1. Јуәс, Үзијјә вә Јушијјә һансы чәтин вәзијјәтлә үзләшмишди?

 ТӘСӘВВҮР ЕДИН КИ, ушаг вә ја јенијетмә јашларынызда Аллаһын халгынын падшаһы тәјин олунурсунуз. Сәлаһијјәтиниздән неҹә истифадә едәрдиниз? Мүгәддәс Китабда белә ҝәнҹләрин олдуғу дејилир. Мәсәлән, Јуәс 7 јашында, Үзијјә 16 јашында, Јушијјә исә 8 јашында Јәһуданын падшаһы олмушду. Јәгин, бу онлар үчүн чох ағыр мәсулијјәт иди. Амма чәтинликләри ашыб дүзҝүн гәрарлар вермәк үчүн Јеһова вә башгалары онлара көмәк едирди.

2. Нәјә ҝөрә Јуәсин, Үзијјәнин вә Јушијјәнин һәјатына диггәт јетирмәлијик?

² Биз нә падшаһыг, нә дә мәликә. Амма бу үч падшаһдан ваҹиб дәрсләр өјрәнә биләрик. Онларын һәм јахшы, һәм дә пис гәрарлары олмушду. Бу падшаһларын һәјаты әсасында ҝөрәҹәјик ки, јахшы инсанларла отуруб-дурмаг, тәвазөкар олмаг вә Јеһованы ахтармаг нәјә ҝөрә ваҹибдир.

3. Јуәс падшаһ баш каһин Јәһјадајын нәсиһәтинә неҹә јанашмышды?

³ Јуәс кими јахшы гәрарлар верин. Јуәс ушаг оланда атасыны итирди. Садиг баш каһин Јәһјадај ону һимајәсинә ҝөтүрүб өз оғлу кими бөјүтдү. Јуәс ағыллы давранды, Јәһјадајын вердији нәсиһәтләри гәбул етди. О, Јәһјадајдан өрнәк алараг Јеһоваја гуллуг етди вә халгы да буна сәсләди. Һәтта Јуәс Јеһованын мәбәдинин тәмир олунмасы үчүн тәдбир ҝөрдү (2 Салн. 24:1, 2, 4, 13, 14).

4. Јеһованын әмрләрини уҹа тутмаг бизә һансы хејри ҝәтирир? (Мәсәлләр 2:1, 5б, 10—12, 16б).

⁴ Әҝәр сизә Јеһованы севмәк, Онун нормаларына ујғун  јашамаг ашыланырса, буну гијмәтләндирин, бу сизә верилән бир һәдијјәдир. (Мәсәлләр 2:1, 5б, 10—12, 16б ајәләрини охујун.) Валидејнләр өвладларына мүхтәлиф јолларла тәлим-тәрбијә верир. Ҝөрүн Катја баҹынын атасы она јахшы гәрарлар вермәјә неҹә көмәк едиб. Атасы һәр ҝүн ону мәктәбә апаранда онунла ҝүнүн ајәсини мүзакирә едирди. Катја дејир: «Бу мүзакирәләр сајәсиндә һәмин ҝүн үзләшдијим чәтин вәзијјәтләрдә дүзҝүн даврана билирдим». Амма, бәлкә дә дүшүнүрсүнүз ки, валидејнләринизин Мүгәддәс Китаб әсасында гојдуғу гајдалар азадлығынызы әлиниздән алыр. Онларын дедикләринә әмәл етмәјә сизә нә көмәк едә биләр? Анастасија баҹы дејир ки, валидејнләри она гајдалар гојанда бунун сәбәбини изаһ едирдиләр. О, әлавә едир: «Бунун сајәсиндә онларын гојдуғу мәһдудијјәтләрә гадаға кими јох, мүдафиә кими бахырдым. Баша дүшүрдүм ки, онлар буну мәни истәдикләри үчүн едирләр».

5. Давранышыныз валидејнләринизә вә Јеһоваја неҹә тәсир едир? (Мәсәлләр 22:6; 23:15, 24, 25).

