1, 2. а) Гүдрәт Саһибинин инсанларла рәфтары илә сәлаһијјәт саһибләринин рәфтары арасында һансы фәрг вар? б) Бу мәгаләдә нә арашдырылаҹаг?

СӘЛАҺИЈЈӘТ, ихтијар саһиби олан шәхсләр адәтән башгалары үзәриндә ағалыг едир, һәтта онлара зүлм верир (Мәт. 20:25; Ваиз 8:9). Јеһова исә, Гүдрәт Саһиби олдуғу һалда, биз инсанлара илтифат ҝөстәрир. О, мәрһәмәтли вә гајғыкешдир. Күлли-Ихтијар Јеһова гејри-камил инсанларын кечирдији һиссләрә, еһтијаҹларына гаршы биҝанә дејил. О, һеч вахт ҝүҹүмүздән артығыны тәләб етмир, чүнки «торпаг олдуғумузу унутмур» (Зәб. 103:13, 14).

² Мүгәддәс Китабда Јеһованын Өз бәндәләринин һиссләрини нәзәрә алдығына даир чохлу нүмунәләр вар. Ҝәлин бу нүмунәләрдән үчүнә нәзәр салаг: биринҹиси, өјрәнәҹәјик ки, Јеһова баш каһинә һөкм хәбәрини чатдырмалы олан балаҹа Ишмуилә неҹә көмәк етмишди; икинҹиси, Исраил халгына башчылыг етмәјә етираз едән Муса пејғәмбәрлә неҹә сәбирлә давранмышды; үчүнҹүсү, Исраил халгыны Мисирдән чыхараркән онлара неҹә гајғы ҝөстәрмишди.

3. Балаҹа Ишмуил һансы гејри-ади һадисәнин шаһиди олур вә бунунла бағлы һансы суал јарана биләр? (Мәгаләнин әввәлиндәки шәклә бахын.)

³ Ишмуил көрпәликдән Јеһоваја мәбәддә гуллуг едирди (1 Ишм. 3:1). Бир ҝеҹә о, јериндә узанмышды, бирдән гејри-ади шеј баш верир *. (1 Ишмуил 3:2—10 ајәләрини охујун.) Ишмуил киминсә ону чағырдығыны ешидир. Елә билир ки, бу, ихтијар јашында олан баш каһин Әлинин сәсидир. Ишмуил дәрһал онун јанына гачыб дејир: «Бәли, ағам. Мәни чағырдын?» Әли исә: «Јох, чағырмамышам», — дејә ҹаваб верир. Бу һадисә ики дәфә јенә тәкрарланыр, онда Әли баша дүшүр ки, ушағы чағыран Аллаһдыр. О, Ишмуилә нөвбәти дәфә сәс ону чағыранда неҹә ҹаваб вермәли олдуғуну өјрәдир. Ишмуил дә һәр шеји Әлинин дедији кими едир. Ҝөрәсән, нәјә ҝөрә Јеһова мәләји васитәсилә Ишмуили чағыранда елә илк дәфәдән Өзүнү әјан етмәди? Мүгәддәс Китабда бунун сәбәби ачыгланмаса да, һадисәләрин ҝедишатындан ајдын ҝөрмәк олар ки, Јеһова Ишмуилин һиссләрини нәзәрә алмышды. Ҝәлин ҝөрәк неҹә.

4, 5. а) Ишмуил Јеһованын бујруғуна неҹә јанашыр вә сәһәриси ҝүн һадисәләр неҹә ҹәрәјан едир? б) Бу һадисәдән Јеһова һагда нә өјрәнирик?

⁴ 1 Ишмуил 3:11—18 ајәләрини охујун. Јеһованын вердији ганунда бујрулурду ки, ушаглар бөјүкләрә, әләлхүсус да, халгын арасында башчылыг едәнләрә һөрмәт гојмалыдыр (Чых. 22:28; Лав. 19:32). Буна ҝөрә дә чәтин ки, Ишмуил сәһәриси ҝүн Әлијә јахынлашыб ҹәсарәтлә һөкм хәбәрини чатдырарды. Мүгәддәс Китабдан охујуруг ки, «о, алдығы вәһји Әлијә данышмаға горхурду». Лакин Јеһова Ишмуили чағырдығыны Әлијә әјан едир. Беләҹә, Әлинин өзү Ишмуилдән «бирҹә кәлмә белә» ҝизләтмәдән һәр шеји данышмасыны истәјир. Ишмуил итаәткарлыг едиб «һәр шеји олдуғу кими» данышыр.

