1, 2. Ваиз 11:6 ајәси хош хәбәрин тәблиғ иши илә неҹә бағлыдыр?

БӘЗИ өлкәләрдә инсанлар мүждәни ешидән кими гәбул едир. Санки бу онларын чохдандыр ешитмәк истәдији хәбәрдир. Бәзи өлкәләрдә исә инсанлар үчүн Аллаһла вә ја Мүгәддәс Китабла бағлы мөвзулар елә дә мараглы дејил. Бәс сизин әразиниздә вәзијјәт неҹәдир? Һәр неҹә олса да, Јеһова истәјир ки, О, тәблиғ ишинин битдијини дејәнә гәдәр бу иши дајандырмајаг.

² Јеһованын тәјин етдији вахтда тәблиғ иши баша чатаҹаг вә «сон о вахт ҝәләҹәк» (Мәт. 24:14, 36). Бәс о вахта гәдәр биз «гој әлин бош дурмасын» * мәсләһәтинә неҹә әмәл едә биләрик? (Ваиз 11:6 ајәсини охујун.)

3. Бу мәгаләдә нәләри арашдыраҹағыг?

³ Өтән мәгаләдә јахшы мүждәчи олмаг үчүн атмалы олдуғумуз дөрд аддымы арашдырдыг (Мәт. 4:19). Бу мәгаләдә исә өјрәнәҹәјик ки, һәјатымызда нә баш верирсә-версин, тәблиғ етмәк әзмимизи неҹә горуја биләрик. Арашдыраҹағыг ки, 1) тәблиғ ишиндән јајынмамаг, 2) сәбирли олмаг вә 3) иманымызы мөһкәм сахламаг нә үчүн ваҹибдир.

4. Нәјә ҝөрә диггәтимизи Аллаһын бујурдуғу ишә ҹәмләмәлијик?

⁴ Иса Мәсиһ ахырзаманда баш верәҹәк һадисәләри вә инсанларда олаҹаг хүсусијјәтләри габагҹадан демишди. О билирди ки, бу шејләр давамчыларыны тәблиғ ишиндән јајындыра  биләр, буна ҝөрә дә онлара «ојаг галын» демишди (Мәт. 24:42). Бу ҝүн бизим дөврүмүз Нуһ пејғәмбәрин дөврүнә бәнзәјир. О вахт инсанлара Нуһун хәбәрдарлығына гулаг асмаға мане олан шејләр бу ҝүндә вар (Мәт. 24:37—39; 2 Бут. 2:5). Буна ҝөрә дә чалышмалыјыг ки, диггәтимиз Аллаһын бујурдуғу ишдән јајынмасын.

5. Һәвариләрин ишләри 1:6—8 ајәләриндә тәблиғ ишимизин мигјасы һаггында нә дејилир?

⁵ Бу ҝүн фикримиз-зикримиз Падшаһлығын тәблиғ ишиндә олмалыдыр. Иса Мәсиһ демишди ки, тәблиғ иши о өләндән сонра да давам едәҹәк вә даһа ҝениш мигјасда вүсәт алаҹаг (Јәһ. 14:12). Онун өлүмүндән сонра шаҝирдләриндән бәзиләри балыгчылыг ишинә гајытмышды. Исанын дириләндән сонра ҝөстәрдији мөҹүзә сајәсиндә шаҝирдләри чохлу балыг тутмушду. Иса бу мөҹүзәдән истифадә едиб онлара баша салмышды ки, тәблиғ иши истәнилән ишдән гат-гат ваҹибдир (Јәһ. 21:15—17). Ҝөјә галхмаздан өнҹә исә шаҝирдләринә билдирди ки, онун башладығы шаһидлик иши Исраилин һүдудларындан да кәнарда тәблиғ олунаҹаг. (Һәвариләрин ишләри 1:6—8 ајәләрини охујун.) Илләр сонра Иса һәвари Јәһјаја вәһј назил едиб Ағанын ҝүнүндә * нәләрин баш верәҹәјини ҝөстәрмишди. Јәһјанын ҝөрдүјү ҝөрүнтүләрин арасында еһтирам доғуран ҝөрүнтү вар иди: мәләјин рәһбәрлији алтында «һәр халга, тајфаја, дилә вә үммәтә... әбәди мүждә» тәблиғ олунурду (Вәһј 1:10; 14:6). Ајдындыр ки, Јеһова бизим үмумдүнја тәблиғ ишиндә иштирак етмәјимизи истәјир, та бу иш баша чатана гәдәр.

