ТӘЛИМ МӘГАЛӘСИ 39
Адыныз «һәјат китабына» јазылыб?
«Јеһовадан горханлар һаггында Онун өнүндә хатирә китабы јазылды» (МӘЛ. 3:16).
НӘҒМӘ 61 Һајды, ирәли, еј Шаһидләр!
ИҸМАЛ *
Јеһова тарих бојунҹа һәјат китабына адлар әлавә едиб (1 вә 2-ҹи абзаслара бахын)
1. Мәлаки 3:16 ајәсинә әсасән, Јеһовада һансы китаб вар вә Јеһова ора нә јазыр?
ЈЕҺОВАНЫН хүсуси бир китабы вар. Бу китаб адлардан ибарәтдир. Јеһова ән биринҹи ора илк садиг шаһиди олан Һабилин адыны јазыб * (Лука 11:50, 51). О вахтдан башлајараг әсрләр әрзиндә чохлу инсанларын адыны ора әлавә едиб. Артыг орада милјонларла инсанын ады вар. Мүгәддәс Китабда о, һәм «хатирә китабы», һәм дә «һәјат китабы» адланыр. Бу мәгаләдә биз «һәјат китабы» ифадәсини ишләдәҹәјик. (Мәлаки 3:16 ајәсини охујун; Вәһј 3:5; 17:8.)
2. Һәјат китабына кимләрин ады јазылыб вә бизим адымызын бу китаба јазылмасы үчүн нә етмәлијик?
2 Бу хүсуси китаба Јеһовадан горхан, Она дәрин еһтирамла ибадәт едән вә Онун адыны әзиз тутан бүтүн инсанларын ады јазылыб. Онларын әбәди јашамаг имканы вар. Адымызын бу китаба јазылмасы үчүн Мәсиһин фидјә гурбанлығы әсасында Јеһова илә сых мүнасибәт гурмалыјыг (Јәһ. 3:16, 36). Истәр ҝөјдә, истәрсә дә јерүзү Ҹәннәтдә јашамаға үмид едәк, бу китабда адымызын олмасыны һәр биримиз истәјирик.
3, 4. а) Һал-һазырда адымызын һәјат китабында олмасы о демәкдир ки, әбәди јашајаҹағыг? Изаһ един. б) Бу вә нөвбәти мәгаләдә нә һагда данышаҹағыг?
3 Бәс бу китаба ады јазыланларын һамысы автоматик әбәди һәјаты алаҹаг? Бу суалын ҹавабы Јеһованын Муса пејғәмбәрә дедији сөзләрдән ајдын олур: «Ким Мәнә гаршы ҝүнаһ едибсә, онун адыны китабымдан силәҹәјәм» (Чых. 32:33). Демәли, бу китабда олан адлары орадан силмәк, јәни позмаг мүмкүндүр, санки Јеһова әввәлҹә бу адлары карандашла јазыр (Вәһј 3:5). Биз чалышмалыјыг ки, адымыз бу китаба «мүрәккәблә», әбәдилик јазылсын.
4 Бунунла бағлы биздә мүәјјән суаллар јарана биләр: «Мүгәддәс Китаба әсасән, кимләрин ады һәјат китабында вар, кимләрин ады исә јохдур? Бу китабда ады јазыланлар әбәди һәјаты нә вахт алаҹаглар? Бәс Јеһованы танымаг имканы олмајыб өләнләр һагда нә демәк олар? Онларын да адынын бу китаба дүшмәси мүмкүндүр?» Бу вә нөвбәти мәгаләдә бүтүн бу суалларын ҹавабыны тапаҹағыг.
БУ КИТАБДА КИМЛӘРИН АДЫ ВАР?
5, 6. а) Филиппилиләрә 4:3 ајәсиндә гејд олундуғу кими, һәјат китабына ады јазыланларын арасында кимләр вар? б) Онларын ады нә вахт һәјат китабына һәмишәлик һәкк олунаҹаг?
5 Бу мәҹази китабда кимләрин ады јазылыб? Бу суалын ҹавабыны билмәк үчүн беш груп инсандан данышаҹағыг. Онларын бәзиләринин ады бу китабда вар, бәзиләрининки исә јохдур.
