1, 2. а) Әшија 41:10 ајәсиндә јазылмыш сөзләр Јошико баҹыја неҹә көмәк етмишди? б) Јеһова бу сөзләри кимләр үчүн јаздырыб?

ЈОШИКО адлы сәдагәтли бир баҹы бәд хәбәр алыр. Һәким она дејир ки, өмрүнә ҹәми бир нечә ај галыб. Баҹы бу хәбәри ешидәндә һансы һиссләри кечирир? О, Мүгәддәс Китабда севдији бир ајәни, Әшија 41:10 ајәсини хатырлајыр. (Ајәни охујун.) Сонра о, һәкимә сакит тәрздә билдирир ки, өлүмдән горхмур, чүнки Јеһова онун әлиндән мөһкәм тутуб *. Бу ајәдә јазылмыш тәсәлливериҹи сөзләр баҹымыза Јеһоваја там архаланмаға көмәк етди. Әшија 41:10 ајәси ејнилә бизә дә шиддәтли сынаглар заманы сакитлијимизи горумаға көмәк едә биләр. Ајәнин бизә неҹә көмәк едә биләҹәјини баша дүшмәк үчүн илк нөвбәдә Јеһованын Әшија пејғәмбәрә бу сөзләри нәјә ҝөрә назил етдијини арашдыраг.

² Јеһова Әшија пејғәмбәрә бу сөзләри ҝәләҹәкдә Бабилә әсир апарылаҹаг јәһудиләрә тәсәлли вермәк мәгсәдилә јаздырмышды. Лакин Јеһова бу ајәни тәкҹә онлар үчүн јох, о ҝүндән бу ҝүнә јашамыш бүтүн хидмәтчиләри үчүн јаздырыб (Әшј. 40:8; Ром. 15:4). Бу ҝүн биз сон дәрәҹә чәтин бир вахтда јашајырыг. Бу исә о демәкдир ки, Әшија китабында јазылмыш руһландырыҹы сөзләрә һеч вахт олмадығы гәдәр еһтијаҹымыз вар (2 Тим. 3:1).

3. а) Әшија 41:10 ајәсиндә һансы вәдләр вар? б) Нәјә ҝөрә бу вәдләрә еһтијаҹ дујуруг?

³ 2019-ҹу илин ајәси кими сечилмиш Әшија 41:10 ајәсиндә  Јеһованын вердији үч вәдә * диггәт јетирәҹәјик. Ајәдә дејилир: 1) «Мән сәнинләјәм»; 2) «сәнин Аллаһын Мәнәм»; 3) «сәнә көмәк едәҹәјәм». Иманы мөһкәмләндирән бу вәдләрә һәр биримизин еһтијаҹы вар, чүнки Јошико баҹы кими, биз дә һәјатда сынагларла, чәтинликләрлә үзләширик. Үстәлик, дүнјада һөкм сүрән ағыр вәзијјәтә гатлашмалы олуруг. Бәзиләримиз исә һәтта һөкумәт тәрәфиндән тәгибләрә мәруз галырыг. Ҝәлин бу үч вәди бир-бир арашдыраг.

4. а) Арашдыраҹағымыз илк вәд һансыдыр? (Һәмчинин һашијәјә бахын.) б) Јеһова бизә дујдуғу һиссләри һансы сөзләрлә ифадә едир? ҹ) Јеһованын дедији сөзләр сизә неҹә тәсир бағышлајыр?

