1. Мүгәддәс Јазыларын Иса үчүн ваҹиб олдуғуну нә ҝөстәрир?

 БИР тәсәввүр един, Исанын өјрәтдикләрини динләмәк неҹә мөһтәшәм иди! О, әзбәрдән Мүгәддәс Китабдан чохлу ситатлар ҝәтирирди. Белә ки, Исанын һәм вәфтиздән сонра дедији илк сөзләр, һәм дә өлүм ајағында оларкән дедији сон сөзләр Мүгәддәс Јазылардан ситат иди b (Ган. 8:3; Зәб. 31:5; Лука 4:4; 23:46). Бу ики һадисә арасындакы үч ил јарым әрзиндә дә Иса тез-тез һамынын гаршысында Мүгәддәс Китабы охујур, орадан ситат ҝәтирир вә изаһ едирди (Мәт. 5:17, 18, 21, 22, 27, 28; Лука 4:16—20).

2. Нәјин сајәсиндә Иса бөјүдүкҹә Мүгәддәс Јазылары даһа јахшы баша дүшүрдү? (Үз габығындакы шәклә бахын.)

² Хидмәтә башламаздан узун илләр әввәл Иса Мәсиһ Аллаһын Кәламыны дәфәләрлә һәм өзү охумушду, һәм дә башгаларындан ешитмишди. Евдә, һәр һалда, Мәрјәмлә Јусиф ҝүндәлик сөһбәтләри заманы Мүгәддәс Јазылардан ситатлар ҝәтирирдиләр c (Ган. 6:6, 7). Шүбһә јохдур ки, Иса һәр шәнбә аиләси илә синагога ҝедирди (Лука 4:16). Јәгин, орада Мүгәддәс Јазыларын гираәтинә диггәтлә гулаг асырды. Вахт кечдикҹә Мүгәддәс Јазылары өзү дә охумағы өјрәнди. Беләҹә, Иса Мүгәддәс Јазылара јахшы бәләд олмагла јанашы, онлары севди. Һәмчинин охудугларына әмәл дә едирди. Мәсәлән, ҝәлин онун ҹәми 12 јашы оланда мәбәддә баш верән һадисәни јадымыза салаг. Мусанын ганунуну әлләринин ичи кими билән  мүәллимләр Исанын «зәкасына вә ҹавабларына валеһ» олмушдулар (Лука 2:46, 47, 52).

3. Бу мәгаләдә нәји мүзакирә едәҹәјик?

³ Ејнилә биз дә Аллаһын Кәламыны мүнтәзәм охумағын сајәсиндә она даһа јахшы бәләд олаҹағыг вә ону севәҹәјик. Бәс охудугларымыздан даһа чох бәһрәләнмәк үчүн нә едә биләрик? Исанын Гануну биләнләрә, мәсәлән, мирзәләрә, фәрисиләрә, саддукиләрә дедији сөзләрдән чох шеј өјрәнә биләрик. Онлар гәдәр Мүгәддәс Јазылары охујан јох иди, ди ҝәл, нә фајда! Исанын сөзләриндән ҝөрмәк олар ки, онлар һансы үч шеји етмирдиләр. Онун дедикләри бизә көмәк едәҹәк ки, 1) охудугларымызы баша дүшәк, 2) руһани хәзинә тапаг вә 3) Аллаһын Кәламынын бизи формалашдырмасына изин верәк.

4. Лука 10:25—29 ајәләриндән Аллаһын Кәламыны охумагла бағлы нә өјрәнирик?

