1, 2. а) Нә үчүн Иса Мәсиһин өлүмүнү анмаг үчүн тәсис етдији мәрасимин садә олмасы тәәҹҹүблү дејил? б) Иса Мәсиһин һансы хүсусијјәтләри һагда данышаҹағыг?

СӨЗСҮЗ КИ, чохларыныз Иса Мәсиһин өлүмүнү анма мәрасиминин неҹә кечирилдијини асанлыгла тәсвир едә биләрсиниз. Чүнки мәрасим чох садә кечирилир. Бәс олдугҹа мүһүм олан бу мәрасимин бу гәдәр садә шәкилдә гејд олунмасына сәбәб нәдир?

² Јер үзүндә хидмәт етдији вахт Иса Мәсиһ мүһүм һәгигәтләри садә, ајдын вә баша дүшүлән тәрздә изаһ едирди (Мәт. 7:28, 29). Өлүмүнү анмаг * үчүн тәсис етдији мәрасим садә, ејни заманда мәна кәсб едән тәрздә иди. Ҝәлин анма мәрасими һагда, һәмчинин Мәсиһин сөјләдији вә етдији шејләр барәдә дәриндән дүшүнәк. Онда онун неҹә тәвазөкар, ҹәсарәтли вә мәһәббәтли олдуғуну даһа јахшы анлајаҹаг вә она даһа чох бәнзәмәк үчүн нә етмәли олдуғумузу биләҹәјик.

3. Мәтта 26:26—28 ајәләринә әсасән, Иса Мәсиһин тәсис етдији мәрасим нә дәрәҹәдә садә иди вә онун истифадә етдији ики әсас символ нәји тәмсил едир?

³ Иса Мәсиһ өлүмүнү анмаг үчүн мәрасими 11 садиг һәварисинин иштиракы илә тәсис етмишди. О, Пасха јемәјиндә сүфрәјә гојулан немәтләрдән ҝөтүрүб садә мәрасим кечирмишди. (Мәтта 26:26—28 ајәләрини охујун.) Иса јалныз  мајасыз чөрәк вә шәрабдан истифадә етмишди. О, һәвариләринә бу ики символун онун бәдәнини вә тезликлә онларын уғрунда ахыдылаҹаг ганыны тәмсил етдијини изаһ етмишди. Чох јәгин, јени мәрасимин бу гәдәр садә олмасы һәвариләри тәәҹҹүбләндирмәмишди. Ҝәлин ҝөрәк нә үчүн.

4. Мәсиһин Мартаја вердији мәсләһәт анма мәрасиминин садә олмасынын сәбәбини анламаға неҹә көмәк едир?

⁴ Бундан бир нечә ај өнҹә, хидмәтинин үчүнҹү илиндә Мәсиһ јахын достлары олан Илазәр, Марта вә Мәрјәмҝили зијарәт едән вахт баш верәнләрә нәзәр салаг. Достларынын әһатәсиндә, раһат шәраитдә Иса тәлим вермәјә башлајыр. Марта да орада иди, амма башы һөрмәтли гонағына јејиб-ичмәк һазырламаға гарышмышды. Иса буну ҝөрүб мүлајимликлә она дүзәлиш верир, чохлу јемәк һазырламағын мүтләг олмадығыны изаһ едир (Лука 10:40—42). Даһа сонра, һәјатыны гурбан вермәздән бир неҹә саат өнҹә о, Мартаја вердији мәсләһәтә ујғун давраныр. Анма мәрасиминдәки сүфрә садә иди. Бундан Иса Мәсиһ һагда нә өјрәнирик?

5. Шам јемәјинин садә олмасындан Иса Мәсиһ һагда нә өјрәнирик вә бу, Филиппилиләрә 2:5—8 ајәләринә неҹә ујғундур?