⁵ Әли Ишмуилин дедикләрини ешидәндә тәәҹҹүбләнмир, чүнки бир мүддәт әввәл «Аллаһ адамы Әлинин јанына ҝәлиб» она ејни шејләри сөјләмишди (1 Ишм. 2:27—36). Әли вә Ишмуиллә бағлы бу һадисә Јеһованын нә гәдәр анлајышлы, һикмәтли Аллаһ олдуғуну ҝөстәрир.

6. Аллаһын Ишмуилә көмәк етмәк тәрзиндән нә өјрәнирик?

⁶ Әзиз ҝәнҹләр, Ишмуилин бу һадисәсиндән ҝөрмәк олар ки, Јеһова сизин дә кечирдијиниз һиссләри вә үзләшдијиниз чәтинликләри чох јахшы баша дүшүр. Ола билсин, өзүнүздән бөјүкләрә тәблиғ етмәк вә ја һәмјашыдларыныздан фәргләнмәк сизин үчүн чәтиндир, бәлкә дә утанырсыныз. Әмин олун ки, Јеһова сизә көмәк етмәк истәјир. Дуа едәрәк кечирдијиниз һиссләри Јеһова илә бөлүшүн (Зәб. 62:8). Мүгәддәс Китабдан Ишмуил кими ҝәнҹләрин нүмунәләрини охујуб үзәриндә дүшүнүн. Артыг бу кими проблемләрин өһдәсиндән ҝәлмиш ҝәнҹләрлә, јахуд сиздән јашҹа бөјүк баҹы-гардашларла сөһбәт един. Онлар сизә чәтин мәгамларда, бәзән дә һеч ҝөзләмәдикләри јолла Јеһованын онлара неҹә дајаг олдуғу барәдә чохлу һадисәләр даныша биләрләр.

7, 8. Јеһова Муса пејғәмбәрә неҹә илтифат ҝөстәрмишди?

⁷ Муса пејғәмбәр 80 јашында Јеһовадан чәтин бир тапшырыг алыр. Она Исраил халгыны Мисир көләлијиндән азад етмәк бујрулур (Чых. 3:10). Мәдјән торпағында 40 ил чобанлыг етмиш Муса тәбии ки, белә бир тапшырыг алдығына ҝөрә чох һејрәтләнир. О, Јеһоваја дејир: «Мән кимәм ки, фиронун јанына ҝедим, исраиллиләри Мисирдән чыхарым?» Јеһова ҹавабында «Мән сәнинлә олаҹағам» дејәрәк она үрәк-дирәк верир  (Чых. 3:11, 12). Һәмчинин вәд едир ки, Исраил ағсаггаллары онун «сөзүнә гулаг асаҹаг». Амма бүтүн бунлара бахмајараг, пејғәмбәр «бирдән,.. сөзүмә гулаг асмадылар?» дејә сорушур (Чых. 3:18; 4:1). О, бунунла бир нөв Аллаһын дедијинә шәкк ҝәтирир. Амма Јеһова сәбирлә давраныр, һәтта Муса пејғәмбәрә мөҹүзә ҝөстәрмәк габилијјәти верир. Беләҹә, онун ады Мүгәддәс Китабда илк мөҹүзә ҝөстәрән инсан кими гәләмә алыныр (Чых. 4:2—9, 21).

⁸ Һәтта бүтүн бунлардан сонра да, пејғәмбәр башга бир сәбәб ҝәтирир. О, јахшы даныша билмәдијини сөјләјир. Јеһова она дејир: «Данышанда Мән сәнинлә олаҹағам, нә демәк лазымдырса, сәнә өјрәдәҹәјәм». Бәс пејғәмбәр бу сөзләрдән сонра разы галыр? Ҝөрүнүр јох, чүнки о, Аллаһдан хаһиш едир ки, онун јеринә башга бирини ҝөндәрсин. Бу заман һаглы олараг Јеһованын аҹығы тутур. Амма Јеһова бу дәфә дә онун һиссләрини нәзәрә алараг гардашы Һаруну онунла ҝөндәрәҹәјини вә Мусанын јеринә онун данышаҹағыны дејир (Чых. 4:10—16).

9. Јеһованын сәбир вә илтифаты Муса пејғәмбәрә јахшы рәһбәр олмагда неҹә көмәк етди?

