1, 2. а) Бу мәгаләдә һансы суаллары арашдыраҹағыг? б) Јеһованын бизә көмәк етмәји үрәкдән истәдијини нә ҝөстәрир?

 ЈЕҺОВА бизә чәтинликләрә таб ҝәтирмәјә вә мүгәддәс хидмәтимиздән севинҹ дујмаға көмәк едә биләр. Бәс О бизә һансы үсулларла көмәк едир? Јеһованын көмәјиндән там јарарланмаг үчүн нә едә биләрик? Бу мәгаләдә бу суалларын ҹавабыны тапаҹағыг. Амма ондан әввәл ҝәлин бир суалы ҹавабландыраг: «Јеһова үмумијјәтлә бизә көмәк етмәк истәјир?»

² Һәвари Булусун ибраниләрә јаздығы мәктубда истифадә етдији бир сөз бизә бу суала ҹаваб тапмаға көмәк едә биләр. О јазмышды: «Јеһова дајағымдыр, әсла горхмарам. Инсан мәнә нә едә биләр?!» (Ибр. 13:6). Мүгәддәс Китаб үзрә бир чох елми мәнбәләрдә изаһ олунур ки, бу ајәдә истифадә олунан «дајаг» сөзү көмәк үчүн фәрјад едән кәсин һарајына гачан инсаны тәсвир едир. Санки Јеһова јүјүрүб дарда олан инсанын дадына чатыр. Јәгин, разы оларсыныз ки, бу тәсвир Јеһованын бизә дајаг олмағы нә гәдәр чох истәдијини ајдын ҝөстәрир. Јеһованын көмәји сајәсиндә биз истәнилән чәтинлијә севинҹлә таб ҝәтирә биләрик.

3. Јеһова һансы үч үсулла сынаглара севинҹлә таб ҝәтирмәјимизә көмәк едир?

³ Бәс Јеһова бизә һансы үсулларла дајаг олур? Ҝәлин бу суала ҹаваб тапмаг үчүн «Әшија» китабына нәзәр салаг.  Чүнки Әшијанын Јеһованын илһамы илә јаздығы пејғәмбәрликләрин чоху бизә дә аиддир. Бундан әлавә, Әшија Јеһова һаггында данышаркән чох ајдын вә садә сөзләрдән истифадә етмишди. Мәсәлән, ҝөтүрәк Әшија 30-ҹу фәсли. Бу фәсилдә Әшија Јеһованын Өз халгына неҹә көмәк етдијини тәсәввүрүмүздә ҹанландыра билмәјимиз үчүн парлаг образлар јарадыб. О јазмышды ки, Јеһова 1) бизим дуаларымызы диггәтлә динләјиб, онлара ҹаваб вермәклә, 2) бизә јол ҝөстәрмәклә вә 3) бизә инди вердији вә ҝәләҹәкдә верәҹәји немәтләр васитәсилә көмәк едир. Ҝәлин бу үч үсулу даһа әтрафлы арашдыраг.

4. а) Јеһова Әшијанын дөврүндәки јәһудиләр һаггында нә демишди вә нәтиҹәдә О нәјә изин верди? б) Садиг јәһудиләрә Јеһова һансы үмиди вермишди? (Әшија 30:18, 19).

