Муаба гајытсынлар. Бәс ҝәлинләр нә едир? «Орпа гајынанасыны өпүб ондан ајрылды. Рут исә онунла галды» (Рут 1:7—14). Орпа ҝери гајытмаға гәрар вермәклә ондан нә ҝөзләнилирди ону етди, Рут исә ондан ҝөзләниләндән артығыны етди. О да ҝери гајыда биләрди. Наимәнин јанында галмаға һеч ким ону мәҹбур етмирди (Рут 1:16, 17). Амма о, Наимәјә мәһәббәтдән ирәли ҝәләрәк ону  гојуб ҝетмәди. Биз Рутдан нә өјрәнирик?

14. а) Баҹы-гардашларымыз мәһәббәтдән ирәли ҝәләрәк нәләр едир? б) Ибраниләрә 13:16 ајәсинә әсасән, һансы гурбанларымыз Јеһоваја хошдур?

¹⁴Мәһәббәт даһа артығыны етмәјә тәшвиг едир. Кечмишдә олдуғу кими, бу ҝүн дә баҹы-гардашлар диндашларына мәһәббәт ҝөстәрирләр. Онлар бу мәһәббәти һәтта шәхсән танымадыглары диндашларына ҝөстәрирләр. Мәсәлән, һарадаса тәбии фәлакәт баш верәндә онлар дәрһал көмәк етмәк үчүн тәшәббүс ҝөстәрирләр. Јығынҹагда кимсә мадди сыхынты чәкәндә онун еһтијаҹына ујғун јардым едирләр. Биринҹи әсрдә јашамыш македонијалылар кими, онлар да ҝөзләниләндән артығыны едирләр. Онлар имканы зәиф олан диндашларына көмәк етмәк үчүн гурбанлар верирләр, «һәтта артыгламасы илә сәхавәт» ҝөстәрирләр (2 Кор. 8:3). Јеһова халгы арасында бу ҹүр мәһәббәтин һөкм сүрдүјүнү ҝөрәндә, тәсәввүр етмәк олар, нә гәдәр чох севинир! (Ибраниләрә 13:16 ајәсини охујун.)

15, 16. Рут көмәк етмәк гәрарынын гәти олдуғуну неҹә ҝөстәрди?

¹⁵ Рутла Наимәнин һадисәсиндән өзүмүз үчүн чох шеј өјрәнә биләрик. Ҝәлин бир нечә саһәјә бахаг.

¹⁶Исрарлы олун. Рут гајынанасы Наимәјә дејәндә ки, онунла бирҝә Јәһудаја ҝетмәк истәјир, Наимә әввәл-әввәл разылашмамышды. Амма Рут көмәк әлини о дәгигә ҝери чәкмәди. Бәс бунун нәтиҹәси нә олду? «Наимә ҝөрәндә ки, Рутун онунла ҝетмәк гәрары гәтидир, даһа она һеч нә демәди» (Рут 1:15—18).

17. Диндашымыздан көмәјимизи әсирҝәмәмәјә бизә нә көмәк едә биләр?

¹⁷Нә өјрәнирик? Руһдан дүшән инсана көмәк етмәк үчүн сәбир лазымдыр. Ҝәлин ондан тез әлимизи үзмәјәк. Көмәјә еһтијаҹы олан баҹы, ола билсин, әввәл-әввәл көмәјимизи гәбул етмәсин, амма мәһәббәт бизи тәшвиг едәҹәк ки, јенә дә она дәстәк олаг * (Гал. 6:2). Үмид едирик ки, бир ҝүн баҹы бизим дост әлимизи тутуб, ону гәм дәрјасындан чыхармағымыза изин верәҹәк.

18. Чох јәгин, һансы сөзләр Рутун гәлбинә дәјмишди?

¹⁸Һәр сөзү үрәјинизә јахын бурахмајын. Наимә илә Рут Бејтләһмә чатанда Наимә кечмиш гоншулары илә ҝөрүшдү. Онлара белә деди: «Бурадан долу чыхдым, Јеһова исә мәни әлибош гајтарды» (Рут 1:21). Тәсәввүр едирсиниз, Рут Наимәнин бу сөзләрини ешидәндә һансы һиссләри кечирмишди? О, Наимә үчүн нәләр етмәмишди?! Онунла бирликдә ағламышды, она тәсәлли вермишди, онунла бирликдә ҝүнләрлә јол ҝәлмишди. Бүтүн бунларын гаршылығында Наимә дејир ки, «Јеһова... мәни әлибош гајтарды». Бу сөзләрлә Наимә јанында дуран Рутун дәстәјини һеч етди. Јәгин, бу, Рутун гәлбинә дәјмишди, амма буна бахмајараг, о, јенә дә Наимәнин јанында галды.

19. Диндашымыз гәлбимизи јараласа да, она дајаг олмаға бизә нә көмәк едә биләр?

