1, 2. Мүгәддәс Китабы мүталиә етмәјин ән јахшы јолу һансыдыр? Нүмунә чәкин.

 ТӘСӘВВҮР един ки, ев алмаг истәјирсиниз. Евин тәкҹә бајыр тәрәфиндән шәклинә бахмаг кифајәт едәрди? Јәгин, истәјәрдиниз ки, еви ҹанлы ҝөрәсиниз, һәм чөл тәрәфини, һәм дә бүтүн отагларыны бир-бир ҝәзәсиниз, һәр бир гарышына диггәтлә бахасыныз. Бәлкә, евин чертјожуна да нәзәр салардыныз. Бәли, ҝәләҹәк евинизин һәр күнҹ-буҹағыны ҝөрмәк истәјәрдиниз.

² Ејни шеји Аллаһын Кәламыны мүталиә едән заман да етмәлијик. Бир јазычы Мүгәддәс Китабы «һүндүр гүлләләри вә дәрин бүнөврәси олан нәһәнҝ бир тикилијә» бәнзәтмишди. Бәс онда орада јазыланларын һамысыны неҹә өјрәнмәк олар? Әҝәр ону тез-тәләсик охусаныз, јалныз тәмәл һәгигәтләри баша дүшәҹәксиниз, башга сөзлә десәк, «Аллаһын мүгәддәс сөзләри илә бағлы ибтидаи тәлимләри» биләҹәксиниз (Ибр. 5:12). Буна ҝөрә дә Мүгәддәс Китабын «ичинә ҝириб» орадакы инҹәликләри ҝөрмәјә чалышын. Буну етмәјин ән ҝөзәл јолу мүхтәлиф һиссәләрин бир-бири илә неҹә әлагәли олдуғуну ҝөрмәкдир. Мәгсәд гојун ки, тәкҹә нәјә инандығынызы јох, һәмчинин буна нәјә ҝөрә инандығынызы да дәрк едәсиниз.

3. Һәвари Булус диндашларыны нәјә тәшвиг едирди вә нә үчүн? (Ефеслиләрә 3:14—19).

³ Аллаһын Кәламынын һәр инҹәлијини ҝөрмәк үчүн орадакы дәрин һәгигәтләри өјрәнмәлијик. Булус мәсиһиләри тәшвиг етмишди ки, Аллаһын Кәламынын дәринлијинә варыб «һәгигәтин ҝенишлијини, узунлуғуну, һүндүрлүјүнү вә дәринлијини»  там гаврасынлар. Бунун сајәсиндә онларын иманлары «мөһкәм» вә «мәтин» олаҹагды. (Ефеслиләрә 3:14—19 ајәләрини охујун.) Биз дә ејни шеји етмәлијик. Бәс Аллаһын Кәламындакы дәрин һәгигәтләри һәртәрәфли ҝөрмәк үчүн ону неҹә тәдгиг етмәлијик?

4. Јеһоваја јахынлашмаг үчүн нә едә биләрик? Мисал чәкин.

⁴ Мәсиһиләр үчүн Мүгәддәс Китабы јалныз сәтһи баша дүшмәк кифајәт дејил. Биз мүгәддәс руһун көмәји илә «Аллаһын дәрин сирләрини белә» өјрәнмәјә ҹан атырыг (1 Кор. 2:9, 10). Бәлкә, Јеһоваја јахынлашмағыныза көмәк едәҹәк мөвзулары арашдырасыныз? Мәсәлән, арашдыра биләрсиниз ки, Јеһова гәдимдә хидмәтчиләринә Өз мәһәббәтини неҹә ҝөстәрмишди вә бу Онун сизи дә севдијини неҹә сүбут едир. Һәмчинин Јеһованын гәдимдә һансы ибадәти тәсис етдијини арашдырмаг вә ону индики ибадәтинизлә мүгајисә етмәк олар. Јахуд Иса Мәсиһин үзәриндә јеринә јетмиш пејғәмбәрликләри дәриндән өјрәнә биләрсиниз.

