1. Јеһоваја хидмәт етмәк нә вахт чәтин ола биләр?

СИЗҸӘ, Јеһоваја хидмәт етмәк нә вахт даһа чәтиндир, проблемләримиз оланда, јохса һәјатымызда һәр шеј нисбәтән јахшы ҝедәндә? Адәтән дара дүшәндә дәрһал Јеһоваја үз тутуруг. Бәс һәјатымызда һәр шеј өз гајдасында оланда неҹә? Ола биләрми ки, диггәтимиз Јеһоваја хидмәтдән јајынсын? Јеһова исраиллиләри бу һагда хәбәрдар етмишди (Ган. 6:10—12).

2. Аса падшаһ һансы нүмунәни гојуб?

² Јәһуда падшаһы Аса тамамилә Јеһоваја бел бағлајырды. Онун бу ағыллы давранышы бизим үчүн ҝөзәл өрнәкдир. О, Јеһоваја тәкҹә чәтин дөврдә јох, һәмчинин әмин-аманлыг дөврүндә дә хидмәт едирди. Та башланғыҹдан «Асанын үрәји... бүтүнлүклә Јеһоваја бағлы» иди (1 Пад. 15:14). Мәсәлән, о буну Јәһудадан јалан ибадәти тәмизләмәклә ҝөстәрмишди. Мүгәддәс Китабда дејилир ки, «о, јад аллаһларын гурбанҝаһларыны, сәҹдәҝаһлары өлкәдән јох етди, дик дашлары парча-парча етди, Ашера бүтләрини кәсди» (2 Салн. 14:3, 5). Һәтта нәнәси Мәкаһы да мәликәликдән мәһрум етди. Чүнки нәнәси бүтә ибадәти јајырды (1 Пад. 15:11—13).

3. Бу мәгаләдә нәји арашдыраҹағыг?

³ Аса өлкәни јалан ибадәтдән тәмизләмәклә јанашы, пак ибадәти дә дирчәлтди, Јәһуда халгына Јеһоваја ҝери дөнмәјә көмәк етди. Јеһова Асаны вә исраиллиләри мүкафатсыз гојмады. Онун һакимијјәти дөврүндә он ил «өлкәдә  әмин-аманлыг» * олду (2 Салн. 14:1, 4, 6). Бу мәгаләдә арашдыраҹағыг ки, Аса падшаһ бу дөврдән неҹә јарарланды. Сонра биринҹи әсрдә јашајан мәсиһиләрин нүмунәсинә бахаҹағыг. Онлар да, Аса падшаһ кими, әмин-аманлыг дөврүндә фүрсәти әлдән вермәдиләр. Сонда исә нөвбәти суалын ҹавабыны тапаҹағыг: «Јашадығыныз өлкәдә азад шәкилдә ибадәт едә билирсинизсә, бу имкандан неҹә јарарлана биләрсиниз?»

4. 2 Салнамәләр 14:2, 6, 7 ајәләринә әсасән, Аса әмин-аманлыг дөврүндә неҹә давранмышды?

⁴ 2 Салнамәләр 14:2, 6, 7 ајәләрини охујун. Аса падшаһ халга демишди ки, онлара «һәр тәрәфдән... динҹлик» верән мәһз Јеһова Аллаһдыр. О дүшүнмүрдү ки, бу дөврдә анҹаг истираһәт етмәк лазымдыр. Әксинә, шәһәрләри инша етмәјә, әтрафына дивар чәкмәјә, бүрҹләр тикмәјә, дарвазалар гојмаға башлады. Аса падшаһ Јәһуда халгына деди: «Һазырда өлкә бизимдир». О нәји нәзәрдә тутурду? Бу о демәк иди ки, халг Аллаһын вердији торпагда сәрбәст долаша биләрди вә дүшмәндән горхмадан иншаат ишләрини апара биләрди. Падшаһ халгы бу фүрсәтдән истифадә етмәјә тәшвиг едирди.

5. Нәјә ҝөрә Аса падшаһ ордусуну ҝүҹләндирди?

⁵ Һәмин дөврдә Аса падшаһ һәмчинин ордуну ҝүҹләндирди (2 Салн. 14:8). Бу онун Аллаһа ҝүвәнмәдијини ҝөстәрирди? Хејр. Садәҹә Аса бир падшаһ кими үзәринә дүшән вәзифәни баша дүшүрдү: о, халгы ҝәләҹәкдә үзләшә биләҹәји бәлалара һазырламалы иди. Аса анлајырды ки, Јәһудада бу сүлһ дөврү әбәдијјән давам етмәјәҹәк вә белә дә олду.

