1, 2. а) Нә үчүн Армаҝеддонун олаҹағы һагда хәбәр бәшәријјәт үчүн хош хәбәрдир? б) Бу мәгаләдә һансы суаллары арашдыраҹағыг?

«АРМАҜЕДДОН» сөзүнү ешидәндә чохларынын ағлына нүвә мүһарибәси вә ја тәбии фәлакәтләр ҝәлир. Лакин Мүгәддәс Китабда Армаҝеддонла бағлы хош шејләр јазылыб. Бу мүһарибәнин бизә хошбәхтлик бәхш едәҹәји дејилир (Вәһј 1:3). Армаҝеддон мүһарибәсиндә бәшәријјәт мәһв олмајаҹаг, әксинә гуртулуша јетишәҹәк! Неҹә?

² Мүгәддәс Китаб Армаҝеддон мүһарибәсинин бәшәријјәтә неҹә гуртулуш ҝәтирәҹәјинә ајдынлыг верир. Орада Армаҝеддон мүһарибәсинин инсан һакимијјәтинә сон гојмагла, писләри мәһв едиб, салеһләри сағ сахламагла вә јер күрәсини тәләф едәнләри тәләф етмәклә бәшәријјәтә гуртулуш ҝәтирәҹәји дејилир (Вәһј 11:18). Буну даһа ајдын баша дүшмәк үчүн ҝәлин дөрд суала нәзәр салаг: «Армаҝеддон нәдир? Һансы һадисәләр Армаҝеддона апарыб чыхараҹаг? Бу мүһарибәдә хилас оланларын арасында олмаг үчүн нә едә биләрик? Дүнјанын сону јахынлашдыгҹа сәдагәтимизи неҹә горуја биләрик?»

3. а) «Армаҝеддон» нә демәкдир? б) Вәһј 16:14, 16 ајәләринә әсасән, нәјә ҝөрә дејә биләрик ки, Армаҝеддон һәрфи јер дејил?

³ Вәһј 16:14, 16 ајәләрини охујун. «Армаҝеддон» сөзүнә Мүгәддәс Китабда јалныз бир дәфә раст ҝәлинир. Бу сөз «Меҝиддо дағы» мәнасыны верән ибрани ифадәсиндән јараныб (Вәһј 16:16, һаш.). Меҝиддо гәдим Исраилдә шәһәр иди (Јуш. 17:11). Лакин «Армаҝеддон» дејиләндә јер үзүндә мөвҹуд олан һәр һансы һәрфи јер нәзәрдә тутулмур. Бу сөз «јер үзүнүн падшаһларынын» Јеһоваја гаршы бирләшдији вәзијјәти билдирир (Вәһј 16:14). Бунунла белә, ҝениш мәнада «Армаҝеддон» сөзү һәм дә јер үзүнүн падшаһларынын  топланмасындан дәрһал сонра баш верәҹәк мүһарибәјә аиддир. «Армаҝеддон» дејиләндә мәҹази јерин нәзәрдә тутулдуғуну һарадан билирик? Биринҹиси, Меҝиддо адлы бир дағ јохдур. Икинҹиси, Меҝиддо әтрафы әрази «јер үзүнүн падшаһларынын», онларын ордуларынын вә силаһ-сурсатынын јерләшәҹәји гәдәр бөјүк дејил. Үчүнҹүсү, мәгаләдән ҝөрәҹәјимиз кими, Армаҝеддон мүһарибәси «јер үзүнүн падшаһларынын» дүнјанын дөрд бир тәрәфиндә јашајан Аллаһын халгына һүҹуму илә башлајаҹаг.

4. Нәјә ҝөрә Јеһова јекун мүһарибәсини Меҝиддо илә әлагәләндирир?