⁴ Биз Аллаһын Кәламындан охудугларымызын мәнасыны баша дүшмәк истәјирик. Әкс һалда, охудугларымызын бизә аз фајдасы олаҹаг. Мәсәлән, ҝәлин Исанын бир гануншүнасла сөһбәтини јадымыза салаг. (Лука 10:25—29 ајәләрини охујун.) Гануншүнас Исадан сорушур ки, әбәди һәјаты алмаг үчүн нә етмәлидир. Иса да онун диггәтини Аллаһын Кәламына јөнәлдәрәк белә дејир: «Ганунда нә јазылыб? Неҹә баша дүшүрсән?» Гануншүнас Мүгәддәс Јазылардан Аллаһы вә башгаларыны севмәклә бағлы ситат ҝәтирир. Онун ҹавабы дүз иди (Лав. 19:18; Ган. 6:5). Амма ҝөрүн о, даһа сонра нә дејир: «Бәс мән кими севмәлијәм?» Бу сөзләрлә гануншүнас ҝөстәрди ки, әслиндә, о охудугларынын мәғзини баша дүшмүр. Елә буна ҝөрә дә бу ајәләри һәјатында дүзҝүн шәкилдә тәтбиг едә билмирди.

5. Дуа етмәк вә арамла охумаг охудугларымызы даһа јахшы баша дүшмәјә неҹә көмәк едә биләр?

⁵ Аллаһын Кәламыны даһа јахшы баша дүшмәк үчүн мүәјјән вәрдишләрә јијәләнмәлијик. Нөвбәти мәсләһәтләр сизә бу саһәдә көмәк едәҹәк. Охумаздан габаг дуа един. Мүгәддәс Јазылары баша дүшмәк үчүн бизә Јеһованын көмәји лазымдыр. Буна ҝөрә дә Ондан мүгәддәс руһ диләјин ки, фикринизи ҹәмләмәјә көмәк етсин. Сонра арамла охујун. Беләҹә, охудугларынызы даһа јахшы гаврајаҹагсыныз. Мәсәлән, Мүгәддәс Китабы уҹадан охумаг, јахуд аудиојазысына гулаг асараг изләмәк олар. Һәмин вахт һәм ҝөз, һәм дә гулаг ишә дүшүр вә беләҹә, охудугларыныз үрәјинизә вә бејнинизә һәкк олунур (Јуш. 1:8). Охујуб гуртаранда исә јенидән дуа един, Јеһоваја Кәламына ҝөрә миннәтдарлығынызы билдирин вә охудугларынызы тәтбиг етмәк үчүн көмәк истәјин.

6. Мүталиә заманы өзүмүзә суаллар вермәјин вә гыса гејдләр апармағын һансы фајдасы вар? (Һәмчинин шәклә бахын.)

⁶ Мүгәддәс Китабдан охудугларынызы баша дүшмәјә даһа ики мәсләһәт көмәк едә биләр. Охудугҹа өзүнүзә суаллар верин: «Бурада, әсасән, сөһбәт кимләрдән ҝедир? Данышан кимдир? Киминлә данышыр? Нә үчүн белә дејир? Һадисә һарада, нә вахт баш верир?» Бу кими суаллар сизә көмәк едәҹәк ки, әсас фикри тута биләсиниз. Һәмчинин охудугҹа гыса гејдләр апарын. Гејдләр апаранда фикирләри сөзләрә чевирмиш олуруг. Беләҹә, бејнимиздәки фикирләр бизә даһа ајдын олур. Јазмаг һәмчинин охудугларымызы јадда сахламаға көмәк  едир. Нә кими гејдләр апармаг олар? Мәсәлән, гыса суаллары, арашдырма заманы тапдыгларынызы, әсас фикирләрин мәҹмусуну, өјрәндикләринизин тәтбигини вә ја садәҹә олараг өз һиссләринизи јаза биләрсиниз. Бу ҹүр гејдләр апармағын сајәсиндә Аллаһын Өз Кәламыны шәхсән сизә үнванладығыны һисс едәҹәксиниз.

7. Мүгәддәс Китабы охујанда биздә һансы хүсусијјәт олмалыдыр вә нәјә ҝөрә? (Мәтта 24:15).