⁵ Иса Мәсиһин һәр сөзү, һәр һәрәкәти тәвазөкарлыг сачырды. Буна ҝөрә дә онун јер үзү һәјатынын сонунҹу ҝеҹәсиндә бөјүк тәвазөкарлыг ҝөстәрмәси һеч дә тәәҹҹүблү дејил (Мәт. 11:29). Мәсиһ бәшәр тарихиндә ән бөјүк гурбаны вермәк үзрә олдуғуну вә Јеһованын ону дирилдиб ҝөјдә шанлы мөвгејә уҹалдаҹағыны билирди. Бунунла белә, о, өлүмүнү анмаг үчүн мүрәккәб мәрасим тәшкил едәрәк өзүнә јерсиз диггәт чәкмәк истәмәди. Әксинә, шаҝирдләринә илдә бир дәфә бу садә шам јемәји васитәсилә ону анмағы бујурду (Јәһ. 13:15; 1 Кор. 11:23—25). Садә, ејни заманда мәрасимә ујғун олан шам јемәји Иса Мәсиһин ловға бири олмадығыны ҝөстәрир. Нә хошбәхтик ки, тәвазөкарлыг сәмави Падшаһымызын ән сәҹијјәви хүсусијјәтләриндәндир. (Филиппилиләрә 2:5—8 ајәләрини охујун.)

6. Чәтинликләр заманы Мәсиһин тәвазөкарлығыны неҹә тәглид едә биләрик?

⁶ Мәсиһин тәвазөкарлығыны неҹә өрнәк ала биләрик? Башгаларынын рифаһыны өзүмүзүнкүндән үстүн тутараг (Филип. 2:3, 4). Исанын јер үзүндә кечирдији сонунҹу ҝеҹәни хатырлајаг. О, тезликлә әзаб чәкәрәк өләҹәјини билсә дә, ондан өтрү јаса батаҹаг садиг һәвариләринә ҝөрә нараһатчылыг кечирирди. Буна ҝөрә дә сонунҹу ҝеҹәсини һәвариләри илә  кечирәрәк онлара тәлим вермиш, руһландырмыш вә иманларыны мөһкәмләндирмишди (Јәһ. 14:25—31). Мәсиһ өзүндән чох башгаларынын рифаһыны дүшүнмәклә әсл тәвазөкарлыг ҝөстәрмишди. О бизим үчүн неҹә дә ҝөзәл өрнәкдир!

7. «Ағанын шам јемәји» мәрасимини тәсис едәндән сонра Иса Мәсиһ неҹә ҹәсарәт ҝөстәрди?

⁷ «Ағанын шам јемәји» мәрасимини тәсис едәндән сонра Иса Мәсиһ мөһтәшәм ҹәсарәт ҝөстәрмишди. Неҹә? Мәсиһ Атасынын онунла бағлы ирадәсини јеринә јетирмәјә разы олду, һалбуки нәтиҹәдә күфр сөјләмәкдә иттиһам олунараг рүсвајҹасына едам олунаҹағыны билирди (Мәт. 26:65, 66; Лука 22:41, 42). О, Јеһованын адыны уҹалтмаг, Онун һакимијјәтини дәстәкләмәк вә төвбә едән сајсыз-һесабсыз инсанын әбәди јашамасына јол ачмаг үчүн там сәдагәт ҝөстәрди. Ејни заманда, давамчыларыны тезликлә үзләшәҹәкләри вәзијјәтләрә һазырлады.

8. а) Иса Мәсиһ садиг һәвариләринә нә сөјләмишди? б) Мәсиһин өлүмүндән сонракы илләр әрзиндә давамчылары онун ҹәсарәт нүмунәсини неҹә изләјирдиләр?

