1, 2. а) Јеһованын хидмәтчиләриндә нә кими шүбһәләр јарана биләр? б) Бу мәгаләдә нәји арашдыраҹағыг?

 ЈАШЫМЫЗДАН асылы олмајараг бәзән һәр биримиз шүбһәләрә гапылырыг a. Мәсәлән, ҝәнҹ тәблиғчидә белә суал јарана биләр: «Ҝөрәсән, Јеһова мәнә фикир верир?» Ола билсин, бу кими суаллара ҝөрә о, вәфтиз олунмаға тәрәддүд едир. Јахуд орта јашлы бир гардашы тәсәввүр едәк. О, ҹаван оланда гәрар вермишди ки, Јеһоваја хидмәти һәр шејдән үстүн тутсун, бу дүнјада чохлу пул газанмағын далынҹа гачмасын. Һал-һазырда гардашын ҝәлири аиләсинин тәләбатларыны өдәмәјә анҹаг чатыр, буна ҝөрә дә о, вахтилә вердији гәрарын дүзҝүн олдуғуна шүбһә едир. Ҝүҹү, тагәти аз олан јашлы баҹыны тәсәввүр едәк. О, Јеһованын јолунда әввәлки гәдәр чох иш ҝөрә билмәдији үчүн руһдан дүшүр. Бәс сиз өзүнүзә нә вахтса бу ҹүр суаллар вермисиниз: «Ҝөрәсән, Јеһова мәнә нәзәр салыр? Јеһованын јолунда гурбанлар вермәјә дәјәрди? Мән һәлә дә Јеһованын иши үчүн јарарлыјам?»

² Бу кими суаллар ҹавабсыз галса, онлар бизи Јеһоваја ибадәтдән сојуда биләр. Ҝәлин ҝөрәк Мүгәддәс Китабдакы принсипләр 1) Јеһованын бизимлә марагландығы илә, 2) кечмишдә вердијимиз гәрарларла вә 3) Онун ишиндә һәлә дә јарарлы олдуғумузла бағлы шүбһәләрә галиб ҝәлмәјә неҹә көмәк едә биләр.

ШҮБҺӘЛӘРӘ НЕҸӘ ГАЛИБ ҜӘЛМӘК ОЛАР?

3. Шүбһәләрә галиб ҝәлмәјин јолларындан бири һансыдыр?

³ Шүбһәләрә галиб ҝәлмәјин бир јолу Аллаһын Кәламынын  васитәсилә суалларымыза ҹаваб тапмагдыр. Белә етсәк, иманымыз мөһкәмләнәҹәк, руһани ҹәһәтдән бөјүјәҹәјик вә иман јолунда даһа дәјанәтли олаҹағыг (1 Кор. 16:13).

4. «Һәр шејин доғру олуб-олмадығыны» неҹә јохлаја биләрик? (1 Салоникилиләрә 5:21).

⁴ 1 Салоникилиләрә 5:21 ајәсини охујун. Фикир верин ки, Мүгәддәс Китаб бизи «һәр шејин доғру олуб-олмадығыны» јохламаға сәсләјир. Бәс буну неҹә едә биләрик? Инандығымыз шејин доғру олуб-олмадығыны јохламаг үчүн Мүгәддәс Китабда бунунла бағлы нә дејилдијини өјрәнмәлијик. Аллаһын ҝөзүндә дәјәрли олдуғуна шүбһә едән ҝәнҹ тәблиғчинин нүмунәсинә гајыдаг. О, садәҹә бу фикирләрлә барышмалыдыр? Хејр. Бу фикирләрин доғру олуб-олмадығыны јохламаг үчүн Јеһованын бу барәдә нә дүшүндүјүнү өјрәнмәлидир.

5. Јеһованын суалларымыза вердији ҹавабы неҹә “ешидә” биләрик?

⁵ Биз Мүгәддәс Китабы охујанда санки Јеһованын сәсини “ешидирик”. Амма һансыса суалла бағлы Онун нә дүшүндүјүнү билмәк үчүн даһа артығыны етмәк лазымдыр. Мүталиәмизи бизи нараһат едән мөвзу әтрафында етмәлијик. Бунун үчүн һәмин мөвзуда ахтарыш апара биләрик. Јеһованын тәшкилатынын тәгдим етдији вәсаитләр бу саһәдә бизә көмәк едәҹәк (Мәс. 2:3—6). Јеһоваја дуа едиб хаһиш едә биләрик ки, дүзҝүн истигамәтдә ахтарыш апармаға вә суалымыза ҹаваб тапмаға бизә көмәк етсин. Сонра исә охудуғумуз материалдан вәзијјәтимизә ујғун принсип вә мәлумат ахтарыб тапа биләрик. Мүгәддәс Китабдан охшар вәзијјәтлә үзләшмиш инсанларын нүмунәсини арашдырмагла да чох шеј өјрәнә биләрик.

