1940-ҹы илләрин әввәлиндә Јеһованын Шаһидләри валидејнләримә Мүгәддәс Китаб дәрси кечирди. Бир мүддәт сонра валидејнләрим дәрсләри дајандырды. Амма анам «Ҝөзәтчи гүлләси» вә «Ојанын!» журналларыны алмаға давам етди. 1950-ҹи илдә аиләмиз Нју-Јорк шәһәриндә кечирилән бејнәлхалг топлантыја дәвәт олунду вә биз бу топлантыда иштирак етдик.

Бундан гыса мүддәт сонра Лоренс Ҹефриз гардаш бизи зијарәт етмәјә башлады. О мәним һәгигәти өјрәнмәјим үчүн ҹан јандырырды. Мән әввәл-әввәл Јеһованын Шаһидләринин сијаси вә һәрби мәсәләләрә гарышмамасы илә разылаша билмирдим. Онунла мүбаһисә едиб дејирдим ки, әҝәр Америкада һеч ким мүһарибәјә ҝетмәсә, дүшмән ҝәлиб бүтүн өлкәни ишғал едәр. О исә тәмкинлә изаһ едирди: «Әҝәр Америкада јашајан бүтүн инсанлар Јеһова Аллаһа ибадәт етсә вә дүшмәнләр онлара һүҹум етсә, сәнҹә, Јеһова нә едәр?» Онун һәм бу, һәм дә диҝәр мөвзуларда ағлабатан изаһатлары мәнә јанлыш дүшүндүјүмү баша дүшмәјә көмәк етди. Беләҹә, мәним Мүгәддәс Китабы өјрәнмәјә марағым артды.

Анамын зирзәмијә гојдуғу «Ҝөзәтчи гүлләси» вә «Ојанын!» журналларынын көһнә сајларыны саатларла охујурдум. Заманла баша дүшдүм ки, өјрәндикләрим һәгигәтдир, буна ҝөрә дә Лоренс гардашын дәрс кечмәк тәклифини гәбул етдим. Мән һәмчинин мүнтәзәм олараг ибадәт ҝөрүшләриндә дә иштирак етмәјә башладым. Үрәјимдә һәгигәтә севҝи ашыб-дашырды вә мән хош хәбәрин тәблиғчиси олдум. «Јеһованын мөһтәшәм ҝүнү»нүн јахын олдуғуну дәрк едәндә мәгсәдләрим дәјишди (Сәф. 1:14). Артыг истәјим университетдә тәһсил алмаг јох, инсанлара Мүгәддәс Китаб һәгигәтини өјрәтмәк иди.

 1956-ҹы ил ијунун 13-ү орта мәктәби битирдим вә үч ҝүн сонра рајон топлантысында вәфтиз олундум. О вахт һеч ағлыма да ҝәлмәзди ки, һәјатымы Јеһова һагда өјрәнмәјә вә өјрәтмәјә һәср етмәклә бу гәдәр чох немәтләр аларам.

Вәфтиздән алты ај сонра мән өнҹүл олдум. «Мүгәддәс ибадәтимиз» вәрәгәсинин 1956-ҹы ил декабр сајында «Тәблиғчиләрә тәләбат олан әразидә хидмәт едә биләрсиниз?» адлы мәгалә вар иди. Бу дәвәт мәнә дә аид иди. Мән дә истәјирдим ки, тәблиғчијә еһтијаҹ олан әразидә хидмәт едим (Мәт. 24:14).

Мән Еҹфилдә, Ҹәнуби Каролинаја көчдүм. Орадакы јығынҹагда ҹәми дөрд тәблиғчи вар иди, мәнимлә бирликдә беш олду. Биз ҝөрүшләри бир гардашын евинин гонаг отағында кечирирдик. Һәр ај 100 саат тәблиғ едирдим. Мән чох мәшғул идим: тәблиғ ишини тәшкил едирдим, јығынҹағын бәндләрини апарырдым. Мараглысы о иди ки, јығынҹагда нә гәдәр чох иш ҝөрүрдүмсә, Јеһова һагда бир о гәдәр чох өјрәнирдим.

Мүгәддәс Китаб дәрси кечдијим бир гадынын бурадан бир нечә километр аралыда јерләшән Ҹонстон шәһәриндә дәфн мәрасими үчүн залы вар иди. О мәни ишлә тәмин етди. Һәфтәдә бир нечә ҝүн ишләјирдим, бу ишә чох еһтијаҹым вар иди. Һәмчинин о, разылыг верди ки, һәмин о балаҹа залдан ибадәт еви кими истифадә едәк.

