1, 2. Ики шаҝирд Иммаса ҝедәркән нә баш верир?

 ЕРАМЫЗЫН 33-ҹү или, нисан ајынын 16-дыр. Исанын шаҝирдләрини кәдәр бүрүјүб. Үстәлик, онлар горху ичиндәдирләр. Шаҝирдләрдән икиси Јерусәлимдән тәгрибән 11 километр аралыда јерләшән Иммас кәндинә ҝедир. Бу ики шаҝирд чох пәришандыр. Онлар Мәсиһин бөјүк ишләр ҝөрәҹәјинә үмид едирдиләр, амма бу үмидләри пуча чыхмышды, чүнки рәһбәрләри Иса Мәсиһ өлдүрүлмүшдү. Бунунла белә, ҝөзләмәдикләри бир шеј баш верир.

² Танымадыглары бир адам шаҝирдләрә јахынлашыб онларла јанашы ҝедир. Шаҝирдләр Исанын башына ҝәлән дәһшәтли һадисәләрдән сөһбәт ачырлар. Сонра һәмин адам онлара өмүрлүк јаддашларында галаҹаг бәзи шејләрдән данышыр. О, «Мусадан вә бүтүн Пејғәмбәрләрдән башлајыб» Мәсиһин нәјә ҝөрә әзаб чәкмәли вә өлмәли олдуғуну изаһ едир. Бу үч нәфәр Иммаса чатанда һәмин јад адам ким олдуғуну ачыглајыр. Бәли, бу, Аллаһын дирилтдији Исадыр! Мәсиһин сағ олдуғуну биләндә шаҝирдләрин нә гәдәр севиндијини бир тәсәввүр един! (Лука 24:13—35).

3, 4. а) Иса шаҝирдләринә неҹә көмәк етди вә бунун нәтиҹәси нә олду? (Һәвариләрин ишләри 1:3). б) Бу мәгаләдән нә өјрәнәҹәјик?

³ Иса јер үзүндә олдуғу сон 40 ҝүн әрзиндә шаҝирдләринә дәфәләрлә ҝөрүнмүшдү. (Һәвариләрин ишләри 1:3 ајәсини охујун.) Бу вахт әрзиндә шаҝирдләрин үрәјиндәки кәдәрин, горхунун јерини севинҹ вә әминлик тутмушду. Онлар Падшаһлығын  ҹәсур мүждәчиләри вә мүәллимләри олдулар a.

⁴ Һәјатынын бу дөнәминдә Исанын ҝөрдүјү ишләрдән чох шеј өјрәнә биләрик. Бу мәгаләдән ҝөрәҹәјимиз кими Иса галан вахты әрзиндә 1) шаҝирдләрини руһландырмышды, 2) онлара Мүгәддәс Јазылары баша дүшмәјә көмәк етмишди вә 3) үзәрләринә даһа чох мәсулијјәт ҝөтүрмәләри үчүн тәлим вермишди. Ҝәлин ҝөрәк Исадан бу саһәләрдә неҹә нүмунә ҝөтүрә биләрик.

РУҺЛАНДЫРЫН

5. Нәјә ҝөрә Исанын шаҝирдләринин руһланмаға еһтијаҹы вар иди?

⁵ Исанын шаҝирдләринин руһланмаға еһтијаҹы вар иди, чүнки бәзиләри Исанын јанында олмаг үчүн аиләләрини, евләрини, ишләрини гојуб ҝәлмишдиләр (Мәт. 19:27). Бир башгалары Исанын шаҝирди олдуғу үчүн пис рәфтара мәруз галмышды (Јәһ. 9:22). Онлар Исанын вәд олунмуш Мәсиһ олдуғуна инандыглары үчүн бу ҹүр гурбанлар верирдиләр (Мәт. 16:16). Амма Иса едам олунанда шаҝирдләрин үмидләри пуч олду. Онлар чох мәјус олмушдулар.

6. Иса дириләндән сонра нә етди?

