1—3. а) Нәјә ҝөрә Сүлејман Јеһоваја әзиз иди вә о, һансы немәтләри алмышды? б) Бу мәгаләдә һансы суаллара ҹаваб вериләҹәк?

СҮЛЕЈМАН Исраилин падшаһы оланда һәлә ҝәнҹ јашларында иди. Һакимијјәтинин әввәлиндә Јеһова она јухуда ҝөрүнүб демишди: «Мәндән нә истәјирсән дилә, сәнә верим». Сүлејман исә ҹаван вә нашы олдуғуну билдирәрәк демишди: «Халгына һөкм етмәк... үчүн гулуна итаәткар үрәк вер» (1 Пад. 3:5—10). Итаәткар үрәк! Неҹә дә тәвазөкар хаһиш иди! Елә буна ҝөрә Сүлејман Јеһоваја әзиз иди (2 Ишм. 12:24). Јеһова Аллаһ бу ҝәнҹ падшаһын хаһишиндән о гәдәр мәмнун галмышды ки, онун «үрәјинә һикмәт, дәрракә» вермишди (1 Пад. 3:12).

² Сүлејман Јеһоваја садиг олдуғу мүддәтдә Ондан чохлу немәтләр алмышды. О, «Исраилин Аллаһы Јеһованын адына» мәбәд тикмәк шәрәфинә лајиг ҝөрүлмүшдү (1 Пад. 8:20). Сүлејман Аллаһын вердији һикмәт сајәсиндә мәшһурлашмышды. Үстәлик, Аллаһын илһамы илә дедији сөзләр Мүгәддәс Китабын үч бөлмәсиндә гејдә алыныб. Онлардан бири Мәсәлләр китабыдыр.

³ Мәсәлләр китабында «үрәк» сөзүнә тәхминән јүз дәфә раст ҝәлинир. Мисал үчүн, Мәсәлләр 4:23 ајәсиндә јазылыб: «Һәр шејдән чох үрәјини гору». Бу ајәдә «үрәк» сөзү һансы мәнада ишләниб? Мәгаләдә бу суала ҹаваб вериләҹәк. Һәмчинин биз нөвбәти ики суалын да ҹавабыны тапаҹағыг: «Шејтан үрәјимизи корламаг үчүн нәләр едир? Үрәјимизи неҹә горуја биләрик?» Аллаһа садиг галмаг үчүн бу ваҹиб суалларын ҹавабыны билмәлијик.

4, 5. а) «Үрәк» сөзү алтында нә нәзәрдә тутулур? б) Физики сағламлығымыз дахилән неҹә инсан олдуғумузун ваҹиблијини неҹә ҝөстәрир?

⁴ Мәсәлләр 4:23 ајәсиндә «үрәк» сөзү алтында инсанын дахили варлығы, јәни онун фикирләри, һиссләри, нијјәтләри вә арзулары нәзәрдә тутулур. Бизим әслиндә ким олдуғумузу өзүмүзү неҹә ҝөстәрмәјимиз јох, дахилән неҹә инсан олдуғумуз мүәјјән едир.

⁵ Ҝәлин дахилән неҹә инсан олдуғумузун ваҹиблијини баша дүшмәк үчүн физики сағламлыгла бағлы нүмунәјә нәзәр салаг. Әввәла, физики ҹәһәтдән сағлам олмаг үчүн дүзҝүн гидаланмалы вә мүнтәзәм идманла мәшғул олмалыјыг. Ејнилә, мәҹази үрәјимизин сағлам олмасы үчүн руһани гида гәбул етмәли вә Јеһоваја иман етдијимизи мүнтәзәм олараг ҝөстәрмәлијик. Иманымызы ҝөстәрмәк үчүн өјрәндикләримизи тәтбиг етмәли вә етигадымызы башгалары илә бөлүшмәлијик (Ром. 10:8—10; Јаг. 2:26). Икинҹиси, ола билсин, кәнардан неҹә ҝөрүндүјүмүзә әсасән, сағлам олдуғумузу дүшүнәк, әслиндә исә хәстә олаг. Ејнилә, мүтәмади олараг руһани ишләрлә мәшғул олдуғумуза ҝөрә дүшүнә биләрик ки, иманымыз мөһкәмдир, һалбуки үрәјимиздә јанлыш истәкләр бој атыр (1 Кор. 10:12; Јаг. 1:14, 15). Јадда сахламалыјыг ки, Шејтанын мәгсәди бизи өз дүшүнҹәсинә јолухдурмагдыр. Бәс о, конкрет олараг һансы үсуллара әл атыр? Биз өзүмүзү неҹә горуја биләрик?

