1. Иса Мәсиһ сонун нә вахт ҝәләҹәји илә бағлы шаҝирдләринә нә демишди вә һансы нәсиһәти вермишди?

 ИСА МӘСИҺИН өлүмүндән бир нечә ҝүн әввәл дөрд шаҝирди ондан сорушмушду: «О дөврүн јекунуна әламәт нә олаҹаг?» (Мәт. 24:3). Ҝөрүнүр, шаҝирдләр өјрәнмәк истәјирди ки, Јерусәлимин вә мәбәдин дағылмаг үзрә олдуғуну неҹә мүәјјән едә биләрләр. Иса онларын суалына ҹаваб верәрәк нәинки Јерусәлимин, һәмчинин јашадығымыз «дөврүн јекуну» барәдә данышмышды. Сонун нә вахт ҝәләҹәји илә бағлы исә о белә демишди: «О ҝүнү вә сааты һеч кәс билмир: нә ҝөјдәки мәләкләр, нә дә Оғул. Буну јалныз Ата билир». Сонра шаҝирдләринин һамысына бәрк-бәрк тапшырды ки, ојаг галсынлар (Марк 13:32—37).

2. Нәјә ҝөрә биринҹи әсрдәки мәсиһиләрин сәрвахт олмасы ваҹиб иди?

² Биринҹи әсрдәки јәһуди мәсиһиләр сәрвахт олмалы идиләр. Чүнки һәјатлары бундан асылы иди. Иса давамчыларына Јерусәлимин дағылмаг үзрә олдуғуну неҹә мүәјјән едәҹәкләри барәдә белә демишди: «Гошунларын Јерусәлими мүһасирәјә алдығыны ҝөрәндә билин ки, о, тезликлә виран олаҹаг». Һәмин вахт онлар Исанын хәбәрдарлығына итаәт едиб дағлара гачмалы идиләр (Лука 21:20, 21). Ромалылар Јерусәлими ишғал едән заман Исанын сөзүнә әмәл едәнләр хилас олдулар.

3. Бу мәгаләдә һансы суаллары мүзакирә едәҹәјик?

³ Биз бу шәр дүнјанын сонунда јашајырыг. Она ҝөрә дә ајыг дуруб, сәрвахт олмалыјыг. Бу мәгаләдә биз нөвбәти  суаллары мүзакирә едәҹәјик: «Дүнјада баш верән һадисәләри диггәтлә мүшаһидә едәркән неҹә таразлы ола биләрик? Өзүмүзә фикир вермәк нә демәкдир? Бу дүнјанын сонуна гәдәр галан вахтымызын гәдрини билдијимизи неҹә ҝөстәрә биләрик?»   

4. Мүгәддәс Китабдакы пејғәмбәрликләрин бу ҝүн неҹә јеринә јетдијини нәјә ҝөрә мүшаһидә етмәлијик?

⁴ Дүнјада баш верән һадисәләрин пејғәмбәрликләрин иҹрасы илә неҹә бағлы олдуғуну мүшаһидә етмәјимиз әбәс јерә дејил. Иса Мәсиһ Шејтан дүнјасынын сона јахынлашдығыны билмәјимизә көмәк едән бир сыра конкрет һадисәләри садаламышды (Мәт. 24:3—14). Һәвари Бутрус исә бизи тәшвиг етмишди ки, иманда мөһкәм галмаг үчүн пејғәмбәрликләрин неҹә јеринә јетдијинә фикир верәк (2 Бут. 1:19—21). Мүгәддәс Китабын сонунҹу бөлмәси белә сөзләрлә башлајыр: «Иса Мәсиһдән ҝәлән вәһј. Аллаһ тезликлә баш верәҹәк һадисәләри гулларына ҝөстәрмәк үчүн бу вәһји Исаја верди» (Вәһј 1:1). Бу сәбәбдән һал-һазырда дүнјада баш верән һадисәләр бизим үчүн чох мараглыдыр. Биз баш верән һадисәләрин пејғәмбәрликләрин иҹрасы илә неҹә бағлы олдуғуну билмәк истәјирик. Буна ҝөрә дә, ола билсин, бунлары бир-биримизлә мүзакирә етмәјә ҹан атаг.

