1—3. Јеһованын хидмәтчиләринин ҝөз јашларына нәләр сәбәб олур?

 АХЫРЫНҸЫ дәфә нә вахт ағламысыныз? Һәрдән севинҹдән ағлајырыг. Амма адәтән ҝөз јашларымыза сәбәб гәлб ағрысы олур. Мәсәлән, јахынымызы итирдијимиз үчүн ағлајырыг. Бирләшмиш Штатларда јашајан Лорели баҹы дејир: «Гызымын өлүмүнә ҝөрә бәзән чох шиддәтли ағрылар кечирирдим, дүшүнүрдүм, һеч нә мәнә тәсәлли верә билмәз. Елә һисс едирдим ки, үрәјим бу иткијә таб ҝәтирмәјәҹәк» *.

² Ҝөз јашларымыза сәбәб башга шејләр дә ола биләр. Јапонијада өнҹүл кими хидмәт едән Һироми баҹы дејир: «Елә олур ки, хидмәтдә растлашдығым инсанларын лагејдлији мәни руһдан салыр. Бәзән ҝөз јашлары ичиндә јалварырам ки, Јеһова гаршыма һәгигәти ахтаран бир инсан чыхартсын».

³ Бу баҹыларын һиссләри сизә танышдыр? Чохларымызда белә һиссләр олуб (1 Бут. 5:9). Һамымыз истәјирик ки, «Јеһоваја севинҹлә ибадәт» едәк. Амма елә олур ки, кәдәр, мәјуслуг вә ја сәдагәтимизи сынајан чәтин вәзијјәтләр уҹбатындан Аллаһа ҝөз јашлары ичиндә ибадәт етмәли олуруг (Зәб. 6:6; 100:2). Бу кими һиссләрин өһдәсиндән неҹә ҝәлә биләрик?

4. Бу мәгаләдә нәләри нәзәрдән кечирәҹәјик?

⁴ Бу саһәдә Исадан чох шеј өјрәнә биләрик. Бәзән о, елә ҝүҹлү гәлб ағрысы кечирирди ки, ҝөз јашларыны сахлаја билмәјиб ағлајырды (Јәһ. 11:35; Лука 19:41; 22:44; Ибр. 5:7). Ҝәлин һәмин һадисәләри бир-бир арашдыраг вә ҝөрәк өзүмүз үчүн һансы нәтиҹәни чыхара биләрик. Һәмчинин бизи ҝөз јашларына  боған проблемләрлә неҹә мүбаризә апара биләҹәјимизи нәзәрдән кечирәҹәјик.

5. Јәһја 11:32—36 ајәләриндә јазыланлардан Иса һаггында нә өјрәнирик?

⁵ Ерамызын 32-ҹи илинин гышында Исанын јахын досту Илазәр хәстәләниб өлдү (Јәһ. 11:3, 14). Онун Мәрјәм вә Марта адлы ики баҹысы вар иди вә Иса бу аиләни чох севирди. Баҹылар гардашларынын өлүмүнә ҝөрә пәришан иди. Илазәр өләндән сонра Иса Мәрјәм вә Мартанын јашадығы Бејтанијјә кәндинә ҝәлди. Марта Исанын ҝәлдијини ешидәндә онун габағына гачыб деди: «Аға, сән бурада олсајдын, гардашым өлмәзди» (Јәһ. 11:21). Тәсәввүр етмәк олар, Марта бу сөзләри дејәндә неҹә пәришан һалда иди! Сонра Иса Мәрјәм вә башгаларынын ағладығыны ҝөрәндә о да ағлады. (Јәһја 11:32—36 ајәләрини охујун.)

6. Нәјә ҝөрә Иса ағламышды?

⁶ Иса нәјә ҝөрә ағламышды? «Мүгәддәс Јазыларын дәрк едилмәси» енсиклопедијасында дејилир: «Досту Илазәрин өлүмү вә баҹыларын пәришан вәзијјәтдә олмасы Исанын гәһәрләнмәсинә вә ағламасына сәбәб олду» *. Јәгин, Иса Илазәрин хәстәлији заманы ағры чәкдијини вә һәјатынын сон анларыны јашадығыны билдији үчүн кечирдији һиссләри тәсәввүр едиб, пис олмушду. Тәбии ки, Иса һәм дә Мәрјәмлә Мартанын һалыны ҝөрүб ағламышды. Әҝәр јахын достунузу вә ја аилә үзвүнүзү итирмисинизсә, шүбһәсиз ки, сиз дә бу кими һиссләр кечирмисиниз. Ҝәлин ҝөрәк бу һадисәдән һансы үч дәрси өјрәнә биләрсиниз.

