1. Бутрус мөҹүзәви шәкилдә чохлу балыг тутанда буна неҹә јанашмышды?

 БУТРУС бүтүн ҝеҹәни әлләшир-вурушур, амма бир дәнә дә олсун балыг тута билмир. Сонра Иса дејир: «Гајығы дәрин бир јерә сүрүб торлары суја атын» (Лука 5:4). Бутрус балыг тутаҹағына инанмыр. Амма јенә дә Исанын дедији кими едир. Тора о гәдәр балыг јығылыр ки, о, јыртылмаға башлајыр. Бутрусла јолдашларыны һејрәт бүрүјүр, онлар баша дүшүрләр ки, мөҹүзәјә шаһид олублар. Бутрус дејир: «Аға, мән ҝүнаһлы адамам, сәнә лајиг дејиләм» (Лука 5:6—9). Ҝөрүнүр, о өзүнү һәтта Исанын јанында олмаға белә лајиг ҝөрмүрдү.

2. Бутрусун нүмунәсини арашдырмағын бизә һансы фајдасы вар?

² Бутрус дүз дејирди, о, «ҝүнаһлы адам» иди. Мүгәддәс Китабдан ҝөрүрүк ки, Бутрус бәзән сөзләринин вә һәрәкәтләринин пешманчылығыны чәкирди. Сиздә дә белә һиссләр олур? Бәлкә дә һансыса мәнфи ҹәһәтинизлә вә ја ҝүнаһлы мејилинизлә узун мүддәтдир мүбаризә апарырсыныз. Бутрусла баш верәнләри арашдырмаг сизә үмидинизи итирмәмәјә көмәк едә биләр. Неҹә? Мәсәлән, Јеһова истәсәјди, Бутрусун сәһвләрини Мүгәддәс Китаба јаздырмазды. Амма О биздән өтрү бунлары Кәламына дахил едиб ки, өзүмүз үчүн дәрс ҝөтүрәк (2 Тим. 3:16, 17). Бутрусун сәһвләри, зәифликләри барәдә өјрәнәндә баша дүшүрүк ки, Јеһова биздән дә камиллик ҝөзләмир. О истәјир ки, биз зәиф ҹәһәтләримизә бахмајараг,  тәслим олмајаг, мүбаризәјә давам едәк.

3. Нәјә ҝөрә биз тәслим олмамалыјыг?

³ Нәјә ҝөрә тәслим олмамалыјыг? Чүнки адәтән инсан нәјисә давамлы едирсә, ҝетдикҹә ону тәкмилләшдирир. Мисал үчүн, инсана һансыса мусиги аләтиндә ифа етмәји өјрәнмәк үчүн узун илләр лазым ҝәлә биләр. Бу илләр әрзиндә о, ола билсин, нечә мин дәфә нотлары сәһв ифа едәҹәк. Амма мәшг етмәјә давам етсә, ҝетдикҹә пүхтәләшәҹәк. О, бир ҝүн маһир чалғычы олса белә ара-сыра јенә дә сәһвләрә јол верәҹәк. Лакин о дајанмајаҹаг, сәнәтиндә даһа да јахшылашмаг үчүн давамлы мәшг едәҹәк. Ејнилә биз дә, ола билсин, һансыса зәифлијимизә үстүн ҝәлдијимизи дүшүнсәк дә, јенидән она јениләк. Амма өз үзәримиздә ишләмәјә давам етмәлијик. Һамымыз бәзән һансыса сөзүмүзә вә ја һәрәкәтимизә ҝөрә пешман олуруг. Амма тәслим олмасаг, Јеһова ҝет-ҝедә даһа да јахшылашмағымыза көмәк едәҹәк (1 Бут. 5:10). Ҝәлин Бутрусун нүмунәсинә бахаг. О, ҝери чәкилмәмишди. Сәһвләринә бахмајараг, Иса она мәрһәмәт ҝөстәрмишди. Бу бизи дә Јеһоваја хидмәтимизи давам етдирмәјә тәшвиг едәҹәк.