⁷ Иса Мәсиһ демишди ки, Аллаһын Кәламыны охујан заман ону дәрк етмәлијик. Бунун үчүн исә бәсирәт лазымдыр. (Мәтта 24:15 ајәсини охујун.) Бәсирәт нәдир? Бу, фикирләрин бир-бири илә әлагәсини, јахуд арасындакы тәзады ајырд етмәк вә илк бахышдан сезилмәјәни ҝөрмәк габилијјәтидир. Иса Мәсиһин сөзләриндән ҝөрмәк олар ки, Аллаһын Кәламындакы пејғәмбәрликләрин неҹә јеринә јетдијини анламаг үчүн дә бизә бәсирәт лазымдыр. Һәмчинин бу хүсусијјәтин сајәсиндә биз Мүгәддәс Китабдан охудуғумуз һәр кәлмәдән там шәкилдә бәһрәләнә биләҹәјик.

8. Бәсирәтлә охумаг нә демәкдир?

⁸ Јеһова хидмәтчиләринә бәсирәт верир. Одур ки, Она дуа един вә бу хүсусијјәти јетишдирмәкдә сизә көмәк етмәсини хаһиш един (Мәс. 2:6). Бәс дуаныза ујғун давранмаг үчүн нә етмәлисиниз? Охудугларынызы диггәтлә тәһлил един. Өјрәндикләринизи артыг билдијиниз фикирләрлә әлагәләндирин. Бу саһәдә сизә арашдырма апармаг үчүн олан нәшрләримиз, мәсәлән, «Јеһованын Шаһидләринин нәшрләри үзрә ахтарыш» вәсаити көмәк едә биләр. Бу нәшрләрин көмәји илә Мүгәддәс Китабдан охудуғунуз парчаны даһа јахшы баша дүшәҹәксиниз вә һәјатыныза тәтбиг едә биләҹәксиниз (Ибр. 5:14). Бәсирәтли олмағын сајәсиндә Мүгәддәс Китабдан охудугларынызы даһа јахшы баша дүшәҹәксиниз.

9. Саддукиләр Мүгәддәс Јазылардакы һансы һәгигәтә әһәмијјәт вермәмишдиләр?

⁹ Саддукиләр Төврата дахил олан беш китабы, аз гала, әзбәр билирдиләр. Амма орадакы ваҹиб һәгигәтләри ҝөрмәздән ҝәлирдиләр. Ҝөрүн саддукиләр Исаја дирилмә илә бағлы суал верәндә о неҹә ҹаваб вермишди: «Мәҝәр Мусанын китабында, кол һаггындакы әһвалатда Аллаһын Мусаја: “Мән Ибраһимин Аллаһы, Исһагын Аллаһы вә Јагубун Аллаһыјам”,— дедијини һеч охумамысыныз?» (Марк 12:18, 26). Әлбәттә ки, саддукиләр бу һадисәни дәфәләрлә охумушдулар. Амма Исанын суалы онларын ваҹиб һәгигәтә — дирилмә тәлиминә әһәмијјәт вермәдијини үзә чыхарды (Марк 12:27; Лука 20:38) d.

10. Охујан заман нәјә диггәт јетирмәлијик?

¹⁰ Бурадан нә өјрәнирик? Охујаркән ҝөзүмүзү дөрд ачмалыјыг ки, бизә өјүд-нәсиһәт верән һеч бир ајәни вә ја һадисәни нәзәрдән гачырмајаг. Әсас тәлимләри баша дүшмәклә кифајәтләнмәмәлијик, илк бахышдан ҝөрүнмәјән дәрин һәгигәтләри вә принсипләри тапмаға чалышмалыјыг.

11. 2 Тимутијә 3:16, 17 ајәләринә әсасән, Мүгәддәс Китабдакы хәзинәләри неҹә тапа биләрсиниз?

