1. Давуд һансы чәтин вәзијјәтлә үзләшмишди?

 ИСРАИЛИН гүдрәтли падшаһы Талут Давуду өлдүрмәк истәјирди. Буна ҝөрә дә Давуд ҹаныны горумаг үчүн гачаг һәјат јашајырды. Давудун јемәјә еһтијаҹы оланда Нуб шәһәринә ҝәлмишди вә орада каһиндән ҹәми-ҹүмләтаны беш көмбә чөрәк истәмишди (1 Ишм. 21:1, 3). Сонра о, адамлары илә бирҝә мағараја сығынмышды (1 Ишм. 22:1). Давуд бу вәзијјәтә неҹә дүшмүшдү?

2. Талут падшаһ өз башына неҹә бәла ачмышды? (1 Ишмуил 23:16, 17).

² Талут падшаһ Давуда газандығы гәләбәләрә, ад-санына ҝөрә пахыллыг едирди. Талут һәмчинин билирди ки, итаәтсизлијинә ҝөрә Јеһова ону Исраилин падшаһы кими рәдд едиб вә онун јеринә Давуду сечиб. (1 Ишмуил 23:16, 17 ајәләрини охујун.) Амма һәлә Исраилин падшаһы олдуғу үчүн Талутун бөјүк ордусу вә чохлу тәрәфдарлары вар иди. Буна ҝөрә дә Давуд ҹаныны гуртармаг үчүн гачмалы олмушду. Доғруданмы, Талут дүшүнүрдү ки, Јеһованын Давудла бағлы нијјәтинә гаршы чыха биләр? (Әшј. 55:11). Мүгәддәс Китабда бу барәдә һеч нә дејилмир, амма биз бир шејә әминик: Талут башына бөјүк бәла ачмышды. Аллаһа гаршы чыханлар мәғлубијјәтә мәһкумдур!

3. Давуд чәтин вәзијјәтинә бахмајараг, һансы әһвали-руһијјәдә иди?

³ Давуд шөһрәтпәрәст инсан дејилди. О, Исраилин падшаһы олмаға ҹан атмырды. Давуду падшаһ кими Јеһова сечмишди (1 Ишм. 16:1, 12, 13). Талут исә она гаты дүшмән кими јанашырды.  Һәјаты тәһлүкәдә олса да, Давуд Јеһованы ҝүнаһландырмырды. Онун јетәринҹә јемәји јох иди, мағарада ҝизләнмәли олурду, амма о, Јеһоваја ҝилејләнмирди. Бәлкә дә, елә һәмин мағарада ҝизләндији вахт Јеһоваја ҝөзәл һәмд нәғмәси бәстәләмишди; әсас ајәдәки «Јеһованы ахтаранлар һеч бир немәтдән корлуг чәкмәз» сөзләрини демишди (Зәб. 34:10).

4. Һансы суаллары арашдыраҹағыг вә нәјә ҝөрә бу суаллары арашдырмаг ваҹибдир?

⁴ Бу ҝүн бир чох диндашларымыз мадди сыхынты чәкир. Бәзән онлар кифајәт гәдәр јемәјә, јахуд диҝәр зәрури шејләрә еһтијаҹ дујурлар *. Пандемија дөврүндә исә даһа чох баҹы-гардашымыз бу кими чәтинликләрлә үзләшиб. «Бөјүк мүсибәт» јахынлашдыгҹа, ола билсин, даһа бөјүк чәтинликләрлә үзләшәҹәјик (Мәт. 24:21). Буна ҝөрә дә ҝәлин нөвбәти дөрд суалы арашдыраг: Давуд һансы мәнада «һеч бир немәтдән корлуг» чәкмирди? Нәјә ҝөрә гане олмағы өјрәнмәлијик? Нә үчүн әмин ола биләрик ки, Јеһова гејдимизә галаҹаг? Индидән ҝәләҹәјә неҹә һазырлаша биләрик?

5, 6. Зәбур 23:1—6 ајәләри Давудун «Јеһованы ахтаранлар һеч бир немәтдән корлуг чәкмәз» сөзләрини баша дүшмәјә неҹә көмәк едир?