Мәнә дәрс кечән гардашын оғлу, Ҹолли Ҹефриз Бруклиндән (Нју-Јорк) мәним јаныма көчдү вә мәним өнҹүл әмәкдашым олду. Бир гардашын балаҹа гошгу еви вар иди, о бизә орада јашамаға иҹазә верди.

Бурада әмәкһаггы чох ашағы иди. Биз ҝүнә ики-үч доллар газанырдыг. Бир дәфә пулум гуртармышды, ахырынҹы гәпијимә мағазадан јемәјә бир-ики шеј алдым. Мағазадан чыханда бир киши мәнә јахынлашыб сорушду: «Иш истәјирсән? Саатына бир доллар верәҹәјәм». Тикинти әразисиндә үч ҝүнлүк тәмизлик ишләри вар иди, мән һәмин ишләри ҝөрдүм. Ајдын иди ки, Јеһова Еҹфилддә галмағым үчүн мәнә көмәк едир. Мадди сыхынтым олса да, 1958-ҹи илдә Нју-Јорк шәһәриндә кечирилән бејнәлхалг топлантыја ҝедә билдим.

Топлантынын икинҹи ҝүнү мәним үчүн хүсуси ҝүн иди. Мән Руби Вадлигтон адлы баҹы илә таныш олдум. О, Галлатин шәһәриндә (Теннесси штаты) өнҹүл кими хидмәт едирди. Икимиз дә хүсуси тәјинатлы мүждәчи олмаг истәјирдик, буна ҝөрә дә топлантыда Ҝилад мәктәбиндә охумаг истәјәнләр үчүн кечирилән ҝөрүшдә иштирак етдик. Сонралар мәктублашмаға башладыг. Бир дәфә мәни Галлатиндәки јығынҹагда ачыг нитглә чыхыш етмәјә дәвәт етмишдиләр. Мән фүрсәтдән истифадә едиб Рубијә евлилик тәклиф етдим. Сонра Рубинин олдуғу јығынҹаға кечдим вә биз 1959-ҹу илдә аилә гурдуг.

23 јашым оланда мән Галлатиндәки јығынҹагда ағсаггаллар шурасынын координатору тәјин олундум (о вахткы ады илә јығынҹаг хидмәтчиси). Бизим  јығынҹаг Чарлз Томпсон гардашын рајон нәзарәтчиси кими зијарәт етдији илк јығынҹаг иди. О, чох тәҹрүбәли иди; бунунла белә, баҹы-гардашлара нәдә көмәк лазым олдуғу илә бағлы мәним фикрими сорушурду вә диҝәр рајон нәзарәтчиләринин онлара неҹә көмәк етдији илә марагланырды. Ондан өјрәндим ки, һансыса мәсәләни һәлл етмәздән өнҹә суаллар вериб, вәзијјәтә һәртәрәфли бәләд олмаг јахшы шејдир.

1964-ҹү илин мај ајында мән Саут-Лансингдә (Нју-Јорк) кечирилән Мәсул Гардашлар үчүн Мәктәбә дәвәт алдым. Тәлим мүддәти бир ај иди. Тәлим верән гардашларын сајәсиндә үрәјимдә даһа чох шеј өјрәнмәк вә руһани ҹәһәтдән јеткинләшмәк үчүн ҝүҹлү истәк јаранды.

1965-ҹи илин јанвар ајында филиал Руби илә мәнә рајон хидмәтиндә иштирак етмәји тәклиф етди. Тәјин олундуғумуз рајонун әразиси чох ҝениш иди. Та Ноксвиллдән (Теннесси штаты), аз гала, Ричмонда (Вирҝинија штаты) кими иди. Бура Шимали Каролина, Кентукки вә Гәрби Вирҝинијадакы јығынҹаглар дахил иди. Мән јалныз гарадәрили баҹы-гардашларын олдуғу јығынҹаглары зијарәт едирдим, чүнки о вахтлар Бирләшмиш Штатларын ҹәнубунда ирги сегрегасија олдуғуна ҝөрә ағдәрилиләрлә гарадәрилиләр бирҝә јығыша билмәздиләр. Баҹы-гардашлар чох касыб идиләр вә биз оланымызы башгалары илә бөлүшмәји өјрәндик. Узун илләр рајон нәзарәтчиси кими хидмәт едән бир гардаш мәнә чох ҝөзәл мәсләһәт вермишди: «Гардаш ол. Јығынҹаға рәис кими ҝирмә. Онлар сәнә гардашлары кими јанашсалар, онда онлара көмәк едә биләҹәксән».