⁵ Мүгәддәс Китаб әсасында верилән мәсләһәтләрә әмәл етсәниз, валидејнләринизин үрәји даға дөнәҹәк. Ән әсасы, Јеһованын гәлби севинәҹәк вә достлуғунуз мөһкәмләнәҹәк. (Мәсәлләр 22:6; 23:15, 24, 25 ајәләрини охујун.) Елә бу сәбәбләрә ҝөрә Јуәсин ушаг вахты гојдуғу нүмунәни изләмәјә дәјәр!

6. Јуәс кимләрин мәсләһәтинә гулаг асмаға башлады вә нәтиҹә неҹә олду? (2 Салнамәләр 24:17, 18).

⁶ Јуәсин пис гәрарларындан ибрәт ҝөтүрүн. Јәһјадај өләндән сонра Јуәс пис инсанларла достлуг гурду. (2 Салнамәләр 24:17, 18 ајәләрини охујун.) О, Јеһованы севмәјән Јәһуда әмирләринин сөзү илә отуруб-дурмаға башлады. Разы оларсыныз ки, Јуәс бу хатакар инсанлардан узаг дурмалы иди (Мәс. 1:10). О исә әксинә, онларын дедији илә отуруб-дурурду. Һәтта бибиси оғлу Зәкәријјә она сәһвини дејәндә Јуәс ону өлдүртдү (2 Салн. 24:20, 21; Мәт. 23:35). Дәһшәтә, ағылсызлыға бир бах! Јуәс јахшы башламышды, амма әфсуслар олсун ки, ахырда дөнүк вә гатил олду. Сонда өз хидмәтчиләри ону өлдүрдү (2 Салн. 24:22—25). Әҝәр Јуәс Јеһоваја вә Ону севәнләрә һәмишә гулаг ассајды, һәјаты тамам башга ҹүр оларды! Јуәсин башына ҝәләнләрдән һансы нәтиҹәни чыхарырсыныз?

7. Кимләрлә достлуг етмәлисиниз? (Һәмчинин шәклә бахын.)

⁷ Чыхардығымыз бир нәтиҹә одур ки, биз  Јеһованы севән, Ону разы салмаг истәјән инсанларла достлуг етмәлијик. Онлар бизи јахшы ишләрә тәшвиг едәҹәк. Һәмчинин мүтләг дејил ки, јалныз өз јашыдларымызла достлуг едәк. Билдијимиз кими, Јуәс Јәһјадајдан јашҹа хејли кичик иди. Достларыныз барәдә өзүнүзә бу суаллары верин: «Онлар Јеһоваја иманымы мөһкәмләндирмәјә көмәк едир? Мәни Аллаһын нормаларына ујғун јашамаға тәшвиг едир? Мәнимлә Јеһова вә Онун дәјәрли һәгигәтләри һагда сөһбәт едир? Јеһованын нормаларына һөрмәтлә јанашыр? Садәҹә ешитмәк истәдикләрими дејир, јохса сәһвими дә ҝөстәрир?» (Мәс. 27:5, 6, 17). Ачығы, достларыныз Јеһованы севмирсә, онлар сизә лазым дејил. Амма Јеһованы севирләрсә, онлардан бәрк јапышын, онларын сизә чох көмәји дәјәҹәк! (Мәс. 13:20).

8. Сосиал шәбәкәләрдән истифадә едирсинизсә, нәји нәзәрә алмалысыныз?

⁸ Сосиал шәбәкәләр васитәсилә биз аиләмизлә вә достларымызла әлагә сахлаја билирик. Амма чох инсан орада һәр алдығынын, һәр етдијинин шәклини вә ја видеосуну чәкиб пајлашыр. Онлар башгаларында тәәссүрат јаратмаг истәјирләр. Сиз дә сосиал шәбәкәләрдән истифадә едирсинизсә, нөвбәти суаллар үзәриндә дүшүнүн: «Мәгсәдим инсанлары өзүмә һејран гојмагдыр? Пајлашдығым постларла инсанларын үрәјини ачмаг истәјирәм, јохса өзүмә тәриф газанмаг? Сосиал шәбәкәләрдән истифадә едән инсанларын фикринә ҝөрә дүшүнҹәм, данышығым вә һәрәкәтләрим мәнфијә доғру дәјишир?» Рәһбәрлик Шурасынын үзвү олмуш Нејтан Норр гардаш белә бир мәсләһәт вермишди: «Инсанлары разы салмаға чалышмајын. Белә етсәниз, һеч кәси разы сала билмәјәҹәксиниз. Јеһованы разы салын. Онда Ону севән һәр кәси разы салаҹагсыныз».

