1. Доғма инсанын јығынҹагдан кәнар едилмәси инсана неҹә тәсир едә биләр?

 ДОҒМАЛАРЫНЫЗДАН кимсә јығынҹагдан кәнар едилиб? Бу, инсанын үрәјини дағлајыр. Һилда * адлы баҹы дејир: «41 иллик өмүр-ҝүн јолдашым вәфат едәндә елә билирдим ки, һәјатда бундан бөјүк дәрд јохдур. Амма сонра оғлум јолдашыны, ушагларыны атанда вә јығынҹағы тәрк едәндә бу мәнә даһа бөјүк зәрбә олду, мән бетәрин-бетәрини јашадым».

2, 3. Зәбур 78:40, 41 ајәләринә әсасән, хидмәтчиләри Јеһовадан үз дөндәрәндә О һансы һиссләри кечирир?

² Јеһованын руһани аиләсиндәки бәзи мәләкләр Ондан үз дөндәрәндә, бир дүшүнүн, бу Она неҹә бөјүк гәлб ағрысы вермишди (Јһд. 6). Јахуд да әзиз халгынын, исраиллиләрин дәфәләрлә Јеһоваја аси чыхмасы Ону чох кәдәрләндирмишди. (Зәбур 78:40, 41 ајәләрини охујун.) Әмин олун ки, доғманызын Јеһованы тәрк етмәси дә Ону кәдәрләндирир. Шәфгәтли Аллаһымыз сизин дәрдинизи дујур, О сиздән лазыми дәстәји вә тәсәллини әсирҝәмәјәҹәк.

³ Бу мәгаләдән өјрәнәҹәјик ки, Јеһованын көмәјини дујмаг үчүн биз нә едә биләрик. Һәмчинин арашдыраҹағыг ки, јығынҹагда белә бир итки илә үзләшәнләрә неҹә көмәк едә биләрик. Амма әввәлҹә ҝәлин ҝөрәк һансы јанлыш дүшүнҹәјә гапылмамалыјыг.

4. Бир чох валидејн оғлу вә ја гызы һәгигәтдән үз дөндәрәндә һансы һиссләри кечирир?

⁴ Инсанын оғлу вә ја гызы Јеһовадан узаглашанда чох вахт валидејнләр өзләрини гынајыр, фикирләширләр ки, өвладларынын һәгигәтдә галмасы үчүн ҝәрәк даһа чох чалышардылар. Лук адлы гардашын оғлу јығынҹагдан кәнар едилмишди. О дејир: «Өзүмү ҝүнаһландырырдым. Ҝеҹәләр јухуму гарышдырырдым,  бәзән ағлајырдым. Үрәјим парчаланырды». Елизабет адлы баҹынын да оғлу јығынҹагдан кәнар олунмушду. О да мәнәви изтираб чәкирди: «Дүшүнүрдүм, ҝөрәсән, бир ана кими нәји сәһв етмишәм? Јәгин, оғлума һәгигәти ашылаја билмәмишәм».

5. Инсан Јеһованы тәрк едәндә буна ҝөрә ким мәсулијјәт дашыјыр?

⁵ Унутмамалыјыг ки, Јеһова һәр биримизә ирадә азадлығы вериб. Бу о демәкдир ки, Она итаәт едиб-етмәмәк һәр кәсин өз сечимидир. Елә ҝәнҹләр вар ки, һеч дә нүмунәви аиләдә бөјүмәјибләр, амма Јеһоваја хидмәти сечибләр вә Она садигдирләр. Еләләри дә вар ки, валидејнләри онлары Мүгәддәс Китаб принсипләри әсасында бөјүтмәк үчүн әлләриндән ҝәләни едиб. Амма онлар бөјүјәндә һәгигәтдән ҝедибләр. Нәтиҹә етибарилә, Јеһоваја хидмәт едиб-етмәјәҹәјимизә һәр биримиз өзүмүз гәрар вермәлијик (Јуш. 24:15). Пәришан һалда олан валидејнләр, дүшүнмәјин ки, үзләшдијиниз бу фаҹиә сизин тәгсириниз уҹбатындан олуб.