6 Биринҹи група Иса илә ҝөјдә һакимијјәт сүрмәк үчүн сечилән кәсләр дахилдир. Онларын ады һәјат китабына јазылыб? Бәли, јазылыб. Һәвари Булусун Филиппидәки әмәкдашларына дедији сөзләрә әсасән, Иса илә һакимијјәт сүрмәк үчүн дәвәт олунан мәсһ олунмуш мәсиһиләрин ады һал-һазырда һәјат китабына јазылыб. (Филиппилиләрә 4:3 ајәсини охујун.) Амма онлар адларынын бу китабдан силинмәмәси үчүн садиг галмалыдырлар. Онлар сонунҹу дәфә мөһүрләнәндән сонра исә адлары бу китаба әбәдилик һәкк олунаҹаг. Бәзиләри өлмәмишдән өнҹә, диҝәрләри исә бөјүк мүсибәтдән габаг сонунҹу дәфә мөһүрләнәҹәк (Вәһј 7:3).
7. Вәһј 7:16, 17 ајәләринә әсасән, бөјүк издиһамын ады һәјат китабына нә заман әбәдилик һәкк олунаҹаг?
7 Икинҹи група башга гојунлардан ибарәт бөјүк издиһам дахилдир. Һал-һазырда онларын ады һәјат китабында вар? Бәли, вар. Бәс онлар Армаҝеддондан сағ чыхандан сонра да адлары һәјат китабында олаҹаг? Бәли, олаҹаг (Вәһј 7:14). Иса Мәсиһ онларын әбәди һәјата говушаҹағыны демишди (Мәт. 25:46). Амма онлар әбәди һәјаты Армаҝеддондан хилас оландан дәрһал сонра алмајаҹаглар. Онларын ады һәјат китабына һәләлик санки карандашла јазылмыш галаҹаг. Иса Мәсиһ миниллик һакимијјәти дөврүндә «онлары отараҹаг вә һәјат сују булагларына апараҹаг». Мәсиһин рәһбәрлијинә итаәт едәнләрин вә сонунҹу сынаг заманы Јеһоваја садиг галан кәсләрин ады һәјат китабына әбәдилик һәкк олунаҹаг. (Вәһј 7:16, 17 ајәләрини охујун.)
8. Кимләрин ады һәјат китабына јазылмајыб вә онларла нә баш верәҹәк?
8 Үчүнҹү група Армаҝеддонда мәһв едиләҹәк кечиләр дахилдир. Онларын ады һәјат китабына јазылмајыб. Иса Мәсиһ демишди ки, бу инсанлар «әбәдилик мәһв едиләҹәкләр» (Мәт. 25:46). Һәвари Булус да Аллаһдан илһам алараг јазмышды ки, «онлар әбәди мәһв ҹәзасына» мәһкум едиләҹәкләр (2 Салон. 1:9; 2 Бут. 2:9, 10). Бу, биләрәкдән мүгәддәс руһа гаршы ҝүнаһ ишләјәнләрә дә аиддир. Онлар да әбәди мәһвә мәһкумдур. Ајдындыр ки, онлар дирилмәјәҹәкләр (Мәт. 12:32; Марк 3:28, 29; Ибр. 6:4—6). Инди исә ҝәлин јер үзүндә јашамаг үчүн дириләҹәк ики груп инсандан данышаг.
КИМЛӘР ДИРИЛӘҸӘК?
9. Һәвариләрин ишләри 24:15 ајәсиндә гејд олундуғу кими, јер үзүндә јашамаг үчүн һансы ики груп инсан дириләҹәк вә онларын арасында һансы фәрг вар?
9 Мүгәддәс Китабда дејилир ки, ики груп инсан, «салеһләр» вә «гејри-салеһләр» дириләҹәк вә онларын гаршысында јер үзүндә әбәди јашамаг имканы ачылаҹаг. (Һәвариләрин ишләри 24:15 ајәсини охујун.) «Салеһләр» сағлыгларында Јеһоваја сәдагәтлә гуллуг едән кәсләрдир. «Гејри-салеһләр» исә сағлыгларында Јеһоваја ибадәт етмәјән кәсләрдир. Онлар Јеһованын нормаларына ујғун јашамадыглары үчүн Онун ҝөзүндә гејри-салеһдирләр. Һәр ики групдакы инсанын дирилмәси о демәкдирми ки, онларын икисинин дә ады һәјат китабына јазылыб? Бу суала ҹаваб тапмаг үчүн ҝәлин һәр ики групу ајры-ајрылыгда арашдыраг.