6. Биринҹи әсрдә јашајан мәсиһиләр әмин-аманлыг дөврүндә неҹә давранырды?

⁶ Биринҹи әсрдә јашајан мәсиһиләр чох вахт тәгибләрә мәруз галсалар да, бәзән әмин-аманлыг дөврү дә олурду. Онлар бу фүрсәтләрдән неҹә истифадә едирди? Бу сәдагәтли мәсиһиләр дурмадан тәблиғ едирди. «Һәвариләрин ишләри» китабында дејилир ки, онлар «Јеһова Аллаһын горхусу» илә јашајырды вә хош хәбәри тәблиғ етмәјә давам едирди. Нәтиҹәдә, јығынҹаг бөјүјүрдү. Ҝөрүндүјү кими, Јеһова онларын әмин-аманлыг дөврүндә етдикләри тәблиғ ишини аванд едирди (Һәв. 9:26—31).

7, 8. Һәвари Булус вә диҝәр мәсиһиләр јаранан имкандан неҹә истифадә етди? Изаһ един.

⁷ Биринҹи әсрдәки мәсиһиләр хош хәбәри тәблиғ етмәк үчүн һәр фүрсәтдән истифадә едирди. Мисал үчүн, һәвари Булус ҝөрәндә ки, Ефесдә хидмәт етмәси үчүн ҝениш гапы ачылыб, фүрсәтдән истифадә едиб орада тәблиғ етди (1 Кор. 16:8, 9).

⁸ Ерамызын 49-ҹу илиндә сүннәт мәсәләсинин һәлл олунмасы илә һәвари Булусун вә диҝәр мәсиһиләрин тәблиғ етмәк имканы јаранды (Һәв. 15:23—29). Онлар сүннәтлә бағлы гәрары јығынҹаглара чатдыранда мәсиһиләр «Јеһованын сөзү һаггындакы мүждәни» даһа да шөвглә бәјан етдиләр (Һәв. 15:30—35). Бу һансы бәһрәләр ҝәтирди? Мүгәддәс Китабда јазылыб ки, «јығынҹаглар иманда мөһкәмләнир вә ҝүнү-ҝүндән бөјүјүрдү» (Һәв. 16:4, 5).

9. Бу ҝүн дүнјанын бир чох өлкәсиндә вәзијјәт неҹәдир вә өзүмүздән нә сорушмалыјыг?

⁹ Бу ҝүн дүнјанын бир чох өлкәсиндә манеәсиз шәкилдә тәблиғ етмәк имканымыз вар. Бәс сиз јашадығыныз өлкәдә азад шәкилдә ибадәт едә билирсиниз? Едә билирсинизсә, өзүнүздән сорушун: «Бу азадлыгдан неҹә истифадә едирәм?» Јашадығымыз ахырзаман Јеһованын халгы үчүн мөһтәшәм дөврдүр, чүнки биз бу вахта гәдәр дүнјада ҝөрүлмәмиш мигјасда тәблиғ вә тәлим ишини һәјата кечиририк (Марк 13:10). Јеһованын халгынын гаршысында чохлу имканлар ачылыб.

10. 2 Тимутијә 4:2 ајәси бизи нәјә тәшвиг едир?

¹⁰ Әмин-аманлыг дөврүндән неҹә јарарлана биләрик? (2 Тимутијә 4:2 ајәсини охујун.) Мәсәлән, ја сиз, ја аиләниздән кимсә тәблиғдә даһа чох иштирак етмәк, һәтта өнҹүл кими хидмәт етмәк үчүн һансы дәјишиклији едә биләр? Инди варланмаг, мал-мүлк јығмаг вахты дејил, онлары өзүмүзлә бөјүк мүсибәтдән кечирмәјәҹәјик (Мәс. 11:4; Мәт. 6:31—33; 1 Јәһ. 2:15—17).

11. Бәзи тәблиғчиләр чохлу инсана хош хәбәри чатдырмаг үчүн нә едиб?