6. Валидејнин һәгигәти тәрк етмәси өвладына неҹә тәсир едә биләр?

⁶ Бәзи валидејнләр һәм һәгигәтдән дөнүр, һәм дә аиләсини тәрк едир (Зәб. 27:10). Ушаг валидејнинә өрнәк кими бахдығына ҝөрә белә бир һадисә баш верәндә чох сарсылыр. Естерин атасы јығынҹагдан кәнар олунуб. О дејир: «Тез-тез мәни ағламаг тутурду, чүнки баша дүшүрдүм ки, атам садәҹә олараг һәгигәтдән узаглашмајыб, о, артыг Јеһоваја ибадәт етмәмәјә гәрар вериб. Атамы чох севирәм. О, јығынҹагдан кәнар едиләндә она ҝөрә һәмишә нараһат идим ки, ҝөрәсән, ҹаны-башы неҹәдир, нә иш ҝөрүр. Һәтта паник атаклар кечирирдим».

7. Валидејни јығынҹагдан кәнар едилән ушаглара гаршы Јеһова һансы һиссләри кечирир?

⁷ Әзиз балалар, әҝәр валидејниниз јығынҹагдан кәнар едилибсә, билин ки, сизә ҝөрә үрәјимиз парчаланыр. Әмин олун ки, Јеһова сизин неҹә әзаб чәкдијинизи јахшы баша дүшүр. О сизи севир, сәдагәтинизи чох гијмәтләндирир, еләҹә дә биз, јығынҹагдакы баҹы-гардашларыныз. Һәмчинин унутмајын ки, валидејнинизин гәрарына ҝөрә сиз мәсулијјәт дашымырсыныз. Бајаг да гејд олундуғу кими, Јеһова һәр кәсә сечим азадлығы вериб. Она һәср олунуб вәфтиз олунмуш һәр бир кәс «өз мәсулијјәт јүкүнү» дашымалыдыр (Гал. 6:5).

8. Аиләнин диҝәр үзвләри јығынҹагдан кәнар едилмиш инсанын ҝери гајытмасыны ҝөзләдикләри мүддәтдә нә едә биләр? (« Јеһоваја ҝери дөн» адлы чәрчивәјә бахын.)

⁸ Јахынымыз јығынҹагдан кәнар едиләндә, тәбии олараг, үмид едирик ки, о, бир ҝүн Јеһоваја ҝери дөнәҹәк. Бәс бу мүддәт әрзиндә сиз нә едә биләрсиниз? Өз руһани сағламлығынызын гајғысына галын. Белә етмәклә, аиләнизин диҝәр үзвләринә, һәтта, ола билсин, јығынҹагдан кәнар едилмиш инсана да јахшы нүмунә олаҹагсыныз. Һәмчинин бу әзаба дөзмәк үчүн ҝүҹ әлдә едәҹәксиниз. Нөвбәти мәсләһәтләр сизә руһани ҹәһәтдән мөһкәм галмаға көмәк едә биләр.

9. Јеһовадан ҝүҹ алмаг үчүн нә едә биләрсиниз? (Һәмчинин « Тәскинлик верән ајәләр» адлы чәрчивәјә бахын.)

⁹ Мүнтәзәм руһани ишләрлә мәшғул олун.  Бундан сонра да һәм өзүнүзүн, һәм дә аиләнизин диҝәр үзвләринин иманыны мөһкәмләндирин. Бу, чох ваҹибдир. Буну неҹә едә биләрсиниз? Аллаһын Кәламыны мүнтәзәм мүталиә етмәклә, охудугларыныз һаггында дәриндән дүшүнмәклә, һәмчинин јығынҹаг ҝөрүшләриндә иштирак етмәклә Јеһовадан ҝүҹ алын. Ҹоаннанын атасы вә баҹысы һәгигәти тәрк едиб. О дејир: «Мүгәддәс Китабдан Абигајил, Әстәр, Әјјуб, Јусиф вә Иса һаггында охујанда тохтаглыг тапырам. Онларын нүмунәси мәндә никбин әһвал-руһијјә јарадыр. Бу да гәлбимин ағрысыны јүнҝүлләшдирир. Һәмчинин фикир вермишәм ки, тәшкилатымызын маһнылары да мәни руһландырыр».

