1, 2. Нәјә ҝөрә Шимшонун һадисәсини арашдырмаг јахшы оларды?

 ШИМШОН адыны ешидәндә ағлыныза нә ҝәлир? Јәгин, онун гејри-ади ҝүҹү. О, доғрудан да, белә инсан иди. Бунунла белә, Шимшон сәһв гәрар да вермишди вә бунун әзабыны чәкмишди. Амма Јеһова онун илләр әрзиндә сәдагәтлә етдији хидмәти гијмәтләндирирди вә ондан өрнәк алмағымыз үчүн нүмунәсини Кәламына јаздырыб.

² Јеһова Исраил халгына көмәк етмәк үчүн Шимшон васитәсилә һејрәтли ишләр ҝөрмүшдү. Шимшонун өлүмүндән әсрләр сонра һәвари Булус онун адыны бөјүк иман саһибләринин арасында чәкмишди (Ибр. 11:32—34). Шимшон һәтта ән ағыр вәзијјәтләрдә белә Јеһоваја архаланырды. Мәгаләдән ҝөрәҹәјимиз кими, Шимшондан чох шеј өјрәнә биләрик вә онун нүмунәси бизи руһландыра биләр.

3. Шимшона һансы тапшырыг верилмишди?

³ Шимшон дүнјаја ҝәлән вахт исраиллиләр филиштлиләрин табелијиндә иди (Һак. 13:1). Онлар исраиллиләрә чох зүлм верирдиләр. Буна ҝөрә дә Јеһова исраиллиләри филиштлиләрдән гуртармаг үчүн Шимшону сечди (Һак. 13:5). Бу һеч дә асан тапшырыг дејилди. Бунун үчүн Шимшон Јеһоваја етибар етмәли иди.

4. Јеһованын көмәји илә Шимшон филиштлиләрин әлиндән неҹә гуртулмушду? (Һакимләр 15:14—16).

⁴ Шимшонун Јеһоваја, Онун дәстәјинә ҝүвәндијини ҝөстәрән бир һадисәјә бахаг. Бир дәфә филиштлиләр Шимшону  тутмаг үчүн Леһијә, еһтимал ки, Јәһудаја ҝәлмишди. Јәһудалылар горхуја дүшүб Шимшону онлара тәслим етмәк гәрарына ҝәлди. Онлар ики тәзә кәндирлә онун әл-голуну бағлајыб филиштлиләрин јанына ҝәтирди (Һак. 15:9—13). Амма «Јеһованын руһу Шимшона ҝүҹ верди» вә о, әлләринин буховуну ачды. Сонра «о, тәзә өлмүш бир ешшәјин чәнә сүмүјүнү тапды» вә онунла мин филиштлини гырды. (Һакимләр 15:14—16 ајәләрини охујун.)

5. Шимшонун ешшәјин чәнә сүмүјүндән истифадә етмәси онун Јеһоваја ҝүвәндијини неҹә ҝөстәрмишди?

⁵ Бәс нәјә ҝөрә ешшәјин чәнә сүмүјү илә? Бу ки дөјүшдә истифадә олунан силаһ дејилди! Шимшон јахшы билирди ки, гәләбә онун истифадә етдији силаһдан јох, Јеһовадан асылыдыр. Буна ҝөрә дә о, әлинә һансы силаһ кечдисә, ондан да истифадә етди. Әсас о иди ки, Аллаһын нијјәти һәјата кечсин. Јеһоваја етибары сајәсиндә бу иманлы инсан бөјүк гәләбә газанды.

6. Шимшонун һадисәсиндән тәјинатларымызла бағлы нә өјрәнирик?

⁶ Јеһованын вердији ҝүҹ сајәсиндә биз дә бүтүн тәјинатларымызы јеринә јетирә биләрик, һәтта баҹармајаҹағымызы дүшүндүјүмүз тапшырыглары белә. Јеһова бизә һеч ағлымыза белә ҝәлмәјән тәрздә көмәк едә биләр. Әмин олун ки, Шимшона ҝүҹ верән Аллаһ сизә дә ирадәсини јеринә јетирмәјә көмәк едәҹәк. Әсас одур ки, Онун көмәјинә архаланасыныз (Мәс. 16:3).

7. Нәјә ҝөрә көмәк үчүн Јеһоваја үз тутмалыјыг? Нүмунә чәкин.

