1, 2. Мәсәлләр 4:25 ајәсиндәки мәсләһәтә неҹә әмәл едә биләрик? Нүмунә чәкин.

НӨВБӘТИ вәзијјәтләри тәсәввүр един. Јашлы баҹы кечмишдә олан хош ҝүнләрини хатырлајыр. Инди һәјаты чәтин олса да, о, Јеһова үчүн әлиндән ҝәләни едир (1 Кор. 15:58). Һәр ҝүн өзүнү әзизләри илә бирликдә јени дүнјада тәсәввүр едир. Икинҹи вәзијјәт: Диндашы бир баҹынын хәтринә дәјсә дә, о, кин сахламамаг гәрарына ҝәлир (Кол. 3:13). Үчүнҹү вәзијјәт: Гардаш кечмишдә етдији сәһвин фәргиндәдир, амма диггәтини бундан сонра Јеһоваја садиг галмаға ҹәмләјиб (Зәб. 51:10).

² Бу үч вәзијјәтдә һансы охшарлыг вар? Онлар кечмишдә оланлары унутмаса да, кечмишлә јашамыр. Әксинә, ҝөзләри дүз габаға, ҝәләҹәјә бахыр. (Мәсәлләр 4:25 ајәсини охујун.)

3. Нәјә ҝөрә ҝәләҹәјә бахмалыјыг?

³ Нәјә ҝөрә ҝәләҹәјә бахмаг ваҹибдир? Неҹә ки, инсан архаја баха-баха ирәли ҝедә билмәз, ејнилә, биз дә даим кечмишдә оланлары дүшүнсәк, Јеһоваја хидмәтдә ирәли ҝедә билмәјәҹәјик (Лука 9:62).

4. Бу мәгаләдә нәји арашдыраҹағыг?

⁴ Бу мәгаләдә кечмишлә јашамағымыза * сәбәб олан үч тәләдән данышаҹағыг: 1) кечмишин хиффәти, 2) инҹик галмаг вә 3) өзүнү һәдсиз гынамаг. Һәр тәләни арашдыраркән өјрәнәҹәјик ки, Мүгәддәс Китаб принсипләри бизә «архада галан шејләр» һаггында дүшүнмәјиб, «ирәлидәки шејләрә» ҹан атмаға неҹә көмәк едә биләр (Филип. 3:13).

5. Ваиз 7:10 ајәсиндә һансы тәлә һаггында хәбәрдарлыг вар?

⁵ Ваиз 7:10 ајәсини охујун. Диггәт јетирдинизсә, бу ајәдә дејилмир ки, «әввәлки ҝүнләр јахшы иди» демәк сәһвдир. Ҝөзәл хатирәләр Јеһованын әнамыдыр. Ајәдә белә јазылыб: «Демә: “Әввәлки ҝүнләр индикиндән јахшы иди”». Башга сөзлә, әввәлки вәзијјәтимизи индики илә мүгајисә етмәк вә инди һәр шејин бетәр олдуғуну дүшүнмәк тәләдир. Бу ајә башга бир тәрҹүмәдә белә сәсләнир: «Демә: “Әввәлки ҝүнләр индикиндән гат-гат јахшы иди”».

6. Өтән ҝүнләримизин даһа јахшы олдуғуну даим дүшүнмәк нәјә ҝөрә мүдрик олмазды? Нүмунә чәкин.

⁶ Отуруб-дуруб әввәлки ҝүнләримизин индикиндән даһа јахшы олдуғуну дүшүнмәк нәјә ҝөрә мүдрик олмазды? Чүнки кечмишин хиффәтини чәксәк, јалныз јахшы шејләри хатырлајаҹағыг, чәкдијимиз әзијјәтләри исә унудаҹағыг. Ҝәлин гәдим Исраил халгыны јадымыза салаг. Мисирдән чыхандан сонра онлар орадакы чәтин һәјатларыны тез бир заманда унутдулар. Тәкҹә орада једикләри јахшы јемәкләри хатырлајырдылар. Онлар дејирди: «Һејиф о ҝүнләрдән! Вахт вар иди Мисирдә һавајы балыг јејирдик, һәлә хијары, гарпызы, кәвәри, соған-сарымсағы демирик!» (Сај. 11:5). Доғрудан онлар о јемәкләри «һавајы» јејирдиләр? Хејр. Бу онлара баһа баша ҝәлирди; Мисирдә онларла гул кими давранырдылар, чох зүлм едирдиләр (Чых. 1:13, 14; 3:6—9). Амма онлар сонралар чәкдикләри әзаблары унутдулар, кечмишин хиффәтини чәкмәјә башладылар. Исраиллиләр Јеһованын онлар үчүн етдији хејирхаһ ишләр һагда дүшүнмәк әвәзинә, өтән ҝүнләрин һәсрәти илә јашајырды. Онларын бу давранышы Јеһоваја ағыр ҝетди (Сај. 11:10).

