Даһа сонра баш верәнләри данышмаздан өнҹә ҝәлин сизә тамвахтлы хидмәтә неҹә башладығымдан данышым.

Мән 1942-ҹи илдә Кариб дәнизиндә јерләшән ҝөзәл бир адада, Күрасао адасында анадан олмушам. Атам әслән суринамлы иди. Амма о ишләмәк үчүн адаја көчмүшдү. Мән дүнјаја ҝәлмәмишдән бир нечә ил әввәл атам артыг Јеһованын Шаһиди иди. О, Күрасаодакы a илк мәсиһиләрдән бири олуб. Атам һәр һәфтә мәнимлә вә баҹы-гардашларымла Мүгәддәс Китаб дәрси кечирди, һалбуки биз бәзән дәрс кечмәк истәмирдик. 14 јашым оланда аиләликҹә Суринама көчдүк. Нәнәм гоҹалмышды вә атам онун гајғысына галмалы иди.

Суринамдакы јығынҹагда мән Јеһоваја ҹанла-башла хидмәт едән ҝәнҹләрлә достлашдым. Онлар мәндән ҹәми бир нечә јаш бөјүк олсалар да, өнҹүл идиләр. Онлар тәблиғдә башларына ҝәлән һадисәләри данышанда һәмишә ҝөзләри парылдајырды. Јығынҹагдан сонра Мүгәддәс Китаба аид мөвзулар барәдә сөһбәт едирдик. Бәзән исә бу сөһбәтләри улдузлу сәманы сејр едә-едә едирдик. Бу достларымын сајәсиндә һәјатда нә истәдијими баша дүшдүм. Мән Јеһова үчүн чалышмаг истәјирдим. Буна ҝөрә дә 16 јашым оланда вәфтиз олундум. 18 јашымда исә өнҹүл хидмәтинә башладым.

Өнҹүл кими хидмәт едәндә мән чох шеј өјрәндим вә бунларын тамвахтлы хидмәтдә мәнә бөјүк көмәји дәјди. Мәсәлән, өјрәндијим шејләрдән биринҹиси о иди ки, башгаларына тәлим вермәк лазымдыр. Чүнки мән өзүм өнҹүл хидмәтинә башлајанда Виллем ван Сејел адлы хүсуси тәјинатлы мүждәчи мәни өз  ганадлары алтына алды b. О мәнә јығынҹагдакы мәсулијјәтләрими јеринә јетирмәклә бағлы чох шеји изаһ етди. Һеч билмәздим ки, мәним тәлимә бу гәдәр еһтијаҹым вар. Нөвбәти ил мән хүсуси өнҹүл тәјин олундум вә Суринамын ҹәнҝәлликләринин дәринликләриндә јерләшән тәҹрид олунмуш груплара рәһбәрлик етмәјә башладым. Нә јахшы ки, Вилјам кими гардашлар мәнә вахтында тәлим вермишдиләр! Бунун чох хејрини ҝөрдүм. Мән дә онлардан нүмунә ҝөтүрәрәк һәмишә чалышмышам ки, башгаларына тәлим верим.

Икинҹиси, садә һәјат сүрмәјин, амма һәр шеји планлашдырмағын ваҹиблијини өјрәндим. Һәр ајын әввәли хүсуси өнҹүл олан әмәкдашымла ај әрзиндә бизә лазым олан шејләрин сијаһысыны тутурдуг. Сонра исә биримиз узун јол гәт едәрәк пајтахта ҝедиб, онлары алырдыг. Чалышырдыг ајлыг мүавинәтимизи гәнаәтлә хәрҹләјәк вә алдығымыз шејләри елә бөлүшдүрәк ки, ај әрзиндә бәс етсин. Чүнки ҹәнҝәлликдә олан вахт нәјимизсә гуртарсајды, бизә көмәк едәҹәк бир-ики нәфәр ја оларды, ја олмазды. Дүшүнүрәм ки, ҝәнҹ јашымда садә јашамаг, амма һәр шеји јахшыҹа планлашдырмаг мәнә өмрүм бојунҹа диггәтими Јеһованын ишинә ҹәмләмәјә көмәк етди.