⁴ Әшија 30-ҹу фәслин илк ајәләриндә Јеһова јәһудиләри «тәрс оғуллар» адландырыр вә гејд едир ки, онлар «ҝүнаһа ҝүнаһ гатырлар». Јеһова сөзүнүн давамында белә дејир: «Онлар аси халгдыр... Јеһованын ганунуну ешитмәк истәмәјән сојдур» (Әшј. 30:1, 9). Онлар Јеһованын сөзүнә гулаг асмағы рәдд етдикләри үчүн Әшија демишди ки, Јеһова башларына ҝәләҹәк фәлакәтдән онлары горумајаҹаг (Әшј. 30:5, 17; Әрм. 25:8—11). Белә дә олду. Бабиллиләр онлары әсир апарды. Амма онларын арасында садиг олан јәһудиләр дә вар иди вә Әшија онлара үмидвериҹи хәбәр чатдырды. Деди ки, ҝүн ҝәләҹәк Јеһова онлара лүтф ҝөстәрәҹәк. (Әшија 30:18, 19 ајәләрини охујун.) Бу сөзләр јеринә јетди. Јеһова онлары әсирликдән азад етди. Амма бу дәрһал баш вермәди. «Јеһова сәбирлә ҝөзләјир ки, сизә лүтф ҝөстәрсин» сөзләринә әсасән, садиг инсанларын азадлыға чыхмасы үчүн мүәјјән вахт кечмәли иди. Белә ки, исраиллиләр дүз 70 илдән сонра әсирликдән азад олду вә онлардан бәзиләри Јерусәлимә гајыда билди (Әшј. 10:21; Әрм. 29:10). Ҝери гајыданларын әсирликдә оларкән ахытдыглары кәдәр ҝөз јашларыны севинҹ ҝөз јашлары әвәз етди.

5. Әшија 30:19 ајәси бизи нәјә архајын едир?

⁵ Бу ҝүн биз нөвбәти сөзләрдән тәсәлли тапа биләрик: «Сән фәрјад едәндә О, сәнә лүтф ҝөстәрәҹәк» (Әшј. 30:19). Әшија бизи архајын едир ки, биз фәрјад едәндә Јеһова бизи диггәтлә динләјәҹәк вә фәрјадымыза дәрһал ҹаваб верәҹәк. Әшија һәмчинин әлавә едир: «Сәсини ешитҹәк сәнә һај верәҹәк». Бу сөзләр бизи әмин едир ки, Атамыз ондан имдад диләјәнләрин дадына јетмәјә һазырдыр. Буну билмәк бизә севинҹлә дөзмәјә көмәк едир.

6. Әшијанын сөзләриндән Јеһованын һәр бир хидмәтчисинин дуасына гулаг асдығы неҹә ҝөрүнүр?

⁶ Бу ајәдә бизи руһландыраҹаг башга бир фикир дә вар. Јеһова ајры-ајрылыгда һәр биримизин дуасына гулаг асыр. Нәјә әсасән белә дејә биләрик? 30-ҹу фәслин әввәлиндә «сиз» әвәзлији истифадә олунуб. Чүнки орада Јеһова бүтүн халга мүраҹиәт едир. 19-ҹу ајәдә исә «сән» әвәзлији истифадә олунуб. Чүнки орада јазылан сөзләр фәрди олараг һәр бир кәсә аиддир. Әшија јазмышды: «Сән фәрјад едәндә», «сәнә лүтф ҝөстәрәҹәк», «сәнә һај верәҹәк». Јеһова мәһәббәтли Ата кимидир. О, һеч вахт руһдан дүшмүш гызыны вә оғлуну диҝәр өвладлары илә мүгајисә етмир. «Сән дә баҹы-гардашын кими ҝүҹлү олмалысан»,— демир. О, һәр биримизә фәрди јанашыр вә дуаларымыза шәхсән гулаг асыр (Зәб. 116:1; Әшј. 57:15).

7. Әшија пејғәмбәр вә Иса Мәсиһ исрарла дуа етмәјин ваҹиблији һагда нә демишди?

 ⁷ Бизи нараһат едән мәсәлә илә бағлы Јеһоваја дуа едәндә, ола билсин, Јеһова дәрһал дуамызын ҹавабы олараг бизә дөзмәјә ҝүҹ верәҹәк. Әҝәр проблемимиз ҝөзләдијимиздән узун чәкирсә, биз дөнә-дөнә Јеһоваја дуа едиб ҝүҹ истәјә биләрик. О Өзү бизи буна тәшвиг едир. Буну Әшијанын сөзләриндән ҝөрмәк олар: «[Јеһовадан] әл чәкмәјин» (Әшј. 62:7). Бу нә демәкдир? Бизим дуаларымыз о гәдәр исрарлы олмалыдыр ки, санки Јеһовадан әл чәкмирик. Әшијанын сөзләри бизә Иса Мәсиһин Лука 11:8—10, 13 ајәләриндәки сөзләрини хатырладыр. Иса бу ајәләрдә бизи тәшвиг едир ки, мүгәддәс руһу исрарла, дурмадан диләјәк. Биз һәмчинин Јеһоваја дуа етмәлијик ки, дүзҝүн гәрар вермәјимиз үчүн бизә јол ҝөстәрсин.