⁴ Нәјә ҝөрә Јеһова јекун мүһарибәсини Меҝиддо илә әлагәләндирир? Мүгәддәс Китабын јазылдығы дөврдә Меҝиддо вә Јизраил дәрәси јахынлығында чохлу дөјүшләр баш верирди. Бәзән Јеһова бу дөјүшләри Өзү апарырды. Мәсәлән, «Меҝиддо сулары јанында» Аллаһ исраилли һаким Бәрәгә Сисарын башчылығы алтында олан Кәнан ордусуну мәғлуб етмәјә көмәк етмишди. Бәрәг вә пејғәмбәр Дәбурә бу мөҹүзәви гәләбәләринә ҝөрә Јеһоваја һәмд етмишдиләр. Онлар нәғмә гошуб охујурдулар: «Улдузлар асимандан дөјүшдү,.. Сисара гаршы вурушду. Гишон чајы дүшмәнләри јујуб апарды» (Һак. 5:19—21).

5. Армаҝеддон мүһарибәси Бәрәгин дөјүшүндән нә илә фәргләнәҹәк?

⁵ Бәрәг вә Дәбурә өз нәғмәләрини бу сөзләрлә јекунлашдырыр: «Еј Јеһова, гој бүтүн дүшмәнләрин мәһв олсун, Сәни севәнләр исә әзәмәтлә доған ҝүнәш кими парласын!» (Һак. 5:31). Армаҝеддонда да Јеһованын дүшмәнләри мәһв едиләҹәк, Ону севәнләр исә хилас олаҹаг. Лакин бу ики мүһарибә арасында бир мүһүм фәрг вар. Армаҝеддонда Аллаһын халгы дөјүшмәјәҹәк, һәтта силаһланмајаҹаг. Онларын ҝүҹү дахили сакитлик, Јеһоваја вә Онун сәмави ордусуна бәсләдикләри етибар олаҹаг (Әшј. 30:15; Вәһј 19:11—15).

6. Јеһова Армаҝеддонда дүшмәнләрини неҹә мәһв едәҹәк?

⁶ Јеһова Армаҝеддонда дүшмәнләрини неҹә мәһв едәҹәк? О, мүхтәлиф үсуллардан истифадә едә биләр. Мәсәлән, ола билсин, Јеһова зәлзәлә, долу вә илдырымдан истифадә еләсин (Әјј. 38:22, 23; Һизг. 38:19—22). Јахуд дүшмәнләрини бир-биринә гаршы галдырсын (2 Салн. 20:17, 22, 23). Јахуд ола билсин, писләри мәләкләри васитәсилә мәһв етсин (Әшј. 37:36). Һансы үсулдан истифадә етмәсиндән асылы олмајараг, Јеһова гәләбә чалаҹаг. Онун бүтүн дүшмәнләри мәһв олаҹаг, бүтүн салеһ бәндәләри исә гуртулаҹаг (Мәс. 3:25, 26).

7, 8. а) 1 Салоникилиләрә 5:1—6 ајәләринә әсасән, дүнја лидерләри һансы гејри-ади бәјанаты едәҹәк? б) Нә үчүн бу бәјанат тәһлүкәли јалан олаҹаг?

⁷ «Јеһованын ҝүнү» башламаздан өнҹә «сүлһ вә тәһлүкәсизлик» бәјанаты олаҹаг. (1 Салоникилиләрә 5:1—6 ајәләрини охујун.) 1 Салоникилиләрә 5:2 ајәсиндә истифадә олунан «Јеһованын ҝүнү» ифадәси бөјүк мүсибәтә аиддир (Вәһј 7:14). Бәс бөјүк мүсибәтин башламаг үзрә олдуғуну неҹә биләҹәјик? Мүгәддәс Китабда дејилир ки, олдугҹа гејри-ади бир бәјанат олаҹаг. Бу бәјанат бөјүк мүсибәтин башлајаҹағына ишарә олаҹаг.

