1. Јашадығымыз зәманә башга дөврләрдән нәдә фәргләнир?

БИЗ тарихин мисилсиз бир дөврүндә јашајырыг. Мүгәддәс Китабда хәбәр верилдији кими, бу ҝүн Јеһова Аллаһ «һәр халга, һәр тајфаја, һәр үммәтә вә һәр дилә мәнсуб адамлардан ибарәт... бөјүк бир издиһам», гүдрәтли бир халг топлајыр. Бу халг «ҝеҹә-ҝүндүз [Аллаһын] мәбәдиндә Она гуллуг» едән сәккиз милјондан чох инсандан ибарәтдир (Вәһј 7:9, 15; Әшј. 60:22). Бу, доғрудан да, мөһтәшәм бир сајдыр! Тарихин һеч бир дөврүндә Јеһова Аллаһы вә инсанлары сәмими-гәлбдән севәнләрин сајы бу гәдәр олмајыб.

2. Аллаһы севмәјән инсанларда даһа чох нәјә севҝи мүшаһидә олунур? (Мәгаләнин әввәлиндәки шәклә бахын.)

² Мүгәддәс Китабда һәмчинин хәбәр верилмишди ки, дөврүмүздә инсанларда Аллаһа јох, башга шејләрә севҝи үстүнлүк тәшкил едәҹәк. Һәвари Булус јазмышды: «Ахырзаманда... инсанлар худбин, пулпәрәст... олаҹаглар, Аллаһдан чох ејш-ишрәти севәҹәкләр» (2 Тим. 3:1—4). Доғрудан да, бу ҝүн инсанлар өзләрини, пулу, әјләнҹәни даһа чох севирләр. Бу севҝи исә Мүгәддәс Китабын өјрәтдији севҝидән јүз сәксән дәрәҹә фәргләнир, белә ки, бу севҝинин көкүндә «мән» принсипи дајаныр. Бу ҹүр севҝи исә инсаны һеч вахт хошбәхт  едә билмәз. Јашадығымыз «сон дәрәҹә чәтин» һәјат елә бу ҹүр худбин севҝинин мәһсулудур.

3. Бу мәгаләдә һансы мөвзу мүзакирә олунаҹаг вә нә үчүн бу мөвзу ваҹибдир?

³ Һәвари Булус билирди ки, ахырзаманда дүнјаны бүрүјән егоизм руһу мәсиһиләрә мәнфи тәсир ҝөстәрә биләр. Буна ҝөрә дә, о, мәсиһиләри хәбәрдар етмишди ки, бу ҹүр инсанлардан узаг ҝәзсинләр (2 Тим. 3:5). Тәбии ки, сөһбәт өзүмүзү бу дүнјадан тамамилә тәҹрид етмәкдән ҝетмир. Белә исә, ҝәлин ҝөрәк дүнјанын руһундан «узаг ҝәз» ҝөстәриши һансы мәнаны дашыјыр вә неҹә јашамалыјыг ки, мәһәббәт мәнбәји Јеһова биздән разы галсын? Әввәла ҝәлин 2 Тимутијә 3:2—4 ајәләриндә тәсвир олунан севҝи илә Илаһидән гајнагланан севҝини гаршы-гаршыја гојаг. Бу бизә өзүмүзү јохламаға, һансы дәјәрләрә үстүнлүк вердијимизи ҝөрмәјә көмәк едәҹәк. Бу исә тапдығымыз хошбәхтлијин сахта вә ја ҝерчәк олмасы илә билаваситә бағлыдыр.

4. Нәјә ҝөрә инсанын өзүнә сағлам севҝи бәсләмәси гәбаһәт дејил?

⁴ Һәвари Булус демишди ки, «инсанлар худбин... олаҹаглар», јәни өзләрини һамыдан чох севәҹәкләр. Әслиндә, инсанын өзүнү севмәси нормалдыр, һәтта демәк олар, ваҹибдир, чүнки Јеһова бизи белә јарадыб. Иса Мәсиһ демишди: «Башгасыны өзүнү севдијин кими сев» (Марк 12:31). Ахы өзүнү севмәјән инсан башгасыны неҹә севә биләр?! Мүгәддәс Китабда һәмчинин бујрулур: «Әр дә арвадыны өз бәдәнини севдији кими севмәлидир. Арвадыны севән өзүнү севир, ахы елә бир адам јохдур ки, өз бәдәнинә нифрәт етсин, әксинә, инсан өз бәдәнинин гејдинә галыр, ону әзизләјир» (Ефес. 5:28, 29). Ҝөрүндүјү кими, инсанын өзүнә сағлам севҝи бәсләмәси гәбаһәт дејил.

