1. Гәдимдә Аллаһын хидмәтчиләри нәјин сајәсиндә ҝүҹлү идиләр?

 АЛЛАҺЫН КӘЛАМЫНДА Онун садиг хидмәтчиләри ҝүҹлү инсанлар кими тәсвир олунуб. Амма онларын арасындан ән ҝүҹлүләри белә өзләрини һеч дә һәмишә ҝүҹлү һесаб етмирдиләр. Мәсәлән, Давуд падшаһ бәзән өзүнү «дағтәк сарсылмаз» һисс едирди, бәзән исә ҹанына горху дүшүрдү (Зәб. 30:7). Јеһованын руһу Шимшона гејри-ади ҝүҹ верирди. Шимшон баша дүшүрдү ки, Јеһованын вердији ҝүҹ олмаса, о, «ҝүҹдән дүшүб ади адам кими олар» (Һак. 14:5, 6; 16:17). Бу садиг инсанлар Јеһованын сајәсиндә ҝүҹлү иди.

2. Нәјә ҝөрә һәвари Булус һәм зәиф, һәм дә ҝүҹлү олдуғуну демишди? (2 Коринфлиләрә 12:9, 10).

² Һәвари Булус Јеһовадан ҝәлән ҝүҹә еһтијаҹ дујдуғуну баша дүшүрдү. (2 Коринфлиләрә 12:9, 10 ајәләрини охујун.) Бизим кими бәзән Булус да сәһһәтиндәки проблемләрлә мүбаризә апарырды (Гал. 4:13, 14). Һәрдән она дүзҝүн давранмаг чәтин олурду (Ром. 7:18, 19). Бәзән исә нараһатлыг, намәлумлуг ону сыхырды (2 Кор. 1:8, 9). Амма Булус зәиф оланда ҝүҹлү иди. Чүнки Јеһова она еһтијаҹ дујдуғу ҝүҹү верирди.

3. Бу мәгаләдә һансы суаллара ҹаваб тапаҹағыг?

³ Јеһова бизи дә ҝүҹлү едәҹәјинә сөз верир (1 Бут. 5:10). Амма әлимизи әлимизин үстүнә гојуб Јеһованын бизә ҝүҹ верәҹәјинә үмид етмәмәлијик. Мәсәлән, мүһәррик машыны һәрәкәтә ҝәтирир. Амма машыны јериндән тәрпәтмәк үчүн сүрүҹү ҝәрәк газ педалына бассын. Ејнилә Јеһова да бизә ҝүҹ вермәјә һазырдыр, амма биздән мүәјјән аддымлар  атмаг тәләб олунур. Бәс ҝүҹлү олмағымыз үчүн Јеһова бизә нәләр вериб? Бу ҝүҹү алмагдан өтрү биз нә етмәлијик? Бу суаллара ҹаваб тапмаг үчүн ҝәлин ҝөрәк Јеһова Јунус пејғәмбәрә, Исанын анасы Мәрјәмә вә һәвари Булуса неҹә ҝүҹ вермишди. Ҝөрәҹәјимиз кими Јеһова ејни үсулларла бу ҝүн дә хидмәтчиләрини ҝүҹләндирир.

4. Һансы үсулларла Јеһовадан ҝүҹ ала биләрик?

⁴ Јеһовадан ҝүҹ алмағын бир јолу дуа етмәкдир. Дуаларымыза ҹаваб олараг Јеһова бизә «инсан ҝүҹүндән үстүн олан ҝүҹ» верә биләр (2 Кор. 4:7). Биз һәмчинин Онун Кәламыны охујуб үзәриндә дүшүнәндә дә ҝүҹләнирик (Зәб. 86:11). Кәламда јазылан сөзләр «гүдрәтлидир» (Ибр. 4:12). Јеһоваја дуа едәндә вә Кәламыны охујанда дөзүм ҝөстәрмәк, севинҹимизи горумаг, һәмчинин чәтин тапшырығын өһдәсиндән ҝәлмәк үчүн ҝүҹ тапырыг. Ҝөрәк Јеһова Јунус пејғәмбәри неҹә мөһкәмләндирмишди.

5. Нәјә ҝөрә Јунус пејғәмбәрә ҝүҹ лазым иди?

