1. Јеһова бизә һансы үмиди вериб?

 ЈЕҺОВА бизә бәнзәрсиз бир үмид, әбәди һәјат үмиди вериб. Бәзиләри ҝөјдә өлмәз руһани варлыг кими јашамаг үмидинә саһибдир (1 Кор. 15:50, 53). Әксәријјәтимизин исә јер үзүндә там сағлам вә хошбәхт јашамаға үмидимиз вар (Вәһј 21:3, 4). Ҝөјдә вә ја јер үзүндә әбәди јашамаг үмидимиздән асылы олмајараг, биз о дөврү сәбирсизликлә ҝөзләјирик вә бу үмид бизим үчүн чох гијмәтлидир.

2. Үмидимиз нәјә әсасланыр вә нәјә ҝөрә белә дејә биләрик?

² Мүгәддәс Китабда «үмид» сөзү «јахшы бир шејин баш верәҹәјини ҝөзләмәк» мәнасыны верир. Ҝәләҹәјә үмидимизин ҝерчәкләшәҹәјинә там әмин ола биләрик, чүнки бу үмиди верән Јеһовадыр (Ром. 15:13). Биз билирик, О нә вәд едиб вә билирик ки, О, һәмишә сөзүнүн үстүндә дурур (Сај. 23:19). Һәмчинин әминик ки, Јеһова вәд етдији һәр бир шеји јеринә јетирмәји арзулајыр вә буна гадирдир. Буна ҝөрә бизим үмидимиз хүлја вә ја хәјал дејил, бизим үмидимиз ҝерчәкдир, сүбутлара әсасланыр.

3. Бу мәгаләдә нә һагда данышаҹағыг? (Зәбур 27:14).

³ Сәмави Атамыз Јеһова бизи севир вә истәјир ки, Она етибар едәк. (Зәбур 27:14 ајәсини охујун.) Јеһоваја мөһкәм үмид бағласаг, һәм индики, һәм дә ҝәләҹәкдәки чәтинликләрә ҹәсарәтлә вә севинҹлә синә ҝәрәҹәјик. Ҝәлин ҝөрәк үмидимиз бизи неҹә горујур. Әввәла, өјрәнәҹәјик ки, үмид һансы мәнада лөвбәрә вә дәбилгәјә бәнзәјир. Сонра исә үмидимизи мөһкәмләндирмәјин јолларындан данышаҹағыг.

4. Һансы мәнада үмид лөвбәрә бәнзәјир? (Ибраниләрә 6:19).

⁴ Һәвари Булус ибраниләрә јаздығы мәктубунда үмидимизи лөвбәрә бәнзәтмишди. (Ибраниләрә 6:19 ајәсини  охујун.) О, тез-тез ҝәми илә сәфәрә чыхырды вә билирди ки, лөвбәр ҝәмини јериндә сабит сахламаг үчүн истифадә олунур. Бир дәфә о, ҝәмидә оланда ҝүҹлү фыртына гопмушду. Бу заман дәнизчиләрин ҝәминин суалты гајалара чырпылмамасы үчүн дәнизә лөвбәрләр атдығыны ҝөрмүшдү (Һәв. 27:29, 39—41). Лөвбәр ҝәмини сабит сахладығы кими, үмидимиз дә бизә һәјатда үзләшдијимиз сынаглар заманы мөһкәм галмаға, Јеһовадан узаглашмамаға көмәк едир. Мөһкәм үмидимиз сајәсиндә проблемләр заманы биз сакитлијимизи горујуруг, чүнки билирик ки, ҝәләҹәкдә һәр шеј јахшы олаҹаг. Унутмамалыјыг ки, Иса Мәсиһ тәгибләрин олаҹағыны габагҹадан демишди (Јәһ. 15:20). Буна ҝөрә дә Јеһованын вәд етдији ҝөзәл ҝәләҹәк барәдә даима дүшүнмәк бизә көмәк едир ки, Онун јолунда мөһкәм галаг.

5. Өлүмлә үз-үзә оларкән үмиди Исаја неҹә ҝүҹ вермишди?

⁵ Ҝәлин ҝөрәк Исаны гаршыда дәһшәтли өлүм ҝөзләсә дә, үмиди она мөһкәм галмаға неҹә көмәк етмишди. Һәвари Бутрус ерамызын 33-ҹү илинин Әллинҹи ҝүн бајрамында Зәбур китабындан бир пејғәмбәрлији ситат ҝәтирмишди. Һәмин сөзләр Исанын үрәјиндәки раһатлығы вә әминлији чох ҝөзәл тәсвир едир: «Мән үмидлә јашајаҹағам, чүнки Сән мәни Мәзарда гојмазсан, гојмазсан вәфалы бәндән чүрүсүн Һүзурунда үрәјим фәрәһлә долаҹаг» (Һәв. 2:25—28; Зәб. 16:8—11). Иса өләҹәјини билирди, амма онун ҝүҹлү үмиди вар иди. О әмин иди ки, Аллаһ ону дирилдәҹәк вә о, јенидән ҝөјдә Аллаһын һүзурунда олуб, фәрәһ дујаҹаг (Ибр. 12:2, 3).

