1. Јеһова бизә һансы азадлығы вериб?

ЈЕҺОВА АЛЛАҺ бизә һәјат јолумузу сечмәк азадлығы вериб. О бизә дүзҝүн гәрарлар вермәји өјрәдир вә Она мәгбул гәрарларымызы һәјата кечирмәјә көмәк едир (Зәб. 119:173). Мүгәддәс Китабдакы һикмәтли мәсләһәтләрә нә гәдәр чох әмәл етсәк, даһа јахшы гәрарлар верәҹәјик (Ибр. 5:14).

2. Гәрар вердикдән сонра һансы чәтинликлә үзләшә биләрик?

² Һәтта дүзҝүн гәрар верәндә дә, башладығымыз иши тамамламаг бизә чәтин ҝәлә биләр. Ҝәлин бәзи нүмунәләрә бахаг: Ҝәнҹ гардаш Мүгәддәс Китабы башдан-ајаға охумаг гәрарына ҝәлир. Бир нечә һәфтә әрзиндә буну етсә дә, мүәјјән сәбәбдән охумағы дајандырыр. Бир баҹы өнҹүл кими хидмәт етмәји гәрарлашдырыр, амма башлајаҹағы вахты һәр дәфә тәхирә салыр. Ағсаггаллар шурасы гәрара ҝәлир ки, баҹы-гардашлара руһландырыҹы зијарәтләр етсинләр, амма үстүндән ајлар кечсә дә, гәрарын иҹрасына башланылмыр. Һәр бир вәзијјәт фәргли олса да, ортаг бир ҹәһәт вар: онлар вердикләри гәрары там јеринә јетирмәјибләр. Биринҹи әсрдә Коринф шәһәриндә јашајан мәсиһиләрин дә буна бәнзәр чәтинлији вар иди. Ҝәлин ҝөрәк онлардан нә өјрәнә биләрик.

3. Коринфлиләр һансы гәрары вермишдиләр, бәс нә баш верди?

³ Ерамызын тәхминән 55-ҹи илиндә Коринфдәки мәсиһиләр ваҹиб бир гәрар вердиләр. Онлар Јерусәлим вә Јәһудијјәдәки диндашларынын чәтинликләрлә үзләшдијини вә јохсуллугдан әзијјәт чәкдијини ешитмишдиләр. Хәбәр чатмышды ки, бәзи јығынҹаглар онлара көмәк етмәк үчүн пул јығыр. Коринфлиләр хејирхаһлыг вә сәхавәтдән ирәли ҝәләрәк бу тәшәббүсә  гошулмаг гәрарына ҝәлир вә һәвари Булусдан мәсләһәт алыр. Булус јығынҹаға ҝөстәриш верир вә пул јығмаг ишини Титуса тапшырыр (1 Кор. 16:1; 2 Кор. 8:6). Лакин бир нечә ај сонра Булус өјрәнир ки, коринфлиләр һәлә дә бәхшиш топламајыблар. Бу о демәк иди ки, диҝәр јығынҹагларын бәхшишләри Јерусәлимә ҝөндәрилән вахт онларын бәхшиши һазыр олмајаҹагды (2 Кор. 9:4, 5).

4. 2 Коринфлиләрә 8:7, 10, 11 ајәләринә әсасән, Булус коринфлиләри нәјә сәсләмишди?

⁴ Коринфлиләрин вердији гәрар јахшы иди, Булус да онлары мөһкәм иманларына вә сәхавәт ҝөстәрмәк истәкләринә ҝөрә тәрифләмишди. Ејни заманда онлары башладыглары иши тамамламаға сәсләмишди. (2 Коринфлиләрә 8:7, 10, 11 ајәләрини охујун.) Онларын нүмунәси ҝөстәрир ки, һәтта садиг мәсиһиләр дә бәзән вердикләри дүзҝүн гәрары иҹра етмәјә чәтинлик чәкир.

5. Һансы суаллара ҹаваб тапаҹағыг?