⁷ Ибадәт евләринин тикинтисиндә иштирак едән баҹы-гардашлар Јеһоваја бөјүк етибар ҝөстәрибләр. Әввәлләр гардашлар адәтән јени ибадәт евләринин вә диҝәр биналарын лајиһәсини өзләри һазырлајырдылар вә сонра тикирдиләр. Амма Јеһованын тәшкилаты бөјүдүкҹә мүәјјән дәјишикликләр етмәјә еһтијаҹ јаранды. Мәсул гардашлар Јеһованын көмәјинә үз тутдулар вә јени үсуллары сынагдан кечирдиләр.  Мәсәлән, бу үсуллардан бири әмлак алыб, орада јенидәнгурма ишләри апармаг иди. Роберт адлы бир гардаш сон илләр әрзиндә дүнјанын чох јериндә тикинти лајиһәләримиздә иштирак едиб. О дејир: «Әввәл-әввәл јени үсул бәзиләринә чәтин ҝәлирди, чүнки биз илләр әрзиндә бу иши тамамилә фәргли ҹүр ҝөрмүшүк. Амма гардашлар ујғунлашмаға һазыр идиләр вә ајдын ҝөрүнүрдү ки, Јеһова бу дәјишикликләрдән разыдыр. О, ишимизи аванд едирди». Бу һадисә ҝөстәрир ки, Јеһова Өз ирадәсини јеринә јетирмәк үчүн халгына рәһбәрлик едир. Бу кими һадисәләрин сајы чохдур. Вахташыры олараг јахшы олар ки, һәр биримиз белә бир суалын үзәриндә дүшүнәк: «Мән Јеһовадан көмәк истәјирәм вә Она даһа јахшы хидмәт етмәк үчүн лазыми дәјишикликләр етмәјә һазырам?»

8. Бир дәфә Шимшон бәрк сусајанда нә етмишди?

⁸ Јәгин, Шимшонун иҝидлик ҝөстәрдији диҝәр һадисәләри дә хатырлајырсыныз. О, тәк ҹаны илә ширлә вурушмушду, даһа сонра филиштлиләрин Ашкелон шәһәриндә 30 нәфәри өлдүрмүшдү (Һак. 14:5, 6, 19). Шимшон јахшы билирди ки, бүтүн бунлары Јеһованын көмәји олмадан едә билмәзди. Онун һәјатында баш верән бир һадисәдән буну ајдын ҝөрмәк олар. О, 1000 филиштлини өлдүрәндән сонра бәрк сусамышды. Бу заман Шимшон өз баҹарығына ҝүвәниб, өзү үчүн су тапа биләрди. Амма о, белә етмәди, Јеһованы чағырыб Ондан көмәк истәди (Һак. 15:18).

9. Јеһова Шимшонун көмәк үчүн јалварышына неҹә ҹаваб вермишди? (Һакимләр 15:19).

⁹ Јеһова Шимшонун јалварышыны ҹавабсыз гојмады, мөҹүзәви шәкилдә бир чешмә јаратды. Шимшон бу судан ичди вә «өзүнә ҝәлиб ҹанланды». (Һакимләр 15:19 ајәсини охујун.) Бу чешмә узун илләр галды, һәтта ҝөрүнүр, Ишмуил пејғәмбәр «Һакимләр» китабыны јазанда о һәлә дә вар иди. Јәгин, һәр дәфә бу чешмәни ҝөрмәк исраиллиләрә хатырладырды ки, Јеһова Она ҝүвәнән хидмәтчиләринин дадына јетмәјә һәмишә һазырдыр.

10. Јеһованын көмәјини алмаг үчүн нә етмәлијик? (Һәмчинин шәклә бахын.)

¹⁰ Биз дә баҹарығымыздан, истедадымыздан, јахуд Јеһованын јолунда ҝөрдүјүмүз ишләрдән асылы олмајараг, һәмишә көмәк үчүн Она үз тутмалыјыг. Тәвазөкар олуб гәбул етмәлијик ки, јалныз Јеһоваја ҝүвәндијимиз тәгдирдә уғур әлдә едә биләрик. Шимшон Јеһованын вердији судан ичәндән сонра ҝүҹләнмишди. Биз дә Јеһованын бизә вердији һәр бир көмәкдән јарарланараг руһани ҹәһәтдән мөһкәмләнә биләрик (Мәт. 11:28).

11. Јеһованын көмәјиндән там шәкилдә неҹә јарарлана биләрик? Нүмунә чәкин.