⁶ Шүбһәсиз, Иса шаҝирдләринин кәдәринә руһани зәифлијин әламәти кими бахмырды. О, баша дүшүрдү ки, кимисә итирәндә инсанын бу ҹүр һиссләр кечирмәси тәбиидир. Буна ҝөрә дә елә дирилдији ҝүндән о, достларыны руһландырмаға башлады. Мәсәлән, сәрдабәнин јанында ағлајан Мәҹдәлли Мәрјәмә ҝөрүндү (Јәһ. 20:11, 16). Һәмчинин мәгаләнин әввәлиндә данышдығымыз ики шаҝирдинә ҝөрүндү. Бундан башга, о, һәвари Бутруса да ҝөрүнмүшдү (Лука 24:34). Исанын нүмунәсиндән нә өјрәнирик? Онун Мәҹдәлли Мәрјәмә ҝөрүндүјү вахт баш верәнләрә нәзәр салаг.

7. Иса Мәрјәмин нә етдијини ҝөрүр вә бу, Исаны нәјә тәшвиг едир? (Јәһја 20:11—16). (Һәмчинин шәклә бахын.)

⁷ Јәһја 20:11—16 ајәләрини охујун. Нисан ајынын 16-сы сәһәр тездән бир нечә мөмин гадын Исанын дәфн олундуғу јерә ҝедир (Лука 24:1, 10). Мәҹдәлли Мәрјәм дә һәмин гадынларын арасындадыр. Мәрјәм  сәрдабәјә чатанда ҝөрүр ки, ичәриси бошдур вә гачыб буну Бутрусла Јәһјаја хәбәр верир. Онлар буну ешидәндә гача-гача сәрдабәјә тәрәф ҝедирләр. Мәрјәм дә онларын архасынҹа ҝәлир. Бутрусла Јәһја сәрдабәнин бош олдуғуну өз ҝөзләри илә ҝөрәндән сонра евә гајыдырлар, амма Мәрјәм гајытмыр, сәрдабәнин јанында галыб ағлајыр. Мәрјәм Исанын орада олдуғуну вә ону изләдијини билмирди. Иса бу садиг гадынын ҝөз јашларыны ҝөрүр вә она тәсәлли вермәк истәјир. Буна ҝөрә дә Мәрјәмә ҝөрүнүр, садә бир шеј едиб ону руһландырыр: Мәрјәмлә данышыр вә она ваҹиб бир тапшырыг верир; дејир ки, ҝедиб гардашларына онун дирилдијини хәбәр версин (Јәһ. 20:17, 18).

8. Исанын нүмунәсини неҹә изләјә биләрик?

⁸ Исанын нүмунәсини неҹә изләјә биләрик? Биз баҹы-гардашлары Јеһоваја хидмәтләрини давам етдирмәјә тәшвиг едә биләрик. Бунун үчүн Исадан нүмунә ҝөтүрәрәк онларын һансы чәтинликләрлә үзләшдикләринә диггәт јетирмәли, һиссләрини баша дүшмәјә чалышмалы вә тәсәлли вермәлијик. Мәсәлән, Ҹоселин адлы бир баҹынын доғма баҹысы фаҹиә нәтиҹәсиндә һәјатыны итирмишди. Ҹоселин дејир: «Ајларла јасдан чыха билмирдим». Амма бир әр-арвад Ҹоселини евинә дәвәт едир. Онун дәрдинә диггәтлә гулаг асыр вә Јеһованын ҝөзүндә дәјәрли олдуғуна ону әмин едир. Ҹоселин дејир: «Елә бил фыртыналы, гаранлыг дәниздә батырдым, амма Јеһова онларын васитәсилә мәни дәниздән чыхарыб гајыға миндирди. Онларын сајәсиндә Јеһоваја хидмәт етмәк истәјим јенидән аловланды». Баҹы-гардашлар үрәкләрини бошалданда биз дә онлары диггәтлә динләсәк, үрәк-дирәк версәк, чох руһланаҹаглар. Нәтиҹәдә, Јеһоваја хидмәтләрини давам етдирмәк үчүн өзләриндә ҝүҹ тапаҹаглар (Ром. 12:15).

МҮГӘДДӘС КИТАБДА ЈАЗЫЛАНЛАРЫ ДӘРК ЕТМӘЈӘ КӨМӘК ЕДИН

9. Исанын шаҝирдләри һансы саһәдә чәтинлик чәкирдиләр вә Иса онлара неҹә көмәк етди?

