1. Инсанларын бир-биринә етибар етмәмәси нәјә ҝөрә бизим үчүн тәәҹҹүблү дејил?

 БУ ШЕЈТАН дүнјасында инсанларын бир-биринә етибары галмајыб. Бизнесменләр, сијасәтчиләр вә дин хадимләри дәфәләрлә онларын үмидләрини пуч едибләр. Бәзиләри һеч достларына, гоншуларына, аилә үзвләринә белә етибар етмир. Әслиндә, бу бизим үчүн тәәҹҹүблү дејил. Мүгәддәс Китабда дејилмишди ки, ахырзаманда инсанлар вәфасыз, бөһтанчы, хаин олаҹаглар. Бу дөврүн аллаһы Шејтан етибарсыздыр, елә инсанлар да онун хүсусијјәтини әкс етдирирләр (2 Тим. 3:1—4; 2 Кор. 4:4).

2. а) Кимләрә вә нәјә шәкк-шүбһәсиз етибар едирик? б) Бизи һансы суал нараһат едә биләр?

² Амма биз мәсиһиләр билирик ки, Јеһоваја тамамилә бел бағлаја биләрик (Әрм. 17:7, 8). Онун бизи севдијинә, биздән үз дөндәрмәјәҹәјинә әминик (Зәб. 9:10). Биз Мәсиһ Исаја да етибар едирик. О бизим уғрумузда ҹаныны гурбан вериб (1 Бут. 3:18). Һәмчинин Мүгәддәс Китаба да етибар едирик, чүнки орадакы мәсләһәтләрин хејрини һәјатымызда ҝөрмүшүк (2 Тим. 3:16, 17). Бәли, биз шәкк-шүбһәсиз Јеһоваја, Исаја вә Мүгәддәс Китаба етибар едирик. Бәс баҹы-гардашларымыза неҹә, онлара етибар едә биләрик? Бәли, едә биләрик. Ҝәлин ҝөрәк нијә.

3. Бизә һансы шәрәф нәсиб олуб? (Марк 10:29, 30).

³ Јеһова бизи хидмәтчиләриндән ибарәт үмумдүнја аиләсинә дахил едиб. Бир дүшүнүн, бу, неҹә бөјүк шәрәфдир вә бунун сајәсиндә нәләрә саһиб олмушуг! (Марк 10:29, 30 ајәләрини охујун.) Дүнјанын дөрд бир тәрәфиндә бизим кими Јеһованы севән, вар ҝүҹү илә Онун ганунларына ујғун јашамаға чалышан баҹы-гардашларымыз вар. Дилимиз, мәдәнијјәтимиз, ҝејимимиз фәргли олса да, һәтта илк дәфә таныш олдуғумуз диндашымызы өзүмүзә доғма билирик. Ән әсасы исә онларла бирҝә сәмави Атамыза ибадәт етмәк, Она һәмд уҹалтмаг бизә хошдур (Зәб. 133:1).

4. Нәјә ҝөрә баҹы-гардашлара еһтијаҹымыз вар?

 ⁴ Индики дөврдә баҹы-гардашларла арамыздакы бирлији горумаг һәмишәкиндән даһа ваҹибдир. Баҹы-гардашларымыз бизә чәтинликләрә дөзмәјә көмәк едирләр (Ром. 15:1; Гал. 6:2). Бизи Јеһоваја хидмәтдә фәал олмаға, руһани ҹәһәтдән мөһкәм галмаға тәшвиг едирләр (1 Салон. 5:11; Ибр. 10:23—25). Ҝәлин дүшүнәк, әҝәр јығынҹағымызын дәстәји олмасајды, биз ортаг дүшмәнимизә — Шејтан Иблисә вә онун шәр дүнјасына неҹә гаршы дура биләрдик? Үстәлик, билирик ки, Шејтан вә онун тәрәфдарлары тезликлә Аллаһын халгына һүҹум едәҹәк. Һәмин вахт әтрафымызда бизә дәстәк олан баҹы-гардашларын олдуғуна ҝөрә чох севинәҹәјик.

5. Нәјә ҝөрә бәзиләринә баҹы-гардашлара етибар етмәк чәтиндир?

