1, 2. а) Иса Мәсиһин һәјатында әсас јери һансы иш тутурду вә нә үчүн? б) «Аллаһын әмәкдашлары» кими даһа сәриштәли олмаг үчүн нә етмәлијик?

ИСА МӘСИҺ дүлҝәр вә устад иди (Марк 6:3; Јәһ. 13:13). О, һәр ики ишин өһдәсиндән мәһарәтлә ҝәлирди. Дүлҝәр олараг о, өз пешәсинә аид олан аләтләрдән истифадә етмәји, тахта-шалбандан лазымлы әшјалар дүзәлтмәји өјрәнмишди. Устад кими исә о, илаһи биликләриндән мәһарәтлә истифадә едәрәк инсанлара Аллаһын Кәламындакы һәгигәтләри анламаға көмәк едирди (Мәт. 7:28; Лука 24:32, 45). Тәхминән 30 јашларында оланда Иса Мәсиһ дүлҝәрлик сәнәтини дајандырыб, диггәтини даһа ваҹиб олан мүәллимлик ишинә јөнәлтди. О, Аллаһын ону јер үзүнә Падшаһлыг һагда хош хәбәри мүждәләмәк үчүн ҝөндәрдијини вурғуламышды (Мәт. 20:28; Лука 3:23; 4:43). Иса Мәсиһ тәблиғ хидмәтини һәр шејдән үстүн тутурду вә башгаларынын да белә давранмасыны истәјирди (Мәт. 9:35—38).

² Биз һамымыз дүлҝәр олмасаг да, хош хәбәрин мүәллимләријик. Бу, о гәдәр ваҹиб ишдир ки, Аллаһ Өзү бу ишдә иштирак едир вә биз Онун «әмәкдашлары» адланырыг (1 Кор. 3:9; 2 Кор. 6:4). Бизим үчүн Јеһованын «сөзүнүн бүнөврәси һәгигәтдир» (Зәб. 119:159, 160). Хидмәтдә «һәгигәт кәламындан дүзҝүн истифадә едән» мүждәчи олмаг үчүн әлимиздән ҝәләни етмәлијик. (2 Тимутијә 2:15 ајәсини охујун.) Одур ки, инсанлара Јеһова Аллаһ, Иса Мәсиһ вә Аллаһын Падшаһлығы һагда һәгигәти өјрәтмәк  үчүн әсас вәсаитимиз олан Мүгәддәс Китабдан истифадә етмәк баҹарығымызы тәкмилләшдирмәлијик. Тәблиғ ишини даһа еффектив иҹра етмәк үчүн Јеһованын тәшкилаты бизи диҝәр вәсаитләрлә дә тәмин едиб. Бу вәсаитләрдән неҹә истифадә етмәји билмәлијик. Сөһбәт тәлим вәсаитләримиздән ҝедир.

3. Нә гәдәр ки тәблиғ етмәк үчүн вахт вар, диггәтимизи әсасән нәјә ҹәмләмәлијик вә Һәвариләрин ишләри 13:48 ајәси бизә бу саһәдә неҹә көмәк едир?

³ Бәс ҝөрәсән нәјә ҝөрә бу вәсаитләр тәблиғ јох, тәлим вәсаитләри адланыр? «Тәблиғ» сөзүнүн мәнасы хәбәри бәјан етмәк демәкдир. «Тәлим» сөзү исә хәбәри инсанын дүшүнҹәсинә вә үрәјинә тәсир едәҹәк шәкилдә чатдырмаг демәкдир ки, бу да өз нөвбәсиндә инсаны өјрәндикләринә ујғун давранмаға тәшвиг едир. Тәблиғ етмәјә ајрылан вахтын битмәк үзрә олдуғу бир заманда амалымыз Мүгәддәс Китаб дәрсинә башламаг вә инсанлара һәгигәти өјрәтмәк олмалыдыр. Бу исә о демәкдир ки, «әбәди һәјата апаран јолда јеримәјә мејли оланлары» тапмаг үчүн вар ҝүҹүмүзлә чалышмалы вә онлара Аллаһын хидмәтчиләри олмаға көмәк етмәлијик. (Һәвариләрин ишләри 13:44—48 ајәләрини охујун.)

