1. Өлүмүндән гыса мүддәт әввәл һәвари Бутрус Јеһованын илһамы илә нә етмишди?

 ҺӘВАРИ БУТРУС билирди ки, тезликлә ҝөзләрини бу һәјата јумаҹаг. О, Јеһоваја узун илләр әрзиндә сәдагәтлә гуллуг етмишди. Бу илләр әрзиндә о, Иса илә бирҝә тәблиғә ҝетмишди, гејри-јәһудиләрә шаһидлијин башланғыҹыны гојмушду, һәмчинин рәһбәрлик шурасынын үзвү кими хидмәт етмишди. Амма Бутрусун хидмәти һәлә сона чатмамышды. О, ерамызын тәхминән 62—64-ҹү илләриндә Аллаһын илһамы илә ики мәктуб јазды. Бу мәктублар Мүгәддәс Китабда Бутрусун биринҹи вә икинҹи мәктубу адланыр. Бутрус үмид едирди ки, јаздығы бу мәктублар онун өлүмүндән сонра мәсиһиләрин дадына чатаҹаг (2 Бут. 1:12—15).

2. Нәјә ҝөрә Бутрусун мәктублары там вахтында иди?

² Бутрус бу мәктубларыны диндашлары «мүхтәлиф сынаглар»ла үзләшән вахт јазмышды (1 Бут. 1:6). Шәр инсанлар јығынҹагда сахта тәлимләр, натәмиз әмәлләр јајмаға чалышырды (2 Бут. 2:1, 2, 14). Јерусәлимдәки мәсиһиләр үчүн һәр шеј тезликлә сона чатаҹагды: һәм шәһәр, һәм дә мәбәд Рома ордусу тәрәфиндән мәһв едиләҹәкди (1 Бут. 4:7). Шүбһәсиз, Бутрусун мәктублары һәмин мәсиһиләрә һазырда үзләшдикләри сынаглара дөзмәјә вә ҝәләҹәк сынаглара һазырлашмаға көмәк едәҹәкди b.

3. Нәјә ҝөрә Бутрусун мәктубларыны арашдырмалыјыг?

³ Бутрус бу мәктублары биринҹи әсрдәки мәсиһиләрә јазса да, Јеһова онлары Өз Кәламына дахил едиб. Беләҹә, бу мәктублардан биз дә фајдалана биләрик (Ром. 15:4). Биринҹи  әсрдә јашајан мәсиһиләр кими, бизим дөврүмүздә дә дүнја натәмиз әмәлләрлә долудур. Бу да Јеһоваја хидмәтимизи чәтинләшдирир. Бундан әлавә, тезликлә биз Јерусәлими вә мәбәди мәһв едән мүсибәтдән даһа бөјүк мүсибәтлә үзләшәҹәјик. Бутрусун һәр ики мәктубунда ваҹиб мәсләһәтләр вар. Онлар бизә Јеһованын ҝүнүнү ҝөзләмәјә, инсан горхусуна үстүн ҝәлмәјә вә бир-биримизи һәрарәтлә севмәјә көмәк едәҹәк. Һәмчинин бу ҹүр нәсиһәтләрин көмәји илә ағсаггаллар јығынҹагдакы баҹы-гардашлары мөһкәмләндирә биләҹәк.

4. 2 Бутрус 3:3, 4 ајәләриндә гејд олундуғу кими иманымызы нә сарсыда биләр?

⁴ Әтрафымыздакы инсанларын чоху Мүгәддәс Китабда ҝәләҹәклә бағлы дејиләнләрә зәррә гәдәр дә инанмыр. Бәзән онлар бизи әлә салыб дејирләр: «Елә илләрдир сонун ҝәләҹәјини дејирсиниз». Бәзиләри иддиа едир ки, сон һеч вахт ҝәлмәјәҹәк. (2 Бутрус 3:3, 4 ајәләрини охујун.) Тәблиғ етдијимиз инсанлар, иш јолдашларымыз вә аилә үзвләримиз белә сөзләр дејәндә иманымыз сарсыла биләр. Белә мәгамларда Бутрусун вердији нәсиһәтләрин бизә көмәји олаҹаг.

5. Бу дүнјанын сонуну сәбирлә ҝөзләмәјә бизә нә көмәк едә биләр? (2 Бутрус 3:8, 9).

