1, 2. Ерамызын 33-ҹү илинин Әллинҹи ҝүн бајрамында һансы һејрәтамиз һадисә баш верди?

ЕРАМЫЗЫН 33-ҹү илинин Әллинҹи ҝүн бајрамыдыр. Шәнбә ҝүнү сәһәр чағы 120-јә јахын шаҝирд Јерусәлимдә бир евин үст мәртәбәсиндә топлашыб (Һәв. 1:13—15; 2:1). Бир нечә ҝүн өнҹә Иса онлара хүсуси бир әнам вериләҹәјини дејәрәк Јерусәлимдә галмаларыны тапшырмышды (Һәв. 1:4, 5). Бәс бундан сонра нәләр баш верди?

² «Гәфләтән ҝөјдән шиддәтли күләјин сәсинә охшар бир сәс ҝәлди». Сәс отурдуглары еви долдурду. Сонра шаҝирдләрин башынын үстүндә «аловун дилләринә бәнзәр бир шеј» пејда олду вә онларын һамысы «мүгәддәс руһла долду» (Һәв. 2:2—4). Јеһова белә бир һејрәтамиз шәкилдә Өз мүгәддәс руһуну орада јығышанларын үзәринә төкдү (Һәв. 1:8). Онлар мүгәддәс руһла мәсһ олунан * вә Иса Мәсиһлә бирҝә ҝөјдә һакимијјәт сүрмәк үмидинә саһиб олан илк инсанлар олду.

3. Әллинҹи ҝүн бајрамында мүгәддәс руһла мәсһ олунанлар нә үчүн мәсһ олундугларына шүбһә етмирдиләр?

³ Сөзсүз, үст мәртәбәдәки отагда топлашан шаҝирдләрин арасында сиз дә олсајдыныз, һәмин ҝүнү һеч вахт унутмаздыныз. Тәсәввүр един, аловун дилләринә бәнзәр бир шеј башынызын үстүндә пејда олур вә сиз башга дилләрдә  данышмаға башлајырсыныз! (Һәв. 2:5—12). Чох јәгин ки, мүгәддәс руһла мәсһ олундуғунуза ҹүзи дә олса шүбһә етмәздиниз. Бәс мүгәддәс руһла мәсһ олунанларын һамысы һансыса һејрәтамиз тәрздә вә һәјатларынын ејни мәгамында мәсһ олунур? Хејр. Буну һарадан билирик?

4. Биринҹи әсрдә мәсһ олунанларын һамысы ҝөјләр дәвәтини һәјатларынын ејни мәгамында алмышды? Изаһ един.

⁴ Ҝәлин ҝөрәк инсан нә вахт мәсһ олуна биләр. Ерамызын 33-ҹү илинин Әллинҹи ҝүн бајрамында тәкҹә 120 нәфәр мәсһ олунмады. Һәмин ҝүн онлардан башга 3000-ә јахын адам да мүгәддәс руһу алды. Онлар вәфтиз олунан заман мәсһ олундулар (Һәв. 2:37, 38, 41). Лакин сонракы илләрдә мәсһ олунанларын һамысы вәфтиз заманы мәсһ олунмады. Сәмәријјәлиләр вәфтиздән мүәјјән мүддәт сонра мәсһ олундулар (Һәв. 8:14—17). Корнили вә аиләсинин мәсһ олунмасы исә демәк олар ки, истисна һаллардан иди, онлар вәфтиздән өнҹә мәсһ олундулар (Һәв. 10:44—48).

5. 2 Коринфлиләрә 1:21, 22 ајәләринә әсасән, Јеһова кимисә мәсһ етмәк үчүн сечәндә нә баш верир?

⁵ Һәмчинин ҝәлин ҝөрәк Јеһова кимисә мәсһ етмәк үчүн сечәндә нә баш верир. Бәзән мәсһ олунанлара Јеһованын онлары сечдијини гәбул етмәк чәтин ҝәлир. Ола билсин, онлар дүшүнүрләр: «Аллаһ нә үчүн мәни сечиб?» Диҝәрләри исә, ола билсин, белә дүшүнмәсинләр. Һәвари Булус мәсһ едилмәк үчүн сечиләнләрлә нә баш вердијини белә изаһ етмишди: «Сиз иман едәндән сонра Аллаһ Мәсиһ васитәсилә сизи вәд едилмиш мүгәддәс руһла мөһүрләди *. Бу руһ мирасымыза зәманәтдир» (Ефес. 1:13, 14). Демәли, Јеһова мүгәддәс руһу васитәсилә бу мәсиһиләрә тамамилә ајдын едир ки, онлары сечиб. Мүгәддәс руһун фәалијјәти сајәсиндә онлар зәманәт алырлар ки, ҝәләҹәкдә јер үзүндә јох, ҝөјдә әбәдијјән  јашајаҹаглар. (2 Коринфлиләрә 1:21, 22 ајәләрини охујун.)