Үчүнҹүсү исә инсанлара өз ана дилләриндә тәблиғ етмәјин ваҹиблијини өјрәндим. Мән Нидерланд, инҝилис, папјаменто вә Суринамын әсас дили олан сранан-тонго дилиндә (сранан кими дә таныныр) даныша билирдим. Ҹәнҝәлликләрдә хидмәт етдијим вахт фикир вердим ки, инсанлара өз ана дилләриндә тәблиғ едәндә онлар даһа јахшы һај верирләр. Бу дилләрин бәзиләри мәнә чәтин ҝәлирди, мәсәлән, сарамаккан дили. Чүнки бу дилдә данышаркән јухары вә ашағы сәс тонларындан истифадә етмәк лазымдыр. Амма чәкдијим зәһмәтә дәјди. Онларын доғма дилиндә даныша билдијим үчүн илләр әрзиндә мән чох инсана һәгигәти өјрәтмишәм.

Тәбии ки, биабыр олдуғум вахтлар да олурду. Бир дәфә сарамаккандилли бир гадына дәрс кечирдим. Онун мәдәси ағрыјырды. Ондан һал-әһвал тутмаг истәдим. Амма, сән демә, сәһвән ондан һамилә олдуғуну сорушмушам. Јәгин, баша дүшдүнүз, о неҹә реаксија ҝөстәрди. Башыма белә һадисәләр ҝәлсә дә, јенә дә чалышырдым, инсанлара өз ана дилләриндә тәблиғ едим.

1970-ҹи илдә мән рајон нәзарәтчиси тәјин олундум. Һәмин ил ҹәнҝәлликләрдәки чохлу уҹгар груплары зијарәт едирдим вә онлара «Јеһованын Шаһидләринин баш идарәсинә сәјаһәт» адлы слајды ҝөстәрирдим. Һәмин баҹы-гардашлара ҝедиб чатмаг үчүн мән вә бир нечә гардаш узун тахта гајыг васитәсилә чајла ҝедирдик. Гајыға ҝенератор, габларда әлавә бензин, нефт лампасы вә слајды ҝөстәрмәк үчүн лазым олан аваданлыглары јүкләјирдик. Һәр дәфә мәнзилбашына чатанда бу аваданлыглары ҹәнҝәлликләрин ичинә апарырдыг вә орада слајдлары ҝөстәрирдик. Амма бу  сәјаһәтләрим заманы ән чох јадымда галан үзләшдијим чәтинликләр јох, инсанларын бу слајдлары неҹә марагла изләмәси олду. Чох хошбәхт идим ки, онлара Јеһова һагда вә Онун тәшкилатынын јерүзү һиссәси һагда өјрәнмәјә көмәк едирдим. Онларын Јеһоваја јахынлашмасы уғрунда һәр зәһмәти чәкмәјә дәјәрди.

Мән хидмәтдә субајлығын үстүнлүкләрини ҝөрсәм дә, һисс едирдим ки, өмүр-ҝүн јолдашына еһтијаҹым вар. Буна ҝөрә дә Јеһоваја дуа етдим ки, мәнә һәјат јолдашы тапмаға көмәк етсин вә о, ҹәнҝәллик әразиләрдә тамвахтлы хидмәтин чәтинликләринә севинҹлә дөзмәјә һазыр олсун. Тәхминән бир илдән сонра Етел адлы хүсуси өнҹүллә ҝөрүшмәјә башладым. О, чох фәдакар иди. Етел ушаглыгдан һәвари Булуса хүсуси рәғбәт бәсләјирди вә онун кими хидмәтдә әлиндән ҝәләни етмәк истәјирди. Биз 1971-ҹи илин сентјабрында аилә гурдуг вә бирликдә рајон хидмәтинә башладыг.