4. «Әбәди һәјата апаран јолда јеримәјә мејли оланлары» неҹә тапа биләрик?

⁴ Бәс «әбәди һәјата апаран јолда јеримәјә мејли оланлары» неҹә тапмаг олар? Биринҹи әсрдә олдуғу кими, бу ҝүн дә белә инсанлары тапмағын јеҝанә јолу шаһидлик етмәкдир. Буна ҝөрә дә биз Иса Мәсиһин тапшырдығы кими давранмалыјыг. О демишди: «Һансы шәһәрә вә ја кәндә ҝирсәниз, лајигли адамлары ахтарын» (Мәт. 10:11). Биз гејри-сәмими, өзүндән разы, руһани тәләбаты олмајан инсанларын хош хәбәри гәбул едәҹәјини ҝөзләмирик. Бизләр сәмими, һәлим, һәгигәтә сусајан инсанларын ахтарышындајыг. Тәблиғ ишини Иса Мәсиһин дүлҝәр кими ҝөрдүјү ишә бәнзәтмәк олар. О, ев әшјалары, гапы, бојундуруг вә диҝәр шејләр дүзәлтмәк үчүн әввәлҹә мүнасиб тахта ахтарырды. Сонра исә лазым олан әшјаны дүзәлтмәк үчүн аләтләрини әлинә алыб баҹарығыны ишә салырды. Биз дә сәмими гәлбли инсанлары Мәсиһин шаҝирди кими һазырламаг үчүн буна бәнзәр шәкилдә давранмалыјыг (Мәт. 28:19, 20).

5. Тәлим вәсаитләримизлә бағлы нәји билмәлијик? Нүмунә чәкин. (Мәгаләнин әввәлиндәки шәкилләрә бахын.)

⁵ Һәр бир вәсаит, һәр бир аләт мүәјјән мәгсәд үчүн нәзәрдә тутулуб. Мәсәлән, ҝөтүрәк Иса Мәсиһин дүлҝәр олдуғу заман истифадә етдији аләтләри *. Тахтаны өлчмәк, кәсмәк, дәлмәк вә шәкил вермәк, еләҹә дә тахтанын сәтһинин дүзлүјүнү јохламаг, һиссәләри бир-биринә бәркитмәк үчүн Иса аләтләрдән истифадә едирди. Ејнилә, бизим һәр бир тәлим вәсаитимиз дә мүәјјән мәгсәдләр үчүн нәзәрдә тутулуб. Ҝәлин ҝөрәк һансы вәсаитләримиз вар вә онлардан неҹә истифадә едә биләрик.

6, 7. а) Визит картлардан неҹә истифадә едирсиниз? б) Ибадәт ҝөрүшүнә дәвәтнамә һансы ики мәгсәдә хидмәт едир?

⁶ Визит картлар. Бу кичик, лакин еффектив вәсаитин көмәјилә инсанлара һәм тәшкилатымыз барәдә мәлумат верә, һәм дә онлары рәсми веб сајтымыза јөнәлдә биләрик. Сајта дахил олмагла онлар әтрафлы мәлумат ала, һәмчинин Мүгәддәс Китаб дәрси кечмәк истәкләрини билдирә биләрләр. Бу ҝүнә кими Мүгәддәс Китаб дәрси кечмәк үчүн jw.org сајты васитәсилә 400 000-дән чох мүраҹиәт гејдә алыныб вә һәр ҝүн јүзләрлә бу ҹүр мүраҹиәт дахил олур! Үстүнүздә һәмишә бир нечә визит карт олса, истәнилән вахт имкан јарананда тәблиғ едә биләҹәксиниз.

