1. Әшија пејғәмбәр исраиллиләрә һансы хәбәри чатдырмышды?

 ӘШИЈА пејғәмбәр Јеһованын «һагг Аллаһ» олдуғуну демишди (Әшј. 65:16). «Һагг» кими тәрҹүмә олунан сөз һәрфән «амин» демәкдир. «Амин» сөзү исә «гој белә олсун», «мүтләг» мәнасыны дашыјыр. Мүгәддәс Китабын бир чох ајәсиндә «амин» сөзү Јеһова вә Иса илә бағлы ишләнир. Бу онларын дедикләринин доғру олдуғуна зәманәтдир. Әшија пејғәмбәрин исраиллиләрә демәк истәдији фикир ајдын иди: Јеһова сөзүнүн ағасыдыр, дедији һәр бир шеји һәјата кечирир. Јеһова буну дәфәләрлә сүбут едиб, вәдләрини һәр заман ҝерчәкләшдириб.

2. Нәјә ҝөрә Јеһованын ҝәләҹәјимизлә бағлы вердији вәдләрә етибар едә биләрик? Мәгаләдә һансы суалларын ҹавабы ишыгландырылаҹаг?

² Бәс биз дә Јеһованын ҝәләҹәјимизлә бағлы вердији вәдләрә етибар едә биләрик? Әшија пејғәмбәрдән тәхминән 800 ил сонра јашамыш һәвари Булус да Аллаһын вәдләринин етибара лајиг олдуғуну гејд етмишди. О, белә бир әсас ҝәтирәрәк демишди ки, Јеһованын «јалан данышмасы мүмкүн» дејил (Ибр. 6:18). Булағын ҝөзүндән ејни анда һәм ширин, һәм дә дузлу су ҝәлмәдији кими, һәгигәт мәнбәји Јеһованын ағзындан да һеч вахт јалан чыхмаз. Буна ҝөрә дә Јеһованын дедији һәр сөзә, ҝәләҹәјимизлә бағлы вердији һәр вәдә там архајын ола биләрик. Бәс Јеһова ҝәләҹәклә бағлы бизә нә вәд едир? Бу вәди јеринә јетирәҹәјинә һансы  зәманәти вериб? Мәгаләдә бу суалларын ҹавабы ишыгландырылаҹаг.

3. а) Јеһованын бүтүн хидмәтчиләринин севдији вәд һансыдыр? (Вәһј 21:3, 4). б) Бәзи инсанлар бу вәдә неҹә мүнасибәт билдирирләр?

³ Ҝәлин Јеһованын бүтүн хидмәтчиләринин севдији бир вәддән данышаг. (Вәһј 21:3, 4 ајәләрини охујун.) Јеһова вәд едир ки, ҝүн ҝәләҹәк, «артыг өлүм олмајаҹаг. Нә дәрд, нә фәрјад, нә дә ағры олмајаҹаг». Чохларымыз тәблиғ едәркән ҝәләҹәкдә һәјатын неҹә олаҹағыны ҝөстәрмәк үчүн бу ҝөзәл ајәләри охујуруг. Бәс инсанлар бу вәдә неҹә јанашыр? Бәзиләри белә дејир: «Ҝөзәл сөзләрдир, амма чәтин ки белә бир шеј олсун».

4. а) Јеһова вәд верәндә бизим ҝүнләрлә бағлы нәји нәзәрә алды? б) Јеһова вәд вермәклә јанашы даһа нә етди?

⁴ Әлбәттә, Јеһова һәвари Јәһјаја Ҹәннәтлә бағлы бу вәдини јаздыранда билирди ки, инсанлара тәблиғ едән заман биз бу үмиди онларла бөлүшәҹәјик. Јеһова ону да билирди ки, чохларына бу вәдин јеринә јетәҹәјинә инанмаг чәтин олаҹаг (Әшј. 42:9; 60:2; 2 Кор. 4:3, 4). Бәс биз инсанлара Вәһј 21:3, 4 ајәләриндәки вәдә инанмаға неҹә көмәк едә биләрик? Һәмчинин бу вәдә өз етибарымызы неҹә мөһкәмләндирә биләрик? Јеһова бу вәдә инанмағымыз үчүн бизә тутарлы сәбәбләр вериб. Ҝәлин ҝөрәк бунлар һансылардыр.

