1. Нәјә ҝөрә итаәткар олмаг чәтин олур?

 ДАВУД падшаһ Јеһованы севирди. Амма бәзән она итаәткар олмаг чәтин олурду. Буна ҝөрә дә Јеһоваја белә дуа етмишди: «Сәнә итаәт етмәјә һәвәс ојат ичимдә» (Зәб. 51:12). Һәрдән итаәткар олмаг бизә дә чәтин олур. Нәјә ҝөрә? Әввәла, она ҝөрә ки, итаәтсизлик бизә ирсән кечиб. Икинҹиси, Шејтан бизи өзүнә охшадыб үсјанкарлыға сөвг етмәк истәјир (2 Кор. 11:3). Үчүнҹүсү, «һал-һазырда итаәтсиз адамларда фәалијјәт ҝөстәрән... руһ», јәни үсјанкарлыг руһу дүнјаны бүрүјүб (Ефес. 2:2). Буна ҝөрә дә Јеһоваја вә Онун сәлаһијјәт вердији кәсләрә итаәт етмәк үчүн ҝәрәк ҝүнаһа мејлимизлә мүбаризә апараг, Иблисин вә онун дүнјасынын тәзјигинә гаршы дураг.

2. «Итаәткар» олмаг нә демәкдир? (Јагуб 3:17).

² Јагуб 3:17 ајәсини охујун. Јагуб јазмышды ки, һикмәтли адам «итаәткардыр». Итаәткар олмағымыз сајәсиндә Јеһованын мүәјјән сәлаһијјәт һәвалә етдији кәсләрә ҹанла-башла табе олаҹағыг. Амма кимсә биздән Јеһованын әмрини позмағымызы истәсә, әлбәттә ки, белә инсана итаәт етмәјәҹәјик (Һәв. 4:18—20).

3. Сәлаһијјәт саһибләринә итаәт етмәјимиз Јеһова үчүн нәјә ҝөрә өнәмлидир?

³ Ола билсин, бизә Јеһоваја итаәт етмәк һансыса инсана итаәт етмәкдән даһа асан ҝәлсин. Ахы Јеһованын бүтүн бујруглары камилдир (Зәб. 19:7). Сәлаһијјәти олан кәсләр барәдә исә буну демәк олмаз. Буна бахмајараг, Јеһова валидејнләрә, һөкумәт ишчиләринә вә ағсаггаллара мүәјјән сәлаһијјәт һәвалә едиб (Мәс. 6:20; 1 Салон. 5:12; 1 Бут. 2:13, 14). Онлара итаәт едәндә Јеһоваја итаәт етмиш олуруг.  Ҝәлин ҝөрәк бу ҹүр инсанларын вердији ҝөстәришләрлә разы олмасаг да, онлара неҹә итаәт едә биләрик.

4. Нәјә ҝөрә ушагларын чоху валидејнләринә итаәт етмир?

⁴ Бу ҝүн ҝәнҹләрин чеврәсиндәки јашыдлары «валидејнләринә итаәт» етмир (2 Тим. 3:1, 2). Нәјә ҝөрә онлар итаәткар дејил? Чүнки бәзиләри ҝөрүр ки, валидејнләринин дедикләри илә етдикләри үст-үстә дүшмүр, өзләринин етмәдији шеји ушагларындан ҝөзләјирләр. Бир башгалары исә ата-анасынын вердији мәсләһәтләрин зәманәјә ујғун олмадығыны вә ја гајдаларын чох сәрт олдуғуну дүшүнүр. Әзиз ҝәнҹләр, сиздә дә белә фикирләр олуб? Бу заман сизә Јеһованын бу әмринә әмәл етмәк чәтин ҝәлә биләр: «Рәббин ирадәсинә ујғун олараг валидејнләринизин сөзүнә гулаг асын, чүнки бу, Аллаһын ҝөзүндә дүзҝүндүр» (Ефес. 6:1). Бу әмрә ујғун давранмаға сизә нә көмәк едә биләр?

5. Лука 2:46—52 ајәләринә әсасән Исанын валидејнләринә гулаг асмағында диггәтәлајиг мәгам нә иди?