⁵ Коринфлиләр кими, биз дә вердијимиз гәрарлары баша чатдырмаға чәтинлик чәкә биләрик. Ола билсин, гејри-камил олдуғумуз үчүн буну һәр дәфә тәхирә салырыг. Јахуд ҝөзләнилмәз һадисәләр гәрарымызы јеринә јетирмәјимизә мане олур (Ваиз 9:11; Ром. 7:18). Вердијимиз гәрара јенидән нәзәр салыб, дүзәлишә еһтијаҹ олуб-олмадығыны неҹә мүәјјән едә биләрик? Башладығымыз иши тамамламаг үчүн нә етмәлијик?

6. Нә вахт вердијимиз гәрарлары дәјишмәк лазым ҝәлә биләр?

⁶ Вердијимиз бәзи гәрарлары дәјишмәк истәмәздик. Мәсәлән, Јеһоваја хидмәт етмәк гәрарына бағлы галырыг, һәјат јолдашымыза садиг галмаға гәти гәрарлыјыг (Мәт. 16:24; 19:6). Амма елә гәрарлар вар ки, онлара дүзәлиш етмәк лазым ҝәлә биләр. Сәбәб вәзијјәтимизин дәјишмәси ола биләр. Максимум дәрәҹәдә јахшы гәрарлар вермәк үчүн нә едә биләрик?

7. Аллаһдан нә диләмәлијик вә нә үчүн?

⁷ Һикмәт диләјин. Јеһова Јагуб васитәсилә бу сөзләри јаздырмышды: «Әҝәр сизләрдән киминсә һикмәти чатышмырса, гој һәр кәсә сәхавәтлә вә гынамадан верән Аллаһдан диләсин вә она вериләҹәк» (Јаг. 1:5). Мүәјјән мәнада һәр биримизин һикмәти чатышмыр. Одур ки, һәм гәрар верәндә, һәм дә гәрарыныза нәзәр саланда Јеһоваја үз тутун. Јеһова сизә дүзҝүн гәрар вермәкдә көмәк едәҹәк.

8. Гәрар вермәздән өнҹә нәләри јахшыҹа арашдырмалыјыг?

⁸ Јахшыҹа арашдырын. Аллаһын Кәламына үз тутун, Јеһованын тәшкилаты васитәсилә вердији нәшрләри охујун, јеткин инсанлардан мәсләһәт алын (Мәс. 20:18). Хүсусилә дә ишинизи дәјишмәк, башга јерә көчмәк үчүн гәрар вермәли оланда, јахуд өзүнүзү доландырмаға вә хидмәти давам етмәјә көмәк едәҹәк тәһсил сечәндә јахшыҹа өлчүб-бичмәк ваҹибдир.

9. Өзүмүзә гаршы дүрүст олмағын һансы фајдасы вар?

⁹ Нијјәтинизи јохлајын. Нијјәтләримиз Јеһова үчүн өнәмлидир (Мәс. 16:2). О, һәр саһәдә дүрүст олмағымызы истәјир. Одур ки, гәрар верәркән һәм өзүмүзә, һәм дә башгаларына гаршы дүрүст олмалыјыг. Әҝәр там дүрүст олмамышыгса, гәрарымыза ахыра гәдәр бағлы галмаг чәтин олаҹаг. Мәсәлән, бир ҝәнҹ гардаш өнҹүл олмаг гәрарыны верир. Лакин бир мүддәтдән сонра о, саат нормасыны тамамлаја билмир вә хидмәтдә севинҹини итирир. Бәлкә дә, гардаш өнҹүллүјә Јеһованы разы салмаг үчүн башладығыны дүшүнүрдү. Амма ола биләрми ки,  әсл сәбәб валидејнләрини, јахуд диҝәр кимисә разы салмаг олсун?

10. Дәјишиклик етмәк үчүн нә ҝәрәкдир?

¹⁰ Ҝәлин Мүгәддәс Китабы өјрәнән бир нәфәри тәсәввүр едәк. О, сигарети атмаг гәрарына ҝәлир. Әввәл-әввәл бу она чәтин олур. Бир-ики һәфтә чәтинлијә дөзсә дә, сонра јенидән сигарет чәкмәјә башлајыр. Лакин сонда о, сигарети тәрҝидә билир! Јеһоваја мәһәббәти вә Ону разы салмаг истәји она бу вәрдишин өһдәсиндән ҝәлмәјә көмәк едир (Кол. 1:10; 3:23).