10. Зәбур 32:6—8 ајәләринә әсасән, гәлб ағрысыны неҹә диндирә биләрик?

¹⁰ Дәрдинизи Јеһова илә бөлүшүн. Һәтта кәдәрли вахтларынызда белә, дуа етмәји дајандырмајын. Јеһоваја јалварын ки, вәзијјәтә Онун ҝөзү илә бахмағыныза көмәк етсин. Һәмчинин сизи өјрәтсин, доғру јола јөнәлтсин. (Зәбур 32:6—8 ајәләрини охујун.) Ола биләр ки, дуа едиб үрәјинизин дәрдини Јеһоваја данышмаг истәјәндә гәһәр сизи боғур. Билин ки, Јеһова сизин бу һиссләринизи чох јахшы анлајыр. О сизи севир вә истәјир ки, үрәјинизи Она бошалдасыныз (Чых. 34:6; Зәб. 62:7, 8).

11. Ибраниләрә 12:11 ајәсинә әсасән, Јеһованын мәһәббәтдән ирәли ҝәлән ҹәза тәдбиринә нәјә ҝөрә етибар етмәлијик? (« Јығынҹагдан кәнаредилмә Јеһованын мәһәббәтиндән гајнагланыр» адлы чәрчивәјә бахын.)

¹¹ Ағсаггалларын вердији гәрары дәстәкләјин. Бу, Јеһованын ҝүнаһ ишләјән инсаны ислаһ етмәк үчүн ҝөрдүјү тәдбирләрдән биридир. Мәһәббәтдән гајнагланан бу тәдбир ҝүнаһ ишләјән инсан да дахил олмагла, һәр кәсин хејринәдир. (Ибраниләрә 12:11 ајәсини охујун.) Бәзән јығынҹагда кимләрсә ағсаггалларын вердији гәрарын әлејһинә фикирләр сөјләјирләр, амма чох вахт онлар биртәрәфли  данышырлар. Нәзәрә алын ки, биз бүтүн фактлары билмирик. Буна ҝөрә һикмәтли олар ки, интизам комитәсиндәки ағсаггаллара етибар едәк, онларын Мүгәддәс Китаб принсипләринә әмәл етмәк вә «Јеһова үчүн» гәрар чыхармагдан өтрү әлләриндән ҝәләни етдикләринә ҝүвәнәк (2 Салн. 19:6).

12. Бәзиләри јығынҹагдан кәнар олунан инсанла үнсијјәт етмәмәк ҝөстәришинә әмәл етмәјин һансы хејрини ҝөрүб?

¹² Ағсаггалларын јахынынызла бағлы чыхардығы гәрары дәстәкләмәјиниз она Јеһоваја ҝери дөнмәјә көмәк едә биләр. Әввәлдә ады чәкилән Елизабет дејир: «Јеткин јашда олан оғлумузла бүтүн мүнасибәтимизи кәсмәк һәдсиз дәрәҹәдә чәтин иди. Амма оғлумуз бәрпа олунандан сонра етираф етмишди ки, ону һаглы олараг јығынҹагдан кәнар етмишдиләр. Сонралар о деди ки, бунун сајәсиндә чох шеј өјрәнди. Мән Јеһованын ҹәза тәдбиринин дүзҝүн олдуғуну дәрк етдим». Баҹынын јолдашы Марк дејир: «Хејли сонра оғлум мәнә деди ки, ону ҝери гајытмаға тәшвиг едән шејләрдән бири бизим тәләб олундуғу кими давранмағымыз олуб. Јеһоваја миннәтдарам ки, бизә итаәткар олмаға көмәк етди».

13. Дәрдинизи јүнҝүлләшдирмәјә сизә нә көмәк едә биләр?