¹¹ Чохлу диндашымыз тәблиғ вә тәлим иши үчүн јени дил өјрәниб. Тәшкилатымыз Мүгәддәс Китаба әсасланан нәшрләри даһа чох дилдә дәрҹ едәрәк бу ишдә онлара көмәк едир. Мисал үчүн, 2010-ҹу илдә нәшрләримиз тәхминән 500 дилдә идисә, бу ҝүн бу сај 1000-дән чохдур!

12. Падшаһлыг һагда хәбәри өз ана дилиндә ешитмәк инсанларда һансы һиссләри доғурур? Нүмунә чәкин.

¹² Мүгәддәс Китабдакы һәгигәтләри өз ана дилиндә ешитмәк инсанларда һансы һиссләри доғурур? Бир нүмунәјә бахаг. Мемфисдә (АБШ, Теннесси штаты) кинјаруанда дилиндә реҝионал топланты кечирилмишди. Бу дил Руанда, Конго (Киншаса) вә Угандада әсас данышыг дилидир. Топлантыдан сонра кинјаруанда дилиндә данышан  баҹы һиссләрини бөлүшмүшдү: «17 илдир Бирләшмиш Штатларда јашајырам. О вахтдан бәри илк дәфәдир ки, топланты програмыны там баша дүшдүм». Ҝөрдүјүмүз кими, програмы ана дилиндә ешитмәк баҹыја дәрин тәсир бағышламышды. Имканыныз јол верирсә, әразиниздә башга дилдә данышан инсанлара көмәк етмәк үчүн онларын дилини өјрәнә биләрсиниз? Онлара ана дилләриндә тәблиғ етсәниз, бәлкә, сизә даһа һәвәслә гулаг асаҹаглар? Алаҹағыныз мүкафат чәкдијиниз зәһмәтә дәјәр.

13. Русијадакы баҹы-гардашлар әмин-аманлыг дөврүндә неҹә давранмышды?

¹³ Һеч дә бүтүн баҹы-гардашларын азад шәкилдә тәблиғ етмәк имканы јохдур. Бәзән дөвләтин гојдуғу мәһдудијјәтләр диндашларымыза азад шәкилдә тәблиғ етмәјә ҹидди әнҝәл төрәдир. Ҝөтүрәк Русијадакы диндашларымызы. Узун илләр әрзиндә онлар тәгибләрә мәруз галмышдылар, амма 1991-ҹи илин март ајында дөвләт тәрәфиндән рәсми олараг танындылар. Һәмин вахт Русијада тәхминән 16 000 тәблиғчи вар иди. Ијирми ил сонра исә онларын сајы 160 000-и кечмишди! Ҝөрүндүјү кими, баҹы-гардашлар сәрбәст тәблиғ етмәк фүрсәти јарананда ағылла давранмышдылар. Әмин-аманлыг дөврү узун чәкмәди. Амма һәтта вәзијјәт дәјишәндән сонра да баҹы-гардашларымызын хидмәтдә шөвгү азалмады. Онлар Јеһованын јолунда әлләриндән ҝәләни етмәјә давам едирләр.

14, 15. Јеһова Өз гүдрәти илә Аса падшаһын дадына неҹә чатды?

¹⁴ Аса падшаһын вахтында әмин-аманлыг дөврү әввәл-ахыр сона чатды. Һәбәшдән бир милјонлуг орду онларын үстүнә  јүрүш етди. Орду башчысы Зараһ әмин иди ки, Јәһуданы мәғлуб едәҹәк. Амма Аса падшаһ ордунун сајына јох, Аллаһы Јеһоваја ҝүвәнирди. О белә дуа етмишди: «Јетиш дадымыза, еј Аллаһымыз Јеһова! Биз Сәнә архаланырыг, бу издиһамын габағына Сәнин адынла чыхмышыг» (2 Салн. 14:11).

¹⁵ Һәбәш ордусунда әсҝәрләрин сајы тәхминән ики гат чох олса да, Аса билирди ки, Јеһова гүдрәтлидир вә халгы наминә һәрәкәтә кечмәјә гадирдир. Јеһова ону наүмид гојмады, Һәбәш ордусу рүсвајчылыг ичиндә мәғлуб олду (2 Салн. 14:8—13).

16. Һарадан билирик ки, әмин-аманлыг дөврү узун сүрмәјәҹәк?