7. Исанын достларына ҝөрә ағламасындан Јеһова һаггында нә өјрәнирик?

⁷ Јеһова һиссләринизи баша дүшүр. Иса Атасынын «дәгиг әксидир» (Ибр. 1:3). Онун ағламасы Јеһованын һансы һиссләр кечирдијини ҝөстәрирди (Јәһ. 14:9). Әҝәр јахын  адамыныз вәфат едибсә, әмин ола биләрсиниз ки, Јеһова нәинки һансы һиссләр кечирдијинизи ҝөрүр, һәм дә дәрдинизә шәрикдир. О сизин гәлбинизә шәфа вермәк истәјир (Зәб. 34:18; 147:3).

8. Нәјә ҝөрә Исанын јахынларымызы дирилдәҹәјинә әмин ола биләрик?

⁸ Иса өлән әзизләримизи дирилтмәк арзусундадыр. Иса ағламаздан бир аз әввәл Мартаны әмин етди ки, гардашы дириләҹәк. О, Исаја инанырды (Јәһ. 11:23—27). Марта Јеһованын садиг хидмәтчиси иди, буна ҝөрә дә әсрләр өнҹә Илјасла Әлјәсә пејғәмбәрин дә өлүләри дирилтдијини билирди (1 Пад. 17:17—24; 2 Пад. 4:32—37). Һәмчинин Исанын өлүләри дирилтдији һагда ешитмишди (Лука 7:11—15; 8:41, 42, 49—56). Сиз дә әмин ола биләрсиниз ки, өлән әзизләринизи јенидән ҝөрәҹәксиниз. Исанын кәдәрли достларына тәсәлли верәркән ағламасы сүбут едир ки, о, өлән әзизләримизи дирилтмәк арзусундадыр!

9. Кәдәрли оланлара, Иса кими, неҹә тәсәлли верә биләрик? Нүмунә чәкин.

⁹ Сиз гәм-гүссә ичиндә оланлара дајаг ола биләрсиниз. Иса Марта вә Мәрјәмлә бирликдә ағламагла јанашы, онлары динләјиб сакитләшдирмишди. Биз дә белә едә биләрик. Австралијада јашајан Дан адлы ағсаггал дејир: «Һәјат јолдашым вәфат едәндә дәстәјә еһтијаҹым вар иди. Бир нечә әр-арвад ҝүнүн истәнилән сааты мәни динләмәјә һазыр идиләр. Онларын јанында раһат ағлајыб, үрәјими бошалда билирдим, өзләрини нараһат һисс етмирдиләр. Мән бәзи ишләри ҝөрәҹәк вәзијјәтдә олмајанда онлар мәнә көмәк едирдиләр, мәсәлән, алыш-вериш едирдиләр, јемәк биширирдиләр, машынымы јујурдулар. Һәмчинин тез-тез мәнимлә бир јердә дуа едирдиләр. Онлар “дар ҝүн үчүн доғулмуш” әсл дост вә гардаш идиләр» (Мәс. 17:17).

10. Лука 19:36—40 ајәләриндә гејд олунан һадисәни тәсвир един.

¹⁰ Иса ерамызын 33-ҹү или нисанын 9-у Јерусәлимә ҝәлди. Шәһәрә јахынлашанда Исаны бөјүк бир издиһам гаршылады, ҹамаат ону падшаһ кими гәбул едиб, үст палтарларыны јерә сәрди. Бу, чох севиндириҹи бир һадисә иди. (Лука 19:36—40 ајәләрини охујун.) Буна ҝөрә дә шаҝирдләр, јәгин, бундан сонра ҝөрдүкләри сәһнәјә тәәҹҹүбләндиләр. «Иса шәһәрә јахынлашанда она бахыб ағлады». О, ҝөз јашлары ичиндә Јерусәлим сакинләринин башына бәла ҝәләҹәјини пејғәмбәрлик етди (Лука 19:41—44).

11. Иса нәјә ҝөрә Јерусәлим сакинләри үчүн ағлады?