7. Бир баҹыја кечмишин хиффәтини чәкмәмәјә нә көмәк етди?

⁷ Бәс биз бу тәләјә дүшмәмәк үчүн нә едә биләрик? Ҝәлин бир баҹынын нүмунәсинә бахаг. О, 1945-ҹи илдә Бруклиндәки Бејтелдә хидмәт етмәјә башламышды. Бир  нечә ил кечәндән сонра о, бир бејтелли гардашла аилә гурду вә онлар бирҝә узун илләр хидмәт етдиләр. Лакин 1970-ҹи илләрин орталарында баҹынын јолдашы хәстәләнди. Баҹы дејир ки, јолдашы өлүмүнә аз галдығыны биләндә она ҝөзәл мәсләһәт вермишди. Онун иткијә таб ҝәтирә билмәси үчүн белә демишди: «Бизим хошбәхт никаһымыз олуб. Белә бир никаһ һәр адама нәсиб олмур». О, баҹыны тәшвиг едәрәк демишди: «Хатирәләрин һәмишә сәнинлә олаҹаг, амма кечмишинлә јашама. Заман јараларыны сағалдаҹаг. Аҹыглы галма, өзүнү јазыглама. Севин ки, Јеһоваја хидмәтдә хошбәхт, немәтләрлә долу ҝүнләр кечирмишик... Хатирәләр Јеһованын әнамыдыр». Неҹә дә ҝөзәл мәсләһәтдир!

8. Бир баҹы кечмишлә јашамамағын хејрини неҹә ҝөрүб?

⁸ Баҹымыз бу мәсләһәтә гулаг асды. О, өлүмүнә гәдәр, 92 јашына гәдәр Јеһоваја сәдагәтлә хидмәт етди. Өлүмүндән бир нечә ил өнҹә баҹы демишди: «Јеһоваја тамвахтлы хидмәтдә кечирдијим 63 илә бојлананда дејә биләрәм ки, мән, һәгигәтән дә, хошбәхт өмүр сүрмүшәм». Баҹы бунун сәбәбини белә изаһ едир: «Хошбәхт олмаг үчүн әсасымыз вар, чүнки биз мөһтәшәм гардашлығын әһатәсиндәјик вә бирҝә јерүзү ҹәннәтдә јашамаг, Јараданымыза, тәк ҝерчәк Аллаһымыз Јеһоваја әбәдијјән ибадәт етмәк үмидимиз вар» *. Баҹынын диггәтини ҝәләҹәјә ҹәмләмәси бизим үчүн ҝөзәл нүмунәдир.

9. Лавилиләр 19:18 ајәсиндә ҝөстәрилдији кими, бағышламаг нә вахт бизим үчүн чәтин ола биләр?

⁹ Лавилиләр 19:18 ајәсини охујун. Адәтән диндашымыз, гоһумумуз вә ја достумуз бизимлә пис рәфтар едәндә бағышламаг даһа чәтин олур. Мәсәлән,  диндашы бир баҹыны јанлыш олараг пул оғурламагда ҝүнаһландырмышды. Сонрадан о үзр истәсә дә, баҹы баш верәнләри унуда билмирди. Сиз дә белә һиссләр кечирмисиниз? Ејни вәзијјәтлә үзләшмәсәк дә, јәгин чохларымызда олуб ки, кимдәнсә инҹимишик вә ону һеч вахт бағышламајаҹағымызы дүшүнмүшүк.

10. Үрәјимиздә инҹиклик галарса, нә едә биләрик?

¹⁰ Үрәјимиздә инҹиклик галарса, нә едә биләрик? Әввәла унутмамалыјыг ки, Јеһова һәр шеји ҝөрүр. О, башымыза ҝәлән һәр бир шејдән, о ҹүмләдән һагсызлыгла үзләшәркән кечирдијимиз һиссләрдән аҝаһдыр (Ибр. 4:13). Бизим әзаб чәкдијимизи ҝөрмәк Јеһова үчүн ағырдыр (Әшј. 63:9). О вәд едир ки, һагсызлыг уҹбатындан чәкдијимиз истәнилән зәрәри арадан галдыраҹаг (Вәһј 21:3, 4).

11. Бағышламағын бизә һансы хејри вар?