⁹ Бу һадисәдән Јеһова һагда нә өјрәнирик? Гүдрәтли Аллаһ Өз ҝүҹүндән истифадә едәрәк Муса пејғәмбәри итаәт етмәјә мәҹбур едә биләрди. Лакин Јеһова бу һәлим, тәвазөкар хидмәтчиси илә сәбир вә нәзакәтлә давранды, она дајаг олаҹағына әмин етди. Бәс бу үсул ишә јарады? Әлбәттә ки! Муса пејғәмбәр чох ҝөзәл башчы олду. Јеһованын онунла рәфтарындан өрнәк алараг, о да чалышырды ки, инсанларла нәзакәтлә вә анлајышла даврансын (Сај. 12:3).

10. Јеһовадан өрнәк алараг башгаларына анлајыш ҝөстәрәндә һансы фајданы әлдә едирик?

¹⁰ Мәсиһиләр бу саһәдә Јеһоваја неҹә бәнзәјә биләр? Аилә башчысы, валидејн вә ја ағсаггалларын башгалары үзәриндә мүәјјән сәлаһијјәти вар. Буна ҝөрә дә онларын Јеһовадан өрнәк алараг аилә үзвү вә ја диндашларына анлајыш вә сәбир ҝөстәрмәси, онларын һиссләрини нәзәрә алмасы олдугҹа ваҹибдир (Кол. 3:19—21; 1 Бут. 5:1—3). Әҝәр сиз Јеһова Аллаһдан, һәмчинин Мусадан да бөјүк Исадан  өрнәк алсаныз, инсанлара сизә јахынлашыб үрәјини бошалтмаг асан олаҹаг вә сизинлә үнсијјәт онлара тәравәт ҝәтирәҹәк (Мәт. 11:28, 29). Бунунла сиз башгаларына ҝөзәл нүмунә гојаҹагсыныз (Ибр. 13:7).

11, 12. Јеһова исраиллиләри Мисирдән чыхаран заман ҹамаатын өзүнү тәһлүкәсизликдә вә раһат һисс етмәси үчүн нә етди?

¹¹ Ерамыздан әввәл 1513-ҹү илдә исраиллиләр Мисирдән чыханда сајлары үч милјондан чох иди. Онларын арасында ушаглар вә јашлылар, һәмчинин хәстәләр вә шикәстләр вар иди. Тәбии ки, белә бөјүк издиһам гајғыкеш вә мәһәббәтли Рәһбәрә еһтијаҹ дујурду. Муса пејғәмбәр васитәсилә халгы Мисирдән чыхаран Јеһова мәһз белә рәһбәр иди. Буна ҝөрә дә исраиллиләр онлара доғма олан јурдларыны тәрк едәндә өзләрини асајишдә һисс едирдиләр (Зәб. 78:52, 53).

¹² Бәс халгынын өзүнү тәһлүкәсизликдә вә раһат һисс етмәси үчүн Јеһова һансы тәдбирләри ҝөрдү? Әввәла, онлары Мисирдән «низамлы бир гошун кими» чыхартды (Чых. 13:18). Бу ҹүр низам-интизам исраиллиләрә әминлик верирди ки, һәр шеј Јеһованын нәзарәти алтындадыр. Бундан әлавә, Јеһова ҝүндүз «булудла», ҝеҹә исә «шәфәг сачан аловла» јол ҝөстәрәрәк јанларында олдуғуну әјан едирди (Зәб. 78:14). О, санки дејирди: «Горхмајын! Мән сизинләјәм. Сизә јол ҝөстәрәҹәјәм, сизи горујаҹағам». Бу әминлик тезликлә баш верәҹәк һадисәләр заманы онларын дадына чатаҹагды.

13, 14. а) Јеһова Гырмызы дәниздән кечән исраиллиләрә неҹә гајғы ҝөстәрди? б) Јеһова Аллаһ мисирлиләрә ҝүҹүнү неҹә ҝөстәрди?

¹³ Чыхыш 14:19—22 ајәләрини охујун. Тәсәввүр един ки, Мисирдән чыхан исраиллиләрин арасындасыныз. Фиронун ордусу арханызҹа дүшүб, гаршынызда исә Гырмызы дәниздир. Гачмаға јер јохдур, санки тәләјә дүшмүсүнүз. Һәмин ан Јеһова вәзијјәтә мүдахилә едир. Өнүнүздә ҝедән булуд сүтуну арханыза кечәрәк мисирлиләрин гаршысыны кәсир. Онларын тәрәфи зил гаранлыға гәрг олур, сизин тәрәф исә мөҹүзәви шәкилдә ишыгланыр. Сонра ҝөрүрсүнүз ки, Муса пејғәмбәр әлини дәнизин үзәринә узадыр. Бу заман ҝүҹлү шәрг күләји әсиб дәнизин сујуну говур. Дәнизин дибиндә о бир таја ҝениш бир јол ачылыр. Һамы кими сиз дә аиләниз вә мал-гаранызла бирҝә низамлы шәкилдә дәнизин диби илә ирәлиләјирсиниз. Бирдән мараглы бир шеј диггәтинизи чәкир. Ҝөрүрсүнүз ки, дәнизин диби палчыг дејил, һеч буз да бағламајыб. Торпаг елә гуру вә мөһкәмдир ки, раһат јеријә билирсиниз. Һәтта астаҝәл инсанлар белә, дәнизин о бири тајына сағ-саламат кечә билир.

