1. Маһны инсана неҹә тәсир едир?

БИР мәшһур нәғмәкар шаир демишди: «Сөз инсаны дүшүндүрүр, мусиги дујғуландырыр, маһны исә дүшүндүјүнү дујмаға сөвг едир». Бизә ән үлви дујғулары јашадан да Сәмави Атамыз Јеһованы вәсф едән сөзләрдир. Мәһз буна ҝөрә, Јеһованын халгы үчүн һәм фәрди шәкилдә, һәм диндашлары илә бирҝә һәмд нәғмәләри охумаг мүһүм ибадәт сајылыр.

2, 3. а) Нәјә ҝөрә бәзиләри јығынҹагда нәғмә охумаға чәкинир? б) Бу мәгаләдә һансы суаллар мүзакирә олунаҹаг?

² Сизә јығынҹагда нәғмә охумаг асандыр, јохса чәтин? Ола билсин, кимсә ҹамаат ичиндә маһны охумаға чәкинир. Бәзи әразиләрдә исә киши хејлағынын ҹамаат арасында маһны охумасы ајыб сајылыр. Бу дүшүнҹә бүтүн јығынҹаға тәсир едә биләр, хүсусән дә, әҝәр ағсаггаллар нәғмә охумаға чәкинир вә ја нәғмә охунанда башга ишләрлә мәшғул олурса (Зәб. 30:12).

³ Һәмд нәғмәләри охумаг ибадәтимизин ајрылмаз һиссәси олдуғу үчүн, нәғмә охунан заман залдан чыхмаг вә програмын бу һиссәсинә ҝеҹикмәк мүнасиб олмазды. Бундан әлавә, һәр биримиз өзүмүзә нөвбәти суаллары верә биләрик: «Јығынҹагда нәғмә охумаға неҹә јанашырам? Һәмд нәғмәләрини охумаға чәкинирәмсә, нә едә биләрәм? Нәғмәләри шөвглә ифа етмәк үчүн һансы мәгамлары нәзәрә алмалыјам?»

4, 5. Гәдим Исраил халгынын ибадәтиндә һәмд нәғмәләринә һансы јер верилмишди?

⁴ Та гәдимдән Јеһова Аллаһа ибадәт едән инсанлар нәғмәдә Ону вәсф етмишләр. Гејд етмәк лазымдыр ки, исраиллиләр Јеһоваја сәдагәтлә хидмәт едән заманлар нәғмә охумаг ибадәтләринин ајрылмаз һиссәси олуб. Мисал үчүн, Давуд падшаһ мәбәддә хидмәти тәшкил едәндә 4000 лавилини һәмд нәғмәләринин ифасы үчүн ајырмышды. Онлардан 288 нәфәр пешәкар мәзмур охујан иди (1 Салн. 23:5; 25:7).

⁵ Мәбәдин ачылышында мусиги чалынмыш вә һәмд нәғмәләри охунмушду. Бу һадисә барәдә Мүгәддәс Китабда јазылыб: «Кәрәнајчылар вә мәзмур охујанлар бир ағыздан Јеһоваја һәмд-сәна едирдиләр. Онлар... Јеһованы мәдһ едәндә, кәрәнајын, чәнҝин, башга аләтләрин сәси ҝөјә јүксәләндә булуд мәбәди, Јеһованын евини долдурду». Тәсәввүр едирсиниз, бу мөһтәшәм һадисәнин шаһиди олмаг исраиллиләрин иманы неҹә мөһкәмләндирмишди?! (2 Салн. 5:13, 14; 7:6).

6. Вали Нәһәмја Јерусәлим диварынын ачылыш мәрасиминә тәнтәнә гатан һансы тәдбири тәшкил етмишди?

⁶ Нәһәмја һәм Јерусәлим диварынын бәрпа ишләринә рәһбәрлик етмиш, һәм дә диварын ачылышында лавилиләрин мусиги аләтләринин мүшајиәти илә маһны охумасыны тәшкил етмишди. Бу мәрасимдә сәсләнән мусиги тәдбирә јығышанларын севинҹинә севинҹ гатмышды. Нәһәмја мәзмур охујанлары ики бөјүк дәстәјә ајырмышды. Һәр дәстә диварын үстү илә әкс истигамәтләрдә ҝедәрәк мәбәдин јанында бирләшмишди. Беләҹә, онларын охудуғу нәғмәнин сәдасы узагларда белә ешидилирди (Нәһ. 12:27, 28, 31, 38, 40, 43). Сөз јох ки, хидмәтчиләринин шаграг сәслә Она уҹалтдығы нәғмәләр Јеһова Аллаһын үрәјини шад етмишди.