10. Нәјә ҝөрә салеһләр дириләҹәк вә онларын бәзиләринә һансы мәсулијјәт һәвалә олунаҹаг? (Һәмчинин бу сајда јерүзү һәјатына дирилмәнин мүзакирә олундуғу «Охуҹуларын суаллары» мәгаләсинә бахын.)
10 «Салеһләр» дөрдүнҹү групдур. Өлмәмишдән өнҹә онларын ады артыг һәјат китабына јазылмышды. Бәс өләндән сонра онларын ады һәјат китабындан силинди? Хејр. Чүнки онлар Јеһованын јаддашында һәлә дә сағдырлар. Јеһова «өлүләрин јох, дириләрин Аллаһыдыр, чүнки Онун үчүн онларын һамысы сағдыр» (Лука 20:38). Салеһләр јер үзүндә јашамаг үчүн дириләндә онларын ады һәјат китабында јазылмыш олаҹаг, амма һәлә ки, «карандашла» (Лука 14:14). Салеһ инсанларын бәзиләри дириләндән сонра «бүтүн јер үзүндә әмир» кими хидмәт едәҹәкләр (Зәб. 45:16).
11. Гејри-салеһләр адлары һәјат китабына јазылмаздан өнҹә нәји өјрәнмәли олаҹаглар?
11 Нәһајәт, ҝәлин бешинҹи груп инсанлардан, «гејри-салеһләрдән» данышаг. Ола билсин, онларын Јеһованын бујругларындан хәбәрләри олмадығы үчүн салеһ өмүр сүрмәјибләр. Буна ҝөрә дә адлары һәјат китабына јазылмајыб. Амма Јеһова онлары дирилтмәклә онлара адларыны һәјат китабына јаздырмалары үчүн шанс верәҹәк. Онларын көмәјә бөјүк еһтијаҹы олаҹаг. Онларын бәзиләри өлмәмишдән әввәл мәнфур, шәр ишләр төрәдибләр. Буна ҝөрә дә гејри-салеһләрә Јеһованын ганунларына ујғун јашамағы өјрәтмәк лазым ҝәләҹәк. Бу мәгсәдлә Аллаһын Падшаһлығы тарихин ән бөјүк тәлим програмыны һәјата кечирәҹәк.
12. а) Гејри-салеһләрә кимләр тәлим верәҹәк? б) Өјрәндикләринә әмәл етмәк истәмәјәнләрин агибәти неҹә олаҹаг?
12 Гејри-салеһләрә кимләр тәлим верәҹәк? Бөјүк издиһам вә дириләҹәк салеһ инсанлар. Гејри-салеһләр адларынын һәјат китабына јазылмасы үчүн Јеһова илә сых мүнасибәт гурмалы вә өзләрини Она һәср етмәлидирләр. Иса Мәсиһ вә онун һәмварисләри гејри-салеһләрин алдыглары тәлимә неҹә јанашаҹагларыны бөјүк марагла изләјәҹәкләр (Вәһј 20:4). Бу көмәји рәдд едәнләр һәтта јүз јашында олсалар белә, јер үзүндән силинәҹәкләр (Әшј. 65:20). Јеһова вә Иса Мәсиһ инсанларын үрәјини ҝөрүр вә онлар изин вермәјәҹәкләр ки, јени дүнјада кимдәнсә һансыса хәтәр ҝәлсин (Әшј. 11:9; 60:18; 65:25; Јәһ. 2:25).
ӨЛҮЛӘР «ДИРИЛИБ ҺӘЈАТА ГОВУШАҸАГ» ВӘ «ДИРИЛИБ МҮҺАКИМӘ ОЛУНАҸАГЛАР»
13, 14. а) Иса Мәсиһин Јәһја 5:29 ајәсиндәки сөзләрини әввәлләр неҹә баша дүшүрдүк? б) Бу сөзләрдә нәјә диггәт јетирмәк лазымдыр?
13 Иса Мәсиһ дә јер үзүндә дириләҹәк кәсләр барәдә данышмышды. О демишди: «Елә бир вахт ҝәләҹәк ки, гәбирләрдә оланларын һамысы онун сәсини ешидиб гәбирләриндән чыхаҹаг. Јахшы әмәл саһибләри дирилиб һәјата говушаҹаг, пис әмәл саһибләри исә дирилиб мүһакимә олунаҹаглар» (Јәһ. 5:28, 29). Иса Мәсиһин бу сөзләринин мәнасы нәдир?