⁵ Бәзиләринә елә ҝәлир ки, Јеһова бу шәр дүнјаны мәһв етмәји ҝеҹикдирир. Бутрусун сөзләри бизә бу мәсәләјә дүзҝүн јанашмаға көмәк едәҹәк. Онун сөзләри ајдын ҝөстәрир ки, Јеһованын заман анлајышы инсанларынкындан тамамилә фәрглидир. (2 Бутрус 3:8, 9 ајәләрини охујун.) Јеһова үчүн мин ил бир ҝүнә бәрабәрдир. О, сәбирлидир, һеч кәсин мәһв олмасыны истәмир. Амма һәмин ҝүн ҝәләндә бу шәр дүнјаја сон гојулаҹаг. О вахта гәдәр исә бизим имканымыз вар ки, бүтүн милләтләрдән олан инсанлара шаһидлик верәк.

6. Јеһованын ҝүнүнү бәрк-бәрк јадда сахламаг үчүн нә етмәлијик? (2 Бутрус 3:11, 12).

⁶ Бутрус бизи «Јеһованын ҝүнүнү бәрк-бәрк јадда сахла»маға тәшвиг едир. (2 Бутрус 3:11, 12 ајәләрини охујун.) Буну неҹә едә биләрик? Биз тез-тез, мүмкүндүрсә, һәр ҝүн јени дүнјада алаҹағымыз немәтләр барәдә дүшүнмәлијик. Јени дүнјаны ҝөзүнүзүн гаршысында ҹанландырын: сиз тәмиз һаваны ҹијәрләринизә чәкирсиниз, сағлам гидалар јејирсиниз, өлән әзизләринизи гаршылајырсыныз, әсрләр өнҹә јашамыш инсанлара пејғәмбәрликләрин неҹә јеринә јетдијини изаһ едирсиниз. Бунлар барәдә дүшүнәндә һәмин ҝүнүн ҝәлишини һәсрәтлә ҝөзләјәҹәксиниз вә инди һансы дөврдә јашадығынызы унутмајаҹагсыныз. Ҝәләҹәјимизин неҹә олаҹағыны «габагҹадан билдијимиз үчүн» јаланчы мүәллимләр бизи аздырмајаҹаг (2 Бут. 3:17).

7. Инсан горхусу бизә неҹә тәсир едә биләр?

⁷ Јеһованын ҝүнүнүн јахын олдуғуну билдијимиз үчүн инсанлара хош мүждәни чатдырмаг истәјирик. Амма һәрдән данышмаға ҹәсарәт етмирик. Ола билсин, бир анлыг инсан горхусуна гапылырыг. Бутрусла да белә бир шеј баш вермишди. Исаја мәһкәмә гурулан ҝеҹә Бутрус онун шаҝирди олдуғуну демәјә горхмушду, һәтта дәфәләрлә демишди ки, ону танымыр (Мәт. 26:69—75). Амма елә һәмин о Бутрус сонралар әминликлә белә сөзләр јазмышды: «Онлары горхуја салан шејләрә ҝөрә горхмајын вә нараһат олмајын» (1 Бут. 3:14). Онун бу сөзләри бизи әмин едир ки, инсан горхусуна үстүн ҝәлмәк мүмкүндүр!

8. Инсан горхусуна неҹә үстүн ҝәлә биләрик? (1 Бутрус 3:15).

 ⁸ Бәс инсан горхусуна неҹә үстүн ҝәлә биләрик? Бутрус бизә нәсиһәт едир: «Мәсиһи бир Аға кими үрәјиниздә мүгәддәс тутун». (1 Бутрус 3:15 ајәсини охујун.) Бу о демәкдир ки, биз Ағамыз вә Падшаһымыз Иса Мәсиһин мөвгеји вә сәлаһијјәти барәдә дүшүнмәлијик. Ола билсин, хош мүждәни бөлүшмәк үчүн имкан јараныб, амма сиз чәкинирсиниз, һәјәҹанланырсыныз. Бу заман Падшаһымызы јадыныза салын. Онун ҝөјдә тахтда отурдуғуну, әтрафында сајсыз-һесабсыз мәләкләрин олдуғуну ҝөзүнүзүн өнүндә ҹанландырын. Унутмајын ки, «ҝөјдә вә јердә бүтүн һакимијјәт» Исаја верилиб вә о, «бу дөврүн јекунуна кими һәмишә» бизимлә олаҹаг (Мәт. 28:18—20). Бутрус бизи тәшвиг едир ки, иманымызы «мүдафиә етмәјә һазыр» олаг. Истәјәрдиниз, ишдә, мәктәбдә вә ја һансыса башга бир јердә шаһидлик верәсиниз? Габагҹадан дүшүнүн ҝөрүн һансы мәгамда белә бир имкан јарана биләр вә сиз нә дејә биләрсиниз. Дуада ҹәсарәт истәјин вә әмин олун ки, Јеһова сизә инсан горхусуна үстүн ҝәлмәјә көмәк едәҹәк (Һәв. 4:29).