11. Нә үчүн конкрет мәгсәдләр гојмалыјыг?

¹¹ Конкрет мәгсәдләр гојун. Нә гәдәр конкрет олсаныз, башладығыныз иши тамамламаг бир о гәдәр асан олаҹаг. Тутаг ки, Мүгәддәс Китабы мүнтәзәм охумаг гәрарына ҝәлмисиниз. Әҝәр конкрет ҹәдвәлиниз јохдурса, мәгсәдинизә чатмаја биләрсиниз *. Јахуд ола билсин, ағсаггаллар баҹы-гардашлары даһа тез-тез зијарәт етмәк гәрарына ҝәлиб, амма бир мүддәт сонра бу гәрара бағлы галмырлар. Гәрарларына ујғун давранмаг үчүн онлар бу ҹүр суалларын үзәриндә дүшүнә биләр: «Руһландырыҹы зијарәтә еһтијаҹы олан баҹы-гардашларын сијаһысыны тутмушуг? Онлары зијарәт етмәк үчүн конкрет вахт тәјин етмишик?»

12. Нә етмәк лазым ҝәлә биләр вә нә үчүн?

¹² Реалист олун. Һеч биримизин о гәдәр вахты, ҝүҹү, јахуд вәсаити јохдур ки, истәдији һәр шеји етсин. Одур ки, реалист вә дәрракәли олун. Вердијиниз гәрары һәјата кечирмәјә ҝүҹүнүз чатмырса, ону дәјишмәк лазым ҝәлә биләр (Ваиз 3:6). Тутаг ки, гәрарыныза јенидән нәзәр салдыныз, лазыми дәјишиклик етдиниз вә инди ону тамамлаја биләҹәјинизи дүшүнүрсүнүз. Ҝәлин башладығыныз иши тамамламаға көмәк едәҹәк беш аддыма нәзәр салаг.

13. Гәрарынызы иҹра етмәк үчүн ҝүҹү һарадан ала биләрсиниз?

¹³ Јеһовадан ҝүҹ диләјин. Аллаһ «фәалијјәт ҝөстәрмәјиниз үчүн сизә ҝүҹ» вермәјә гадирдир (Филип. 2:13). Одур ки, гәрарынызы һәјата кечирмәјә ҝүҹ вермәси үчүн Аллаһдан мүгәддәс руһ диләјин. Һәтта дуаныза ҹавабын ҝеҹикдијини дүшүнсәниз белә, дуа етмәјә давам един. Иса Мәсиһин дә дедији кими, «дурмадан диләјин, сизә [мүгәддәс руһ] вериләҹәк» (Лука 11:9, 13).

14. Мәсәлләр 21:5 ајәсиндәки принсип гәрарынызы һәјата кечирмәјә неҹә көмәк едә биләр?

¹⁴ План гурун. (Мәсәлләр 21:5 ајәсини охујун.) Истәнилән лајиһәни баша чатдырмаг үчүн план гурмалысыныз. Сонра плана ујғун һәрәкәт етмәлисиниз. Еләҹә дә, гәрар верәндә ону һәјата кечирмәк үчүн етмәли олдуғунуз һәр шејин сијаһысыны тутун. Бөјүк ишләри кичик һиссәләрә ајырмаг сизә ҝөрдүјүнүз ишләрин ҝедишатыны изләмәјә көмәк едәҹәк. Һәвари Булус коринфлиләрә мәсләһәт ҝөрмүшдү ки, онун ҝәлишини ҝөзләмәкдәнсә, ианә үчүн пулу «һәр һәфтәнин биринҹи ҝүнү» ајырыб гыраға гојсунлар (1 Кор. 16:2). Бундан әлавә, бөјүк ишләри һиссәләрә ајырмаг сизи лүзумсуз ҝәрҝинлик һиссиндән азад едә биләр.

15. План гурдугдан сонра нә етмәк олар?