¹³ Сизи анлајаҹаг достунузла дәрдләшин. Никбин әһвал-руһијјәнизи горумаға көмәк едәҹәк јеткин мәсиһиләрлә үнсијјәт един (Мәс. 12:25; 17:17). Бајаг ады чәкилән Ҹоанна баҹы дејир: «Дахилән өзүмү чох тәнһа һисс едирдим. Амма етибарлы достларла сөһбәт етмәјин мәнә хејли көмәји олду». Бәс әҝәр јығынҹагда кимләринсә сөзүнә ҝөрә өзүнүзү пис һисс едирсинизсә, нә едә биләрсиниз?

14. Нәјә ҝөрә биз бир-биримизә гаршы һәмишә сәбирли олуб, үрәкдән бағышламалыјыг?

¹⁴ Баҹы-гардашларыныза гаршы сәбирли олун. Биз ҝөзләмәмәлијик ки, һамы һәмишә дүзҝүн сөзләр сечиб данышаҹаг (Јаг. 3:2). Биз һамымыз гејри-камилик. Буна ҝөрә дә ола биләр ки, кимсә нә дејәҹәјини билмир, јахуд да истәмәдән хәтримизә дәјән сөзләр дејир. Һәвари Булусун нөвбәти мәсләһәтини унутмајын: «Бир-биринизә гаршы һәмишә сәбирли олун, биринизин диҝәриндән шикајәти олса да, бир-биринизи үрәкдән бағышлајын» (Кол. 3:13). Бир баҹынын аилә үзвү јығынҹагдан кәнар едилмишди. О дејир: «Јеһова мәнә көмәк едиб ки, мәни руһландырмаға чалышан, амма буну гејри-камил шәкилдә едән баҹы-гардашларымы бағышлајым». Бәс јығынҹаг аиләнин садиг үзвләринә неҹә көмәк едә биләр?

15. Аилә үзвү јығынҹагдан кәнар едилән диндашымыза неҹә дәстәк ола биләрик?

¹⁵ Аиләдәки садиг мәсиһиләрә хејирхаһ вә достјана мүнасибәт ҝөстәрин. Мириам адлы баҹынын гардашы јығынҹагдан кәнар едиләндән сонра баҹы јығынҹаға ҝетмәјә чәкинирди. О дејир: «Мәни фикир ҝөтүрмүшдү ки, ҝөрәсән, ҹамаат нә дејәҹәк. Амма јығынҹагдакы ҝөзәл достларым дәрдимә шәрик олду. Мәнә гардашымла бағлы пис һеч нә демәдиләр. Онларын сајәсиндә бу  чәтин анларымда өзүмү тәк һисс етмәдим». Башга бир баҹы исә дејир: «Оғлумуз јығынҹагдан кәнар едиләндән сонра дәјәрли достларымыз бизә тәскинлик вермәјә ҝәлдиләр. Бәзиләри дејирди ки, һеч билмирләр нә десинләр. Амма мәнимлә ағлајырдылар, мәнә руһландырыҹы мәктублар ҝөндәрирдиләр. Онларын мәнә чох бөјүк көмәји дәјди!»

16. Јығынҹаг аиләдәки садиг мәсиһиләрә давамлы олараг неҹә дәстәк ола биләр?

¹⁶ Аиләнин садиг үзвләринә дајаг олмаға давам един. Онларын сизин мәһәббәтинизә, руһландырыҹы сөзләринизә инди даһа чох еһтијаҹлары вар (Ибр. 10:24, 25). Бәзән јығынҹагдан кәнар едилмиш инсанын аилә үзвләри өзләринә гаршы елә мүнасибәт ҝөрүр ки, санки онлар да јығынҹагдан кәнар едилибләр. Гојмајын онлар өзләрини белә һисс етсин! Валидејнләри һәгигәтдән ҝетмиш ҝәнҹләрин тәрифә вә руһландырыҹы сөзләрә хүсусилә еһтијаҹы вар. Марија баҹынын јолдашы јығынҹагдан кәнар едилмишди вә аиләсини атыб ҝетмишди. Баҹы дејир: «Бәзи достларымыз бизә ҝәлиб, јемәк биширмәјә, аиләви ибадәт кечирмәјә көмәк едирдиләр. Онлар мәним дәрдими өз дәрдләри билдиләр, мәнимлә ағладылар. Мәним һагда шајиәләр данышыланда мәни мүдафиә едирдиләр. Онлар мәни сөзүн әсл мәнасында дирчәлтдиләр!» (Ром. 12:13, 15).