5. Јеһованын Ҹәннәтлә бағлы вердији вәдә етибар етмәк үчүн һансы сәбәбләримиз вар вә бу сәбәбләр һарада јазылыб?

⁵ Јеһова Ҹәннәтлә бағлы вәдини верәндән сонра бу вәдә етибар етмәјимиз үчүн нөвбәти ајәләрдә сәбәбләр ҝәтирир: «Тахтда отуран деди: “Будур, Мән һәр шеји тәзә едирәм”. Сонра әлавә етди: “Јаз, чүнки бу сөзләр доғру вә етибарлыдыр”. Сонра О, мәнә деди: “Онлар јеринә јетди! Мән Алфа вә Омегајам, әввәл вә ахырам”» (Вәһј 21:5, 6а).

6. Вәһј 21:5, 6 ајәләриндәки сөзләр Аллаһын вәдинә олан етибарымызы нәјә ҝөрә мөһкәмләндирир?

⁶ Бу сөзләр Аллаһын вәдинә олан етибарымызы неҹә мөһкәмләндирир? «Вәһјин зирвәси» китабында бу ајәләрлә бағлы дејилир: «Бу сөзләрлә Јеһова бир нөв садиг хидмәтчиләринә немәтләр вәд етдији сәнәдин алтындан гол чәкир» b. Јәни Вәһј 21:3, 4 ајәләриндә Јеһова вәд верир, 5 вә 6-ҹы ајәләри илә исә Өз имзасыны атараг вәдини мүтләг јеринә јетирәҹәјинә зәманәт верир. Ҝәлин Јеһованын вердији зәманәти нәзәрдән кечирәк.

7. Вәһј 21:5 ајәсиндәки сөзләр кимә мәхсусдур вә нәјә ҝөрә бу, диггәтчәкән мәгамдыр?

⁷ Бешинҹи ајә белә сөзләрлә башлајыр: «Тахтда отуран деди» (Вәһј 21:5а). Бу, диггәтчәкән мәгамдыр, чүнки Јеһованын «Вәһј» китабында ҝөрүнтү васитәсилә шәхсән данышдығы үч һадисәдән биридир. Бәли, бу зәманәти верән һансыса гүдрәтли мәләк дејил, һеч Иса да дејил, Јеһованын Өзүдүр. Бу ҝөстәрир ки, Вәһј 21:5, 6 ајәләриндә јазылан сөзләрә там етибар едә биләрик. Чүнки Јеһова «һеч вахт јалан [данышмыр]» (Тит. 1:2).

8. Јеһова һансы сөзләрлә вәдини јеринә јетирәҹәјинә әминлик верир? (Әшија 46:10).

⁸ Ҝәлин Вәһј 21:5 ајәсиндәки «будур» сөзүнә бахаг. «Будур» кими тәрҹүмә  олунмуш јунан сөзү «Вәһј» китабында тез-тез истифадә едилир. Бир мәнбәдә дејилир ки, «бу сөз охуҹунун диггәтини нөвбәти сөзләрә јөнәлтмәк үчүн истифадә едилир». Бу сөздән сонра Јеһова белә дејир: «Мән һәр шеји тәзә едирәм». Дүздүр, бурада Јеһова ҝәләҹәкдә едәҹәји дәјишикликләрдән данышыр. Лакин О бу вәдинин јеринә јетәҹәјинә о гәдәр әминдир ки, онлары һал-һазырда етдијини дејир. (Әшија 46:10 ајәсини охујун.)

9. а) «Һәр шеји тәзә едирәм» ифадәсинә Јеһованын ҝөрдүјү һансы ики иш дахилдир? б) «Көһнә ҝөј» вә «көһнә јер»лә нә баш верәҹәк?