6. Шејтанын мәгсәди нәдир вә о, мәгсәдинә чатмаг үчүн нәләр едир?

⁶ Шејтан истәјир ки, биз дә онун кими үсјанкар олуб Аллаһын ганунларыны һечә сајаг, худбинликлә давранаг. Лакин о бизи өзү кими дүшүнмәјә вә давранмаға мәҹбур едә билмәдијиндән мәгсәдинә наил олмаг үчүн башга үсуллара әл атыр. Мисал үчүн, Шејтан бизи артыг јолдан чыхартдығы инсанларла әһатә едир (1 Јәһ. 5:19). Вә ҝөзләјир ки, биз пис достларын дүшүнҹә вә һәрәкәтләримизи поздуғуну билсәк дә, онларла вахт кечирмәјә башлајаг (1 Кор. 15:33, һаш.). О бу үсулла Сүлејман падшаһы јолдан чыхара билмишди. Сүлејман чохлу бүтпәрәст гадынла евләнмишди, нәтиҹәдә  арвадлары она ҝүҹлү тәсир ҝөстәрмиш вә јаваш-јаваш ону Јеһовадан узаглашдырмышды (1 Пад. 11:3).

7. Шејтан өз дүшүнҹә тәрзини јајмаг үчүн даһа нәләр едир вә нә үчүн еһтијатлы олмалыјыг?

⁷ Шејтан өз дүшүнҹәсини јајмаг үчүн филмләрдән вә телевизија програмларындан истифадә едир. О билир ки, әһвалатлар, һадисәләр бизи садәҹә әјләндирмир, һәмчинин дүшүнҹәмизә, һиссләримизә вә давранышымыза тәсир едир. Иса Мәсиһ динләјиҹиләринә ваҹиб дәрсләр өјрәтмәк үчүн әһвалатлар данышырды. Елә ҝөтүрәк сәмәријјәли һагда чәкдији мәсәли, јахуд еви тәрк едәрәк мирасыны тар-мар едән оғул һагда әһвалаты (Мәт. 13:34; Лука 10:29—37; 15:11—32). Иса Мәсиһдән фәргли олараг, Шејтанын дүшүнҹә тәрзинә јолухмуш кәсләр бу үсулла бизим дүшүнҹәмизи корламаға чалыша биләр. Биз бу саһәдә таразлы олмалыјыг. Филмләр вә телевизија програмлары васитәсилә дүшүнҹәмизи корламадан әјләнә вә нәләрсә өјрәнә биләрик. Лакин еһтијаты әлдән вермәмәлијик. Әјләнҹә сечәркән јахшы олар ки, өзүмүздән сорушаг: «Бу филм вә ја програм ҹисмани истәкләри тәмин етмәјин гәбаһәт олмадығыны тәлгин етмир ки?» (Гал. 5:19—21; Ефес. 2:1—3). Бахдығыныз филм вә ја програмын Шејтанын дүшүнҹә тәрзини јајдығыны һисс едәндә неҹә давранмалысыныз? Јолухуҹу хәстәликдән горундуғунуз кими, бу ҹүр әјләнҹәләрдән дә өзүнүзү горујун!

8. Валидејнләр өвладларына үрәкләрини горумаға неҹә көмәк едә биләр?