7. Иса Мәсиһ һәмд нәғмәләри охумағын ибадәтдә ваҹиб олдуғуну неҹә ҝөстәрмишди?

⁷ Мәсиһилијин тәмәли гојуландан һәмд нәғмәләри охумаг мәсиһи ибадәтинин ваҹиб һиссәси олуб. Иса Мәсиһ «Ағанын шам јемәји» мәрасимини тәсис едәндән сонра һәвариләрлә бирҝә һәмд нәғмәләри охумушду. Гејд едәк ки, бу, бәшәрин талеји һәлл олунан анларда баш вермишди. (Мәтта 26:30 ајәсини охујун.)

8. Биринҹи әсрдәки мәсиһиләр ибадәтдә нәғмә охумаг мәсәләсиндә һансы нүмунәни гојублар?

⁸ Биринҹи әсрдәки мәсиһиләр ибадәтләриндә Аллаһы нәғмәләрлә тәрәннүм етмәкдә бизә нүмунә гојублар. Онлар ибадәт үчүн, адәтән, евләрдә јығышырдылар. Бу евләр мәбәд гәдәр әзәмәтли вә ҝөзәл олмаса да, мәсиһиләрдә Јеһованын шәнинә нәғмә охумаг шөвгүнү азалтмырды. Һәвари Булус Аллаһын илһамы илә диндашларына бујурмушду: «Бир-биринизә мәзмурлар, мәдһләр вә миннәтдарлыгла охунан руһани маһныларла өјүд-нәсиһәт верин, Јеһованы үрәјиниздә тәрәннүм един» (Кол. 3:16). Бизим нәғмә китабындакы маһнылар һәгигәтән миннәтдарлыгла охунуласы «руһани маһнылар»дыр. Бу маһнылар да «садиг вә ағыллы нөкәр»ин вердији руһани гидадыр (Мәт. 24:45).

9. а) Нә үчүн јығынҹаг вә бөјүк топлантыларда бәзи баҹы-гардашлар шөвглә охумаға чәкинирләр? б) Һәмд нәғмәләри неҹә охунмалыдыр вә бу ишдә кимләр нүмунә гојмалыдыр? (Мәгаләнин әввәлиндәки шәклә бахын.)

⁹ Ола билсин, ҹамаат ичиндә маһны охумаг киминсә аиләсинә вә ја мәдәнијјәтинә јаддыр. Јахуд кимсә пешәкар мүғәнниләрә һәвәслә гулаг асыр, амма өзү  маһны охумаға чәкинир, чүнки фикирләшир ки, онун сәси бу мүғәнниләрин сәсинә чата билмәз. Лакин белә шејләр бизи Јеһованы нәғмәләрлә тәрәннүм етмәк кими ваҹиб ибадәтдән азад етмир. Одур ки, утанҹаглығы бир кәнара гојун, нәғмә китабыны јухары тутуб башынызы дикәлдин вә шөвглә охујун (Үзр. 3:11; Зәбур 147:1 ајәсини охујун). Бу ҝүн артыг бир чох ибадәт евиндә нәғмәләрин сөзләри екранда ҝөстәрилир, бу исә охумағы даһа да асанлашдырыр. Һәмд нәғмәләрини охумаг һәтта Мәсул Гардашлар үчүн Мәктәбин тәдрис програмына әлавә едилиб. Бу ҝөстәрир ки, ағсаггаллар нәғмә охумагда јығынҹаға нүмунә олмалыдырлар.

10. Горху бизи шөвглә охумагдан сахлајырса, һансы фикир бизи үрәкләндирә биләр?