 ⁷ Дәвәтнамәләр. Ибадәт ҝөрүшүнә дәвәтнамә ики мәгсәдә хидмәт едир. Орада јазылыб: «Сизи Јеһованын Шаһидләри илә Төврат, Зәбур вә Инҹили арашдырмаға дәвәт едирик». Бунун үчүн ики үсул тәклиф олунур: «Ибадәт ҝөрүшләримиз», јахуд «Сизинлә дәрс кечән инсанла бирҝә». Одур ки, бу вәсаити тәкҹә бизим һагда мәлумат вермәк үчүн јох, һәмчинин «Аллаһа еһтијаҹы олдуғуну» дәрк едәнләрә Мүгәддәс Китабы арашдырмағы тәклиф етмәк үчүн дә истифадә едә биләрик (Мәт. 5:3). Әлбәттә, инсанын Мүгәддәс Китабы өјрәнмәк истәјиб-истәмәмәјиндән асылы олмајараг ибадәт евләримизин гапысы һамынын үзүнә ачыгдыр. Ҝөрүшләримиздә иштирак едән инсан орада Мүгәддәс Китаба әсасланан һәгиги тәлими һәм ҝөрәҹәк, һәм дә ешидәҹәк.

8. Инсанларын һеч олмаса бир дәфә ибадәт ҝөрүшүмүзә ҝәлмәси нә үчүн ваҹибдир? Нүмунә чәкин.

⁸ Инсанлары ибадәт ҝөрүшләримиздә азы бир дәфә иштирак етмәјә дәвәт етмәк ваҹибдир. Нә үчүн? Бунун сајәсиндә онлар илаһи биликләрлә зәнҝин олан ибадәт ҝөрүшләримизлә руһани ҹәһәтдән аҹынаҹаглы вәзијјәтдә олан Бөјүк Бабил арасындакы кәскин фәрги ҝөрәҹәкләр (Әшј. 65:13). Бирләшмиш Штатларда јашајан Реј вә Линда адлы бир әр-арвад бир нечә ил бундан өнҹә буна шаһид олмушду. Аллаһа инанан вә Она даһа јахын олмаг истәјән бу әр-арвад килсәјә ҝетмәк гәрарына ҝәлир. Һәмин әразидә сајсыз-һесабсыз килсә вә мәзһәбләр вар иди. Буна ҝөрә онлар јашадыглары шәһәрдәки килсәләри бир-бир ҝәзмәјә башлајырлар. Реј вә Линда ҝетдикләри һәр килсәдә әсасән ики шејә фикир вермәји гәрарлашдырырлар. Биринҹиси, ҝедәҹәкләри килсәдә нәсә өјрәнмәли идиләр. Икинҹиси исә, һәмин динин үзвләринин хариҹи ҝөркәминдән мөмин олдуглары ҝөрүнмәли иди. Бир нечә ил әрзиндә онлар бүтүн килсәләрдә олурлар, лакин үмидләри пуча чыхыр. Онлар ҝетдикләри килсәләрдә һеч бир шеј өјрәнә билмирләр, үстәлик, ора ҝәлиб-ҝедәнләрин ҝејим-кеҹими һеч дә ләјагәтли дејилди. Сонунҹу килсәни дә зијарәт едәндән сонра Линда ишә ҝедир, Реј исә евә гајыдыр. Ибадәт евимизин өнүндән кечән Реј өз-өзүнә дүшүнүр: «Бәлкә, бир ичәри ҝирим бура да бахым?» Тәбии ки, орада ҝөрдүкләри она әвәзсиз тәәссүрат бағышлајыр! Ибадәт евиндәкиләр чох меһрибан вә ҝүләрүз иди, һамы абыр-һәјалы ҝејинмишди. Реј өн ҹәрҝәдә әјләшир. Ешитдикләри онун үрәјинә јағ кими јајылыр! Бу заман о, ибадәт ҝөрүшүнә илк дәфә ҝәлиб, «һәгигәтән дә, Аллаһ сизинләдир» дејән инсанларын кечирдији һиссләри кечирир (1 Кор. 14:23—25). Бундан сонра Реј һәр базар ҝүнү јығынҹагларда иштирак едир, бир мүддәт сонра исә һәфтәарасы ҝөрүшләрә дә гатылыр. Линда да она гошулур. 70-ә јахын јашлары олан бу әр-арвад Мүгәддәс Китабы өјрәнмәјә башлајыр вә вәфтиз олунур.