6. Тәблиғдән јајынмамаға бизә нә көмәк едә биләр?

⁶ Тәблиғ ишини һәјата кечирмәјимиз үчүн Јеһова бизә чохлу үсулларла дәстәк олур. Мәсәлән, Јеһова бизә бол  руһани гида верир; бура чап вә електрон нәшрләр, аудио вә видео јазылар, интернет телевизијасы дахилдир. Бир дүшүнүн, рәсми сајтымыз 1000-дән чох дилдә әлчатандыр! (Мәт. 24:45—47). Сијасәтин, динин, мадди дурумун инсанлар арасында сәдләр чәкдији бир дүнјада сәккиз милјондан чох Аллаһын хидмәтчиси арасында әсл бирлик һөкм сүрүр. Мәсәлән, 2019-ҹу ил апрелин 19-у бүтүн дүнјадакы Јеһованын Шаһидләринин ҝүнүн ајәсинин арашдырылдығы видеоја бахмасы бу бирлијин әјани сүбутудур. Һәмин ҝүн ахшам 20 919 041 нәфәр Иса Мәсиһин өлүмүнү анма мәрасимини кечирмишди. Бизә мүасир дөврдә баш вермиш бу мөҹүзәни ҝөрмәк вә бу мөҹүзәнин ичиндә олмаг шәрәфи нәсиб олуб. Бу һагда дүшүнәндә тәблиғ ишиндә даһа шөвглә иштирак етмәк истәјирик.

7. Иса Мәсиһин нүмунәси бизә неҹә көмәк едә биләр?

⁷ Һәмчинин бизә Иса Мәсиһин нүмунәсини изләмәк көмәк едәҹәк. О изин вермәди ки, һәгигәтә шәһадәт етмәсинә нә исә мане олсун (Јәһ. 18:37). Шејтан Исаја «дүнјанын бүтүн сәлтәнәтләрини вә онларын ҹалалыны» тәклиф едәндә, јахуд инсанлар ону падшаһ етмәк истәјәндә о тәләјә дүшмәди (Мәт. 4:8, 9; Јәһ. 6:15). О нә вар-дөвләтә тамаһ салды, нә дә амансыз тәгибләрлә үзләшәндә тәслим олду (Лука 9:58; Јәһ. 8:59). Иман сынағы заманы һәвари Булусун мәсләһәтини унутмасаг, диггәтимиз јајынмајаҹаг. О, мәсиһиләри тәшвиг етмишди ки, јорулуб тәслим олмамалары үчүн Исанын нүмунәсини изләсинләр (Ибр. 12:3).

8. Сәбир нәдир вә нәјә ҝөрә бу ҝүн хүсусилә ваҹибдир?

⁸ Сәбирли олмаг вәзијјәт дәјишәнәдәк сакит шәкилдә ҝөзләмәк баҹарығыдыр. Биз истәр һансыса чәтинлијин сона чатмасыны, истәрсә дә чохданкы арзумузун јеринә јетмәсини ҝөзләјәркән сәбирли олмалыјыг. Һәбгуг пејғәмбәр Јәһудада һөкм сүрән зүлмүн сона чатмасынын һәсрәтиндә иди (Һәб. 1:2). Исанын шаҝирдләри үмид едирдиләр ки, дәрһал Аллаһын Падшаһлығыны ҝөрәҹәкләр вә бу Падшаһлыг онлары Рома әсарәтиндән азад едәҹәк (Лука 19:11). Биз дә Аллаһын Падшаһлығынын пислијин көкүнү кәсәҹәји вә салеһлијин һөкм сүрәҹәји јени дүнјаны гураҹағы вахтын интизарындајыг (2 Бут. 3:13). Амма сәбирли олмалыјыг вә Јеһованын тәјин етдији вахты ҝөзләмәлијик. Ҝәлин ҝөрәк Јеһова бизә сәбирли олмағы неҹә өјрәдир.