4. Лука 5:5—10 ајәләриндә Бутрус өзү һагда нә дејир, бәс Иса ону нәјә әмин едир?

⁴ Мүгәддәс Китабда Бутрусун өзүнү «ҝүнаһлы адам» адландырмасынын сәбәби вә ја онун һансы ҝүнаһлары нәзәрдә тутдуғу ачыгланмыр. (Лука 5:5—10 ајәләрини охујун.) Амма јәгин ки, о бәзи ҹидди сәһвләр етмишди. Ола билсин, Бутрус өзүнү јарарлы һесаб етмәдији үчүн онда мүәјјән горхулар вар иди вә Иса буну сезмишди. Амма Иса һәм дә билирди ки, о, садиг гала биләр. Она ҝөрә дә меһрибанҹасына Бутруса демишди: «Горхма!» Иса она инанырды. Бу да Бутрусун һәјатыны бүсбүтүн дәјишди. Сонралар Бутрус вә гардашы Андреас балыгчылығын дашыны атдылар вә бүтүн вахтларыны Мәсиһин ардынҹа ҝетмәјә сәрф етдиләр. Нәтиҹәдә хејли мүкафат алдылар (Марк 1:16—18).

5. Бутрус горхуларыны ашыб Исанын дәвәтини гәбул етмәклә һансы немәтләри алды?

⁵ Мәсиһин давамчысы олдуғу үчүн Бутрусун һәјатында мөһтәшәм һадисәләр баш вермишди. О, Исанын хәстәләрә шәфа вердијини, ҹинләри говдуғуну, һәтта өлүләри дирилтдијини ҝөрдү b (Мәт. 8:14—17; Марк  5:37, 41, 42). Үстәлик, Падшаһлыг ҹалалында ҝәлән Исанын ҝөрүнтүсү назил оланда о да орада иди. Јәгин, бу һадисә онун јаддашына өмүрлүк һәкк олунду (Марк 9:1—8; 2 Бут. 1:16—18). Бәли, Бутрус һеч ағлына белә ҝәлмәјән һадисәләрин шаһиди олду. О чох хошбәхт иди ки, өзү илә бағлы мәнфи һиссләрә үстүн ҝәлиб бүтүн бу немәтләри алды.

6. Бутрус зәифликләринә дәрһал үстүн ҝәлә билди? Изаһ един.

⁶ Бу гәдәр шејләри ҝөрән, ешидән Бутрус јенә дә бәзән зәифликләринә јенилирди. Мәсәлән, бир нечә вәзијјәтә бахаг. Иса Мүгәддәс Китаб пејғәмбәрлијинә әсасән әзаб чәкиб өләҹәјини дејәндә Бутрус она ирад тутмушду (Марк 8:31—33). О, кимин бөјүк олдуғу үстүндә дәфәләрлә һәвариләрлә мүбаһисә етмишди (Марк 9:33, 34). Исанын өлүмүндән бир аз әввәл Бутрус гејри-ихтијари бир нәфәрин гулағыны кәсмишди (Јәһ. 18:10). Елә һәмин ҝеҹә Бутрус горхуја дүшүб Исанын досту олдуғуну үч дәфә данмышды (Марк 14:66—72). Нәтиҹәдә һөнкүр-һөнкүр ағламышды (Мәт. 26:75).

7. Иса дириләндән сонра Бутруса һансы имканы јаратды?

⁷ Иса мәјуслуға гәрг олмуш бу һәварисиндән әлини үзмәди. Дириләндән сонра Бутруса имкан јаратды ки, ону һәлә дә севдијини билдирсин. Иса Бутрусу онун сүрүләринин чобаны олмаға дәвәт етди (Јәһ. 21:15—17). Бутрус да бу дәвәти гәбул етди. Әллинҹи ҝүн бајрамында Бутрус Јерусәлимдә иди вә мүгәддәс руһла мәсһ олунан илк мәсиһиләрдән бири иди.