⁵ Давуд «Јеһованы ахтаранлар һеч бир немәтдән корлуг чәкмәз» дејәндә нәји нәзәрдә тутурду? Буну баша дүшмәк үчүн ҝәлин 23-ҹү мәзмуру арашдыраг. О, буна бәнзәр ифадәни бу мәзмурда да истифадә етмишди. (Зәбур 23:1—6 ајәләрини охујун.) Давуд бу мәзмуру нөвбәти сөзләрлә башлајыр: «Јеһова мәним Чобанымдыр, мөһтаҹ олмарам». Нөвбәти ајәләрдә исә Давуд һәгиги дәјәрә малик олан шејләрдән — Јеһованын онун Чобаны олмасы сајәсиндә алдығы бол руһани немәтләрдән данышыр. Дејир ки, Јеһова ону «салеһлик јоллары илә апарыр», пис ҝүнүндә дә, јахшы ҝүнүндә дә һәмишә она дајаг  олур. Давуд билирди ки, Јеһованын «јашыл отлаглар»ында онун һәјаты чәтинликсиз өтүшмәјәҹәк. О, бәзән «гаранлыг дәрәдән» кечәҹәк, јәни кәдәрли анлары олаҹаг, һәмчинин бәзи инсанлар она дүшмән кәсиләҹәк. Амма Јеһова кими гајғыкеш Чобаны олдуғуна ҝөрә һеч нә ону горхутмајаҹаг.

⁶ Демәли, Давуд һансы мәнада «һеч бир немәтдән корлуг» чәкмирди? Онун Јеһова илә мөһкәм достлуғуну горумасы үчүн лазым олан һәр шеји вар иди. Давудун хошбәхтлији мадди шејләрдән асылы дејилди. О, Јеһованын вердикләри илә гане олурду. Онун үчүн ән өнәмлиси Јеһованын рәғбәтини вә мүдафиәсини дујмаг иди.

7. Лука 21:20—24 ајәләринә әсасән, биринҹи әсрдә Јәһудијјәдә јашајан мәсиһиләр һансы вәзијјәтлә үзләшмишдиләр?

⁷ Давудун сөзләриндән мадди шејләрә таразлы јанашмағын нә гәдәр ваҹиб олдуғуну ҝөрүрүк. Дүздүр, саһиб олдуғумуз мал-мүлкдән истифадә етмәкдә пис һеч нә јохдур, амма бу шејләр бизим үчүн һәддән артыг ваҹиб олмамалыдыр. Биринҹи әсрдә Јәһудијјәдә јашајан мәсиһиләр бу ваҹиб һәгигәти баша дүшдүләр. (Лука 21:20—24 ајәләрини охујун.) Иса онлара хәбәрдар етмишди ки, вахт ҝәләҹәк, гошунлар Јерусәлими мүһасирәјә алаҹаг. Бу заман онлар дағлара гачмалы идиләр. Бунун нәтиҹәсиндә онлар чох шејләрини итирәҹәкдиләр, амма һәјатларыны газанаҹагдылар. Бу һадисә илә бағлы «Ҝөзәтчи гүлләси» журналынын бир нечә ил әввәлки сајында белә дејилмишди: «Онлар тарлаларыны, евләрини, һәтта евләриндәки әшјаларыны гојуб гачмышдылар. Әмин идиләр ки, Јеһова онлары горујаҹаг вә гајғыларына галаҹаг. Она ҝөрә дә ибадәти ваҹиб ҝөрүнән истәнилән шејдән үстүн тутдулар».

8. Биринҹи әсрдә Јәһудијјәдә јашајан мәсиһиләрин башына ҝәләнләрдән һансы ваҹиб дәрси өјрәнирик?

⁸ Биринҹи әсрдә Јәһудијјәдә јашајан мәсиһиләрин үзләшдикләриндән һансы ваҹиб дәрси өјрәнирик? Һәмин «Ҝөзәтчи гүлләси» журналында белә јазылмышды: «Ола билсин, мадди шејләрә мүнасибәтимиз сынанаҹаг. Һәмин вахт мәлум олаҹаг, бизим үчүн даһа ваҹиб бунлардыр, јохса Аллаһа садиг кәсләрә нәсиб олаҹаг хилас. Бәли, биз “гачаркән” мүәјјән чәтинликләрлә үзләшәҹәјик, нәләрдәнсә мәһрум олаҹағыг. Биринҹи әсрдә Јәһудијјәдән гачан мәсиһиләр кими, биз дә истәнилән гурбаны вермәјә һазыр олмалыјыг» *.