5. Нә етмәлијик вә нә етмәмәлијик? (Һәмчинин шәкилләрә бахын.)

⁵ Амма пејғәмбәрликләри мүзакирә едәркән өз фәрзијјәләримизи ирәли сүрмәмәлијик. Чүнки јығынҹагда бирлији позаҹаг фикирләр јајмаг истәмирик. Мәсәлән, ола билсин, ешидирик ки, дүнја лидерләри һансыса мүнагишәни һәлл етмәк, сүлһ вә тәһлүкәсизлик јаратмаг барәдә данышырлар. Јахшы олар ки, онларын бу сөзләри илә 1 Салоникилиләрә 5:3 ајәсиндәки пејғәмбәрлијин јеринә јетдијини иддиа етмәјәк, әксинә, нәшрләримиздә дәрҹ олунан сон мәлуматлардан хәбәрдар олаг. Сөһбәтләримиз Јеһованын тәшкилатынын дәрҹ етдији мәлуматлара әсаслананда јығынҹагда бирлик олур, һәмфикир олуруг (1 Кор. 1:10; 4:6).

6. 2 Бутрус 3:11—13 ајәләриндән нә өјрәнирик?

⁶ 2 Бутрус 3:11—13 ајәләрини охујун. Һәвари Бутрусун сөзләри бизә пејғәмбәрликләри арашдыраркән мәгсәдимизи унутмамаға көмәк едир. О дејир ки, «Јеһованын ҝүнүнү бәрк-бәрк јадда» сахламалыјыг. Нә үчүн? Мәгсәдимиз Армаҝеддонун ҝәләҹәји ҝүнү вә сааты мүәјјән етмәк дејил. Биз истәјирик ки, о ҝүн јетишәнә гәдәр «мүгәддәс јашајыш вә мөминлик»лә өмүр сүрәк (Мәт. 24:36; Лука 12:40). Башга сөзлә, биз истәјирик ки, әмәлләримиз дүз олсун вә хидмәтдә етдијимиз һәр бир шеј Јеһоваја севҝидән ирәли ҝәлсин. Буну унутмамаг үчүн өзүмүзә һәмишә фикир вермәлијик.

7. Иса Мәсиһин мәсләһәтинә неҹә әмәл едә биләрик? (Лука 21:34, 35).

⁷ Иса Мәсиһ Лука 21:34, 35 ајәләриндә шаҝирдләринә ваҹиб нәсиһәт вермишди: «Өзүнүзә фикир верин». (Ајәләри охујун.) Бу сөзләрлә о ҝөстәрмишди ки, онлар тәкҹә ахырзаманын әламәтләринә јох, һәмчинин өзләринә дә фикир вермәлидирләр. Өзүмүзә фикир вермәк о демәкдир ки, биз Јеһова илә мүнасибәтләримизә хәләл ҝәтирәҹәк истәнилән тәһлүкәни сезмәли  вә ондан узаг дурмалыјыг. Онда Аллаһын мәһәббәтиндән ајрылмајаҹағыг (Мәс. 22:3; Јһд. 20, 21).

8. Һәвари Булус мәсиһиләрә һансы нәсиһәти вермишди?

⁸ Һәвари Булус да мәсиһиләрә өзләринә фикир вермәји нәсиһәт етмишди. Мәсәлән, о, Ефесдәки мәсиһиләрә демишди: «Диггәтли олун, дүшүнҹәсизләр кими јох, мүдрикләр кими һәрәкәт един» (Ефес. 5:15, 16). Шејтан бизим Јеһова илә достлуғумузу һәдәф алыб. Буна ҝөрә дә Мүгәддәс Китаб бизә мәсләһәт ҝөрүр ки, Јеһованын ирадәсини даима гаврајаг. Бунун сајәсиндә өзүмүзү Шејтанын һүҹумларындан горујаҹағыг (Ефес. 5:17).

9. Јеһованын ирадәсини неҹә гавраја биләрик?