⁵ Итаәткарлығы Исадан өјрәнә биләрсиниз, о бу саһәдә ән ҝөзәл нүмунәдир (1 Бут. 2:21—24). Иса гејри-камил валидејнләри олан камил өвлад иди. Јусифлә Мәрјәм бәзән ону баша дүшмәсә дә, мүәјјән сәһвләр етсә дә, Иса онлара һөрмәт едирди (Чых. 20:12). Онун 12 јашы оланда баш вермиш бир һадисәни јадымыза салаг. (Лука 2:46—52 ајәләрини охујун.) Иса валидејнләри илә бирликдә Јерусәлимә ҝетмишди. Амма Јусифлә Мәрјәм ҝери гајыданда ҝөрдүләр ки, Иса јанларында јохдур. Тәбии ки, бүтүн ушагларынын бир арада олмасына нәзарәт етмәк онларын өһдәчилији иди. Онлар Исаны тапанда Мәрјәм ону данламаға башлады. Иса анасына дејә биләрди ки, ону наһаг јерә гынајыр, амма о, белә демәди, әксинә валидејнләринә гыса вә һөрмәтҹил ҹаваб верди. Јусифлә Мәрјәм «Исанын нәдән данышдығыны баша дүшмәдиләр». Һәр неҹә олса да, Иса «бундан сонра да валидејнләринин сөзүндән чыхмады».

6, 7. Ушаглара валидејнләринин сөзүнә гулаг асмаға нә көмәк едә биләр?

⁶ Әзиз ҝәнҹләр, валидејнләриниз сизи баша дүшмәјәндә вә ја өзләри һансыса сәһвләри едәндә онлара итаәт етмәк сизә чәтин ҝәлир? Бу заман сизә нә көмәк едә биләр? Биринҹиси, Јеһованын һансы һиссләр кечирдијини дүшүнүн. Мүгәддәс Китабда дејилир ки, валидејнләринизин сөзүнә гулаг асмағыныз «Ағаја хош ҝедир» (Кол. 3:20). Јеһова билир ки, бәзән валидејнләриниз сизи там баша дүшмүр вә ја гојдуглары гајдалар сәрт олур. Белә оланда да онлара итаәт един, онда Јеһова сиздән разы галаҹаг.

⁷ Икинҹиси, валидејнләринизин кечирдији һиссләр барәдә дүшүнүн. Онларын сөзүнә итаәт едәндә үрәкләри севинир вә сизә етибарлары артыр (Мәс. 23:22—25). Бу һәм дә сизә онларла даһа јахын олмаға көмәк едәҹәк. Белчикадан олан Александр гардаш дејир: «Валидејнләримин бујругларыны јеринә јетирдикҹә мүнасибәтләримиз јахшылашды, даһа меһрибан, даһа хошбәхт олдуг» b. Үчүнҹүсү, јадда сахлајын ки, итаәткар олмағыныз сабаһ сизә хејир ҝәтирәҹәк. Бразилијада јашајан Пауло дејир: «Ата-анамын сөзүнә гулаг асмаг мәнә Јеһоваја вә диҝәр сәлаһијјәтли шәхсләрә итаәт етмәјә көмәк етди». Аллаһын  Кәламында валидејнләрә итаәт етмәјин белә бир ваҹиб сәбәби вурғуланыр: «Беләҹә, ҝүзәранын хош, јер үзүндә өмрүн узун олаҹаг» (Ефес. 6:2, 3).

8. Чохларыны валидејнләринин сөзүнә гулаг асмаға нә тәшвиг едир?

⁸ Валидејнләринә итаәткарлығын хејрини чох ҝәнҹ ҝөрүб. Бразилијадан олан Луизанын валидејнләри мүәјјән мүддәт она телефон алмаға иҹазә вермирдиләр. О, әввәл-әввәл бунун сәбәбини баша дүшә билмирди. Луиза әсас ҝәтирирди ки, онун јашында оланларын чохунун телефону вар. Амма Луиза сонра баша дүшдү ки, валидејнләри әслиндә ону бу јолла горујуб. О, инди белә дејир: «Валидејнләримин гојдуғу гајда-ганунлара әлими-голуму бағлајан “дәли көјнәји” кими јох, һәјатымы горујан тәһлүкәсизлик кәмәри кими бахырам». Бирләшмиш Штатлардан олан Елизабетә исә индинин өзүндә дә һәрдән валидејнләринә гулаг асмаг чәтин олур. Амма о бунун өһдәсиндән белә ҝәлир: «Валидејнләримин гојдуғу һансыса гајданы там баша дүшмәјәндә бундан әввәлки гајдаларынын мәни неҹә горудуғуну јадыма салырам». Моника исә дејир ки, ата-анасынын сөзүнә гулаг асанда һәмишә хејир тапыб, гулаг асмајанда исә зијаныны ҝөрүб.