⁴ Јеһова бизә илк олараг бу сөзләрлә тәскинлик верир: «Горхма, Мән сәнинләјәм» *. Аллаһымыз бизимлә олдуғуну бүтүн диггәтини бизә јөнәлтмәклә вә бизә дәрин мәһәббәт бәсләмәклә ҝөстәрир. Онун бизә неҹә нәвазишлә јанашдығыны нөвбәти сөзләрдән ҝөрмәк олар: «Мәнә әзиз олдун, сәни шәрәфләндирдим, сәни севдим» (Әшј. 43:4). Каинатда һеч бир гүввә Јеһованын Өз хидмәтчиләринә мәһәббәт бәсләмәсинә мане ола билмәз! Онун бизә олан сәдагәти сарсылмаздыр (Әшј. 54:10). Мәһәббәти вә достлуғу биздә ҹәсарәт һасил едир. Јеһова досту Ибрамы (Ибраһим) горудуғу кими, бизи дә горујаҹаг. О демишди: «Горхма, Ибрам, сәнин галханын Мәнәм» (Јар. 15:1).

5, 6. а) Јеһованын үзләшдијимиз сынаглар заманы бизә көмәк етмәк истәдијини һарадан билирик? б) Јошико баҹынын нүмунәсиндән нә өјрәнирик?

⁵ Билирик ки, Јеһова үзләшдијимиз сынаглара гаршы биҝанә дејил, О бизә көмәк әли узатмаг истәјир. Буну халгына вердији нөвбәти вәддән ҝөрмәк олар: «Сујун ичиндән кечсән дә, сәнинлә олаҹағам, чајлардан кечсән дә, батмајаҹагсан, одун ичиндән кечсән дә, јанмајаҹагсан, алов сәни гарсамајаҹаг» (Әшј. 43:2). Бу сөзләр нә мәна кәсб едир?

⁶ Јеһова һәјатымызы чәтинләшдирән проблемләри арадан галдыраҹағына сөз вермир.  Бунунла белә, О, чај кими ахыб ҝәлән проблемләрин ичәрисиндә боғулмағымыза, одлу-аловлу сынагларын бизә сағалмаз јара вурмасына изин вермәјәҹәк. Јеһова бизимлә олаҹағына, чәтинликләрдән кечмәјә көмәк едәҹәјинә зәманәт верир. О, буну неҹә едәҹәк? Јеһова горхуларымызы ашмаға көмәк едәҹәк ки, биз истәнилән вәзијјәтдә, һәтта өлүмлә үз-үзә оланда белә, Она садиг галаг (Әшј. 41:13). Јухарыда ады чәкилән Јошико баҹы буну өз үзәриндә һисс етмишди. Онун гызы дејир: «Анамын неҹә сакит олмасы бизи һејран гојмушду. Биз ајдын ҝөрүрдүк ки, Јеһова она гәлб раһатлығы вериб. Анам өлдүјү ҝүнә гәдәр тибб баҹыларына вә пасиентләрә Јеһова вә Онун вәдләри һагда данышырды». Јошико баҹынын нүмунәсиндән нә өјрәнирик? Аллаһын «Мән сәнинләјәм» вәдинә етибар етмәјимиз сынаглар заманы бизи дә ҹәсарәтли вә мәтин едәҹәк.

7, 8. а) Арашдыраҹағымыз икинҹи вәд һансыдыр вә бу вәдин мәнасы нәдир? б) Нәјә ҝөрә Јеһова јәһудиләрә «тәлаша дүшмә» демишди? ҹ) Әшија 46:3, 4 ајәләриндәки һансы сөзләр Аллаһын халгына горхмамаға көмәк етмишди?

⁷ Әшија пејғәмбәрин гәләмә алдығы икинҹи вәдә диггәт јетирәк: «Тәлаша дүшмә, сәнин Аллаһын Мәнәм». Бу сөзләрин мәнасы нәдир? Ајәдәки «тәлаш» сөзү орижинал дилдә «һансыса тәһлүкәдән горхараг тез-тез ҝеријә бојланмаг» вә ја «тәһлүкәли вәзијјәтдә олан инсан кими паникаја дүшмәк» мәнасыны дашыјыр.

