1. Давуд падшаһ Јеһоваја һансы һиссләри бәсләјирди вә бу ону нә етмәјә тәшвиг едирди?

ДАВУД ПАДШАҺ јазмышды: «Јеһова бөјүкдүр, ән ҝөзәл тәрифләрә лајигдир» (Зәб. 145:3). О, Јеһованы чох севирди вә бу севҝидән ирәли ҝәләрәк Ону «топланты ичиндә» мәдһ едирди (Зәб. 22:22; 40:5). Сөзсүз ки, сиз дә Јеһованы севирсиниз вә Давуд пејғәмбәрин сөзләринә шәриксиниз. О демишди: «Атамыз Исраилин Аллаһы Јеһова, Сәнә әзәлдән әбәдијјәтәдәк алгыш олсун!» (1 Салн. 29:10—13).

2. а) Јеһованы неҹә мәдһ едә биләрик? б) Бәзиләринин һансы чәтинлији вар вә биз нәји арашдыраҹағыг?

² Бу ҝүн Јеһованы мәдһ етмәјин үсулларындан бири ибадәт ҝөрүшләриндә шәрһ вермәкдир. Амма бир сыра баҹы-гардашларымыз үчүн шәрһ вермәк әсл мүбаризәдир. Онлар ибадәт ҝөрүшләриндә шәрһ вермәк истәсәләр дә, горху онлара үстүн ҝәлир. Бәс бу баҹы-гардашлар горхуларыны неҹә дәф едә биләр? Һансы мәсләһәтләр һәр биримизә руһландырыҹы шәрһләр вермәјә көмәк едә биләр? Бу суаллара ҹаваб вермәздән өнҹә ҝәлин ибадәт ҝөрүшләриндә шәрһ вермәјимизин дөрд әсас сәбәбини арашдыраг.

3—5. а) Ибраниләрә 13:15 ајәсинә әсасән, нә үчүн ибадәт ҝөрүшләриндә шәрһ веририк? б) Һамымыз ејни ҹүр шәрһләр вермәлијик? Изаһ един.

³ Јеһова һәр биримизә Ону мәдһ етмәк шәрәфини бәхш едиб (Зәб. 119:108). Јығынҹагда вердијимиз шәрһләр Јеһоваја тәгдим етдијимиз мәдһ гурбанынын бир һиссәсидир вә һеч ким бизим әвәзимизә бу гурбаны верә билмәз. (Ибраниләрә 13:15 ајәсини охујун.) Бәс Јеһова һәр биримиздән ејни ҹүр гурбан, башга сөзлә, ејни ҹүр шәрһ вермәји тәләб едир? Хејр!

 ⁴ Јеһова Аллаһ билир ки, һамымызын баҹарығы вә шәраити мүхтәлифдир вә О, имканымыз дахилиндә вердијимиз гурбанлары чох дәјәрләндирир. Ҝәлин хатырлајаг, Јеһова исраиллиләрдән һансы нөв гурбанлары гәбул едирди? Бәзи исраиллиләрин гузу вә ја кечи гурбан ҝәтирмәк имканы вар иди. Амма касыблар «ики гумру гушу, јахуд ики бала ҝөјәрчин» тәгдим едә биләрди. Буна да имканы чатмајан исраиллиләр «ефанын онда бири гәдәр нарын ун» ҝәтирә биләрдиләр (Лав. 5:7, 11). Ун баһа дејилди, амма Јеһова һәтта бу гурбаны да гәбул едирди, әсас о иди ки, ән јахшы ун — «нарын ун» олсун.

⁵ Лүтфкар Аллаһымыз бу ҝүн дә биздән баҹардығымыз гурбаны вермәји ҝөзләјир. Јеһова тәләб етмир ки, шәрһ верәркән һамымыз Аполлос кими ҝөзәл натиг олаг вә ја һәвари Булус кими инандырыҹы данышаг (Һәв. 18:24; 19:8). Јеһова биздән баҹарығымыздан артығыны ҝөзләмир, Онун истәдији одур ки, верә биләҹәјимиз ән јахшы шәрһләри верәк. Ики хырда пул ианә едән дул гадыны јадыныза салын. О, Јеһова үчүн чох әзиз иди, чүнки о, әлиндән ҝәләнин ән јахшысыны етмишди (Лука 21:1—4).