5. Фәрди мүталиә заманы һансы мөвзуну арашдырмаг истәјәрдиниз?

⁵ Мүгәддәс Китабы мүталиә етмәји севән бир нечә нәфәрдән сорушмушдулар ки, ҝөрсүнләр онлар һансы мөвзулары даһа дәриндән арашдырмаг истәјәрдиләр. Онларын вердији ҹаваблардан бәзиләри « Фәрди мүталиә үчүн мөвзулар» адлы чәрчивәдә гејд олунуб. Бу мөвзулары арашдырмаг сизә бөјүк севинҹ ҝәтирәҹәк. Бунлары «Ҝөзәтчи гүлләси нәшрләринин индекси» (түрк.) вә «Јеһованын Шаһидләринин нәшрләри үзрә ахтарыш» вәсаитинин көмәји илә едә биләрсиниз. Дәрин мүталиә иманынызы мөһкәмләндирәҹәк вә сиз «Аллаһын елминә» јетишәҹәксиниз (Мәс. 2:4, 5). Инди дәрин мөвзулардан бәзиләринә диггәт јетирәҹәјик.

6. а) Јеһованын нијјәтини һәр заман јеринә јетирдијини ҝөстәрән нүмунә чәкин. б) Нәјә ҝөрә дејә биләрик ки, Јеһованын инсанларла вә Јер күрәси илә бағлы нијјәти әбәдидир?

⁶ Мәсәлән, ҝөтүрәк Мүгәддәс Китабда Аллаһын нијјәти илә бағлы дејиләнләри.  Јеһова нәјисә етмәјә гәрар верәндә һансыса конкрет јолдан асылы олмур. Буну бир нүмунә әсасында изаһ етмәк олар. Тәсәввүр един ки, кәндә ҝетмәк истәјирсиниз. Амма ҝөрүрсүнүз ки, бөјүк бир ағаҹ ашыб, јолу бағлајыб. Бу јолла кәндә ҝетмәк мүмкүн дејил, буна ҝөрә дә башга јол сечирсиниз. Әлбәттә ки, биз нијјәт етдијимиз һәр шејә һәмишә чата билмәрик. Амма Јеһоваја нијјәтинә чатмаға һеч нә мане ола билмәз, О буна истәнилән јолла чата биләр. Ахы О, «һәр шеји Өз мәгсәди үчүн гуруб» (Мәс. 16:4). Һәмчинин Мүгәддәс Китабда јазылыб ки, Јеһованын нијјәти «әбәдидир» (Ефес. 3:11). Һансы мәнада? Јеһова нијјәтинин там шәкилдә јеринә јетмәси үчүн әсрләрин кечмәсинә изин вериб. Һәм дә Онун ҝерчәкләшдирдији һәр бир шеј әбәди галаҹаг. Бәс Јеһованын нијјәти нәдир? О, нијјәтини јеринә јетирмәк үчүн нәләри дәјишиб?

7. Адәмлә Һәвва үсјан едәндән сонра Јеһова нијјәтини јеринә јетирмәк үчүн һансы дәјишиклији етди? (Мәтта 25:34).