⁸ Әзиз валидејнләр, сизин үзәринизә бөјүк мәсулијјәт дүшүр: өвладларынызы онларын үрәјини корламаға чалышан Шејтанын тәсириндән горумалысыныз. Чох јәгин ки, өвладларынызы хәстәликләрдән горумаг үчүн әлиниздән ҝәләни едирсиниз. Бунун үчүн еви тәмиз сахлајыр, өзүнүзүн вә өвладларынызын хәстәләнмәсинә сәбәб ола биләҹәк шејләри туллајырсыныз. Ејнилә дә, ушагларынызы Шејтанын дүшүнҹәсинә јолухдураҹаг филм  вә програмлардан, електрон ојунлардан вә интернет сајтларындан горумалысыныз. Јеһова сизә өвладларынызын руһани сағламлығынын гајғысына галмаг сәлаһијјәти вериб (Мәс. 1:8; Ефес. 6:1, 4). Одур ки, аиләниздә Мүгәддәс Китаб нормаларына әсасланан гајдалар гојмаға чәкинмәјин. Мәсәлән, азјашлы өвладларыныза нәјә бахмаға иҹазә вердијиниз, нәјә иҹазә вермәдијинизлә бағлы гајдалар гојун вә сәбәбини изаһ един (Мәт. 5:37). Бөјүдүкҹә онлара Јеһованын гајда-ганунларына әсасән нәјин дүзҝүн, нәјин сәһв олдуғуну ајырд етмәји өјрәдин (Ибр. 5:14). Вә унутмајын ки, сөзләринизин өвладларыныза бөјүк тәсири олса да, әмәлләринизин тәсири даһа бөјүкдүр! (Ган. 6:6, 7; Ром. 2:21).

9. Шејтан һансы фикри тәлгин едир вә бу фикир нәјә ҝөрә тәһлүкәлидир?

⁹ Шејтан үрәјимизи корламаг үчүн башга бир үсула да әл атыр. О чалышыр ки, Јеһованын дүшүнҹә тәрзинә јох, инсан һикмәтинә бел бағлајаг (Кол. 2:8). Мисал үчүн, Шејтан белә бир фикир тәлгин едир: инсанын һәјатда башлыҹа амалы варланмаг олмалыдыр. Бу ҹүр дүшүнәнләр варлана да биләр, варланмаја да. Истәнилән һалда, онлар тәһлүкәдәдирләр. Чүнки онларын башы пул газанмаға о гәдәр гарыша биләр ки, мәгсәдләринә наил олмагдан өтрү сағламлыгларыны, аилә мүнасибәтләрини, һәтта Аллаһла достлугларыны да гурбан верә биләрләр (1 Тим. 6:10). Һикмәтли Јараданымыза шүкүрләр олсун ки, бизә пула таразлы јанашмаға көмәк едир (Ваиз 7:12; Лука 12:15).

10, 11. а) Өзүмүзү мүдафиә етмәк үчүн нә етмәлијик? б) Гәдимдә ҝөзәтчиләр һансы иши ҝөрүрдү вә һансы мәнада виҹданымыз ҝөзәтчијә бәнзәјир?

¹⁰ Үрәјимизи горумаг үчүн ҝәрәк тәһлүкәләри мүәјјән етмәји вә ҹәлд өзүмүзү мүдафиә етмәји баҹараг. Мәсәлләр 4:23 ајәсиндә «гору» кими тәрҹүмә олунан сөз гәдимдә ҝөзәтчиләрин ҝөрдүјү иши хатырладыр. Гәдимдә ҝөзәтчиләр шәһәрин гала диварларынын үстүндә кешик чәкир вә тәһлүкәнин јахынлашдығыны ҝөрән кими һәјәҹан тәбили чалыб хәбәр верирдиләр. Буну билмәк дүшүнҹәмизи корламаға чалышан Шејтанын гаршысыны алмаг үчүн нә етмәли олдуғумузу анламаға көмәк едир.