9. Јеһова Үзијјәјә һансы саһәләрдә көмәк етмишди? (2 Салнамәләр 26:1—5).

⁹ Үзијјә кими јахшы гәрарлар верин. Ҝәнҹлијиндә Үзијјә тәвазөкар иди. О, Аллаһдан горхмағы өјрәнмишди. Үзијјә 68 ил өмүр сүрмүшдү вә өмрүнүн әксәр һиссәсиндә Јеһова онун ишләрини аванд етмишди. (2 Салнамәләр 26:1—5 ајәләрини охујун.) Үзијјә чохлу дүшмән халглары мәғлуб етмишди вә Јерусәлимин мүдафиә системини мөһкәмләндирмишди (2 Салн. 26:6—15). Сөзсүз ки, о, Јеһованын көмәји илә етдији ишләрә ҝөрә чох севинирди (Ваиз 3:12, 13).

10. Үзијјә илә нә баш верди?

¹⁰ Үзијјәнин пис гәрарларындан ибрәт ҝөтүрүн. Үзијјә бир падшаһ кими башгаларына ҝөстәришләр вермәјә вәрдиш етмишди. Бәлкә дә елә бу сәбәбә ҝөрә дүшүнүрдү ки, үрәји истәјәни едә биләр. Мәсәлән, бир ҝүн о, тәкәббүрлү давраныб «бухур гурбанҝаһында бухур јандырмаг үчүн Јеһованын мәбәдинә» ҝирмишди, һалбуки падшаһларын буну етмәјә ихтијары јох иди (2 Салн. 26:16—18). Баш каһин Әзрија ону сәһв һәрәкәтдән дөндәрмәјә чалышанда Үзијјә бәрк гәзәбләнди. Әфсуслар олсун ки, Үзијјә бунунла сәдагәтлә хидмәт етдији илләри бада верди вә ҹүзама тутулду (2 Салн. 26:19—21). Әҝәр о, тәвазөкар галсајды, һәјаты тамам башга ҹүр оларды!

11. Тәвазөкар олуб-олмадығымыз нәләрдән ҝөрүнәҹәк? (Һәмчинин шәклә бахын.)

¹¹ Үзијјә ҝүҹләнәндә унутду ки, әлиндә олан һәр шејә Јеһованын сајәсиндә саһибдир. Бундан нә өјрәнирик? Унутмамалыјыг ки, һәјатда вә хидмәтдә әлдә етдијимиз һәр бир ҝөзәл шеји бизә Јеһова вериб. Буна ҝөрә дә нәјәсә наил оланда бунунла өјүнмәмәлијик, әксинә, һәр шеј үчүн Јеһоваја  миннәтдар олмалыјыг b (1 Кор. 4:7). Тәвазөкарлыгла гәбул етмәлијик ки, ҝүнаһлыјыг вә дүзәлишә еһтијаҹымыз вар. 60 јашларында олан бир гардаш јазмышды: «Баша дүшдүм ки, өзүм һагда јүксәк фикирдә олмамалыјам. Һансыса ағылсыз һәрәкәтимә ҝөрә мәнә дүзәлиш едиләндә чалышырам, лазыми дәјишикликләр едиб ирәли ҝедим». Јеһовадан горхмағын вә тәвазөкарлығымызы горумағын сајәсиндә хошбәхт өмүр сүрәҹәјик. Бу, данылмаз фактдыр! (Мәс. 22:4).

12. Јушијјә јенијетмә јашларындан Јеһованы неҹә ахтарырды? (2 Салнамәләр 34:1—3).