⁷ Јеһова Адәм вә Һәвваја онларла бағлы нијјәтини билдирмишди. Онлара демишди: «Төрәјиб чохалын, бүтүн јер үзүнү долдурун вә она саһиб олун... Јердәки диҝәр ҹанлыларын үзәриндә һөкмранлыг един» (Јар. 1:28). Лакин Адәмлә Һәвва Јеһоваја үсјан етди вә бәшәр аиләсинә ҝүнаһ дахил олду. Амма бу, Јеһоваја нијјәтини һәјата кечирмәјә мане олмады. Јеһова нијјәтини һәјата кечирмәк үчүн башга јол сечди. О, дәрһал гәрар верди ки, бир Падшаһлыг гурсун; бу Падшаһлыг Онун инсанларла вә Јер күрәси илә бағлы әзәли нијјәтини јеринә јетирсин. (Мәтта 25:34 ајәсини охујун.) Јеһова тәјин етдији вахтда Оғлуну јер үзүнә ҝөндәрди. Иса Падшаһлыг һагда тәблиғ етди вә инсанлары ҝүнаһдан, өлүмдән хилас етмәк үчүн өз һәјатыны гурбан верди. Сонра Иса дирилди вә Аллаһын Падшаһлығынын Падшаһы тәјин олунду. Дәринлијә варсаг, Јеһованын нијјәти барәдә һәлә чох шеј өјрәнә биләрик.

8. а) Мүгәддәс Китабын мөвзусу нәдир? б) Ефеслиләрә 1:8—11 ајәләринә әсасән Јеһованын әсас нијјәти нәдир? (Үз габығындакы шәклә бахын.)

⁸ Јеһова Исанын идарә етдији Падшаһлыг васитәсилә јер үзү илә бағлы нијјәтини јеринә јетирәрәк адына бәраәт газандыраҹаг. Бу, Мүгәддәс Китабын әсас мөвзусудур. Јеһованын нијјәти дәјишилмәздир. О, сөз вериб ки, һәр шеј дедији кими олаҹаг (Әшј. 46:10, 11; Ибр. 6:17, 18). Јер күрәси Ҹәннәтә чевриләҹәк. Адәмлә Һәвванын камил, салеһ нәсли әбәди јашајаҹаг (Зәб. 22:26). Амма Јеһованын даһа ҝениш мәгсәди вар. Онун әсас нијјәти одур ки, ҝөјдә вә јердә олан бүтүн шүурлу варлыгларын арасында бирлик јаратсын. Онда онларын һамысы Јеһованын рәһбәрлијини гәбул едиб Она сәдагәтлә гуллуг едәҹәк. (Ефеслиләрә 1:8—11 ајәләрини охујун.) Доғрудан да, Јеһова Өз нијјәтини мөһтәшәм шәкилдә һәјата кечирир. Буна валеһ олмамаг мүмкүн дејил.

9. Мүгәддәс Китабы охујуб ҝәләҹәјимизи һара кими ҝөрә биләрик?

⁹ Јеһованын Әдән бағында сөјләдији пејғәмбәрлији јадымыза салаг. Бу пејғәмбәрлик Јарадылыш 3:15 ајәсиндә јазылыб b. Орада Јеһованын нијјәтинин һәјата кечмәси үчүн һансы һадисәләрин баш верәҹәјиндән данышылыр. Амма һәмин һадисәләр мин илликләр сонра баш верәҹәкди. Мәсәлән, бу һадисәләрдән бири гадынын өвладынын  әсас һиссәси олан Мәсиһин Ибраһим пејғәмбәрин нәслиндән ҝәлмәси иди (Јар. 22:15—18). Сонра пејғәмбәрлик олундуғу кими ерамызын 33-ҹү илиндә Иса Мәсиһ дабанындан санҹылды (Һәв. 3:13—15). Бу пејғәмбәрлијә аид олан сон һадисә Шејтанын башынын әзилмәси олаҹаг. Бунун баш вермәсинә исә мин илдән чох вахт галыб (Вәһј 20:7—10). Бәс ҝөрәсән, Шејтан дүнјасы илә Јеһованын тәшкилаты арасындакы дүшмәнчилик ән сон һәддә чатанда нәләр баш верәҹәк?

10. а) Тезликлә һансы һадисәләр баш верәҹәк? б) Ағлымызы вә үрәјимизи неҹә һазырлаја биләрик? (Һашијәјә бахын.)

