Мән 1983-ҹү илдә анадан олмушам. Балаҹа оланда сағлам ушаг идим. Амма 10 јашым оланда бүтүн бәдәнимдә дәһшәтли ағрылар һисс етмәјә башладым. Тәхминән ики ил сонра бир ҝүн ојандым ки, тәрпәнә билмирәм. Ајагларымы тәрпәтмәјә нә гәдәр чалышсам да, онларда тәпәр јох иди. О ҝүндән етибарән бир даһа јеријә билмәдим. Хәстәлик уҹбатындан организмимдә бөјүмә просеси дајанды. Бу ҝүн мән балаҹа ушаг бојдајам.

Мән бир нечә ај иди ки, евдән чөлә чыхмырдым. Бир ҝүн ики Јеһованын Шаһиди гапымызы дөјдү. Адәтән кимсә ҝәләндә ҝизләнирдим, амма бу дәфә имкан јаратдым ки, гадынлар мәнимлә данышсынлар. Онлар Ҹәннәт һаггында данышдыгҹа тәхминән беш јашымда ешитдикләрим јадыма дүшдү. О вахт Суринамда јашајан Ҹетро адында бир хүсуси тәјинатлы мүждәчи бир ајлыг бизим кәндә ҝәлмишди. О, атама Мүгәддәс Китаб дәрси кечирди. Ҹетро мәнә гаршы чох меһрибан иди. Мән ону чох истәјирдим. Һәмчинин бабамҝил мәни бәзән Јеһованын Шаһидләринин кәндимиздә кечирилән јығынҹағына апарырды. Буна ҝөрә дә һәмин ҝүн гапымызы дөјән гадынлардан бири, Флоренс даһа чох билик алмаг истәјиб-истәмәдијими сорушанда дедим ки, истәјирәм.

Нөвбәти дәфә Флоренс һәјат јолдашы Ҹастасла ҝәлди. Онлар мәнимлә Мүгәддәс Китаб дәрси кечмәјә башлады. Ҝөрәндә ки, охуја билмирәм, мәнә охумағы өјрәтдиләр. Бир мүддәт сонра артыг өзүм сәрбәст охуја билирдим. Бир ҝүн бу ҹүтлүк мәнә деди ки, онлар Суринама тәјин олунуб. Тәәссүфләр олсун ки, Ориалада мәнимлә дәрси давам етдирәҹәк башга һеч кәс јох иди. Амма нә јахшы ки, Јеһова мәни унутмады.

Чох кечмәди ки, Ориалаја Флојд адлы өнҹүл ҝәлди. О, «дахма-дахма» тәблиғ едәркән мәнимлә гаршылашды. Мәнимлә Мүгәддәс Китаб дәрси кечмәк һаггында данышанда ҝүлүмсәдим. О сорушду ки, нијә ҝүлүрәм, дедим ки, мән артыг «Аллаһ биздән нә тәләб едир?» брошүрүнү гуртарыб «Әбәди һәјата апаран билик» * китабына башламышдым. Дәрсимин нәјә ҝөрә јарымчыг галдығыны изаһ етдим. Флојд мәнимлә «Билик» китабыны кечиб гуртарды. Амма сонра ону да башга јерә тәјин етдиләр. Јенә мүәллимсиз галдым.

 2004-ҹү илдә Гранвил вә Ҹошуа адлы ики хүсуси өнҹүл Ориалаја тәјин олунду. Онлар «дахма-дахма» тәблиғ едәркән мәни тапдылар. Онлар мәнә Мүгәддәс Китаб дәрси кечмәји тәклиф едәндә ҝүлүмсәдим. Онлардан хаһиш етдим ки, мәнә «Билик» китабыны башдан кечсинләр. Билмәк истәјирдим ки, мәнә әввәлки мүәллимләримин өјрәтдикләрини өјрәдәҹәкләр, ја јох. Гранвил мәнә деди ки, кәнддә јығынҹаглар кечириләҹәк. Он ил иди ки евдән чөлә чыхмамағыма бахмајараг, јығынҹаға ҝетмәк истәдим. Беләҹә, Гранвил мәни әлил арабасына гојуб ибадәт евинә апарды.