6. Мәсһ олунанлар мүкафатларыны алмаг үчүн нә етмәлидир?

⁶ Мәсиһинин мәсһ олунмасы, онун ҝөјләр мүкафатыны мүтләг алаҹағы демәкдир? Хејр. Мәсиһи ҝөјләр үчүн сечилдијинә әмин олур. Лакин нөвбәти хәбәрдарлығы унутмамалыдыр: «Гардашлар, буна ҝөрә дә алдығыныз дәвәти вә Аллаһ тәрәфиндән сечилдијинизи доғрултмаг үчүн вар гүввәнизлә чалышын. Буну етсәниз, һеч вахт јыхылмајаҹагсыныз» (2 Бут. 1:10). Одур ки, мәсһ олунмуш мәсиһи Јеһова тәрәфиндән сечилсә дә, башга сөзлә, ҝөјләр дәвәти алса да, мүкафаты јалныз садиг галдығы тәгдирдә алаҹаг (Филип. 3:12—14; Ибр. 3:1; Вәһј 2:10).

7. Мәсһ олунмушлар ҝөјләр дәвәти алдыгларыны неҹә билир?

⁷ Бәс инсан ҝөјләр дәвәти алдығыны неҹә билир? Ҹавабы Булусун Ромада «мүгәддәс олмаг үчүн чағырылмыш» кәсләрә үнванладығы сөзләрдән ҝөрмәк олар. О демишди: «Бу руһ бизи көлә едиб јенидән горхуја салмыр, бу руһун васитәсилә биз оғуллуға ҝөтүрүлүрүк вә бу руһун тәшвиги илә “Атаҹан, Ата!” — дејә чағырырыг. Бу руһ бизә тәлгин едир ки, биз Аллаһын өвладларыјыг» (Ром. 1:7; 8:15, 16). Демәли, Јеһова мәсһ олунмушлара мүгәддәс руһун васитәсилә ајдын билдирир ки, онлар ҝөјләр дәвәти алыб (1 Салон. 2:12).

8. 1 Јәһја 2:20, 27 ајәләринә әсасән, нәјә ҝөрә мәсһ олунмушлар киминсә онларын мәсһ олундугларыны тәсдигләмәсинә еһтијаҹ дујмурлар?

⁸ Јеһова ҝөјләр дәвәти алан кәсләрин ағлында вә үрәјиндә бирҹә шүбһә јери дә гојмур. (1 Јәһја 2:20, 27 ајәләрини охујун.) Әлбәттә, мәсһ олунмуш кәсләр дә һәр бир кәс кими, јығынҹаг васитәсилә Јеһовадан тәлим алмалыдыр. Лакин киминсә онларын мәсһ олундугларыны тәсдигләмәсинә еһтијаҹ дујмурлар. Јеһова каинатдакы ән ҝүҹлү гүввәдән, Өз мүгәддәс руһундан истифадә едәрәк онлара тамамилә ајдын шәкилдә билдирир ки, онлар мәсһ олунублар!

9. Ефеслиләрә 1:18 ајәсинә әсасән, мәсһ олунан кәсләрдә һансы дәјишиклик баш верир?

⁹ Бу ҝүн Аллаһын хидмәтчиләринин бир чоху мәсһ олунан заман инсанла нә баш вердијини анламаға чәтинлик чәкир. Бу нормалдыр, чүнки онларын өзләри мәсһ олунмајыблар. Аллаһ инсанлары ҝөјдә јох, јер үзүндә әбәди јашамаг үчүн јарадыб (Јар. 1:28; Зәб. 37:29). Амма О, бәзиләрини ҝөјдә јашамаг үчүн сечиб. Буна ҝөрә дә онлары мәсһ едәндә үмидләрини вә дүшүнҹә тәрзләрини көклү шәкилдә дәјишир, белә ки, онлар артыг ҝөјдә јашамағы арзулајырлар. (Ефеслиләрә 1:18 ајәсини охујун.)

10. «Јенидән доғулмаг» нә демәкдир? (Һәмчинин һашијәјә бахын.)