¹⁰ Мүгәддәс Китабдан бу барәдә чох шеј өјрәнә биләрик. Јер үзүнү ләрзәјә ҝәтирәҹәк һадисәләр барәдә дүшүнәк. Биринҹиси, дүнја лидерләри «сүлһ вә тәһлүкәсизлик» бәјанатыны верәҹәк (1 Салон. 5:2, 3). Онлар бүтүн јалан динләрә һүҹум едәндә гәфил бөјүк мүсибәт башлајаҹаг (Вәһј 17:16). Бундан сонра, ола билсин, «инсан Оғлунун гүдрәтлә, ҹалал ичиндә булудларын үзәриндә» ҝәлмәсинин фөвгәлбәшәр нүмајиши олаҹаг (Мәт. 24:30). Иса Мәсиһ инсанлары мүһакимә едиб гузулары кечиләрдән ајыраҹаг (Мәт. 25:31—33, 46). Шејтан да бош дајанмајаҹаг. О, бүтүн нифрәтини төкүб Мәҹуҹ өлкәсиндән олан Јәҹуҹу, јәни милләтләр бирлијини Аллаһын халгына гаршы галдыраҹаг (Һизг. 38:2, 10, 11). Бөјүк мүсибәтин һансыса мәгамында јер үзүндәки мәсһ олунмуш мәсиһиләр ҝөјә топланаҹаг. Онлар Мәсиһлә вә онун сәмави ордусу илә бирҝә бөјүк мүсибәтин сонунда, Армаҝеддон мүһарибәсиндә дөјүшәҹәкләр c (Мәт. 24:31; Вәһј 16:14, 16). Сонра исә јер үзүндә Мәсиһин миниллик һакимијјәти дөврү башлајаҹаг (Вәһј 20:6).

11. Әбәди һәјат сизин үчүн нә демәкдир? (Һәмчинин шәклә бахын.)

¹¹ Инди исә узаг ҝәләҹәјимиз барәдә дүшүнәк. Мүгәддәс Китабда дејилир ки, Јараданымыз «инсанларын үрәјинә әбәдијјәт» гојуб (Ваиз 3:11). Баша дүшүрсүнүз,  бу сизин үчүн, Јеһова илә мүнасибәтиниз үчүн нә демәкдир? «Јеһоваја јахынлаш» китабынын 319-ҹу сәһифәсиндә (түрк.) ҝәләҹәјә марағымызы артыран ҝөзәл сөзләр јазылыб: «Јүз, мин, милјон, һәтта милјард ил јашајандан сонра Јеһова һагда индикиндән гат-гат чох шеј биләҹәјик. Амма һәлә дә сајсыз-һесабсыз һејрәтамиз һәгигәтләри кәшф етмәјә давам едәҹәјик... Әбәди һәјат ағлымыза ҝәлмәјәҹәк гәдәр долғун, рәнҝарәнҝ олаҹаг. Бу һәјаты ән ҝөзәл едән мәгам исә Јеһоваја даһа да јахынлашмағымыз олаҹаг». Мүгәддәс Китабы мүталиә едән заман даһа нәләри арашдыра биләрик?

12. Сәмави аләмә неҹә баха биләрик? Нүмунә чәкин.

¹² Мүгәддәс Китабын сајәсиндә Јеһованын «уҹаларда» олан мәскәни барәдә мүәјјән тәсәввүрүмүз олур (Әшј. 33:5). Орада Јеһова Аллаһ вә Онун тәшкилатынын сәмави һиссәси илә бағлы валеһедиҹи мәлуматлар вар (Әшј. 6:1—4; Дән. 7:9, 10; Вәһј 4:1—6). Мәсәлән, биз Һизгијалын ҝөрдүјү ҝөрүнтүләр барәдә охуја биләрик. Ҝөјләр ачыланда вә Аллаһдан ҝөрүнтүләр назил оланда о, валеһедиҹи шејләр ҝөрмүшдү (Һизг. 1:1).

13. Ибраниләрә 4:14—16 ајәләринә әсасән Исанын ҝөјдә ҝөрдүјү ишләрлә бағлы нәји гијмәтләндирирсиниз?