8. Әшија 30:20, 21 ајәләри гәдимдә неҹә јеринә јетди?

⁸ Әшија 30:20, 21 ајәләрини охујун. Бабиллиләр ил јарым Јерусәлими мүһасирәдә сахламышды. Бу мүддәт әрзиндә јәһудиләрә дәрд вә зүлм чөрәклә су кими таныш иди. Амма 20 вә 21-ҹи ајәләрдән ҝөрдүјүмүз кими, Јеһова сөз вермишди ки, әҝәр халг төвбә етсә вә әмәлләриндән дөнсә, дадына јетәҹәк. Әшија Јеһованы онларын Бөјүк Нәсиһәтчиси адландырмышды вә демишди ки, Јеһова онлара Она мәгбул шәкилдә ибадәт етмәји өјрәдәҹәк. Јәһудиләр әсирликдән азад едиләндә бу сөзләр јеринә јетди. Јеһова онларын Бөјүк Нәсиһәтчиси олду вә Онун рәһбәрлији алтында халг пак ибадәти бәрпа едә билди. Чох хошбәхтик ки, Јеһова бу ҝүн дә бизим Бөјүк Нәсиһәтчимиздир.

9. Бу ҝүн Јеһовадан тәлим алмағын бир јолу һансыдыр?

⁹ Әшија јенә образлы дилдә данышыр вә бизи Јеһовадан өјрәнән шаҝирдләрә бәнзәдир. Биз ики үсулла тәлим алырыг. Биринҹи үсул барәдә Әшија јазыр: «Бөјүк Нәсиһәтчини өз ҝөзүнлә ҝөрәҹәксән». Әшија бу бәнзәтмәдә нәсиһәтчинин шаҝирдләрин өнүндә дурдуғуну тәсвир едир. Бу ҝүн бизә дә Бөјүк Нәсиһәтчидән тәлим алмаг шәрәфи нәсиб олуб. О бизә тәшкилаты васитәсилә тәлим верир. Јығынҹагдан, топлантылардан, нәшрләримиздән, JW телевизијамыздан вә диҝәр јолларла алдығымыз тәлим бизә чәтинликләрә севинҹлә таб ҝәтирмәјә көмәк едир. Јеһоваја бизә вердији ајдын ҝөстәришләрә ҝөрә чох миннәтдарыг.

10. Һансы мәнада гулағымыза архадан сәс ҝәлир?

 ¹⁰ Әшија Јеһованын бизә тәлим вермәсинин икинҹи үсулу барәдә белә дејир: «Гулағына архадан бу сәс ҝәләҹәк». Олур ки, мүәллим шаҝирдләринин архасынҹа ҝедәрәк онлара истигамәт верир. Әшија Јеһова илә бағлы белә бир образ јаратмышды. Бу ҝүн биз дә архадан Онун сәсини ешидирик. Бу неҹә мүмкүндүр? Јеһованын сөзләри Мүгәддәс Китабда әсрләр өнҹә јазылыб. Буна ҝөрә дә биз ону охујанда санки архадан Јеһованын сәсини ешидирик (Әшј. 51:4).

11. Чәтинликләрә севинҹлә таб ҝәтирмәк үчүн һансы аддымлары атмалыјыг вә нәјә ҝөрә?