6. Ибадәт ҝөрүшләри шүбһәләримизә үстүн ҝәлмәјә неҹә көмәк едир?

⁶ Һәмчинин Јеһованын сәсини ибадәт ҝөрүшләриндә “ешидирик”. Бу ҝөрүшләрдә мүнтәзәм иштирак етсәк, һансыса нитгдән вә ја киминсә шәрһиндән мәһз бизим суалымыза ҹаваб олан фикир ешидә биләрик (Мәс. 27:17). Ҝәлин бизи нараһат едә биләҹәк конкрет шүбһәләрдән вә онлары дәф етмәјин јолларындан данышаг.

ЈЕҺОВАНЫН ШӘХСӘН СИЗӘ НӘЗӘР САЛДЫҒЫНА ШҮБҺӘ ЕДИРСИНИЗСӘ

7. Бәзиләриндә һансы суал јарана биләр?

⁷ Нә вахтса сиздә белә бир шүбһә јараныб: «Ҝөрәсән, Јеһова мәнә доғрудан да нәзәр салыр?» Әҝәр өзүнүзү дәјәрсиз һисс едирсинизсә, Каинатын Јараданы илә достлуг етмәк сизин үчүн ағласығмаз, мүмкүнсүз ҝөрүнә биләр. Ола билсин, Давуд падшаһда да белә фикирләр олурду. Јеһованын ади инсанлара фикир вермәси ону һејрәтә ҝәтирирди. Давуд демишди: «Еј Јеһова, инсан нәдир ки, она нәзәр салырсан? Фани инсан нәдир ки, она диггәт јетирирсән?» (Зәб. 144:3). Бәс бу суалларын ҹавабыны һарадан тапмаг олар?

8. 1 Ишмуил 16:6, 7, 10—12 ајәләринә әсасән Јеһова инсанларда нәјә фикир верир?

⁸ Мүгәддәс Китабдан өјрәнирик ки, Јеһова башгаларынын әһәмијјәт вермәдији кәсләрә нәзәр салыр. Јеһова Ишмуили Јәссәнин евинә ҝөндәрмишди. Ишмуил онун оғулларындан бирини Исраилин ҝәләҹәк падшаһы кими мәсһ етмәли иди. Јәссә сәккиз оғлундан једдисини, јәни ән кичији олан Давуддан b башга һамысыны Ишмуилин гаршысына  чыхарды. Амма Јеһова мәһз Давуду сечди. (1 Ишмуил 16:6, 7, 10—12 ајәләрини охујун.) Јеһова Давудун дахилән неҹә инсан олдуғуну ҝөрүрдү. Билирди ки, бу ҝәнҹ оғлан руһани шејләрә дәјәр верир.

9. Јеһованын сизинлә марагландығына нәјә ҝөрә әмин ола биләрсиниз? (Һәмчинин шәклә бахын.)

⁹ Дүшүнүн: Јеһова сизә нәзәр салдығыны бу ҝүнә кими неҹә ҝөстәриб? О мәһз сизин тәләбатыныза ујғун мәсләһәтләр верир (Зәб. 32:8). Әҝәр О сизи јахшы танымаса, буну неҹә едә биләр? (Зәб. 139:1). Јеһованын вердији мәсләһәтләрә әмәл едәндә вә онларын хејрини ҝөрәндә Онун шәхсән сизинлә марагландығына әмин олаҹагсыныз (1 Салн. 28:9; Һәв. 17:26, 27). О, чәкдијиниз зәһмәти ҝөрүр. Јеһова сизин дахили ҝөзәллијиниздән аҝаһдыр вә сизә јахын олмаг истәјир (Әрм. 17:10). Бу достлуг тәклифини гәбул етсәниз, Јеһова чох севинәр (1 Јәһ. 4:19).

ВЕРДИЈИНИЗ ГӘРАРЛАРЫН ДҮЗҜҮНЛҮЈҮНӘ ШҮБҺӘ ЕДИРСИНИЗСӘ

10. Кечмиш гәрарларымыз барәдә дүшүнәндә биздә һансы суаллар јарана биләр?