9. Һәвари Булусун ибраниләрә вердији мәсләһәт сизи нәјә әмин едир?

⁹ Тәсәввүр едирсиниз, һәмин мәсиһиләр үчүн һәр шејләрини гојуб ҝетмәк, јени һәјата башламаг нә гәдәр чәтин иди? Бу мәсиһиләр Јеһованын онларын зәрури еһтијаҹларынын гејдинә галаҹағына етибар етдиләр. Бунун үчүн иман лазым иди. Онлара бу саһәдә бир шеј көмәк етмишди. Бу, һәвари Булусун ибраниләрә вердији бәзи дәјәрли мәсләһәтләр иди. Јерусәлим ромалылар тәрәфиндән мүһасирәјә алынмамышдан беш ил әввәл о јазмышды: «Һәјатынызда пулпәрәстлијә јер вермәјин, нәјиниз варса, она гане олун, чүнки Аллаһ дејиб: “Сәни һеч вахт атмарам, һеч вахт тәрк етмәрәм”. Буна ҝөрә дә биз ҹәсарәтлә дејирик: “Јеһова дајағымдыр, әсла горхмарам. Инсан мәнә нә едә биләр?!”» (Ибр. 13:5, 6). Шүбһәсиз, о кәсләр ки ромалыларын һүҹумундан әввәл Булусун бу мәсләһәтинә әмәл етмишди, онлар јени әразидә садә һәјата даһа асан ујғунлашдылар. Онлар әмин иди ки, Јеһова онларын әсас еһтијаҹларыны тәмин  едәҹәк. Булусун сөзләри биздә дә бу ҹүр әминлик һасил едир.

10. Булусун бизимлә бөлүшдүјү «сирр» нәдир?

¹⁰ Һәвари Булус Тимутијә дә ејни мәсләһәти вермишди вә бу бизә дә аиддир. О јазмышды: «Буна ҝөрә дә јемәјимиз, палтарымыз варса, бунлара гане олаҹағыг» (1 Тим. 6:8). Бу о демәкдирми ки, ҝөзәл евимиз, јахшы јемәјимиз олмамалыдыр вә ја һәрдәнбир тәзә палтар алмамалыјыг? Булусун чатдырмаг истәдији фикир бу дејил. О дејир ки, биз мадди ҹәһәтдән нәјимиз варса, она гане олмалыјыг (Филип. 4:12). Булусун «сирри» бу иди. Бизим ән дәјәрли хәзинәмиз саһиб олдуғумуз һансыса мадди шеј јох, Јеһова илә мүнасибәтимиздир (Һәб. 3:17, 18).

11. Муса пејғәмбәрин исраиллиләрә дедији сөзләрдән гане олмагла бағлы нә өјрәнирик?

¹¹ Бизим тәләбатларымыза олан бахышымызла Јеһованын бахышы фәргләнә биләр. Ҝөрүн исраиллиләр гырх ил сәһрада оландан сонра Муса пејғәмбәр һансы сөзләри јазмышды: «Аллаһыныз Јеһова һәр ишинизи аванд едиб. Бу бөјүк сәһрада атдығыныз һәр аддым Она аҝаһдыр. Бу гырх ил әрзиндә Аллаһыныз Јеһова сизинлә олуб, сиз һеч нәдән корлуг чәкмәмисиниз» (Ган. 2:7). Гырх ил әрзиндә Јеһова исраиллиләрә манна јетирмишди. Онларын палтарлары — Мисирдән чыхаркән әјинләриндә олан палтарлары һеч сүзүлмәмишди (Ган. 8:3, 4). Бәлкә дә, бу, кимәсә азлыг едирди, амма Муса исраиллиләрә хатырлатды ки, онларын еһтијаҹ дујдуглары һәр шејләри вар иди. Әҝәр биз гане  олмағы өјрәнсәк — Јеһованын бизә јетирдији һәтта хырда шејләрә ҝөрә миннәтдар олсаг, бунлара Јеһованын бәрәкәти кими бахсаг вә бунлара ҝөрә шүкүр етсәк, Јеһованын гәлбини шад едәҹәјик.