⁵ Јунус пејғәмбәрдә ҹәсарәт чатышмырды. О, Јеһованын она вердији тапшырыгдан горхуб башга истигамәтә гачмышды. Бунун уҹбатындан о, аз гала ҝүҹлү фыртынада һәјатыны итирәҹәкди. Үстәлик, Јунус ҝәмидә онунла бирликдә оланларын да һәјатыны тәһлүкәјә атмышды. Дәнизчиләр ону ҝәмидән дәнизә атанда нәһәнҝ бир балыг ону удду. Јунус һеч вахт белә бир горхунҹ јердә олмамышды. Сизҹә, һәмин вахт о һансы һиссләри кечирирди? Бәлкә дә елә бу балығын гарнындаҹа өләҹәјини, ја да Јеһованын ондан үз дөндәрдијини фикирләширди. Јәгин, Јунусун ичи ичини јејирди.

6. Јунус 2:1, 2, 7 ајәләринә әсасән балығын гарнында оларкән Јунуса нә ҝүҹ вермишди?

⁶ Јунус тәк-тәнһа балығын гарнында олан вахт өзүндә ҝүҹ тапмаг үчүн нә етди? О, дуа етди. (Јунус 2:1, 2, 7 ајәләрини охујун.) Јунус Јеһованын сөзүндән чыхса да, әмин иди ки, Јеһова бу пешман бәндәсинин дуасыны динләјәҹәк. Һәмчинин о, Аллаһын Кәламында јазыланлар барәдә дүшүнүрдү. Буну нәјә әсасән дејә биләрик? «Јунус» китабынын икинҹи фәслиндә онун дуасы јазылыб. Һәмин дуада о, «Зәбур» китабында олан сөзләри вә ифадәләри ишләтмишди. (Мәсәлән, Јунус 2:2, 5 ајәләрини Зәбур 69:1; 86:7 ајәләри илә әлагәләндирин.) Бу, ајдын ҝөстәрир ки, Јунус һәмин ајәләри јахшы билирди. Һәјатынын бу чәтин анларында о һәмин ајәләр барәдә дүшүнүб Јеһованын она көмәк олаҹағына әмин олурду. Јеһова Јунусу балығын гарнындан гуртарды, артыг о, алдығы тапшырығы јеринә јетирмәјә һазыр иди (Јун. 2:10—3:4).

7, 8. Тајвандан олан бир гардаша сынаглара дөзмәјә нә ҝүҹ вермишди?

⁷ Биз мүхтәлиф сынагларла үзләширик вә бу заман Јунусун нүмунәси бизә чох көмәк ола биләр. Мәсәлән, Тајвандан олан Замиг b гардашын сәһһәтиндә ҹидди проблемләр вар. Бир тәрәфдән дә аиләси Јеһоваја иманына ҝөрә она зүлм верир. Замиг дуа вә мүталиә васитәсилә Јеһовадан ҝүҹ алыр. О белә дејир: «Дүзүнү десәм, бәзән проблем јарананда о гәдәр фикир чәкирәм ки, сакитләшиб мүталиә белә едә билмирәм». Амма Замиг гојмур ки, бу она мүталиә етмәјә мане олсун. О дејир: «Әввәлҹә мән Јеһоваја дуа едирәм. Сонра гулагҹығымы тахыб нәғмәләримизи динләјирәм. Һәрдән һәтта онлары зүмзүмә дә едирәм,  та ки сакитләшәнә гәдәр. Сонра да мүталиә етмәјә башлајырам».

⁸ Фәрди мүталиә Замигә ағлына белә ҝәлмәјән тәрздә ҝүҹ вериб. Мәсәлән, бир дәфә о, ҹидди әмәлијјат кечирмишди. Тибб баҹысы она демишди ки, әмәлијјатдан сонра организмин бәрпа олунмасы үчүн она ган көчүрүлмәлидир, чүнки гырмызы ган һүҹејрәләринин сајы чох ашағы иди. Әмәлијјатдан әввәлки ҝеҹә Замиг ејни әмәлијјат кечирмиш бир баҹы һагда охумушду. Баҹынын гырмызы ган һүҹејрәләринин сајы Замигинкиндән дә ашағы дүшмүшдү. Амма баҹы буна бахмајараг, јенә дә ганкөчүрмәјә разы олмамышды вә сонра сағалмышды. Бу һадисә Замигә Јеһоваја садиг галмаг үчүн ҝүҹ верди.