¹⁶ Һеч биримиз ҝәләҹәкдә башымыза нә ҝәләҹәјини тәфәррүаты илә билмирик, амма бир шеји билирик ки, Јеһованын халгынын јашадығы истәнилән әмин-аманлыг дөврү мүвәггәтидир. Иса Мәсиһ пејғәмбәрлик етмишди ки, ахырзаманда бүтүн халглар онун давамчыларына нифрәт едәҹәк (Мәт. 24:9). Һәвари Булус да демишди ки, «Мәсиһ Исанын шаҝирди кими мөмин һәјат сүрмәк истәјәнләрин һамысы тәгиб олунаҹаг» (2 Тим. 3:12). Шејтан «бөјүк гәзәблә» бизә гаршы вурушур вә онун гәзәбинә туш ҝәлмәјәҹәјимизи дүшүнсәк, өзүмүзү алдатмыш оларыг (Вәһј 12:12).

17. Иманымыз неҹә сынана биләр?

¹⁷ Бир аздан һәр биримизин иманы сынанаҹаг. Чох тезликлә дүнјада «елә бөјүк мүсибәт олаҹаг ки, беләси дүнја јаранандан бәри олмамышдыр» (Мәт. 24:21). Һәмин вахт, ола билсин, аилә үзвләримиз бизә гаршы чыхсын вә тәблиғ фәалијјәтимизә гадаға гојулсун (Мәт. 10:35, 36). Аса падшаһ кими, шәхсән сиз Јеһованын көмәјинә вә мүдафиәсинә етибар едәҹәксиниз?

18. Ибраниләрә 10:38, 39 ајәләринә әсасән, әмин-аманлыг дөврүнүн сонуна неҹә һазыр ола биләрик?

¹⁸ Јеһова инди бизи гаршыдакы һадисәләрә һазырлајыр. О, ибадәтимизи әзмлә давам етдирмәјимиз үчүн «садиг вә ағыллы нөкәр» васитәсилә «вахтлы-вахтында» руһани гида верир (Мәт. 24:45). Ҝәрәк биз дә өһдәмизә дүшәни едиб, Јеһоваја сарсылмаз  иман јетишдирәк. (Ибраниләрә 10:38, 39 ајәләрини охујун.)

19, 20. 1 Салнамәләр 28:9 ајәсинә әсасән, һансы суалларын үзәриндә дүшүнмәлијик вә нәјә ҝөрә?

¹⁹ Аса падшаһ кими, биз дә Јеһоваја ибадәт етмәлијик (2 Салн. 14:4; 15:1, 2). Биз буна Јеһова һагда өјрәнәндә вә вәфтиз олунанда башламышыг. Бундан сонра да һәр фүрсәтдән истифадә едиб Јеһоваја мәһәббәтимизи ҝүҹләндирмәлијик. Мәһәббәтимизин нә дәрәҹәдә ҝүҹлү олдуғуну јохламаг үчүн өзүмүздән соруша биләрик: «Ибадәт ҝөрүшләриндә мүнтәзәм иштирак едирәм?» Бу ҝөрүшләр бизә Јеһоваја хидмәт етмәк үчүн ҝүҹ верир вә диндашларымызла үнсијјәтдән руһланырыг (Мәт. 11:28). Һәмчинин бу суалын үзәриндә дүшүнмәк јахшы олар: «Мүгәддәс Китабы мүнтәзәм мүталиә етмәји вәрдиш етмишәм?» Әҝәр аиләнизлә јашајырсынызса, һәр һәфтә аиләви ибадәт кечирирсиниз? Тәк јашајырсынызса, аиләләр кими, сиз дә ибадәт үчүн вахт ајырырсыныз? Һәмчинин тәблиғ вә шаҝирд һазырламаг ишиндә там шәкилдә иштирак едирсиниз?

²⁰ Нәјә ҝөрә бу суалларын үзәриндә дүшүнмәлијик? Мүгәддәс Китабда јазылыб ки, Јеһова үрәкләри, фикирләри арашдырыр. Она ҝөрә биз дә үрәјимизи, фикирләримизи арашдырмалыјыг. (1 Салнамәләр 28:9 ајәсини охујун.) Әҝәр ҝөрсәк ки, мәгсәдләримиздә, дүшүнҹәмиздә мүәјјән дәјишиклик етмәк лазымдыр, бу саһәдә Јеһовадан көмәк истәмәлијик. Инди гаршыдакы сынаглара өзүмүзү һазырламаг вахтыдыр. Гојмајын ки, бу әмин-аманлыг дөврүндә ағылла давранмағыныза нәсә мане олсун!