¹¹ Русијадан олан Алексеј гардашын нүмунәсинә бахаг. О, ағыр тәгибләрлә үзләшир. Бәс она мөһкәм галмаға нә көмәк едир? Алексејлә јолдашынын мүнтәзәм олараг руһани ишләрлә мәшғул олмаг үчүн јахшы ҹәдвәли вар. Алексеј фәрди мүталиә етмәк вә Мүгәддәс Китабы һәр ҝүн охумаг үчүн әлиндән ҝәләни едир. О, һәр сәһәр јолдашы илә бирҝә ҝүнүн ајәсини мүзакирә едир вә онлар бирликдә дуа едирләр. Онун нүмунәсиндән нә өјрәнирик? Биз Јеһоваја архаланмалыјыг, өз ҝүҹүмүзә ҝүвәнмәмәлијик. Бунун үчүн иманымызы мөһкәмләндирән ишләрлә мәшғул олмалыјыг. Мәсәлән, Мүгәддәс Китабы мүталиә етмәлијик, дуа етмәлијик, ибадәт ҝөрүшләриндә вә тәблиғ ишиндә иштирак етмәлијик.  Онда Јеһова да бизә хидмәтимизи давам етдирмәјә көмәк едәҹәк. Јеһова Шимшону ҝүҹлү етдији кими бизи дә ҝүҹлү едә биләр.

12. Шимшон һансы сәһв гәрары вермишди вә бу онун өнҹәки гәрарларындан нә илә фәргләнирди?

¹² Әлбәттә, Шимшон да бизим кими бәзән сәһвләр едирди. Онун вердији бир гәрар бөјүк фаҹиә илә нәтиҹәләнмишди, чүнки Шимшон бу гәрарында Јеһованын она вердији тапшырығы унутмушду. О, һаким оландан бир мүддәт сонра «Сорег вадисиндә јашајан Дилалә адлы бир гыза ашиг олду» (Һак. 16:4). Бу мүнасибәт әввәлки мүнасибәтләриндән фәргли иди. Бундан әввәл о, филиштли бир гызла аилә гурмаг истәјирди. «Бу иш Јеһовадан» иди, чүнки «О, филиштлиләри ҹәзаландырмаг үчүн мәгам ҝөзләјирди». Бундан бир мүддәт сонра Шимшон филиштлиләрин Гәззә шәһәриндә бир фаһишәнин евиндә галмышды. Һәмин вахт Јеһова Шимшона ҝүҹ верди вә о, шәһәр дарвазаларыны јериндән чыхартды, бунунла да шәһәр зәифләди (Һак. 14:1—4; 16:1—3). Дилалә исә, ҝөрүнүр, исраилли иди, бу сәбәбдән Шимшонун онунла мүнасибәти филиштлиләрлә дөјүшмәк үчүн һеч бир фүрсәт јаратмырды.

13. Дилалә Шимшонун аҹынаҹаглы вәзијјәтә дүшмәсинә неҹә сәбәб олду?

¹³ Дилалә бөјүк мәбләғдә пулун мүгабилиндә филиштлиләрә Шимшону сатаҹағына бојун олду. Јәгин, Шимшонун ҝөзү Дилаләнин ешгиндән кор олмушду. Она ҝөрә дә Дилаләнин онун архасынҹа нә ишләр чевирдијини ҝөрә билмирди. Сәбәб һәр нә олса да, Дилалә ҝедиб-ҝәлиб Шимшондан онун ҝүҹүнүн сәбәбини сорушурду. О да ахырда мәҹбур галыб сирри деди. Әфсуслар  олсун ки, Шимшонун сәһви она баһа-баша ҝәлди. О һәм ҝүҹүнү итирди, һәм дә бир мүддәтлик Јеһованын рәғбәтини (Һак. 16:16—20).

14. Дилаләјә етибар етдији үчүн Шимшонун башына нәләр ҝәлди?

¹⁴ Шимшон Јеһоваја јох, Дилаләјә етибар етдији үчүн бунун аҹы нәтиҹәләрини бичди. Филиштлиләр ону тутуб ҝөзүнү кор етдиләр. Сонра ону Гәззә шәһәриндә зиндана салдылар. Орада о, нөкәрчилик едиб дәјирман дашы һәрләдирди. О һәмин бу шәһәрин дарвазасыны чыхарыб сакинләрини алчалтмышды. Инди исә бир мәрасим заманы филиштлиләр ону алчалтдылар. Онлар сахта аллаһ олан Дагона гурбан ҝәтирдиләр, чүнки дүшүнүрдүләр ки, Шимшону онларын әлинә о, тәслим едиб. Сонра Шимшону зиндандан чыхарыб мәрасимә ҝәтирдиләр ки, онлары «әјләндирсин», ону әлә салсынлар (Һак. 16:21—25).

15. Шимшон јенидән Јеһоваја ҝүвәндијини неҹә ҝөстәрди? (Һакимләр 16:28—30). (Үз габығындакы шәклә бахын.)