⁸ Нә үчүн Јеһова онлара «тәлаша дүшмә» демишди? Сүрҝүндә олаҹаг јәһудиләрин тәлаша дүшмәсинә нә сәбәб ола биләрди? Јеһова билирди ки, 70 иллик сүрҝүнүн сонуна јахын Мада-Фарс ордусу Бабилә һүҹум едән вахт оранын бүтүн сакинләри горхуја гапылаҹаг. Лакин Јеһова бу орду васитәсилә халгыны Бабил әсарәтиндән гуртараҹагды (Әшј. 41:2—4). Мада-Фарс ордусу јахынлашанда бабиллиләр вә әтраф халгларын ҹамааты бир-биринә ҹәсарәт вериб «мөһкәм ол» дејирди. Онлар һәмчинин чохлу бүтләр дүзәлдир вә бүтләрин онлары горујаҹағына үмид едирдиләр (Әшј. 41:5—7). Сүрҝүндә олан јәһудиләр исә Јеһованын Әшија васитәсилә дејилмиш сөзләриндән тәскинлик тапырдылар: «Сән исә, еј Исраил, [гоншуларындан фәргли олараг] Мәним гулумсан... Тәлаша дүшмә, сәнин Аллаһын Мәнәм» (Әшј. 41:8—10). Диггәт јетирин ки, Јеһова «сәнин Аллаһын Мәнәм» демишди. Бу сөзләрлә О, садиг хидмәтчиләрини унутмадығына әмин едирди, јәни Јеһова һәлә дә онларын Аллаһы, онлар исә һәлә дә Онун халгы иди. Јеһова демишди: «Сизи ҝәздирәҹәјәм,.. сизи хилас едәҹәјәм». Шүбһәсиз, бу тәсәлливериҹи вә руһландырыҹы сөзләр сүрҝүндә олан јәһудиләрә ҝүҹ верирди. (Әшија 46:3, 4 ајәләрини охујун.)

9, 10. Нә үчүн горхуја гапылмаг лазым дејил? Нүмунә чәкин.

⁹ Дүнјадакы вәзијјәтин ҝет-ҝедә писләшмәси һәлә һеч вахт инсанлары бу гәдәр нараһат етмәмишди. Әлбәттә, баш верәнләр биздән дә јан кечмир. Амма биз горхмамалыјыг, чүнки Јеһова дејир: «Сәнин Аллаһын Мәнәм». Нәјә ҝөрә бу сөзләр сакитлијимизи горумағымыз үчүн ҝүҹлү сәбәбдир?

¹⁰ Ҝәлин белә бир нүмунәјә диггәт јетирәк: Ариф вә Фәрид адлы ики сәрнишин тәјјарә илә учур. Бирдән гасырға тәјјарәни јухары-ашағы силкәләмәјә башлајыр. Бу заман пилот сәрнишинләрә мүраҹиәт едир: «Тәһлүкәсизлик кәмәрләрини бағлы сахлајын. Турбулент зонадан кечирик». Ариф чох нараһат олур. Сонра пилот әлавә едир: «Данышан сизин пилотунуздур. Һәр шеј нәзарәт алтындадыр, тәлаша дүшмәјин». Елә бу мәгамда Ариф  башыны јелләјәрәк дејир: «О, неҹә зәманәт верә биләр?» Лакин Фәридин һеч нараһат олмадығыны ҝөрүб сорушур: «Сән нијә белә раһатсан?» Фәрид ҝүлүмсәјәрәк дејир: «Чүнки пилоту јахшы таныјырам. О мәним атамдыр! Ону танысан, нәјә гадир олдуғуну билсән, сән дә мәним кими раһат оларсан. Ҝәл сәнә атам һагда данышым».

11. Ики сәрнишинлә бағлы нүмунәдән нә өјрәнирик?