17. Ағсаггаллар гәмҝинләрә неҹә тәскинлик верә биләр?

¹⁷ Әзиз ағсаггаллар, садиг аилә үзвләринә дәстәк олмаг үчүн һәр фүрсәти дәјәрләндирин. Јахыны Јеһованы тәрк етмиш диндашыныза тәскинлик вермәк хүсусилә сизин мәсулијјәтиниздир (1 Салон. 5:14). Јығынҹагдан әввәл вә сонра онлары руһландырмаг үчүн тәшәббүс ҝөстәрин. Онлары зијарәт един, онларла бирҝә дуа един. Хидмәтдә онларла әмәкдашлыг един, аиләви ибадәтинизә дәвәт един. Гајғыкеш чобанлар Јеһованын гәмҝин гузуларына шәфгәт, мәһәббәт вә диггәт ҝөстәрмәлидир (1 Салон. 2:7, 8).

18. 2 Бутрус 3:9 ајәсинә әсасән, Јеһова ҹидди ҝүнаһ ишләјәнләрин нә етмәсини истәјир?

¹⁸ Јеһова «һеч кәсин мәһв олмасыны истәмир, әксинә, истәјир ки, һамы төвбәјә  ҝәлсин». (2 Бутрус 3:9 ајәсини охујун.) Һәтта инсан ҹидди ҝүнаһ ишләсә дә, онун һәјаты Јеһованын ҝөзүндә дәјәрлидир. Бир дүшүнүн, Јеһова ҝүнаһкарларын һәјаты үчүн неҹә бөјүк бир дәјәр вериб — севимли Оғлуну гурбан вериб. Шәфгәтли Аллаһымыз Јеһова ҝүнаһ ишләјәнләрин Она ҝери дөнмәсинә көмәк етмәјә чалышыр. Онларын бу сечими едәҹәјинә үмидини итирмир. Буну Иса Мәсиһин итмиш оғул һагда чәкдији мәсәлдән ҝөрмәк олар (Лука 15:11—32). Доғрудан да, Јеһовадан узаглашмыш бир чохлары сонралар Она ҝери дөнүбләр. Јығынҹаг да онлары бөјүк севинҹлә гәбул едиб. Бајаг ады чәкилән Елизабет дә оғлу бәрпа олунанда бу хошбәхтлији јашады. Елизабет дејир: «Мәни үмидими итирмәмәјә тәшвиг едәнләрә чох миннәтдарам».

19. Нәјә ҝөрә һәмишә Јеһоваја етибар едә биләрик?

¹⁹ Биз Јеһоваја һәмишә етибар едә биләрик. О, һеч заман бизим зәрәримизә олан ҝөстәришләр вермир. О, рәһмли Атадыр, көмәк әли узатмаға һәмишә һазырдыр. Ону севән вә Она ибадәт едән һәр кәси дәрин мәһәббәтлә севир. Әмин олун ки, Јеһова сизи изтираблы анларынызда тәрк етмәјәҹәк (Ибр. 13:5, 6). Јухарыда ады чәкилән Марк дејир: «Јеһова һеч вахт бизи атмады. Биз чәтинликләр јашајанда О, һәр заман бизим јанымызда олур». Јеһова сизә «инсан ҝүҹүндән үстүн олан ҝүҹү» вермәјә давам едәҹәк (2 Кор. 4:7). Бәли, јахыныныз Јеһованы тәрк етсә дә, сиз үмидинизи итирмәдән Јеһоваја садиг гала биләрсиниз.