⁹ Инди исә Вәһј 21:5 ајәсиндә јазылан «һәр шеји тәзә едирәм» ифадәсинә фикир верәк. 21-ҹи фәсилдә Јеһованын ҝөрдүјү ики ишдән сөһбәт ҝедир: әвәз етмәк вә бәрпа етмәк. Биринҹиси, Јеһова нәји әвәз едәҹәк? Вәһј 21:1 ајәсиндә јазылыб: «Көһнә ҝөјлә көһнә јер јох олмушду». «Көһнә ҝөј» Шејтан вә ҹинләринин тәсири алтында олан сијаси һөкумәтләрдир (Мәт. 4:8, 9; 1 Јәһ. 5:19). Мүгәддәс Китабда «јер» дејиләндә бәзән јер үзүнүн сакинләри нәзәрдә тутулур (Јар. 11:1; Зәб. 96:1). Демәли, «көһнә јер» бу ҝүн јер үзүндә јашајан шәр инсанлардыр. Јеһова бу көһнә «ҝөјү» вә «јери» дүзәлтмәјә чалышмајаҹаг. Әксинә, онлары тамамилә мәһв едиб, «јени ҝөј»лә, јәни јени һөкумәтлә вә «јени јер»лә, јәни салеһ инсанларла әвәз едәҹәк.

10. Јеһова нәләри тәзәләјәҹәк?

¹⁰ Јеһова башга нәләри тәзә едәҹәк? Диггәт јетирин, Вәһј 21:5 ајәсиндә Јеһова демир: «Мән тәзә шејләр јарадырам». О дејир ки, «Мән һәр шеји тәзә едирәм». Јеһова Јер күрәсини дә, инсанлары да мүкәммәллијә чатдыраҹаг. Әшија пејғәмбәрин дә дедији кими бүтүн Јер күрәси ҹәннәтә, Әдән бағына чевриләҹәк. Јеһова һәмчинин һәр биримизи физики ҹәһәтдән сағлам едәҹәк. Ахсаглар, корлар, карлар сағалаҹаг, һәтта өлүләр дә дириләҹәк (Әшј. 25:8; 35:1—7).

11. Јеһова Јәһјаја һансы әмри вермишди вә сәбәбини неҹә изаһ етмишди?

¹¹ Јеһова вәдинә етибар етмәјимиз үчүн даһа һансы зәманәти верир? О, Јәһјаја демишди: «Јаз, чүнки бу сөзләр доғру вә етибарлыдыр» (Вәһј 21:5). Фикир вердиниз, Јеһова тәкҹә «јаз» әмрини вермәмишди. О бунун сәбәбини дә изаһ едиб демишди: «Бу сөзләр доғру вә етибарлыдыр». Нә јахшы ки, Јәһја «јаз» әмринә табе олуб, бунлары бизим үчүн гәләмә алыб. Бунун сајәсиндә биз Аллаһын Ҹәннәт вәди барәдә охуја вә ҝәләҹәкдә бизи ҝөзләјән ҝөзәл немәтләр барәдә дүшүнҹәләрә дала билирик.

12. Јеһова нәјә ҝөрә «онлар јеринә јетди» демишди?

¹² Даһа сонра Јеһова дејир: «Онлар јеринә јетди!» (Вәһј 21:6). Нәјә ҝөрә Јеһова Ҹәннәтлә бағлы вәдинин артыг јеринә јетдијини дејир? Чүнки нијјәтини һәјата кечирмәјә һеч нә Она мане ола билмәз. Нөвбәти сөзләри илә Јеһова бизә вәдинин јеринә јетәҹәјинә даһа бир зәманәт верир. Бу һансы сөзләрдир?

13. Јеһова нәјә ҝөрә «Мән Алфа вә Омегајам» демишди?

¹³ Јухарыда гејд етдијимиз кими Јеһова Өзү үч дәфә Јәһја илә данышмышды (Вәһј 1:8; 21:5, 6; 22:13). Һәр үч һадисәдә дә О бу сөзләри ишләтмишди: «Мән Алфа вә Омегајам». «Алфа» јунан әлифбасынын  биринҹи, «омега» исә ахырынҹы һәрфидир. Јеһова нәјә ҝөрә Өзү илә бағлы бу сөзләри дејир? Чүнки О, башладығы һәр иши мүтләг ахыра чатдырыр.