¹⁰ Бәзи баҹы-гардашларымыза шөвглә маһны охумаға горху мане олур. Горхурлар ки, һамы онлара бахаҹаг, јахуд да сәсләри киминсә хошуна ҝәлмәјәҹәк. Ҝәлин бир анлыг дүшүнәк: Мүгәддәс Китабда дејилир ки, «һәр биримиз дәфәләрлә сәһв едирик. Сөзүндә сәһвә јол вермәјән камил инсандыр» (Јаг. 3:2). Амма бу, бизи данышмагдан сахламыр, елә дејил? Онда нијә сәсимизин ҝөзәл олмамасы бизи Јеһоваја маһныда тәриф демәкдән чәкиндирмәлидир?

11, 12. Охумаг баҹарығымызы неҹә јахшылашдыра биләрик?

¹¹ Әҝәр сизи нәғмә охумагдан сахлајан амил дүзҝүн охумағы билмәмәјиниздирсә, бир нечә садә мәсләһәтә риајәт етмәклә баҹарығынызы јахшылашдыра биләрсиниз *.

¹² Маһныны ҝур сәслә ифа етмәк үчүн дүзҝүн нәфәс алмаг лазымдыр. Електрик енержиси ҹиһазы ишә салдығы кими, тәнәффүс дә сәсимизи тәнзимләјир. Маһны  охујанда адәтән данышдығымыз сәс уҹалығы илә, һәтта бир аз да уҹадан охумаг лазымдыр *. Јери ҝәлмишкән, Мүгәддәс Јазыларда Јеһованын шәнинә нәғмәләр сөјләмәклә бағлы контекстләрдә «сәсинизи јүксәлдин» кими чағырышлар ишләнир (Зәб. 33:1—3).

13. Һансы мәсләһәтләр бизә һәмд нәғмәләрини шөвглә ифа етмәјә көмәк едә биләр?

¹³ Аиләви ибадәт ахшамы вә ја фәрди мүталиә илә мәшғул оланда нөвбәти мәсләһәтләри сынагдан кечирин: нәғмә китабындан хошунуза ҝәлән маһнылары сечин. Әввәлҹә маһнынын сөзләрини мусигисиз уҹадан охујун, сонра мәтндәки сөз бирләшмәләрини һәмин сәс тону илә бирнәфәсә дејин. Сонра исә сөз бирләшмәләрини ејни сәс ҝүҹү илә мусигинин мүшајиәти алтында охујун (Әшј. 24:14). Беләҹә, маһны охујанда сәсиниз уҹадан чыхаҹаг. Амма гој бу, сизи нә утандырсын, нә дә маһны охумагдан чәкиндирсин. Әслиндә, бу чох ҝөзәл наилијјәтдир!

14. а) Маһны охујанда ағзы ҝениш ачмаг охумаг баҹарығымыза неҹә тәсир едир? («Маһны охумаг баҹарығынызы јахшылашдырын» адлы чәрчивәјә бахын.) б) Сәсдәки проблемләри арадан галдырмагла бағлы һансы мәсләһәтләр сизин үчүн фајдалы олду?

¹⁴ Маһныны уҹадан охумаг истәјириксә, ағзы ҝениш ачмаг мүтләгдир. Одур ки, маһны охујанда ағзынызы ади данышыгда олдуғундан ҝениш ачын. Бәс сәси чох зәиф вә ја һәддән артыг јүксәк оланлар нә едә биләр? Онлара «Теократик Хидмәт Мәктәбиндә тәлим алырыг» китабынын 184-ҹү сәһифәсиндә јерләшән «Бәзи проблемләр вә онларын һәлли» адлы чәрчивәјә бахмағы мәсләһәт ҝөрүрүк.

15. а) 2016-ҹы илдә кечирилән иллик ҝөрүшдә һансы елан олмушду? б) Јени нәғмә китабынын һансы үстүнлүкләри вар?