¹² Јушијјә кими јахшы гәрарлар верин. Јушијјә јенијетмә јашларында Јеһованы ахтармаға башлады. О, Јеһованы танымаг, Онун ирадәсини јеринә јетирмәк истәјирди. Бунунла белә, бу ҝәнҹ падшаһын һәјаты һеч дә асан дејилди. Һәмин вахт әксәријјәт сахта аллаһлара ибадәт едирди, буна ҝөрә дә Јеһованын тәрәфини тутмаг үчүн Јушијјәјә бөјүк ҹәсарәт лазым иди. О, белә дә етди! Һеч 20 јашы јох иди ки Јушијјә өлкәдән сахта ибадәти тәмизләмәјә башлады. (2 Салнамәләр 34:1—3 ајәләрини охујун.)

13. Өзүнүзү Јеһоваја һәср етмәјиниз һәјатынызы неҹә дәјишәҹәк?

¹³ Сиз дә чох ҝәнҹ олсаныз да, Јушијјәдән өрнәк алараг Јеһованы ахтармаға, Онун хүсусијјәтләри барәдә өјрәнмәјә ҹан ата биләрсиниз. Бу ҹүр давам етсәниз, өзүнүзү Она һәср етмәк истәјәҹәксиниз. Бәс һәср олунмағынызын һәјатыныза һансы тәсири олаҹаг? 14 јашында вәфтиз олунан Лука дејир: «Индән белә мән Јеһоваја хидмәти һәјатымда һәр шејдән үстүн тутаҹағам вә Онун гәлбини севиндирмәјә чалышаҹағам» (Марк 12:30). Әҝәр сизин дә үрәјиниздә белә бир истәк варса, нә хош сизә!

14. Јушијјә падшаһдан өрнәк алан ҝәнҹләрин нүмунәсини чәкин.

¹⁴ Јеһованын ҝәнҹ хидмәтчиләри һансы чәтинликләрлә үзләшир? 12 јашында вәфтиз олунмуш Ҹоһан дејир ки, синиф јолдашлары ону вејп, јәни електрон сигарет чәкмәјә  мәҹбур едир. Ҹоһан онларын тәзјигинә гаршы дурмаг үчүн өзүндә неҹә ҝүҹ тапыр? О, өзүнә хатырладыр ки, вејп һәм сағламлығыны, һәм дә Јеһова илә мүнасибәтини корлајаҹаг. 14 јашында вәфтиз олунан Рејчел исә мәктәбдәки чәтинликләрә неҹә таб ҝәтирдији илә бағлы белә дејир: «Һәр бир вәзијјәтдә ағлыма һансыса руһани фикир ҝәтирмәјә чалышырам. Мәсәлән, олур ки, тарих дәрси јадыма Мүгәддәс Китабдан һансыса һадисәни вә ја пејғәмбәрлији салыр. Јахуд да мәктәбдә киминләсә сөһбәт едәндә онунла бөлүшмәк үчүн һансыса ајәни јадыма салырам». Ола билсин, чәтинлијиниз Јушијјә падшаһынкы кими дејил, амма сәдагәтиниз онунку кими ола биләр. Ҝәнҹ јашларынызда таб ҝәтирдијиниз чәтинликләр сизи гаршыдакы сынаглара һазырлајаҹаг.

15. Јушијјәјә Јеһоваја сәдагәтлә хидмәт етмәјә нә көмәк етмишди? (2 Салнамәләр 34:14, 18—21).

¹⁵ Јушијјә падшаһ 26 јашында мәбәди тәмир етмәјә башлады. Бу заман мәбәддә «Јеһованын Муса васитәсилә вердији Төврат» тапылды. Падшаһ орада јазыланлары ешидәндә онлара әмәл етмәк үчүн дәрһал һәрәкәтә кечди. (2 Салнамәләр 34:14, 18—21 ајәләрини охујун.) Бәс сиз Мүгәддәс Китабы мүнтәзәм мүталиә етмәк истәјәрдиниз? Бәлкә дә артыг буну етмәјә чалышырсыныз. Бәс мүталиәниз неҹә ҝедир? Сизә шәхсән көмәк едәҹәк ајәләри гејд едирсиниз? Бајаг ады чәкилән Лука тапдығы мараглы фикирләри бир дәфтәрә јазыр. Бәлкә, сиз дә белә едәсиниз? Онда хошунуза ҝәлән ајәләр вә фикирләр јадынызда галаҹаг. Мүгәддәс Китаба нә гәдәр чох бәләд олсаныз вә севсәниз, Јеһоваја бир о гәдәр чох хидмәт етмәк истәјәҹәксиниз. Һәмчинин охудугларыныз Јушијјә падшаһ кими, сизи дә дүзҝүн давранмаға тәшвиг едәҹәк.