9. Чәтинликләр заманы өзүнүзү зәиф һисс едирсинизсә, нә едә биләрсиниз? (Һәмчинин шәкилләрә бахын.)

⁹ Олуб ки, чәтинлијиниз олан заман нараһатлыгдан дуада нә дејәҹәјинизи билмәмисиниз, ја да мүталиә етмәјә тагәтиниз олмајыб? Унутмајын ки, Јеһова сизин вәзијјәтинизи чох јахшы баша дүшүр. Һәмин вахт гыса дуа етсәниз дә, әмин ола биләрсиниз ки, Јеһова сизә лазыми көмәји ҝөстәрәҹәк (Ефес. 3:20). Әҝәр физики вә ја емосионал ағрыја ҝөрә охумаг, мүталиә етмәк чәтиндирсә, Мүгәддәс Китабын вә ја она әсасланан нәшрләрин аудиојазысына гулаг асын. Һәмчинин jw.org сајтындан һансыса маһныны динләјә вә ја видеоја баха биләрсиниз. Дуа едәндә вә нәшрләримиздән дуаныза ҹаваб ахтаранда санки Јеһоваја дејирсиниз: «Мәни ҝүҹлү ет».

10. Диндашларымыз бизи неҹә мөһкәмләндирир?

¹⁰ Јеһова бизи иман баҹы-гардашларымыз васитәсилә мөһкәмләндирә биләр. Сынагларла үзләшәндә вә ја тәјинатымызы јеринә јетирмәјә чәтинлик чәкәндә онлар бизә «дајаг» ола биләр (Кол. 4:10, 11). Әсас да «дар ҝүн»дә достлара еһтијаҹ дујуруг (Мәс. 17:17). Зәиф вахтларымызда диндашларымыз бизим еһтијаҹымызы өдәјә биләр, тәсәлли верә биләр вә Јеһоваја садиг галмаға тәшвиг едә биләр. Ҝәлин ҝөрәк Јеһова хидмәтчиләри васитәсилә Мәрјәми неҹә ҝүҹләндирмишди.

11. Нәјә ҝөрә Мәрјәмин ҝүҹә еһтијаҹы вар иди?

 ¹¹ Мәрјәмә Јеһованын ирадәсини јеринә јетирмәк үчүн ҝүҹ лазым иди. Ҹәбрајыл мәләк она ағыр бир тапшырыг вермишди. Тәсәввүр едирсиниз, о бу тапшырығы аланда нә гәдәр һәјәҹан кечирмишди?! О, әрдә олмаја-олмаја һамилә галаҹагды. Мәрјәм индијә кими ушаг бөјүтмәмишди, амма инди ҝәләҹәк Мәсиһи бөјүтмәли иди. Үстәлик, о һеч вахт ҹинси әлагәдә олмамышды. Ҝөрәсән, Мәрјәм нишанлысы Јусифә һамилә олаҹағыны неҹә ачыглајаҹагды? (Лука 1:26—33).

12. Лука 1:39—45 ајәләринә әсасән Мәрјәмә нә ҝүҹ верди?

¹² Мәрјәм гејри-ади вә олдугҹа мәсулијјәтли олан бу тәјинатыны јеринә јетирмәк үчүн һарадан ҝүҹ тапды? О башгаларынын көмәјинә үз тутду. Мәсәлән, Ҹәбрајыл мәләкдән бу тапшырыгла бағлы әлавә мәлумат истәди (Лука 1:34). Бундан бир аз сонра Јәһуданын дағлыг бөлҝәсиндә јашајан гоһуму Илсәбаҝилә ҝетди. Ора ҝетмәјә дәјәрди! Илсәба Мәрјәми тәрифләди вә онун һәлә дүнјаја ҝәлмәмиш өвлады барәдә Јеһованын илһамы илә пејғәмбәрлик сөјләди. (Лука 1:39—45 ајәләрини охујун.) Бу пејғәмбәрлик Мәрјәми чох руһландырды. Мәрјәм деди ки, Јеһова «голунун гүввәти илә бөјүк ишләр ҝөрдү» (Лука 1:46—51). Беләликлә, Јеһова Ҹәбрајыл мәләк вә Илсәба васитәсилә Мәрјәмә ҝүҹ верди.