9, 10. а) Буклетләрин истифадәси нә үчүн асандыр? б) «Аллаһын Падшаһлығы нәдир?» буклети васитәсилә сөһбәтә неҹә башламаг олар?

⁹ Буклетләр. Сөһбәтә асанлыгла башламаг үчүн әлимиздә сәккиз әдәд буклет вар. 2013-ҹү илдә ишыг үзү ҝөрән бу буклетләрин беш милјард нүсхәси чап олунуб. Бу вәсаитләрин өзәллији одур ки, һамысы ејни форматдадыр вә бириндән истифадә етмәји өјрәнмәклә һамысындан истифадә етмәк мүмкүндүр. Бу буклетләр васитәсилә сөһбәтә неҹә башламаг олар?

¹⁰ Мәсәлән, «Аллаһын Падшаһлығы нәдир?» буклети васитәсилә сөһбәтә башламаг үчүн буклетин үзәриндәки суалы ҝөстәриб сорушмаг олар: «Аллаһын Падшаһлығынын нә олдуғуну билирсиниз?» Сонра орада ҝәтирилән үч варианты охујун. Инсан өз фикрини билдирдикдән сонра сәһв вә ја дүз дедијини вурғуламадан икинҹи сәһифәни ачын. Орада «Мүгәддәс Китабда нә дејилир?» башлығы алтында ҝәтирилән Дәнјал 2:44 вә  7:14 ајәләрини охујун. Инсана мараглыдырса, сөһбәти давам етдирин. Сонда буклетин архасында «Дүшүнүн» башлығы алтындакы «Аллаһын Падшаһлығынын һакимијјәти алтында һәјат неҹә олаҹаг?» суалыны верин. Бу, тәкрар сөһбәт үчүн зәмин јарадаҹаг. Нөвбәти дәфә ҝөрүшәндә дәрс кечмәк үчүн әсас вәсаитләримиздән бири олан «Илаһи мүждә» брошүрүнүн 7-ҹи фәслини арашдыра биләрсиниз.

11. Журналларымыз һансы мәгсәди дашыјыр вә онлар һагда нәји билмәлијик?

¹¹ Журналларымыз. «Ҝөзәтчи гүлләси» вә «Ојанын!» журналлары дүнјада ән чох дилә тәрҹүмә олунан вә ән чох нәшр олунан журналлардыр! Ҝениш күтлә үчүн нәзәрдә тутулан бу журналларын үз габығындакы мөвзу мүхтәлиф әразиләрдә јашајан инсанларын мараг даирәсини нәзәрә алараг тәртиб олунур. Бу журналлардан истифадә едәрәк инсанларын диггәтини һәјатда ән ваҹиб олан шејләрә ҹәмләмәјә көмәк етмәлијик. Амма илк өнҹә онларын кимләр үчүн нәзәрдә тутулдуғуну билмәк лазымдыр.

12. а) «Ојанын!» журналы кимләр үчүн нәзәрдә тутулуб вә нә мәгсәд дашыјыр? б) Бу вәсаитдән истифадә едәрәк һансы јахшы нәтиҹә әлдә етмисиниз?

¹² «Ојанын!» журналы Мүгәддәс Китаб һагда аз мәлуматы олан вә ја үмумијјәтлә мәлуматы олмајан инсанлар үчүн нәзәрдә тутулуб. Бу, Мүгәддәс Китабдакы тәлимләрдән, онун практики фајдасындан хәбәри олмајан, јахуд динә етибар етмәјән инсанлар ола биләр. «Ојанын!» журналынын әсас мәгсәди охуҹулары Аллаһын варлығына әмин етмәкдир (Ром. 1:20; Ибр. 11:6). Һәмчинин о, инсанлара Мүгәддәс Китабы «Аллаһын сөзү кими» гәбул етмәјә көмәк едир (1 Салон. 2:13). 2018-ҹи илдә чыхан үч журнал белә адланыр: «Хошбәхтлик јолу», «Уғурлу аиләнин 12 сирри», «Кәдәрдән гуртулмағын јоллары».

13. а) «Ҝөзәтчи гүлләси»нин күтләви нәшри кимләр үчүн нәзәрдә тутулуб? б) Бу вәсаитдән истифадә едәрәк һансы јахшы нәтиҹә әлдә етмисиниз?