Биз балаҹа бир јығынҹағы зијарәт едән вахт Руби бир ҝәнҹ гадынла дәрс кечмәјә башлады. Онун бир јашында гызы вар иди. Јығынҹагда киминсә онунла дәрс кечмәси алынмадығы үчүн Руби она мәктуб васитәсилә дәрс кечирди. Нөвбәти зијарәтимиз заманы гадын бүтүн ҝөрүшләрдә иштирак етди. Сонра бу јығынҹаға ики хүсуси өнҹүл тәјин олунду вә һәмин гадынла дәрсләри онлар давам етдирдиләр. Чох кечмәмиш бу гадын вәфтиз олунду. Тәхминән 30 ил сонра, 1995-ҹи илдә Патерсондакы Бејтелдә бир ҹаван баҹы Рубијә јахынлашыб танышлыг верди. О, Рубинин дәрс кечдији гадынын гызы иди. О, јолдашы илә бирҝә Ҝилад мәктәбинин 100-ҹү синфиндә охујурду.

Тәјин олундуғумуз икинҹи рајон Флоридада иди. Тәхминән о вахтларда бизим автомобилә еһтијаҹымыз вар иди вә чох уҹуз гијмәтә бирини тапдыг. Амма елә биринҹи һәфтә онун су насосу хараб олду, тәмирә исә пулумуз јох иди. Ағлыма бир гардаш ҝәлди, ондан көмәк истәдим. О да ишчиләриндән биринә тапшырды ки, автомобили тәмир етсин вә биздән пул ҝөтүрмәсин. Гардаш садәҹә бизә деди: «Сизин һеч бир борҹунуз јохдур». Һәлә үстәлик, бизә пул көмәклији етди! Бу, Јеһованын Өз хидмәтчиләринин гејдинә галдығына бариз нүмунә иди. Бу һадисә бизә бир даһа хатырлатды ки, башгаларына гаршы сәхавәтли олаг.

Јығынҹаглара зијарәт едәндә баҹы-гардашларын евиндә галырдыг. Бунун сајәсиндә чохлу достларымыз олду. Бир дәфә јығынҹагла бағлы һесабат һазырлајырдым вә ону чап машынында јарымчыг гојуб ҝетмишдим. Ахшам евә гајыданда ҝөрдүм ки, евиндә галдығымыз аиләнин үчјашлы оғлу һесабаты тамамламагда мәнә «көмәк едиб». Бу һәрәкәтинә ҝөрә онунла нечә ил зарафатлашдым.

1971-ҹи илдә бир мәктуб алдым. Мән Нју-Јорк шәһәринә вилајәт нәзарәтчиси кими тәјин олунмушдум. Белә бир тәјинаты һеч ҝөзләмирдик! Һәмин шәһәрә көчәндә ҹәми 34 јашым вар иди. Баҹы-гардашлар мәни, илк гарадәрили вилајәт нәзарәтчиләрини чох меһрибан гаршыладылар.

Бир вилајәт нәзарәтчиси кими, мән һәр һәфтәсону рајон топлантысында Јеһова һагда өјрәдирдим. Рајон нәзарәтчиләринин чоху мәндән тәҹрүбәли иди. Онлардан бири мәним вәфтиз нитгими сөјләмишди. О бири гардаш, Теодор Јарач сонралар Рәһбәрлик Шурасынын үзвү олду. Һәмчинин Бруклиндәки Бејтелдә хидмәт едән чохлу тәҹрүбәли гардашларла әмәкдашлыг едирдим. Рајон нәзарәтчиләри вә бејтеллиләр мәнимлә елә мүнасибәт гурурдулар ки, өзүмү раһат һисс едирдим. Онлара чох миннәтдар идим. Онларын неҹә гајғыкеш ағсаггал олдугларыны, Аллаһын Кәламына етибар етдикләрини вә тәшкилаты сәдагәтлә дәстәкләдикләрини өз ҝөзүмлә ҝөрүрдүм. Бу гардашларын тәвазөкарлығы сајәсиндә вилајәт нәзарәтчиси кими хидмәт етмәк мәним үчүн хејли асан олду.

1974-ҹү илдә Рәһбәрлик Шурасы башга рајон нәзарәтчиләрини вилајәт нәзарәтчиләри кими тәјин етди. Мән исә јенидән рајон нәзарәтчиси кими тәјин олундум. Бу дәфә бизи Ҹәнуби Каролинаја ҝөндәрдиләр. Артыг орада ағдәрили вә гарадәрили баҹы-гардашлар бир јердә јығышырдылар вә һамы буна ҝөрә чох хошбәхт иди.