⁵ Амма бәзиләринә баҹы-гардашлара етибар етмәк чәтиндир. Чүнки, ола билсин, онлар кимәсә мәхфи бир шеј дејибләр, о исә буну башгаларына јајыб, јахуд кимсә өз сөзүнүн үстүндә дурмајыб. Ја да һансыса диндашы сөзү вә һәрәкәти илә онларын гәлбини бәрк јаралајыб. Башларына белә шејләр ҝәлдији үчүн онлар кимәсә етибар едә билмирләр. Бәс белә һалда баҹы-гардашлара етибар етмәјә бизә нә көмәк едәҹәк?

6. Мәһәббәт баҹы-гардашлара етибар етмәјә неҹә көмәк едә биләр? (1 Коринфлиләрә 13:4—8).

⁶ Мәһәббәт бизи тәшвиг едир ки, баҹы-гардашлара етибар едәк. 1 Коринфлиләрә 13-ҹү фәсилдә мәһәббәтин чохлу јөнләри гејд олунуб. Онлар бизә баҹы-гардашлара етибар етмәјә вә ја сарсылан етибарымызы бәрпа етмәјә көмәк едә биләр. (1 Коринфлиләрә 13:4—8 ајәләрини охујун.) Мәһәббәтин бир јөнү һаггында 4-ҹү ајәдә дејилир ки, «мәһәббәт сәбирли вә хејирхаһдыр».  Јеһова бизимлә һәтта Она гаршы ҝүнаһ ишләјәндә белә сәбирлә давраныр. Демәли, баҹы-гардашлар хәтримизә дәјәндә, бизи һөвсәләдән чыхараҹаг һәрәкәтә јол верәндә биз дә сәбирли олмалыјыг. Һәмчинин 5-ҹи ајәдә јазылыб ки, мәһәббәт «тез өзүндән чыхмыр, она едилән пислијин һесабыны тутмур». Биз истәмәрик ки, бизә едилән пислијин һесабыны тутаг, јәни диндашымызын хәтримизә дәјән һәрәкәтини јадда сахлајаг. Ваиз 7:9 ајәсиндә дејилир ки, «күсәјән олма». Күсәјән олмагданса, јахшы олар ки, Ефеслиләрә 4:26 ајәсинә әмәл едәк. Орада јазылыб: «Ҝүн батана гәдәр һирсли галмајын».

7. Мәтта 7:1—5 ајәләриндәки принсипләр баҹы-гардашлара етибарымызы мөһкәмләндирмәјә неҹә көмәк едә биләр?

⁷ Баҹы-гардашлара етибар етмәјә бизә даһа нә көмәк едә биләр? Онлара Јеһованын ҝөзү илә бахмалыјыг. Јеһова онлары севир, онларын сәһвини бир-бир гејд етмир. Биз дә белә давранмалыјыг (Зәб. 130:3). Диггәтимизи диндашларымызын сәһвләринә ҹәмләмәмәлијик, онларын ҝөзәл хүсусијјәтләрини ҝөрмәјә чалышмалыјыг. Һәмчинин онларын дүзҝүн давранмағы баҹараҹағына үмидимизи итирмәмәлијик. (Мәтта 7:1—5 ајәләрини охујун.) Мәһәббәт «һәр шејә инаныр», буна ҝөрә дә биз онларын нијјәтинин јахшы олдуғуна инанмалыјыг (1 Кор. 13:7). Дүздүр, бу, о демәк дејил ки, Јеһова бизим кимәсә кор-коранә инанмағымызы истәјир; диндашларымыз етибара лајигдир, Јеһова буна ҝөрә онлара инанмағымызы истәјир *.

8. Диндашларыныза етибарынызы неҹә артыра биләрсиниз?

⁸ Етибар һөрмәт кимидир, ону газанмаг үчүн вахт лазымдыр. Диндашларыныза етибарынызы неҹә артыра биләрсиниз? Онлары јахындан танымаға чалышын, јығынҹагда онларла үнсијјәт един, бирҝә хидмәтә чыхын. Онларла сәбирлә давранын, имкан јарадын ки, етибара лајиг олдугларыны ҝөстәрсинләр. Ола билсин, тәзә-тәзә танымаға башладығыныз диндашыныза бүтүн шәхси мәсәләләринизи данышмајаҹагсыныз. Амма мүнасибәтләриниз мөһкәмләндикҹә үрәјиниздәкиләри архајынлыгла онунла бөлүшә биләҹәксиниз (Лука 16:10). Бәс әҝәр диндашыныз сизин етибарынызы сарсыдыбса, онда неҹә? Онунла мүнасибәтләринизи кәсмәјә тәләсмәјин. Сәбирли олун. Һәмчинин бир-ики нәфәрин һәрәкәтинә ҝөрә бүтүн баҹы-гардашлара етибарынызы итирмәјин. Бу саһәдә бизә өрнәк олан Јеһованын садиг хидмәтчиләри вар. Бәзиләри онлары мәјус етсә дә, онларын һамыја етибары итмәди.