¹³ Һәмчинин Исанын падшаһ вә мәрһәмәтли баш каһин кими ҝөјдә ҝөрдүјү ишләр барәдә дүшүнүн. Биз онун васитәсилә дуада «Аллаһын лүтф тахтына» јахынлаша билирик вә «дара дүшәндә» Ондан мәрһәмәт, көмәк истәјирик. (Ибраниләрә 4:14—16 ајәләрини охујун.) Гој Јеһованын вә Исанын бизим үчүн һәм кечмишдә, һәм дә инди етдикләри барәдә дүшүнмәдијимиз бир ҝүн белә олмасын. Онларын бизә севҝиси гәлбимизи  исиндирир вә Јеһоваја ибадәтдә әлимиздән ҝәләни етмәјә тәшвиг едир (2 Кор. 5:14, 15).

14. Јеһоваја вә Исаја миннәтдарлығымызы билдирмәјин ән јахшы үсулларындан бири нәдир? (Һәмчинин шәкилләрә бахын.)

¹⁴ Јеһоваја вә Исаја миннәтдарлығымызы неҹә ҝөстәрә биләрик? Бунун ән ҝөзәл үсулларындан бири башгаларына Јеһованын Шаһиди олмаға вә Исанын ардынҹа ҝетмәјә көмәк етмәкдир (Мәт. 28:19, 20). Һәвари Булус Јеһоваја вә Исаја миннәтдарлыгдан ирәли ҝәләрәк белә дә етмишди. О билирди ки, Јеһованын ирадәси «һәр ҹүр [инсанын] хилас олуб һәгигәт барәсиндә дәгиг билијә» јијәләнмәсидир (1 Тим. 2:3, 4). Булус даһа чох инсана көмәк етмәк үчүн хидмәтдә әлиндән ҝәләни едирди. О истәјирди ки, «һәр ҹүр васитәдән истифадә едиб кимләрисә хилас» едә билсин (1 Кор. 9:22, 23).

15. Зәбур 1:2 ајәсинә әсасән бизи нә хошбәхт едәҹәк?

¹⁵ Биринҹи мәзмурун јазары хошбәхт инсаны тәсвир едәрәк белә сөзләр јазмышды: «О, Јеһованын ганунундан һәзз алыр, ҝеҹә-ҝүндүз Онун ганунунун дәринлијинә варыр» (Зәб. 1:1—3). Бир Мүгәддәс Китаб тәрҹүмәчиси бу ајәләрлә бағлы белә сөзләр демишди: «Инсан илаһи нәсиһәтләрдән о гәдәр һәзз алмалыдыр ки, ону ахтармалы, арашдырмалы вә хејли вахт ајырыб үзәриндә дүшүнмәлидир. Мүгәддәс Китабын охуҹусу орадакы һикмәтә баш вурмадығы һәр бир ҝүнүнү бада вермиш олур» («Studies in the Psalms»). Кәламдакы инҹәликләри, орада јазыланларын бир-бири илә әлагәсини ҝөрмәјә чалышдыгҹа мүталиәниз сизә зөвг верәҹәк. Аллаһын Кәламынын һәр бир инҹәлијини ҝөрмәјә чалышмаг инсана сөзлә ифадәолунмаз дәрәҹәдә зөвг верир!

16. Нөвбәти мәгаләдә нәји мүзакирә едәҹәјик?

¹⁶ Јеһованын Кәламында бизә ачыгладығы ҝөзәл һәгигәтләри баша дүшмәк чәтин дејил. Нөвбәти мәгаләдә дәрин һәгигәтләрдән бири барәдә — Јеһованын руһани мәбәди һагда данышаҹағыг. Булус ибраниләрә мәктубунда бу мәбәди тәсвир етмишди. Үмид едирик, бу мөвзуну арашдырмаг хошунуза ҝәләҹәк.