Бир чох баҹы-гардашымыз jw.org сајтынын өн сәһифәсиндә јерләшдирилән мәгаләләрин хидмәтдә чох фајдалы олдуғуну дејир. Онлары електрон форматда кимәсә ҝөндәрмәк чох асандыр. Баҹы-гардашлар ҹари һадисәләрдән истифадә едәрәк Мүгәддәс Китабдакы пејғәмбәрликләрин неҹә јеринә јетдијини изаһ едирләр. Бир гардаш сајтын өн сәһифәсиндәки мәгаләләрлә бағлы белә дејир: «Бу мәгаләләр хидмәтдә әлимиздән чох тутур».

Өн сәһифәдәки мәгаләләр вахташыры јениләндији үчүн орадакы көһнә мәгаләләри неҹә тапмаг олар?

• jw.org сајтында өн сәһифәнин јухары һиссәсиндә «Диҝәр мәгаләләр» јазылан линкин үстүнә басын. «Өн сәһифәдә чыхан сон мәгаләләр» адлы сәһифә ачылаҹаг. Орада ән сон чыхан мәгаләләри ҝөрә биләрсиниз.

• «JW Library^®» тәтбигиндә вә ја jw.org сајтында «Китабхана» бөлмәсинә, сонра «Силсилә мәгаләләр», сонра да «Әлавә мөвзулар» бөлмәсинә дахил олун. Орада өн сәһифәдә ишыгландырылан чохлу мөвзулар вар.