Етел имканлы аиләдә бөјүмәдији үчүн ҹәнҝәллик әразиләрдә сәјјар хидмәтин јаратдығы чәтинликләрә тез ујғунлашды. Мисал үчүн, јығынҹаглары зијарәт едәндә өзүмүзлә чох аз шеј ҝөтүрүрдүк, палтарларымызы чајда јујурдуг, елә өзүмүз дә чајда чимирдик. Баҹы-гардашлар бизә нә верирди, ону да јејирдик, истәр бу игуана олсун, истәр пирана, истәрсә дә чајда вә ја мешәдә тутдуглары башга бир шеј. Бошгаб олмајанда јемәји банан габығына гојуб јејирдик. Чәнҝәл-гашыг олмајанда исә јемәји әллә јејирдик. Етеллә мән һисс едирдик ки, әл-әлә вериб, Јеһованын јолунда һәр бир әзијјәтә гатлашанда үчгат ипимиз даһа да мөһкәмләнир (Ваиз 4:12). Чохлу чәтинликләрлә үзләшсәк дә, бу анлары һеч нәјә дәјишмәрик.

Бир дәфә ҹәнҝәлликдән гајыданда әввәлдә данышдығым һадисә башымыза ҝәлди. Гајыг сујун ичинә ҝирсә дә, тез дә сујун үзүнә  чыхды. Јахшы ки, әјнимиздә хиласедиҹи жилет вар иди, һәм дә суја дүшмәдик. Амма гајығын ичинә су долду. Биз габларда олан јемәји чаја төкдүк вә габларла гајығын ичиндәки сују бошалтдыг.

Јемәкләри чаја атдығымыз үчүн јемәјә һеч нәјимиз галмамышды. Буна ҝөрә дә гајыгла ҝедә-ҝедә балыг тутмаға башладыг. Амма бир дәнә дә олсун балыг тута билмәдик. Сонра Јеһоваја дуа едиб, бизә һәмин ҝүн үчүн рузи јетирмәсини хаһиш етдик. Дуамызы гуртаран кими гардашлардан бири бөјүк бир балыг тутду. Һәмин балығы бешимиз дә јејиб дојдуг.

Беш ил сәјјар хидмәтдә оландан сонра ҝөзләнилмәз бир немәт алдыг. Валидејн олаҹағымызы өјрәндик. Бу хәбәрә ҝөрә чох севиндим. Тәбии ки, һәјатымыз дәјишәҹәкди, буна ҝөрә бир аз нараһат идим. Амма биз тамвахтлы хидмәтимизи мүмкүн гәдәр давам етдирмәк фикриндә идик. 1976-ҹы илдә оғлумуз Етнјел дүнјаја ҝәлди. Ики ил јарымдан сонра исә икинҹи оғлумуз Ҹованни анадан олду.

Суринамда тәләбат олдуғуна ҝөрә филиал һәм ушагларымы бөјүтмәјим, һәм дә сәјјар хидмәтдә галмағым үчүн тәдбир ҝөрдү. Ушагларымыз балаҹа оланда мән јығынҹагларын сајы аз олан рајонлара тәјин олунурдум. Адәтән мән ајын ики һәфтәси јығынҹаглары зијарәт едирдим, галан ҝүнләрдә исә өз јығынҹағымда өнҹүл кими хидмәт едирдим. Евимизә јахын јығынҹаглары зијарәт едәндә Етел вә оғулларымыз да мәнимлә бирликдә ҝедирди. Анҹаг ҹәнҝәлликләрдәки јығынҹаглары зијарәт едәндә вә топлантыларда иштирак едәндә мән тәк ҝедирдим.