⁹ Исанын шаҝирдләри Аллаһын Кәламына иман ҝәтирирдиләр, охудугларыны һәјатларында тәтбиг етмәјә чалышырдылар (Јәһ. 17:6). Буна бахмајараг, Исанын ишҝәнҹә дирәјиндә өлмәси онлары чашгынлыға салмышды. Иса анлајырды ки, онларда јаранан шүбһәләр иман азлығындан јох, Аллаһын Кәламыны ахыра кими дәрк етмәмәләриндән ирәли ҝәлир (Лука 9:44, 45; Јәһ. 20:9). Буна ҝөрә дә Иса онлара охудугларынын мәнасыны анламаға көмәк етди. Ҝәлин ҝөрәк Иса Иммаса ҝедән ики шаҝирдинә бу саһәдә неҹә көмәк етмишди.

10. Иса шаҝирдләрини вәд едилмиш Мәсиһ олдуғуна неҹә әмин етди? (Лука 24:18—27).

¹⁰ Лука 24:18—27 ајәләрини охујун. Фикир вердинизсә, Иса шаҝирдләринә ким олдуғуну дәрһал демир, онлара суаллар верир. Ҝөрүнүр, о, шаҝирдләринин нә фикирләшдијини, нә һисс етдијини дилә ҝәтирмәсини истәјирди. Онлар белә дә едир. Шаҝирдләр дејир ки, онлар Иса Мәсиһин Исраили Романын зүлмүндән азад едәҹәјинә үмид едирдиләр. Бу ики шаҝирд үрәјини бошалдандан сонра Иса Мәсиһ Мүгәддәс Јазылар васитәсилә онлара баш верәнләри изаһ едир b. Даһа сонра елә һәмин ҝүн о диҝәр шаҝирдләрлә дә ҝөрүшүб бу пејғәмбәрликләри баша салыр (Лука 24:33—48). Бу әһвалатдан нә өјрәнирик?

11, 12. а) Исанын Мүгәддәс Китаб һәгигәтләрини өјрәтмәк тәрзиндән һансы нүмунәни ҝөтүрүрүк? (Һәмчинин шәкилләрә бахын.) б) Нортејин мүәллими она неҹә көмәк етмишди?

¹¹ Исанын нүмунәсини неҹә изләјә биләрик? Әввәла, дәрс кечдијиниз инсанлара мүнасиб  суаллар верәрәк нә дүшүндүкләрини, нә һисс етдикләрини өјрәнин (Мәс. 20:5). Сонра исә онлара үзләшдикләри вәзијјәтә ујғун ајәләр тапмағын јолуну ҝөстәрин. Һәмчинин конкрет нә етмәли олдугларыны демәк әвәзинә, ајәләрлә бағлы суаллар верин, онлары дүшүнмәјә тәшвиг един. Бу принсипләри һәјатларында тәтбиг етмәјин јолуну ҝөстәрин. Ганада јашајан Нортеј адлы бир гардашын һадисәсинә бахаг.

¹² Нортеј 16 јашы оланда Мүгәддәс Китабы өјрәнмәјә башлајыр. Амма гыса мүддәт сонра аиләси она гаршы чыхыр. Бәс билирсиниз, Нортејә мөһкәм галмаға нә көмәк етди? Она Мүгәддәс Китаб дәрси кечән мүәллими Мәтта 10-ҹу фәслин әсасында һәгиги мәсиһиләрин тәгиб олунаҹағыны баша салмышды. Нортеј дејир: «Она ҝөрә дә тәгибләр башлајанда мән һәгигәтдә олдуғума әмин идим». Мүәллими һәмчинин Нортејә Мәтта 10:16 ајәсини ҝөстәриб изаһ етди ки, аиләсиндә мүбаһисә јарадаҹаг вәзијјәтләрдә еһтијатлы олсун, ејни заманда дини мөвзуда һөрмәтҹил данышсын. Вәфтиз олунандан сонра Нортејин өнҹүл олмаг фикри вар иди. Амма атасы онун университетә дахил олмасыны истәјирди. Бу дәфә дә мүәллими она нә етмәли олдуғуну демәди. Әксинә, суаллар верәрәк Мүгәддәс Китаб принсипләри үзәриндә дүшүндүрдү. Бунун нәтиҹәси нә олду? Нортеј өнҹүл олмаг гәрарыны верди, атасы ону евдән говду. Нортеј башына ҝәләнләрлә бағлы белә дејир: «Мән дүзҝүн гәрар вердијимә там әминәм». Биз дә вахт ајырыб инсанлары Мүгәддәс Китаб ајәләри үзәриндә дүшүндүрсәк, онлара иманда мөһкәм олмаға көмәк едәҹәјик (Ефес. 3:16—19).