¹⁰ Бәзиләри кечмишә бојлананда вердикләри гәрарларын дүзҝүн олдуғуна шүбһә едирләр. Ола билсин, онлар Јеһоваја там шәкилдә хидмәт етмәк үчүн ҝәлирли ишләриндән чыхыблар, јахуд да уғурлу бизнес гурмаг имканындан ваз кечибләр. Бәлкә дә, һәмин вахтдан узун илләр кечиб вә инди, ола билсин, һәмин инсанлар дүнјәви мәгсәдләр гојан танышларына бахыб ҝөрүрләр ки, онларын раһат шәраитләри вар, һеч нәдән корлуг чәкмирләр. Буна ҝөрә дә онлар белә дүшүнә биләрләр: «Ҝөрәсән, Јеһованын јолунда бу гурбанлары вермәклә дүз етмишәм? Бәлкә, о вахт чох ишләсәјдим, инди јахшы пулум оларды?»

11.73-ҹү мәзмурун јазарыны нә нараһат едирди?

¹¹ Әҝәр бу кими суаллар сиздә дә јаранырса,  фикир верин, 73-ҹү мәзмурун јазары һансы һиссләри кечирмишди. О, башгаларынын сағлам, фираван, әзаб-әзијјәтсиз јашадығыны ҝөрүрдү (Зәб. 73:3—5, 12). Онларын һәјатына, уғурларына баханда дүшүнүрдү ки, һәдәр јерә Јеһованын јолунда бу гәдәр әзијјәтә гатлашыб. Бу фикрә ҝөрә о, бүтүн ҝүнү «дәрд-сәр» чәкирди (Зәб. 73:13, 14). Бәс о бу мәнфи дүшүнҹәләринә неҹә үстүн ҝәлди?

12. Зәбур 73:16—18 ајәләринә әсасән мәзмурчу мәнфи фикирләрин өһдәсиндән неҹә ҝәлди?

¹² Зәбур 73:16—18 ајәләрини охујун. Мәзмурчу Аллаһын мүгәддәс мәканына ҝетмишди. Белә бир сакит мүһит она ајдын дүшүнмәјә имкан верди. Орада о баша дүшдү ки, кәнардан бәзиләринин һәјаты раһат ҝөрүнсә дә, ҝәләҹәјә үмидләри јохдур. Буну анлајандан сонра мәзмурчу гәлб раһатлығы тапды. О, әмин олду ки, руһани ишләри үстүн тутмагла ән доғру гәрары вериб. Нәтиҹәдә, онун Јеһоваја хидмәт етмәк әзми мөһкәмләнди (Зәб. 73:23—28).

13. Кечмишдә вердијиниз гәрарларын дүзҝүнлүјүнә шүбһә едирсинизсә, гәлб раһатлығы тапмаға сизә нә көмәк едәҹәк? (Һәмчинин шәклә бахын.)

¹³ Мәзмурчу кими сиз дә Аллаһын Кәламынын көмәји илә гәлб раһатлығы тапа биләрсиниз. Неҹә? Нә гәдәр дәјәрли шејләрә саһиб олдуғунуз барәдә дүшүнүн. Мәсәлән, сиз ҝөјдә хәзинә јығмысыныз. Бәс Јеһоваја хидмәт етмәјән инсанлар барәдә нә демәк олар? Онларын алдығы јеҝанә мүкафат бу дүнјанын тәгдим етдији шејләрдир. Бу инсанлар үчүн јахшы иш, раһат шәраит бу һәјатда һәр шејдән ваҹибдир. Чүнки онлар ҝәләҹәјә үмид бәсләмирләр. Сизә исә Јеһова ағлыныза белә  ҝәлмәјәҹәк немәтләри вермәји вәд едир (Зәб. 145:16). Һәм дә буну нәзәрә алын: биз дәгигликлә билә билмәрик, фәргли гәрар версәјдик, инди һәјатымыз неҹә оларды. Амма бир шеј дәгигдир, Јеһоваја вә инсанлара мәһәббәтдән ирәли ҝәләрәк гәрар верән кәсләр һәгигәтән дәјәрли олан һеч бир шејдән мәһрум олмурлар.

ЈЕҺОВАНЫН ИШИНДӘ ЈАРАРЛЫ ОЛДУҒУНУЗА ШҮБҺӘ ЕДИРСИНИЗСӘ

14. Бәзиләри һансы чәтинликләрлә үзләшир вә онларда һансы суал јарана биләр?

¹⁴ Јеһованын бәзи хидмәтчиләри гоҹалыг, хәстәлик вә ја әлиллик уҹбатындан истәдикләри гәдәр Она хидмәт едә билмирләр. Буна ҝөрә онлар Јеһованын ҝөзүндә дәјәрсиз олдугларыны дүшүнә биләрләр. Бәлкә дә, онлары белә суал нараһат едир: «Мән һәлә дә Јеһованын иши үчүн јарарлыјам?»