8. Бутрус Антакјада һансы ҹидди сәһви етмишди?

⁸ Бутрус мәсһ олунмуш мәсиһи оландан сонра да зәиф ҹәһәтләри илә мүбаризә апарырды. Ерамызын 36-ҹы илиндә Бутрус бир һадисәнин шаһиди олду. Сүннәтсиз олан гејри-јәһуди Корнили мүгәддәс руһла мәсһ олунду. Бу һадисә сүбут етди ки, «Аллаһ ајры-сечкилик етмәјән Аллаһдыр» вә гејри-јәһудиләр дә мәсиһи јығынҹағынын бир һиссәси ола биләр (Һәв. 10:34, 44, 45). Бундан сонра Бутрус һеч вахт етмәдији бир шеј етди: гејри-јәһудиләрлә бир сүфрә архасында јемәк јемәјә башлады (Гал. 2:12). Бунунла белә, бәзи јәһудиләр дүшүнүрдү ки, јәһудиләр гејри-јәһудиләрлә бир сүфрә архасында әјләшә билмәз. Онлардан бәзиләри Антакјаја ҝәләндә Бутрус ҝөрүнүр онларын горхусундан гејри-јәһудиләрлә бир сүфрәјә әјләшмәди. Һәвари Булус бу икиүзлүлүјү ҝөрүб һамынын ҝөзү гаршысында ону данлады (Гал. 2:13, 14). Бутрус сәһв етсә дә, руһдан дүшмәди, хидмәтини дајандырмады. Она нә көмәк етди?

9. Јәһја 6:68, 69 ајәләриндән Бутрусун сәдагәтли олдуғу неҹә ҝөрүнүр?

⁹ Бутрус сәдагәтли иди. Һеч бир шеј ону Исанын ардынҹа ҝетмәкдән сахлаја билмәди. Мәсәлән, бир дәфә шаҝирдләр Исанын дедији сөзләри баша дүшмәмишди. (Јәһја 6:68, 69 ајәләрини охујун.) Онлар Исадан дедикләринин мәнасыны сорушмаг әвәзинә, ондан узаглашды. Амма Бутрус белә етмәди. О, баша дүшүрдү ки, «әбәди һәјатын сөзләри» јалныз Исададыр.

10. Иса Бутруса инандығыны неҹә ҝөстәрди? (Һәмчинин шәклә бахын.)

¹⁰ Јерүзү һәјатынын сон ҝеҹәси Иса билирди ки, Бутрус вә диҝәр һәвариләри ону атаҹаг. Амма Иса Бутруса деди ки, онун јенидән ҝери гајыдаҹағына вә сәдагәтли галаҹағына әминдир (Лука 22:31, 32). О, баша дүшүрдү ки, «руһ шөвглү, ҹисим  исә зәифдир» (Марк 14:38). Буна ҝөрә дә Бутрус ону таныдығыны данса да, Иса Бутрусдан үмидини үзмәди, ону атмады. Иса дириләндән сонра еһтимал ки, тәкликдә Бутруса ҝөрүндү (Марк 16:7; Лука 24:34; 1 Кор. 15:5). Јәгин, бу гәмҝин һәвари Исаны ҝөрүб дирчәлмишди.

11. Иса Бутрусу Јеһованын она дајаг олаҹағына неҹә әмин етди?