5. Худбин инсаны неҹә тәсвир едәрдиниз?

⁵ Өзүнә сағлам севҝи бәсләмәклә худбинлик ајры-ајры шејләрдир. Худбин инсан өзүнү башгаларындан чох севир, өзү барәдә лүзумундан артыг фикирләшир. (Ромалылара 12:3 ајәсини охујун.) Бу ҹүр инсан анҹаг өз мәнафеји үчүн јашајыр, башгалары онун веҹинә дејил. Нә исә проблем јарананда мәсулијјәти өз бојнундан атыр вә ҝүнаһы һәмишә башгаларында ахтарыр. Мүгәддәс Китабы шәрһ едән бир китабда дејилир ки, худбин инсан «јумаг кими бүкүлүб бәдәнинин исти вә јумшаг һиссәсини ичинә гысан, әтрафдакылара исә ијнәләрини ҝөстәрән кирпијә бәнзәјир». Тәкҹә өзүнү дүшүнән инсан һеч вахт әсл хошбәхтлији дада билмәз.

6. Һансы инсанлар әсл хошбәхтлијә јетишир?

⁶ Мүгәддәс Китаб алимләри фәрз едир ки, һәвари Булусун мәнфи хүсусијјәтләрин сырасында худбинлијин адыны биринҹи чәкмәсинә сәбәб диҝәр мәнфи хүсусијјәтләрин худбинликдән төрәмәсидир. Аллаһ севҝиси исә инсанда тамам башга хүсусијјәтләр һасил едир. Илаһи мәһәббәт Мүгәддәс Китабда севинҹ, сүлһ, сәбир, хејирхаһлыг, јахшылыг, иман, мүлајимлик, өзүнә һаким олмаг кими хүсусијјәтләрлә әлагәләндирилир (Гал. 5:22, 23). Мәзмурчунун да јаздығы кими илаһи мәһәббәт инсаны хошбәхт едир. О демишди: «Аллаһы Јеһова олан халг нә бәхтијардыр!» (Зәб. 144:15). Јеһова хошбәхт Аллаһ олдуғу үчүн Онун хидмәтчиләри дә хошбәхтдирләр. Тәкҹә өзүнү севән, һәмишә башгаларындан нә исә уман инсанлардан фәргли олараг, онлар башгаларынын рифаһыны дүшүнүр, инсанларла пајлашмағы севирләр (Һәв. 20:35).

7. Һансы суалларын көмәји илә Аллаһа мәһәббәтимизи тәһлил едә биләрик?

⁷ Биз еһтијатлы олмасаг, гәлбимиздә Аллаһа мәһәббәтин јерини өзүмүзә мәһәббәт тута биләр. Биздә бу һалын јараныб-јаранмадығыны неҹә мүәјјән едә биләрик? Филиппилиләрә 2:3, 4 ајәләри бизә нәсиһәт едир: «Һиккә илә, тәкәббүрлә һеч нә етмәјин. Әксинә, тәвазөкар олуб башгаларыны өзүнүздән үстүн сајын. Тәкҹә өзүнүзү фикирләшмәјин, башгаларыны да фикирләшин». Бу ајәнин ишығында  өзүмүзә нөвбәти суаллары верә биләрик: «Ајәләрдәки нәсиһәтә әмәл едирәмми? Аллаһын ирадәсинә ујғун давраныраммы? Баҹы-гардашлара вә тәблиғ етдијим инсанлара јардым әлими узадыраммы?» Дүздүр, өзүндән чох башгаларыны дүшүнмәк һәмишә асан олмур. Бунун үчүн инсандан ҝүҹ вә фәдакарлыг тәләб олунур. Амма бу гурбана дәјәр, ахы бунунла биз јерин-ҝөјүн Јараданыны разы салмыш олуруг. Һәјатда бундан бөјүк хошбәхтлик ола биләрми?!

8. Аллаһ севҝиси бәзи баҹы-гардашларымызы һансы гәрарлара тәшвиг едиб?