9. Чохлары ганунлара табе олмагла бағлы нә дүшүнүр?

⁹ Чох адам гәбул едир ки, өлкәни идарә едән «һөкумәт» олмалыдыр вә онун гојдуғу гајдаларын һеч олмаса бәзиләринә әмәл етмәк лазымдыр (Ром. 13:1). Амма бәзән елә һәмин адамлар бәјәнмәдикләри, онлара ағыр ҝәлән ганунлара әмәл етмир. Ҝөтүрәк елә верҝи мәсәләсини. Бир Авропа өлкәсиндә сорғуда иштирак едәнләрин дөрддә бири һесаб едир ки, «сәнә ағлабатан ҝәлмәјән верҝиләри өдәмәјә биләрсән». Тәәҹҹүблү дејил ки, бу өлкәнин әһалиси верҝиләрин тәхминән 65 фаизини өдәјир.

10. Нәјә ҝөрә һәтта хошумуза ҝәлмәсә белә ганунлара итаәт етмәлијик?

¹⁰ Мүгәддәс Китабдан ҝөрмәк олар ки, биз инсан һөкумәтләри уҹбатындан әзаб чәкирик, онлары Шејтан идарә едир вә онлар тезликлә мәһв едиләҹәк (Зәб. 110:5, 6; Ваиз 8:9; Лука 4:5, 6). Амма орада һәмчинин јазылыб ки, «һөкумәтә гаршы чыхан Аллаһын тәсис етдији гурулуша гаршы чыхыр». Һөкумәтләр Аллаһын низам-интизамы горумаг үчүн тәсис етдији мүвәггәти гурулушдур вә биздән онлара нисби табечилик ҝөзләнилир. Одур ки, биз «һәр кәсә һаггыны» вермәлијик. Бура верҝи өдәмәк, һөрмәт ҝөстәрмәк вә итаәт етмәк дахилдир (Ром. 13:1—7). Ола билсин, һансыса ганун бизә һагсыз ҝөрүнсүн, раһатлығымызы позсун вә ја она итаәт етмәк бизә баһа-баша ҝәлсин. Буна бахмајараг, Јеһованын  хатиринә биз һөкумәтин ганунларына табе олаҹағыг. Амма әлбәттә ки, Јеһованын әмрини позмағы тәләб едән ганунлар бура аид дејил (Һәв. 5:29).

11, 12. Лука 2:1—6 ајәләринә әсасән Јусифлә Мәрјәм чәтин олса да, гануна табе олмагдан өтрү нәләр етмишди? Бәс нәтиҹә неҹә олду? (Һәмчинин шәкилләрә бахын.)

¹¹ Јусифлә Мәрјәм бизим үчүн ҝөзәл нүмунәдир. Бу әр-арвад онлар үчүн асан олмајанда белә һөкумәтә табе олурду. (Лука 2:1—6 ајәләрини охујун.) Мәрјәмин һамиләлијинин тәхминән доггузунҹу ајында онларын итаәткарлығы сынанды. Рома императору Сезар Август әһалинин сијаһыја алынмасы үчүн фәрман верди. Јусифлә Мәрјәм дағлы-тәпәли јолларла һарадаса 150 километр гәт едиб Бејтләһмә ҝетмәли иди. Бу һеч дә асан сәјаһәт олмајаҹагды, әсас да Мәрјәм үчүн. Јәгин, онлар һәм Мәрјәмин, һәм дә доғулмамыш көрпәнин сағламлығына ҝөрә нараһат идиләр. Бирдән јолда Мәрјәмин доғуш санҹылары тутсајды, неҹә олаҹагды? Ахы о, бәтниндә ҝәләҹәк Мәсиһи дашыјырды. Бу онлара һөкумәтин әмринә итаәтсизлик етмәјә һагг газандырарды?