¹¹ Бу нүмунәдән нә өјрәнирик? Фәрид кими, биз дә сакитик, чүнки сәмави Атамыз Јеһованы чох јахшы таныјырыг. Билирик ки, О, ахырзаманда үзләшдијимиз гасырғајабәнзәр проблемләрдән сағ-саламат кечмәјимиз үчүн бизә бәләдчилик едәҹәк (Әшј. 35:4). Бүтүн дүнја горхуја гапылса да, Јеһоваја етибар етдијимиз үчүн бизим үрәјимиз сакитдир (Әшј. 30:15). Бундан әлавә, биз дә Фәрид кими Аллаһа нә үчүн ҝүвәндијимизин сәбәбләрини инсанларла бөлүшүрүк. Беләҹә, онлар да һансы чәтинликләрлә үзләширләр-үзләшсинләр, Јеһованын онлара дәстәк олаҹағына әмин ола биләрләр.

12. а) Арашдыраҹағымыз үчүнҹү вәд һансыдыр? б) Јеһованын «голу» ифадәси бизә һансы факты хатырладыр?

¹² Ҝәлин Әшија пејғәмбәрин гәләмә алдығы үчүнҹү вәдин үзәриндә дүшүнәк: «Сәнә гүввәт верәҹәјәм, сәнә көмәк едәҹәјәм». Әшија пејғәмбәр Јеһованын халгына неҹә гүввәт верәҹәјини, неҹә ҝүҹләндирәҹәјини нөвбәти сөзләрлә артыг тәсвир етмишди: «Јеһова ҝүҹ-гүдрәтлә ҝәлир, Онун голу һакимијјәт сүрәҹәк» (Әшј. 40:10). Мүгәддәс Китабда «гол» ифадәси мәҹази мәна дашыјыб, чох вахт ҝүҹ-гүдрәти билдирир. Она ҝөрә дә Јеһованын «голу һакимијјәт сүрәҹәк» ифадәси Онун гүдрәтли Падшаһ олдуғундан хәбәр верир. Јеһова кечмишдә хидмәтчиләринә дајаг олмаг вә  онлары мүдафиә етмәк үчүн һәдсиз ҝүҹүндән истифадә етмишди. О, бу ҝүн дә Она иман едән, башга сөзлә, Она бел бағлајан инсанлара ҝүҹ вермәјә вә горумаға давам едир (Ган. 1:30, 31; Әшј. 43:10).

13. а) Јеһова бизә гүввәт верәҹәји илә бағлы вәдини хүсусилә нә вахт јеринә јетирир? б) Һансы зәманәт бизә ҝүҹ вә әминлик верир?

¹³ Јеһова «сәнә гүввәт верәҹәјәм» вәдини хүсусилә дүшмәнләр бизи тәгиб едәндә јеринә јетирир. Бу ҝүн дүнјанын бәзи јерләриндә дүшмәнләримиз тәблиғ ишини дајандырмаг вә тәшкилатымыза гадаға гојмаг үчүн дәридән-габыгдан чыхыр. Биз һәтта белә һүҹумлар заманы да һәддән артыг нараһат олмуруг. Јеһованын бизә вердији зәманәт биздә ҝүҹ, әминлик һасил едир. О вәд едир: «Сәнә гаршы дүзәлдилән һеч бир силаһ кара ҝәлмәјәҹәк» (Әшј. 54:17). Бу ајә бизә үч ваҹиб факты хатырладыр.

14. Аллаһын дүшмәнләринин бизә һүҹум етмәси нә үчүн бизи тәәҹҹүбләндирмир?

¹⁴ Әввәла, Мәсиһин давамчылары олдуғумуз үчүн инсанларын бизә нифрәт едәҹәјини билирик (Мәт. 10:22). Иса Мәсиһ демишди ки, ахырзаманда онун шаҝирдләри шиддәтли тәгибләрә мәруз галаҹаг (Мәт. 24:9; Јәһ. 15:20). Икинҹиси, Әшијанын пејғәмбәрлији бизи хәбәрдар едир ки, дүшмәнләримиз бизә нифрәт етмәкдән әлавә, бизә гаршы мүхтәлиф силаһлар истифадә едәҹәк. Бу силаһлара јалана һәгигәт дону ҝејиндирмәк, бизим һагда ағ јаланлар јајмаг вә амансыз тәгибләр дахилдир (Мәт. 5:11). Јеһова бизимлә мүһарибә апаран дүшмәнләримизин бу силаһлардан истифадә етмәсинин гаршысыны алмајаҹаг (Ефес. 6:12; Вәһј 12:17). Амма горхмаға еһтијаҹ јохдур. Нәјә ҝөрә?