14. а) Јеһова нә заман «Алфа» деди? Бәс нә заман «Омега» дејәҹәк? Нүмунә чәкин. б) Јарадылыш 2:1—3 ајәләриндә Јеһова бизә һансы зәманәти вериб?

¹⁴ Јеһова Адәмлә Һәвваны јарадандан сонра бәшәријјәтлә вә Јер күрәси илә бағлы нијјәтини ачыглады. Мүгәддәс Китабда бунунла бағлы дејилир: «Аллаһ онлара хејир-дуа верәрәк деди: “Төрәјиб чохалын, бүтүн јер үзүнү долдурун вә она саһиб олун”» (Јар. 1:28). Јеһова бу нијјәтини бәјан етмәклә санки «Алфа» деди. Онун нијјәти ајдын иди: Адәмлә Һәввадан төрәјән камил, итаәткар инсанлар јер үзүнү долдуруб ону ҹәннәтә чевирмәли идиләр. Бу нијјәти јеринә јетәндә О, санки «Омега» дејәҹәк. «Ҝөјүн, јерин вә онларда олан һәр шејин јарадылышы» баша чатандан сонра Јеһова башга бир зәманәт верди. Бу барәдә Јарадылыш 2:1—3 ајәләриндә јазылыб. (Ајәләри охујун.) Јеһова једдинҹи ҝүнү мүгәддәс елан етди. Бу нә демәкдир? Јәни Јеһова һәмин ҝүнү бәшәријјәтлә вә Јер күрәси илә бағлы нијјәтинин јеринә јетмәсинә һәср етди. О бунунла бир нөв билдирди ки, једдинҹи ҝүнүн сонунда нијјәти там шәкилдә јеринә јетәҹәк.

15. Нәјә ҝөрә Шејтан Јеһоваја нијјәтини һәјата кечирмәјә мане олдуғуну дүшүнә биләрди?

¹⁵ Адәмлә Һәвва үсјан етдикдән сонра онлар ҝүнаһлы олдулар вә өвладларына ҝүнаһла өлүмү өтүрдүләр (Ром. 5:12). Илк бахышдан кимәсә елә ҝәлә биләр ки, Шејтан Јеһованын јер үзүнү камил, итаәткар инсанларла долдурмаг нијјәтини алт-үст етди, Онун «Омега» демәјинә  тамамилә мане олду. Бәлкә дә Шејтан Јеһованын чыхылмаз вәзијјәтдә олдуғуну дүшүнүрдү. Јәгин, фикирләширди ки, узагбашы Јеһова Адәмлә Һәвваны өлдүрүб нијјәтини јеринә јетирмәк үчүн башга камил әр-арвад јарадаҹаг. Әҝәр Јеһова белә етсәјди, Иблис Ону јаланчы адландыраҹагды. Нәјә ҝөрә? Ахы Јеһова Адәмлә Һәвваја онларын өвладларынын јер үзүнү долдураҹағыны демишди (Јар. 1:28).

16. Даһа һансы сәбәбә ҝөрә Шејтан Јеһованын нијјәтини һәјата кечирмәјә мүвәффәг олмадығыны фикирләшә биләрди?

¹⁶ Јахуд да Шејтан бу варианты дүшүнә биләрди: «Әҝәр Јеһова Адәмлә Һәвванын ушагларынын олмасына изин версә, онсуз да онлар гејри-камил доғулаҹаглар вә һеч вахт камил ола билмәјәҹәкләр» (Ваиз 7:20; Ром. 3:23). Шүбһәсиз, бу һалда да Иблис Јеһованын нијјәтини һәјата кечирмәји баҹармадығыны дејиб, Ону иттиһам едәҹәкди. Чүнки Јеһованын Ҹәннәти Адәмлә Һәвванын камил, итаәткар өвладлары илә долдурмаг нијјәти пуча чыхаҹагды.

17. Шејтан, Адәм вә Һәвва үсјан етсә дә, Јеһова нијјәтини һәјата кечирмәк үчүн нә етди вә бу нә илә нәтиҹәләнәҹәк? (Һәмчинин шәклә бахын.)