¹¹ Јеһованын тәшкилаты вә Кәламы васитәсилә вердији мәсләһәтләрдән там јарарланмаг үчүн нә едә биләрик? Әшија пејғәмбәр ики мәгамы гејд едир. Биринҹиси, «јол будур», икинҹиси, «бу јолла ҝет» (Әшј. 30:21). Јолу билмәк кифајәт дејил. Биз һәм дә бу јолла ҝетмәлијик. Јеһованын Кәламындан Онун бујругларыны өјрәнирик. Тәшкилатын вердији ачыгламаларын бу саһәдә бизә чох көмәји дәјир. Бунунла јанашы, биз өјрәндикләримизә әмәл етмәји өјрәнирик. Јеһоваја хидмәтдә чәтинликләрә севинҹлә таб ҝәтирә билмәк үчүн биз бу аддымларын икисини дә атмалыјыг. Јалныз бу һалда Јеһованын бизә немәтләр верәҹәјинә әмин ола биләрик.

12. Әшија 30:23—26 ајәләринә әсасән, Јеһова халгына һансы немәтләри бәхш етди?

¹² Әшија 30:23—26 ајәләрини охујун. Бу пејғәмбәрлик Бабил әсарәтиндән Исраилә гајыдан јәһудиләрин үзәриндә неҹә јеринә јетди? Јеһова онлара физики вә руһани немәтләр бәхш етди. Халгын һәм јемәји бол иди, һәм дә, ән әсасы, пак ибадәтин тәдриҹән бәрпа олунмасы үчүн руһани гидасы. Јәһудиләр индијәдәк Јеһовадан бу гәдәр чох руһани немәтләр алмамышды. 26-ҹы ајәдә гејд олундуғу кими, Јеһованын вердији руһани нур даһа да парлаг олмушду (Әшј. 60:2). Бу немәтләр халгда үрәк ҹошгунлуғу јаратды вә беләҹә, онлар севинҹлә вә мәтанәтлә хидмәт етдиләр (Әшј. 65:14).

13. Пак ибадәтин бәрпасы илә бағлы пејғәмбәрлик бизим дөврүмүздә неҹә јеринә јетир?

¹³ Пак ибадәтин бәрпасы илә бағлы пејғәмбәрлик бизә аиддир? Әлбәттә. 1919-ҹу илдән бәри милјонларла инсан јалан динин дүнја империјасы олан Бөјүк Бабилин әсарәтиндән гуртулуб. Јеһова онлары исраиллиләрин олдуғу Вәд едилмиш  дијардан даһа јахшы бир јерә, руһани ҹәннәтә ҝәтириб (Әшј. 51:3; 66:8). Бәс руһани ҹәннәт нәдир?

14. Руһани ҹәннәт нәдир вә бу ҝүн орада кимләр мәскунлашыб? («Бәзи ифадәләрин изаһы»на бахын.)

¹⁴ Ерамызын 1919-ҹу илиндән бәри мәсһ олунмушлар руһани ҹәннәтдә b јашајыр. Вахт кечдикҹә јерүзү үмидинә саһиб олан «башга гојунлар» да руһани ҹәннәтдә мәскунлашды вә Јеһовадан бол немәтләр алды (Јәһ. 10:16; Әшј. 25:6; 65:13).

15. Руһани ҹәннәт һарада јерләшир?

¹⁵ Бәс бу ҝүн руһани ҹәннәт һарада јерләшир? Јеһоваја ибадәт едән инсанлара дүнјанын һәр бир јериндә раст ҝәлмәк мүмкүндүр. Демәли, онларын мәскунлашдығы руһани ҹәннәтин әразиси бүтүн дүнјаны әһатә едир. Һарада јашамағымыздан асылы олмајараг, нә гәдәр ки пак ибадәти фәал сурәтдә дәстәкләјирик, биз руһани ҹәннәтин сакини ола биләрик.

16. Руһани ҹәннәтин ҝөзәллијини даим ҝөрмәк үчүн нә етмәлијик?