Бир мүддәт сонра Гранвил мәни тәшвиг етди ки, Теократик Хидмәт Мәктәбинә јазылым. О деди: «Әлил олсан да, даныша билирсән. Ҝүн ҝәләҹәк ачыг мәрузә сөјләјәҹәксән. Бу, мүтләг олаҹаг!» Онун руһландырыҹы сөзләри мәндә әминлик јаратды.

Мән Гранвиллә тәблиғдә әмәкдашлыг етмәјә башладым. Амма кәндин торпаг јоллары чох кәлә-көтүр олдуғу үчүн әлил арабасыны сүрмәк олмурду. Гранвилдән хаһиш етдим ки, мәни әл арабасына гојуб сүрсүн. Бу чох јахшы чыхыш јолу иди. 2005-ҹи илин апрел ајында вәфтиз олундум. Гыса мүддәт сонра гардашлар мәнә јығынҹағын әдәбијјатына бахмағы вә ибадәт евиндәки сәс аваданлығыны ишләтмәји өјрәтдиләр.

2007-ҹи илдә атам гајыгла ҝедәркән баш верән бәдбәхт һадисә заманы һәлак олду. Аиләмиз кәдәр ичиндә иди. Гранвил бизим үчүн дуа етди, Мүгәддәс Китабдан тәсәлливериҹи ајәләр охуду. Ики ил кечмәмиш нөвбәти фаҹиә илә үзләшдик, Гранвил гајыг гәзасында һәјатыны итирди.

Бизим јаслы јығынҹағымыз ағсаггалсыз галды, бирҹә јығынҹаг хидмәтчимиз вар иди. Гранвилин иткиси мәнә чох ағыр ҝәлирди, о мәним үчүн әзиз дост иди. О һәмишә мәнә һәм физики, һәм руһани ҹәһәтдән дајаг олурду. Онун өлүмүндән сонракы јығынҹагда мәнә «Ҝөзәтчи гүлләси» мүзакирәсиндә абзаслары охумағы тапшырдылар. Ики абзас охумушдум ки, мәни ағламаг тутду, ҝөз јашларымы сахлаја билмирдим, сәһнәдән дүшмәли олдум.

Башга јығынҹагдан гардашларын Ориалаја, бизә көмәјә ҝәлмәси илә хејли тохтаглыг тапдым. Филиал Кожо адлы бир хүсуси өнҹүл дә ҝөндәрди. Анамын, балаҹа гардашымын Мүгәддәс Китабы өјрәниб вәфтиз олмалары мәни чох севиндирди. 2015-ҹи ил март ајында мәни јығынҹаг хидмәтчиси тәјин етдиләр. Бир мүддәт сонра мән илк ачыг мәрузәми сөјләдим. Һәмин ҝүн үзүмдә һәм ҝүлүш, һәм ҝөз јашы Гранвилин илләр өнҹә мәнә дедији сөзләри хатырладым: «Ҝүн ҝәләҹәк ачыг мәрузә сөјләјәҹәксән. Бу, мүтләг олаҹаг!»

JW телевизијасы васитәсилә ҝөрдүм ки, мәним вәзијјәтимдә олан баҹы-гардашларым вар. Амма мәһдудијјәтләринә бахмајараг, онлар хидмәтдә чох шеј едирләр вә хошбәхтдирләр. Демәли, мән дә баҹарарам. Бүтүн ҝүҹүмү Јеһованын јолунда сәрф етмәк истәдијим үчүн өнҹүл хидмәтинә башладым. 2019-ҹу илин сентјабрында һеч ҝөзләмәдијим бир хош хәбәр алдым! Һәмин ај билдим ки, тәхминән 40 тәблиғчиси олан јығынҹағымыза ағсаггал кими тәјин олунмушам.

Мәнә дәрс кечән вә Јеһоваја хидмәт етмәјимдә әмәји олан дәјәрли баҹы-гардашлара чох миннәтдарам. Ән әсасы исә шүкүрләр едирәм ки, Јеһова мәни унутмады.