⁸ Иса Мәсиһ бүтүн нараһатчылыгларыны бир кәнара гојуб диггәтини садиг һәвариләринин еһтијаҹларына јөнәлтмәклә дә ҹәсарәт ҝөстәрмишди. Јәһуданы јола салдыгдан сонра Исанын тәсис етдији садә мәрасим мәсһ олунаҹаг давамчыларына онун ахыдылаҹаг ганынын фајдасыны вә онунла јени әһдә дахил олдугларыны хатырладаҹагды (1 Кор. 10:16, 17). Иса давамчыларынын онунла бирҝә ҝөјдә јашамаға лајиг олмаларына көмәк етмәк үчүн һәм өзүнүн, һәм дә Аллаһын онлардан нә ҝөзләдијини изаһ етмишди (Јәһ. 15:12—15). О һәмчинин онлары гаршыда ҝөзләјән чәтинликләрдән хәбәрдар етмишди. Сонра өзүнү нүмунә ҝәтирәрәк, шаҝирдләрини ҹәсарәтли олмаға сәсләмишди  (Јәһ. 16:1—4а, 33). Узун илләр сонра да Исанын шаҝирдләри онун фәдакарлыг нүмунәсини изләјир вә ҹәсарәт ҝөстәрирдиләр. Һәтта әзијјәт чәкмәк баһасына олса белә, мүхтәлиф сынаглар заманы бир-биринә дајаг олурдулар (Ибр. 10:33, 34).

9. Ҹәсарәт ҝөстәрмәкдә Мәсиһдән неҹә нүмунә ҝөтүрә биләрик?

⁹ Ејнилә, биз дә Иса Мәсиһин ҹәсарәт нүмунәсини изләјирик. Мәсәлән, етигадларына ҝөрә тәгиб олунан диндашларымыза дәстәк олмаг ҹәсарәт тәләб едир. Бәзән һагсыз јерә диндашларымызы һәбс едирләр. Бу заман онлара көмәк етмәк, јери ҝәләндә, онлары мүдафиә етмәк үчүн әлимиздән ҝәләни етмәлијик (Филип. 1:14; Ибр. 13:19). Һәмчинин «ҹәсарәтлә» тәблиғ етмәјә давам етмәклә дә ҹәсур олдуғумузу ҝөстәририк (Һәв. 14:3). Иса Мәсиһ кими, биз дә тәгибләрә, манеәләрә бахмајараг, Падшаһлыг һагда хәбәри бәјан етмәјә әзмлијик. Дүздүр, бәзән ҹәсарәтимизин чатмадығы мәгамлар да олур. Бәс белә мәгамларда нә етмәлијик?

10. Анма мәрасиминдән өнҹәки һәфтәләр нә етмәлијик вә нәјә ҝөрә?

¹⁰ Мәсиһин фидјә гурбанлығы сајәсиндә јаранан үмидимиз барәдә дүшүнмәклә ҹәсарәтимизи мөһкәмләндирә биләрик (Јәһ. 3:16; Ефес. 1:7). Анма мәрасиминдән өнҹәки һәфтәләр әрзиндә фидјәјә ҝөрә миннәтдарлығымызы артырмаг үчүн хүсуси имканымыз вар. Бу мүддәтдә анма мәрасими илә әлагәдар Мүгәддәс Китабы гираәт един вә дуа едәрәк Мәсиһин өлүмүндән өнҹә баш верән һадисәләр үзәриндә дүшүнүн. Беләҹә, «Ағанын шам јемәји» мәрасиминдә истифадә олунан символларын маһијјәтини вә онларын тәмсил етдији фидјә гурбанлығынын нә гәдәр дәјәрли олдуғуну даһа јахшы анлајаҹагсыныз. Јеһова Аллаһын вә Иса Мәсиһин бизим үчүн нәләр етдијини, бунун бизә  вә доғмаларымыза неҹә фајда ҝәтирдијини дәрк едәндә ҝәләҹәјә олан үмидимиз мөһкәмләнир вә сона гәдәр дөзмәк үчүн ҹәсарәтимиз артыр (Ибр. 12:3).

11, 12. Нәләри өјрәндик?