¹¹ Мүгәддәс Китабы охујаркән руһани хәзинәни неҹә тапмаг олар? 2 Тимутијә 3:16, 17 ајәләриндә јазыланлара нәзәр салын. (Ајәләри охујун.) Диггәт јетирин ки, «Мүгәддәс Јазылардакы һәр кәлмә» 1) тәлим, 2) тәнбеһ, 3) ислаһ вә 4) тәрбијә үчүн фајдалыдыр. Һәтта тез-тез мүраҹиәт етмәдијимиз Мүгәддәс Китаб бөлмәләриндән дә бу дөрд фајданы әлдә едә биләрик. Охудуғунуз һиссәни тәһлил един, ҝөрүн орадан Јеһова, Онун нијјәти, јахуд принсипләр һагда һансы тәлими алырсыныз. Охудугларынызын тәнбеһ үчүн неҹә фајдалы олдуғуна диггәт јетирин. Бунун үчүн ҝөрүн ајәләр сизә јанлыш мејилләринизи вә хүсусијјәтләринизи мүәјјән едиб, онлары тәрҝитмәјә вә Јеһоваја сәдагәтинизи горумаға неҹә көмәк едир. Бәс охудуғунуз ајәләр јанлыш бахышлары, мәсәлән, хидмәтдә ешитдијиниз јанлыш фикирләри ислаһ етмәјә, јәни онлара дүзәлиш вермәјә неҹә көмәк едә биләр? Һәмчинин ҝөрүн бу ајәләрдә сизи тәрбијәләндирән вә беләҹә, Јеһованын дүшүнҹәсини әкс етдирмәјинизә көмәк едән һансы фикирләр вар. Мүталиә заманы бу дөрд амили јадда сахламаг сизә руһани хәзинәни тапмаға көмәк едәҹәк вә беләҹә, Мүгәддәс Китабын мүталиәси сизә даһа чох фајда ҝәтирәҹәк.

12. Нә үчүн Иса Мәсиһ фәрисиләрә «мәҝәр охумамысыныз?» суалыны вермишди?

¹² Иса Мәсиһ фәрисиләрлә сөһбәтиндә дә  «мәҝәр охумамысыныз?» суалыны вермишди. О истәјирди ки, фәрисиләрин Мүгәддәс Јазылардан охудуглары илә бағлы сәһв дүшүнҹәдә олдугларыны үзә чыхарсын (Мәт. 12:1—7) e. Һәмин сөһбәтдә фәрисиләр иддиа едирдиләр ки, Исанын шаҝирдләри Шәнбә ганунуна риајәт етмир. Иса Мәсиһ ҹавабында онлара Мүгәддәс Јазылардан ики нүмунә чәкди вә «Һушә» бөлмәсиндән ситат ҝәтирәрәк ачыг шәкилдә ҝөстәрди ки, фәрисиләр Шәнбә ганунунун мәғзини баша дүшмүрләр вә үрәкләриндә мәрһәмәт јохдур. Онлар Аллаһын Кәламыны охусалар да, бу Кәлам онлары формалашдырмырды. Нәјә ҝөрә? Чүнки онлар гүрурлу идиләр вә Мүгәддәс Јазылары башгаларында сәһв тутмаг үчүн охујурдулар. Бу әһвал-руһијјә онлара охудугларынын мәғзини анламаға мане олурду (Мәт. 23:23; Јәһ. 5:39, 40).   

13. Мүгәддәс Китабы охујанда биздә һансы хүсусијјәтләр олмалыдыр вә нә үчүн?

¹³ Исанын сөзләриндән өјрәнирик ки, биз Мүгәддәс Китабы дүзҝүн нијјәтлә охумалыјыг. Фәрисиләрдән фәргли олараг, биз тәвазөкар вә өјрәнмәјә һазыр олмалыјыг. Биз сөзүн ичимиздә әкилмәсинә һәлимликлә јол вермәлијик (Јаг. 1:21). Әҝәр һәлим олсаг, Аллаһын Кәламы гәлбимиздә көк салаҹаг. Биз тәнгиди әһвал-руһијјәдән вә гүрурдан узаг олдуғумуз һалда Кәламдакы мәрһәмәт, шәфгәт вә мәһәббәтлә бағлы нәсиһәтләр бизи формалашдыраҹаг.