¹¹ Һәмчинин јадда сахламалыјыг ки, бағышламаг өзүмүзүн хејринәдир. Һагсыз јерә ҝүнаһландырылан баҹы мәһз буну баша дүшдү. Бир мүддәт сонра о, үрәјиндән инҹиклик һиссини чыхара билди. Баҹы анлады ки, биз башгаларыны бағышлајанда Јеһова да бизи бағышлајыр (Мәт. 6:14). Дүздүр, баҹы диндашынын бу һәрәкәтинә һагг вермәди, амма о, инҹиклији үрәјиндән чыхарыб атды. Нәтиҹәдә баҹы өзүнү даһа хошбәхт һисс етди вә диггәтини Јеһоваја хидмәтә ҹәмләјә билди.

12. 1 Јәһја 3:19, 20 ајәләриндән нә өјрәнирик?

¹² 1 Јәһја 3:19, 20 ајәләрини охујун. Һамымыз бәзән өзүмүзү ҝүнаһкар һисс едирик. Мәсәлән, бәзиләри һәгигәти өјрәнмәздән әввәл, бәзиләри исә вәфтиздән сонра етдикләри сәһвә ҝөрә өзләрини гынајырлар (Ром. 3:23). Әлбәттә, биз истәјирик ки, Аллаһын бәјәндији кими давранаг, амма «һәр биримиз дәфәләрлә сәһв едирик» (Јаг. 3:2; Ром. 7:21—23). Өзүмүзү ҝүнаһкар һисс етмәјимиз, хош һисс олмаса да, бунун хејри вар. Чүнки бу һисс бизи һәрәкәтимизи дүзәлтмәјә вә бир дә сәһвимизи тәкрарламамаға тәшвиг едә биләр (Ибр. 12:12, 13).

13. Өзүмүзү һәддән артыг гынамаг нәјә ҝөрә тәһлүкәлидир?

¹³ Лакин, ола биләр ки, өзүмүзү һәддән артыг гынајаг: төвбә етсәк дә, Јеһова бизи бағышладығыны ҝөстәрсә дә, өзүмүзү јенә дә ҝүнаһландыраг. Бу һисс тәһлүкәлидир (Зәб. 31:10; 38:3, 4). Нәјә ҝөрә? Кечмиш ҝүнаһларына ҝөрә виҹдан әзабындан гуртула билмәјән бир баҹынын нүмунәсинә бахаг. О дејир: «Мәнә елә ҝәлирди ки, Јеһоваја хидмәтдә чох чалышмаға дәјмәз, артыг мәним үчүн ҝеҹдир». Баҹынын һиссләри чохларымыза танышдыр. Еһтијатлы олмалыјыг ки, өзүмүзү һәддиндән артыг гынајыб, Шејтанын тәләсинә дүшмәјәк. Ишдир, Јеһова бизи бағышладығы һалда, биз өзүмүзү бағышламајыб хидмәтимизи дајандырсаг, Шејтанын севинмәсинә сәбәб оларыг! (2 Коринфлиләрә 2:5—7, 11 ајәләри илә әлагәләндирин.)

14. Јеһованын бизи бағышладығына неҹә әмин ола биләрик?

¹⁴ Амма јенә дә бизи бир суал нараһат едә биләр: «Һарадан билим ки, Јеһова мәни бағышлајыб?» Әслиндә, бу суалы вермәклә суала ҹаваб да вермиш олуруг. Узун илләр өнҹә «Ҝөзәтчи гүлләси»ндә јазылмышды: «Ола билсин, биз әввәлки һәјат тәрзимиздән галан вә дүшүндүјүмүздән даһа дәринә көк салан һансыса пис вәрдишимизә ҝөрә дәфәләрлә бүдрәјир вә јыхылырыг... Үмидсизлијә гапылмајын. Дүшүнмәјин ки, бағышланмаз ҝүнаһ ишләмисиниз. Шејтан  сизин мәһз белә фикирләшмәјинизи истәјир. Кәдәрләнмәјиниз, мәјус олмағыныз артыг сүбут едир ки, вәзијјәтиниз үмидсиз дејил. Тәвазөкар вә сәмими шәкилдә Јеһоваја үз тутуб сизи бағышламасыны, пак етмәсини вә көмәк ҝөстәрмәсини диләмәкдән һеч вахт јорулмајын. Ушаг ејни сәһви нечә дәфә етмәсиндән асылы олмајараг, һәр дәфә атасынын үстүнә гачдығы кими, сиз дә Јеһоваја сығынын. О, лүтф ҝөстәриб сизә ҹомәрдликлә көмәк едәҹәк» *.

15, 16. Бәзиләри Јеһованын онлары бағышладығыны дәрк едәндә һансы һиссләри кечириб?