6. а) Ибраниләрә 10:24, 25 ајәләринә әсасән, ешитдијимиз шәрһләр бизә неҹә тәсир едә биләр? б) Сизи руһландыран шәрһләрә ҝөрә миннәтдар олдуғунузу неҹә ҝөстәрә биләрсиниз?

⁶ Вердијимиз шәрһләрлә бир-биримизи руһландырырыг. (Ибраниләрә 10:24, 25 ајәләрини охујун.) Јығынҹагда мүхтәлиф шәрһләр ешитмәк һамымыза хошдур. Ушагларын садә вә сәмими шәрһләри һәр биримизин көнлүнү охшајыр. Баҹы-гардашларын јениҹә кәшф етдикләри һәр һансы фикри неҹә шөвглә данышдығыны ешитмәк бизи чох руһландырыр. Үстәлик, утанҹаг олмаларына вә ја бизим дилимизи тәзәҹә өјрәнмәләринә бахмајараг, өзләриндә ҹәсарәт тапыб шәрһ верән кәсләрлә фәхр едирик (1 Салон. 2:2). Онларын чалышганлығына ҝөрә миннәтдар олдуғумузу неҹә ҝөстәрә биләрик? Вердикләри руһландырыҹы шәрһләрә ҝөрә јығынҹагдан сонра онлара тәшәккүр етмәклә. Һәмчинин өзүмүз дә шәрһ вермәклә онлара миннәтдарлығымызы ҝөстәрмиш олаҹағыг. Бу заман биз башгаларынын шәрһләриндән руһландығымыз кими, башгалары да бизим шәрһләримиздән руһланаҹаг (Ром. 1:11, 12).

7. Шәрһ вермәјин бизә һансы хејри вар?

⁷ Шәрһ вермәк өзүмүзүн хејринәдир  (Әшј. 48:17). Неҹә? Әввәла, әҝәр ҝөрүшдә шәрһ вермәк истәјириксә, бу бизи јығынҹаға даһа јахшы һазырлашмаға тәшвиг едәҹәк. Јахшы һазырлашдыгҹа Аллаһын Кәламыны даһа дәриндән дәрк едәҹәјик. Дәрракәмиз артдыгҹа исә өјрәндикләримизи даһа јахшы тәтбиг едәҹәјик. Икинҹиси, мүзакирәләрдә иштирак етдијимиз үчүн ҝөрүш бизә даһа чох зөвг верәҹәк. Үчүнҹүсү, шәрһ вермәк хүсуси зәһмәт тәләб етдији үчүн, чох еһтимал ки, дедијимиз фикирләр узун мүддәт јадымызда галаҹаг.

8, 9. а) Мәлаки 3:16 ајәсинә әсасән, сизҹә, Јеһова вердијимиз шәрһләрә неҹә јанашыр? б) Бәзиләри һәлә дә һансы чәтинликлә үзләшир?

⁸ Иманымызы изһар едәндә Јеһованы разы салырыг. Јеһованын бизи динләдијинә вә јығынҹагда шәрһ вермәк үчүн зәһмәт чәкдијимизи гијмәтләндирдијинә әмин ола биләрик. (Мәлаки 3:16 ајәсини охујун.) Ону разы салмаг үчүн әлимиздән ҝәләни едәндә башымыздан бәрәкәт төкәрәк бизи дәјәрләндирдијини ҝөстәрир (Мәл. 3:10).

⁹ Ајдындыр ки, јығынҹагда шәрһ вермәк үчүн әсаслы сәбәбләримиз вар. Бунунла белә, бәзиләри јығынҹагда әл галдырыб шәрһ вермәјә чәкинир. Әҝәр сиз дә шәрһ вермәјә чәтинлик чәкирсинизсә, руһдан дүшмәјин. Ҝәлин Мүгәддәс Китабдан бәзи принсип вә нүмунәләри, һәмчинин бир нечә фајдалы төвсијәни арашдыраг. Бу мәлуматлар һәр биримизә јығынҹагларда даһа чох шәрһ вермәјә көмәк едәҹәк.

10. а) Бәзиләримиздә һансы горху вар? б) Шәрһ вермәјә чәкинмәјиниз һансы јахшы хүсусијјәтиниздән хәбәр верир?