¹¹ Демәли, өјрәндик ки, «Ағанын шам јемәји» мәрасими бизә тәкҹә уғрумузда верилән фидјә гурбанлығыны јох, һәмчинин Мәсиһин тәвазөкарлыг вә ҹәсарәт кими әвәзсиз хүсусијјәтләрини дә хатырладыр. Биздән өтрү Аллаһа јалваран Баш Каһинимизин бу хүсусијјәтләри тәзаһүр етдирмәјә давам етдијини билмәк үрәјимизи шүкранла долдурур (Ибр. 7:24, 25). Миннәтдарлығымызы билдирмәк үчүн Мәсиһин өлүмүнү анма мәрасимини сәдагәтлә, онун бујурдуғу кими гејд етмәлијик (Лука 22:19, 20). Илин ән әламәтдар тарихи олан бу ҝүнү нисан ајынын 14-нә тәсадүф едән ҝүндә гејд едирик.

¹² Садә шәкилдә кечирилән «Ағанын шам јемәји» мәрасиминдән Мәсиһи бизим уғрумузда өлмәјә тәшвиг едән даһа бир хүсусијјәт барәдә өјрәнирик. Јер үзүндә јашадығы мүддәтдә о, бу хүсусијјәти илә танынырды. Сөһбәт һансы хүсусијјәтдән ҝедир?

13. Јәһја 15:9 вә 1 Јәһја 4:8—10 ајәләри Јеһова Аллаһын вә Иса Мәсиһин ҝөстәрдији мәһәббәти неҹә тәсвир едир вә онларын мәһәббәтиндән кимләр бәһрәләнир?

¹³ Иса Мәсиһ ҝөрдүјү һәр бир ишдә Јеһова Аллаһын бизә олан дәрин мәһәббәтини мүкәммәл шәкилдә әкс етдирирди. (Јәһја 15:9; 1 Јәһја 4:8—10 ајәләрини охујун.) Үстәлик, о, һәјатыны уғрумузда гурбан вермәји сәмими гәлбдән истәмишди. Мәсһ олунмуш, јахуд «башга гојунлар»дан олмағымыздан асылы олмајараг, һәр биримиз Јеһова Аллаһын вә Оғлунун бу гурбанлыг васитәсилә ҝөстәрдији мәһәббәтдән бәһрәләнирик (Јәһ. 10:16; 1 Јәһ. 2:2). Анма мәрасиминдә истифадә олунан символлар һагда дүшүнәк; онлар да Мәсиһин давамчыларына дујдуғу мәһәббәтдән вә анлајышдан хәбәр верир. Ҝәлин ҝөрәк неҹә.

14. Иса Мәсиһ шаҝирдләринә мәһәббәтини һансы јолла ҝөстәрди?

¹⁴ Иса Мәсиһин мүрәккәб адәтләри олан ајин јох, садә шам јемәји тәсис етмәси дә мәсһ олунмуш давамчыларына дујдуғу мәһәббәти ҝөстәрир. Заманла, һәр ил анма мәрасимини кечирмәли олан мәсһ олунмушлар бу ҝүнү мүхтәлиф шәраитләрдә, һәтта һәбсдә белә кечирмәли олдулар (Вәһј 2:10). Онлар Мәсиһин ҝөстәришинә итаәт едә билдиләр? Әлбәттә!

15, 16. Бәзиләри чәтин шәраитдә олмаларына бахмајараг, «Ағанын шам јемәји» мәрасимини неҹә кечирә билмишдиләр?