⁸ Аллаһ севҝиси бәзи баҹы-гардашларымызы тәшвиг едиб ки, Јеһоваја хидмәтдә даһа чох иш ҝөрә билмәк үчүн карјерадан имтина етсинләр. Мәсәлән, ҝөтүрәк Бирләшмиш Штатларда јашајан, ихтисасҹа һәким олан Ерика адлы баҹымызы. О, тибб саһәсиндә јахшы вәзифә тутмаг имканындан кечәрәк өнҹүл хидмәтинә башламыш вә һәјат јолдашы илә бирҝә бир сыра өлкәдә хидмәт етмишдир. Баҹы кечмиш ҝүнләри хатырлајараг дејир: «Әҹнәбидилли әразидә хидмәт едәндә башымыза ҝәлән чохсајлы мараглы һадисәләр, газандығымыз достлар бизим һәјатымызы олдугҹа зәнҝинләшдириб. Инди һәкимлијә гајытсам да, вахтымы вә ҝүҹүмү әсасән инсанлара руһани шәфа вермәјә, јығынҹагдакы баҹы-гардашлара хидмәт етмәјә сәрф едирәм. Бу да мәнә дәрин мәмнунлуг вә севинҹ бәхш едир».

9. Нәјә ҝөрә пулпәрәст инсан хошбәхт ола билмәз?

⁹ Јухарыда гејд етдијимиз кими, ахырзаман барәдә верилән әламәтләрдән бири дә одур ки, инсанлар «пулпәрәст... олаҹаглар». Бир нечә ил бундан габаг Ирландијада белә бир һадисә баш вермишди. Бир өнҹүл гардашымыз бир киши илә Аллаһ барәдә сөһбәт едәндә киши пул кисәсиндән пул чыхардыб гардаша ҝөстәрәрәк фәхрлә дејир: «Мәним аллаһым бах будур!» Дүздүр, һәр кәс бу кишинин дедији сөзләри дилинә ҝәтирмәсә дә, дүнјанын вәзијјәти ҝөз габағындадыр: биз пул севән, мал севән дүнјада јашајырыг. Мүгәддәс Китабда дејилир ки, «ҝүмүш севән ҝүмүшдән дојмаз, вар-дөвләт севән дә газанҹдан» (Ваиз 5:10). Бәли, бу ҹүр инсанларын пул иштаһасы ҝүнү-ҝүндән артыр вә бу иштаһаны тәмин етмәјә чалышмагла онлар «өзләринә чохлу әзаб» чәкдирирләр (1 Тим. 6:9, 10).

10. Ағур варлы вә јохсул олмагла бағлы нә јазмышды?

¹⁰ Сөзсүз ки, пул инсаны мүәјјән мүдафиә илә тәмин едир; пулсуз кечинмәк гејри-мүмкүндүр (Ваиз 7:12). Бәс инсанын ҝәлири чох дејил, анҹаг зәрури еһтијаҹларына чатырса, о хошбәхт ола биләрми? Бәли, ола биләр. (Ваиз 5:12 ајәсини охујун.) Ҝәлин бахаг, Јаги оғлу Ағур пејғәмбәр Аллаһдан нә диләмишди: «Мәни нә касыб елә, нә дә варлы. Гәдәриндә јејим». Ағур касыб олмамаг арзусуну белә изаһ етмишди: «Јохсул олуб оғурлуг етмәјим, Аллаһымын адына ләкә ҝәтирмәјим». Бәс ҝөрәсән, онун варлы олмаг истәмәмәси нәдән ирәли ҝәлирди? О дејир: «Тохлугдан Сәни данмајым, “Јеһова кимдир?” демәјим» (Мәс. 30:8, 9). Јәгин пејғәмбәрин нә демәк истәдијини јахшы баша дүшүрүк, чүнки Аллаһы гојуб вар-дөвләтинә сығынан инсанлары аз ҝөрмәмишик.

11. Иса Мәсиһин пулла бағлы һансы өјүд-нәсиһәти вар?

¹¹ Пулу севән инсан Аллаһы разы сала билмәз. Бу һәгигәт Иса Мәсиһин нөвбәти сөзләриндән ирәли ҝәлир: «Һеч ким ики ағаја гуллуг едә билмәз. Ја биринә нифрәт едиб диҝәрини севәҹәк, ја да биринә сәдагәт ҝөстәриб, диҝәрини сајмајаҹаг. Сиз һәм Аллаһын, һәм дә вар-дөвләтин гулу ола билмәзсиниз». Одур ки, пејғәмбәрин вердији нәсиһәтә диггәт јетирмәјимиз јахшы оларды: «Өзүнүзә јердә хәзинә топламајын. Бурада ону ҝүвә јејир вә пас хараб едир, оғрулар да ҝириб оғурлајыр. Әвәзиндә хәзинәнизи ҝөјдә топлајын. Орада ону нә ҝүвә јејир, нә пас хараб едир, нә дә оғрулар ҝириб оғурлајыр» (Мәт. 6:19, 20, 24).

12. Садә һәјат Аллаһа гуллуг етмәји неҹә асанлашдырыр? Нүмунә чәкин.