9. Јеһованын сәбирли олдуғу нәдән ҝөрүнүр?

⁹ Јеһова мүкәммәл сәбир нүмунәсидир. О, Нуһ пејғәмбәрә ҝәми тикмәк вә «салеһлик ҹарчысы» кими хидмәт етмәк үчүн кифајәт гәдәр вахт вермишди (2 Бут. 2:5; 1 Бут. 3:20). Јеһованын сәбрини Ибраһим пејғәмбәрлә сөһбәтиндән дә ҝөрмәк олар. Пејғәмбәр биләндә ки, Јеһова Сәдум вә Әмурә шәһәрләрини мәһв едәҹәк, Она чохлу суал вермишди. Јеһова да ону сәбирлә динләмишди (Јар. 18:20—33). Әсрләр әрзиндә Јеһова сәдагәтсиз Исраил халгына гаршы һәдсиз сәбир ҝөстәрмишди (Нәһ. 9:30, 31). Бу ҝүн дә Јеһованын сәбринин шаһидијик: О, вахт верир ки, Өзүнә ҹәлб етдији инсанлар «төвбәјә ҝәлсин» (2 Бут. 3:9; Јәһ. 6:44; 1 Тим. 2:3, 4). Јеһованын нүмунәси бизи тәблиғ вә тәлим ишини сәбирлә давам етдирмәјә тәшвиг едир. Һәмчинин О бизә сәбирли олмағы Кәламындакы бир нүмунә васитәсилә өјрәдир.

10. Јагуб 5:7, 8 ајәләриндә бәһс олунан әкинчинин нүмунәсиндән нә өјрәнирик?

 ¹⁰ Јагуб 5:7, 8 ајәләрини охујун. Әкинчинин нүмунәси бизә сәбирли олмағы өјрәдир. Елә биткиләр вар ки, тез бөјүјүр. Амма әксәр биткиләрин, хүсусилә дә бар верән биткиләрин јетишмәси үчүн чох вахт лазымдыр. Исраилдә мәһсулун јетишмәси тәхминән 6 ај чәкирди. Әкинчи пајызда илк јағышлар јағанда тохум әкирди, јазда исә сонунҹу јағыш јағанда мәһсулу јығырды (Марк 4:28). Әкинчинин сәбриндән өрнәк алмаг ағыллы һәрәкәтдир. Амма бәзән бу асан олмур.

11. Хидмәтдә сәбирли олмаг нә үчүн ваҹибдир?

¹¹ Адәтән гејри-камил инсан зәһмәтинин бәһрәсини тез ҝөрмәк истәјир. Амма бағчамызын барлы-бағатлы олмасыны истәјириксә, она даима гуллуг ҝөстәрмәлијик: торпағы белләмәли, тохуму әкмәли, алагдан тәмизләмәли вә сувармалыјыг. Шаҝирд һазырламаг иши дә давамлы зәһмәт тәләб едир. Дәрс кечдијимиз инсанларын үрәјиндә мәһәббәт тохумларыны әкмәк, гәрәз кими «алаг отларыны» тәмизләмәк үчүн заман лазымдыр. Сәбирли олмаг көмәк едәҹәк ки, истәдијимиз нәтиҹәни алмајанда руһдан дүшмәјәк. Инсан өјрәнмәјә һәвәсли оланда да сәбирли олмалыјыг. Чүнки биз инсаны иманда бөјүмәјә мәҹбур едә билмәрик. Исанын да шаҝирдләри бәзән онун дедикләрини ҝеҹ баша дүшүрдү (Јәһ. 14:9). Ҝәлин унутмајаг ки, биз әксәк дә, суласаг да, инсанларда иман јетишдирән Аллаһдыр (1 Кор. 3:6).