15. 71-ҹи мәзмурун јазары нәјә әмин иди?

¹⁵71-ҹи мәзмурун јазарынын да буна бәнзәр нараһатлыглары вар иди. Она ҝөрә дә о, дуа етмишди: «Ҝүҹүм түкәнәндә мәни тәрк етмә» (Зәб. 71:9, 18). Бунунла белә, мәзмурчу әмин иди ки, әҝәр о, сәдагәтлә хидмәт етсә, Јеһова она дајаг олаҹаг. О, бир шеји өјрәнди: инсан мәһдудијјәтләринә бахмајараг хидмәтдә әлиндән ҝәләни едәндә Јеһова ондан разы галыр (Зәб. 37:23—25).

16. Јашлы баҹы-гардашлар Јеһованын јолунда һансы ишләри ҝөрә биләрләр? (Зәбур 92:12—15).

¹⁶ Әзиз јашлы баҹы-гардашлар, өзүнүзә Јеһованын ҝөзү илә бахын. Физики ҹәһәтдән зәиф олсаныз да, Јеһованын көмәји илә руһани ҹәһәтдән ҝүҹлү ола биләрсиниз. (Зәбур 92:12—15 ајәләрини охујун.) Фикринизи артыг едә билмәдијиниз шејләрә јох, баҹардығыныз шејләрә ҹәмләјин. Мисал үчүн, өз нүмунәнизлә вә инсанлара  диггәт ҝөстәрмәклә онлары руһландыра биләрсиниз. Һәмчинин илләр әрзиндә Јеһованын сизә неҹә дајаг олдуғу вә Онун вәдләринин јеринә јетәҹәјинә там әмин олдуғунуз барәдә даныша биләрсиниз. Бундан әлавә, јадда сахлајын ки, башгалары үчүн етдијиниз сәмими дуаларын бөјүк тәсири вар (1 Бут. 3:12). Вәзијјәтиниздән асылы олмајараг, Јеһова вә инсанлардан өтрү һәмишә нә исә едә биләрсиниз.

17. Нәјә ҝөрә өзүмүзү башгалары илә мүгајисә етмәмәлијик?

¹⁷ Әҝәр Јеһоваја истәдијиниз гәдәр хидмәт едә билмәдијинизә ҝөрә мәјус олурсунузса, бир шеји јадда сахлајын: Јеһованын јолунда етдијиниз һәр бир шеј Онун үчүн чох дәјәрлидир. Бәлкә дә ҝөрдүјүнүз ишләри башгаларынынкы илә мүгајисә етмәјә мејиллисиниз. Гәтијјән буну етмәјин, чүнки Јеһова бу ҹүр мүгајисәләр етмир (Гал. 6:4). Мәсәлән, Мәрјәм Исаја чох баһалы әтирли јағ һәдијјә етмишди (Јәһ. 12:3—5). Касыб дул гадын исә чох аз дәјәри олан ики хырда пул ианә етмишди (Лука 21:1—4). Иса һәр икисинин вердији һәдијјәјә иманларынын тәзаһүрү кими бахды. Иса Атасынын хүсусијјәтләрини мүкәммәл шәкилдә әкс етдирирди. Она ҝөрә дә әмин ола биләрсиниз ки, сизин үчүн нә гәдәр кичик ҝөрүнсә дә, Јеһова Она имандан вә севҝидән ирәли ҝәләрәк етдијиниз һәр бир ишә бөјүк дәјәр верир.

18. Шүбһәләрә неҹә галиб ҝәлә биләрик? (Һәмчинин « Аллаһын Кәламы шүбһәләрә галиб ҝәлмәјә көмәк едә биләр» адлы чәрчивәјә бахын.)

¹⁸ Вахташыры һәр биримизин үрәјиндә шүбһәләр јараныр. Амма ҝөрдүјүмүз кими Јеһованын етибарлы Кәламы олан Мүгәддәс Китаб онлары дәф етмәјә көмәк едә биләр. Буна ҝөрә дә сизи нараһат едән суаллара ҹаваб тапмаға чалышын. Гој нараһатлыгларынызын јерини әминлик тутсун. Архајын олун, сиз шәхсән Јеһованын нәзәриндәсиниз. Јеһова вердијиниз гурбанлары гијмәтләндирир вә сизә мүкафат вермәји Өзүнә борҹ билир. О, һәр бир хидмәтчисини севҝисинә вә диггәтинә лајиг ҝөрүр. Буна шүбһә етмәјин.