¹⁷ Шејтан, Адәм вә Һәвва үсјан етсә дә, Јеһова нијјәтини һәјата кечирмәк үчүн мүкәммәл бир үсулдан истифадә етди (Зәб. 92:5). Бу үсул Шејтанын јүз ил гала ағлына да ҝәлмәзди. Јеһова Адәмлә Һәвванын ушаг саһиби олмаларына изин вермәклә һагг Аллаһ олдуғуну, јаланчы олмадығыны сүбут етди. Һәмчинин Јеһова сүбут етди ки, нәјисә етмәји гәт едибсә, һеч нә Она әнҝәл ола билмәз. Јеһова нијјәтини јеринә јетирмәк үчүн јер үзүнә «өвлад» ҝөндәрди. Бу өвлад Адәмлә Һәвванын итаәткар нәслини хилас етмәк үчүн һәјатыны фидјә кими гурбан верәҹәкди (Јар. 3:15; 22:18). Јәгин, Јеһованын мәсәләни бу ҹүр һәлл етмәси Шејтанын ағлынын уҹундан да кечмәзди. Нәјә ҝөрә? Чүнки фидјә фәдакар мәһәббәтә дајанан бир тәдбирдир (Мәт. 20:28; Јәһ. 3:16). Шејтанда исә худбин олдуғу үчүн бу кејфијјәтин зәррәси дә јохдур. Бәс фидјә тәдбири нәјә јол ачды? Миниллијин сонунда Адәмлә Һәвванын камил, итаәткар өвладлары јер үзү Ҹәннәтдә мәскунлашаҹаг. Јеһованын нијјәти мәһз бу иди. Һәмин вахт О нәһајәт «Омега» дејәҹәк.

18. Јеһованын вәдинә етибар етмәк үчүн һансы үч сәбәбимиз вар? (Һәмчинин « Јеһованын вәдинә етибар етмәјимиз үчүн үч сәбәб» адлы чәрчивәјә бахын.)

¹⁸ Бу мәгаләдән өјрәндик ки, Јеһованын Ҹәннәтлә бағлы вәдинин јеринә јетәҹәјинә инанмаг үчүн тутарлы сәбәбләримиз вар. Бәс әҝәр кимсә бу вәдә етибар етмирсә, онлара неҹә көмәк едә биләрик? Бу үч әсасы ҝәтирмәк олар: Биринҹиси, вәди верән Јеһованын Өзүдүр. «Вәһј» китабында дејилир: «Тахтда отуран деди: “Будур, Мән һәр шеји тәзә едирәм”». Нијјәтини һәјата кечирмәк үчүн Јеһованын һикмәти дә вар, ҝүҹү дә вар, истәји дә вар. Икинҹиси, Јеһова вәдинин ҝерчәкләшәҹәјинә о гәдәр әминдир ки, онун артыг јеринә јетдијини сөјләјир. Мәһз буна ҝөрә О демишди: «Бу сөзләр доғру вә етибарлыдыр... Онлар јеринә јетди!» Үчүнҹүсү, Јеһова нәјисә етмәјә башлајыбса, О буну мүтләг ахыра чатдырыр. Чүнки О демишди: «Мән Алфа вә Омегајам». Бәли, Јеһова сүбут едәҹәк ки, Шејтан јаланчыдыр вә Она нијјәтини јеринә јетирмәјә мане ола билмәз.

19. Инсанлар Аллаһын Ҹәннәт вәдинә шүбһә едәндә онлара нә демәк олар?

¹⁹ Унутмајын, һәр дәфә хидмәтдә инсанлара Јеһованын вердији зәманәт барәдә данышанда Онун вәдләринә өз әминлијинизи артырмыш олурсунуз. Ола билсин, Вәһј 21:4 ајәсиндә Ҹәннәтлә бағлы јазылан ҝөзәл вәди кимәсә охујанда о белә десин: «Ҝөзәл сөзләрдир, амма чәтин ки белә шеј олсун». Бу заман она нә дејәрдиниз? 5 вә 6-ҹы ајәләри охујуб изаһ едә биләрсиниз. Гој һәмин инсан ҝөрсүн ки, Јеһова вәдини јеринә јетирәҹәјинә зәманәт вериб, бир нөв сөзүнүн алтына Өз имзасыны атыб (Әшј. 65:16).