⁸ Пејғәмбәрлик едилдији кими, бу, «сүлһ вә тәһлүкәсизлик» бәјанаты олаҹаг. Нәјә ҝөрә дүнја лидерләри бу бәјанаты едәҹәкләр? Сәбәбини дәгиг билмирик. Бу ишдә дин хадимләринин дә әли олаҹаг? Јәгин ки. Һәр бир һалда, бу, ҹинләрдән гајнагланан нөвбәти јалан олаҹаг. Бу јалан лап тәһлүкәли јалан олаҹаг. Чүнки бәшәр тарихиндә ән бөјүк мүсибәтин башламасына аз галмыш  инсанлар алданараг өзләрини тәһлүкәсизликдә һисс едәҹәкләр. Бәли, «һамилә гадыны гәфилдән доғум санҹылары тутдуғу кими, онлар да гәфил мәһвә уғрајаҹаглар». Бәс Јеһованын садиг бәндәләри илә нә баш верәҹәк? Јеһованын ҝүнүнүн белә гәфил башламасы онлары мәәттәл гојаҹаг, амма онлар һазырлыгсыз олмајаҹаглар.

9. Јеһова Шејтан дүнјасыны һансы ардыҹыллыгла мәһв едәҹәк?

⁹ Јеһова, Нуһун ҝүнләриндән фәргли олараг, Шејтан дүнјасыны бир дәфәјә мәһв етмәјәҹәк. О, буну ики мәрһәләдә едәҹәк. Биринҹи мәрһәләдә Јеһова јалан динләр империјасы олан Бөјүк Бабили мәһв едәҹәк. Икинҹи мәрһәләдә, Армаҝеддонда исә, Шејтан дүнјасынын сијаси, һәрби вә коммерсија системи дә дахил олмагла, галан һиссәсини дармадағын едәҹәк. Ҝәлин баш верәҹәк бу ики мүһүм мәрһәләни бир-бир арашдыраг.

10. Вәһј 17:1, 6 вә 18:24 ајәләринә әсасән, нәјә ҝөрә Јеһова Бөјүк Бабили мәһв едәҹәк?

¹⁰ «Бөјүк фаһишәјә чыхарылаҹаг һөкм». (Вәһј 17:1, 6; 18:24 ајәләрини охујун.) Бөјүк Бабил Аллаһын адына чохлу гара јахыб. О, Аллаһ һагда јалан тәлимләр јајыб. Инсан һакимијјәтләри илә иттифага ҝирәрәк, әхлагсыз гадын кими, онларла зина едиб. Нүфузундан, сәлаһијјәтиндән истифадә едәрәк үзвләрини чапыб талајыб. Үстәлик, о, чохлу ганлар төкүб, һәтта Аллаһын садиг бәндәләринин дә ганына баис олуб (Вәһј 19:2). Бәс Јеһова Бөјүк Бабили неҹә мәһв едәҹәк?

11. «Ал-гырмызы рәнҝли» вәһши һејван кимдир вә Јеһова ону Бөјүк Бабилә гаршы неҹә истифадә едәҹәк?

¹¹ Јеһова бөјүк фаһишәни ал-гырмызы рәнҝли вәһши һејванын вә он бујнузун васитәсилә мәһв едәҹәк. Вәһши һејван Бирләшмиш Милләтләр Тәшкилатыны, он бујнуз исә бу тәшкилаты дәстәкләјән сијаси гүввәләри тәмсил едир. Јеһованын тәјин етдији вахт бу сијаси гүввәләр Бөјүк Бабилә һүҹум едәҹәк. Онун вар-дөвләтини әлиндән алараг вә шәр әмәлләрини ифша едәрәк «тар-мар едиб чылпаг гојаҹаг» (Вәһј 17:3, 16). Онун мәһви гәфил, санки бир ҝүнүн ичиндә баш верәҹәк.  Белә гәфил мәһвә уғрамасы тәрәфдарларыны дәһшәтә салаҹаг. Ахы бөјүк фаһишә өзүндән разы шәкилдә: «Мән тахтда отурмуш бир мәликәјәм, дул галмамышам, һеч вахт да дәрд билмәјәҹәјәм», — дејирди (Вәһј 18:7, 8).

12. Јеһова халгларын нә етмәсинә јол вермәјәҹәк вә нәјә ҝөрә?