6. Бир гардаш үмиди барәдә нә демишди?

⁶ Јеһованын вердији үмид бир чох баҹы-гардашлара сынаглара дөзмәјә көмәк едиб. Ҝәлин Инҝилтәрәдә јашајан Леонард Чинн адлы бир садиг гардашын һадисәсинә бахаг. Биринҹи Дүнја мүһарибәси дөврүндә о, һәрби хидмәтдән имтина етдији үчүн һәбс олунмушду. О, ики ај тәкадамлыг камерада галды. Сонра исә ону ағыр ишләр ҝөрмәјә мәҹбур етдиләр. Гардаш белә сөзләр јазмышды: «Башыма ҝәләнләрдән анладым ки, чәтинликләрә дөзмәк үчүн үмид нә гәдәр ваҹибдир. Бизим Иса, һәвариләр вә пејғәмбәрләр кими ҝөзәл нүмунәләримиз вар. Үстәлик, Јеһова бизә дәјәрли вәдләр вериб. Бунларын сајәсиндә инсан ҝәләҹәјә үмидлә бахыр, сынаглара дөзмәјә ҝүҹү олур». Үмид Леонард гардаш үчүн бир лөвбәр иди, бу бизим үчүн дә белә ола биләр.

7. Сынаглар үмидимизи неҹә мөһкәмләндирир? (Ромалылара 5:3—5; Јагуб 1:12).

⁷ Биз сынаглара дөзәндә, Јеһованын бизә неҹә көмәк етдијини ҝөрәндә вә Онун рәғбәтини һисс едәндә үмидимиз мөһкәмләнир. (Ромалылара 5:3—5; Јагуб 1:12 ајәләрини охујун.) Бунун сајәсиндә үмидимиз хош хәбәри илк ешитдијимиз вахтла мүгајисәдә даһа мөһкәм олур. Шејтан бизи сынаглар васитәсилә јыхмаға чалышса да, Јеһованын көмәји сајәсиндә һәр сынагдан башыуҹа чыха биләрик.

8. Һансы мәнада үмид дәбилгәјә бәнзәјир? (1 Салоникилиләрә 5:8).

⁸ Мүгәддәс Китабда үмид һәмчинин дәбилгәјә бәнзәдилир. (1 Салоникилиләрә 5:8 ајәсини охујун.) Дәбилгә әсҝәрин башыны дүшмән зәрбәсиндән горујур. Биз дә руһани мүһарибәдәјик вә зеһнимизи Шејтанын һәмләләриндән горумалыјыг. Чүнки о бизи аздырмаг вә дүшүнҹәмизи корламаг үчүн һәр тәрәфдән һүҹума кечиб.  Дәбилгә әсҝәрин башыны горудуғу кими, үмид дә бизим дүшүнҹәләримизи горујур вә Јеһоваја садиг галмаға көмәк едир.

9. Үмиди олмајан инсанларын һәјаты неҹәдир?

⁹ Әбәди һәјат үмиди бизә көмәк едәҹәк ки, һикмәтлә вә дәрракә илә давранаг. Јох әҝәр үмидимиз зәиф олса вә ағлымыза ҹисмани фикирләр һаким кәсилсә, әбәди һәјат үмидимизи унудаҹағыг. Ҝәлин ҝөрәк гәдим Коринфдә јашајан бәзи мәсиһиләрлә нә баш вермишди. Онлар Аллаһын әсас вәдинә — дирилмә вәдинә иманларыны итирмишдиләр (1 Кор. 15:12). Булус демишди ки, ҝәләҹәјә үмиди олмајан инсанлар јалныз бу ҝүнлә јашајырлар (1 Кор. 15:32). Бизим дөврүмүздәки инсанлар һагда да ејни шеји демәк олар. Онлар Аллаһын вәдләринә үмид етмәдикләринә ҝөрә фикирләри-зикирләри анҹаг кеф чәкмәкдәдир. Биз исә үмидимизи Аллаһын вәд етдији ҝәләҹәјә бағламышыг. Бу үмид бир дәбилгә кими бизим зеһнимизи горујур вә көмәк едир ки, өмрүмүзү-ҝүнүмүзү өз истәкләримизи тәмин етмәјә сәрф етмәјәк. Ахы бу, Јеһова илә мүнасибәтләримизи корлаја биләр (1 Кор. 15:33, 34).