15, 16. а) Јадда сахламалы олдуғумуз үчүнҹү факт һансыдыр вә Әшија 25:4, 5 ајәләри бу факты неҹә тәсдигләјир? б) Әшија 41:11, 12 ајәләри бизә гаршы дөјүшәнләрин агибәтини неҹә тәсвир едир?

¹⁵ Јадда сахламалы олдуғумуз үчүнҹү факта нәзәр салаг. Јеһова билдирир ки, бизә «гаршы дүзәлдилән һеч бир силаһ кара ҝәлмәјәҹәк». Дивар бизи ҝүҹлү лејсандан горудуғу  кими, Јеһова да бизи «залымларын нәфәси»ндән горујаҹаг. (Әшија 25:4, 5 ајәләрини охујун.) Дүшмәнләримиз бизә һеч вахт сағалмаз јара вура билмәјәҹәк (Әшј. 65:17).

¹⁶ Бундан әлавә, Јеһова Она етибарымызы даһа да артырмағымыз үчүн бизә «кин бәсләјәнләрин» агибәтини хырдалығына гәдәр тәсвир едир. (Әшија 41:11, 12 ајәләрини охујун.) Дүшмәнләримиз бизә гаршы нә гәдәр гәзәблә дөјүшсәләр дә, бизимлә апардыглары мүһарибә нә гәдәр ҝүҹлү олса да, нәтиҹә ејни олаҹаг: Аллаһын халгынын бүтүн дүшмәнләри «јох олаҹаг, мәһв олаҹаг».

17, 18. а) Мүгәддәс Китабы охумаг Јеһоваја етибарымызы неҹә артырыр? Нүмунә чәкин. б) 2019-ҹу илин ајәси үзәриндә дәрин дүшүнмәк бизә неҹә көмәк едә биләр?

¹⁷ Јеһованы даһа јахындан таныдыгҹа Она олан етибарымыз артаҹаг. Аллаһы доғрудан да јахшы танымағын јеҝанә јолу Мүгәддәс Китабы диггәтлә охујуб, охудугларымыз үзәриндә дүшүнмәкдир. Мүгәддәс Китабда Јеһованын Өз халгыны кечмишдә неҹә горудуғу илә бағлы дәгиг мәлумат гејд олунуб. Бу мәлумат Аллаһын бизи горујаҹағына даир әминлијимизи артырыр.

¹⁸ Ҝөрүн Әшија пејғәмбәр Јеһованын бизи мүдафиә етдијини неҹә ҝөзәл сөзләрлә тәсвир едир. О, Јеһованы Чобан, халгыны исә гузу адландырараг дејир: «Әли илә гузуларыны бир јерә топлајаҹаг, онлары гојнунда апараҹаг» (Әшј. 40:11). Јеһованын ҝүҹлү әлләри, гүдрәтли голлары илә бизи неҹә сардығыны дујанда өзүмүзү раһат, тәһлүкәсизликдә һисс едирик. Үзләшдијимиз проблемләрә рәғмән сакитлијимизи горумағымыз үчүн ағыллы вә садиг нөкәр Әшија 41:10 ајәсини 2019-ҹу илин ајәси сечиб: «Тәлаша дүшмә, сәнин Аллаһын Мәнәм». Бу руһландырыҹы, тәсәлливериҹи сөзләр үзәриндә дәриндән дүшүнүн. Онлар гаршыда ҝөзләјән чәтинликләрә синә ҝәрмәјиниз үчүн сизи мөһкәмләндирәҹәк.