¹² Јеһова гојмајаҹаг ки, халглар Онун бәндәләрини мәһв етсин. Чүнки Аллаһын халгы Бөјүк Бабилдән чыхмаг әмринә табе олуб вә фәхрлә Онун адыны дашыјыр (Һәв. 15:16, 17; Вәһј 18:4). Онлар башгаларынын да сахта диндән чыхмасы үчүн әлләриндән ҝәлән көмәји әсирҝәмирләр. Беләликлә, Бөјүк Бабилин «башына ҝәләҹәк бәлалар» Јеһованын хидмәтчиләринин башына ҝәлмәјәҹәк. Бунунла белә, нөвбәти һадисәләр онларын иманыны сынајаҹаг.

13. а) Јәҹуҹ кимдир? б) Һизгијал 38:2, 8, 9 ајәләринә әсасән, Јәҹуҹун Армаҝеддон адланан мәҹази јерә ҝәлмәси нә вахт олаҹаг?

¹³ Јәҹуҹун һүҹуму. (Һизгијал 38:2, 3, 8, 9 ајәләрини охујун.) Бүтүн јалан динләр мәһв олаҹаг, Аллаһын халгы исә дәһшәтли гасырғадан саламат чыхан ағаҹ кими мөһкәм дураҹаг. Сөзсүз ки, бу, Шејтаны гәзәбләндирәҹәк. О, гәзәбини неҹә төкәҹәк? Шејтан «мурдар вәһј»ләр — ҹинләрдән гајнагланан јалан мәлуматлар васитәсилә милләтләр бирлијини Јеһованын хидмәтчиләринә гаршы галдыраҹаг (Вәһј 16:13, 14). Бу милләтләр бирлији «Мәҹуҹ өлкәсиндән олан Јәҹуҹ» адланыр. Милләтләр бирлији Аллаһын халгына һүҹум едән заман Армаҝеддон адланан мәҹази јерә топлашаҹаг (Вәһј 16:16).

14. Јәҹуҹ нәји анлајаҹаг?

¹⁴ Јәҹуҹ «инсан ҝүҹүнә» — өз һәрби гүввәсинә архаланаҹаг (2 Салн. 32:8). Биз исә Аллаһымыз Јеһоваја бел бағлајаҹағыг. Һәрчәнд бу, милләтләрә ахмаглыг кими ҝөрүнәҹәк. Ахы Бөјүк Бабил олдугҹа гүдрәтли олса белә, аллаһлары ону вәһши һејванын вә он бујнузун әлиндән гуртара билмәди! (Вәһј 17:16). Одур ки, Јәҹуҹ бизи асанлыгла мәһв едәҹәјини дүшүнәҹәк. О, «өлкәни бүрүјән  булудлар кими», Јеһованын халгына һүҹум чәкәҹәк (Һизг. 38:16). Амма тезликлә чыхылмаз бир тәләјә дүшдүјүнү анлајаҹаг. Гырмызы дәниздәки фирон кими, Јәҹуҹ да баша дүшәҹәк ки, Јеһоваја гаршы дөјүшүрмүш (Чых. 14:1—4; Һизг. 38:3, 4, 18, 21—23).

15. Мәсиһ јекун гәләбәсини неҹә чалаҹаг?

¹⁵ Мәсиһ вә онун сәмави ордусу Аллаһын халгынын мүдафиәсинә галхаҹаг вә Јәҹуҹла ордусуну мәһв едәҹәк (Вәһј 19:11, 14, 15). Бәс Аллаһын баш дүшмәнинин, милләтләри јалан тәблиғатла Армаҝеддона јығмыш Шејтанын агибәти неҹә олаҹаг? Иса ону вә ҹинләрини мин иллијә буховлајыб, дибсиз гујуја атаҹаг (Вәһј 20:1—3).

16. а) Аллаһы таныдығымыз нәдән ҝөрүнүр? б) Армаҝеддонда Аллаһы таныјан инсанларла нә баш верәҹәк?

¹⁶ Һәгигәтдә чохдан олуб-олмамағымыздан асылы олмајараг, Армаҝеддондан хилас олмаг үчүн Аллаһы танымалы вә «Ағамыз Иса һаггындакы мүждәјә итаәт» етмәлијик (2 Салон. 1:7—9). Аллаһы танымаг нәјин Она мәгбул олуб-олмадығыны билмәк, ганунларына бәләд олмаг демәкдир. Аллаһы таныдығымыз һәмчинин Она мәһәббәт, итаәт вә там сәдагәт ҝөстәрмәјимиздән ҝөрүнүр (1 Јәһ. 2:3—5; 5:3). Бүтүн бунлары едириксә, Аллаһ да бизи таныјаҹаг, јәни Онун рәғбәтини газанаҹағыг (1 Кор. 8:3). Армаҝеддондан хиласымыз да елә бундан асылыдыр.