¹² Јусифлә Мәрјәмин нараһат олмаг үчүн јетәринҹә сәбәби олса да, онлар гануна табе олду. Јеһова да онларын итаәтини гијмәтләндириб гејдләринә галды. Мәрјәм сағ-саламат Бејтләһмә чатды, сағлам ушаг дүнјаја ҝәтирди, һәтта Мүгәддәс Китаб пејғәмбәрлијинин јеринә јетмәсиндә пај саһиби олду! (Мик. 5:2).

13. Итаәткарлығымыз диндашларымыза һансы хејри ҝәтирир?

¹³ Һөкумәтә табе олмағын һәм өзүмүзә, һәм дә башгаларына хејри вар. Мәсәлән, гануну позмадығымыз үчүн ҹәза алмырыг (Ром. 13:4). Һәмчинин итаәткарлығымыз сајәсиндә һөкумәт Јеһованын Шаһидләри барәдә јахшы фикирдә олур. Мисал үчүн, узун илләр әввәл Ниҝеријада әсҝәрләр ҝөрүш вахты ибадәт евинә дахил олмушду. Онлар верҝијә гаршы олан гијамчылары ахтарырды.  Амма рәис «Јеһованын Шаһидләри верҝи әлејһдарлары дејил» дејиб әсҝәрләрә әмр етди ки, залы тәрк етсинләр. Һәр дәфә һөкумәтин ганунларына табе оланда Аллаһын халгынын репутасијасыны даһа да јахшылашдырырсыныз. Бу исә ҝүнләрин бир ҝүнү диндашларынызы горуја биләр (Мәт. 5:16).

14. Бир баҹыја һөкумәтә табе олмаға нә көмәк етмишди?

¹⁴ Амма бәзән инсан һөкумәтә табе олмаг истәмир. Бирләшмиш Штатларда јашајан Ҹоана баҹы дејир: «Аилә үзвләрим һөкумәтин әлиндән чох чәкиб, она ҝөрә дә итаәткар олмаг мәним үчүн һәддән артыг чәтин иди». Амма Ҹоана мәгсәдјөнлү шәкилдә дүшүнҹәсини дәјишмәјә чалышды. Биринҹиси, о, интернетдән дөвләтин әлејһинә олан постлары охумаға сон гојду (Мәс. 20:3). Икинҹиси, дуа етди, Јеһовадан көмәк истәди ки, һөкумәтдә нәјинсә дәјишәҹәјинә јох, Она үмид етсин (Зәб. 9:9, 10). Үчүнҹүсү, Ҹоана нәшрләримиздән битәрәфликлә бағлы мәгаләләр охуду (Јәһ. 17:16). О, инди дејир ки, һөкумәтә һөрмәти вә итаәти сајәсиндә үрәјиндә «сөзлә ифадә олунмаз гәдәр раһатлыг вар».

15. Јеһованын тәшкилатындан ҝәлән ҝөстәришләрә табе олмаг нәјә ҝөрә бәзән чәтин олур?

¹⁵ Јеһова бујурур ки, јығынҹаға «рәһбәрлик едәнләрә итаәт» едәк (Ибр. 13:17). Ағамыз Иса камил олса да, рәһбәрлик етмәк үчүн тәјин етдији гардашлар гејри-камилдир. Онлара итаәт етмәк бизә бәзән асан олмур, әсас да онлар истәмәдијимиз бир шеји бизә бујуранда. Бу, бир дәфә Бутруса да чәтин олмушду. Мәләк она демишди ки, Мусанын Ганунунда напак һесаб олунан һејванларын әтини јесин, Бутрус исә бундан имтина етмишди, өзү дә бир дәфә јох, дүз үч дәфә (Һәв. 10:9—16). Нәјә ҝөрә? Чүнки о бу мәсәләдә башга ҹүр давранмаға алышмышды, јени ҝөстәриш исә она ағлабатан ҝәлмирди. Әҝәр камил мәләјин ҝөстәришинә итаәт етмәк Бутруса чәтин идисә, ҝөрүн гејри-камил инсанлардан алдығымыз ҝөстәришә итаәт етмәк бизә нә гәдәр чәтин ола биләр!

16. Верилән ҝөстәриш Булуса ағлабатан ҝөрүнмәсә дә, о нә етди? (Һәвариләрин ишләри 21:23, 24, 26).