ГАРДАШЛАРА «ИНСАН ТИМСАЛЫНДА ҺӘДИЈЈӘ» ОЛМАҒА КӨМӘК ЕДИН

13. Иса ҝөјә галхандан сонра да тәблиғ ишинин давам етмәси үчүн нә етмишди? (Ефеслиләрә 4:8).

¹³ Иса Мәсиһ јер үзүндә оларкән Атасынын она һәвалә етдији иши мүкәммәл шәкилдә јеринә јетирирди (Јәһ. 17:4). Амма о, һеч вахт бу ҹүр дүшүнҹәдә дејилди: «Ишин јахшы ҝөрүлмәсини истәјирсәнсә, өзүн ет». О, јер үзүндә тәблиғ етдији үч ил јарым әрзиндә башгаларына да бу иши өјрәдирди. Ҝөјә галхмаздан әввәл Иса шаҝирдләринә мүһүм бир тапшырыг һәвалә етди: онлара Јеһованын гузуларынын гејдинә галмағы, тәлим вә тәблиғ ишинә рәһбәрлик етмәји тапшырды. Һалбуки шаҝирдләриндән бәзиләри һәмин вахт 20 јашларында оларды. (Ефеслиләрә 4:8 ајәсини охујун.) Бу кишиләр Исаја садиг идиләр, зәһмәткеш идиләр. Иса ҝөјә  галхмаздан әввәл «инсан тимсалында һәдијјә» олмалары үчүн онлара әлавә тәлим верди. О буну неҹә етди?

14. Иса јер үзүндә олдуғу сон 40 ҝүн әрзиндә шаҝирдләринә руһани ҹәһәтдән јеткинләшмәјә неҹә көмәк етмишди? (Һәмчинин шәклә бахын.)

¹⁴ Иса шаҝирдләринә ачыг, амма меһрибан шәкилдә мәсләһәт верирди. Мәсәлән, о бәзи шаҝирдләрин үрәјиндә шүбһәләрин олдуғуну ҝөрүрдү, буна ҝөрә дә онлара бу саһәдә мәсләһәт вермишди (Лука 24:25—27; Јәһ. 20:27). Онлара билдирмишди ки, Аллаһын гузуларынын гејдинә галмаг һәјатларында пул газанмагдан даһа ваҹиб јери тутмалыдыр (Јәһ. 21:15). Һәмчинин демишди ки, башгалары Јеһованын јолунда һансыса тәјинатлар аланда өзләрини онларла мүгајисә едиб нараһат олмасынлар (Јәһ. 21:20—22). Бундан әлавә, о бәзи шаҝирдләринин Падшаһлыг һагда олан јанлыш фикирләринә дүзәлиш етмиш вә онлары диггәтләрини хош хәбәрин тәблиғинә ҹәмләмәјә тәшвиг етмишди (Һәв. 1:6—8). Ағсаггаллар Исадан нә өјрәнә биләр?

15, 16. а) Ағсаггаллар Иса Мәсиһин нүмунәсини неҹә изләјә биләрләр? б) Алдығы мәсләһәт Патрикә неҹә көмәк етди?

¹⁵ Ағсаггаллар Иса Мәсиһин нүмунәсини неҹә изләјә биләр? Онлар ҹаванлар да дахил олмагла јығынҹагдакы гардашлара тәлим вермәли, онлара даһа чох мәсулијјәтин өһдәсиндән ҝәлмәјә көмәк етмәлидирләр c. Ағсаггаллар бу гардашларын һәмин ишләри мүкәммәл ҝөрәҹәјини ҝөзләмирләр. Онлар меһрибанлыгла мәсләһәт вермәлидирләр. Беләҹә, ҝәнҹ гардашлар тәҹрүбә газанаҹаглар вә тәвазөкар, сәдагәтли, башгаларына гуллуг етмәјә һазыр олаҹаглар (1 Тим. 3:1; 2 Тим. 2:2; 1 Бут. 5:5).