¹¹ Ҝөзәтчиләр шәһәрин дарваза кешикчиләри илә сых әмәкдашлыг едирди (2 Ишм. 18:24—26). Онлар дүшмән јахынлашанда дарвазалары бағлы сахламалары үчүн кешикчиләрә хәбәр верирдиләр вә беләҹә, бирликдә шәһәри горујурдулар (Нәһ. 7:1—3). Ејнилә, дүшмәнимиз Шејтан үрәјимизи зәбт етмәјә чалышанда, башга сөзлә, дүшүнҹәмизә, һиссләримизә, нијјәт вә арзуларымыза тәсир етмәјә ҹәһд едәндә Мүгәддәс Китаб әсасында тәрбијә олунмуш виҹданымыз * ҝөзәтчи кими бизи хәбәрдар едир. Виҹданымыз һәјәҹан тәбили чалан заман она гулаг асмалы вә бир нөв дарвазалары бағламалыјыг.

12, 13. Нәләри етмәјә сөвг олуна биләрик, бәс неҹә давранмалыјыг?

¹² Шејтанын дүшүнҹә тәрзинин бизә сирајәт етмәмәси үчүн нә етмәли олдуғумузу бир нүмунә әсасында арашдыраг. Јеһова бизи өјрәдир ки, «әхлагсызлығын, һәр ҹүр натәмизлијин» адыны белә чәкмәмәлијик (Ефес. 5:3). Бәс мәктәб вә ја иш јолдашларымыз әхлагсыз мөвзулар барәдә данышмаға башлајанда нә едәҹәјик? Билирик ки, «аллаһсызлығы вә бу дүнјаја хас истәкләри» рәдд етмәлијик  (Тит. 2:12). Виҹданымыз ҝөзәтчи кими бизи хәбәрдар едәндә онун сәсинә гулаг асаҹағыг? (Ром. 2:15). Һәмин вахт ичимиздән һәмјашыдларымыза гулаг асмаг, јахуд онларын пајлашдығы шәкилләрә бахмаг истәји кечә биләр. Амма бу заман мәҹази диллә десәк, шәһәр дарвазаларыны бағламаг лазымдыр. Јәни сөһбәти дәјишмәли вә ја орадан узаглашмалыјыг.

¹³ Һәмјашыдларымыз бизи пис шејләр һагда дүшүнмәјә вә ја пис ишләр ҝөрмәјә сөвг едән заман онлара гаршы дурмаг үчүн ҹәсарәт ҝәрәкдир. Әмин ола биләрик ки, Јеһова апардығымыз мүбаризәни ҝөрүр вә Шејтанын дүшүнҹә тәрзинә гаршы дурмағымыз үчүн бизә ҝүҹ вә һикмәт верәҹәк (2 Салн. 16:9; Әшј. 40:29; Јаг. 1:5). Бәс бундан сонра да үрәјимизи горумаг үчүн нә етмәлијик?

14, 15. а) Үрәјимизи нәјә ачмалыјыг вә буну неҹә едә биләрик? б) Мәсәлләр 4:20—22 ајәләри Мүгәддәс Китабын мүталиәсиндән там фајда әлдә етмәјимизә неҹә көмәк едир? (« Нә барәдә дүшүнә биләрәм?» адлы чәрчивәјә бахын.)

¹⁴ Үрәјимизи горумаг үчүн ону пис тәсирләрә гаршы бағламагла јанашы, јахшы тәсирләрә гаршы ачыг сахламалыјыг. Ҝәлин гала шәһәр нүмунәси үзәриндә бир даһа дүшүнәк. Кешикчи шәһәри дүшмән һүҹумундан горумаг үчүн дарвазалары бағлајырды. Амма ејни заманда о, әрзаг вә диҝәр лазыми шејләрин шәһәрә ҝәтирилмәси үчүн дарвазалары ачырды. Әҝәр дарвазалар һеч ачылмасајды, шәһәр әһли аҹындан өләрди. Ејнилә, биз дә Аллаһын дүшүнҹә тәрзинин үрәјимизә тәсир етмәси үчүн мүнтәзәм олараг үрәјимизин гапыларыны ачмалыјыг.