¹¹ Исанын бу гәдәр кәдәрләнмәсинә сәбәб нә иди? Ону меһрибан гаршыласалар да, артыг бәлли иди ки, јәһудиләрин әксәријјәти Падшаһлыг һагда хәбәри гәбул етмәјәҹәк. Нәтиҹәдә, Јерусәлим дағыдылаҹаг, сағ галан јәһудиләр дә әсир апарылаҹаг (Лука 21:20—24). Тәәссүф ки, елә дә олду; Исанын дедији кими, инсанларын чоху ону рәдд етдиләр. Бәс сизин әразиниздәки инсанлар Падшаһлыг һагда хәбәрә неҹә јанашыр? Һәгигәти өјрәтмәк үчүн ҝөстәрдијиниз ҹәһдләрин гаршылығында аз адам һај верирсә, Исанын ағламасындан нә өјрәнә биләрсиниз? Ҝәлин үч мәгама бахаг.

12. Исанын инсанлардан өтрү ағламасындан Јеһова һаггында нә өјрәнирик?

¹² Инсанлар Јеһова үчүн чох дәјәрлидир. Исанын ағламасы Јеһованын инсанлара нә  гәдәр өнәм вердијини ҝөстәрир. О, «һеч кәсин мәһв олмасыны истәмир, әксинә, истәјир ки, һамы төвбәјә ҝәлсин» (2 Бут. 3:9). Биз инсанларын хош хәбәри өјрәнмәси үчүн бундан сонра да әлимиздән ҝәләни етмәклә онлары севдијимизи ҝөстәририк (Мәт. 22:39).

13, 14. Иса инсанларын һалына аҹыдығыны неҹә ҝөстәрмишди вә биз өзүмүздә бу хүсусијјәти неҹә јетишдирә биләрик?

¹³ Иса хидмәтә ҹан гојурду. О, инсанлара һәр фүрсәтдә тәблиғ едирди (Лука 19:47, 48). Ону буна нә тәшвиг едирди? Иса инсанларын һалына аҹыјырды. Бәзән о гәдәр адам Исанын сөзләрини ешитмәк истәјирди ки, о вә шаҝирдләри чөрәк јемәјә имкан тапмырдылар (Марк 3:20). Һәмчинин Иса онунла ҝеҹә сөһбәт етмәк истәјән бир нәфәрә вахт ајырмышды (Јәһ. 3:1, 2). Исаны динләјәнләрин әксәријјәти онун шаҝирди олмады. Амма һамысы әтрафлы шаһидлик алдылар. Биз дә истәјирик ки, һәр кәсә хош хәбәри ешитмәк имканы јарадаг (Һәв. 10:42). Буну етмәк үчүн исә хидмәтә мүнасибәтимизи дәјишмәлијик.

¹⁴ Лазыми дәјишикликләр един. Һәмишә ејни вахтда тәблиғ етсәк, мараг ҝөстәрәҹәк инсанлара раст ҝәлмәјә биләрик. Матилда адлы бир өнҹүл баҹы дејир: «Јолдашымла чалышырыг ки, мүхтәлиф вахтларда хидмәт едәк. Сәһәр тездән ишҝүзар әразидә тәблиғ едирик. Ҝүнорта саатларында чохлары чөлдә олдуғу үчүн әдәбијјат арабаларындан истифадә едирик. Ахшамүстү исә ев-ев хидмәт едирик». Биз өзүмүзә раһат олан вахтда јох, инсанлара даһа чох раст ҝәләҹәјимиз вахтда тәблиғ етмәк үчүн ҹәдвәлимиздә дәјишиклик етмәлијик. Белә етсәк, әмин ола биләрик ки, Јеһова биздән разы галаҹаг.

15. Лука 22:39—44 ајәләриндә јазылдығы кими, Исанын һәјатынын сон ҝеҹәсиндә нә баш вермишди?

¹⁵ Ерамызын 33-ҹү или нисанын 14-ү Иса ҝеҹә Ҝетсемани бағына ҝетди. Орада дуа едиб үрәјини Јеһоваја бошалтды. (Лука 22:39—44 ајәләрини охујун.) Мәһз һәјатынын бу ағыр дөнәминдә о, «Аллаһа  фәрјад етмиш, ҝөз јашлары илә јалвармыш»ды (Ибр. 5:7). Бәс о, һәмин вахты Аллаһа нә барәдә дуа етмишди? Јеһоваја садиг галмаг вә Онун ирадәсини јеринә јетирмәк үчүн ҝүҹ истәмишди. Јеһова Оғлунун јалварышларыны ешитди вә ону мөһкәмләндирмәк үчүн бир мәләк ҝөндәрди.

16. Иса Ҝетсемани бағында дуа едәркән нијә ағламышды?