⁹ Мүгәддәс Китабда Јеһова илә достлуғумуза хәләл ҝәтирәҹәк һәр тәһлүкә барәдә јазылмајыб. Чох вахт биз елә мәсәләләр барәдә гәрар вермәли олуруг ки, Мүгәддәс Китабда о мөвзулара һеч тохунулмајыб. Һикмәтли гәрарлар вермәк үчүн биз «Јеһованын ирадәсини» гаврамалыјыг. Бунун үчүн Онун Кәламыны мүнтәзәм мүталиә етмәлијик вә охудугларымызын үзәриндә дәриндән дүшүнмәлијик. Јеһованын ирадәсини гаврадыгҹа вә «Мәсиһин дүшүнҹәсинә» саһиб олдугҹа, верәҹәјимиз гәрарла бағлы һеч бир ҝөстәриш олмаса белә, «мүдрикләр кими» һәрәкәт едәҹәјик (1 Кор. 2:14—16). Елә тәһлүкәләр вар ки, онлары мүәјјән етмәк нисбәтән асандыр. Бәзи тәһлүкәләри исә сезмәк чәтин олур.

10. Һансы тәһлүкәләрдән гачмалыјыг?

¹⁰ Гачмалы олдуғумуз бәзи тәһлүкәләрә бунлар дахилдир: флирт, сәрхошлуг, гарынгулулуг, аҹыдил олмаг, зоракы әјләнҹәләр, порнографијаја бахмаг вә бу кими диҝәр шејләр (Зәб. 101:3). Дүшмәнимиз Шејтан Иблис Јеһова илә достлуғумуза хәләл ҝәтирмәк үчүн дурмадан фүрсәт ахтарыр (1 Бут. 5:8). Әҝәр ајыг олмасаг, Шејтан дүшүнҹәләримизә вә үрәјимизә пахыллығын, надүрүстлүјүн, тамаһкарлығын, нифрәтин, тәкәббүрүн вә кинин тохумларыны сәпә биләр (Гал. 5:19—21). Әввәл-әввәл бунлар өзүнү елә дә ҝүҹлү бүрузә вермәјә биләр, амма онлары дәрһал көкүндән гопартмасаг, онлар зәһәрли битки кими бөјүмәјә давам едәҹәк вә ҹидди фәсадлар төрәдәҹәк (Јаг. 1:14, 15).

11. Илк бахышдан сезилмәјән һансы тәһлүкәдән гачмалыјыг вә нәјә ҝөрә?

¹¹ Тәһлүкәләрдән бири дә пис достлугдур. Ҝәлин белә бир вәзијјәтә бахаг. Сиз мәсиһи олмајан бир нәфәрлә ишләјирсиниз. Истәјирсиниз онда Јеһованын Шаһидләри һагда јахшы тәәссүрат јарадасыныз. Буна ҝөрә дә онунла меһрибан давранырсыныз, она көмәк едирсиниз. Әввәл-әввәл бу иш јолдашынызла һәрдәнбир, чох кечмәмиш исә мүнтәзәм наһар етмәјә башлајырсыныз. Бәзән о, әхлагсыз мөвзулардан сөз ачыр. Тәзә-тәзә бу сизин хошунуза ҝәлмир. Амма мүәјјән вахтдан сонра бу сөһбәтләр сизин үчүн адиләшир. Бир ҝүн о, ишдән сонра сизи ички ичмәјә дәвәт едир вә сиз дәвәти гәбул едирсиниз. Тәдриҹән онун кими дүшүнмәјә башлајырсыныз. Чох кечмәмиш сиз иш јолдашыныз кими давранмаға башлајаҹагсыныз. Дүздүр, биз һамы илә меһрибан вә һөрмәтҹил давранмалыјыг. Ејни заманда унутмамалыјыг ки, вахт кечирдијимиз инсанлар бизә ҝүҹлү тәсир ҝөстәрир (1 Кор. 15:33). Әҝәр биз Исанын да дедији кими, өзүмүзә фикир версәк, Јеһованын әхлаг нормаларына ујғун јашамајан инсанларла лазымсыз үнсијјәтдән узаг дураҹағыг  (2 Кор. 6:15). Онда биз тәһлүкәни ҝөрүб, ондан гачаҹағыг.