¹⁹Нә өјрәнирик? Бу ҝүн дә, ола биләр ки, һансыса дәрдли баҹыја дајаг олмаг үчүн әлимиздән ҝәләни едирик. Амма о, елә сөзләр дејир ки, гәлбимизи јаралајыр. Буна рәғмән, биз чалышырыг, онун дедикләрини  үрәјимизә салмајаг, әксинә, көмәјә мөһтаҹ олан баҹымыза дајаг олаг. Һәмчинин Јеһовадан көмәк истәјирик ки, она тәсәлли вермәјимиз үчүн бизә јол ҝөстәрсин (Мәс. 17:17).

20. Рута Наимәјә көмәк етмәкдән усанмамаға нә ҝүҹ верди?

²⁰Диндашынызы руһландырын. Рут Наимәјә мәһәббәт ҝөстәрди. Амма инди Рутун өзүнүн руһланмаға еһтијаҹы вар иди вә Јеһова да ону Буәз васитәсилә руһландырды. Буәз Рута белә деди: «Гој Јеһова сәнә бунун әвәзини версин! Ганадлары алтына сығындығын Исраилин Аллаһы Јеһовадан бол-бол мүкафат аласан!» Бу сөзләр Рута гол-ганад верди. О, Буәзә деди: «Сән бу гарабашына тәсәлли, үрәк-дирәк вердин» (Рут 2:12, 13). Буәзин јериндә дедији сөзләр Рута ҝүҹ верди ки, Наимәјә дајаг олмагдан усанмасын.

21. Әшија 32:1, 2 ајәләринә әсасән, ағсаггаллар нә едир?

²¹Нә өјрәнирик? Башгаларына мәһәббәт ҝөстәрәнләрин бәзән өзләринин дә руһланмаға еһтијаҹы олур. Буәз Руту тәрифләјиб билдирмишди ки, етдији јахшылыг нәзәрдән јајынмыр. Ејнилә, бу ҝүн дә ағсаггаллар башгаларына дајаг олан баҹы-гардашларын зәһмәтини ҝөрүрләр вә онлары гијмәтләндирдикләрини билдирирләр. Ағсаггалларын дедији тәриф сөзләри баҹы-гардашлара ҝүҹ верир ки, диндашларына дајаг олмаға давам етсинләр. (Әшија 32:1, 2 ајәләрини охујун.)

22, 23. Наимәнин дүшүнҹәси неҹә дәјишди вә нәјә ҝөрә? (Зәбур 136:23, 26).

²² Даһа сонра Буәз Рутла Наимәјә пај верир (Рут 2:14—18). Наимә Буәзин белә бир сәхавәт ҝөстәрмәсинә неҹә  јанашыр? О дејир: «Дириләрдән вә өлүләрдән мәһәббәтини әсирҝәмәјән Јеһова она хејир-дуа версин» (Рут 2:20а). Наимәнин фикирләри јерлә-ҝөј гәдәр дәјишмишди! Бундан әввәл «Јеһова мәнә дүшмән кәсилиб» дејән Наимә инди севинҹлә дејир ки, Јеһова «мәһәббәтини әсирҝәмәјән» Аллаһдыр. Наимәнин дүшүнҹәси нәјин сајәсиндә бу дәрәҹәдә дәјишмишди?

²³ Нәһајәт, Наимә өз һәјатында Јеһованын әлини ҝөрмәјә башламышды. Јәһудаја гајытдығы јол бојунҹа Јеһова Рут васитәсилә она дајаг олмушду (Рут 1:16). Һәмчинин Наимә Јеһованын дәстәјини башга ҹүр дә ҝөрдү. Үзәринә гоһумлуг борҹу дүшән Буәз бу ики гадына сәхавәтлә пај верди * (Рут 2:19, 20б). Јәгин Наимә белә дүшүнүрдү: «Инди баша дүшдүм ки, Јеһова һеч вахт мәни атмајыбмыш, О, һәмишә мәним јанымда олуб!» (Зәбур 136:23, 26 ајәләрини охујун.) Сөзсүз ки, Наимәнин үрәји миннәтдарлыгла долуб дашырды, севинирди ки, Рутла Буәз она дајаг олмагдан ваз кечмәди. Тәсәввүр едирсиниз, Наимәнин индики вәзијјәтинә ҝөрә онларын үчү дә неҹә хошбәхт иди?!

24. Диндашларымыза ән әсас нәјә ҝөрә мәһәббәт ҝөстәрмәк истәјирик?

²⁴ «Рут» китабындан мәһәббәт барәдә нә өјрәнирик? Мәһәббәт бизи тәшвиг едир ки, дәрдли баҹы-гардашларымыза көмәк етмәкдән тез ваз кечмәјәк. Һәмчинин мәһәббәт бизи онлара дәстәк олмагдан өтрү нәләрисә гурбан вермәјә тәшвиг едир. Ағсаггаллар јығынҹагдакылара дајаг олан баҹы-гардашлары тәрифләмәли, онлары руһландырмалыдыр. Диндашымызын руһән дирчәлдијини ҝөрәндә биз чох севинирик (Һәв. 20:35). Бәс мәһәббәт ҝөстәрмәјимизин ән башлыҹа сәбәби нәдир? Биз «мәһәббәти бол олан» Аллаһымыз Јеһоваја бәнзәмәк вә Ону разы салмаг истәјирик (Чых. 34:6; Зәб. 33:22).