9. Бутрус нә вахт баҹы-гардашлара мәһәббәт ҝөстәрмәмишди? (Һәмчинин шәклә бахын.)

⁹ Бутрус баҹы-гардашлара мәһәббәт ҝөстәрмәји өјрәнмишди. Бир дәфә Иса демишди: «Сизә јени бир әмр верирәм: бир-биринизи  севин. Бир-биринизи мән сизи севдијим кими севин» (Јәһ. 13:34). Бутрус бу сөзләри өз гулағы илә ешитсә дә, сонралар тәсир алтына дүшүб гејри-јәһуди баҹы-гардашларла бир сүфрәјә әјләшмәмишди. Һәвари Булус буну ҝөрүб Бутрусун һәрәкәтини «ријакарлыг», башга сөзлә, икиүзлүлүк адландырмышды (Гал. 2:11—14). Бутрус сәһвини баша дүшдү вә бундан нәтиҹә чыхартды. О, һәр ики мәктубунда вурғуламышды ки, биз баҹы-гардашлары тәкҹә севмәмәлијик, бу севҝимизи ҝөстәрмәлијик.

10. «Ријасыз гардашлыг мәһәббәти» нәјин нәтиҹәсидир? Изаһ един (1 Бутрус 1:22).

¹⁰ Бутрус бизи диндашларымыза «ријасыз гардашлыг мәһәббәти» ҝөстәрмәјә тәшвиг едир. (1 Бутрус 1:22 ајәсини охујун.) Бу ҹүр мәһәббәт «һәгигәтә итаәт» етмәјин нәтиҹәсиндә јараныр. Бу һәгигәтә Аллаһын «ајры-сечкилик етмәјән Аллаһ» олмасы дахилдир (Һәв. 10:34, 35). Јығынҹагда бирини севиб, о бирисиндән ҝен ҝәзириксә, Исанын мәһәббәтлә бағлы вердији әмрә итаәт етдијимизи дејә билмәрик. Дүздүр, ола билсин, Иса кими бизим дә өзүмүзә даһа јахын һисс етдијимиз кимләрсә вар (Јәһ. 13:23; 20:2). Амма Бутрус бизә хатырладыр ки, бүтүн диндашларымыза «гардашлыг мәһәббәти» бәсләмәлијик, онлары доғмамыз кими севмәлијик (1 Бут. 2:17).

11. Башгаларыны «сәмими-гәлбдән, һәрарәтлә» севмәк нә демәкдир?

¹¹ Бутрус бизи тәшвиг едир: «Бир-биринизи сәмими-гәлбдән, һәрарәтлә севин». Бу контекстдә «һәрарәтлә» севмәк һиссләримизи мәһәббәтә чатана гәдәр дартмаг демәкдир. Тутаг ки, һансыса баҹы вә ја гардаш хәтримизә дәјиб. Бу заман илк реаксијамыз она мәһәббәт ҝөстәрмәк јох, әксинә, ондан әвәз чыхмаг ола биләр. Амма Бутрус Исадан өјрәнмишди ки, гисас алмағымыз Аллаһа хош ҝетмир (Јәһ. 18:10, 11). О јазмышды: «Пислијә писликлә, тәһгирә тәһгирлә ҹаваб вермәјин, әксинә, хејир-дуа илә ҹаваб верин» (1 Бут. 3:9). Һәрарәтли севҝи сајәсиндә, һәтта хәтринизә дәјән инсанлара гаршы меһрибан вә анлајышлы олаҹагсыныз.