¹⁶ Ҝөрүн алдығы мәсләһәт Патрик адлы бир гардаша неҹә көмәк едиб. Бир вахтлар о, башгалары илә, һәтта баҹыларла кобуд данышырды, онларла һөрмәтсиз давранырды. Јеткин бир ағсаггал Патрикдә белә бир зәифлијин олдуғуну ҝөрүр. Она нәјин үзәриндә ишләмәли олдуғуну ајдын дејир, амма буну меһрибан шәкилдә едир. Патрик дејир: «Јахшы ки, о мәнә бу саһәдә мәсләһәт верди. Киминсә мәним арзуладығым мәсулијјәти алдығыны ҝөрәндә руһдан дүшүрдүм. Амма ағсаггалын мәсләһәти сајәсиндә баша дүшдүм ки, мән јығынҹагда һансыса  мәсулијјәти әлдә етмәјә ҹан атмагданса, фикрими даһа чох баҹы-гардашлара тәвазөкарлыгла хидмәт етмәјә ҹәмләмәлијәм». Нәтиҹәдә, Патрик 23 јашында ағсаггал тәјинаты алды (Мәс. 27:9).

17. Иса шаҝирдләринә етибар етдијини неҹә ҝөстәрмишди?

¹⁷ Иса шаҝирдләринә тәкҹә тәблиғ етмәји јох, һәмчинин тәлим вермәји тапшырмышды (Мәт. 28:20) d. Бәлкә дә, шаҝирдләри өзләрини бу тәјината јарарлы билмирдиләр. Амма Иса онларын бу иши баҹараҹағына әмин иди вә буну онлара да демишди. Иса онлара инандығыны бу ҹүр билдирмишди: «Атам мәни дүнјаја ҝөндәрдији кими, мән дә сизи дүнјаја ҝөндәрирәм» (Јәһ. 20:21).

18. Ағсаггаллар Исанын нүмунәсини неҹә изләјә биләр?

¹⁸ Ағсаггаллар Иса Мәсиһин нүмунәсини неҹә изләјә биләр? Тәҹрүбәли ағсаггаллар мәсулијјәтләрини башгалары илә пајлашырлар (Филип. 2:19—22). Мәсәлән, ағсаггаллар ҝәнҹләрә ибадәт евинин тәмизлији вә гуллуғу илә бағлы ишләр һәвалә едә биләр. Ағсаггаллар кимәсә һансыса иши тапшырандан сонра онун бу ишин өһдәсиндән ҝәләҹәјинә етибар етдијини неҹә ҝөстәрә биләр? Она тәлим вермәклә, сонра исә бу иши ҝөрмәји онун өһдәсинә бурахмагла. Тәзәликҹә ағсаггал тәјин олунмуш Метју гардаш тәҹрүбәли ағсаггаллара чох миннәтдардыр. Онлар она һансыса иши тапшыранда ону ҝөрмәјин јолуну һәртәрәфли изаһ едирдиләр, сонра исә бу иши онун өһдәсинә бурахырдылар. Метју дејир: «Мән һансыса сәһви едәндә онлар буна тәлим просесинин бир һиссәси кими бахырдылар вә нөвбәти дәфә бу иши даһа јахшы ҝөрмәјимә көмәк едирдиләр» e.

19. Нә етмәјә гәти гәрарлы олмалыјыг?

¹⁹ Иса јер үзүндә олдуғу сон 40 ҝүн әрзиндә башгаларыны руһландырыр, өјрәдир вә тәлим верирди. Ҝәлин биз дә Исанын нүмунәсини изләјәк (1 Бут. 2:21). О бизә бу саһәдә көмәк едәҹәк. Ахы о, белә бир сөз вермишди: «Мән бу дөврүн јекунуна кими һәмишә сизинләјәм» (Мәт. 28:20).