12. Иманымыза шәрик олмајан гоһумларымыза шаһидлик верәркән неҹә сәбирли ола биләрик?

¹² Иманымыза шәрик олмајан гоһумларымыза шаһидлик верәркән сәбирли олмаг чәтин ола биләр. Бу саһәдә Ваиз 3:1, 7 ајәләриндәки принсип көмәк едәҹәк. Орада јазылыб: «Һәр шејин өз вахты вар...  Сусмағын өз вахты, данышмағын өз вахты». Биз сусуб, давранышымызла шаһидлик верә биләрик, амма һәгигәт барәсиндә данышмаг фүрсәти јарананда буна һәмишә һазыр олмалыјыг (1 Бут. 3:1, 2). Биз шөвглә тәблиғ етмәли вә тәлим вермәлијик, амма бу заман, аилә үзвләримиз дә дахил олмагла, һәр кәсә сәбирлә јанашмалыјыг.

13, 14. Кимләр бизә сәбир саһәсиндә нүмунәдир?

¹³ Һәм гәдимдә јашамыш, һәм дә бизим дөврүмүздәки сәдагәтли инсанларын нүмунәсиндән сәбирли олмағы өјрәнә биләрик. Һәбгуг пејғәмбәр пислијин сона чатмасыны һәсрәтлә ҝөзләсә дә, гәтијјәтлә демишди: «Кешик чәкдијим јердә дураҹағам» (Һәб. 2:1). Һәвари Булус хидмәтини баша чатдырыб сәмави мүкафатыны алмағы арзуладығыны билдирсә дә, «мүждә һаггында әтрафлы шәһадәт» вермәјә сәбирлә давам едирди (Һәв. 20:24).

¹⁴ Ҝилад мәктәбинин мәзуну олан бир әр-арвадын нүмунәсинә нәзәр салаг. Онларын тәјин олундуғу өлкәдә бир нечә Јеһованын Шаһиди вар иди. Бура гејри-христиан өлкәси иди вә әксәр инсанлар Мүгәддәс Китабы өјрәнмәјә мејилли дејилди. Диҝәр әразиләрә тәјин олунан мәзунлар исә данышырдылар ки, чохлу Мүгәддәс Китаб дәрсләри кечирирләр, шаҝирдләри јахшы инкишаф едир. Амма бу әр-арвадын хидмәт етдији әразидә вәзијјәт белә олмаса да, онлар сәбирлә тәблиғ етмәјә давам едирди. Сәккиз ил бу әразидә хидмәт етдикдән сонра, нәһајәт, онлара бир нәфәрин вәфтиз олундуғуну ҝөрмәк севинҹи нәсиб олду. Гәдимдәки вә мүасир дөврдәки нүмунәләрин һансы охшар ҹәһәти вар? Бу сәдагәтли инсанлар шөвгләрини итирмәди, онларын әли бош дурмады, Јеһова да сәбирләринә ҝөрә мүкафат верди. Ҝәлин «вәдләри иман вә сәбирлә мирас аланлардан» нүмунә ҝөтүрәк (Ибр. 6:10—12).

15. Иман тәблиғ етмәк гәтијјәтимизи неҹә мөһкәмләндирир?

¹⁵ Биз тәблиғ етдијимиз мүждәјә иман етдијимиз үчүн ону чохларына чатдырмаг истәјирик. Биз Аллаһын Кәламындакы вәдләрә етибар едирик (Зәб. 119:42; Әшј. 40:8). Пејғәмбәрликләрин дөврүмүздә јеринә јетдијини ҝөрүрүк. Инсанларын Мүгәддәс Китаб мәсләһәтләринә әмәл етдикҹә һәјатларынын јахшылыға доғру дәјишдијинин шаһидијик. Бунлар бизи бир даһа әмин едир ки, инсанларын Падшаһлыг һаггында хош хәбәри ешитмәјә еһтијаҹы вар.

16. Зәбур 46:1—3 ајәләринә әсасән, Јеһоваја иман тәблиғдә әзмли олмаға неҹә көмәк едир? Һәмчинин Исаја иман бизә неҹә көмәк едир?

