ЈЕРУСӘЛИМДӘ, Мүгәддәс торпаглар музејиндә б. е. ә. 700—600-ҹү илләрә аид даш китабә вар. Бу даш Исраилдә, Һәбрунун јахынлығында ҹәсәдләрин гојулдуғу мағарадан ҝөтүрүлүб. Дашын үзәринә белә сөзләр һәкк олунуб: «Јәһва Сәбаүт Һәгав оғлу Һәгафа ләнәт етсин». Бу китабә Мүгәддәс Китабын дәгиглијини неҹә тәсдиг едир? Бундан ҝөрүнүр ки, Мүгәддәс Китабын јазылдығы дөврдә ибрани һәрфләри илә ЈҺВҺ кими јазылан Аллаһын ады Јеһова јахшы танынырды вә инсанлар ади данышыгда бу ады чәкирди. Ҹәсәдләрин гојулдуғу мағаралардакы диҝәр јазылар да ҝөстәрир ки, мағараларда ҝөрүшүб данышан вә ҝизләнән инсанлар диварда тез-тез һәм Аллаһын адыны јазырдылар, һәм дә тәркибиндә Аллаһын адынын мүхтәлиф формалары олан шәхс адларыны.

Ҹорҹија университетиндә чалышан Др. Рејчел Набулси бу јазыларла бағлы дејир: «ЈҺВҺ адынын белә тез-тез истифадә олунмасы диггәтәлајиг мәгамдыр... [Мүгәддәс Китабда] јазыланлар вә китабәләр Исраилин вә Јәһуданын һәјатында ЈҺВҺ-нын мүһүм јер тутдуғуну ҝөстәрир». Бу, Мүгәддәс Китабла узлашыр. Орада Аллаһын ады ибрани һәрфләри илә ЈҺВҺ формасында минләрлә дәфә раст ҝәлинир. Бәзән шәхс адларынын тәркибиндә дә Аллаһын ады олурду.

Дашын үзәриндә јазылмыш «Јәһва Сәбаүт» ифадәси «ордулар Аллаһы Јеһова» демәкдир. Бурадан да ҝөрмәк олар ки, тәкҹә Аллаһын ады јох, һәмчинин «ордулар Аллаһы Јеһова» ифадәси дә Мүгәддәс Китабын јазылдығы дөврдә ҝениш истифадә олунурду. Бу факт һәм дә тәсдиг едир ки, Мүгәддәс Китабда «ордулар Аллаһы Јеһова» ифадәси бош јерә истифадә олунмајыб. Мүгәддәс Китабын Төврат һиссәсиндә бу ифадәјә тәхминән 280 дәфә раст ҝәлинир, әсас да Әшијанын, Әрәмјанын вә Зәкәријјәнин китабларында.