9. а) Јеһованын тәјин етдији шәхсләрин сәһвләринә бахмајараг, Һәннә Јеһоваја етибар етдијини неҹә ҝөстәрди? б) Һәннәдән Јеһованын тәјин етдији шәхсләрә етибар етмәклә бағлы нә өјрәнирик? (Шәклә бахын.)

⁹ Нә вахтса мәсул гардаш сизи мәјус едиб? Әҝәр белә бир шеј олубса, Һәннәнин һадисәсинин сизә бөјүк көмәји дәјә биләр. Онун јашадығы дөврдә Исраилдә Јеһоваја ибадәтә баш каһин Әли рәһбәрлик едирди. Анҹаг онун аиләси халг үчүн јахшы нүмунә дејилди. Онун оғулларына мәбәддә мәсулијјәтләр һәвалә олунмушду, онлар исә биабырчы, әхлагсыз һәрәкәтләр едирдиләр. Аталары буну билә-билә онларла бағлы өлчү ҝөтүрмүрдү. Јеһова Әлини вәзифәсиндән дәрһал узаглашдырмады. Буна бахмајараг, Һәннә Јеһоваја ибадәт етмәк үчүн јенә дә мәбәдә ҝәлирди. О демирди: «Нә гәдәр ки Әли баш каһиндир, бура ајаг  басмајаҹағам». Бир дәфә Һәннә мәбәддә пәришан һалда дуа едәндә Әли сәһвән фикирләшмишди ки, о, сәрхошдур. Әли нә баш вердијини сорушмадан бу дәрдли гадыны данламышды (1 Ишм. 1:12—16). Амма Һәннә анд ичмишди ки, оғлу олса, ону мәбәддә хидмәт етмәк үчүн верәҹәк. О, оғлунун Әлинин һимајәси алтында олаҹағыны билсә дә, фикриндән дөнмәди (1 Ишм. 1:11). Бәс Әлинин оғуллары пис әмәлләриндән әл чәкмишди? Хејр. Буна ҝөрә дә Јеһова мәсләһәт билдији вахтда онлары ҹәзаландырды (1 Ишм. 4:17). Һәннәјә исә өвлад пајы верди. Онун оғлу олду вә адыны Ишмуил гојду (1 Ишм. 1:17—20).

10. Хәјанәтлә үзләшдијинә ҝөрә Давуд падшаһын башгаларына етибары сарсылды? Изаһ един.

¹⁰ Һеч олуб ки, јахын достунуз сизә хәјанәт етсин? Белә бир шеј Давуд падшаһын башына ҝәлмишди. Оғлу Абсалам падшаһлығы онун әлиндән алмаға ҹәһд етмишди. Давудун ән јахын достларындан бири Әхтуфил исә бу үсјанда Абсалама гошулмушду. Тәсәввүр етмәк олар, һәм оғлунун, һәм дә достунун она арха чевирмәси Давуда неҹә бөјүк зәрбә олмушду! Онлар хаин чыхсалар да, Давуд башгаларына етибарыны итирмәди. Давуд бу үсјанда онлара гошулмајан садиг досту Хушаја етибар едирди. Онун етибары әсассыз дејилди. Сонракы һадисәләр Хушајын јахшы дост олдуғуну ҝөстәрди. О һәтта Давуда көмәк етмәк үчүн өз һәјатыны тәһлүкәјә атмышды (2 Ишм. 17:1—16).

11. Набалын бир нөкәринин Абигајилә етибар етдији нәдән ҝөрүнүрдү?