 ¹² Бир сыра диндашымыз өз тәҹрүбәсиндән дејә биләр ки, садә һәјат јашамаг онлара мәмнунлугдан башга, Аллаһын ишинә даһа чох вахт ајырмаг имканы да верир. Буну Ҹек адлы америкалы гардашымызын тәҹрүбәсиндән ҝөрмәк олар. Гардаш јолдашы кими өнҹүл хидмәтинә башламаг үчүн бөјүк евини сатмыш, саһибкарлыг фәалијјәтини дајандырмышды. О дејир: «Шәһәрдән кәнардакы ҝөзәл евимизи, торпағымызы сатмаға әлим ҝәлмирди. Амма бир нечә ил иди ки, ишдә јашанан проблемләрә ҝөрә евә чох бәрбад вәзијјәтдә гајыдырдым. Һәјат јолдашым исә өнҹүл олдуғу үчүн һәмишә ҝөзәл әһвали-руһијјәдә иди. О дејирди: “Мәним Мүдиримдән јохдур!” Сонра мән дә өнҹүл олдум. Бу ҝүн һәјат јолдашымла бирликдә бир Саһибкарын, Јеһова Аллаһын ишини ҝөрүрүк».

13. Пула мүнасибәтимизи неҹә тәһлил едә биләрик?

¹³ Пула неҹә мүнасибәт бәсләдијимизи мүәјјән етмәк үчүн нөвбәти суаллара дүрүст шәкилдә ҹаваб вермәлијик: «Мүгәддәс Китабда пулла бағлы верилән өјүдләрин һикмәтинә инаныраммы? Бу өјүдләрә әмәл едирәмми? Пул газанмаг һәјат амалыма чеврилмәјиб ки? Мәним үчүн һәјатда нә даһа бөјүк әһәмијјәт дашыјыр: мал-мүлк, јохса Јеһова илә вә инсанларла мүнасибәтим? Инаныраммы ки, Јеһова мәни көмәксиз гојмајаҹаг, бүтүн еһтијаҹларымы өдәјәҹәк?» Әмин ола биләрик ки, Аллаһымыз һеч вахт бизи наүмид гојмајаҹаг (Мәт. 6:33).

14. Инсанын әјләнҹәни севмәси гәбаһәтдирми? Изаһ един.

¹⁴ Һәвари Булус демишди ки, ахырзаманда, һәмчинин инсанлар «ејш-ишрәти севәҹәкләр», јәни әјләнмәк вә зөвг-сәфа сүрмәк онлар үчүн һәр шејдән ваҹиб олаҹаг. Инсанын өзүнә вә пула мүнасибәтиндә олдуғу кими, әјләнҹәни севмәк дә өзү-өзлүјүндә гәбаһәт дејил, әсас одур ки, таразлыг итмәсин. Сағлам әјләнҹә вә истираһәт инсана тәравәт ҝәтирир. Јеһова истәмир ки, биз өзүмүзү бу шејләрдән мәһрум едәк. О, Өз Кәламы васитәсилә бизә бујурур: «Ҝет шад-хүррәм чөрәјини је, шән үрәклә шәрабыны ич» (Ваиз 9:7).

15. 2 Тимутијә 3:4 ајәсиндә јазылмыш «Аллаһдан чох ејш-ишрәти севәҹәкләр» сөзләринин мәнасы нәдир?

¹⁵ Һәвари Булусун 2 Тимутијә 3:4 ајәсиндә јаздыгларына әсасән, ахырзаманда  инсанлар ејш-ишрәти о дәрәҹәдә севәҹәкләр ки, һәјатларында Аллаһа јер галмајаҹаг. Ајәдә дејилир ки, онлар ејш-ишрәти «Аллаһдан чох» севәҹәкләр. Бу сөзләр онларын Аллаһы да севәҹәјини билдирмир. Бунунла бағлы бир алим јазмышды: «Бу ајә демәк истәмир ки, инсанлар Аллаһы мүәјјән дәрәҹәдә севәҹәкләр. Ајәнин мәнасы одур ки, онлар Аллаһы үмумијјәтлә севмәјәҹәкләр». Неҹә дә ајылдыҹы фикирдир! Ејш-ишрәти севән бу инсанлар Лука 8:14 ајәсиндә «башлары зөвг-сәфаја» гарышмыш инсанлар кими тәсвир олунурлар.

16, 17. Иса Мәсиһ әјләнҹәјә вә истираһәтә неҹә јанашырды?