¹⁴ Чыхыш 14:23, 26—30 ајәләрини охујун. Бу заман мәғрур вә ахмаг фирон сизин далынызҹа дүшүр. Муса пејғәмбәр јенә әлини дәнизин үзәринә узадыр. Дивар кими дуран сулар сунами далғасы кими бир-биринә тоггушараг фирону вә ордусуну суја гәрг едир. Бир нәфәр дә сағ чыхмыр! (Чых. 15:8—10).

15. Бу һадисәдән Јеһова һагда нә өјрәнирик?

¹⁵ Бу һадисәдән ҝөрүрүк ки, Јеһова низам-интизам Аллаһыдыр. Онун бу хүсусијјәти бизә архајынлыг вә тәһлүкәсизлик һисси бәхш едир (1 Кор. 14:33). Чобан сүрүсүнүн гајғысына галдығы кими, Јеһова да халгынын кешијини чәкир, онлары дүшмәнләрдән горујур. Буну билмәк сонуна доғру јахынлашан бу дүнјада бизләрә әсл гәлб раһатлығы вә әминлик бәхш едир (Мәс. 1:33).

16. Јеһова Аллаһын Исраил халгыны һансы јолла хилас етдијини арашдырмағын бизә һансы фајдасы вар?

¹⁶ Бу ҝүн дә Јеһова Аллаһ Өз хидмәтчиләринә бир халг кими гајғы ҝөстәрир, Онунла  јахшы мүнасибәтләр гурмаға көмәк едир вә дүшмәнләрдән һифз едир. Јеһова сүрәтлә јахынлашан бөјүк мүсибәт заманы да белә давранаҹаг (Вәһј 7:9, 10). Одур ки, ҹаван, јашлы, сағлам, јахуд хәстә олмасындан асылы олмајараг Аллаһын халгынын һеч бир үзвү бөјүк мүсибәт заманы тәлаша дүшмәјәҹәк *. Әксинә, онларын ағлында Иса Мәсиһин дедији сөзләр олаҹаг: «Гамәтинизи дүзәлдиб башынызы дикәлдин, чүнки гуртулушунуз јахындыр» (Лука 21:28). Јеһованын халгы һәтта Јәҹуҹун — гәдим фирондан даһа гүдрәтли олан халглар бирлијинин һүҹуму заманы да бу архајынлығыны итирмәјәҹәк (Һизг. 38:2, 14—16). Онларын бу архајынлыгларыны горумаларына сәбәб Јеһованын һеч вахт дәјишмәјән Аллаһ олдуғуну билмәләри олаҹаг. Кечмишдә олдуғу кими, гајғыкеш Хиласкарымыз бу дәфә дә халгыны һифз едәҹәк (Әшј. 26:3, 20).

17. а) Јеһованын халгына ҝөстәрдији гајғы һагда охудугларымыз бизә неҹә көмәк едә биләр? б) Нөвбәти мәгалә һансы мөвзуја һәср олунуб?

¹⁷ Јеһованын Өз халгынын гејдинә галаркән, онлара јол ҝөстәрәркән вә гуртулуш верәркән неҹә анлајышла вә нәвазишлә давранмасы барәдә данышдыг. Мүгәддәс Китабдан бу кими һадисәләр һагда охујаркән чалышын хырда деталлара фикир верәсиниз, онда Јеһованын әввәлләр диггәт јетирмәдијиниз хүсусијјәтләрини ашкар едәҹәксиниз. Өјрәндикләриниз үрәјинизә вә зеһнинизә тәсир едәрәк Она олан мәһәббәтинизи вә иманынызы мөһкәмләндирәҹәк. Нөвбәти мәгаләдә аилә үзвләримизә, диндашларымыза вә тәблиғ етдијимиз инсанлара анлајыш вә гајғы ҝөстәрәркән Јеһовадан неҹә өрнәк ала биләҹәјимизи арашдыраҹағыг.