12. а) Һәрарәтли мәһәббәтимиз бизи даһа нәјә тәшвиг едәҹәк? б) «Бирлик әнамыны горујаг» адлы видеода ҝөстәрилдији кими сиз нәјә ҹан атмаг истәјирсиниз?

¹² Бутрус биринҹи мәктубунда гејд едир ки, һәрарәтлә севмәк бир нечә јох, «чохлу ҝүнаһын үстүнү өртүр» (1 Бут. 4:8). Јәгин, Исанын илләр өнҹә Бутруса бағышламагла бағлы дедији сөзләр онун һәлә дә јадында иди. Һәмин вахт Бутрус Исаја гардашыны «једди дәфә» бағышламаға һазыр олдуғуну демишди. Бәлкә дә о елә билирди ки, бу онун ҹомәрд олдуғуну ҝөстәрир. Амма Иса Бутруса изаһ етди ки, «лазым ҝәлсә, лап 77 дәфә» бағышламалыдыр, јәни бағышламағын һәдди јохдур (Мәт. 18:21, 22). Исанын бу нәсиһәти бизә дә аиддир. Әҝәр бу ҹүр давранмаг сизә чәтин ҝәлирсә, үрәјинизи сыхмајын. Гејри-камил олдуглары үчүн бу, Јеһованын бүтүн хидмәтчиләринә бәзән чәтин олур. Индики мәгамда әсас одур ки, гардашынызы бағышламаг вә онунла аранызда сүлһү бәрпа етмәк үчүн баҹардығынызы едәсиниз c.

13. Нәјә ҝөрә ағсаггаллара баҹы-гардашлары руһландырмаға вахт тапмаг чәтин олур?

¹³ Иса дириләндән сонра Бутруса демишди: «Гузуларымы отар» (Јәһ. 21:16). Јәгин, Бутрус өмүрбиллаһ бу сөзләри јадындан чыхармады. Әзиз ағсаггаллар, билдијиниз кими бу ҝөстәриш сизә дә аиддир.  Амма бәзән ағсаггаллар үчүн бу ваҹиб мәсулијјәти иҹра етмәјә вахт тапмаг чәтин олур. Чүнки онлар һәр шејдән әввәл өз аиләләрини физики, емосионал вә руһани ҹәһәтдән тәмин етмәлидир. Бундан әлавә, ағсаггаллар тәблиғ ишиндә иштираклары илә башгаларына нүмунә гојурлар, һәмчинин јығынҹаг вә топланты бәндләринин һазырланмасына вә тәгдим едилмәсинә бөјүк өнәм верирләр. Бәзи ағсаггаллар исә Хәстәханаларла әлагә комитәләринин үзвләри олдуглары үчүн, јахуд Јерли лајиһә-иншаат шөбәси илә әмәкдашлыг етдикләри үчүн онларын әлавә мәсулијјәтләри олур. Доғрудан да, ағсаггалларын иши башларындан ашыр!

14. Ағсаггаллары сүрүнүн гејдинә галмаға нә тәшвиг едә биләр? (1 Бутрус 5:1—4).

¹⁴ Һәвари Бутрус ағсаггаллары Аллаһын сүрүсүнү отармаға сәсләмишди. (1 Бутрус 5:1—4 ајәләрини охујун.) Әзиз ағсаггаллар, билирик ки, сиз баҹы-гардашлары севирсиниз, истәјирсиниз ки, Јеһова илә мүнасибәтләринин мөһкәм олмасына көмәк едәсиниз. Амма бәзән ола билсин ки, вахтыныз аз олур, јахуд јорғун олурсунуз вә буна ҝөрә бу тәјинатынызы јеринә јетирә билмирсиниз. Бу заман нә едә биләрсиниз? Бүтүн нараһатлыгларынызы Јеһоваја данышын. Бутрус јазмышды: «Хидмәт едән гој Аллаһын вердији ҝүҹә архаланараг хидмәт етсин» (1 Бут. 4:11). Ола билсин, баҹы-гардашларын үзләшдији бәзи проблемләрин бу дүнјада там һәлли јохдур. Амма унутмајын ки, «баш чобан» Иса Мәсиһ онлара сиздән даһа јахшы көмәк едә биләр. О буну һәм бу ҝүн едә биләр, һәм дә ҝәләҹәкдә јени дүнјада. Јеһованын ағсаггаллардан истәји садәҹә одур ки, онлар баҹы-гардашлары севсинләр, онлара руһани ҹәһәтдән дајаг олсунлар вә «сүрүјә нүмунә» гојсунлар.