¹⁰ Һәтта әлинизи галдырыб шәрһ вермәк фикри белә, сизи тәлаша салыр? Беләдирсә, сиз тәк дејилсиниз. Әслиндә, әксәријјәтимиз шәрһ верәндә бир аз һәјәҹан кечиририк. Амма бу һисси ашмаг үчүн әввәлҹә шәрһ вермәјинизә нәјин мане олдуғуну мүәјјән етмәлисиниз. Бәлкә, дејәҹәјиниз фикри унудаҹағыныздан вә ја фикринизи сәһв чатдыраҹағыныздан горхурсунуз? Јохса нараһатсыныз ки, шәрһләриниз башгаларынынкы кими гәшәнҝ олмајаҹаг?  Әслиндә, бу, јахшы әламәтдир. Бу ҝөстәрир ки, сиз тәвазөкар инсансыныз вә башгаларыны өзүнүздән үстүн сајырсыныз. Јеһова бу хүсусијјәти чох бәјәнир (Зәб. 138:6; Филип. 2:3). Амма Јеһова һәмчинин истәјир ки, сиз јығынҹагда Ону мәдһ едәсиниз вә баҹы-гардашлары руһландырасыныз (1 Салон. 5:11). О сизи севир вә сизә ҹәсарәт верәҹәк.

11. Мүгәддәс Китабдакы һансы фикирләр бизә көмәк едә биләр?

¹¹ Ҝәлин Мүгәддәс Китабда јазылмыш бәзи фикирләрин үзәриндә дүшүнәк. Орада дејилир ки, һәр биримиз сөзүмүздә, сөзү демәк тәрзимиздә сәһвләрә јол веририк (Јаг. 3:2). Јеһова биздән мүкәммәллик ҝөзләмир. Баҹы-гардашларымыз да ејнән (Зәб. 103:12—14). Онлар бизим руһани аиләмиздир вә бизи чох севирләр (Марк 10:29, 30; Јәһ. 13:35). Онлар баша дүшүрләр ки, бәзән демәк истәдијимиз фикри дүзҝүн ифадә етмәјә биләрик.

12, 13. Нәһәмјадан вә Јунусдан нә өјрәнә биләрик?

¹² Мүгәддәс Китабдакы бәзи нүмунәләр дә сизә горхуларынызы ашмаға көмәк едә биләр. Мисал үчүн, Нәһәмјаны јадыныза салын. О, гүдрәтли бир шаһын сарајында хидмәт едирди. Бир ҝүн Нәһәмја Јерусәлимин диварларынын, дарвазаларынын виран галдығыны ешидир. Бу хәбәр ону бәрк мәјус едир (Нәһ. 1:1—4). Тәсәввүр етмәк олар, шаһ Нәһәмјадан нә үчүн кәдәрли олдуғуну сорушанда ону неҹә һәјәҹан бүрүмүшдү. Амма Нәһәмја дәрһал дуа едиб шаһа ҹаваб верир. Нәтиҹәдә шаһ Аллаһын халгына хејли көмәк едир (Нәһ. 2:1—8). Диҝәр бир нүмунә исә Јунусдур. Јеһова она Нејнәва ҹамаатына хәбәр чатдырмағы бујурур. Јунус елә горхур ки, там әкс истигамәтә гачыр (Јун. 1:1—3). Амма Јеһованын көмәји илә Јунус она тапшырылан ишин өһдәсиндән ҝәлир. Үстәлик, онун сөзләри нејнәвалылара фајда ҝәтирир (Јун. 3:5—10). Нәһәмја вә Јунусдан нә өјрәнирик? Нәһәмјадан ҹаваб вермәздән өнҹә дуа етмәјин ваҹиблијини өјрәнирик. Јунусдан исә өјрәнирик ки, горхуларымызын нә гәдәр бөјүк олмасына бахмајараг, Јеһова Она хидмәт етмәјимизә көмәк едәҹәк. Ҝәлин разылашаг ки, һеч бир јығынҹаг нејнәвалылар гәдәр горхунҹ дејил.

¹³ Бәс ибадәт ҝөрүшләриндә вердијимиз шәрһләрин руһландырыҹы олмасы үчүн һансы төвсијәләр көмәјимизә чатар? Ҝәлин онлардан бир нечәсинә нәзәр салаг.