¹⁵ Гурдуғунуз планы бир јерә јазмаг сизә гәрарынызы һәјата кечирмәјә көмәк едәҹәк (1 Кор. 14:40). Мисал үчүн, ағсаггаллар шурасына ҝөстәриш верилиб ки, вердикләри һәр гәрары, еләҹә дә гәрары иҹра едәҹәк шәхси вә ишин битмә тарихини гејдә алан  бир ағсаггал тәјин етсинләр. Ағсаггаллар бу ҝөстәришә ујғун даврананда вердикләри гәрарлары иҹра етмәк онлара даһа асан олур (1 Кор. 9:26). Шәхси ишләринизи ҝөрәндә дә бу үсулу тәтбиг едә биләрсиниз. Мисал үчүн, ҝүндәлик ҝөрәҹәјиниз ишләрин сијаһысыны тутун вә ваҹиблијинә ҝөрә сыралајын. Бунун сајәсиндә сиз нәинки башладығыныз иши битирәҹәк, һәтта аз вахтда чох иш ҝөрәҹәксиниз.

16. Гәрары һәјата кечирмәк үчүн даһа нә лазымдыр вә Ромалылара 12:11 ајәси буну неҹә тәсдигләјир?

¹⁶ Ҹан гојун. Гурдуғунуз плана ујғун давранмаг вә башладығыныз иши тамамламаг үчүн сәј ҝөстәрмәк лазымдыр. (Ромалылара 12:11 ајәсини охујун.) Булус Тимутијә јахшы мүәллим олмаг үчүн өзүнү тәлим вермәјә һәср етмәји вә бунлардан бәрк-бәрк јапышмағы мәсләһәт ҝөрмүшдү. Бу мәсләһәт диҝәр руһани мәгсәдләрә дә тәтбиголунандыр (1 Тим. 4:13, 16).

17. Ефеслиләрә 5:15, 16 ајәләрини тәтбиг етмәк гәрарымызы һәјата кечирмәјә неҹә көмәк едә биләр?

¹⁷ Вахтынызы дүзҝүн планлашдырын. (Ефеслиләрә 5:15, 16 ајәләрини охујун.) Гәрарынызы иҹра етмәк үчүн бир вахт тәјин един вә бу вахты дәјишмәјин. Ишә башламаг үчүн мүкәммәл вахтын ҝәләҹәјини ҝөзләмәјин, ола билсин ки, белә бир вахт һеч вахт ҝәлмәсин (Ваиз 11:4). Даһа ваҹиб шејләр үчүн ҝәрәкли олан вахтынызы вә ҝүҹүнүзү аз әһәмијјәтли шејләрә ајырмајын (Филип. 1:10). Мүмкүндүрсә, фикринизин јајынмајаҹағы бир вахт сечин. Диггәтинизи ҹәмләмәк үчүн сизә вахт лазым олдуғуну башгаларына билдирин. Чалышын телефонунузу сөндүрәсиниз, е-маилинизә вә сосиал шәбәкәләрә башга вахт дахил оласыныз *.

18, 19. Вердијиниз гәрары баша чатдырмаг чәтин оланда сизә нә көмәк едә биләр?

¹⁸ Диггәтинизи нәтиҹәјә ҹәмләјин. Вердијиниз гәрарын нәтиҹәси, санки сәјаһәтинизин сон нөгтәсидир. Мәнзил башына чатмаг истәјән инсан јол бағлы олдуғуна ҝөрә јолуну дәјишмәли олса да, ирәлиләмәјә давам едәҹәк. Ејнилә, гәрарынызын нәтиҹәси һагда дүшүнмәк көмәк едәҹәк ки, чәтинликлә үзләшәндә, јахуд алтернатив јоллар ахтармалы оланда тәслим олмајасыныз (Гал. 6:9).

¹⁹ Јахшы гәрар вермәк чәтин олдуғу кими, ону һәјата кечирмәк дә чәтин ола биләр. Лакин Јеһованын көмәји сајәсиндә башладығыныз иши тамамламаг үчүн лазым олан һикмәт вә ҝүҹә саһиб ола биләрсиниз.