¹⁶ Руһани ҹәннәтдә галмаг үчүн диҝәр шејләрлә јанашы, ҝәрәк мәсиһи јығынҹағыны да даима гијмәтләндирәк. Буну неҹә едә биләрик? Бунун үчүн диггәтимизи оранын сакинләринин сәһвләринә јох, ҝөзәл ҹәһәтләринә ҹәмләмәлијик (Јәһ. 17:20, 21). Бу нә үчүн ваҹибдир? Ҝәлин бир нүмунәјә бахаг. Ҝөзәл бир мешә тәсәввүр един. Адәтән мешәдә бир-бириндән фәргли ағаҹлар олур. Ејнилә јығынҹагларымызда олан руһани ҹәннәти дә бир-бириндән фәргли инсанлар бәзәјир. Онлары ағаҹлара бәнзәтмәк олар (Әшј. 44:4; 61:3). Чалышмалыјыг ки, диггәтимизи «мешәнин» ҝөзәллијинә ҹәмләјәк, јанымызда олан «ағаҹын» гүсурларына јох. Јол вермәмәлијик ки, өзүмүзүн вә ја баҹы-гардашларымызын сәһвләри мәсиһи јығынҹағынын ҝөзәллијини ҝөрмәјимизә мане олсун.

17. Јығынҹагда бирлији горумаг үчүн һәр биримиз нә едә биләрик?

¹⁷ Бәс һәр биримиз өз тәрәфимиздән  јығынҹагдакы бирлији горумаг үчүн нә етмәлијик? Сүлһпәрвәр олмалыјыг (Мәт. 5:9; Ром. 12:18). Баҹы-гардашларла арамызда сүлһү горумаг үчүн һәр дәфә тәшәббүс ҝөстәрәндә руһани ҹәннәтин ҝөзәллијинә ҝөзәллик гатырыг. Унутмамалыјыг ки, руһани ҹәннәтин һәр бир сакинини пак ибадәтә Јеһова ҹәлб едиб (Јәһ. 6:44). Онларын һәр бири Јеһованын ҝөзүндә ләл-ҹәваһирдир! Ҝөрүн биз онларла арамызда бирлији вә сүлһү горумаг үчүн вар ҝүҹүмүзлә чалышанда Јеһова неҹә севинир (Әшј. 26:3; Һәг. 2:7).

18. Даим нәјин үзәриндә дүшүнмәлијик вә нә үчүн?

¹⁸ Јеһованын вердији сајсыз немәтләрин хејрини там ҝөрмәк үчүн нә етмәлијик? Аллаһын Кәламындан вә она әсасланан нәшрләрдән өјрәндикләримизин дәринлијинә вармалыјыг. Бу ҹүр мүталиәнин сајәсиндә биз ҝөзәл мәсиһи хүсусијјәтләринә саһиб олаҹағыг вә бир-биримизә «нәвазишлә гардашлыг мәһәббәти» бәсләјәҹәјик (Ром. 12:10). Инди алдығымыз немәтләр барәдә дүшүнмәклә Јеһова илә мүнасибәтләримизи мөһкәмләндиририк. Јеһованын бизә ҝәләҹәкдә верәҹәји немәтләр барәдә дүшүнәндә исә Она әбәдијјән хидмәт етмәк үмидимиз даһа реал олур. Бүтүн бунлар бизә һал-һазырда Јеһоваја хидмәтдән даһа чох севинҹ дујмаға көмәк едир.

19. а) Әшија 30:18 ајәсинә әсасән, биз нәјә әмин ола биләрик? б) Чәтинликләрә севинҹлә дөзмәјә бизә нә көмәк едәҹәк?

¹⁹ Јеһова бу шәр дүнјаја сон гојанда бизим хејримизә ајаға «галхаҹаг» (Әшј. 30:18). Биз әминик ки, Јеһова Һагг Аллаһдыр, О, Шејтан дүнјасынын лазымындан бир ҝүн дә артыг мөвҹуд олмасына изин вермәјәҹәк (Әшј. 25:9). О ҝүн јетишәнә гәдәр исә Јеһова кими, биз дә сәбирлә ҝөзләјәҹәјик. Бу вахт әрзиндә исә ҝәлин дуа етмәк шәрәфини гијмәтләндирәк, Аллаһын Кәламыны охујуб, һәјатымызда тәтбиг едәк вә алдығымыз немәтләр барәдә дүшүнәк. Беләҹә, Јеһова бизә чәтинликләрә севинҹлә дөзмәјә көмәк едәҹәк.