¹⁵ Ҝөзәтчи Гүлләси, Мүгәддәс Китаб вә Трактатлар Ҹәмијјәтинин (Пенсилванија)  2016-ҹы илдә кечирилән иллик ҝөрүшүндә Рәһбәрлик Шурасынын үзвү Стивен Летт гардаш «Јеһованы шөвглә тәрәннүм един» адлы јени нәғмә китабынын бурахылдығыны елан етмишди. О гејд етди ки, бу јени нәшри чыхармағын бир сәбәби маһныларын мәтнини Мүгәддәс Китабын «Јени Дүнја Тәрҹүмәси»нин јенидән ишләнмиш версијасына (2013-ҹү ил) ујғунлашдырмаг, јәни маһныларын мәтниндә ишләнән көһнә терминләри јениләрлә әвәз етмәк иди. Һәмчинин јени нәғмә китабына фидјә үчүн шүкран нәғмәләри вә тәблиғ иши илә бағлы нәғмәләр дахил едилиб. Бундан әлавә һәмд нәғмәләрини охумаг ваҹиб ибадәт сајылдығы үчүн Рәһбәрлик Шурасы гәрара ҝәлди ки, маһны китабынын кејфијјәти јүксәк олмалыдыр. Бу сәбәбдән маһны китабы ҝөрүнүш бахымындан «Јени Дүнја Тәрҹүмәси» илә ејнидир.

16, 17. «Јеһованы шөвглә тәрәннүм един» китабында һансы јениликләр вар?

¹⁶ «Јеһованы шөвглә тәрәннүм един» китабы мөвзулар үзрә тәртиб олунуб. Мәсәлән, илк 12 маһны Јеһова һагда, нөвбәти 8 маһны Иса Мәсиһ вә фидјә һагдадыр, галанлары исә башга мөвзулар үзрә јығылыб. Китаб мөвзу үзрә мүндәриҹатла башлајыр. Бу, гардашлара һазырладыглары мәрузәләр үчүн маһны сечмәјә көмәкчи олаҹаг.

¹⁷ Һәмд нәғмәләринин бөјүк шөвглә ифа олунмасы үчүн онларын мәтнинә ајдынлыг, бәдиилик вә тәсир ҝүҹү бахымындан тәзәдән бахылмышдыр. Јени нәғмә китабынын бәзи тәрҹүмәләриндә артыг ишләк олмајан сөз вә ифадәләр јениләри илә әвәз олунмушдур. Бундан әлавә, амиранә ҹүмләләрдән гачынылыб ки, јени вәфтиз олунанлар, вәфтиз олмамыш тәблиғчиләр, ҝәнҹләр вә баҹылар бу ҹүр ҹүмләләри охујанда башгаларына ҝөстәриш вермиш олмасынлар.

18. Нә үчүн јени нәғмә китабындакы маһныларла таныш олмаг ваҹибдир? (Һәмчинин һашијәјә бахын.)

¹⁸ «Јеһованы шөвглә тәрәннүм един» китабындакы бир чох нәғмә дуа шәклиндә јазылыб. Бу нәғмәләри охумагла биз Јеһоваја бәсләдијимиз үлви һиссләри ифадә едирик. Бәзи маһнылар исә бизи «мәһәббәтә вә јахшы ишләрә» тәшвиг едир (Ибр. 10:24). Јәгин истәјәрдиниз ки, бу маһныларын мусигисини, ритмини јахшы дујасыныз, сөзләрини әзбәрләјәсиниз. Бунун үчүн jw.org сајтына дахил олуб маһныларын вокал ифасыны динләјә биләрсиниз. Евдә мәшг етмәк сизә һәмд нәғмәләрини сәрбәст вә шөвглә охумаға көмәк едәҹәк *.

19. Јығынҹаға ҝәләнләрин һәр бири һансы ибадәти иҹра едә биләр?

¹⁹ Унутмамалыјыг ки, һәмд нәғмәләри охумаг ваҹиб ибадәтләрдән биридир. Бу илаһи нәғмәләри охумагла Јараданымыз Јеһова Аллаһа мәһәббәтимизи вә шүкранымызы ифадә едирик. (Әшија 12:5 ајәсини охујун.) Биз шөвглә охујанда башгаларыны да үрәкдән охумаға һәвәсләндиририк. Һәмд нәғмәләри охумаг елә бир ибадәтдир ки, һәр кәс, ҹаван да, јашлы да, јығынҹаға тәзә ҝәләнләр дә ону иҹра едә биләр. Одур ки, ҝәлин һәмд нәғмәләри охујанда утанҹаглығы бир кәнара гојаг, маһныны јашамаға чалышаг. Ҝәлин мәзмурчунун «Јеһованын шәнинә... нәғмә охујун» чағырышына һај верәк! (Зәб. 96:1).