Ҝәлин ҝөрәк Мүгәддәс Китабда бунунла бағлы нә дејилир.

Һәвариләрин ишләри 24:15 ајәсиндә јазылыб ки, «[Аллаһ] һәм салеһләри, һәм дә гејри-салеһләри [дирилдәҹәк]». Салеһләр сағ икән Аллаһа итаәт едән кәсләрдир, буна ҝөрә дә онларын ады һәјат китабына јазылыб (Мәл. 3:16). Гејри-салеһләрә исә Јеһованы јахындан танымаг имканы олмадан өлән инсанлар дахилдир, онларын ады һәјат китабына јазылмајыб.

Јәһја 5:28, 29 ајәләриндә Һәвариләрин ишләри 24:15 ајәсиндә гејд олунан һәмин ики груп инсандан данышылыр. Иса Мәсиһ демишди ки, «јахшы әмәл саһибләри дирилиб һәјата говушаҹаг, пис әмәл саһибләри исә дирилиб мүһакимә олунаҹаглар». Салеһләр өлмәздән әввәл «јахшы әмәл саһибләри» олан инсанлардыр. Онларын ады һәјат китабына јазылдығы үчүн дирилиб һәјата говушаҹаглар. Гејри-салеһләр исә сағлыгларында «пис әмәл саһибләри» олан инсанлардыр. Онларын ады һәјат китабында јохдур. Буна ҝөрә дә онлар дирилиб мүһакимә олунаҹаглар, јәни сынаг дөврү јашајаҹаглар. Бу вахт әрзиндә онларын Јеһова һаггында өјрәнмәк вә адларыны һәјат китабына јаздырмаг имканы олаҹаг.

Вәһј 20:12, 13 ајәләриндә изаһ олунур ки, дириләнләрин һамысындан тумарларда јазыланлара әмәл етмәк ҝөзләниләҹәк. Бу тумарларда јени дүнјада верилән јени ганунлар јазылаҹаг. Ганунлара әмәл етмәјәнләр мәһв олаҹаг (Әшј. 65:20).

Дәнјал 12:2 ајәсиндә пејғәмбәрлик олунуб ки, өлүм јухусуна ҝедәнләрдән «кимиси әбәди һәјат үчүн, кимиси исә рүсвајчылыг вә әбәди һәгарәт үчүн» дириләҹәк. Бу ајәдә дириләнләрлә бағлы вериләҹәк сон һөкмдән данышылыр. Бу, ја «әбәди һәјат», ја да «әбәди һәгарәт» олаҹаг. Демәли, мин илин сонунда бәзиләри әбәди һәјат алаҹаг, бәзиләри исә әбәдилик мәһв олаҹаглар (Вәһј 20:15; 21:3, 4).

Јер үзүндә дириләҹәк бу ики груп инсаны башга өлкәдә јашамаг истәјән әҹнәбиләрә бәнзәтмәк олар. Салеһләр, бир нөв, иш визасы вә ја даими јашајыш үчүн виза аланлар кимидир, онларын мүәјјән азадлыглары вә һүгуглары вар. Гејри-салеһләри исә мүвәггәти јашајыш үчүн виза алан вә ја турист визасы алан әҹнәбијә бәнзәтмәк олар. Бу ҹүр әҹнәбиләр јени өлкәдә јашамаға давам етмәк үчүн мүәјјән тәләбләрә ҹаваб вермәлидирләр. Ејнилә гејри-салеһләр дә Ҹәннәтдә галмаг үчүн Јеһованын ганунларына әмәл етмәли вә салеһ олмалыдырлар. Амма кимин һансы нөв визасы олмасындан асылы олмајараг, ола биләр ки, бәзи әҹнәбиләр нәһајәтдә вәтәндашлыг алсын, бәзиләри исә өлкәдән депортасија олунсун. Нәтиҹә онларын јени өлкәдә өзләрини неҹә апармаларындан вә ганунлара әмәл едиб-етмәмәләриндән асылы олаҹаг. Јеһова да бүтүн дириләнләр барәдә сон гәрары онларын јени дүнјада ҝөстәрдикләри сәдагәтә вә әмәлләринә әсасән верәҹәк.

Јеһова рәһмли олмагла јанашы, һәмчинин әдаләтлидир, наһаг иш ҝөрмәјән Аллаһдыр (Ган. 32:4; Зәб. 33:5). О, мәһәббәтдән ирәли ҝәләрәк һәм салеһләри, һәм дә гејри-салеһләри дирилдәҹәк. Ејни заманда О, гојдуғу јүксәк әхлаг нормаларынын позулмасына ҝөз јуммајаҹаг. Јалныз Јеһованы севән вә Онун гајда-ганунларына итаәт едән инсанлара јени дүнјада јашамаға изин вериләҹәк.