¹¹ Иса Бутрусу Јеһованын она дајаг олаҹағына әмин етмишди. Иса дириләндән сонра Бутруса вә диҝәр һәвариләрә јенә мөҹүзәви шәкилдә балыг тутмаға көмәк етди (Јәһ. 21:4—6). Шүбһәсиз, бу мөҹүзәдән сонра Бутрус әмин олду ки, Јеһова үчүн онун мадди еһтијаҹларыны тәмин етмәк чох асандыр. Бәлкә дә онун јадына Исанын дедији сөзләр дүшмүшдү. О демишди ки, Јеһова Падшаһлығы «һәр шејдән үстүн» тутанлары дарда гојмајаҹаг (Мәт. 6:33). Артыг Бутрус үчүн һәјатда ән үмдә шеј балыгчылыг иши јох, тәблиғ иши иди. О, ерамызын 33-ҹү илинин Әллинҹи ҝүн бајрамында ҹәсарәтлә шаһидлик верди вә бунун нәтиҹәсиндә минләрлә инсан хош мүждәни гәбул етди (Һәв. 2:14, 37—41). Сонра о, сәмәријјәлиләрә вә гејри-јәһудиләрә мәсиһин давамчысы олмаға көмәк етди (Һәв. 8:14—17; 10:44—48). Ајдындыр ки, Јеһова һәр ҹүр инсаны јығынҹаглара ҹәлб етмәк үчүн бир васитәчи кими Бутрусу сечмишди.

12. Зәифликләримизлә мүбаризә апарырыгса, Бутрусун нүмунәсинә әсасән нәји унутмамалыјыг?

¹² Јеһова бизә тәслим олмамаға көмәк едә биләр. Дүздүр, әҝәр һансыса зәифлијимизлә узун мүддәтдир мүбаризә апарырыгса, јолумуза давам етмәк чәтин ола биләр. Һәтта бәзән дүшүнә биләрик ки, Бутрусун зәиф ҹәһәтләри бизимки илә мүгајисәдә һеч нәдир. Амма әлимизин-голумузун јана дүшмәмәси үчүн Јеһова бизә ҝүҹ верә биләр (Зәб. 94:17—19). Мәсәлән, бир гардаш һәгигәтә ҝәлмәздән әввәл узун илләр һомосексуал олуб. Амма о, гәти шәкилдә натәмиз әмәлләринә сон гојду. Бунунла белә, һәрдәнбир онда јанлыш истәкләр баш галдырырды. Она зәифлијинә јенилмәмәјә нә көмәк етмишди? О белә демишди: «Јеһова мәнә ҝүҹ верир… Онун мүгәддәс руһунун көмәји илә өјрәндим ки, һәгигәт јолунда јеримәк мүмкүндүр… Јеһованын јолунда јарарлыјам вә  ҝүнаһларыма рәғмән, О, һәлә дә мәни мөһкәмләндирир».

13. Һәвариләрин ишләри 4:13, 29—31 ајәләринә әсасән Бутрусун нүмунәсини неҹә изләјә биләрик? (Һәмчинин шәклә бахын.)

¹³ Ҝөрдүјүмүз кими Бутрус инсан горхусуна ҝөрә бир нечә дәфә ҹидди сәһвләр етмишди. Амма Јеһовадан ҝүҹ истәјәндән сонра о, ҹәсарәтли даврана билмишди. (Һәвариләрин ишләри 4:13, 29—31 ајәләрини охујун.) Биз дә өз горхуларымыза үстүн ҝәлә биләрик. Ҝөтүрәк насист Алманијасында јашамыш Һорст гардашы. О, мәктәбдә она ҝөстәрилән тәзјигин уҹбатындан бир нечә дәфә «Һајл Һитлер!» демәјә мәҹбур галмышды. Валидејнләри буна ҝөрә ону данламамышдылар, әксинә, онунла бирҝә Јеһоваја дуа едиб она ҹәсарәт вермәсини хаһиш етмишдиләр. Валидејнләринин көмәји вә Јеһоваја етибары сајәсиндә Һорст нәһајәтдә мәтин дајана билмишди. Сонралар о белә сөзләр демишди: «Јеһова мәни һеч вахт атмады» c.

14. Ағсаггаллар руһдан дүшәнләрә неҹә дајаг ола биләр?