¹⁰ Кимсә мүгәддәс руһла мәсһ олунанда о, «јенидән», јахуд «јухарыдан» доғулур *. Иса һәмчинин вурғуламышды ки, мәсһ олунмамыш шәхсә «јенидән» доғулмағын, јахуд «руһдан» доғулмағын нә олдуғуну изаһ етмәк мүмкүн дејил (Јәһ. 3:3—8, һаш.).

11. Кимсә мәсһ олунан заман дүшүнҹәси неҹә дәјишир? Изаһ един.

¹¹ Мәсһ олунмуш мәсиһиләрин дүшүнҹә тәрзиндә һансы дәјишиклик баш верир? Јеһова онлары мәсһ етмәздән өнҹә, онлар  јер үзүндә әбәди јашамаға үмид едирдиләр. Онлар Јеһованын бүтүн писликләри мәһв едәҹәји вә јер үзүнү ҹәннәтә чевирәҹәји ҝүнү сәбирсизликлә ҝөзләјирдиләр. Ола билсин, өлән аилә үзвләринин, јахуд достларынын дирилмәсини, онлары неҹә гаршылајаҹагларыны хәјалларында ҹанландырырдылар. Лакин мәсһ олундугдан сонра онлар башга ҹүр дүшүнмәјә башлајырлар. Нә үчүн? Она ҝөрә јох ки, јер үзүндә әбәди јашамаг артыг онлара мараглы дејил. Онларын дүшүнҹәсинин дәјишмәсинә сәбәб һәјатда чохлу әзабларла үзләшмәләри, ҝүҹлү стресс кечирмәләри дејил. Онлар бирдән-бирә артыг јер үзүндә јашамағын дарыхдырыҹы олдуғу гәнаәтинә ҝәлмирләр. Әксинә, Јеһова Өз мүгәддәс руһу васитәсилә онларын дүшүнҹә тәрзини вә үмидләрини дәјишир.

12. 1 Бутрус 1:3, 4 ајәләринә әсасән, мәсһ олунмушлар үмидләри барәдә дүшүнәндә һансы һиссләри кечирир?

¹² Ола биләр ки, һансыса мәсһ олунмуш кәс өзүнү бу шәрәфли дәвәтә лајиг билмәсин. Амма о, Јеһова тәрәфиндән сечилдијинә бир ан белә шүбһә етмир. Ҝөјдә јашамаг үмиди барәдә дүшүнәндә гәлби шүкран вә севинҹлә ашыб-дашыр. (1 Бутрус 1:3, 4 ајәләрини охујун.)

13. Мәсһ олунмушлар јер үзү һәјатларына неҹә јанашыр?

¹³ Бәс бу, о демәкдирми ки, мәсһ олунмушлар өлмәји арзулајыр? Һәвари Булус бу суала ҹаваб вермишди. О, өз ҹисмани бәдәнини чадырла мүгајисә едәрәк демишди: «Бу чадырда олан бизләр ағыр јүк алтында инилдәјирик. Биз ону әјнимиздән чыхармаг јох, башгасына бүрүнмәк истәјирик ки, һәјат фанилији јох етсин» (2 Кор. 5:4). Мәсһ олунмушлар бу һәјата марагларыны итирәрәк, ону тез баша вурмағы арзуламырлар. Әксинә, онлар һәјатдан һәзз алыр вә һәр ҝүнләрини аиләләри вә достлары илә бирҝә Јеһоваја хидмәтдә кечирмәк истәјирләр. Бунунла белә, нә ишлә мәшғул олмаларындан асылы олмајараг, онлар бир ан белә ҝәләҹәјә даир мөһтәшәм үмидләрини унутмурлар (1 Кор. 15:53; 2 Бут. 1:4; 1 Јәһ. 3:2, 3; Вәһј 20:6).

14. Нәләр инсанын мүгәддәс руһла мәсһ олундуғуну ҝөстәрмир?