¹¹ Етибар мәсәләсиндә Набалын бир нөкәри дә бизим үчүн ҝөзәл нүмунәдир. Давудла адамлары Набал адлы бир исраиллинин нөкәрләрини дәфәләрлә горумушду. Бир мүддәт сонра Давуд Набалдан өзү вә адамлары үчүн имкан дахилиндә әрзаг вермәсини истәди. Бу варлы-һаллы инсан Давудун ади хаһишини јеринә јетирмәди. Давуд бундан о гәдәр гәзәбләнди ки, Набалын бүтүн ев әһлини гырмаг гәрарына ҝәлди. Баш верән бу һадисәләри Набалын бир нөкәри Абигајилә чатдырды. Бу нөкәр ев әһли иди вә билирди ки, Абигајил онун һәјатыны хилас едә биләр. Буна ҝөрә дә о, ҹаныны ҝөтүрүб гачмады, әксинә, Абигајилин вәзијјәти јолуна гоја биләҹәјинә етибар етди. Онун  Абигајилә етибары әсассыз дејилди. Чүнки Абигајили һамы бәсирәтли бир гадын кими таныјырды вә доғрудан да, бу нөкәрин етибары боша чыхмады. Абигајил Давуду фикриндән дашындырмаға чалышмагла ҹәсарәтлә давранмышды (1 Ишм. 25:2—35). О, Давудун дәрракәли давранаҹағына ҝүвәнирди.

12. Шаҝирдләринин сәһвләринә бахмајараг, Исанын онлара етибар етдији нәдән ҝөрүнүрдү?

¹² Иса шаҝирдләринин сәһвләрини ҝөрсә дә, онлара етибар едирди (Јәһ. 15:15, 16). Јагубла Јәһја ондан Падшаһлыгда ән јахшы јерләри истәмишдиләр. Иса онларын Аллаһа јанлыш нијјәтлә ибадәт етдикләрини дүшүнмәди. Нә дә ки, онлары һәвариликдән чыхармады (Марк 10:35—40). Иса һәбс олунан ҝеҹә исә бүтүн шаҝирдләри ону гојуб гачмышды (Мәт. 26:56). Амма о, јенә дә шаҝирдләринә етибарыны итирмәди. Иса онларын нөгсанларыны чох јахшы ҝөрүрдү. Амма бунунла белә, онлары «ахырадәк севди» (Јәһ. 13:1). Һәтта дириләндән сонра он бир һәварисинә бөјүк мәсулијјәтләр һәвалә етди. Онлара тәблиғ ишини тәшкил етмәји вә дәјәрли гузуларынын гајғысына галмағы тапшырды (Мәт. 28:19, 20; Јәһ. 21:15—17). Иса бу гејри-камил шаҝирдләринә әбәс јерә етибар етмәмишди. Онларын һамысы јерүзү һәјатларынын сонуна гәдәр Аллаһа сәдагәтлә хидмәт етдиләр. Бәли, Һәннә, Давуд, Набалын нөкәри, Абигајил вә Иса гејри-камил инсанлара етибар мәсәләсиндә ҝөзәл нүмунәдир.

13. Диндашымыза етибар етмәјимизә нә мане ола биләр?

¹³ Олуб ки, диндашыныза мәхфи мәлумат демисиниз, о исә буну киминләсә бөлүшүб? Белә бир шеј адамы чох сарсыдыр. Бир баҹы бу ҹүр вәзијјәтлә үзләшмишди. О, бир ағсаггала шәхси мәсәләсини ачыб данышмышды. Сәһәри ҝүн ағсаггалын арвады бу баҹыны руһландырмаг үчүн она зәнҝ етмишди. Ҝөрүнүр, ағсаггал баҹынын она тәкликдә дедикләрини арвадына данышмышды. Ајдындыр ки, баҹынын һәмин ағсаггала етибары сарсылмышды. Бәс о нә етди? Јахшы ки, баҹы ағсаггаллара етибарыны бәрпа етмәк үчүн башга ағсаггалдан көмәк истәди.

14. Бир гардаша ики ағсаггала јенидән етибар етмәјә нә көмәк етди?

¹⁴ Бир гардаш узун мүддәт иди ки, ики ағсаггалдан инҹимишди вә онлара етибар едә билмирди. Амма һөрмәт етдији бир гардашын дедији фикир ону дүшүндүрдү. Бу, садә, амма ејни заманда ҝүҹлү бир фикир иди. О демишди: «Бизим дүшмәнимиз гардашларымыз јох, Шејтандыр». Гардаш бу фикир үзәриндә дәриндән дүшүндү. Дуа едиб Јеһовадан көмәк истәди вә нәһајәт, һәмин ағсаггалларла мүнасибәтини дүзәлтди.

15. Нәјә ҝөрә диндашларымыза јенидән етибар етмәк үчүн вахт лазымдыр? Нүмунә чәкин.