13. Боливијадан олан бир баҹы диндашларындан көмәк истәмәјин һансы хејрини ҝөрдү?

¹³ Мәрјәм кими сиз дә диндашларыныздан ҝүҹ ала биләрсиниз. Боливијада јашајан Дасури баҹынын белә бир ҝүҹә еһтијаҹы вар иди. Онун атасы өлүмҹүл хәстәлијә тутулмушду вә хәстәханаја јерләшдирилмишди. Дасури атасынын јанында олуб ҹанла-башла онун гејдинә галырды (1 Тим. 5:4). Амма бу, һәмишә асан олмурду. Дасури дејир: «Дәфәләрлә олуб ки, даһа баҹармајаҹағымы дүшүнмүшәм». Бәс о кимдәнсә көмәк истәјирди? Әввәл-әввәл јох. Дасури сөзүнә әлавә едир: «Һеч кимә әзијјәт вермәк истәмирдим. Дүшүнүрдүм ки, нә көмәк лазымдырса, Јеһова Өзү едәҹәк. Амма сонра баша дүшдүм ки, өзүмү башгаларындан тәҹрид етмәклә проблемләрими тәкбашына һәлл етмәјә чалышырам» (Мәс. 18:1). Дасури бир нечә достуна мәктуб јазыб һансы вәзијјәтдә олдуғуну онлара билдирди. О дејир: «Әзиз диндашларымын мәни неҹә мөһкәмләндирдијини һеч бир сөзлә ифадә едә билмәрәм. Онлар хәстәханаја јемәк ҝәтирирдиләр, руһландырыҹы ајәләр бөлүшүрдүләр. Тәк олмадығымызы билмәк чох ҝөзәл һиссдир. Биз Јеһованын бөјүк аиләсинин бир һиссәсијик. О аилә ки чәтин анында сәнә көмәк әли узатмаға, сәнинлә бирликдә ағламаға, сәнинлә бәрабәр мүбаризә апармаға һазырдыр!»

14. Нәјә ҝөрә ағсаггалларын көмәјини гәбул етмәлијик?

¹⁴ Јеһованын бизи мөһкәмләндирмәк үчүн истифадә етдији бир мәнбә дә ағсаггаллардыр. Онлар тәравәт вә ҝүҹ тапмағымыз үчүн бизә верилән бир һәдијјәдир (Әшј. 32:1, 2). Она ҝөрә дә нәјинсә фикрини чәкәндә дәрдинизи ағсаггаллара данышын. Онлар сизә көмәк тәклиф едәндә буну гәбул един. Јеһова онларын васитәсилә сизи ҝүҹлү едәҹәк.

15. Бүтүн мәсиһиләрин һансы үмиди вар?

¹⁵ Мүгәддәс Китабдакы вәдләрә үмидимиз бизә ҝүҹ верир (Ром. 4:3, 18—20). Бизим ја јер үзүндә ҹәннәтдә, ја да сәмави Падшаһлыгда әбәди јашамаг  имканымыз вар. Үмидимиз бизә сынаглара дөзмәјә, хош мүждәни тәблиғ етмәјә вә јығынҹагда мүхтәлиф тапшырыглары јеринә јетирмәјә ҝүҹ верир (1 Салон. 1:3). Бу үмид һәвари Булусу да ҝүҹләндирмишди.

16. Нәјә ҝөрә һәвари Булусун ҝүҹә еһтијаҹы вар иди?

¹⁶ Булуса чәтинликләрә дөзмәк үчүн ҝүҹ лазым иди. О, коринфлиләрә мәктубунда өзүнү зәриф сахсы габа бәнзәтмишди. О јазмышды ки, «чашгынлыг» ичиндәдир, ону «сыхышдырырлар», «тәгиб едирләр», «вуруб јерә сәрибләр», һәтта бәзән һәјаты ипдән асылы олуб (2 Кор. 4:8—10). Булус бу сөзләри үчүнҹү тәблиғ сәјаһәти заманы јазмышды. Һәмин вахт һеч хәбәри дә јох иди ки, гаршыда ону нә гәдәр бәла ҝөзләјир. О, күтләнин һүҹумуна мәруз галды, тутулду, ҝәми гәзасына уғрады вә һәбс олунду.

17. 2 Коринфлиләрә 4:16—18 ајәләринә әсасән Булуса сынаглара дөзмәјә нә ҝүҹ верди?