¹⁶ Әјләнҹә вә истираһәт мәсәләсиндә һәдди горумаг үчүн ҝәлин Иса Мәсиһин мүкәммәл нүмунәсини нәзәрдән кечирәк. Тәбии ки, о да истираһәтә вә әјләнҹәјә вахт ајырырды. Мүгәддәс Китабда охујуруг ки, о, гонаглыға ҝетмишди, тојда иштирак етмишди (Јәһ. 2:1—10; Лука 5:29). Иса һәтта һәмин тојда шәраб аз олдуғу үчүн мөҹүзә ҝөстәриб сују шәраба дөндәрмишди. Јејиб-ичдији үчүн инсанлар ону мүһакимә едәндә о, онларын ифрат дүшүнҹәјә саһиб олдуғуну ҝөстәрмишди (Лука 7:33—36).

¹⁷ Иса Мәсиһ истираһәт вә әјләнҹәни бәјәнсә дә, бу шејләр онун үчүн әсас јердә дејилди. Онун һәјатынын әсас гајәси Јеһоваја ибадәт етмәк вә инсанлара фәдакарҹасына көмәк етмәк иди. О, бәшәријјәти јашатмаг үчүн ишҝәнҹәли өлүмү дадды. Мәсиһ онун јолуну изләмәк истәјәнләрә белә нәсиһәт етмишди: «Мәнә ҝөрә инсанлар сизи тәһгир вә тәгиб едәндә, сизин һаггынызда һәр ҹүр јалан вә пис сөз данышанда сиз неҹә дә хошбәхтсиниз! Севинин вә шадланын, чүнки ҝөјдә сизи бөјүк мүкафат ҝөзләјир, ахы сиздән әввәл пејғәмбәрләри дә белә тәгиб етмишләр» (Мәт. 5:11, 12).

18. Һансы суалларын көмәји илә әјләнҹәјә севҝимизин гәдәрини мүәјјән едә биләрик?

¹⁸ Әјләнҹәјә севҝимизин һәдди ашмадығыны мүәјјән етмәк үчүн ҝәлин нөвбәти суалларла өзүмүзү тәһлил едәк: «Һәјатымда әсас јери нә тутур, јығынҹаглар, тәблиғ иши, јохса әјләнҹә? Мәнә зөвг верән шејләрдән хидмәт уғрунда кечмәјә һазыраммы? Әјләнҹә сечәндә Јеһованын бахышыны нәзәрә алыраммы?» Елә әјләнҹәләр вар ки, биз Јеһованын онлары севмәдијини конкрет билирик, амма бәзән садәҹә еһтимал едирик. Әҝәр Јеһованы доғрудан да севириксә, еһтимал етдијимиз вәзијјәтләрдә дә әјләнҹәдән имтина едәҹәјик. (Мәтта 22:37, 38 ајәләрини охујун.)

19. Нә ҹүр инсанлар һеч вахт әсл хошбәхтлијә наил ола билмәз?

¹⁹ Тәхминән алты мин илдир ки, бәшәријјәт Шејтанын һакимијјәти алтында әзаб чәкир. Бу һакимијјәтин сону олан ахырзаманда дүнја јалныз өзүнү, пулу вә әјләнҹәни севән инсанларла долудур. Онлар анҹаг өз мәнфәәтләрини ҝүдүр, өз истәкләрини тәмин етмәји дүшүнүрләр. Лакин бу ҹүр инсанлар һеч вахт, сөзүн әсл мәнасында, хошбәхт ола билмәзләр. Мәзмурчунун да јаздығы кими инсан хошбәхтлији анҹаг Јеһовада тапа биләр: «Хошбәхтдир о кәс ки, көмәји Јагубун Аллаһыдыр, үмиди Аллаһы Јеһовадыр» (Зәб. 146:5).

20. Аллаһ севҝиси сизи неҹә хошбәхт едиб?

²⁰ Бизим Јеһова Аллаһа бәсләдијимиз севҝи ҝүнү-ҝүндән мөһкәмләнир вә һәр ил чох сајда инсан Јеһованы севәрәк сыраларымыза гошулур. Бу, сүбут едир ки, Аллаһын Падшаһлығы фәалијјәт ҝөстәрир вә тезликлә јер үзүнә ҝөрүнмәмиш немәтләр бәхш едәҹәк. Јеһованын ирадәсини јеринә јетирмәк, јери-ҝөјү Јараданы разы салдығымызы билмәк бизә әсл мәмнунлуг вә севинҹ бәхш едир. Јеһованы севәнләрин севинҹи әбәди, түкәнмәз олаҹаг! Нөвбәти мәгаләдә худбинликдән доған бир нечә хүсусијјәти нәзәрдән кечирәҹәк, онларла мәсиһи хүсусијјәтләри арасындакы тәзады ҝөрәҹәјик.