Мән бүтүн мәсулијјәтләримин өһдәсиндән ҝәлмәк үчүн һәр шеји јахшы планлашдырмалы идим. Һәр һәфтә аиләви ибадәтимизин олмасы үчүн тәдбир ҝөрүрдүм. Мән ҹәнҝәлликләрдәки јығынҹаглары зијарәт едәндә Етел оғулларымызла бир јердә аиләви ибадәт кечирирди. Амма мүмкүн гәдәр чалышырдыг ки, һәр шеји бир јердә, аиләликҹә едәк. Бундан әлавә, Етеллә мән ушагларымызын фајдалы әјләнҹә илә мәшғул олмасы вә истираһәт етмәси үчүн дә әлимиздән ҝәләни едирдик. Ја онларла бирликдә ојунлар ојнајырдыг, ја да ҝәзмәјә ҝедирдик. Мән чох вахт ҝеҹәјарысына кими мәсулијјәтләримлә бағлы ишләри ҝөрүрдүм. Етел исә Мәсәлләр 31:15 ајәсиндә тәсвир олунан јахшы  арвад кими, алагаранлыгдан ојаныб һазырлыг ҝөрүрдү. Бунун сајәсиндә ушаглар мәктәбә ҝетмәмишдән әввәл бирликдә ҝүнүн ајәсини охујуб, сәһәр јемәји јејирдик. Јеһоваја чох миннәтдарам ки, мәним белә фәдакар һәјат јолдашым вар. Онун дәстәји сајәсиндә Јеһованын мәнә тапшырдығы мәсулијјәтләри иҹра едә билирәм!

Бир валидејн кими биз һәмишә чалышырдыг ки, ушагларымыза Јеһоваја вә хидмәтә севҝи ашылајаг. Биз истәјирдик ки, ушагларымыз һәјат јолу кими тамвахтлы хидмәти сечсинләр, амма буну бизим истәјимизлә јох, өз истәкләри илә етсинләр. Биз һәмишә онлара тамвахтлы хидмәтин ҝәтирдији севинҹдән данышырдыг. Биз демирдик ки, чәтинликләр олмајаҹаг, амма Јеһованын аиләмизә неҹә көмәк етдијини, нә гәдәр немәтләр вердијини вурғулајырдыг. Һәм дә диггәт јетирирдик ки, ушагларымыз Јеһованы һәјатларында һәр шејдән үстүн тутан баҹы-гардашларла отуруб-дурсунлар.

Јеһова ушагларымызы бөјүтмәк үчүн бизи лазым олан һәр шејлә тәмин етди. Әлбәттә ки, мән дә өз өһдәмә дүшәни едирдим. Субај вахты ҹәнҝәллик әразидә хүсуси өнҹүл кими хидмәт едәндә һәр шеји габагҹадан планлашдырмағы, пула гәнаәт етмәји өјрәнмишдим. Амма һәр шеји өлчүб-бичсәк дә, бәзән олурду ки, пулумуз чатмырды. Белә вахтларда Јеһованын көмәјини дујурдуг. Мәсәлән, 1980-ҹи илләрин сону 1990-ҹы илләрин әввәли Суринамда вәтәндаш мүһарибәси олду. Һәмин илләрдә һәтта ән зәрури шејләри әлдә етмәк чәтин иди. Амма Јеһова бизим гајғымыза галырды (Мәт. 6:32).

Бүтүн һәјатымыз боју Јеһованын әлини үзәримиздә һисс етмишик, гәлбимиздә һәмишә хошбәхтлик вә мәмнунлуг олуб. Өвладларымызла фәхр едирик. Онлары Јеһованын јолунда бөјүтмәк бизим үчүн бөјүк шәрәф иди. Чох хошбәхтик ки, онлар һәјатларыны тамвахтлы хидмәтә һәср етдиләр. Өвладларымызын икиси дә теократик мәктәбләрин мәзунудурлар вә һал-һазырда јолдашлары илә бирликдә Суринам филиалында хидмәт едирләр.

Етеллә мән јаша долмушуг. Амма һәлә дә хүсуси өнҹүл кими хидмәт едирик вә чох мәшғулуг. Һәтта о гәдәр мәшғулуг ки, мән индијә гәдәр үзмәји өјрәнмәјә вахт тапмамышам. Амма пешман дејиләм. Өтән илләрә бојлананда ҝөрүрәм ки, ҝәнҹ јашларымда тамвахтлы хидмәти сечмәк һәјатымда вердијим ән јахшы гәрарлардан бири иди.