¹⁶ Иса Аллаһын адына күфр едән бир инсан кими танынаҹағына ҝөрә о гәдәр нараһат иди ки, шүбһәсиз, Ҝетсемани бағында дуа едәндә мәһз буна ҝөрә ағламышды. Һәмчинин онун үзәриндә Атасынын адыны тәмизә чыхармаг кими бөјүк мәсулијјәт вар иди. Сиз дә Јеһоваја садиглијинизи сынајан чәтин вәзијјәтләрлә үзләширсинизсә, Исанын ҝөз јашларындан чох шеј өјрәнә биләрсиниз. Ҝәлин онлардан үчүнү нәзәрдән кечирәк.

17. Исанын сәмими дуаларына вердији ҹавабдан Јеһова һаггында нә өјрәнирик?

¹⁷ Јеһова јалварышларымызы динләјир. Јеһова Исанын үрәкдән етдији хаһиши ҹавабсыз гојмады. Нәјә ҝөрә? Чүнки Исанын әсас мәгсәди Атасына садиг галмаг вә Онун адына бәраәт газандырмаг иди. Әҝәр бизим дә әсас мәгсәдимиз Јеһоваја садиг галмаг вә Онун адына бәраәт газандырмагдырса, О, дуамыза ҹаваб олараг бизә көмәк едәҹәк (Зәб. 145:18, 19).

18. Нәјә ҝөрә демәк олар ки, Иса дәрдимизә шәрик олан достдур?

¹⁸ Иса дәрдимизә шәрикдир. Кәдәрли анларымызда бизи баша дүшән, хүсусилә дә бизимлә охшар вәзијјәтлә үзләшән достумузун олмасы бөјүк хошбәхтликдир. Иса мәһз белә достдур. О, зәиф, јардыма мөһтаҹ олмағын нә демәк олдуғуну јахшы билир. Иса зәифликләримизи анлајыр вә чалышыр ки, «дара дүшәндә» биз көмәксиз галмајаг (Ибр. 4:15, 16). Иса Ҝетсемани бағында мәләјин көмәјини гәбул етдији кими, биз дә Јеһованын көмәјини гәбул етмәлијик. О бизә көмәји нәшрләр, видеолар, нитгләр, ағсаггалларын вә јеткин баҹы-гардашларын руһландырыҹы зијарәти васитәсилә едир.

19. Кәдәрли анларымызда сәдагәтимизи горумаг үчүн һарадан ҝүҹ ала биләрик? Нүмунә чәкин.

 ¹⁹ Јеһова сизә сүлһүнү верәҹәк. Јеһова бизи неҹә ҝүҹләндирир? Биз дуа едәндә О бизә «һәр бир ағылдан үстүн олан сүлһү»нү верир (Филип. 4:6, 7). Бу сүлһ бизим гәлбимизи овундурур вә ајдын дүшүнмәјимизә көмәк едир. Лүс адлы баҹы буну өз үзәриндән һисс етмишди. О дејир: «Мән тәнһалыг һисси илә мүбаризә апарырам. Бәзән бу һиссләр о гәдәр шиддәтли олур ки, Јеһованын мәни севмәдијини дүшүнүрәм. Амма бу заман дәрһал Јеһоваја дуа едирәм. Кечирдијим һиссләри Она дејирәм. Дуамын сајәсиндә бејнимдән бу ҹүр фикирләри гова билирәм». Баҹынын нүмунәсиндән ҝөрдүјүмүз кими, дуа бизә гәлб раһатлығы тапмаға көмәк едир.

20. Иса Мәсиһин ағламасындан нәләр өјрәндик?

²⁰ Ҝөрүн Исанын ағламасындан бизә тәсәлли верән, өјүд верән нә гәдәр шеј өјрәнмәк олар! Бизим үчүн јаддашлыг олду ки, јаслы диндашларымыза дәстәк олмалыјыг. Бир даһа әмин олдуг ки, әзизимизи итирмишиксә, Јеһова вә Иса бизә дајаг олаҹаг. Өјрәндик ки, тәблиғ етдијимиз инсанлара шәфгәтлә јанашмалыјыг, чүнки Јеһова Аллаһ вә Иса Мәсиһ бу нәҹиб кејфијјәти тәзаһүр етдирир. Һәмчинин тәсәлли тапдыг ки, Јеһова вә әзиз Оғлу бизим һиссләримизи баша дүшүр, зәифликләримизи анлајыр вә дәрдимизә дөзмәјә көмәк етмәјә һазырдыр. Ҝәлин Јеһованын ҝөзләримиздән бүтүн јашлары силәҹәји вахта гәдәр өјрәндикләримизә әмәл етмәкдән ваз кечмәјәк! (Вәһј 21:4).