¹⁴ Ола билсин, сиз дә мүгәддәс руһла мәсһ олунуб-олунмадығынызы дүшүнүрсүнүз. Онда нөвбәти ваҹиб суаллары нәзәрдән кечирин: «Сиз Јеһованын нијјәтини иҹра етмәк арзусу илә алышыб-јанырсыныз? Тәблиғ ишинә хүсуси ҹан гојдуғунузу дүшүнүрсүнүз? Мүгәддәс Китабы мүталиә етмәји вә “Аллаһын дәрин сирләрини” өјрәнмәји чох севирсиниз? (1 Кор. 2:10). Тәблиғ ишинизә Јеһованын хүсуси хејир-дуа вердијини дүшүнүрсүнүз? Башгаларына руһани дајаг олмағы өзүнүзә борҹ билирсиниз? Һәјатынызын бир чох саһәләриндә Јеһованын дәстәјини ҝөрмүсүнүз?» Әҝәр бу суаллара ҹавабыныз «бәли»дирсә, бу, ҝөјләр дәвәти алдығынызы тәсдиг едир? Хејр, бу, белә дејил. Нә үчүн? Чүнки мәсһ олунуб-олунмамасындан асылы олмајараг, Аллаһын бүтүн хидмәтчиләри бу ҹүр һиссләр кечирә биләр. Јеһова һәр бир хидмәтчисинә саһиб олдуғу үмиддән асылы олмајараг, бу ишләри ҝөрмәк үчүн ејни ҝүҹү верә биләр. Әслиндә, әҝәр сиз мүгәддәс руһла мәсһ олунуб-олунмадығынызы дүшүнүрсүнүзсә, елә бунун өзү ҝөстәрир ки, сиз мәсһ олунмамысыныз. Јеһова тәрәфиндән чағырыланларын буна һеч бир шүбһәси олмур! Онлар мәсһ олундугларына әминдирләр!

15. Нәјә ҝөрә дејә биләрик ки, Аллаһдан мүгәддәс руһ аланларын һамысы ҝөјләр һәјаты үчүн сечилмәјиб?

 ¹⁵ Аллаһын Кәламында мүгәддәс руһ алмыш чохлу мөмин киши вә гадынын нүмунәси вар. Бунунла белә, онлар ҝөјләр үмидинә малик дејилдиләр. Давуду мүгәддәс руһ јөнләндирирди (1 Ишм. 16:13). Мүгәддәс руһ она Јеһова һагда дәрин биликләри анламаға вә Мүгәддәс Китабын бөлмәләрини јазмаға көмәк етмишди (Марк 12:36). Үстәлик, һәвари Булус да демишди ки, Давуд «ҝөјә галхмајыб» (Һәв. 2:34). Вәфтизчи Јәһја «мүгәддәс руһла» долмушду (Лука 1:13—16). Иса Мәсиһ демишди ки, бәшәр өвладлары арасында Јәһјадан бөјүјү олмајыб, лакин о, сәмави Падшаһлыға дахил оланларын сырасында дејил (Мәт. 11:10, 11). Јеһова мүгәддәс руһу васитәсилә бу шәхсләрә мөһтәшәм ишләр ҝөрмәјә ҝүҹ версә дә, онлары ҝөјләр һәјаты үчүн сечмәмишди. Бу, онларын ҝөјдә һакимијјәт сүрмәк үчүн сечиләнләрдән даһа аз имана саһиб олдуғу демәкдир? Хејр. Бу, садәҹә олараг о демәкдир ки, Јеһова онлары дирилдәндә онлар јерүзү Ҹәннәтдә јашајаҹаглар (Јәһ. 5:28, 29; Һәв. 24:15).

16. Јеһованын хидмәтчиләринин бөјүк бир гисми һансы мүкафаты сәбирсизликлә ҝөзләјир?

¹⁶ Бу ҝүн Јеһованын јер үзүндә јашајан хидмәтчиләринин бөјүк бир гисми ҝөјдә јашамаг үмидинә малик дејил. Ибраһим, Сара, Давуд, вәфтизчи Јәһја да дахил олмагла, гәдимдә јашамыш чох сајда киши вә гадын Аллаһын Падшаһлығынын јер үзүнү идарә едәҹәји вахты ҝөзләјирди (Ибр. 11:10).

17. Нөвбәти мәгаләдә һансы суаллар арашдырылаҹаг?

¹⁷ Мәсһ олунмушларын бәзиләри һәлә дә јер үзүндә Аллаһын халгы арасында олдуғундан, ортаја бәзи суаллар чыхыр (Вәһј 12:17). Мисал үчүн, мәсһ олунмушлар өзләри һагда һансы фикирдә олмалыдыр? Әҝәр јығынҹағыныздан кимсә анма мәрасиминдә символлардан истифадә етмәјә башлајарса, һәмин инсанла неҹә рәфтар етмәлисиниз? Бәс мәсһ олундуғуну дејәнләрин сајы артырса, онда неҹә? Буна ҝөрә нараһат олмалысыныз? Бу суаллара нөвбәти мәгаләдә ҹаваб вериләҹәк.