15. Бир ағсаггал баҹы-гардашларын гејдинә неҹә галыр? (Һәмчинин шәклә бахын.)

¹⁵ Узун илләрдир ағсаггал кими хидмәт едән Вилјам гардаш баҹы-гардашлары руһани ҹәһәтдән мөһкәмләндирмәјин ваҹиблијини баша дүшүр. COVID-19 пандемијасы башлајанда онун вә диҝәр ағсаггалларын башлыҹа иши групларындакы һәр тәблиғчи илә һәр һәфтә әлагә сахламаг иди. Вилјам буна нәјә ҝөрә бу гәдәр өнәм вердикләри барәдә белә дејир: «Баҹы-гардашларын чоху  евдә тәк јашајырды вә асанлыгла мәнфи фикирләрә гапыла биләрдиләр». Һансыса диндашы дәрдини данышанда Вилјам диггәтлә гулаг асыр, ону баша дүшмәјә, еһтијаҹыны дујмаға чалышыр. Сонра она көмәк етмәк үчүн сајтымыздан нәшрләр вә ја видеолар тапыр. О дејир: «Баҹы-гардашлары руһани ҹәһәтдән мөһкәмләндирмәк инди һәмишәкиндән даһа ваҹибдир. Биз инсанлара Јеһова һагда өјрәтмәк үчүн бүтүн ҝүҹүмүзү гојуруг. Баҹы-гардашлары да мөһкәмләндирмәк үчүн ејни ҝүҹү сәрф етмәлијик, Јеһованын гузуларына һәгигәтдә галмаға көмәк етмәлијик».

16. Бутрусун мәктубларындан өјрәндијимиз нәсиһәтләри неҹә тәтбиг едә биләрик?

¹⁶ Биз Бутрусун ики мәктубундакы ҹәми бир нечә ваҹиб фикрә тохундуг. Јәгин, ҝөрдүнүз ки, һансыса саһәдә јахшылашмалысыныз. Мәсәлән, истәјәрдиниз, јени дүнјада алаҹағыныз немәтләр барәдә даһа тез-тез дүшүнәсиниз? Ишдә, мәктәбдә вә ја башга јерләрдә шаһидлик вермәји гаршыныза мәгсәд гојдунуз? Башга һансы саһәләрдә баҹы-гардашлара һәрарәтли мәһәббәт ҝөстәрмәлијик? Әзиз ағсаггаллар, Јеһованын гузуларыны ҹанла-башла бәсләмәјә гәтијјәтлисиниз? Өзүнүзү дүрүстҹәсинә јохлајын. Ола билсин, мүәјјән зәиф ҹәһәтләринизин олдуғуну ҝөрәҹәксиниз. Руһдан дүшмәјин. Аға хејирхаһдыр, сизә тәкмилләшмәјә көмәк едәҹәк (1 Бут. 2:3). Бутрус бизә белә бир әминлик верир: «Аллаһ… тәлиминизи баша чатдыраҹаг, сизи ҝүҹлү, мәтин, сарсылмаз едәҹәк» (1 Бут. 5:10).

17. Тәслим олмасаг вә Јеһовадан тәлим алмаға давам етсәк, нә әлдә едәҹәјик?

¹⁷ Бир дәфә Бутрус өзүнү Аллаһын Оғлунун јанында олмаға лајиг ҝөрмәмишди (Лука 5:8). Амма Јеһованын вә Исанын дәстәји сајәсиндә о, Мәсиһин сәдагәтли давамчысы ола билди. Нәтиҹәдә, Јеһова Бутруса «Ағамыз вә Хиласкарымыз Иса Мәсиһин әбәди Падшаһлығынын гапысы»ндан дахил олмаға иҹазә верди (2 Бут. 1:11). Бу чох бөјүк мүкафат иди! Бутрусдан өрнәк алараг сиз дә тәслим олмасаныз вә Јеһовадан тәлим алмаға давам етсәниз, әбәди һәјат мүкафатыны алаҹагсыныз. Сиз «иманынызын һәдәфинә — хиласа» јетишәҹәксиниз (1 Бут. 1:9).