14 Әввәлләр белә баша дүшүрдүк ки, Иса Мәсиһ бу ајәдә өлүләрин дириләндән сонра едәҹәји әмәлләри нәзәрдә тутур. Јәни бәзиләри дириләндән сонра јахшы әмәл саһиби олаҹаг, бәзиләри исә пис. Амма фикир верин, Иса Мәсиһ бурада демир ки, гәбирләриндән чыханлар јахшы әмәл саһиби олаҹаглар, јахуд пис әмәл саһиби олаҹаглар. Иса инсанларын өлмәздән әввәл һансы әмәл саһиби олдугларындан данышыр. О дејир: «Јахшы әмәл саһибләри дирилиб һәјата говушаҹаг, пис әмәл саһибләри исә дирилиб мүһакимә олунаҹаглар». Бу сөзләр ҝөстәрир ки, инсанлар дирилмәздән әввәл артыг јахшы әмәл вә ја пис әмәл саһиби олублар. Бу, мәнтиглидир. Ахы јени дүнјада һеч кимә пис әмәлләр төрәтмәјә изин верилмәјәҹәк. Демәли, гејри-салеһләр өлмәздән өнҹә пис әмәл саһиби олублар. Бәс өлүләрин дирилиб һәјата говушаҹағы, јахуд дирилиб мүһакимә олунаҹағы дејиләндә нә нәзәрдә тутулур?
15. Кимләр «дирилиб һәјата говушаҹаг» вә нәјә ҝөрә?
15 Салеһләр, јәни өлмәздән әввәл јахшы әмәл саһиби оланлар «дирилиб һәјата говушаҹаг», чүнки онларын ады артыг һәјат китабында олаҹаг. Беләликлә, Јәһја 5:29 ајәсиндә јазылан «јахшы әмәл саһибләри» вә Һәвариләрин ишләри 24:15 ајәсиндә јазылан «салеһләр» ејни груп инсанлардыр. Бу изаһат Ромалылара 6:7 ајәси илә узлашыр. Орада дејилир ки, «өлмүш адам ҝүнаһдан азаддыр». Демәли, салеһләрин ҝүнаһлары өләндә силиниб, амма Јеһова онларын јахшы әмәлләрини унутмајыб (Ибр. 6:10). Буна ҝөрә дә адлары һәјат китабында јазылмыш олаҹаг. Әлбәттә, салеһләр дириләндән сонра да сәдагәтләрини горумалыдырлар ки, адлары һәјат китабында галсын.
16. Өлүләрин дирилиб мүһакимә олунаҹағы дејиләндә нә нәзәрдә тутулур?
16 Бәс өлмәздән әввәл пис әмәл саһиби оланлар һагда нә демәк олар? Дүздүр, өләндә онларын ҝүнаһлары силиниб. Амма сағлыгларында Јеһованын садиг хидмәтчиси кими өмүр сүрмәдикләри үчүн онларын ады һәјат китабына јазылмајыб. Демәли, «пис әмәл саһибләри» вә Һәвариләрин ишләри 24:15 ајәсиндәки «гејри-салеһләр» ејни груп инсанлардыр. Онлар «дирилиб мүһакимә олунаҹаглар» *. Бу, о демәкдир ки, Иса Мәсиһ онлары мүшаһидә едәҹәк, әмәлләринә гијмәт верәҹәк (Лука 22:30). Бунун сајәсиндә Иса Мәсиһ онларын адларынын һәјат китабына јазылмаға лајиг олуб-олмадығыны биләҹәк. Тәбии ки, бунун үчүн мүәјјән вахт лазым ҝәләҹәк. Әҝәр онлар кечмишдәки шәр әмәлләрини тәкрарламасалар вә өзләрини Јеһоваја һәср етсәләр, адлары һәјат китабына јазылаҹаг.
17, 18. Дириләнләрин һамысындан нә тәләб олунаҹаг вә Вәһј 20:12, 13 ајәләриндә сөһбәт һансы әмәлләрдән ҝедир?