¹⁵ Шимшон ҹидди сәһв етсә дә, тәслим олмады. О, Јеһованын она вердији тапшырығы јеринә јетирмәк, филиштлиләрә гаршы вурушмаг үчүн фүрсәт ахтарды. (Һакимләр 16:28—30 ајәләрини охујун.) Шимшон филиштлиләрдән һејфини чыхмаг үчүн Јеһовадан көмәк истәди. Јеһова да онун јалварышыны ешидиб она јенидән гејри-ади ҝүҹ верди. Нәтиҹәдә, Шимшон әввәлкиндән дә чох филиштлини гырды.

16. Шимшонун етдији сәһвдән һансы ибрәти ҝөтүрә биләрик?

¹⁶ Шимшон сәһвинин аҹысыны чәксә дә, бу она Јеһованын нијјәтини јеринә јетирмәјә мане олмады. Ејнилә, ола билсин, бизә сәһвимизә ҝөрә ирад тутулсун вә ја мәсулијјәтимизи итирәк. Амма биз буна ҝөрә Јеһоваја хидмәтимизи дајандырмамалыјыг. Унутмамалыјыг ки, Јеһова бизи бағышламаға һазырдыр (Зәб. 103:8—10). Сәһв етсәк дә, Шимшон кими биз дә, Јеһованын ишиндә јарарлы ола биләрик.

17, 18. Мајклын һадисәсиндә сизи нә руһландырды? (Һәмчинин шәклә бахын.)

¹⁷ Ҝәлин ҝөрәк Мајкл адлы бир ҹаван гардашла нә баш вермишди. Бир заманлар о, јығынҹаг хидмәтчиси вә өнҹүл кими Јеһоваја хидмәтдә чох иш ҝөрүрдү. Амма әфсуслар олсун ки, етдији сәһвә ҝөрә о, јығынҹагдакы мәсулијјәтләрини итирди. Мајкл  дејир: «Бу вахта гәдәр Јеһоваја хидмәтдә чох актив олмушам. Амма бирдән-бирә санки әлим-голум бағланды. Дүздүр, Јеһованын мәни атдығы һеч ағлымын уҹундан белә кечмәјиб. Лакин Онунла мүнасибәтләримин јенидән әввәлки кими олаҹағына вә ја јығынҹагда јенә әввәлки кими хидмәт едәҹәјимә инанмырдым».

¹⁸ Тәрифәлајигдир ки, Мајкл ҝери чәкилмәди. О, сөзүнә әлавә едир: «Јеһова илә мүнасибәтими бәрпа етмәјә чалышырдым. Бунун үчүн тез-тез дуа едиб, үрәјими Она ачырдым, һәмчинин мүталиә едирдим». Бир мүддәт сонра јығынҹагда Мајкла јенидән мәсулијјәтләр һәвалә олунду. Һал-һазырда о, ағсаггал вә өнҹүл кими хидмәт едир. Мајкл дејир: «Јығынҹағын, әсас да ағсаггалларын дәстәји вә руһландырыҹы сөзләри сајәсиндә баша дүшдүм ки, Јеһова мәни һәлә дә севир, јығынҹагда јенидән тәмиз виҹданла хидмәт едә биләрәм. Башыма ҝәләнләрдән өјрәндим ки, Јеһова үрәкдән төвбә едән һәр кәси бағышлајыр». Биз дә әмин ола биләрик ки, һәтта сәһвләр етсәк дә, Јеһованын јолунда јарарлы ола биләрик, О бизә дајаг олаҹаг. Әсас одур ки, әлимиздән ҝәләни едиб сәһвимизи дүзәлдәк вә Она архаланмаға давам едәк (Зәб. 86:5; Мәс. 28:13).

19. Шимшонун һадисәси сизи неҹә мөһкәмләндирир?

¹⁹ Бу мәгаләдә Шимшонун һәјатында баш вермиш бир нечә әламәтдар һадисәјә нәзәр салдыг. Шимшон камил инсан дејилди. О, Дилаләјә ујуб ҝүнаһ етсә дә, Јеһоваја хидмәтини дајандырмады. Јеһова да ону атмады, онун васитәсилә јенә гүдрәтли бир иш ҝөрдү. Шимшон Јеһованын ҝөзүндә һәлә дә иман өрнәји иди вә Јеһова онун адыны Ибраниләрә 11-ҹи фәсилдәки садиг инсанларын сијаһысына дахил етди. Неҹә дә хошдур ки, биз белә бир мәһәббәтли Аллаһа гуллуг едирик! О ән зәиф анларымызда белә бизә дајаг олмаға һазырдыр. Одур ки, ҝәлин биз дә Шимшон кими Јеһоваја јалвараг: «Мәни јадына сал. Пәрвәрдиҝара, мәнә… гүввәт вер» (Һак. 16:28).