14. Нәјә ҝөрә ибадәт ҝөрүшләринә јахшы һазырлашмалыјыг вә буну нә вахт едә биләрик?

¹⁴ Ҝөрүшләрә һазырлашын. Габагҹадан планлашдыранда вә јахшы һазырлашанда даһа әминликлә шәрһ верәҹәксиниз (Мәс. 21:5). Әлбәттә ки, һәр биримизин фәргли графики вар. Сәксән јашларында олан Елоиз адлы дул баҹы «Ҝөзәтчи гүлләси»нин тәлим мәгаләләринә һәфтәнин әввәлиндә һазырлашыр. Баҹы дејир: «Габагҹадан һазырлашанда ҝөрүшләр мәнә даһа мараглы ҝәлир». Там иш ҝүнү ишләјән Ҹој адлы бир баҹы исә «Ҝөзәтчи  гүлләси»нә шәнбә ҝүнләри һазырлашмаға вахт ајырыр. О дејир: «Јығынҹагдан бир ҝүн әввәл һазырлашанда мөвзу јадымда олур». Өнҹүл кими хидмәт едән Ајк адлы мәшғул бир ағсаггал исә дејир: «Мәним үчүн бүтүн мәгаләјә бир дәфәјә һазырлашмагдан чох, һәфтә әрзиндә аз-аз һазырлашмаг даһа әлверишлидир».

15. Ҝөрүшә јахшы һазырлашмаг үчүн нә едә биләрсиниз?

¹⁵ Ҝөрүшләрә јахшы һазырлашмаг дејәндә нә нәзәрдә тутулур? Һәр дәфә һазырлашмаға башлајанда дуа едиб Јеһовадан мүгәддәс руһ истәјин (Лука 11:13; 1 Јәһ. 5:14). Сонра бир нечә дәгигә әрзиндә мөвзуну ҝөздән кечирин. Јәни мөвзунун адыны, јарымбашлыглары, шәкилләри вә чәрчивәләри тәһлил един. Сонра абзаслары охумаға башлајын. Һәр абзасы охудугҹа чалышын истинад олунмуш ајәләрин чохуну охујасыныз. Охудуғунуз мәлуматын үзәриндә дүшүнүн, шәрһ вермәк истәдијиниз мәгамлара хүсуси диггәт јетирин. Нә гәдәр јахшы һазырлашсаныз, бунун сизә бир о гәдәр чох фајдасы олаҹаг вә шәрһ вермәк сизә даһа асан ҝәләҹәк (2 Кор. 9:6).

16. Мүталиә үчүн һансы вәсаитләр вар вә сиз онлардан неҹә истифадә едирсиниз?

¹⁶ Мүмкүнсә, електрон вәсаитләрдән истифадә един. Јеһова тәшкилаты васитәсилә ҝөрүшләрә јахшы һазырлашмағымыза көмәк едән електрон вәсаитләр тәгдим едиб. «JW Либрарј^®» тәтбигетмәси сајәсиндә мүзакирә олунаҹаг нәшрләри мобил ҹиһаза јүкләмәк мүмкүндүр. Беләҹә, биз материалы истәдијимиз вахт вә истәдијимиз јердә арашдыра, јахуд ән азы, охуја вә ја гулаг аса биләрик. Бәзиләри бу тәтбигетмәни ишдә вә ја мәктәбдә јемәк фасиләси заманы, јахуд јол ҝедәндә истифадә едир. «Ҝөзәтчи Гүлләсинин китабханасы» вә «Ҝөзәтчи Гүлләсинин ОНЛАЈН КИТАБХАНАСЫ^™» сајәсиндә даһа дәриндән арашдырмаг истәдијимиз мәгамлары асанлыгла тәдгиг етмәк мүмкүндүр.

17. а) Нә үчүн бир нечә шәрһ һазырламаг даһа јахшыдыр? б) «Јеһованын досту ол. Ҝәл шәрһ һазырлајаг» видеосундан нә өјрәнмисиниз?