17. «Ағамыз Иса һаггындакы мүждәјә» итаәт етмәјә нә дахилдир?

¹⁷ «Ағамыз Иса һаггындакы мүждәјә» онун өјрәтдији бүтүн һәгигәтләр дахилдир. Бу һәгигәтләр Аллаһын Кәламында јазылыб. Иса һаггындакы мүждәјә итаәт етмәк онун өјрәтдији һәгигәтләри тәтбиг етмәк демәкдир. Бура Јеһоваја хидмәти һәјатымызда биринҹи јерә гојмаг, Онун салеһ ганунларына ујғун јашамаг вә Падшаһлығыны бәјан етмәк дахилдир (Мәт. 6:33; 24:14). Һәмчинин үзәрләриндә бөјүк мәсулијјәтләр олан  Мәсиһин мәсһ олунмуш гардашларына дәстәк олмагла да мүждәјә итаәт етдијимизи ҝөстәририк (Мәт. 25:31—40).

18. Мәсһ олунмуш мәсиһиләр онлара ҝөстәрилән хејирхаһлығын әвәзиндә нә едәҹәкләр?

¹⁸ Тезликлә Аллаһын мәсһ олунмуш хидмәтчиләри онлара хејирхаһлыг ҝөстәрән башга гојунлара мүкафат верә биләҹәкләр (Јәһ. 10:16). Неҹә? Армаҝеддон мүһарибәси башламаздан өнҹә јер үзүндә јашајан мәсһ олунмушлар өлмәз руһани варлыглар гисминдә ҝөјә апарылаҹаг. Беләҹә, 144 000 мәсһ олунмушун һамысы сәмави ордунун бир һиссәси олараг, Јәҹуҹун мәһвиндә вә Аллаһын хидмәтчиләриндән ибарәт бөјүк издиһамын хиласында иштирак едәҹәкләр (Вәһј 2:26, 27; 7:9, 10). Бах онда, бөјүк издиһам мәсһ олунмуш мәсиһиләрә вахтилә дајаг олдуғу үчүн әсл фәрәһ һисси дујаҹаг!

19, 20. Армаҝеддонун јахынлашдығы бир вахтда чәтинликләримизә бахмајараг, сәдагәтимизи неҹә горуја биләрик?

¹⁹ Сон дәрәҹә ағыр бир дөврдә, ахырзаманда јашајан Јеһованын хидмәтчиләри мүхтәлиф сынагларла үзләшир. Амма бу сынаглара севинҹлә таб ҝәтирә биләрик (Јаг. 1:2—4). Бунун башлыҹа јолу даима сәмими-гәлбдән дуа етмәкдир (Лука 21:36). Дуа илә јанашы, Аллаһын Кәламыны һәр ҝүн мүталиә едиб үзәриндә дәрин дүшүнмәлијик, мәсәлән, тезликлә баш верәҹәк һадисәләри арашдыра биләрик (Зәб. 77:12). Бунлары етсәк, һәмчинин хидмәтдә фәал олсаг, иманымызы мөһкәм, үмидимизи ҹанлы сахлајаҹағыг.

²⁰ Бир дүшүнүн, Бөјүк Бабил мәһв оланда вә Армаҝеддон битәндә неҹә хошбәхт олаҹагсыныз! Ән әсасы исә, Аллаһын ады вә һакимијјәти бәраәт газананда севинҹиниз јерә-ҝөјә сығмајаҹаг! (Һизг. 38:23). Бәли, Армаҝеддон Аллаһы таныјан, Онун Оғлуна һөрмәт едән вә ахыра кими дөзән кәсләр үчүн хош хәбәрдир! (Мәт. 24:13).