12. Давудун өзүнә јох, Јеһоваја ҝүвәндијини нә ҝөстәрир?

¹² Давуд билирди ки, Јеһова сәдагәтли Аллаһдыр вә Ону севәнләрлә јахындан марагланыр. Давуд 34-ҹү мәзмуру јазанда онун һәјаты тәһлүкә алтында иди. Амма о, иман ҝөзү илә Јеһованын мәләјинин онун «әтрафында дүшәрҝә» гурдуғуну ҝөрмүшдү (Зәб. 34:7). Јәгин Давуд Јеһованын мәләјини дүшәрҝә гуруб кешиш чәкән әсҝәрә бәнзәтмишди. Бахмајараг ки, Давуд өзү шүҹаәтли дөјүшчү иди вә Јеһова она тах-таҹ вәд етмишди, о өз габилијјәтинә ҝүвәнмирди. Дүшүнмүрдү ки, сапанд атараг, гылынҹ ојнадараг дүшмәни мәғлуб едә биләр (1 Ишм. 16:13; 24:12). О, Јеһоваја бел бағлајырды вә Јеһованын мәләјинин «Ондан горханлары хилас» едәҹәјинә әмин иди. Дүздүр, биз бу ҝүнләри мөҹүзәви шәкилдә мүдафиә олунаҹағымызы ҝөзләмирик. Амма билирик ки, Јеһоваја ҝүвәнәнләрә һеч ким вә һеч нә сағалмаз јара вура билмәз.

13. Мәҹуҹ өлкәсиндән олан Јәҹуҹ һүҹум едән заман нәјә ҝөрә биз мүдафиәсиз ҝөрүнәҹәјик? Бәс һәмин вахт горхмамаг үчүн һансы әсасымыз олаҹаг? (Үз габығындакы шәклә бахын.)

¹³ Јахын ҝәләҹәкдә Јеһованын бизи горумаға гадир олдуғуна иманымыз сынанаҹаг. Мәҹуҹ өлкәсиндән олан Јәҹуҹ, јәни халглар бирлији Аллаһын халгына һүҹум едәндә, бәлкә дә, бизә елә ҝәләҹәк ки, һәјатымыз тәһлүкә алтындадыр. Һәмин вахт Јеһованын бизи горумаға гадир олдуғуна вә буну едәҹәјинә әмин олмалыјыг. Халгларын ҝөзүндә биз мүдафиәсиз ҝөрүнәҹәјик (Һизг. 38:10—12). Бизим нә силаһымыз олаҹаг, нә дә дөјүш тәлими кечмиш олаҹағыг. Онлар бизә раһат лоғма кими бахаҹаглар. Онлар бизим иман ҝөзүмүзлә ҝөрдүјүмүзү — Аллаһын халгынын әтрафында дүшәрҝә салан вә бизи горумаг үчүн һазыр дуран мәләкләр ордусуну ҝөрмәјәҹәкләр. Неҹә ҝөрсүнләр?! Ахы, онларын иман ҝөзләри бағлыдыр. Ҝөрүн инди ҝөјләрин ордусунун бизим мүдафиәмизә ҝәлдијини ҝөрәндә онлар неҹә дәһшәтә дүшәҹәкләр! (Вәһј 19:11, 14, 15).

14. Ҝәләҹәјә һазырлашмаг үчүн индидән һансы аддымлары ата биләрик?