17 Мин ил әрзиндә јени тумарлар ачылаҹаг вә дириләнләрин һамысындан, һәм салеһләрдән, һәм дә гејри-салеһләрдән орада јазылан ганунлара табе олмаг тәләб олунаҹаг. Һәвари Јәһја ҝөрдүјү вәһји белә тәсвир едир: «Мән... тахтын өнүндә дурмуш өлүләри — бөјүкләри вә кичикләри ҝөрдүм. Тумарлар ачылмышды. Башга бир тумар да ачылды, бу тумар һәјат китабыдыр. Өлүләр тумарларда јазыланлара ујғун олараг, әмәлләринә ҝөрә мүһакимә едилди» (Вәһј 20:12, 13).
18 Дириләнләр һансы әмәлләринә әсасән мүһакимә олунаҹаг? Өлмәмишдән әввәл етдикләри әмәлләрә ҝөрә? Хејр. Билдијимиз кими, инсан өләндә ҝүнаһларындан азад олур, демәли, бурада онларын кечмишдә етдији әмәлләр нәзәрдә тутула билмәз. Сөһбәт онларын јени дүнјада тәлим аландан сонра едәҹәји әмәлләрдән ҝедир. Һәтта Нуһ, Ишмуил, Давуд вә Дәнјал кими садиг инсанлар да Иса Мәсиһин гурбанлығы һаггында өјрәнмәли вә она иман етмәли олаҹаг. Ҝөрүн инди гејри-салеһләр нә гәдәр шеј өјрәнмәлидирләр!
19. Јеһованын вердији һејрәтамиз имкандан имтина едәнләри һансы агибәт ҝөзләјир?
19 Бәс белә бир һејрәтамиз имкандан имтина едәнләрин агибәти неҹә олаҹаг? Бу суалын ҹавабы Вәһј 20:15 ајәсиндә јазылыб: «Ады һәјат китабында тапылмајан һәр кәс одлу ҝөлә атылды». Јәни онлар әбәдилик мәһв олунаҹаглар. Бәли, адымызын һәјат китабына јазылмасы вә орадан силинмәмәси өлүм-дирим мәсәләсидир!
Гардаш Мәсиһин миниллик һакимијјәти дөврүндә бөјүк тәлим програмында иштирак едир (20-ҹи абзаса бахын)
20. Миниллик әрзиндә һансы мөһтәшәм иш һәјата кечириләҹәк? (Үз габығындакы шәклә бахын.)
20 Иса Мәсиһин миниллик һакимијјәти дөврү чох мөһтәшәм бир дөвр олаҹаг. Һәмин вахт јер үзүндә бәшәр тарихинин ән ҝенишмигјаслы тәлим програмы һәјата кечириләҹәк. Һәмчинин бу мүддәт әрзиндә һәм салеһләрин, һәм дә гејри-салеһләрин әмәлләринә гијмәт вериләҹәк (Әшј. 26:9; Һәв. 17:31). Бәс бу тәлим програмы неҹә һәјата кечириләҹәк? Нөвбәти мәгаләдә бу һагда әтрафлы данышаҹағыг.
НӘҒМӘ 147 Әбәди һәјат вәди
^ Бу мәгаләдә биз Јәһја 5:28, 29 ајәләринин изаһына едилән дүзәлиши арашдыраҹағыг. Өјрәнәҹәјик ки, өләнләр «дирилиб һәјата говушаҹаг» вә «дирилиб мүһакимә олунаҹаг» дејиләндә нә нәзәрдә тутулур вә һәр група кимләр дахилдир.
^ Бу китаб «бәшәрин тәмәли гојуландан бәри» јазылмаға башлајыб. «Бәшәр» дејиләндә исә Јеһованын фидјә сајәсиндә ҝүнаһдан азад олмаға лајиг билдији инсанлар нәзәрдә тутулур (Мәт. 25:34; Вәһј 17:8). Беләликлә, ҝөрүнүр, бу китаба биринҹи Һабилин ады јазылыб.
^ Әввәлләр белә баша дүшүрдүк ки, ајәдәки «мүһакимә» сөзү мәнфи мәна дашыјыр, јәни бурада инсанын мәһкум олунмасы нәзәрдә тутулур. Амма контекстдән ҝөрмәк олар ки, Иса бурада бу сөзү мәнфи мәнада ишләтмәјиб, ҝөрүнүр, «мүһакимә» дејиләндә инсанын «мәһкәмәдә ишинә бахылмасы», әмәлләринин гијмәтләндирилмәси нәзәрдә тутулур; бир јунан лүғәтинә әсасән, бу ифадә «киминсә давранышыны диггәтлә мүшаһидә етмәк» мәнасыны верә биләр.