¹⁶ Һәвари Булус һәтта она мәнтигсиз ҝәлән ҝөстәришләрә дә итаәт едирди. Булус барәдә шајиәләр ҝәзирди, ҝуја о, ҹамаата тәблиғ едир ки, «Мусанын Ганунундан дөнсүнләр». Бу шајиәләр јәһуди мәсиһиләрин дә гулағына чатмышды (Һәв. 21:21). Буна ҝөрә дә Јерусәлимдәки ағсаггаллар Булуса деди ки, өзү илә дөрд нәфәр ҝөтүрүб мәбәдә ҝетсин вә паклансын; һамы ҝөрсүн ки, о, Гануна риајәт едир. Булус мәсиһиләрин артыг Ганунун табелијиндә олмадығыны билирди, һәм дә о, һеч бир сәһв иш ҝөрмәмишди. Амма јенә дә Булус ағсаггалларын бир сөзүнү ики етмәди, сәһәриси ҝүн «һәмин кишиләри јанына алыб онларла бирликдә пакланды». (Һәвариләрин ишләри 21:23, 24, 26 ајәләрини охујун.) Булусун итаәти сајәсиндә баҹы-гардашлар арасындакы бирлик позулмады (Ром. 14:19, 21).

17. Стефанидән нә өјрәнирсиниз?

¹⁷ Стефани баҹыја гардашларын вердији бир гәрары гәбул етмәк чәтин олмушду. О, јолдашы илә әҹнәбидилли групда һәвәслә хидмәт едирди. Амма сонра филиал комитәси бу групу ләғв етди вә онлар јенидән ана дилләриндә олан јығынҹаға тәјин олунду. Стефани дејир: «Чох дилхор олмушдум. Ана дилимиздә олан јығынҹагда тәблиғчиләрә тәләбатын олмадығыны дүшүнүрдүм».  Буна бахмајараг, о бу јени ҝөстәришә табе олду. Стефани сөзүнә әлавә едир: «Заманла ҝөрдүм ки, бу гәрар һикмәтли имиш. Јығынҹағымызда һәгигәтдә тәк олан чох мәсиһи вар. Биз онлар үчүн руһани валидејн олдуг. Һәмчинин мән фәалијјәтини бәрпа етмиш бир баҹыја дәрс кечирәм. Үстәлик, фәрди мүталиә үчүн инди даһа чох вахтым вар. Виҹданым да раһатдыр ки, итаәткарлыг ҝөстәрмәк үчүн әлимдән ҝәләни етдим».

18. Итаәткар олмағын һансы хејри вар?

¹⁸ Итаәткар олмағы өјрәнмәк мүмкүндүр. Иса «итаәтли олмағы» өјрәнмишди, амма о буну мүкәммәл шәраитдә јох, «чәкдији әзаблар сајәсиндә» өјрәнмишди (Ибр. 5:8). Онун кими биз дә чох вахт итаәткарлығы мәһз чәтин вәзијјәтдә оланда өјрәнирик. Мәсәлән, COVID-19 пандемијасынын башланғыҹында ибадәт евләриндә јығышмаг вә ев-ев тәблиғ етмәк дајандырылмышды. Бу ҝөстәришә итаәт етмәк сизә чәтин иди? Бунунла белә, итаәткарлығыныз сизи горуду, јығынҹагда бирлик олду вә Јеһова да разы галды. Инди һамымыза бөјүк мүсибәтдә алаҹағымыз ҝөстәришләрә табе олмаг даһа асан олаҹаг. Верилән ҝөстәришләрә итаәт етмәк һәјатымызы хилас едәҹәк! (Әјј. 36:11).

19. Нәјә ҝөрә итаәткар олмаг истәјирсиниз?

¹⁹ Өјрәндик ки, итаәткарлыг ҝөстәрмәјин сајсыз-һесабсыз хејри вар. Амма Јеһоваја итаәт етмәјимизин әсас сәбәби одур ки, Ону севирик вә гәлбини севиндирмәк истәјирик (1 Јәһ. 5:3). Биз һеч вахт Јеһованын борҹунун алтындан чыха билмәрик (Зәб. 116:12). Амма Она вә үзәримиздә олан сәлаһијјәтли шәхсләрә итаәт едә биләрик. Итаәткарлығымыз һикмәтли олдуғумузу ҝөстәрәҹәк. Һикмәтли олмағымыз исә Јеһованын гәлбини севиндирир (Мәс. 27:11).