¹⁴ Ҝәләҹәјә һазырлашмаг үчүн индидән нә едә биләрик? Һәр шејдән өнҹә, биз мадди шејләрә таразлы јанашмалыјыг. Баша дүшмәлијик ки, бир ҝүн ҝәләҹәк саһиб олдуғумуз шејләрдән ваз кечмәли олаҹағыг. Һәмчинин гане олмағы баҹармалыјыг вә бизә ән бөјүк севинҹи Јеһова илә мүнасибәтләримиз ҝәтирмәлидир. Аллаһымызы нә гәдәр јахшы танысаг, Мәҹуҹ өлкәсиндән олан Јәҹуҹун һүҹуму заманы Онун бизи горујаҹағына әминлијимиз бир о гәдәр ҝүҹлү олаҹаг.

15. Ҝәнҹ јашында үзләшдији һансы һадисәләр Давуду Јеһованын ону һеч вахт атмајаҹағына әмин етмишди?

¹⁵ Ҝәлин ҝөрәк Давуда башга нә көмәк етмишди вә бу бизә сынаглара һазырлашмаға неҹә көмәк едә биләр. Давуд дејир: «Дадын, ҝөрүн неҹә ҝөзәлдир Јеһова, Она сығынан нә бәхтијардыр!» (Зәб. 34:8). Бу сөзләр Давудун Јеһоваја бел бағламасынын сәбәбини ҝөстәрир. Давудун Јеһоваја ҝүвәндији вахтларда Јеһова ону һеч вахт атмамышды. Ҝәнҹ јашларында Давуд филиштли  Ҹалутла үз-үзә ҝәлмишди вә бу ҹәнҝавәрә белә демишди: «Бу ҝүн Јеһова сәни мәнә тәслим едәҹәк» (1 Ишм. 17:46). Даһа сонра Давуд Талут падшаһын гуллуғунда дуран заман падшаһ дәфәләрлә Давуду өлдүрмәјә ҹәһд етмишди. Анҹаг «Јеһова Давудла иди» (1 Ишм. 18:12). Кечмишдә Јеһованын көмәјини ҝөрдүјү үчүн Давуд билирди ки, индики чәтинликләри заманы да Јеһоваја архалана биләр.

16. Биз Јеһованын неҹә ҝөзәл Аллаһ олдуғуну һансы јолларла «дада» биләрик?

¹⁶ Индидән һәр саһәдә Јеһованын вердији рәһбәрлијә етибар етсәк, ҝәләҹәкдә Онун бизи хилас етмәјә гадир олдуғуна әминлијимиз бир о гәдәр мөһкәм олаҹаг. Бизим үрәјимиздә иман вә истәк олмалыдыр ки, Јеһоваја етибар едиб мүдиримиздән топлантыларда иштирак етмәк үчүн иҹазә алаг, јахуд ондан бүтүн јығынҹаг ҝөрүшләринә гатылмаг вә хидмәтдә даһа чох иштирак етмәк үчүн иш ҹәдвәлимиздә дәјишиклик етмәсини хаһиш едәк. Тутаг ки, мүдиримиз бизим хаһишимизи нәзәрә алмады вә ишимизи итирдик. Белә вәзијјәтдә Јеһованын бизи һеч вахт атмајаҹағына вә зәрури еһтијаҹларымызы тәмин едәҹәјинә иман едәҹәјик? (Ибр. 13:5). Тамвахтлы хидмәтчиләрин бир чоху Јеһованын онларын ән чәтин анларында неҹә дадына чатдығыны өз тәҹрүбәләриндән дејә биләрләр. Јеһова сәдагәтли Аллаһдыр.

17. 2022-ҹи илин ајәси һансыдыр вә нәјә ҝөрә бу ајә јеринә дүшүр?

¹⁷ Јеһова бизимләдир, буна ҝөрә дә ҝәләҹәкдә үзләшәҹәјимиз сынаглар бизи горхутмамалыдыр. Нә гәдәр ки Јеһованын ирадәсини һәјатымызда һәр шејдән үстүн тутуруг, О бизи һеч вахт тәрк етмәјәҹәк. Гаршыдакы сынаглара индидән һазырлашмағын вә Јеһованын бизи һеч вахт атмајаҹағына етибар етмәјин ваҹиблијини хатырлатмаг үчүн Рәһбәрлик Шурасы Зәбур 34:10 ајәсини 2022-ҹи илин ајәси сечиб: «Јеһованы ахтаранлар һеч бир немәтдән корлуг чәкмәз».