12. Исанын шаҝирдләри Јерусәлимин вә мәбәдин мәһвини ҝөзләдикләри мүддәтдә нә етмәли идиләр?

¹² Исанын шаҝирдләри садәҹә отуруб Јерусәлимин вә мәбәдин мәһвини ҝөзләмәмәли идиләр. Иса онлара ҹидди бир иш тапшырмышды. Онлар «Јерусәлимдә, бүтүн Јәһудијјәдә вә Сәмәријјәдә, һәтта јерин уҹгарларынадәк» хош хәбәри тәблиғ етмәли идиләр (Һәв. 1:6—8). Исанын шаҝирдләринә һәгигәтән дә бөјүк бир иш тапшырылмышды. Онлар вахтларынын гәдрини билдикләрини өзләрини бу ишә һәср етмәклә ҝөстәрдиләр.

13. Нәјә ҝөрә вахтымызын гәдрини билмәлијик? (Колослулара 4:5).

¹³ Колослулара 4:5 ајәсини охујун. Өзүмүзә фикир вермәк үчүн вахтымыздан неҹә истифадә етдијимизи дә ҝөтүр-гој етмәлијик. Һамымызын башына тәсадүфән нә исә ҝәлә биләр (Ваиз 9:11). Һәтта, гәфилдән өлә биләрик.

14, 15. Вахтын гәдрини билдијимизи неҹә ҝөстәририк? (Ибраниләрә 6:11, 12). (Һәмчинин шәклә бахын.)

¹⁴ Биз Јеһованын ирадәсини јеринә јетирмәклә вә Онунла достлуғумузу мөһкәмләндирмәклә вахтымыздан мүдрик истифадә  етмиш олуруг (Јәһ. 14:21). Биз мәтин галмалы, сарсылмаз олмалы, һәмишә Рәббин ишиндә чох чалышмалыјыг (1 Кор. 15:58). Онда истәр бизим һәјатымызын, истәрсә дә бу шәр дүнјанын сону ҝәләндә һеч нәјә ҝөрә пешман олмајаҹағыг (Мәт. 24:13; Ром. 14:8).

¹⁵ Бу ҝүн дә Иса Аллаһын Падшаһлығы һаггындакы хош мүждәни бүтүн дүнјада тәблиғ едән шаҝирдләринә ҝөстәришләр верир. О өз үзәринә дүшәни едир. Јеһованын тәшкилаты васитәсилә Иса бизә тәблиғ етмәји өјрәдир вә хош хәбәри јајмаг үчүн лазым олан вәсаитләрлә тәмин едир (Мәт. 28:18—20). Тәблиғ вә шаҝирд һазырламаг ишиндә әлимиздән ҝәләни етмәклә вә бу дөврүн јекунуна кими ајыг галмагла биз дә өз үзәримизә дүшән иши иҹра етмиш олуруг. Ибраниләрә 6:11, 12 ајәләриндәки мәсләһәти тәтбиг етмәклә үмидимизи ахырадәк мөһкәм сахлајаҹағыг. (Ајәләри охујун.)

16. Нәјә гәтијјәтли олмалыјыг?

¹⁶ Јеһова Шејтан системини мәһв едәҹәји ҝүнү вә сааты артыг тәјин едиб. О ҝүн ҝәләндә Јеһова Кәламында јаздырдығы бүтүн пејғәмбәрликләри јеринә јетирәҹәк. Бәзән елә дүшүнә биләрик ки, бу дөврүн јекуну ҝеҹикир. Амма бу белә дејил. Јеһованын ҝүнү «ҝеҹикмәјәҹәк»! (Һәб. 2:3). Одур ки, ҝәлин бундан сонра да ҝөзүмүзү Јеһоваја дикәк, «гуртулуш верән Аллаһы сәбирлә» ҝөзләјәк (Мик. 7:7).