¹³ «Ҝөзәтчи гүлләси» журналы Аллаһа вә Онун Кәламына мүәјјән гәдәр инамы олан инсанлар үчүн нәзәрдә тутулуб. Онларын Мүгәддәс Китаб һагда мәлуматлары олса да, орадакы тәлимләр һагда дәгиг биликләри јохдур (Ром. 10:2; 1 Тим. 2:3, 4). 2018-ҹи илдә ишыг үзү ҝөрән үч журнал белә адланыр: «Төврат, Зәбур, Инҹил бу ҝүн актуалдыр?», «Сизи ҝәләҹәкдә нә ҝөзләјир?», «Аллаһ чәкдијимиз әзаблары ҝөрүр».

14. а) Тәлим вәсаитләримиз арасында јер алан дөрд видео нә үчүн нәзәрдә тутулуб? б) Бу видеолары ҝөстәриб һансы мүсбәт нәтиҹә әлдә етмисиниз?

¹⁴ Видеолар. Иса Мәсиһин дөврүндә дүлҝәрләр јалныз әл аләтләриндән истифадә едирдиләр. Лакин бу ҝүн онларын әлиндә мишар, дрел, јејә, мыхвуран апарат вә саирә кими електрик аләтләр вар. Ејнилә, бизим дә тәлим вәсаитләримизин арасында чап олунмуш нәшрләрдән әлавә, инсанлара ҝөстәрмәк үчүн дөрд ҝөзәл видео вар. Бунлар «Мүгәддәс Китабы өјрәнмәк нәјә ҝөрә ваҹибдир?», «Мүгәддәс Китаб дәрсләри неҹә кечирилир?», «Ибадәт ҝөрүшләримиз неҹә кечирилир?» вә «Јеһованын Шаһидләри. Биз кимик?» адлы видеолардыр. Ики дәгигәдән аз чәкән бу видеолардан илк сөһбәт заманы истифадә етмәк чох еффективдир. Нисбәтән узун видеолары исә вахты оланлара вә јахуд тәкрар сөһбәт етдијимиз инсанлара ҝөстәрә биләрик. Бу мөһтәшәм вәсаитләр инсанлары Мүгәддәс Китабы өјрәнмәјә вә ибадәт ҝөрүшләримизә гатылмаға тәшвиг едә биләр.

15. Ҝөстәрдијимиз видеоларын инсанлара неҹә тәсир етдијинә даир нүмунә чәкин.

¹⁵ Мисал үчүн, бир баҹымыз Микронезијадан көчән бир гадына онун өз ана дили олан Јап дилиндә «Мүгәддәс Китабы өјрәнмәк нәјә ҝөрә ваҹибдир?»  адлы видеону ҝөстәрмишди. Видео башлајан кими гадын демишди: «Инана билмирәм, бу ки мәним доғма дилимдир! Данышығындан билинир ки, мәним јашадығым ададандыр. О, мәним дилимдә данышыр!» Сонра һәмин гадын jw.org сајтында өз дилиндә олан бүтүн нәшрләри охујаҹағыны вә бүтүн видеолара бахаҹағыны демишди. (Һәвариләрин ишләри 2:8, 11 ајәләри илә әлагәләндирин.) Диҝәр бир нүмунәјә нәзәр салаг. Бирләшмиш Штатларда јашајан бир баҹымыз ејни видеонун линкини өз гардашы оғлуна ҝөндәрмишди. Оғлан өз ана дилиндә бахдығы видео барәдә бибисинә белә ҹаваб јазмышды: «Дүнјанын Шејтанын һакимијјәти алтында олмасы фикри хүсусилә диггәтими чәкди. Мүгәддәс Китаб дәрси кечмәк үчүн мүраҹиәт әризәси долдурдум». Бу оғлан фәалијјәтимизин гадаған олундуғу өлкәдә јашајыр!

16. а) «Аллаһын сөзүнә гулаг ас вә әбәдијјән јаша»; б) «Илаһи мүждә» вә ҹ) «Јеһова Аллаһын мүасир халгы» брошүрүнүн өзәллији нәдәдир?