¹⁶ Биз һәмчинин тәблиғ етдијимиз мүждәнин Мәнбәји Јеһова Аллаһа вә Падшаһлығын Падшаһы кими тәјин етдији Иса Мәсиһә иман ҝәтиририк (Јәһ. 14:1). Һәјатымызда нә баш версә дә, Јеһова ҝүҹүмүз, пәнаһымыздыр. (Зәбур 46:1—3 ајәләрини охујун.) Һәмчинин әминик ки, Иса Мәсиһ Јеһованын вердији ҝүҹ вә сәлаһијјәтлә ҝөјдән тәблиғ ишинә рәһбәрлик едир (Мәт. 28:18—20).

17. Тәблиғи нијә дајандырмамалыјыг? Нүмунә чәкин.

¹⁷ Иман бизи әмин едир ки, Јеһова әмәјимизи мүкафатсыз гојмајаҹаг, бәзән исә буну ҝөзләмәдијимиз тәрздә едәҹәк (Ваиз 11:6). Мәсәлән, һәр ҝүн минләрлә инсан әдәбијјат масаларынын вә арабаларынын јанындан кечир. Ҝөрәсән бу тәблиғ үсулу һансыса нәтиҹәни верир? Әлбәттә! «Мүгәддәс ибадәтимиз» вәрәгәсинин 2014-ҹү ил нојабр сајында (рус.) дејилирди ки, бир тәләбә Јеһованын Шаһидләри  һагда мәгалә јазмаг истәјирди, амма ибадәт евини тапа билмирди. Сонра бу гыз тәләбә шәһәрҹијиндә әдәбијјат масасына раст ҝәлди вә орада мәгаләси үчүн лазыми мәлумат тапды. Бир мүддәт сонра о, Јеһованын Шаһиди кими вәфтиз олунду вә һал-һазырда өнҹүл кими хидмәт едир. Белә һадисәләр бизи тәблиғ ишини давам етдирмәјә тәшвиг едир, чүнки һәлә дә Аллаһын Падшаһлығы һаггында хәбәри ешитмәјә мөһтаҹ инсанлар вар.

18. Нәјә ҝөрә әминик ки, тәблиғ иши Јеһованын истәдији вахтда сона чатаҹаг?

¹⁸ Әмин ола биләрик ки, тәблиғ иши дүз вахтында сона чатаҹаг. Нуһ пејғәмбәрин дөврүнү јадымыза салаг. Јеһова ҝөстәрди ки, һәр шеји вахтлы-вахтында едән Аллаһдыр. Дашгындан тәхминән 120 ил әввәл Јеһова онун баш верәҹәји тарихи тәјин етди. Онилликләр сонра Јеһова Нуһ пејғәмбәрә ҝәми тикмәји бујурду. Дашгын башлајана гәдәр Нуһ 40-50 ил әрзиндә бу ишлә мәшғул олду. Инсанлар гулаг асмаса да, Нуһ јенә дә онлары хәбәрдар едирди. О, бу иши Јеһова ҝәмијә һејванлары јығмаг вахты чатдығыны дејәнә гәдәр давам етдирди. Сонра исә вахт јетишәндә Јеһова «гапыны бағлады» (Јар. 6:3; 7:1, 2, 16).

19. «Гој әлин бош дурмасын» мәсләһәтинә әмәл етсәк, нәләрин шаһиди олаҹағыг?

¹⁹ Чох тезликлә Јеһова тәблиғ ишини јекунлашдыраҹаг. О, Шејтан дүнјасынын «гапысыны бағлајаҹаг» вә итаәткар инсанларын јашајаҹағы јени дүзән гураҹаг. О вахта гәдәр исә ҝәлин Нуһ пејғәмбәрдән, Һәбгуг пејғәмбәрдән вә «гој әлин бош дурмасын» мәсләһәтинә әмәл едән диҝәр мөмин инсанлардан өрнәк алаг. Ҝәлин тәблиғ ишиндән јајынмајаг, сәбирли олаг, Јеһоваја вә вәдләринә иманымызы мөһкәм сахлајаг.