¹⁴ Нә Јеһова, нә дә Иса биздән үмидини үзмүр. Бутрус Исаны данандан сонра ики јол арасында галмышды: ја Мәсиһин давамчысы олмаға сон гојаҹагды, ја да давам едәҹәкди. Иса Јеһоваја јалвармышды ки, Бутрусун иманы түкәнмәсин. О белә бир дуа етдијини Бутруса да демишди вә сөјләмишди ки, сонралар Бутрусун диндашларынын иманыны мөһкәмләндирәҹәјинә әминдир (Лука 22:31, 32). Јәгин, Бутрус Исанын бу сөзләрини хатырлајанда чох руһланырды. Бизим дә һәјатда сечим етмәли олдуғумуз мәгамлар олур. Бу заман садиг галмағымыз үчүн Јеһова  ағсаггаллар васитәсилә бизә дәстәк ола биләр (Ефес. 4:8, 11). Узун илләрдир ағсаггал олан Пол гардаш мәһз белә дә етмәјә чалышыр. О, мүбәризәсини давам етдирә билмәјәҹәјини дејән инсанлары һәгигәтә илк ҝәлдији вахтлары хатырламаға тәшвиг едир вә әмин едир ки, Јеһова онлары чох севир, онлары һеч вахт атмаз. Пол дејир: «Руһдан дүшсәләр дә, Јеһованын көмәји илә тәслим олмајан чох мәсиһи ҝөрмүшәм».

15. Бутрусун вә Һорст гардашын нүмунәси Мәтта 6:33 ајәсинин доғрулуғуну неҹә тәсдиг едир?

¹⁵ Јеһова һәм Бутрусун, һәм дә диҝәр һәвариләрин мадди тәләбатыны өдәјирди. Тәблиғ ишини һәјатымызда һәр шејдән үстүн тутсаг, О бизим дә гејдимизә галаҹаг (Мәт. 6:33). Бајаг ады чәкилән Һорст гардаш Икинҹи Дүнја мүһарибәсиндән сонра өнҹүл олмаг гәрарына ҝәлмишди. Амма о чох касыб иди вә дүшүнүрдү ки, тамвахтлы хидмәтдә ола-ола өзүнү доландыра билмәјәҹәк. Бәс о нә етди? Һорст Јеһованы сынамаг гәрарына ҝәлди. О, рајон нәзарәтчисинин зијарәти заманы бүтүн һәфтәни хидмәтдә олду. Һәмин һәфтәнин сону рајон нәзарәтчиси она ичиндә пул олан аноним бир зәрф верди. Һорст јериндә донуб галды. Зәрфин ичиндәки пул она бир нечә ај өнҹүл кими хидмәт етмәјә бәс едәҹәкди. Бу һәдијјә Һорсту әмин етди ки, Јеһова онун гејдинә галаҹаг. Өмрүнүн галан һиссәсиндә Падшаһлығын иши онун үчүн һәјатда һәр шејдән үстүн олду (Мәл. 3:10).

16. Нәјә ҝөрә Бутрусун нүмунәсини вә мәктубларыны арашдырмаға дәјәр?

¹⁶ Јәгин, Бутрус севинирди ки, Исаја «сәнә лајиг дејиләм» дејәндә Иса ону атмады. Бутрусун сәдагәтини горумасы вә башгаларына ҝөзәл нүмунә олмасы үчүн Иса она тәлим вермәјә давам едирди. Онун вердији тәлимдән биз өзүмүз үчүн чох дәјәрли шејләр өјрәнә биләрик. Бутрус биринҹи әсрдәки јығынҹаглара јаздығы ики мәктубунда һәмин дәрсләри вә диҝәр нәсиһәтләри бөлүшүб. Нөвбәти мәгаләдә һәмин мәктублардан бәзи фикирләри мүзакирә едәҹәјик вә ҝөрәҹәјик ки, онлары бу ҝүн неҹә тәтбиг едә биләрик.