10. Үмид бизи јанлыш фикирләрдән неҹә горуја биләр?

¹⁰ Үмид дәбилгәмиз бизи мәнфи дүшүнҹәдән дә горуја биләр. Бәзиләри елә дүшүнүр ки, Јеһованы һеч вахт разы сала билмәјәҹәкләр. Онлар белә дејир: «Мән һеч вахт әбәди һәјаты аланларын сырасында олмајаҹағам. Чүнки буна лајиг дејиләм. Һеч вахт Јеһованын истәдији кими инсан ола билмәјәҹәјәм». Әјјуб пејғәмбәрин сахта досту Әлифәз Әјјубун ағлына буна бәзәр фикирләр јеритмәјә чалышырды. Әлифәз демишди: «Фани инсан нәдир ки, тәмиз олсун?» Сонра исә Аллаһ һагда белә демишди: «Бах, О, мәләкләринә белә, ҝүвәнмир, һәтта ҝөјләр Онун ҝөзүндә пак дејил» (Әјј. 15:14, 15). Јалана бир бах! Унутмајын ки, сизин бу ҹүр дүшүнмәјинизи Шејтан истәјир. О билир ки, сиз бу ҹүр фикирләшсәниз, ҝетдикҹә үмидинизи итирәҹәксиниз. Буна ҝөрә дә бу ҹүр јанлыш фикирләри ағлыныза јахын бурахмајын, әксинә, фикринизи Јеһованын вәдләринә ҹәмләјин. Јеһова истәјир ки, сиз әбәди јашајасыныз вә бу мәгсәдинизә чатмаг үчүн сизә көмәк едәҹәк. Гәтијјән буна шүбһә етмәјин! (1 Тим. 2:3, 4).

11. Ҝәләҹәјә үмидимизин ҝерчәкләшәҹәјини ҝөзләдијимиз мүддәтдә нәјә ҝөрә сәбирли олмалыјыг?

¹¹ Үмидимизи мөһкәм сахламаг һәмишә асан олмур. Ола биләр ки, Аллаһын Өз вәдләрини јеринә јетирмәсини ҝөзләмәјә сәбримиз чатмаз. Амма Јеһова вар олуб вә олаҹаг, буна ҝөрә Онун заманла бағлы анлајышы бизимкиндән фәргләнир (2 Бут. 3:8, 9). О Өз вәдләринин һамысыны јеринә јетирәҹәк, амма ола билсин, буну бизим ҝөзләмәдијимиз вахтда етсин. Бәс бизә Јеһованын Өз вәдләрини һәјата кечирәҹәји вахты сәбирлә ҝөзләмәјә вә бу вахт әрзиндә үмидимизи мөһкәм сахламаға нә көмәк едә биләр? (Јаг. 5:7, 8).

12. Ибраниләрә 11:1, 6 ајәләринә әсасән, үмидлә иман бир-бири илә неҹә бағлыдыр?

¹² Үмидимизи мөһкәм сахламаг үчүн бизим Јеһова илә јахын мүнасибәтимиз олмалыдыр. Чүнки үмидимизи О ҝерчәкләшдирәҹәк. Мүгәддәс Китабда ҝөстәрилир ки, үмидлә иман бир-бири илә сых бағлыдыр. Әҝәр биз Аллаһын «варлығына вә Ону ҹидд-ҹәһдлә ахтаранлара мүкафат вердијинә» инансаг, үмидимиз дә мөһкәм олаҹаг. (Ибраниләрә 11:1, 6 ајәләрини охујун.) Јеһова бизим үчүн нә гәдәр ҝерчәк олса, Онун вәдләрини һәјата кечирәҹәјинә әминлијимиз бир о гәдәр мөһкәм олаҹаг.  Ҝәлин ҝөрәк Јеһова илә мүнасибәтимизи һансы үсулларла мөһкәмләндирә биләрик. Чүнки Онунла мүнасибәтимиз мөһкәм олса, үмидимиз дә мөһкәм олаҹаг.

13. Аллаһла јахын мүнасибәти неҹә гура биләрик?

¹³ Јеһоваја дуа един вә Кәламыны охујун. Биз Јеһованы ҝөрә билмәсәк дә, Онунла јахын мүнасибәт гурмағымыз мүмкүндүр. Биз дуа едәндә Онунла данышырыг вә әминик ки, О бизә гулаг асыр (Әрм. 29:11, 12). Аллаһын Кәламыны охујуб, үзәриндә дүшүнәндә исә Онун сәсинә гулаг асырыг. Онун Кәламындан кечмишдәки садиг хидмәтчиләринә неҹә дајаг олдуғу һагда охујанда үмидимиз даһа да ҝүҹләнир. Мүгәддәс Китабда «јазыланларын һамысы бизә нәсиһәт олараг јазылыб ки, дөзүм сајәсиндә вә Мүгәддәс Јазылардан алдығымыз тәсәлли сајәсиндә үмидимиз олсун» (Ром. 15:4).