¹⁵ Бир чох баҹы-гардашымыз Јеһованын онлары бағышладығыны баша дүшәндә тәсәлли тапыб. Мәсәлән, бир нечә ил бундан өнҹә бир гардаша «Мүгәддәс Китаб һәјатлары дәјишир» рубрикасындан охудуғу мәгаләнин көмәји дәјмишди. Орада бир баҹынын сөзләри јазылмышды; баҹы кечмишдә сәһвләр етдији үчүн дүшүнүрдү ки, Јеһова ону севә билмәз. О, вәфтиз оландан узун илләр сонра да бу ҹүр һиссләрлә мүбаризә апарырды. Лакин фидјә үзәриндә дәриндән дүшүндүкҹә фикри дәјишмәјә башлады *.

¹⁶ Бу баҹынын һадисәси гардаша неҹә көмәк етди? Гардаш јазыр: «Ҝәнҹ вахтларымда порнографија алудәчилијим вар иди, бунунла мүбаризә апарырдым. Бу јахынларда бу һал јенидән тәкрарланды. Ағсаггаллардан көмәк истәдим вә проблемин өһдәсиндән хејли ҝәлдим. Ағсаггаллар мәни Јеһованын мәһәббәтинә вә мәрһәмәтинә әмин етдиләр. Амма бәзән һәлә дә өзүмү дәјәрсиз һисс едирәм, дүшүнүрәм ки, Јеһова мәним кими инсаны севмәз. Баҹынын һадисәсинин мәнә бөјүк көмәји дәјиб. Инди дәрк едирәм ки, Јеһованын мәни бағышламасынын мүмкүн олмадығыны дүшүнмәклә, бир нөв, дејирәм ки, Онун Оғлунун гурбанлығы мәним ҝүнаһларымы өртә билмәз. Бу мәгаләни кәсиб ҝөтүрдүм ки, һәр дәфә дәјәрсизлик һисси мәни чулғајанда ону охујуб үзәриндә дүшүнүм».

17. Булуса өзүнү һәддән артыг ҝүнаһкар һисс етмәмәјә нә көмәк етмишди?

 ¹⁷ Бу кими һадисәләр бизә һәвари Булусу хатырладыр. Мәсиһи олмаздан өнҹә о, чохлу ҹидди ҝүнаһлар ишләмишди. Етдији әмәлләри унутмаса да, Булус отуруб-дуруб бу һагда дүшүнмүрдү (1 Тим. 1:12—15). О, Мәсиһин ҹаныны шәхсән онун уғрунда гурбан вердијини һесаб едирди (Гал. 2:20). Беләҹә, гојмады ки, ҝүнаһ һисси онун јејиб-битирсин, әксинә, бүтүн диггәтини Јеһоваја хидмәтдә әлиндән ҝәләни етмәјә ҹәмләди.

18. Бу мәгаләдән нә өјрәндик?

¹⁸ Бу мәгаләдә арашдырдығымыз тәләләрлә бағлы нә өјрәндик? 1) Хош хатирәләр Јеһованын әнамыдыр; бунунла белә, өтән ҝүнләримиз нә гәдәр јахшы олса да, ҝәләҹәкдә јени дүнјада һәјатымыз даһа јахшы олаҹаг. 2) Кимсә бизим гәлбимизи јараласа да, ону бағышламаг көмәк едәҹәк ки, диггәтимизи хидмәтә ҹәмләјәк. 3) Өзүмүзү һәддән артыг гынамаг Јеһоваја хидмәтдән севинҹ дујмағымыза әнҝәл ола биләр. Буна ҝөрә дә һәвари Булус кими, Јеһованын бизи бағышладығына инанмалыјыг.

19. Һарадан билирик ки, јени дүнјада аҹы хатирәләр бизә әзаб вермәјәҹәк?

¹⁹ Бизим әбәди јашамаг имканымыз вар! Јени дүнјада аҹы хатирәләр бизә әзаб вермәјәҹәк. Һәмин дөврлә бағлы Мүгәддәс Китабда јазылыб: «Көһнә шејләр јада дүшмәјәҹәк» (Әшј. 65:17). Бир дүшүнүн: бәзиләримиз Јеһоваја узун илләр хидмәт едиб гоҹалсаг да, јени дүнјада ҹаванлашаҹағыг (Әјј. 33:25). Буна ҝөрә дә ҝәлин кечмишлә јашамајаг! Ҝөзүмүзү ҝәләҹәкдәки һәјата зилләјәк вә орада јашамаг үчүн әлимиздән ҝәләни едәк!