¹⁷ Үмиди барәдә дүшүнмәк Булуса ҝүҹ верирди. (2 Коринфлиләрә 4:16—18 ајәләрини охујун.) О, коринфлиләрә демишди ки, бәдәни «заһирән солса» да, буна ҝөрә руһдан дүшмәјәҹәк. Булус фикрини ҝәләҹәјә ҹәмләмишди. Ҝөјдә әбәди јашамаг үмиди онун үчүн мөһтәшәм ҹалал иди, бундан өтрү истәнилән чәтинлијә дөзмәјә дәјәрди. Булус бу үмиди барәдә чох дүшүнүрдү, бунун да сајәсиндә «ҝүнбәҝүн јениләшир»ди.

18. Ҝәләҹәјә үмид Тихомирә вә аиләсинә неҹә ҝүҹ верир?

¹⁸ Ҝәләҹәјә үмид Болгарыстанда јашајан Тихомир гардаша да ҝүҹ верир. Бир нечә ил бундан әввәл онун кичик гардашы Здравко автомобил гәзасында һәјатыны итириб. Тихомир бир мүддәт өзүнә ҝәлә билмәди. Бу фаҹиәјә дөзмәк үчүн о, һәјат јолдашы вә оғлу илә бирҝә дирилмәни тәсәввүрүндә ҹанландырыр. Тихомир бөлүшүр: «Биз Здравко илә һарада ҝөрүшәҹәјимизи, она һансы јемәкләри биширәҹәјимизи, о гајыданда илк гонаглыға кимләри чағыраҹағымызы  вә она ахырзаманла бағлы нәләри данышаҹағымызы мүзакирә едирик». Тихомир дејир ки, бу үмид сајәсиндә онлар өзләриндә дөзмәк үчүн ҝүҹ тапырлар вә гардашынын дириләҹәји ҝүнү сәбирлә ҝөзләјә билирләр.

19. Үмидинизи неҹә мөһкәмләндирә биләрсиниз? (Һәмчинин шәклә бахын.)

¹⁹ Бәс сиз үмидинизи неҹә мөһкәмләндирә биләрсиниз? Әҝәр јер үзүндә әбәди јашамаға үмид едирсинизсә, Мүгәддәс Китабдан Ҹәннәтлә бағлы јазыланлары охујун вә бу барәдә дүшүнүн (Әшј. 25:8; 32:16—18). Јени дүнјадакы һәјаты хәјалынызда ҹанландырын. Елә тәсәввүр един ки, санки орадасыныз. Әтрафынызда кимләр вар? Һансы сәсләри ешидирсиниз? Нә һисс едирсиниз? Фантазијанызы артырмаг үчүн нәшрләримиздә Ҹәннәтин тәсвир олундуғу шәкилләрә бахын, јахуд «Јени дүнја јахын», «Ҹәннәтә сәјаһәт» вә «Јени дүнја јахындыр» адлы мусигили видеолара да баха биләрсиниз. Әҝәр ҝәләҹәјә үмидимиз даим ағлымызда олса, индики проблемләримиз бизим үчүн «гысамүддәтли вә јүнҝүл» ҝөрүнәҹәк (2 Кор. 4:17). Јеһова вердији үмид васитәсилә сизи ҝүҹлү едәҹәк.

20. Зәиф олсаг да, һарадан ҝүҹ тапа биләрик?

²⁰ Биз зәиф олсаг да, «Аллаһдан ҝүҹ» алаҹағыг (Зәб. 108:13). Јеһова бу ҝүҹү алмағымыз үчүн лазым олан һәр шеји вериб. Ола биләр ки, тәјинатынызы јеринә јетирмәк, сынаға таб ҝәтирмәк, ја да севинҹинизи горумаг сизә чәтин олсун. Бу заман Јеһоваја һәрарәтлә дуа един вә Онун көмәјини ҝөрмәк үчүн фәрди мүталиә един. Баҹы-гардашларын дәстәјини гәбул един. Үмидинизи ағлынызда даима ҹанлы тутун. Онда «һәр шејә севинҹлә вә сәбирлә таб ҝәтирмәк үчүн Онун шанлы гүдрәтиндән бөјүк ҝүҹ» алаҹагсыныз (Кол. 1:11).