14. Јеһованын Өз хидмәтчиләри үчүн етдикләри барәдә дүшүнмәјин һансы фајдасы вар?

¹⁴ Јеһованын Өз вәдләрини неҹә јеринә јетирдији барәдә дүшүнүн. Ҝәлин Јеһованын Ибраһим пејғәмбәрлә Сара үчүн нәләр етдијини хатырлајаг. Онлар елә јаша чатмышдылар ки, артыг ушаг саһиби ола билмәздиләр. Амма Јеһова онлара вәд етмишди ки, өвладлары олаҹаг (Јар. 18:10). Ибраһим пејғәмбәр буна неҹә јанашды? Мүгәддәс Китабда јазылыб: «[Ибраһим] иман етди ки, чохлу халгларын атасы олаҹаг» (Ром. 4:18). Инсан бахышы илә белә бир вәдин јеринә јетмәси гејри-мүмкүн ҝөрүнүрдү, амма Ибраһим пејғәмбәр бунун ҝерчәкләшәҹәјинә там әмин иди. Онун үмиди боша чыхмады (Ром. 4:19—21). Бу һадисәләрдән өјрәнирик ки, Јеһованын вәдләрини јеринә јетирәҹәјинә һәмишә әмин ола биләрик, һәтта вәзијјәт бизим үчүн мүмкүнсүз ҝөрүнсә белә.

15. Нәјә ҝөрә Јеһованын бизим үчүн етдикләри барәдә дүшүнмәлијик?

 ¹⁵ Јеһованын сизин үчүн етдикләри барәдә дүшүнүн. Јеһованын Кәламындакы һансы вәдләрин өз һәјатынызда ҝерчәкләшдијини ҝөрмүсүнүз? Мәсәлән, Иса сөз вермишди ки, Јеһова бизи зәрури шејләрлә тәмин едәҹәк (Мәт. 6:32, 33). О һәмчинин демишди ки, Јеһовадан мүгәддәс руһ истәјәндә О бизә верәҹәк (Лука 11:13). Јеһова вердији бу сөзләрин үстүндә дуруб. Бәлкә дә, Јеһованын башга вәдләринин дә јеринә јетдијини ҝөрмүсүнүз. Мәсәлән, сизи бағышлајаҹағы, сизә тәсәлли верәҹәји вә руһани ҹәһәтдән гидаландыраҹағы илә бағлы вердији вәдләри хатырлаја биләрсиниз (Мәт. 6:14; 24:45; 2 Кор. 1:3). Јеһованын сизин үчүн артыг нәләр етдији барәдә дүшүнмәк көмәк едәҹәк ки, Онун ҝәләҹәклә бағлы вердији вәдләрә мөһкәм үмидиниз олсун.

16. Нәјә ҝөрә үмиди дәјәрли бәхшишә бәнзәтмәк олар?

¹⁶ Әбәди һәјат үмиди Јеһованын бизә вердији гијмәтли бәхшишдир. Бу мөһтәшәм һәјаты һәсрәтлә ҝөзләјирик. Бу вәдин ҝерчәкләшәҹәјинә әмин ола биләрик. Үмид бир лөвбәр кими бизә сынагларла, тәгибләрлә вә өлүм тәһлүкәси илә үзләшәндә мөһкәм галмаға көмәк едир. Һәмчинин о, дәбилгә кими дүшүнҹәмизи горујур, јанлыш әмәлләрдән узаг олуб, дүзҝүн давранмаға көмәк едир. Мүгәддәс Китаба әсасланан үмидимиз сајәсиндә биз Јеһоваја јахынлашырыг. Һәмчинин бу үмид Јеһованын бизә олан дәрин мәһәббәтини ҝөстәрир. Әҝәр үмидимизи мөһкәм сахласаг, бунун бөјүк хејрини ҝөрәҹәјик.

17. Нәјә ҝөрә үмидимиз бизә һәмишә севинҹ ҝәтирир?

¹⁷ Һәвари Булус ромалылара мәктубунда «үмидинизә севинин» сөзләрини јазмышды (Ром. 12:12). Булус әмин иди ки, садиг галса, ҝөјләр һәјатыны алаҹаг. Бу үмид она севинҹ ҝәтирирди. Биз дә үмидимизә севинә биләрик, чүнки әминик ки, Јеһова Өз вәдләрини јеринә јетирәҹәк. Мәзмурчу јазмышды: «Хошбәхтдир о кәс ки,.. үмиди Аллаһы Јеһовадыр. О Аллаһ ки һәмишә сәдагәтлидир» (Зәб. 146:5, 6).