¹⁵ Мүгәддәс Китабда Аллаһын дүшүнҹә тәрзи гәләмә алыныб. Одур ки, һәр дәфә Кәламы охујанда Онун дүшүнҹә тәрзинин бизим дүшүнҹәмизә, һиссләримизә вә давранышымыза тәсир етмәсинә имкан вермиш олуруг. Мүгәддәс Китабын мүталиәсиндән там фајда әлдә етмәк үчүн нә едә биләрик? Дуа етмәк ваҹибдир. Бир баҹы дејир: «Мүгәддәс Китабы охумаздан өнҹә Јеһоваја дуа едиб хаһиш едирәм ки, Кәламындакы мөһтәшәм инҹиләри ҝөрмәјимә көмәк етсин» (Зәб. 119:18). Биз һәмчинин охудугларымызын үзәриндә дәрин дүшүнмәлијик. Дуанын, мүталиәнин вә охудугларымызын үзәриндә дүшүнмәјин сајәсиндә Аллаһын Кәламы гәлбимизин дәринликләринә чатыр вә Онун дүшүнҹә тәрзини севмәјә башлајырыг. (Мәсәлләр 4:20—22 ајәләрини охујун; Зәб. 119:97.)

16. Бәзиләри JW телевизијасындан неҹә бәһрәләнир?

¹⁶ Аллаһын дүшүнҹәсинин бизи формалашдырмасы үчүн һәмчинин JW телевизијасында^® јајымланан видеолары изләмәлијик. Бир ҹүтлүк дејир: «Ајлыг програмлар сөзүн әсл мәнасында дуаларымыза ҹаваб олур! Онлар бизи мөһкәмләндирир, кәдәрли оланда, өзүмүзү тәнһа һисс едәндә әһвалымызы јүксәлдир. Маһнылара исә бүтүн ҝүнү гулаг асырыг. Биз јемәк биширәндә, еви јығышдыранда вә ја адиҹә отуруб чај ичәндә бу маһнылары динләјирик». Бу програмлар үрәјимизи горумаға, Јеһова кими дүшүнмәјә вә Шејтанын дүшүнҹәсинин бизә сирајәт етмәсинә гаршы дурмаға көмәк едир.

17, 18. а) 1 Падшаһлар 8:61 ајәсиндән ҝөрүндүјү кими, Јеһовадан өјрәндикләримизи тәтбиг етмәјин һансы фајдалары вар? б) Һизгијјә падшаһдан нә өјрәнирик? ҹ) Давуд пејғәмбәрин Зәбур 139:23, 24 ајәләриндә јазылмыш сөзләринә әсасән, нә һагда дуа едә биләрик?

¹⁷ Һәр дәфә дүзҝүн давранмағын фајдасыны ҝөрәндә иманымыз мөһкәмләнир (Јаг. 1:2, 3). Јеһованын бизи өвлады адландырмагла гүрур дујмасы бизә хош тәсир едир вә Ону разы салмаг истәјимиз даһа да  артыр (Мәс. 27:11). Үзләшдијимиз һәр сынагда ҝөстәрә биләрик ки, гајғыкеш Атамыза һачаланмыш үрәклә хидмәт етмирик (Зәб. 119:113). Әксинә, Јеһованы бүтүн гәлбимизлә севирик, үрәјимиз Онун гајда-ганунларына вә ирадәсинә табе олмаға гәтијјәтлидир. (1 Падшаһлар 8:61 ајәсини охујун.)

¹⁸ Тәбии ки, гејри-камил олдуғумуза ҝөрә бәзән сәһвләрә дә јол верәҹәјик. Амма ајағымыз бүдрәјәндә Һизгијјә падшаһын нүмунәсини јадымыза сала биләрик. О да сәһвләрә јол вермишди. Лакин төвбә етмиш вә әввәлки кими Јеһоваја «сидги-үрәклә» хидмәт етмәјә давам етмишди (Әшј. 38:3—6; 2 Салн. 29:1, 2; 32:25, 26). Гојмајын Шејтан өз дүшүнҹәси илә сизи зәһәрләсин. Итаәткар үрәјә саһиб олмаг үчүн дуа един (1 Пад. 3:9; Зәбур 139:23, 24 ајәләрини охујун). Һәр шејдән өнҹә үрәјинизи горусаныз, Јеһоваја садиг гала биләҹәксиниз!