¹⁵ Биринҹи әсрдән бу ҝүнә гәдәр һәгиги мәсиһиләр анма мәрасимини гејд етмәк үчүн әлләриндән ҝәләни едирләр. Онлар һәтта ағыр шәраитләрдә белә, «Ағанын шам јемәји» мәрасимини ҝөстәришә ујғун кечирмәјә чалышыблар. Ҝәлин нөвбәти нүмунәләрә нәзәр салаг. Чиндә тәкадамлыг камерада һәбсдә олан Һаролд Кинг гардаш Мәсиһин анма мәрасимини кечирмәјин јолуну тапмышды. О, хәлвәтҹә әлиндә оланлардан анма мәрасими үчүн символлар һазырламышды. Һәмчинин мәрасимин тарихини баҹардығы гәдәр дәгиг һесабламаға чалышмышды. Һәмин ҝүн јетишәндә о, өз камерасында нәғмә охумуш, дуа етмиш, Мүгәддәс Китаба әсасланан мәрузә сөјләјәрәк анма мәрасимини гејд етмишди.

¹⁶ Башга бир нүмунәјә нәзәр салаг. Икинҹи Дүнја мүһарибәси заманы һәбс дүшәрҝәсиндә олан бир груп баҹымыз «Ағанын шам јемәји» мәрасимини гејд етмәк үчүн һәјатларыны тәһлүкәјә атмышды. Амма шам јемәји садә олдуғундан мәрасими ҝизлинҹә гејд едә билмишдиләр. Онлар дејир: «Бир  кәтилин үстүнә ағ өртүк сәриб, символлары да үстүндә гојуб даирәви шәкилдә әтрафына топлашмышдыг. Ишыг бизи әлә вермәсин дејә, шам јандырмышдыг... Орада бүтүн ҝүҹүмүзү Аллаһын мүгәддәс адына бәраәт газандырмаға һәср едәҹәјимизә бир даһа сөз вердик». Онлар неҹә дә мөһтәшәм иман ҝөстәрмишдиләр! Иса Мәсиһин анма мәрасимини һәтта чәтин шәраитдә белә кечирә биләҹәјимиз тәрздә тәсис етмәси онун мәһәббәтинин тәҹәссүмүдүр.

17. Өзүмүзә һансы суаллары верә биләрик?

¹⁷ Анма мәрасими јахынлашдыгҹа јахшы олар ки, өзүмүзә нөвбәти суаллары верәк: «Мәһәббәт ҝөстәрмәкдә Иса Мәсиһә даһа чох бәнзәмәк үчүн нә едә биләрәм? Өзүмдән чох башгаларынын рифаһыны дүшүнүрәм? Баҹы-гардашларымдан баҹардыгларындан артығыны ҝөзләјирәм, јохса онларын мәһдудијјәтләрини нәзәрә алырам?» Ҝәлин һәмишә Иса Мәсиһә бәнзәјәк вә бир-биримизин дәрдинә шәрик олаг (1 Бут. 3:8).

18, 19. а) Нәјә әмин ола биләрик? б) Нәјә гәти гәрарлысыныз?

¹⁸ Мәсиһин өлүмүнү анма мәрасимини һәмишә гејд етмәјәҹәјик. Иса Мәсиһ бөјүк мүсибәт заманы ҝәләндә сечилмишләрини јығыб ҝөјә апараҹаг вә анма мәрасиминин кечирилмәси дајандырылаҹаг (1 Кор. 11:26; Мәт. 24:31).

¹⁹ Әмин ола биләрик ки, һәтта анма мәрасими артыг кечирилмәјәндә белә, Јеһованын халгы бу шам јемәјини бир нәфәрин ҝөстәрдији ән бөјүк тәвазөкарлыг, ҹәсарәт вә мәһәббәт тәҹәссүмү олараг хатырлајаҹаг. Шүбһәсиз ки, бу хүсуси мәрасими гејд едәнләр онун һагда һәмин вахт јашајанлара данышаҹаглар. Лакин һал-һазырда анма мәрасиминдән бәһрәләнмәк үчүн Мәсиһин тәвазөкарлығыны, ҹәсарәтини вә мәһәббәтини изләмәјә әзмли олмалыјыг. Онда Јеһова Аллаһдан мүкафат алаҹағымыза әмин ола биләрик (2 Бут. 1:10, 11).