¹⁷ Мүмкүнсә, бир нечә шәрһ һазырлајын. Нәјә ҝөрә? Чүнки әлинизи галдыранда бәзән сизә сөз верилмәјә биләр. Бәлкә дә, башгалары сизинлә ејни вахтда әлини галдыраҹаг вә ҝөрүшү апаран гардаш онлардан биринә сөз верәҹәк. Ҝөрүшүн вахтында гуртармасы үчүн гардаш һәр һансы фикрә верилән шәрһләрин сајыны мәһдудлашдыра биләр. Буна ҝөрә дә мүзакирәнин әввәлиндә сизә сөз верилмәјибсә, инҹимәјин вә руһдан дүшмәјин. Бир нечә шәрһ һазырласаныз, мүзакирәдә иштирак етмәк имканыныз даһа чох олаҹаг. Һазырладығыныз шәрһләрдән бири ајәни охумаг ола биләр. Һәмчинин чалышын өз сөзләринизлә верә биләҹәјиниз бир шәрһ һазырлајасыныз *.

18. Нәјә ҝөрә гыса шәрһләр вермәк лазымдыр?

 ¹⁸ Гыса шәрһләр верин. Гыса вә садә шәрһләр чох вахт ән руһландырыҹы шәрһләр олур. Буна ҝөрә дә гыса шәрһләр вермәји гаршыныза мәгсәд гојун. Чалышын шәрһләриниз 30 санијәни ашмасын (Мәс. 10:19; 15:23). Әҝәр узун илләрдир јығынҹагда шәрһ верирсинизсә, гыса шәрһләр вермәкдә башгаларына нүмунә гојмаг мәсулијјәти дашыјырсыныз. Узун-узады вә мүрәккәб шәрһләр версәниз, башгалары сизин кими шәрһ вермәк баҹарыгларынын олмадығыны дүшүнәрәк ҹаваб вермәјә чәкинәҹәкләр. Үстәлик, гыса шәрһләр мүзакирәдә даһа чох инсанын иштирак етмәсинә имкан јарадыр. Хүсусилә дә әҝәр биринҹи сизә сөз верилибсә, чалышын суала садә вә конкрет ҹаваб верәсиниз. Абзасдакы бүтүн фикирләри демәјә чалышмајын. Абзасын әсас фикри мүзакирә олунандан сонра әлавә фикирләрә тохуна биләрсиниз. (« Неҹә шәрһ вермәк олар?» адлы чәрчивәјә бахын.)

19. Ҝөрүшү апаран гардашын сизә һансы көмәји дәјә биләр, амма бунун үчүн сиз нә етмәлисиниз?

¹⁹ Ҝөрүшү апаран гардаша һансы абзаса шәрһ вермәк истәдијинизи билдирин. Амма бунун үчүн гардаша ҝөрүшдән әввәл јахынлашмаг лазымдыр. Һәмин абзаса шәрһ вермәк вахты ҝәләндә әлинизи ҹәлд галдырын вә јухары тутун ки, гардаш ҝөрә билсин.

20. Һансы мәнада јығынҹаг ҝөрүшләрини достларла бир сүфрә архасында јемәк јемәјә бәнзәтмәк олар?

²⁰ Јығынҹаг ҝөрүшләрини достларла бир сүфрә архасында јемәк јемәјә бәнзәтмәк олар. Тәсәввүр един ки, јығынҹагдакы достларыныз сизи кабаб гонаглығына дәвәт едиб вә сизә дә садә бир шеј биширмәји тапшырыр. Сиз нә едәҹәксиниз? Ола билсин, бир аз һәјәҹанланаҹагсыныз, амма јәгин һәр кәсин хошуна ҝәләҹәк бир шеј һазырламаг үчүн әлиниздән ҝәләни едәҹәксиниз. Јеһова дәвәт етдији ибадәт ҝөрүшләриндә бизим үчүн бол сүфрә ачыр (Зәб. 23:5; Мәт. 24:45). Вә ҝөрәндә ки, садә, амма верә биләҹәјимиз ән јахшы һәдијјәни ҝәтирмишик чох севинир. Буна ҝөрә дә јахшы һазырлашын вә баҹардығыныз гәдәр чох шәрһләр верин. Онда Јеһованын сүфрәсиндән һәм өзүнүз гидаланаҹагсыныз, һәм дә башгаларынын гидаланмасы үчүн бир бәхшиш верәҹәксиниз.