14. Аллаһын Кәламынын бизи формалашдырдығыны неҹә мүәјјән едә биләрик? (Һәмчинин шәкилләрә бахын.)

¹⁴ Башгалары илә рәфтарымыздан Аллаһын Кәламынын бизи формалашдырмасына јол вериб-вермәдијимиз бәлли олур. Аллаһын Кәламы фәрисиләрин үрәјинә тәсир етмәдији  үчүн онлар «ҝүнаһсыз адамлары мәһкум» едирдиләр (Мәт. 12:7). Бизим дә башгалары һаггында һансы фикирдә олмағымыз вә онларла рәфтарымыз ҝөстәрир ки, Аллаһын Кәламынын бизи формалашдырмасына изин веририк, ја јох. Мәсәлән, биз адәтән инсанларын јахшы хүсусијјәтләрини гејд едирик, јохса чатышмајан ҹәһәтләрини? Мәрһәмәтлијик, јохса башгаларына тәнгиди јанашырыг? Бағышламаға һазырыг, јохса кин сахлајырыг? Өзүмүзү белә тәһлил етмәјимиз ҝөстәрәҹәк ки, Аллаһын Кәламы дүшүнҹәмизи, һиссләримизи вә давранышымызы формалашдырыр, ја јох (1 Тим. 4:12, 15; Ибр. 4:12).

15. Иса Мүгәддәс Јазылара неҹә јанашырды?

¹⁵ Иса Мәсиһ Аллаһын Кәламыны севирди. Онун кечирдији һиссләр Зәбур 40:8 ајәсиндә белә пејғәмбәрлик олунмушду: «Еј Аллаһым, истәјини јеринә јетирмәкдән һәзз алырам, ганунун гәлбимдәдир». Бунун сајәсиндә о, хошбәхт иди вә Јеһоваја хидмәтини уғурла давам етдирирди. Биз дә Аллаһын Кәламыны охусаг вә севсәк, орада јазыланлар бизә дә хошбәхтлик бәхш едәҹәк вә уғур газанаҹағыг (Зәб. 1:1—3).   

16. Мүгәддәс Китаб мүталиәнизи јахшылашдырмаг үчүн шәхсән сиз нә едәҹәксиниз? (« Исанын сөзләри сајәсиндә охудугларынызы дәрк едәҹәксиниз» адлы чәрчивәјә бахын.)

¹⁶ Ҝәлин Исанын сөзләринә вә нүмунәсинә ујғун давранараг Мүгәддәс Китабы мүталиә етмәк габилијјәтимизи тәкмилләшдирәк. Биз дуа етмәклә, арамла охумагла, өзүмүзә суаллар вермәклә вә гыса гејдләр апармагла Мүгәддәс Китабы даһа јахшы баша дүшәрик. Мүгәддәс Китаба әсасланан нәшрләримизин көмәји илә охудугларымызы јахшы-јахшы тәһлил етмәклә бәсирәтимизи ишә сала биләрик. Охудуғумуз парчадан руһани хәзинә тапмаға чалышмагла Мүгәддәс Китабдан, һәтта елә дә таныш олмајан ајәләрдән даһа јахшы истифадә етмәји өјрәнә биләрик. Мүгәддәс Китабы дүзҝүн нијјәтлә мүталиә етмәклә охудугларымызын бизи формалашдырмасына изин верәҹәјик. Бу саһәләрдә пүхтәләшдикҹә Мүгәддәс Китаб мүталиәмиз даһа да јахшылашаҹаг вә Јеһоваја даһа да јахынлашаҹағыг (Зәб. 119:17, 18; Јаг. 4:8).