¹⁶ Брошүрләр. Әҝәр инсан охумағы јахшы баҹармырса вә јахуд да онун дилиндә нәшрләримиз јохдурса, һәгигәти она неҹә өјрәдә биләрик? Бизим бунун үчүн дә вәсаитимиз вар. Бу, «Аллаһын сөзүнә гулаг ас вә әбәдијјән јаша» брошүрүдүр *. «Илаһи мүждә» брошүрү Мүгәддәс Китаб дәрсинә башламаг үчүн әла вәсаитдир. Һәмсөһбәтинизә брошүрүн архасындакы 14 мөвзуну ҝөстәриб, һансы мөвзунун онун үчүн мараглы олдуғуну соруша, сонра исә һәмин дәрси арашдыра биләрсиниз. Бу үсулу тәкрар сөһбәт заманы истифадә етмисиниз? Диҝәр вәсаитимиз «Јеһова Аллаһын мүасир халгы» брошүрүдүр. Бу брошүр шаҝирдләри тәшкилатымызла таныш етмәк үчүн нәзәрдә тутулуб. Ондан неҹә истифадә етмәји өјрәнмәк үчүн «Мәсиһи һәјаты вә ибадәти. Иш дәфтәри» вәрәгәсинин 2017-ҹи ил март сајына баха биләрсиниз.

17. а) Һәр бир тәлим китабынын мәгсәди нәдир? б) Артыг вәфтиз олунмасына бахмајараг, һәр бир кәсдән нә ҝөзләнилир вә нә үчүн?

¹⁷ Китаблар. Брошүр васитәсилә Мүгәддәс Китаб дәрсинә башлајандан сонра истәдијиниз вахт «Мүгәддәс Китаб тәлимләри» китабына кечә биләрсиниз. Бу китаб инсанлара Аллаһын Кәламындакы әсас тәлимләр барәдә ҝениш мәлумат верир. Руһани аддымлар атан шаҝирдлә бу дәрс вәсаитиндән сонра «Аллаһын мәһәббәтиндән ајрылмајын» китабыны кечмәк лазымдыр. Бу китаб шаҝирдә Мүгәддәс Китаб принсипләрини ҝүндәлик һәјатда тәтбиг етмәји өјрәдир. Унутмајын ки, шаҝирд һәтта вәфтиз олунса белә, һәр ики китабы ахырадәк арашдырмалыдыр. Бу, она иманда сарсылмаз олмаға көмәк едәҹәк. (Колослулара 2:6, 7 ајәләрини охујун.)

18. а) 1 Тимутијә 4:16 ајәси һәгигәти өјрәдән бизләри нәјә тәшвиг едир вә бу, һансы нәтиҹәләр верир? б) Тәлим вәсаитләрини истифадә едәркән амалымыз нә олмалыдыр?

¹⁸ Јеһованын Шаһидләри олан бизләрә инсанлара әбәди һәјат үмиди верән «һәгигәт хәбәри, јәни мүждә» чатдырмаг иши һәвалә олунуб (Кол. 1:5; 1 Тимутијә 4:16 ајәсини охујун). Бунун үчүн бизә лазым олан һәр ҹүр тәлим вәсаити илә тәҹһиз олунмушуг. (« Тәлим вәсаитләри» адлы чәрчивәјә бахын.) Ҝәлин онлардан мәһарәтлә истифадә етмәк үчүн әлимиздән ҝәләни едәк. Һәр бир тәблиғчи мараг ҝөстәрән шәхсә һансы нәшри вә нә вахт верәҹәјини өзү гәрарлашдыра биләр. Лакин мәгсәдимиз садәҹә нәшрләри пајламаг олмамалыдыр, үстәлик хош хәбәрә мараг ҝөстәрмәјәнләрә нәшр вермәк лазым дејил. Амалымыз сәмими, һәлим, һәгигәтә сусајан инсанлары — «әбәди һәјата апаран јолда јеримәјә мејли оланлары» Мәсиһин шаҝирди кими һазырламагдыр (Һәв. 13:48; Мәт. 28:19, 20).