16. Јушијјә нәјә ҝөрә ҹидди сәһвә јол верди вә ондан һансы ибрәти ҝөтүрә биләрик?

¹⁶ Јушијјәнин пис гәрарындан ибрәт ҝөтүрүн. Јушијјә 39 јашында һәјаты баһасына  баша ҝәлән бир сәһв етди. О, Јеһованын фикрини өјрәнмәк әвәзинә, өз билдији кими давранды (2 Салн. 35:20—25). Бурадан нә өјрәнирик? Фәрги јохдур, јашымыз нә гәдәр чохдур, нечә мүддәтдир һәгигәтдәјик, биз һәмишә Јеһованы ахтармалыјыг. Бәс бу нә демәкдир? Јәни биз һәмишә дуа едиб Ондан мәсләһәт истәмәлијик, Кәламыны мүталиә етмәлијик вә јеткин мәсиһиләрин мәсләһәтинә гулаг асмалыјыг. Бунун сајәсиндә һәјатда ҹидди сәһвләр етмәјәҹәјик вә даһа хошбәхт олаҹағыг (Јаг. 1:25).

17. Үч Јәһуда падшаһынын һәјатындан һансы нәтиҹәни чыхарырыг?

¹⁷ Ҝәнҹлик чағы ҝөзәл фүрсәтләрлә долудур. Јуәс, Үзијјә вә Јушијјә барәдә јазыланлар ҝөстәрир ки, ҝәнҹләр дүзҝүн гәрарлар вериб Јеһованы разы салан өмүр сүрә биләрләр. Дүздүр, онларын үчү дә сәһвләрә јол вердиләр вә бунун ахыры һеч дә јахшы олмады. Амма әҝәр онларын јахшы ишләриндән өрнәк, сәһвләриндән исә ибрәт алсаг, хошбәхт өмүр сүрәҹәјимизә архајын ола биләрик.

18. Кимләрин нүмунәсиндән ҝөрмәк олар ки, хошбәхт өмүр сүрә биләрсиниз? (Һәмчинин шәклә бахын.)

¹⁸ Мүгәддәс Китабда Јеһоваја јахынлашан, Онун рәғбәтини газанан вә долғун өмүр сүрән башга ҝәнҹләрдән дә данышылыр. Онлардан бири Давуд иди. О та ушаглыгдан Јеһоваја ибадәт етмәјә гәрар вермишди. Сонралар исә садиг падшаһ олду. Дүздүр, онун бәзи сәһвләри дә олмушду, амма үмумиликдә Јеһова ондан чох разы иди (1 Пад. 3:6; 9:4, 5; 14:8). Давудун нүмунәсини арашдырсаныз, Јеһоваја сәдагәтлә гуллуг етмәк истәјәҹәксиниз. Һәмчинин Маркын вә ја Тимутинин һәјаты барәдә даһа чох шеј өјрәнә биләрсиниз. Ҝөрәҹәксиниз ки, онлар Јеһоваја ушаглыгдан хидмәт етмәјә башламышдылар вә ахырадәк сәдагәтлә өмүр сүрмүшдүләр. Бунунла онлар һәм Јеһованын гәлбини севиндирмишдиләр, һәм дә өзләри хошбәхт олмушдулар.

19. Ҝәләҹәјиниз неҹә ола биләр?

¹⁹ Ҝәләҹәјиниз һәјатынызы бу ҝүн неҹә гурмағыныздан асылыдыр. Әҝәр өз ағлыныза јох, Јеһоваја ҝүвәнсәниз, О сизин аддымларынызы јөнәлдәҹәк (Мәс. 20:24). Сиз хошбәхт, долғун өмүр сүрә биләрсиниз. Унутмајын ки, Јеһова Онун јолунда етдијиниз һәр бир шеји гијмәтләндирир. Һәјатынызы Јеһоваја хидмәтә сәрф етмәкдән даһа јахшы нә ола биләр?