1976-ҹы илин сонунда мән Ҹорҹија штатына тәјин олундум. Тәјин олундуғум рајон Атланта илә Колумбус шәһәрләри арасындакы әразини әһатә едирди. Орада баш верән бир ағыр һадисә һәлә дә јадымдадыр. Бир нечә нәфәр бир аиләнин галдығы еви јандырмышды. Аиләнин беш ушағы јанғын нәтиҹәсиндә һәлак олмушду. Ушагларын дәфн нитгини мән сөјләмишдим. Аналары јанғындан хәсарәт алмышды вә хәстәханаја јерләшдирилмишди. Һәм ағдәрили, һәм дә гарадәрили Јеһованын Шаһидләри валидејнләрә тәсәлли вермәк үчүн хәстәханаја ахын едирдиләр. Баҹы-гардашларын ҝөстәрдикләри мәһәббәт әвәзсиз иди. Аллаһын халгы бир-биринин дәрдинә бу ҹүр шәрик оланда онлар һәјатын ән ағыр чәтинликләринә белә, синә ҝәрә билирләр.

1977-ҹи илдә биз бир лајиһәдә көмәк етмәк үчүн бир нечә ајлыг Бруклиндәки Бејтелә дәвәт олундуг. Лајиһә битмәк үзрә оланда Рәһбәрлик Шурасынын ики үзвү мәнимлә ҝөрүшдү. Онлар бизә Бејтелдә даими хидмәт етмәји тәклиф етдиләр. Биз разылашдыг.

Мән 24 ил Хидмәт шөбәсиндә чалышмышам. Бу шөбәдәки гардашлар тез-тез гәлиз вә һәссас мәсәләләрин һәллиндә көмәк едирләр. Илләр әрзиндә Рәһбәрлик Шурасы Мүгәддәс Китаб принсипләринә әсасланан ҝөстәришләр вериб. Хидмәт шөбәси бунларын әсасында суаллара ҹаваб верир. Һәмчинин бу ҝөстәришләр рајон нәзарәтчиләринә, ағсаггаллара вә өнҹүлләрә тәлим вермәк үчүн истифадә олунур. Бу тәлим чохларына руһани ҹәһәтдән инкишаф етмәјә көмәк едиб. Бунун да нәтиҹәсиндә Јеһованын тәшкилаты мөһкәмләниб.

1995—2018-ҹи илләр әрзиндә мән баш идарәнин нүмајәндәси кими (әввәлки ады филиаллар үзрә нәзарәтчи) мүхтәлиф филиаллары зијарәт етмишәм. Мән филиал комитәләринин үзвләри илә, бејтеллиләрлә вә хүсуси тәјинатлы мүждәчиләрлә ҝөрүшүб, онлары руһландырмышам вә онлары нараһат едән бир чох мәсәләләрин һәллиндә көмәк етмишәм. Онларын өзләри барәдә данышдыглары һадисәләр исә Руби илә мәни руһландырыб. Мисал үчүн, 2000-ҹи илдә биз Руанданы зијарәт етмишдик. 1994-ҹү илдә орада сојгырым олмушду. Баҹы-гардашларын вә Бејтел аиләсинин һәмин дөврдән неҹә сағ чыхдыглары һагда ешидәндә риггәтә ҝәлмишдик. Чохларынын доғмалары һәлак олмушду. Амма онлар чәтинликләрә бахмајараг, иманларыны, үмидләрини вә севинҹләрини итирмәмишдиләр.

Јашымыз артыг 80-и һаглајыб. Сон 20 илдир ки, мән Бирләшмиш Штатларын филиал комитәсиндә хидмәт едирәм. Һеч вахт университетдә тәһсил алмамышам. Амма Јеһова вә Онун тәшкилаты мәнә ән али тәһсили вериб. Бу тәлим мәни инсанлара әбәдијјән хејир ҝәтирәҹәк Мүгәддәс Китаб һәгигәтләрини өјрәтмәјә јарарлы едиб (2 Кор. 3:5; 2 Тим. 2:2). Аллаһын Кәламынын инсанларын һәјатыны јахшылыға доғру дәјишдирдијинә вә онларын Јарадана јахынлашдығына шаһид олмушам (Јаг. 4:8). Руби илә мән баҹардығымыз гәдәр инсанлары тәшвиг едирик ки, Јеһова һагда өјрәнмәк вә Мүгәддәс Китаб һәгигәтләрини башгаларына өјрәтмәк имканыны гијмәтләндирсинләр. Ахы бу, Јеһованын хидмәтчиси үчүн ән бөјүк шәрәфдир!