¹⁵ Бәлкә дә, нә вахтса мәсулијјәтләринизи итирмисиниз. Бу, инсана чох пис тәсир едир. Белә бир шеј Грет адлы баҹынын да башына ҝәлмишди. О, анасы илә бирҝә 1930-ҹу илләрдә Јеһоваја сәдагәтлә хидмәт едирди. Һәмин вахт Алманијада насист режими иди вә фәалијјәтимиз гадаға алтында иди. Грет јазы макинасында диндашларымыз үчүн «Ҝөзәтчи гүлләси»нин нүсхәләрини чап едирди. Амма гардашлар биләндә ки, Гретин атасы һәгигәтә гаршы чыхыр, онлар Гретин севдији бу мәсулијјәти онун әлиндән алдылар. Горхурдулар ки, Гретин атасы онлары сатар вә јығынҹагла бағлы мәлуматлар әлејһдарларын әлинә кечәр. Гретин сынаглары бунунла битмәди. Икинҹи Дүнја мүһарибәси дөврүндә гардашлар Гретлә анасына һеч журнал да вермирдиләр, јолда-издә гаршылашанда исә онларла данышмырдылар. Бу вәзијјәт Гретин гәлбини о гәдәр јараламышды  ки, һәмин гардашлары бағышламаг, онлара јенидән етибар етмәк үчүн она хејли вахт лазым ҝәлди. Амма заман кечдикҹә о баша дүшдү ки, Јеһова онлары бағышлајыб вә о да бағышламалыдыр *.

16. Нәјә ҝөрә баҹы-гардашлара јенидән етибар етмәк үчүн әлимиздән ҝәләни етмәлијик?

¹⁶ Әҝәр сиз дә гәлбинизи гыран бу ҹүр вәзијјәтлә үзләшмисинизсә, вар ҝүҹүнүзлә чалышын ки, диндашларыныза јенидән етибар едә биләсиниз. Ола билсин, сизә вахт лазым ҝәләҹәк. Амма зәһмәт чәкмәјинизә дәјәр. Ҝәлин бир нүмунәјә бахаг. Әҝәр нә вахтса гидадан зәһәрләнмисинизсә, бундан сонра даһа еһтијатлы олаҹагсыныз, нә једијинизә фикир верәҹәксиниз. Амма бир дәфә зәһәрләндијинизә ҝөрә үмумијјәтлә јемәк јемәкдән имтина етмәзсиниз. Ејнилә әҝәр кимсә бизим етибарымызы сарсыдыбса, бу, о демәк дејил ки, биз һеч бир баҹы-гардаша етибар етмәјәҹәјик. Ахы билирик ки, һамымыз ҝүнаһлы доғулмушуг. Диндашларымыза јенидән етибар етсәк, һәм даһа хошбәхт олаҹағыг, һәм дә чалышаҹағыг ки, јығынҹагда етибарын олмасы үчүн өз тәрәфимиздән нәсә едәк.

17. Баҹы-гардашлара етибар етмәк нәјә ҝөрә ваҹибдир вә нөвбәти мәгаләдә нә һагда данышаҹағыг?

¹⁷ Шејтан дүнјасында инсанлар арасында етибара надир һалларда раст ҝәлмәк олар. Амма биз баҹы-гардашларымыза етибар едә биләрик. Чүнки арамызда мәһәббәт вар. Бу ҹүр етибар бизә севинҹ ҝәтирир, арамызда бирлик јарадыр. Үстәлик, ҝәләҹәк сынаглар заманы да етибар бизим мүдафиәмиз олаҹаг. Әҝәр сиз јашадығыныз аҹы тәҹрүбәјә ҝөрә кимәсә етибар едә билмирсинизсә, нә едә биләрсиниз? Чалышын вәзијјәтә Јеһова кими бахын, Мүгәддәс Китаб принсипләринә әмәл един, үрәјиниздә баҹы-гардашлара дәрин мәһәббәт јетишдирин вә Мүгәддәс Китабдакы нүмунәләрдән нәтиҹә чыхарын. Гәлб јарасынын сағалмасы вә баҹы-гардашлара јенидән етибар етмәјиниз мүмкүндүр. Белә етсәниз, әтрафынызда сајсыз-һесабсыз достларыныз олаҹаг, о достлар ки, «гардашдан јахындыр» (Мәс. 18:24). Амма билдијимиз кими, етибар икитәрәфли олур. Нөвбәти мәгаләдән өјрәнәҹәјик ки, биз етибарлы инсан олдуғумузу неҹә сүбут едә биләрик.